2010–2019
Jenaaj Wanlōn̄ļo̧k Ippān Doon
Eprōļ 2015


Jenaaj Wanlōn̄ļo̧k Ippān Doon

Āinwōt kōrā ro im em̧m̧aan ro rej kōjparok bujen ko, jej aikuj in kotak doon im jipan̄ doon erom armej ro Irooj enaaj kar kōņaan bwe ren erom.

Ilo kakkobaba n̄an kōnono ko, al, im jar ko aolep iien rej un̄ūr būruwōd ilo iien kweilo̧k eo eļap, ikar ron̄ jān elōn̄ kōrā ro jeid im jatid bwe ta eo em̧m̧an ippāer eļaptata ej aer alooje an Būreejtōnji eo Kein Kajuon im Doulul eo an Jon̄oulruo Rijilōk ro ilo aer diwōjļo̧k jān podium eo ippān kōmpānion ro aer n̄an indeeo. Im jej ke m̧ōņōņō in ron̄jake an Em̧m̧aan rein Rejitōn Bōro kwaļo̧k aer iakwe n̄an er?

Pija
President Boyd K. Packer and his wife, Donna, at the Brigham City Utah Temple cornerstone ceremony, 23 September 2012.

Kōnono kōn kōrā eo pāleen, Donna, Būreejtōn Boyd K. Packer ekar ba, “Kōnke opiij in ij kabwijere, ewōr ippa eddo n̄an kwaļo̧k m̧ool: E elukkuun wāppen.”1

Pija
President Dieter F. Uchtdorf and his wife.

“E ej meram eo an mour e aō,”2Būreejtōn Dieter  F. Uchtdorf ekar ba kōn kōrā eo pāleen, Harriet.

Pija
President Henry B. Eyring and Sister Eyring at their wedding.

Būreejtōn Henry B. Eyring, ej kōnono kōn kōrā eo pāleen, Kathleen, ekar ba, “E [ej] juon armej eo ekōm̧m̧an aō kōņaan bwe in em̧m̧an jon̄an wōt aō maron̄.”3

Pija
LDS Church President Thomas S. Monson gives his wife, Frances, a kiss at their 60th anniversary celebration, 10/6/2008, at the Lion House. The two met in 1944 and were married in the Salt Lake Temple on Oct. 7, 1948.

Im Būreejtōn Thomas S. Monson, kōnono kōn eo ejitōn bōro ippān Frances, ekar ba: “Eaar aō riakwe n̄an mour eo aō, im m̧ōttā eo ilōke, im jera epaake eō. Ij ba bwe ij oon̄ kōn e ejjab jinoin n̄an kwaļo̧k m̧wilaļ in en̄jake eo aō.”4

Ibarāinwōt kōņaan in kwaļo̧k aō iakwe n̄an kōmpānion eo aō ejitōn bōro, Craig. Ej juon menin letok n̄an n̄a! Ij kōnono n̄an ļeo pāleeō, juon naan kaorōke im kwojarjar ilo kallim̧ur in kōjeram̧m̧an an petriak eo aō bwe aō mour im ajri ro nejū “naaj pād ilo an kōjparok.” Ealikkar n̄an n̄a bwe Craig ej kakūrm̧ool kallim̧ur in. Kōjerbale jān naan ko an Mark Twain, ij ba bwe “mour n̄e ejab [Craig] eban erom juon mour.”5Ij iakwe e, būruwōn im an jetōb!

Jerbal ko Rekwojarjar im Eddo ko

Rainin, ikōņaan kautiej ļōm̧aro pālele, baba ro, em̧m̧aan ro jeid im jatid,im ļaddik ro nejid, im ro ullepād ro rejeļā wōn er im ro rej kōm̧m̧ane jon̄an wōt aer maron̄ kakūrm̧ool jerbal ko Anij kar lilo̧k n̄an er āinwōt an kōmeļeļe ilo kean̄ eo an baam̧le, ekitbuuj aer tōl ilo jim̧we im kakke n̄an im kōjparok baam̧le ko aer. Jouj jeļā bwe eļap aō ļōmņak kōn unin kōnono ko kōn eddo ko an juon jemān, juon jinen, im m̧are an jorrāān n̄an elōn̄ armej. Ijeļā bwe jet membōr in Kabun̄ in rej en̄jake bwe m̧ōko m̧weer eban tōpar ta eo rej ļōm̧ņake enaaj em̧m̧an. Elōn̄ rej metak jān wōt kōmetak, kōwaane, im an̄ūrlep, im imminene ko rebōd im m̧anit. Ijjab jojom̧ari m̧akūtkūt ko an em̧m̧aan ro ak kōrā ro raar ļōmņak wōt ak jaje ke rekar kōmetak, ken̄taan, im kōm̧m̧an būromōj ilo m̧ōko m̧weer. Ak rainin ikōņaan kōnono kōn bar juon men.

Ij jeļā bwe ļeo pālele eban lukkuun wōrtokjen im̧aan mejān kōrā eo pāleen eļan̄n̄e ejjab jerbali jerbal ko Anij ekar liļo̧k āinwōt juon rikabwijer priesthood ewānōk—eaorōktata ilo m̧weo. Ij iakwe im tōmak naan kein jān Būreejtōn Packer n̄an ļeo pālele im baba ro rewānōk: “Ewōr ippāmi kajoor eo an priesthood kaju waj jen Irooj n̄an kōjparok m̧weo m̧ōm. Enaaj lōn̄ iien ko eļan̄n̄e men kein renaaj āinwōt kein kattōrak ikōtaan baam̧le eo am im m̧wil eo an rikapo eo ekajoor.”6

Ritōl ro ilo Jetōb im Rūkaki ro ilo M̧weo

Jinoin iiō in, ikar pād ilo juon kallōb an juon em̧m̧aan ejej uwaan—Don ej ullepān ļeo pāleeō. Juon iaan ļaddik ro nejin Ullepa Don ekar kwaļo̧k juon en̄jake ke ekar juon ļaddik jidikdik, ālkin an jinen im jemān wiaki m̧weo m̧weer. Kōnke ekar ļalem wōt ajri ro n̄an naajdik im kanuknuk er, ekar jabwe jāān n̄an orore yard eo. Juon iaan jerbal ko eļap an kōjparoke āinwōt juon rikōjparok baam̧le eo an, Ullepa Don ekar kajutak jet dumej ioon bwidej eo, bōk jet to, im eo̧ti to ko ippān dumej ko im kar kōmeļeļeik ajri ro bwe n̄e renaaj pād wōt ilowaan oror eo ej kōm̧m̧ane, reban jorrāān.

Juon raan kōrā ro rej rūkaki in loļo̧k ro aer rekar lale ilo an jab tōmak ke ej epaakeļo̧k m̧weo im kar loe ļalem ajri ro reddik rej jutak idam̧ōn to ko, reilo̧k n̄an juon bo̧o̧ļ eo ekar kabbin̄ itererein to ko im kālo̧k wōt n̄an iaļ eo. Juon ajri eddik ekar ettōr im bōktok jemāer, eo, bwe en maron̄, kar ettōr im bōktok bo̧o̧ļ eo.

Tokālik ilo kallōb eo, ļaddik eo erūttotata ekar dānin kōmjaļaaļ ilo an kwaļo̧k bwe an kōjatdikdik ekar bwe en āinwōt jemān.

Pija
Sister Burton's son and grandson reading together.

Būreejtōn Ezra Taft Benson ekar ba:

“O, ļōm̧aro pālele im baba ro ilo Israel, kom̧ maron̄ kōm̧m̧an eļapļo̧k n̄an lo̧mo̧o̧r eo im mour ippān Anij n̄an baam̧le ko ami! …

“Keememej kūr eo ami ekwojarjar āinwōt juon jemān in Israel—kūr eo ami eaorōktata ilo iien in im indeeo—juon kūr eo kom̧ij jāmin kōtļo̧k jāne.”

Pija
Sister Burton's son and grandson on a bed together.

Kom̧ij aikuj jipan̄ kalōk juon kapijuknen ijo Jetōb in Irooj emaron̄ pād ie.”7

Ekōjkan an jerbal naan in kanaan kein rainin.

Emaron̄ bōlen pen, mekarta uwaak ko rem̧m̧an, n̄an em̧m̧aan in bujen ro bwe jen mour ilo juon laļ ejjab kaorōk jerbal eo ekwojarjar im eddo ko aer ak ennaan ko kajedeedi reriab kōn meļeļe ko n̄an erom “keien m̧ōm̧m̧aan.” Juon ennaan eriab ej “Kōn wōt n̄a.” Im ewōr barāinwōt ennaan ko rekajookok im kajirere kake bwe ļōm̧aro pālele im baba ro ejjem̧ļo̧k bar aikuji er. Ij akweļap ippāmi bwe kom̧in jab ron̄jake riab an Setan! E ekar kabōjrak jeram̧m̧an in ekwojarjar n̄an ami erom juon em̧m̧aan ripālele ak baba. Kōnke ebanbane ro ewōr ippāer jerbal kein rekwojarjar ko e ej jāmin būki, ekōņaan kōm̧m̧an bwe “aolep armej … ren en̄taan āinwōt e”!8

Kotak im Jipan̄ ilo Jerbal ko rej Kakūrm̧ool im Kaun̄ Kipden Doon

Ro jeiū im jatū, jej aikuji doon! Āinwōt kōrā im em̧m̧aan ro rej kōjparok bujen, jej aikuj in kotak doon im jipan̄ doon erom armej ro Irooj enaaj kar kōm̧m̧an bwe jen erom. Im jej aikuj in jerbal ippān doon n̄an ļōn̄aj diktak in epepen eo im jipan̄ er tōpar kōttōbar eo aer āinwōt rijolet an mour indeeo. Jenaaj maron̄ kōm̧m̧an āinwōt Elder Robert  D. Hales im kōrā eo pāleen, Mary, eo ekar kōm̧m̧an im ļo̧o̧r jabōn kōņnaan in “Kwon kotak eō im inaaj kotak eok, im jenaaj wanlōn̄ļo̧k ippān doon.”9

Jejeļā jān jeje ko rekwojarjar bwe “ejjab em̧m̧an bwe … armej eo en make iaan.” En̄in ej unin an Jemedwōj Ilan̄ kar kōm̧m̧ane “juon rijipan̄ ekkar n̄an e.”10 Naan in rijipan̄ ej meļeļein “juon rijipan̄ em̧m̧an, wānōk, ak āinļo̧k wōt e.”11N̄an waanjon̄ak, pā ko ruo peid rej āinwōt doon ak rej jejjet in wōt doon. Ilo m̧ool rej jejjet im einjuon jān doon, ak er rej nōbar doon im em̧m̧an n̄an doon. Jerbal ippān doon, er rej kajoorļo̧k.12

Ilo juon jepta kōn baam̧le ko, Bok in bōk meļeļe eo an Kabun̄ in ej kitbuuj ennaan in: “Ļōmān jetōb ko an em̧m̧aan im kōrā ej kōm̧m̧an bwe ren kapolel doon.”13Jouj im je bwe ej ba “kapolel e doon,” jab “jiāeik doon”! Jej pād ijin n̄an jipan̄, kotak, im m̧ōņōņō ippān doon ilo ad kajjieon̄ jon̄an eo em̧m̧antata jemaron̄. Sister Barbara B. Smith ekar katakin, “Ej aikuj in ļap ad m̧ōņōņō n̄e jemaron̄ in m̧ōņōņō ilo tōprak an juon im jab ilo eo ad make.”14N̄e jej pukōt n̄an “kapolel” ijjelo̧kin “jiāe,” elukkuun in pidodo n̄an piniki doon!

Ke iaar juon m̧am̧a em̧m̧an dettan ewōr nejin ajri ro reddik, ikar boub in jānij kaļ, kwaļkwōl, im kauwe, ejjeļo̧k juon armej ekam̧ōņōņō ļo̧k an al al in Būraimere ko “Ij m̧ōņōņō n̄e jemām̧ ej deļo̧n̄tok.”15 Ikijo̧n̄ jijet im kwaļo̧k bwe ekar jab aolep iien ekar kam̧ōņōņō n̄e Craig ej deļo̧n̄tok ilo kōjem̧ eo ālkin juon raan eļap kar jerbal ie. Aolep iien ej iakiakwe kōm̧ kajjojo kōn juon ebbakuj im mejān ma im ukōt elōn̄ men ko reppen im jet iien raar raan ko renana n̄an iien ko rem̧m̧an ippān baba. Ikōņaan bwe en kar dik aō inepata kōn elōn̄ men ko iaar aikuj in kōttōbraki ilo raan eo im en kar ļapļo̧k aō kaorōki, āinwōt e, men ko eļap aer aorōk. En kar emakijkijļo̧k aō bōjrak im lem̧ōņōņō kōn iien ko rem̧m̧an an baam̧le im kam̧m̧oolol e kōn kōjeram̧m̧an ko an mour ko am!

En makijkij Ad Kōnono Naan ko Rejouj n̄an Doon

Jem̧aanļo̧k, juon sister etiljek ilo Kabun̄ in ekar kwaļo̧k ippa juon inepata ekar jar kake ium̧win elōn̄ iien ko. Inepata eo an ekar kōn jet sister ilo ward eo an. Ekar ba n̄an n̄a kōn wāween an kar metak ilo an anlo̧ke aer kōnono im jab kautiej n̄an ļōm̧aro pāleer im kōn ļōm̧aro pāleer, men̄e im̧aan mejān ajri ro nejier. Innām ekar jiron̄ eō ke ekar juon em̧m̧an dettan, kōn an kar lukkuun kōņaan im jar n̄an pukōt n̄an lo im m̧areik juon rikabwijer priesthood eo im ejaake juon kapijuknen elem̧ōņōņō ippān. Ekar rūttoļo̧k ilo juon em̧ ijo jinen ekar “peek m̧weo” im jemān ekar mijak im kakūrm̧ool kajjitōk ko an jinen bwe m̧weo en wōr wōt aenōm̧m̧an ie. Ekar en̄jake bwe ekar wōr juon wāween em̧m̧anļo̧k. Ekar jab loe jon̄an in ilo m̧weo im̧ōn im ekar rūttoļo̧k ie, ak ilo an jab joked an jar n̄an pukōt tōl, Irooj ekar kōjeram̧m̧an e n̄an an jeļā wāween ejaake juon em̧ ippān ļeo pāleen ijo Jetōb enaaj ruwainene in pād ie. Ikar pād ilo m̧wiin im ij kam̧ool bwe ej juon jikin ekwojarjar!

Ro jeiū im jatū, ewi jon̄an emakijkij in ad kōņaan in “kōnono naan ko rejouj n̄an doon”?16

Jej aikuj mālijjon̄e kōj make ilo ad kajjitōk kajjitōk ko. Kōn jidik kakkobaba, kajjitōk kein remaron̄ jerbal n̄an kōj aolep, men̄e jej rim̧are ak jemake iaad im mekarta jekjek rot rewaļo̧k im̧ōko im̧ōd.

  1. N̄āāt eo āliktata iaar nōbar kōmpānion eo aō, m̧ake iaam̧ ak im̧aan mejān ajri ro nejūm̧?

  2. N̄āāt eo āliktata ikar kam̧m̧oolol, kwaļo̧k aō iakwe, ak akweļap ilo tōmak kōn kompanion eo aō ilo jar?

  3. N̄āāt eo āliktata n̄a make ikar bōjrak jān aō ba men ko ijeļā remaron̄ kōmetak?

  4. N̄āāt eo āliktata ikar joļo̧k bōd im ettā kajjitōk jeorļo̧k bōd—ilo aō jab kwaļo̧k bar jet naan “ak n̄e kwe wōt kokar” ak “ak n̄e kwoj jan̄in”?

  5. N̄āāt eo āliktata ikar kālet n̄an m̧ōņōņō ijjelo̧kin akweļap ba bwe kwe “ijim̧we”?

Kiiō, eļan̄n̄e jabdewōt iaan kajjitōk kein rej tōl eok n̄an kwaļo̧k am̧ abōņōņō ak ajļo̧k, keememej bwe Elder David A. Bednar ekar katakin bwe “Bōd ko rejelet jetōb ko ad ej āinwōt metak ko ilo ābwinid: Bōd ej juon kōkaļļe eo ekauwōtata im juon bōbrae jān jorrāān ko.”17

Ij kajjitōk ippād kajjojo n̄an eo̧ron̄ akweļap eo an Elder Jeffrey R. Holland: “Ro jeiū im jatū, ilo kajjitōk in n̄an erom āinwōt Rilo̧mo̧o̧r eo, jemaron̄ kajjieon̄ ‘wāppen’ em̧m̧aan im kōrā ro, diktata ilo juon wāween kiiō—jab tipn̄ōl ilo naan, ak ba naan ilo wāween eo em̧m̧anļo̧k, jān kōnono kōn juon lo ekāāl, lo an enjeļ raan.”18

Ilo aō kar m̧aanjabpopo n̄an iien in rainin, Jetōb ekar katakin eō, im ikar kallim̧ur n̄an kōnono naan ko rejouj eļapļo̧k im emakijkijļo̧k n̄an nōbar kōmpānion eo aō im kōn e, n̄an kotak em̧m̧aan ro ilo baam̧le eo aō im kwaļo̧k kam̧m̧oolol kōn wāween ko rej kakūrm̧ool kwojarjar eo aer im jerbal ko raorōk. Im ikar kallim̧ur n̄an ļoor jabōn kōņnaan in “Kwon kotak eō im inaaj kotak eok, im jenaaj wanlōn̄ļo̧k ippān doon.”

Kwonaaj ke kobatok ippa ilo kappukōt jipan̄ eo an Jetōb Kwojarjar eo n̄an katakin kōj wāween an em̧m̧anļo̧k ad kotak doon ilo jerbal ko ad raorōk āinwōt ļaddik im leddik in bujen ro rejtōn bōro nejin jemedwōj ilan̄ im jinedwōj ilan̄?

Ijeļā bwe jān kajoor in ej kōmaron̄ an Pinmuur eo im ad tōmak ilo Jisōs Kraist, jemaron̄ kōm̧m̧ane. Ij jar jenaaj likūt ad lōke ilo E n̄an jipan̄ doon mour m̧ōņōņō im indeeo ilo ad wanlōn̄ļo̧k ippān doon, ilo etan Jisōs Kraist, amen.

Kakeememej ko

  1. Boyd K. Packer, ilo “Donna Smith Packer Receives Family History Certificate from BYU,” news.byu.edu/archive12-jun-packer.aspx.

  2. Dieter F. Uchtdorf, ilo Jeffrey R. Holland, “Elder Dieter F. Uchtdorf: On to New Horizons,” Ensign, Mar. 2005, 12; Liahona, Mar. 2005, 10.

  3. Henry B. Eyring, ilo Gerald N. Lund, “Elder Henry B. Eyring: Molded by ‘Defining Influences,’” Ensign, Sept. 1995, 14; Liahona, Apr. 1996, 31.

  4. Thomas S. Monson, “I Jamin Likjab jān Eok ak Ilo̧k jān Eok” Ensign ak Kweilo̧k eo Eļap,Okt. 2013, 85.

  5. Mark Twain, Eve’s Diary (1905), 107.

  6. Boyd K. Packer, “Kajoor eo an Priesthood eo,” Ensign ak Kweilo̧k eo Eļap, Eprōļ 2010, 9.

  7. Ezra Taft Benson, “To the Fathers in Israel,” Ensign, Nov. 1987, 51, 50.

  8. 2 Nipai 2:27.

  9. Lale Robert D. Hales, “Strengthening Families: Our Sacred Duty,” Ensign, May 1999, 34; Liahona, July 1999, 40; barāinwōt lale LaRene Gaunt, “Elder Robert D. Hales: ‘Return with Honor,’” Ensign, July 1994, 51; Liahona, Apr. 1995, 31.

  10. Jenesis 2:18.

  11. Jenesis 2:18, footnote b.

  12. Lale Bruce K. Satterfield, “The Family under Siege: The Role of Man and Woman” (presentation given at Ricks College Education Week, June 7, 2001), 4; emp.byui.edu/SATTERFIELDB/PDF/RoleManWoman2.pdf.

  13. Bok in Bōk Meļeļe 2: Tōl Kabun̄ eo (2010), 1.3.1.

  14. Barbara B. Smith, “Hearts So Similar,” Ensign, May 1982, 97.

  15. “Daddy’s Homecoming,” Children’s Songbook, 210.

  16. “Let Us Oft Speak Kind Words,” Hymns, no. 232.

  17. David A. Bednar, “Kōm̧ij Tōmak ilo Jetjet,” Ensign ak Kweilo̧k eo Eļap, Eprōļ 2013, 44.

  18. Jeffrey R. Holland, “The Tongue of Angels,” Ensign or Liahona, May 2007, 18.