មែនហើយ យើងអាច ហើយនឹងឈ្នះ !
ដោយ អែលឌើរ អូលីសេស សូរ៉េស
ក្នុងគណៈប្រធាននៃពួកចិតសិបនាក់
យើងត្រូវតែកាន់ឲ្យខ្ជាប់ខ្ជួនឡើង ចំពោះទីបន្ទាល់អំពីដំណឹងល្អរបស់ព្រះយេស៊ូវ គ្រីស្ទ ។ នោះយើងឈ្នះលើចម្បាំងប្រចាំថ្ងៃទាស់នឹងសេចក្ដីអាក្រក់ ។
បងប្អូនជាទីស្រឡាញ់អើយ ខ្ញុំមានចិត្តរាបទាបចំពោះឯកសិទ្ធិដែលខ្ញុំមាន ដើម្បីនិយាយទៅកាន់បងប្អូនថ្ងៃនេះ ដែលជាអ្នកកាន់បព្វជិតភាពរបស់ព្រះ ទូទាំងសាសនាចក្រ ។
ប្រធាន ថូម៉ាស អេស ម៉នសុន គ្រាមួយនោះបានថ្លែងថា ៖
« ពិភពលោកនេះអាចជាកន្លែងដែលគួរឲ្យភ័យខ្លាចដើម្បីនឹងរស់នៅ ។ តម្លៃនៃក្រមសីលធម៌សង្គម ហាក់ដូចជាចុះអន់ថយទៅៗក្នុងល្បឿនយ៉ាងឆាប់រហ័ស » ។ គ្មាននរណាម្នាក់—មិនថាក្មេង ចាស់ ឬ វ័យមជ្ឈិមទេ— គឺមិនអាចចៀសផុតពីអ្វីៗ ដែលអាចនឹងទាញយើងចុះ និងបំផ្លាញយើងឡើយ ។ …
“… ប៉ុន្តែយើងមិនត្រូវអស់សង្ឃឹមទេ ។ … យើងកំពុងតែធ្វើសង្គ្រាមនឹងអំពើបាប ។ … វាគឺជាសង្គ្រាម ដែលយើងអាច ហើយនឹងឈ្នះបាន ។ ព្រះវរបិតាសួគ៌របស់យើង បានប្រទានដល់យើង នូវឧបករណ៍ទាំងឡាយដែលយើងត្រូវការ ដើម្បីអាចឈ្នះបាន » ។១
យើងគ្រប់គ្នា ទាំងក្មេងទាំងចាស់ បានប្រឈមមុខរាល់ថ្ងៃនឹងសង្គ្រាម ដែលបានថ្លែងដោយ ប្រធាន ម៉នសុន។ មារសត្រូវ និងពួកទេវតាវា កំពុងព្យាយាមរំខានយើង ។ គោលបំណងរបស់ពួកវា គឺជម្រុញយើងឲ្យងាកចេញពីសេចក្តីសញ្ញា ដែលយើងបានធ្វើជាមួយព្រះអម្ចាស់ ធ្វើឲ្យយើងបាត់បង់នូវចក្ខុវិស័យអំពីមរតកដ៏អស់កល្បជានិច្ចរបស់យើង ។ ពួកវាដឹងយ៉ាងច្បាស់ អំពីផែនការរបស់ព្រះវរបិតាសួគ៌សម្រាប់កូនចៅរបស់ទ្រង់ ដ្បិតពួកវាបានមានវត្តមានជាមួយយើង នៅក្នុងការប្រឹក្សាដ៏ធំក្នុងស្ថានសួគ៌ នៅពេលផែនការនោះត្រូវបានបង្ហាញដល់យើង ។ ពួកវាព្យាយាមយកប្រៀបលើភាពកម្សោយ និង គុណវិបត្តិរបស់យើង ដោយឆបោកយើងដោយ « អ័ព្ទនៃសេចក្ដីងងឹង… ដែលធ្វើឲ្យភ្នែកទាំងឡាយខ្វាក់ ហើយធ្វើឲ្យចិត្តទាំងឡាយនៃកូនចៅមនុស្សរឹងរូស ហើយនាំពួកគេទៅតាមផ្លូវទូលាយទាំងឡាយ ដើម្បីឲ្យពួកគេវិនាស ហើយវង្វេងបាត់ » ។២
ដូចដែល ប្រធាន ម៉នសុន បានបង្រៀនថា ថ្វីបើមានការប្រឆាំងជំទាស់ ដែលយើងប្រឈមមុខក្តី នេះគឺជាសង្គ្រាមដែលយើងអាច ហើយនឹងឈ្នះលើបាន ។ ព្រះអម្ចាស់ទុកចិត្តលើសមត្ថភាព និងការប្តេជ្ញាចិត្តរបស់យើង ដើម្បីនឹងឈ្នះនោះ ។
វគ្គគម្ពីរមានគំរូជាច្រើនឥតគណនា អំពីអ្នកទាំងឡាយ ដែលបានឈ្នះចម្បាំងរបស់ពួកគេ ទោះពួកគេស្ថិតក្នុងស្ថានភាពសាហាវឃោរឃៅក្ដី ។ គំរូមួយនៃគំរូទាំងនេះ គឺមេទ័ពឯកមរ៉ូណៃ នៅក្នុងព្រះគម្ពីរមរមន ។ យុវជនដ៏អស្ចារ្យម្នាក់នេះ មានចិត្តក្លាហាន ដើម្បីនឹងការពារសេចក្តីពិត ក្នុងពេលដែលមានការទាស់ទែង និងសង្គ្រាមជាច្រើន ដែលធ្វើឲ្យជីវិតរបស់ប្រជាជននីហ្វៃទាំងមូល ស្ថិតក្នុងភាពគ្រោះថ្នាក់ ។ ថ្វីបើគាត់ជាអ្នកមានប្រាជ្ញាខ្ពស់ ក្នុងការអនុវត្តទំនួលខុសត្រូវរបស់គាត់ក្តី មរ៉ូណៃនៅតែមានចិត្តរាបទាប ។ ឥរិយាបទនេះ និងផ្សេងៗទៀតបានធ្វើឲ្យគាត់ជាឧបករណ៍ដ៏អស្ចារ្យនៅក្នុងព្រះហស្ថព្រះនាពេលនោះ។ អាលម៉ាបានកត់ត្រាទុកថា បើបុរសគ្រប់រូប ដូចជាមរ៉ូណៃ នោះ « អំណាចទាំងឡាយរបស់ស្ថាននរកនឹងត្រូវញ័ររន្ធត់រហូតតទៅ [ ហើយ ] អារក្សនឹងគ្មានអំណាចទៅលើចិត្តនៃកូនចៅមនុស្សទៀតឡើយ » ។៣ ចារិតលក្ខណៈទាំងអស់របស់មរ៉ូណៃ បានដុះចេញមកពីសេចក្តីជំនឿដ៏ធំរបស់គាត់លើព្រះ និង លើព្រះអម្ចាស់យេស៊ូវគ្រីស្ទ៤ និង ការប្តេជ្ញាចិត្តដ៏រឹងមាំរបស់គាត់ ដើម្បីធ្វើតាមព្រះសូរសៀងរបស់ព្រះ និង ព្យាការីទ្រង់ ។៥
នេះគឺជានិមិត្តរូបដែលថា យើងគ្រប់រូបត្រូវកែប្រែខ្លួនយើង ឲ្យក្លាយទៅជាមេទ័ពមរ៉ូណៃសម័យទំនើប ដើម្បីយកឈ្នះលើសង្គ្រាម ទាស់នឹងសាតាំង ។ ខ្ញុំស្គាល់ឌីកុនក្មេងស្មោះត្រង់ម្នាក់ ដែលបានកែប្រែខ្លួនគាត់ ឲ្យក្លាយទៅជាមេទ័ពមរ៉ូណៃសម័យទំនើបម្នាក់ ។ ដរាបណាគាត់ព្យាយាមធ្វើតាមការទូន្មានរបស់ឪពុកម្ដាយ និងអ្នកដឹកនាំរបស់គាត់ នោះសេចក្ដីជំនឿ និងការតាំងចិត្តរបស់គាត់ត្រូវបានសាកល្បងរៀងរាល់ថ្ងៃ ទោះជាគាត់នៅក្មេងក្ដី ។ ថ្ងៃមួយ គាត់ប្រាប់ខ្ញុំថា គាត់ភ្ញាក់ផ្អើលចំពោះស្ថានភាពដ៏រសាប់រសល់ និងពិបាកមួយ—គឺមិត្តរបស់គាត់កំពុងមើលរូបអាសអាភាស នៅលើទូរស័ព្ទដៃ ។ ក្នុងគ្រានោះ ដែលយុវជននេះ ត្រូវសម្រេចចិត្តនូវអ្វីដែលសំខាន់បំផុតចំពោះគាត់—ប្រជាប្រិយភាព ឬសេចក្ដីសុចរិតរបស់គាត់ ។ ក្នុងពីរបីវិនាទីបន្ទាប់ពីនោះ គាត់មានចិត្តក្លាហាន ហើយបានប្រាប់មិត្តភក្ដិថា អ្វីដែលពួកគេកំពុងតែធ្វើនោះមិនត្រូវឡើយ។ លើសពីនោះ គាត់បានប្រាប់ពួកគេថា ពួកគេត្រូវតែឈប់ធ្វើដូច្នោះទៅ ឬពួកគេនឹងក្លាយទៅជាកញ្ជះរបស់វា ។ មិត្តរួមថ្នាក់ភាគច្រើន បានសើចចំអកដាក់គាត់ ដោយនិយាយថានោះគឺជាផ្នែកនៃជីវិត ហើយថាគ្មានអ្វីខុសទេ ដែលធ្វើបែបនេះនោះ ។ ប៉ុន្តែ មានមិត្តម្នាក់ក្នុងចំណោមពួកគេ ដែលបានស្តាប់តាមពាក្យទូន្មានរបស់យុវជននោះ ហើយបានសម្រេចចិត្តថានឹងឈប់ធ្វើដូច្នោះ ។
គំរូរបស់ឌីកុនម្នាក់នេះ មានអានុភាពវិជ្ជមាន ទៅលើមិត្តរួមថ្នាក់គាត់ម្នាក់ ។ មិនបាច់សង្ស័យទេ គាត់ និង មិត្តរបស់គាត់ពិតជាប្រឈមមុខនឹងការចំអក និងការបៀតបៀន ដោយព្រោះតែការសម្រេចចិត្តនោះ ។ ម៉្យាងទៀត ពួកគេបានអនុវត្តតាមដំបូន្មានរបស់អាលម៉ា ថ្លែងទៅកាន់ប្រជាជនគាត់ នៅពេលថ្លែងថា « ចូរអ្នករាល់គ្នាចេញពីពួកទុច្ចរិតមក ហើយញែកខ្លួន ហើយចូរកុំប៉ះពាល់ដល់វត្ថុទាំងឡាយ ដែលឥតស្អាតរបស់ពួកគេនោះឡើយ » ។៦
កូនសៀវភៅ ដើម្បីកម្លាំងនៃយុវជន មាននូវដំបូន្មានដូចតទៅ ដែលបានអនុមតិដោយគណៈប្រធានទីមួយ សម្រាប់យុវវ័យនៃសាសនាចក្រ ៖ « អ្នករាល់គ្នាទទួលខុសត្រូវចំពោះជម្រើសនានា ដែលអ្នករាល់គ្នាធ្វើ ។ ព្រះអម្ចាស់ទ្រង់យកចិត្តទុកដាក់ដល់អ្នក ហើយនឹងជួយអ្នកឲ្យធ្វើការជ្រើសរើសល្អ សូម្បីតែគ្រួសារ និងមិត្តភក្ដិរបស់អ្នក ប្រើសិទ្ធិជ្រើសរើសរបស់ពួកគេ តាមវិធីដែលមិនត្រូវក្តី ។ សូមមានសេចក្តីក្លាហានខាងសីលធម៌ ឈរយ៉ាងរឹងមាំ ក្នុងការគោរពដល់ឆន្ទៈរបស់ព្រះ ទោះអ្នកត្រូវឈរតែម្នាក់ឯក្ដី ។ កាលណាអ្នកធ្វើបែបនេះ អ្នកធ្វើគំរូឲ្យអ្នកដទៃអនុវត្តតាម » ។៧
សង្គ្រាមរវាងល្អ និងអាក្រក់ នឹងបន្តពេញមួយជីវិតយើង ព្រោះថាគោលបំណងរបស់បច្ចាមិត្ត គឺធ្វើឲ្យមនុស្សគ្រប់រូប រងទុក្ខដូចវាដែរ ។ សាតាំង និង ពួកទេវតាវា នឹងខំបំភាន់គំនិតយើង ហើយអះអាងនូវការត្រួតត្រារបស់វា ដោយល្បួងយើងឲ្យធ្វើអំពីបាប ។ បើពួកវាអាចធ្វើបាន ពួកវានឹងបង្ខូចអ្វីៗទាំងអស់ដែលល្អ ។ ទោះជាយ៉ាងណាក៏ដោយ ជាការចាំបាច់ដែលត្រូវយល់ថា ពួកវានឹងមានអំណាចលើយើងមានតែពេលដែលយើងអនុញ្ញាតវាតែប៉ុណ្ណោះ ។
វគ្គគម្ពីរក៏មានគំរូមួយចំនួនអំពីពួកអ្នកដែលបណ្តោយខ្លួនឲ្យមច្ចាមិត្ត ហើយបានបំភាន់ ទាំងត្រូវបានបំផ្លាញនៅទីបញ្ចប់នៃជីវិតរបស់ពួកគេ ដូចជា នេហូរ កូរីហូរ និងសេរេម ផងដែរ ។ យើងត្រូវតែប្រុងប្រយ័ត្ន ចំពោះគ្រោះថ្នាក់នេះ ។ យើងមិនអាចអនុញ្ញាតឲ្យខ្លួនយើង ត្រូវបោកបញ្ឆោតដោយសារដំណឹងដ៏មានប្រជាប្រិយ ដែលពិភពលោកងាយនឹងទទួលនោះឡើយ ហើយដែលជំទាស់នឹងគោលលទ្ធិ និងគោលការណ៍ពិត នៃដំណឹងល្អរបស់ព្រះយេស៊ូវគ្រីស្ទ ។ សារដំណឹងរបស់លោកិយជាច្រើន គឺពុំតំណាងអ្វីក្រៅពីការព្យាយាមឲ្យសង្គមយើង ដោះសារចំពោះអំពើបាបនោះឡើយ ។ យើងត្រូវតែចងចាំថា នៅទីបំផុត នៅពេលមនុស្សគ្រប់រូបនឹងឈរនៅចំពោះព្រះគ្រីស្ទ « ដើម្បីទទួលការជំនុំជម្រះចំពោះកិច្ចការទាំងឡាយ [ របស់យើង ] ដើម្បីឲ្យឃើញថាពួកគេល្អ ឬពួកគេអាក្រក់ » ។៨ ខណៈពេលយើងប្រឈមមុខនឹងសារដំណឹងលោកិយទាំងនេះ នោះយើងនឹងតម្រូវឲ្យមានចិត្តក្លាហានដ៏ខ្លាំង និងចំណេះដឹងរឹងមាំអំពីផែនការនៃព្រះវរបិតាសួគ៌ ដើម្បីជ្រើសយកអ្វីដែលត្រឹមត្រូវ ។
យើងរាល់គ្នា អាចទទួលកម្លាំង ដើម្បីជ្រើសអ្វីដែលត្រូវ បើយើងស្វែងរកព្រះអម្ចាស់ និងដាក់ការទុកចិត្ត និងសេចក្តីជំនឿទាំងអស់នៅលើទ្រង់ ។ ប៉ុន្តែដូចបទគម្ពីរបង្រៀនថា យើងចាំបាច់ត្រូវមាន « ចិត្តស្មោះស » និង « ស្មោះអស់ពីចិត្ត » ។ នោះព្រះអម្ចាស់ នៅក្នុងសេចក្ដីមេត្តាដ៏គ្មានទីបញ្ចប់របស់ទ្រង់ « នឹងសម្ដែងសេចក្ដីពិតដល់ [ យើង ] ដោយព្រះចេស្ដានៃព្រះវិញ្ញាណបរិសុទ្ធ ។ ដោយព្រះចេស្តានៃព្រះវិញ្ញាណបរិសុទ្ធ នោះ [ យើង ] អាចស្គាល់សេចក្តីពិតនៃគ្រប់ការណ៍ទាំងអស់ » ។៩
ការចេះដឹងនេះទទួលបាន តាមរយៈព្រះវិញ្ញាណបរិសុទ្ធ គឺគ្មានអ្វីក្រៅពីទីបន្ទាល់របស់យើង ដែលនឹងជម្រុញសេចក្តីជំនឿ និងការប្តេជ្ញាចិត្តរបស់យើង ឲ្យអនុវត្តតាមការបង្រៀននៃដំណឹងល្អដែលបានស្ដារឡើងវិញ នៅក្នុងថ្ងៃចុងក្រោយនេះ ថ្វីបើមានសារដំណឹងដ៏មានប្រជាប្រិយដែលយើងស្តាប់ឮពីលោកិយក៏ដោយ ។ ទីបន្ទាល់របស់យើងត្រូវតែជាខែលការពារយើងពីព្រួញដ៏ខ្លាំងក្លារបស់បច្ចាមិត្ត ដែលព្យាយាមប៉ុនប៉ងយើង ។១០ វានឹងដឹកនាំយើងដោយមានសុវត្ថិភាពកាត់តាមភាពងងឹត និង ភាពច្របូកច្របល់ដែលមាននៅក្នុងពិភពលោកសព្វថ្ងៃនេះ ។១១
ខ្ញុំបានរៀនអំពីគោលការណ៍នេះ នៅពេលខ្ញុំបានបម្រើជាអ្នកផ្សព្វផ្សាយវ័យក្មេង ។ ដៃគូរបស់ខ្ញុំ និងខ្ញុំកំពុងតែបម្រើ នៅក្នុងសាខាដ៏តូច និងដាច់ស្រយាលមួយ នៃសាសនាចក្រ ។ យើងបានខំនិយាយជាមួយនឹងមនុស្សគ្រប់រូប នៅក្នុងទីក្រុងនោះ ។ ពួកគេបានទទួលយើងយ៉ាងរាក់ទាក់ ប៉ុន្តែ ពួកគេចូលចិត្តជជែកវែកញែក អំពីបទគម្ពីរ ហើយសុំឲ្យយើងបង្ហាញភស្តុតាងជាក់ស្តែង ទាក់ទងទៅនឹងភាពពិតដ៏ពេញលេញ នៃអ្វីដែលយើងកំពុងតែបង្រៀន ។
ខ្ញុំនឹកចាំគ្រាមួយនោះ ដៃគូខ្ញុំ និងខ្ញុំ បានព្យាយាមបង្ហាញភស្តុតាងនូវអ្វីមួយទៅដល់ប្រជាជន ព្រះវិញ្ញាណបរិសុទ្ធបានចាកចេញពីយើង ហើយយើងមានអារម្មណ៍ស្មុគស្មាញ និងច្របូកច្របល់ទាំងស្រុង ។ យើងមានអារម្មណ៍ថា យើងគួរតែភ្ជាប់ទីបន្ទាល់យើងជាមួយនឹងសេចក្ដីពិតនៃដំណឹងល្អ ដែលយើងកំពុងបង្រៀន ។ តាំងពីនោះមក ខ្ញុំចាំថាពេលយើងថ្លែងទីបន្ទាល់មួយ យ៉ាងអស់ពីដួងចិត្តរបស់យើង អំណាចនៃការបញ្ជាក់យ៉ាងស្ងប់ស្ងាត់ មកពីព្រះវិញ្ញាណបរិសុទ្ធ មានពេញបន្ទប់ និងគ្មានកន្លែងមន្ទិល ឬត្រូវវែកញែកឡើយ ។ ខ្ញុំបានរៀនថា គ្មានឋាមពលអាក្រក់ណា ដែលអាចនឹងបំភាន់ចិត្ត បោកបញ្ឆោត ឬបន្ទាបអំណាចនៃទីបន្ទាល់យ៉ាងស្មោះរបស់សិស្សពិតនៃព្រះយេស៊ូវ គ្រីស្ទ បានឡើយ ។
ដូចដែលព្រះអង្គសង្គ្រោះបានបង្រៀនថា បច្ចាមិត្តប្រាថ្នាចង់រែងយើងដូចជាស្រូវសាលី ធ្វើឲ្យយើងអសមត្ថភាព ដើម្បីមានឥទ្ធិពលល្អដល់ពិភពលោក ។១២
បងប្អូនប្រុស ដោយសារតែរលកនៃភាពច្របូកច្របល់ និង មន្ទិល បានរីករាលដាលពាសពេញពិភពលោកសព្វថ្ងៃនេះ យើងត្រូវតែកាន់ខ្ជាប់ទីបន្ទាល់របស់យើងឲ្យបានរឹងមាំ ទៅនឹងទីបន្ទាល់នៃដំណឹងល្អនៃព្រះយេស៊ូវគ្រីស្ទ ។ នោះសមត្ថភាពរបស់យើងដើម្បីការពារសេចក្ដីពិត និងសេចក្ដីយុត្តិធម៌នឹងកើនឡើង ។ យើងនឹងឈ្នះលើចម្បាំងប្រចាំថ្ងៃទាស់នឹងឋាមពលអាក្រក់ ហើយជាជាងបរាជ័យក្នុងចម្បាំងនៃជីវិត យើងនឹងជួយគាំទ្រអ្នកដទៃ ឲ្យអនុវត្តតាមបទដ្ឋានរបស់ព្រះអម្ចាស់វិញ ។
ខ្ញុំសូមអញ្ជើញអ្នករាល់គ្នា ឲ្យស្វែងរកសុវត្ថិភាព នៅក្នុងការបង្រៀន ដែលមាននៅក្នុងព្រះគម្ពីរ ។ មេទ័ពមរ៉ូណៃ បានភ្ជាប់សេចក្ដីជំនឿរបស់លោកលើព្រះ និង ទីបន្ទាល់របស់លោកអំពីសេចក្ដីពិត ជាមួយនឹងចំណេះដឹង និង ប្រាជ្ញា ដែលមាននៅក្នុងព្រះគម្ពីរ ។ តាមរបៀបនេះ គាត់ទុកចិត្តថា គាត់នឹងទទួលព្រះពរពីព្រះអម្ចាស់ ហើយទទួលបានជ័យជំនះជាច្រើន ដែលពិតជាបានកើតឡើងមែន ។
ខ្ញុំសូមអញ្ជើញអ្នករាល់គ្នា ឲ្យស្វែងរកសុវត្ថិភាព នៅក្នុងពាក្យសម្ដីវាងវៃនៃពួកព្យាការីបច្ចុប្បន្ន ។ ប្រធានថូម៉ាស អេស ម៉នសុន បានមានប្រសាសន៍ថា ៖ « យើងជាអ្នកដែលត្រូវបានតែងតាំងដល់បព្វជិតភាពនៃព្រះ អាចធ្វើឲ្យមានការផ្លាស់ប្ដូរបាន ។ នៅពេលយើងរក្សាសច្ចភាពផ្ទាល់ខ្លួន និង គោរពដល់បព្វជិតភាព យើងនឹងក្លាយទៅជាគំរូសុចរិត សម្រាប់ឲ្យគេធ្វើតាម … [ ហើយយើង ] ជួយបំភ្លឺដល់ពិភពលោកដែលកាន់តែងងឹតទៅៗនេះ » ។១៣
ខ្ញុំសូមអញ្ជើញមនុស្សទាំងអស់ឲ្យទុកចិត្តលើព្រះគុណ និងព្រះចេស្ដានៃដង្វាយធួននៃព្រះយេស៊ូវគ្រីស្ទ ។ តាមរយៈពលិកម្មធួនរបស់ទ្រង់ យើងអាចកើននូវសេចក្តីក្លាហាន ដើម្បីយកឈ្នះលើសង្គ្រាមទាំងអស់ នៅក្នុងសម័យរបស់យើង សូម្បីនៅក្នុងគ្រាលំបាក ការសាកល្បង និងការល្បួងនានារបស់យើងក្ដី ។ ចូរយើងទុកចិត្តលើសេចក្តីស្រឡាញ់ និងព្រះចេស្ដាទ្រង់ដើម្បីសង្គ្រោះយើង ។ « ព្រះគ្រីស្ទ ទ្រង់មានព្រះបន្ទូលថា ៖
« ខ្ញុំជាផ្លូវ ជាសេចក្តីពិត ហើយជាជីវិត បើមិនមកតាមខ្ញុំ នោះគ្មានអ្នកណាទៅឯព្រះវរបិតាបានឡើយ » ។១៤
« ខ្ញុំជាពន្លឺលោកីយ៍ អ្នកណាដែលតាមខ្ញុំ នោះមិនដែលដើរក្នុងសេចក្តីងងឹតឡើយ គឺនឹងមានពន្លឺនៃជីវិតវិញ » ។១៥
« ខ្ញុំប្រាប់សេចក្តីទាំងនេះ ដើម្បីឲ្យអ្នករាល់គ្នា បានសេចក្តីសុខសាន្ត ។ « នៅលោកីយ៍នេះ នោះអ្នករាល់គ្នាមានសេចក្តីវេទនាមែន ប៉ុន្តែ ត្រូវសង្ឃឹមឡើង ដ្បិតខ្ញុំបានឈ្នះលោកីយ៍ហើយ » ។១៦
ខ្ញុំសូមថ្លែងទីបន្ទាល់អំពីការពិតទាំងនេះ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។