Tia‘i i te tamarii puhura

I To’na taviniraa i te tahuti nei, ua haapii te Faaora Iesu Mesia no ni‘a i To’na mana faaora i te mauiui e te taata nei. I te hoê taime i roto i te Luka pene 15 o te Faufaa Apî, te faahapahia ra Oia no To’na tamaaraa e To’na parahiraa e te feia hara (hi‘o Luka 15:2). Ua faaohipa te Faaora i teie faahapahaparaa ei rave‘a no te haapii ia tatou paatoa nahea i te pahono atu i te feia tei mo‘e to ratou e‘a.

E ua pahono ihora i teie mau faahapahaparaa Ia’na na roto e piti uiraa faufaa rahi :

« O vai ïa taata i ô outou nei, hoê hanere a’na mamoe, ia mo‘e ra te hoê, e ore e vaiiho i te iva ahuru e iva tiahapa i te medebara ra, a haere a imi ai i tei mo‘e ra, e ia itea’tu ? (Luka 15:4).

« E o vai ho‘i ïa vahine, hoê ahuru a’na diderama, ia mo‘e ra te hoê, e ore e titi‘a i te lamepa, a purumu ai i te fare, a ma‘imi maite ai e ia itea’tu ia’na ? » (Luka 15:8).

Ei reira ua haapii te Faaora i te parabole no te tamaiti puhura. E ere teie parabole no ni‘a i na mamoe 100 e aore râ na diderama 10, no ni‘a râ i te hoê tamaiti iti tei mo‘e. Na roto i teie parabole, e aha ta te Faaora e haapii mai nei no ni‘a i te rave‘a pahonoraa ia mo‘e atu i te tahi melo utuafare to’na e‘a ?

Teie te tamaiti puhura e faaara ra i to’na metua tane e, te hinaaro ra oia i ta’na faufaa i teie nei. Te hinaaro ra oia ia faaru‘e i te hau o to’na fare e utuafare no te imi haere i te mau mea o te ao (hi‘o Luka 15:12–13). E hi‘o maitai tatou e, i roto i te parabole a te Faaora, ua pahono atu te metua tane ma te here na roto i te horo‘araa i ta’na tamaiti i ta’na tufaa aiʻa. Papû roa paha e, ua tamata te metua tane i te mau rave‘a atoa, ia taui mai te tamaiti i to’na mana‘o e ia faaea mai. Atira noa’tu, i te raveraa teie tamaiti taata paari i ta’na faaotiraa, ua vaiiho teie metua tane paari ia’na ia haere. Ei reira, ua faa‘ite mai te metua tane i to’na here mau, e ua hi‘o noa e ua tia‘i noa a‘era (hi‘o Luka 15:20).

Ua tupu atoa teie ohipa i roto i to’u utuafare. Ua atuatu to matou na metua hi‘oraa maitai ia matou, o vau, to’u na taea‘e haapa‘o maitai e piti e to’u tuahine maitai. Ua haapiihia matou te evanelia i te fare, e ua paari mai matou ei taata maitai, e pauroa matou e maha tei taatihia i te hiero e to matou hoa here. Tera râ, i te matahiti 1994, ua hi‘o ê rii mai to matou tuahine, o Susan, i te Ekalesia e i te tahi atoa mau haapiiraa i reira. Ua vare oia i te parau o te feia tei faaoo e tei faahapa i te feia faatere matamua o te Ekalesia. Ua faati‘a oia i to’na faaroo i roto i te mau peropheta e te mau aposetolo ia tapetepete. E ua upooti‘a ihora to’na mau feaaraa i ni‘a i to’na faaroo, e ua ma‘iti a‘era e faaru‘e i te Ekalesia. Ua horo‘a mai Susan i ta’na parau faati‘a no te faati‘a i to’na aamu ma te mana‘o e, e tauturu te reira i te tahi atu mau pu‘eraa.

Ua oti roa matou to’u na taea‘e e to matou metua vahine ivi. Aita matou i taa te tumu tei arata‘i ia’na i te haapaeraa i to’na faaroo. E mai te huru ra e, ua mauiui roa te mafatu o to matou metua vahine i teie ma‘itiraa a to’u tuahine.

Ua tavini matou to’u na taea‘e ei episekopo e ei peresideni pupu autahu‘araa, e ua ite matou i te oaoa no te manuiaraa i roto i te paroisa e te pupu autahu‘araa a vaiiho ai matou i na iva ahuru ma iva no te haere e tii i te hoê. Are‘a râ, no to matou tuahine, rahi noa’tu to matou tautooraa i te faaoraraa ia’na e i te aniraa ia’na ia ho‘i mai, rahi noa’toa’tu to’na faaatearaa ia’na e atea roa’tu.

A imi noa ai matou i te arata‘iraa o te ra‘i no te ite mai e nahea i te pahono tano i to’na mau hinaaro, ua tae mai te pahonoraa papû e, ia peehia te hi‘oraa o te metua tane i roto i te parabole no te tamaiti puhura. Ua rave o Susan i ta’na faaotiraa, e mai te huru ra e ti‘a ia matou ia vaiiho ia’na—eiaha râ oia ia ore e ite mai, i mua ia’na e i to’na aau, to matou here papû ia’na. E no reira, ma te faa‘ite faahou â ia’na i to matou here e maitai, ua hi‘o matou e ua tia‘i ho‘i.

Aita to’u metua vahine i faaea i te here e i te atuatu ia Susan. Te taime atoa e haere oia i te hiero, e tuu to’u metua vahine i te i‘oa o Susan i ni‘a i te tapura no te pure, e ma te ti‘aturi noa. O to’u tuaane e ta’na vahine tei fatata a‘e ia Susan i California, e ia tupu te mau faaoaoaraa utuafare, e ani ratou ia’na ia haere mai. E faaineine ratou i te hoê tamaaraa i to ratou fare i te mau matahiti atoa, i te mahana fanauraa o Susan. E hi‘o maitai ratou e, te vai ra te farereiraa e ana, ia ite mai Susan i to ratou here mau ia’na.

I Utah, e tauturu to’u teina e ta’na vahine i te mau tamarii a Susan, no te atuatu ia ratou e no te here ia ratou. E hi‘o maitai ratou e, ia tae noa te aniraa i ta’na mau tamarii ia haere mai i te mau putuputuraa utuafare, e ia tae te mahana bapetizoraa no te mootua tamahine o Susan, ua ti‘a’tu to’u taea‘e no te rave i te oro‘a. E mau haapii utuafare here atoa to Susan e te tuahine hahaere, e aita roa’tu ratou i faaru‘e.

E ia haere to matou mau tamarii i te misioni e ia faaipoipohia, e ani matou ia Susan ia haere mai, e ua tae mai oia i teie mau oro‘a utuafare. Ua tamata noa matou i te faatupu i te mau ohipa no te utuafare ia ti‘a ia Susan e ta’na mau tamarii ia amui mai ia matou, ia ite mai ratou e, ua here matou ia ratou e e mau melo ratou no to matou utuafare. I te faariiraa Susan i ta’na parau tu‘ite teitei i te hoê fare haapiiraa tuatoru i California, ua tae atoa’tu matou no te turu ia’na. E noa’tu pai eita ta matou e nehenehe e farii i ta’na mau ma‘itiraa atoa, ua nehenehe noa râ ta matou e farii ia’na. I here, i hi‘o e i tia‘i noa na matou.

I te matahiti 2006 ra, ua 12 atura matahiti to Susan faaru‘eraa i te Ekalesia, ua haere ta maua tamahine Kathy e ta’na tane e ora i California, no te haere i te fare haapiiraa ture. Hoê â oire to ratou Susan. Ua fariu teie na taata faaipoipo apî i ni‘a i to ratou tati Susan no te tauturu, e ua here roa ia’na. Ua tauturu mai Susan i te haapa‘oraa i to maua mootua tamahine piti matahiti, o Lucy, e na Susan i tauturu ia Lucy e ta’na mau pure i te pô. Ua taniuniu mai Katy ia’u i te hoê mahana ma te ani mai, te mana‘o ra anei vau e ho‘i mai Susan i roto i te Ekalesia. Ua haapapû atu vau ia’na e, o tera ihoa to’u mana‘o e e titauhia ia matou ia tamau noa i te faaoromai. E ua ma‘iri a‘era e toru matahiti, a ma te here, ua hi‘o e ua tia‘i matou.

A ono matahiti i ma‘iri, te parahi ra maua ta’u vahine Marcia i ni‘a i te mau parahiraa matamua i roto i te pu amuiraa. I tera mahana, e paturuhia vau ei tino apî no te mau hui mana faatere rahi. Ua papa‘i mai Marcia i te hoê nota ia’u, o o’na te taata piri noa i te Varua, te na ô ra te nota : « I to’u mana‘o, teie te taime no Susan ia ho‘i mai ». E ua tuu ihora ta’u tamahine o Katy i te mana‘o e, e haere vau i rapae no te taniuniu ia Susan no te ani ia’na ia mata‘ita‘i i te amuira rahi i tera mahana.

E no te faaûruraa o teie nau vahine rahi, ua haere a‘era vau i roto i tera vahi tomoraa no te taniuniu i to’u tuahine. Te matini tei pahono mai, e ua vaiiho vau i te poro‘i ia mata‘ita‘i oia i tera tuhaa pureraa o te amuiraa rahi. Ua faaroo oia i teie poro‘i. Te vahi au no matou, ua ‘umehia to’na mana‘o ia mata‘ita‘i i te mau tuhaa pureraa atoa o te amuiraa. Ua faaroo oia i te mau peropheta e te mau aposetolo o ta’na i here na mua a‘e. Ua faaroo oia i te tahi mau i‘oa apî aita i te matamua ra, mai te peresideni Uchtdorf e te mau aposetolo Bednar, Cook, Christofferson e Andersen. I tera taime e i te tahi atoa mau taime taa ê tei tuuhia mai e te ra‘i ra—mai te tamaiti puhara ra—ua iho faahou to’u tuahine i to’na iho huru mau (hi‘o Luka 15:17). Ua haaputapu te mau parau a te mau peropheta e aposetolo e na reira atoa te here o to’na utuafare ia’na, e ua taui to’na tere e ua haamata oia i te ho‘i mai i te fare. I te ma‘iriraa 15 matahiti, ua itehia mai to matou tuahine e tamahine tei mo‘e na. Ua hope a‘eraa te hi‘oraa e te tia‘iraa no matou.

Ua faahiti Susan i teie ohipa i tupu mai ta Lehi i parau i roto i te Buka a Moromona. Ua faaru‘e oia i te auri e ua haere atura na roto i te mahu poiri (hi‘o 1 Nephi 8:23). Ua parau oia e, aita oia i ite a‘e ua mo‘e oia e tae noa’tu i te taime ua ara faahou mai to’na faaroo na roto i te Maramarama o te Mesia, ma te faaanaana maitai i te taa-ê-raa o te ohipa ta’na e ite ra i roto i te ao e te mea ta te Fatu e ta to’na utuafare e pûpû mai nei.

Ua tupu te semeio i roto i na matahiti e ono i ma‘iri. Ua farii faahou Susan i te hoê iteraa papû no te Buka a Moromona. Ua farii oia i te hoê parau faatiʻa no te hiero. Ua tavini oia ei rave ohipa no te mau oro‘a i roto i te hiero, e te haapii ra oia i te piha haapiiraa tumu o te evanelia i ta’na paroisa. Ua matara te uputa o te ra‘i i ta’na mau tamarii e mootua, e noa’tu â te mau faahopearaa huru fifi, mai te huru ra e, aita oia i faaru‘e a‘enei.

Vetahi o outou, mai te utuafare Nielson, e mau melo utuafare tei mo‘e to ratou e‘a no te tahi taime. Te arata‘iraa a te Faaora i te feia atoa e 100 mamoe ta ratou, o te vaiihoraa ïa i na iva ahuru ma iva no te haere e imi e e faaora i te hoê. Te arata‘iraa i te feia e 10 diderama moni ta ratou e ua mo‘e hoê, o te imiraa ïa i te reira ia itehia mai. Ia riro râ tei mo‘e ei tamaiti e ei tamahine na outou, ei taea‘e e ei tuahine no outou tei ma‘iti ho‘i ia reva’tu, ua haapii mai matou i roto i to matou utuafare e, a hope noa’tu tei roaa ia tatou ia rave, ia here atu tatou i tera taata ma to tatou aau atoa e ia hi‘o, e ia pure e ia tia‘i ho‘i tatou i te rima o te Fatu ia faa‘itehia mai.

Peneia‘e te haapiiraa rahi roa a‘e ta te Fatu i haapii mai ia’u na roto i teie ohipa, o te mea ïa i tupu i roto i ta matou tuatapaparaa tamahana o te papaʻiraa moʻa, i muri iho to to’u tuahine faaru‘eraa i te Ekalesia. Te tai‘o ra ta maua tamaiti David, e te tuatapapa ra matou i te Luka 15. A tai‘o ai oia i te parabole no te tamaiti puhura, ua taa ê rii te mea ta’u i apo mai i tera mahana, o ta to’u tari‘a i ore i faaroo a‘enei na mua’tu. I mâtau noa na vau i te faaau ia’u i te tamaiti tei faaea i te fare. A tai‘o mai ai David i tera po‘ipo‘i, ua puta mai te mana‘o e, e nehenehe atoa e parau e, o vau te tamaiti puhura, ia au i te tahi hi‘oraa. Ua ere tatou paatoa i te haamaitai a te Atua ra (hi‘o Roma 3:23). Ua hinaaro tatou paatoa i te Taraehara o te Faaora no te faaora i to tatou mauiui. Ua mo‘e tatou paatoa, e ua titauhia ia itehia mai. Ua tauturu mai te reira heheuraa i tera mahana ia ite e, maua toopiti, to’u tuahine e o vau iho nei, tei hinaaro i te here o te Faaora e i Ta’na Taraehara. Maua Susan ho‘i tei ni‘a i tera e‘a ho‘iraa i te fare.

E mau parau puai ta te Faaora i faaohipa i roto i te parabole no te faa‘ite i to te metua tane fariiraa i ta’na tamaiti puhura, e te ti‘aturi nei au e, e faa‘iteraa te reira no te ohipa e tupu no outou e no’u iho nei e te Metua ia ho‘i atu tatou i to tatou fare i te ra‘i. Te haapii nei te reira ia tatou no ni‘a i te hoê metua tane tei here e tei tia‘i e tei hi‘o. Teie te mau parau a te Faaora : « E tei te atea ê â oia, ite maira ta’na metua ia’na, aroha maira, horo maira, tauvahi maira i ni‘a i ta’na a‘i, ho‘iho‘i maira ia’na » (Luka 15:20).

Ia ti‘a ia outou e ia’u atoa nei ia farii i te heheuraa no te ite nahea i te rave maitai i te feia ati a‘e ia tatou o tei mo‘e, e mai te peu e titauhia, ia roaa atoa mai te faaoromai e te here o to tatou Metua i te Raʻi e o Ta’na Tamaiti Iesu Mesia, a here, a hi‘o e a tia‘i ai tatou i te tamarii puhura. Na roto i te i‘oa o Iesu Mesia ra, amene.