2010–2019
Ijo Jim̧we, Iakwe, im Meanwōd rej Pād
Eprōļ 2015


Ijo Jim̧we, Iakwe, im Meanwōd rej Pād

Jisōs Kraist eaar en̄taan, mej, im jerkak jān mej ilo laajrak eo me E emaron̄ in kar kotak kōj n̄an mour indeeo.

Ilo an ejjeļo̧k too in kōjparok ko, kein loklok ko, ak jabdewōt kain kein tallōn̄,ruo jemjān jejati—Jimmy,  14, iiō dettan, im John,  19 iiō dettan (men̄e āt kein rejjab m̧ool in etaer)—kar kajjieon̄ in tallōn̄e ijo eju dipin Snow Canyon State Park eo ilo turōk in Utah ijo iaar rūttoļo̧k ie. Epaakeļo̧k aeroilōn̄tata in ijo erro ej tallōn̄e, raar lo bwe juon deka eaar m̧al m̧aantak eaar kapan̄ aero tallōn̄ļo̧k n̄an ilōn̄ tata. Raar lo bwe juon eļļāļo̧k ioon dōkā eo ej m̧al m̧aantak, ak barāinwōt rejjab maron̄ bar wanlaļļo̧k dipin dōkā ko. Raar bōjrak. Ālkin pukōt kilen ilo jojo kōjparoke, John eaar lo jidik peļļo̧k ijo emaron̄ katōt neen ie bwe en maron̄ iuun lōn̄ļo̧k ļaddik eo jatin ioon dekā eo ej eon̄ļo̧k. Bōtaab ejjeļo̧k wāween emaron̄ kar kotake e make lōn̄ļo̧k. Ilo an ļapļo̧k an inepata n̄an kappukōt jikin an kedepdep ak n̄an likūt neen ie, eļapļo̧k an kankan m̧ajōl ko an. Ekar jino wiwijet, im eaar jino mijak bwe enaaj jako.

Ekar jab maron̄ to ļo̧k wōt an depdep, John eaar kālet bwe ļōmņak eo de eo an n̄an kajjieon̄ kelōn̄ļo̧k ilo an kate n̄an jibwe lōn̄ in dekā eo ej m̧al tok. Eļan̄n̄e enaaj tōprak, emaron̄, kōn kōjerbal kajoor eo an pein, kanōk lōn̄ļo̧k e n̄an ijo em̧m̧an.

Ilo naan ko an make, eaar ba:

“M̧okta jān aō kelōn̄ļo̧k iaar jiron̄ Jimmy n̄an etal im kappukōt juon ra in wōjke ekijn̄en̄e n̄an door laļ tak n̄an eō, men̄e iaar jeļā bwe ejjeļo̧k jabdewōt kain ioon jabōn toļ in. Eaar jekjek eo de eo n̄an an ilo̧k. Eļan̄n̄e kelōn̄ļo̧k eo aō ejab tōprak, men eo imaron̄ kar kōm̧m̧ane em̧m̧an ļeo jatū eaar jab leo aō wōtlo̧k im mej.

“Ikar leļo̧k iien n̄an an jako jān ijo, iaar kōm̧m̧ane jar eo aō āliktata—iaar kōņaan bwe baam̧le eo aō en jeļā bwe iaar iakwe er im bwe Jimmy emaron̄ in kar tōparļok m̧weo ilo ejjeļo̧k jorrāān e make—innām iaar kelōn̄ļo̧k. Eaar bwe an kajoor aō būjbūj lōn̄ļo̧k jon̄an jibin peiū ebaj tōpar ioon dekā eo ej m̧altok. Ak peiū eaar pād ioon dekā eo ej m̧al m̧aantak, iaar jab en̄jake jabdewōt ak bok ioon dekā eo edepakpak. Imaron̄ in keememej wōt en̄jake eo eperan n̄an ettoto wōt ijo ilo an ejjeļo̧k jabdewōt men n̄an kōdepdeb ie—ejjeļok tōrerein, ejjeļo̧k ebokbok, ejjeļo̧k kein jōbjōb ak kein depded. Iaar en̄jake an addin peiū jino iperper ioon jikin eo ebokbok. Iaar jeļā bwe mour eo aō ejem̧ļo̧k.

“Ak ilo jidimkij, āinwōt jourur ej waļo̧k ilo lan̄ ilo jōm̧m̧ar, ruo pā ko rekar itok jān ioon tōrere in wōtlo̧k ļo̧k eo, rekar jibwe peiū kōn juon kajoor im kije eo ekabwilōn̄lōn̄ kōn jon̄ak eo aer. Ļeo jatū etiljek eaar jab ilo̧k im kapok jabdewōt raan wōjke me ejjeļo̧k. Kajidedeik lukkuun ta iaar ļōmņak in kōm̧m̧ane, eaar jab em̧m̧akūt n̄an jidik. Eaar kōttar wōt—ikōn̄, lukkuun ikōn̄—kanooj jeļā inaaj kar kabwebweik n̄an kajjieon̄ in kōm̧m̧ane kelōn̄ļo̧k eo. Ke iaar kōm̧m̧ane, eaar dāpij eō, im jab kōņaan kōtļo̧k bwe in wōtlo̧k. Pā ko rōdipen pein eo jatū ekar lo̧mo̧o̧ren eō raan eo ke iaar etoto ijo eutiej jān ioon bwidej jeļā bwe inaaj kar mej.”1

Ro jeiū im jatū jitōnbōro, rainin ej Jabōt in Ijtō. Men̄e jej aikuj iien otemjej kememej (jej kallim̧ur ilo jar in kwojkwoj eo ad wiik otemjeļo̧k bwe jenaaj), mekarta en̄in ej raan eo ekwojarjar tata an iiō n̄an keememej pā ko pein im kijejeto eo an eo jeid me eaar pukōt tok kōj ro rej lokjak n̄an mej ilo jetōb im kanniōk, n̄an lo̧mo̧o̧ren kōj jān likjab ko im m̧ōjņo̧ ko ad im jān būrom̧ōj im jerawiwi ko ad. Kōjerbal bwebwenato in āinwōt m̧ōņōkjān kar kwaļo̧k jān baam̧le eo an John im Jimmy, ij kwaļo̧k aō kam̧oolol kōn Pinmuur eo im Jerkakpeje eo an Irooj Jisōs Kraist im kūle m̧akūtkūt ko ilo karōk eo ekwojarjar an Anij me ej tōprak in im letok meļeļe eo n̄an “iakwe eo Jisōs ej letok n̄an [kōj].”2

Ilo jukjukinpād eo ad laļ in eļapļo̧k, ejja jokkuun wōt juon āinwōt jab jeļā kake āinwōt an jab bun̄bun̄ n̄an kōnono kōn Adam im Eve ak kōn Jikin Kallib Eden ak kōn “wōtlo̧k eo” an Adam im Eve n̄an mour wabanban in. Mekarta m̧ool eo eļamwaan ej bwe jej jab maron̄ lukkuun meļeļe Pinmuur eo im Jerkakpeje eo an Kraist im jej jāmin naaj polel ad kam̧oolol kōn un eo ejej uwaan kōn ļotak eo An ak mej eo An—ilo bar jet naan ejjeļo̧k n̄an jidik n̄an m̧ool in kam̧oolol kōn Kūrijm̧ōj ak Ijtō—ilo jab meļeļe bwe ekar wōt em̧m̧aan etan Adam im kōrā Eve ro raar wōtlo̧k jān lukkuun nememe eo an Eden, im bōk kaje ko me raar pād ilo wōtlo̧k eo.

Ijjab jeļā tipdik in ta eo eaar waļo̧k ioon laļ in m̧okta jāne, bōtaab ijeļā rein ruo raar kōm̧anm̧an er ium̧win pā ekwojarjar eo pein Anij, ijeļā bwe raar mour jidik iien make ilo jekjek eo an pedetaij ijo eaar ejjeļo̧k mej an armej ak maron̄ eo n̄an wōr baam̧le, im ijeļā bwe kōn juon kōllaajrak in kālet ko raar jerawiwiki kien eo an Anij bwe raar aikuj diwōjļo̧k jān nememe eo an jikin kallib eo bōtaab kar kōm̧m̧an bwe en wōr nejierro m̧okta jān aerro mej ilo kanniōk.3 N̄an kobaik elōn̄ļo̧k būrom̧ōj im apan̄ n̄an jekjek eo aero, jerawiwi eo aer ewōr kaje ko ilo jetōb barāinwōt, bukweļo̧k erro jān im̧aan Anij n̄an indeeo. Kōnke raar ļotak tok n̄an laļ in eaar bun̄ im kōnke jenaaj kar bar jerawiwiki kien ko an Anij, jej barāinwōt lokjak n̄an ejja kaje ko wōt me Adam im Eve raar jelm̧ai.

Juon jekjek ekainepata! Aolep armej rej wōtlo̧k—aolep em̧m̧aan, kōrā, im ajri rej aolep iien epaakeļo̧k mej eo ilo kanniōk indeeo, aolep iien epaakeļo̧k en̄taan ilo jetōb n̄an indeeo. Ej ta eo meļeļe in mour in ke? En̄in ej tōprak eo āliktata an jeļā an armej? Jej ke aolep baj alitoto ilo juon canyon em̧ōļo juon laļ eoktak, kajjojo iaad jej pukōt juon kein jipan̄ edik, kajjojo iaad jej pukōt juon men n̄an depdep n̄ane—kōn ejjeļo̧k bōtaab en̄jake bok an wererļo̧k ium̧win addin peid, ejjeļo̧k men n̄an lo̧mo̧o̧ren kōj, ejjeļo̧k men n̄an dāpiji, im em̧ool ejjeļo̧k men n̄an jibwe kōj? Jibadbad eo de eo ad ilo mour ej juon mour eo ejjeļo̧k meļeļe in—kelōn̄ļo̧k jon̄an wōt ad maron̄, niknik ium̧win emaron̄ jiljilimjuonn̄oul iiō ko, innām likjab im wōtlo̧k, im wōtlo̧k wōt indeeo?

Uwaak eo n̄an kajjitōk kein ej juon eo alikkar im indeeo jab! Kōn rikanaan ro etto im raan kein, ij kam̧ool bwe “aolep men kar kōm̧anm̧an ilo lotātāt an Eo ejeļā men otemjej.”4 Kōn menin, jān iien eo ro jined im jemed raar diwōjļo̧k jān Jikin Kallib Eden, Anij im Jemedwōj aolep, rej kōtmene jokālet eo an Adam im Eve, kar jilkinļo̧k enjeļ ro jān lan̄ n̄an kwaļo̧k n̄an er—im lelaļ tak ilo aolep iien ko n̄an kōj—bwe ilo aolepān iien ko m̧aantak kar karōke n̄an m̧ōņōņō eo ad indeeo. Eaar m̧ōttan karōk eo An ekwojarjar, me eaar letok juon Rilo̧mo̧o̧r, eo Nejin Anij Make— bar juon “Adam,” Rijilōk Paul eaar ņa Etan5— eo enaaj kar itok ilo tōre eo an n̄an en̄taan kōn m̧oktata jerawiwi eo an Adam. Pinmuur eo enaaj kar kadedeļok anjo̧ eo ioon mej ilo jetōb, ilo ejjeļo̧k kaljōkļok letok jerkakpeje eo n̄an aolep armej ro me raar ak renaaj ļotak tok n̄an laļ in. Kōn meanwōd enaaj kar barāinwōt letok jeorļo̧k bōd n̄an jerawiwi ko an juon make jān Adam n̄an jem̧ļo̧k in laļ, jekjek eo kōn ukwļo̧k im pokake kien ko rekwojarjar.

Āinwōt juon iaan rikam̧ool ro An kar kapiti, ij kean̄ ilo jibbon̄ōn Ijtō in bwe Jisōs RiNazareth eo eaar im ej Rilo̧mo̧o̧r eo an laļ in, “Adam eo ālik,”6 Ritōl im Rikoweppān an ad tōmak, Jino in im Jemļo̧k in mour ideeo. “Bwe āinwōt ilo Adam ro otemjej rej mej, āindein barāinwōt ilo Kraist ro otemjej re naaj mour,”7 Paul eaar kean̄. Im jān rikanaan-petriak Liai: “Adam eaar wōtlo̧k bwe armej ren kar āinwōt. … Im Messaia eo ej itok ilo iien eo ejejjet, bwe Emaron̄ lo̧mo̧ren ro nejin armej jān wōtlo̧k eo.”8 Men eo edipio tata iaan aolep, Bok in Mormon rikanaan eo Jacob eaar katakin āinwōt m̧ōttan raan ko ruo in kwaļo̧k eo kōn Pinmuur eo an Jisōs Kraist me “jerkakpeje eo eaikuj  … itok  … jān tokjen bōd.”9

Kōn menin rainin jej kememe menin letok eo an anjo̧ ioon aolep wōtlo̧k me em̧ōj ad ioone, aolep būrom̧ōj me jaar jeļā kake, aolep ebbweer ko eaar wōr ippād, aolep mijak ko jaar jelm̧ai—im aaet jej barāinwōt kememe jerakakpeje eo ad jān mej im jeorļo̧k bōd eo kōn jerawiwi ko ad. Anjo̧ in ej pād n̄an aolepedwōj kōnke kōn tōre ko me raar waļo̧k ilo jemļo̧kin eo elukkuun in wōt āinwōt in epaakeļo̧k ruo taujin iiō ko remootļo̧k ilo Jerusalem.

Ijjino kōn metak eo ilo jetōb an Jikin Kallib Gethsemane, em̧m̧akūtļo̧k n̄an Debwāāle ioon debwāāl eo ilo Calvary, im kōjem̧ļo̧k ilo juon Jabōt jibbon̄ aiboojoj ilowaan lōb eo kar leļo̧k, juon em̧m̧aan ejjeļo̧k an jerawiwi, erreo, im kwojarjar, eo Nejin Anij Make, kar kōm̧m̧ane ta eo ejjeļok armej eaar mej ekar kōm̧m̧ane ak maron̄ kar kōm̧m̧ane. Ium̧win kajoor eo An make, Eaar jerkak jān mej, kōn an ānbwin eo im jetōb eo An jamin n̄an jidik jepeļļo̧k. Kōn kālet eo An make, Eaar make wutikļo̧k nuknuk in kallib eo me kar kalbubuik E kake, kōkōm̧anm̧ōn likūt napkin eo ej kūtimi Mejān “kamakeļo̧k iaan ilo juon jikin,”10 Jeje ko rekwojarjar rej ba.

Tōre eo ilo raan ko jilu an Pinmuur eo im Jerkakpeje eo kōn aolep men ko Jisōs eaar iooni ilo jekjek eo, ej kwaļok iien eo aorōk tata, en̄taan eo ekanooj makeļo̧k, ļamļam eo ej make wōt aorōk an iakwe kwojarjar eo kar kwaļo̧k ilo bwebwnato an laļ in. Jisōs Kraist eaar en̄taan, mej, im jerkak jān mej ilo laajrak eo me Emaron̄ in kar, āinwōt m̧ōkaj in jourur ilo juon ļan̄ ilo jōm̧ar, letok n̄an jipan̄ dāpij kōj, jibwe kōj kōn kajoor bōtata eo An, im kōn pokake eo ad n̄an kien ko An, kotak kōj n̄an mour indeeo.

Ijtō in ij kam̧oolol E im Jemen eo eaar letok E n̄an kōj bwe Jisōs ej jutak anjo̧ wōt ioon mej, men̄e Ej jutak ioon nee ko neen rekinejnej. Ijtō in ij kam̧oolol E im Jemen eo eaar letok E n̄an kōj bwe E ej letok wōt jouj eo ejjab likjab, men̄e Ej erļo̧ke kōn pā ko kar deli im ioon pein ekurar. Ijtō in ij kam̧oolol E im Jemen eo eaar letok E n̄an kōj bwe jān maron̄ al kōn jikin kallib eo me eaar do̧o̧rļo̧k bōtōktōk, dōbwāāl eo kar dilaiki, im lōb eo ekwojarjar ejjeļo̧k kobban:

Eļap, aiboojoj, im dedeļo̧k,

Jekjek eo ekabwilōn̄lōn̄ an Lo̧mo̧o̧r,

Ijo jim̧we, iakwe, im meanwōd raar pād

Ilo jokkuun wōt ilo kwojarjar!11

Ilo āt kwojarjar eo etan jerkakpeje Irooj Jisōs Kraist, amen.