• Print
• Listen
  • MP3
• E-mail

Elder M. Russell Ballard,  “Mulimuli i Aoaoga Faavae ma le Talalelei a Keriso,”  Nov 2010

Faeasaite a le OAE mo le Autalavou Matutua • 7 Novema, 2010 • Iunivesite o Polika Iaga

O outou o se vaaiga matagofie, ma o alii ma tamaitai talavou silisili o le lalolagi atoa. Ua ia te outou le talalelei toefuataiina a Iesu Keriso e taiala ai o outou laasaga o le faatuatua i le lalolagi ua matuai faateleina le amioleaga i nei aso. Ua lelei tele mo au ma Tuafafine Ballard le faatasi ai ma outou i lenei afiafi, iinei i le Marriott Centre faapea outou uma o loo potopoto i isi fale i le salafa o le lalolagi. O le i ai o tekinolosi, ou te manatu ai o nisi o outou o loo faalogologo mai e ala i faasalalauga po o isi mea ofoofogia faaeletonika. Ae e le afaina po o fea o e i ai i lenei po, ou te lagona le faafetai e lauga atu ia te outou ma ou te tatalo o le a faamanuia le Alii ia i tatou i se mea o le a ou tautala atu ai ina ia fesoasoani ia te outou i o outou olaga i lenei taimi.

Ou te faafetai atu i le aufaipese a le Inisitituti o Mataupu Faalelotu a Logan mo le musika matagofie ma se agaga faafetai ou te faailoa atu ia Peresitene Tom Mullen, o se tasi o peresitene o siteki iinei, ma o se tasi o faifeautalai maoae na matou galulue faatasi ai ma Tuafafine Ballard i le Misiona a Toronto Kanata i le tele o tausaga ua mavae.

“E! O Le Togafiti Poto a Le ua Leaga”

O le po nei ou te fia tulitataoina le mea sa ou fai atu ai i le konafesi aoao na mavae atu nei. O outou o e na faafofoga— ma ou te faamoemoe o nisi o outou e mafai ona agavaa— ma mauaina fautuaga mai le Pulega Aoao ma taitai aoao o le Ekalesia. Atonu tou te manatuaina i la’u lauga sa ou faatusatusa ai se lago fai e faaaoga e se faifaiva i maunu faafoliga ia e faaaoga e Satani e pue ai i tatou ma toso atu ai i tatou i lona lalolagi matautia o le malaia.

Sa ou mauaina se tusi i nai aso talu ona maea le konafesi mai se alii talavou lelei e igoa ia Chayton Snider.  E 11 ona tausaga. Sa ia faalogo ia te au ma ia lafoina mai ai le ata tusi lena faatasi ma lana faamatalaga lenei: “O tagata faifaiva latou te tosoina mai i’a i se maunu fai, e faatusa lea i le auala e ‘tosoina’ ai i tatou e Satani i mea ua fai ma vaisu (o ‘maunu fai’ na). Pe a togi e le faifaiva le i’a i le matafaga ma toe taumafai ai le i’a e ‘tafiti’ atu i totonu o le vai, o lena ‘tafitifiti’ ou te manatu e faatusa i le auala tatou te tauivi ai e toe foi atu i le saogalemu o le vai o le talalelei, ae tatou te manaomia le fesoasoani mai le Tama Faalelagi ma Iesu Keriso e ō ese ai mai na vaisu.”1

Faafetai lava Chayton mo lau otootoga manino o la’u lauga o le konafesi.

Ou te sii mai i lena lauga: “E pei lava o le faifaiva i ‘ofe tā lea na te iloaina e ta’a’ina ia i’avai i le fiaai, o loo iloa foi e Lusifelo lo tatou ‘matelaina’, po o o vaivaiga, ma faaosoosoina i tatou i maunu taufaasese ia, afai e faaaogaina, e mafai ona faalavelaveina ai le filemu o o tatou olaga i ana faatosinaga lē alofa. Ma e le pei la o le tagata faifaiva lea na te pueina ma toe faasola le i’a i le vai e aunoa ma se manu’a, o Lusifelo o le a lē manao lava e faamamulu. O lana sini ia malaia ē ua ia faaaafiaina ia pei lava o ia.”2

Ia Tausisia le Faigofie o le Talalelei a Iesu Keriso

Ou te tatalo o le a faamanuia au e le Alii i le aoaoina atu o se mataupu faavae taua tele ia te outou. O le aoaoga faavae la lenei, “Ia tausisia le faigofie o le talalelei a Iesu Keriso.” Sa i ai i le aposetolo o Paulo lea atugaluga foi e tasi i ona aso ina ua ia fai mai, “A e ou te fefe, ina nei pei ona faaseseina o Eva e le gata i lana togafiti, e faapea ona faaleagaina o outou manatu ina ia le tonu ia Keriso” (2 Korinito 11:3).

I le Tusi a Mamona, na faamalamalama ai e le perofeta o Nifae le aoaoga faavae ma le talalelei a Keriso i faaupuga faigofie nei. O loo ou faatatau ma faasino i faamatalaga mai le 2 Nifae, mataupu e 31.

• • “Aua ua olioli lo’u agaga i le malamalama” (fuaiupu e 3).

• • “E mafai ea ona tatou mulimuli atu ia Iesu, pe afai tatou te le loto ina tausi i poloaiga a le Tama?” (fuaiupu e 10).

• • “Ua fetalai mai foi le Tama: Ia outou salamo, ma ia papatisoina outou i le suafa o lo’u Atalii Pele” (fuaiupu e 11).

• • “O le ua papatisoina i lo’u igoa, o ia ua foaiina i ai le Agaga Paia e le Tama” (fuaiupu e 12).

• • “Na ou faalogo foi i le siufofoga o le Tama, ua faapea mai: Ioe, e tonu ma ua faamaoni upu a la’u pele. O le tumau e oo i le iuga, e faaolaina lea” (fuaiupu e 15).

• • “Aua ana le se anoa le afioga lava a Keriso, ma le faatuatua e le mafaagaeetia ia te ia … po ua outou le o mai i nei mea” (fuaiupu e 19).

• • “Ou uso pele e, o le ala lava lenei; e leai foi se isi ala po o se isi igoa i lalo o le lagi e mafai ona faaolaina ai tagata i le malo o le Atua” (fuaiupu e 21).

• •  “O lenei, faauta, o le mataupu lenei a Keriso” (fuaiupu e 21).

Na faauigaina e le Perofeta o Iosefa Samita ia muai mataupu faavae ma sauniga o le talalelei i le faatuatuaga lona fa: “Muamua, o le Faatuatua i le Alii o Iesu Keriso; lona lua, o le Salamo; lona tolu, o le Papatisoina i le faatofuina mo le faamagaloina o agasala; lona fa, o le Faaee atu o lima e maua ai le mea foaifua o le Agaga Paia.”

Ou te fia taulai atu i le aoaoga faavae ma le talalelei a Keriso i le po nei. O lea ou tupulaga talavou pele e, ua matuai tele naua mea o loo tutupu i le lalolagi i le taimi nei ua tuu faafeagai tonu lava ma mataupu faavae o le talalelei. E ao ona e iloaina aoaoga faavae a Keriso ma ola ai ma puipuia i aso uma o lou olaga.

Tuu Atu i le Alii le Taimi Tutusa

I nai tausaga ua mavae sa oo mai ai se tasi o au faifeautalai ia te au. Sa ia fai mai: “Peresitene, ua amata mou atu la’u molimau. E i ai ni nai a’u fesili ia e le mafai ona taliina e se tasi. Ua fai mai lo’u epikopo ma le peresitene o le siteki e faagalo na fesili, ma e leai ni a la tali.”

Sa ou fai atu i ai e tusi mai ana fesili i se pepa ona fautuaina lea o ia e toe sau e vaai au i totonu o le sefulu aso, ma o le a ou taliina fesili taitasi uma o na fesili.

A o ia tuua lo’u ofisa, sa uunaia au e fesili atu ia te ia, “Faifeautalai, o anafea na gata ai lou faitauina o tusitusiga paia?”

Sa ia faailoa mai ua fai lava si leva.

Sa ou faapea atu, “Ua e tuuina mai ia te au se tofiga ma e fetaui foi la le tuu atu ia te oe o se tasi. Ia e faitau ia le itiiti ifo ma se itula mai i tusitusiga paia i aso taitasi seia e toe foi mai mo au tali.”

Sa ia malie i ai e faia lena mea.

Ina ua ia toe foi mai, ua ou saunia. Na ia fai mai: “Peresitene ou te le manaomia ni tali. Ou te iloa e moni le Tusi a Mamona. Ou te iloa o Iosefa Samita o se perofeta. O lea ua ou fiafia.”

Sa ou tali atu: “O le a avatu pea a’u tali. Sa ou galue malosi ai!” O nei mea uma e le faa_Mamona sa matou taulimaina lava.

Sa ou fesili atu ia te ia ina ua uma le ma talanoaga, “Faifeautalai, o a mea ua e aoaoina mai nei mea uma?”

Ona ia tuuina mai lea o se tali taua tele: “Ua ou iloaina ia tuu atu i le Alii le taimi tutusa!”

O lea, ia ta iloiloina faatasi ia aoaoga faavae autu ma le talalelei a Keriso.

Mataupu Faavae e 1: Faatuatua i le Alii o Iesu Keriso

O le muai mataupu faavae lava o le Faatuatua i le Alii o Iesu Keriso. “O le i ai o le faatuatua ia Keriso e aofia ai le i ai o se talitonuga maumaututu o Ia o le Alo e Toatasi na Fanaua o le Atua ma o le Faaola ma le Togiola o le lalolagi. Ua aoao mai la tatou aoaoga faavae e faapea, e mafai ona tatou toe foi atu e ola faatasi ma lo tatou Tama Faalelagi lea ua na o le faalagolago lava i le alofa tunoa ma le alofa mutimutivale o Lona Alo. Pe a tatou faatuatua ia Keriso, ua tatou taliaina ma faaaogaina Lana togiola ma Ana aoaoga. Ua tatou faatuatuaina o Ia ma mea ua Ia fetalai i ai. Tatou te iloa e ia te Ia le mana e tausia ai Ana folafolaga. E faamanuiaina e le Tama Faalelagi i latou o e e i ai le faatuatua e usiusitai ai i Lona Alo. …

“Tatou te talitonu ia Keriso ma tatou te talitonu e finagalo o Ia ia tatou tausia Ana poloaiga. Tatou te mananao e faaalia lo tatou faatuatua e ala i le usiusitai ia te Ia. …

“… E ala i lo tatou faatuatua ia Iesu Keriso, e mafai ai ona Ia faamaloloina i tatou, i le faaletino ma faaleagaga.”3

A’u uo talavou e, ia faaalu se minute e mafaufau ai i lou lava faatuatua i le Alii o Iesu Keriso a o ou fesili atu ia te outou nai fesili:

• 1. Pe o e fiafia ea i le taitaiga o loo agai i ai lou olaga ma le loloto o lou faatuatua i le Alii o Iesu Keriso?

• 2. Pe e te alofa ea i le Atua ma lou loto atoa, agaga, ma le malosi, ma le mafaufau, e pei ona aoao atu e le Alii i le aoao tulafono i leLuka 10? (tagai i le fuaiupu e 27).

• 3. Pe o e faia ea mea faigofie i lou olaga i aso uma?

  • a. Pe o e faia ea au tatalo i taeao uma ma po uma?

  • e. Pe o e faitau i aso uma i tusitusiga paia?

  • i. Pe o e faaaogaina gagana talafeagai?

  • o. Pe o e faamaoni ea?

  • u. Pe o e ola ea i le Upu o le Poto?

• 4. Pe o e agalelei ea ma manatu i manaoga o isi o siomiaina oe?

• 5. Pe o e mulimuli ea i fautuaga a le Usoga ia sa faamamafa mai i le konafesi lea na mavae atu nei e matua aloese mai soo se ituaiga o ponokalafi?

  E le mafai ona i ai ponokalafi i o tatou olaga pe afai e i ai so tatou faatuatua moni i le Alii o Iesu Keriso. Ou te fai atu ma le malosi uma o ia te au: afai o se faafitauli lenei mea i lou olaga, “Tuu loa!”

• 6. Pe o e ola agavaa ea mo se pepa faataga o le malumalu?

• 7. Pe o e auai ea ma le atoatoa i au sauniga o le Aso Sa, aemaise lava le sauniga faamanatuga—‘ai ma inu ma le agavaa i le faamanatuga ma faafouina au feagaiga ma le Alii?

• 8. Ia te outou o faifeautalai ua maea mai misiona, pe o outou faatumauina ea le mamalu o se auauna a le Alii o Iesu Keriso i ou laei ma i ou uiga patino?

• 9. Pe o e saunia ea ma saili ma le atoatoa ia maua sau soa e faavavau?

  E mafai ona ou faaaluina le po atoa i lenei fesili, ae ou te mautinoa i le taimi nei ua outou malamalama matou te le faatagaina le “tafafaovale.” Afai e te lei mauaina lena mea, ia maua loa i le po nei. I la outou gagana, “Ia faafilemu!” Matou te fautuaina tafaoga faamasani talafeagai— ua outou iloa lava, o se mea faigofie: e talosaga e se tama se teine mo se tafaoga faamasani, ma oulua maua faatasi ai se taimi fiafia. Pe o e sailia moni ea se soa e alofa i le Alii ma faamamaluina Lona suafa paia?

• 10. Ma outou na ua faaipoipo, pe o i ai pea ni po e eva ai [na o oulua] a o outou faaauau ona fausia ma faamalolosia a outou sootaga?

E moni, e i ai foi isi mea, ia e mafai ona ou faaopoopoina i le lisi. Peitai, afai o loo e tauivi ma le faamaoni e faia le mea silisili e te mafaia e mulimuli ai ia Keriso, ona mafai lea ona e taliina fesili faapenei i se Ioe leotele!

A o e mafaufau la i le po nei e uiga i lou faatuatua patino i le Alii o Iesu Keriso, e i ai ea soo se mea i lou olaga lea ua e iloaina nei e te le o manao ina ia i ai? Afai o i ai soo se mea ua e iloaina i lou loto e le o tusa ai ma se tasi e i ai le faatuatua moni i le Alii o Iesu Keriso, ia sei ou tau atu la ia te oe le auala e faaleleia ai.

Mataupu Faavae e 2: Salamo

O le Salamo o le mataupu faavae lona lua o le talalelei. “O lo tatou faatuatua ia Keriso ma lo tatou alofa mo Ia e taitai atu ai i tatou i le salamo po o le suia ai foi o tatou manatu, o talitonuga, ma amioga ia e le o ogatusa ma Lona finagalo. … Pe a tatou salamo, tatou te lagonaina le faanoanoa e tusa i le Atua, ma tatou taofia ai le faia o mea e sese ma [faateleina a tatou taumafaiga] e fai mea e sao. …

“E aumaia e le salamo faamaoni ni taunuuga. Tatou te lagonaina le faamagaloga a le Atua ma Lona filemu i o tatou olaga. E tafieseina lo tatou tausalaina ma le faanoanoa.”4

Uso e ma tuafafine, ia faafetai ua saunia e le talalelei a Iesu Keriso se auala e solaese ai mai mea sese tatou te faia e ala i le salamo faamaoni. Afai e le maua e se tasi le tomai e salamo ai, o le tele la o taimi o le a avea ai mausa iti ma se vaisu. E mafai e i tatou uma ona faigofie ona aloese mai le saisaitia i vaisu faigofie e ala i le lē tagofia o mea faatuinanau po o faatinoga ua fai ma vaisu. Ia aua lava nei sese ai a’u uo talavou pele, o i tatou uma lava ua taulai i ai Satani ma ana au. O le a ia faaaogaina uma maunu taufaasese po o togafiti ia na te faia e mafua ai ona e sese ma ou se’e ese ai mai a tatou tautinoga ma lo tatou tuuto faamaoni i le Alii.

Mataupu Faavae e 3: Papatisoga

O le mataupu faavae lona tolu o le talalelei o le papatisoga. O lenei mataupu faavae toetoe lava o outou uma o loo lagonaina mai lo’u leo, ua faatinoina. O le papatisoga i le faatofuina mo le faamagaloina o agasala o le feagaiga muamua lea tatou te osia i le va o i tatou lava ia ma le Alii o Iesu Keriso ma lo tatou Tama Faalelagi. O le papatisoga o se sauniga; o se “sauniga paia po o le aia tatou te faaalia ai ua tatou ulufale atu i se feagaiga ma le Atua,” ma e “finagalo pea le Atua i Ana fanau ia osia feagaiga. O se feagaiga o se maliega mausali ma le paia i le va o le Atua ma le tagata. Ua folafola mai e le Atua e faamanuia i tatou, ma ua tatou folafola atu e usiusitai ia te Ia. … O le tausia o feagaiga e aumai ai faamanuiaga i lenei olaga ma le faaeaga i le olaga a sau.”5

Manatua, na faatulagaina e Keriso le faataitaiga mo i tatou e ala i le papatisoina o Ia. Ma ua faamanuiaina i tatou i le avanoa e aai ma feinu i le faamanatuga i vaiaso taitasi, lea e “fesoasoani ai ia i tatou e faatumauina le agavaa e maua ai le Agaga e faatasi ma i tatou i taimi uma. O se faamanatu faalevaiaso o a tatou feagaiga”6 ma fesoasoani ia i tatou e fausia lo tatou faatuatua ma le faalagolago i le Alii o Iesu Keriso.

Mataupu Faavae e 4: O Le Mea Foai Fua o le Agaga Paia

O le mataupu faavae lona fa o le mea foai fua o le Agaga Paia. “Na aoao mai Iesu e ao ona papatisoina i tatou i le vai faapea foi ma le Agaga. O le papatisoga i le vai e ao ona sosoo ai ma le papatisoga a le Agaga, a leai e le atoa. Ua na o lo tatou mauaina o le papatisoga ma le meaalofa o le Agaga Paia e mafai ai ona tatou mauaina le faamagaloga o a tatou agasala ma avea ai ma ē toe fanaufouina faaleagaga atoatoa. …

“… E molimau mai le Agaga Paia ia Keriso ma fesoasoani mai ia i tatou ia iloa le upumoni. Na te aumaia le malosiaga faaleagaga ma fesoasoani ia i tatou e faia le mea e sao. Na te [aumaia ia i tatou le filemu] ma faamafanafana i tatou i taimi o tofotofoga po o faanoanoaga. Na te lapatai i tatou i tulaga matautia faaleagaga po o le faaletino. … E ala mai i le mana o le Agaga Paia e mafai ai ona tatou lagonaina le alofa o le Atua ma le taitaiga mo i tatou uma lava. O lenei meaalofa o se muai tofo lea i le olioli e faavavau ma se folafolaga o le ola e faavavau.”7

Mataupu Faavae e 5: Tumau seia oo i le Iuga

{ Ma le mea mulimuli, o le mataupu faavae lona lima: e ao ona tatou tumau seia oo i le iuga. “O le taimi lava tatou te tuvae ai i le ala sao ma le vaapiapi e ala i lo tatou faatuatua ia Iesu Keriso, salamo ma le sauniga o le papatisoga ma le [mauaina o le Agaga Paia], e ao ai ona tatou faia taumafaiga uma e tumau ai i luga o le ala.”8

I tausaga ua mavae, sa tulai ai lo matou peteriaka faamaoni o le siteki pe a ma le iva sefulu ona tausaga i le sauniga molimau ma anapogi ma saunoa i se mea o le a le mafai o na galo ia te au: “Ou te tatalo i po uma o le a silasila mai le Atua ia te au ua ou oti saogalemu ma la’u molimau o loo mu saesae.”

Sa ou fai atu ia te ia, “Peteriaka, i tagata uma lava ou te iloa, e mautinoa lava e le tau manaomia ona e toe popole i lena mea!”

Sa ia uumau i le kola o lo’u peleue, ma toso au i luga ina ia faafesagai vavalalata o ma mata, ma sa ia tilotilo mai i o’u mata, ma fai mai i nei upu: “Atalii”—sa ou faaipoipo ma ua toalua lau fanau! “Atalii, e leai se tasi ua malupuipuia seiloga ua oo i le iuga.”

Ia faapena foi i tatou taitoatasi ina ia tatou faamaoni e oo i le iuga.

O lea la, o le aoaoga faavae o le faatuatua ia Keriso, salamo, o le osia ma le faafouina ma le tausia o feagaiga, ma le taitaia e le Agaga o le a avea o se mamanu o le olaga. O a tatou faatinoga i le olaga i aso uma o loo fauina ma puleaina e nei mataupu faavae.

O Le Talalelei a Iesu Keriso O Le Ala Laupapa lea i le Va o le Muai Olaga ma le Ola e Faavavau

O lea, ou te iloa o nisi o outou faifeautalai ua maea misiona o loo outou faapea ifo ia te outou, o loo sii mai e Elder Ballard nisi o nei mea mai aoaoga faavae o loo i le tusi musuia o leTalai La’u Talalelei. Ou te faamoemoe o loo outou matauina nisi o nei upu ma ua outou teufatuina o latou uiga i o outou olaga. O outou na alii ma tamaitai talavou e lei faamisiona, e mafai ona ou fautua atu e sili atu le lelei mo outou pe a i ai se kopi o le Talai La’u Talalelei. Suesue le mataupu e tolu, le lesona ua faaulutalaina “O Le Talalelei a Iesu Keriso.” Ua matua faataoto manino mai ai ma auiliili tele ai laasaga faavae talafeagai e aloese ai mai le mauaina e maunu fai a Satani ma toso ese atu ai mai le ala lea e tau atu i le ola e faavavau.

E maeu le faigofie o le talalelei a Iesu Keriso! E maeu foi le taua mo i tatou le tumau ai i luga o le ala e tasi ua faamalamalama mai e le Atua o le auala e toe foi atu ai i Lona afioaga e faavavau. O le talalelei o le ala o le fiafia; e faigofie lava ma matagofie.

Sei ou faaali atu le auala e faapei ai muai mataupu faavae o le talalelei o se ala laupapa i le va o le muai olaga (suitulaga e le siiina o lou lima agavale) ma le ola e faavavau (suitulaga e le siiina o lou lima taumatau). O le ala laupapa i le va o le lua o le talalelei a Iesu Keriso. Ua tatou o mai mai le muai olaga i le olaga faaletino e tauivi e iloa ma ia ola i mataupu faavae o le talalelei. Ua tatou mauaina i tatou lava iinei i le lalolagi, ma e tatou te toe foi atu, ma le faamoemoe, i le afioaga o le Atua. E manaomia ai le malamalama ma le usitai. O la tatou sini a o tatou tauivi e ola i le talalelei o le avea lea ma suitauva e mauaina ia faamanuiaga uma ua faapolopoloina e lo tatou Tama mo Lana fanau faamaoni ma le tauaogaina.

Na fetalai Iesu:

“O le poloaiga lenei: Ina salamo ia outou tuluiga uma o le lalolagi, ma o mai ia te au, ma ia papatisoina i lo’u igoa, ina ia faapaiaina outou i le Agaga Paia tou te talia, ina ia outou tutu ma le le pona i ou luma i le aso gataaga.

“E moni, e moni, ou te fai atu ia te outou, o la’u talalelei lenei; ua outou iloa foi mea e tatau ona outou faia i la’u ekalesia” (3 Nifae 27:20–21).

Ua I Ai lo Outou Lumanai Maoae e Tulimatai Atu I Ai

Ou te toe foi mai ma toe fesili atu foi ia te outou e mafaufau i o outou lava olaga. O faapefea mai outou? O i ai ea se mea i lou olaga ua mafua ai ona e se’e ese mai aoaoga o le talalelei i faatosinaga a Satani? Pe o e tuuina atu ea i le Alii se taimi tutusa? Ua outou soifua i se lalolagi ua faatumulia i tekinolosi ia ua faigofie ai ona maua faamatalaga faaeletonika, faafiafiaga, ma fegalegaleaiga i luga o a outou komepiuta i le fale, o a outou iPad, po o a outou iPhone. E lei i ai lava se tupulaga na muamua atu ia te outou sa sili atu ona tele naua ni tekinolosi i o latou tamatamai lima. E ala i le Facebook ma isi fesootaiga ua mafai ai ona outou fesootai ma uo i le lalolagi atoa. E ui lava e ofoofogia nei meafaigaluega, ou te lapatai atu ia te outou ina ia aua nei avea le faaaogaina o tekinolosi e faoa ai ou taimi i se tulaga e avea ai ma vaisu e faaaogaina ai pea i taimi uma. E manaomia lava ona faatapulaaina lou faaaogaina o na mea ina ia latou le fāoa mai ia te oe le mea e taua, faapelepele, ma faavavau.

Ua lava lo tatou matamata i talafou i le po ma le faitauina o nusipepa e iloa ai le pagatia tele ua i ai le lalolagi. Ua i ai mafuie, o afa, ma asiosio i lea mea ma lea mea. Ua i ai le oge ma puapuaga ma tulafono o le fasiotia o ituaiga, ae le ta’ua ai le fasioti tagata ma isi faatinoga o taua.

O nisi o outou atonu ua mafaufau i le lalolagi i le asō, e le o taofia e le lumanai ni mea se tele e tauivi i ai. Ou te manatua a o o’u tamaitiiti ua sefulutolu o’u tausga ua foi atu i le fale mai le sauniga perisitua i le Aso Sa, 7 o Tesema, 1941, sa ou iloa mai o’u matua, faatoa uma lava ona tu’ipomuina e Iapani le Pearl Habour. O iina na vilitū ai le Iunaite Setete i se taua a le lalolagi lea ua leva ona vevela i Europa mo le lua tausaga. Sa foliga mai i le olaga sa matou iloaina, o le a faamutaina. Sa tele le le mautonu a o valaauina le tele o alii talavou i le auaunaga faamiliteli. Peitai, e tutusa lava le taimi nei ma lena taimi, e ui i le lotolotoi ai o taua uma, o tauiviga, ma faatosinaga a le tiapolo i le lalolagi, ae o loo i ai lava se lelei tele.

Ina ua ou fanau mai—i se taimi ua mamao atu, a o outou i ai uma i le lalolagi o agaga— pe tusa na o le 20 atunuu sa foliga mai na mafai e se tasi ona faaigoaina o faiga faatemokalasi, lea e olioli ai tagatanuu e oo lava i sina vaegāmea o le saolotoga tatou te le o faatauaina. O lea la ua silia nei ma le 90. O lona uiga ua toatele atu tagata o le lalolagi ua mafai ona ola o latou soifuaga i le saolotoga e tusa ma o latou lava talitonuga.

I le aso, i le salafa o le lalolagi, ua tuuitiitia le mativa ma o manuia faalesoifua maloloina ua faaleleia, aemaise lava i tulaga tau i le faamamaina o le suavai ma le vai taumafa i atunuu tauatiae. E ese le ofoofogia o mea o tutupu. O avanoa tau aoaoga ua tele foi ina maua i le lalolagi atoa.

E tele lava mafuaaga mo outou e faatumulia ai i le faamoemoe ma mea lelei. Aua nei uunaia oe e Satani ona e le talitonu ai lea i le lumanai maoae e tatau ona e tulimatai atu i ai.

O Outou o Taitai o le Ekalesia i le Lumanai

Tatou te saunia uma e olioli i le olaga e ala i faaiuga tatou te faia i aso uma. Afai tou te faamaoni ma faatuatua i aoaoga faavae ma le talalelei a Keriso, e tele avanoa matagofie i le olaga o le a fai mo outou. I le Ekalesia, o o outou taitai i le uarota, siteki, ma tulaga aoao o le a musuia e valaau outou e auauna i na tofiga ua outou saunia i ai outou lava o se taunuuga o a outou filifiliga atamamai e tausia poloaiga a le Atua.

I le tolusefulu tausaga mai le asō o le taitaiga o le Ekalesia o le a matuā faalagolago i le lelei ona saunia o outou taitoatasi e faataunuu valaauga o le a outou maua, e auauna ai i le Ekalesia.

Mafaufau i le mea lenei— e 98 tausaga, mai le 1830 i le 1928 (o le tausaga na ou fanau ai), na faatulaga ai e le Ekalesia ona uluai siteki e 100. O siteki e 100 lona lua na faatulaga i totonu o le luasefulu fa tausaga na sosoo ai. Ona amata lea ona vaaia le tatala mai o se ata manaia. I le faaiuga o le 1960, e na o le valu tausaga mulimuli ane ai, na faatulaga ai le siteki lona 300 i Toronto, Kanata i le taimi lena a o avea Peresitene Thomas S. Monson ma peresitene o le misiona iina. I le lua vaiaso talu ai, sa ma i ai ma Tuafafine Ballard i le konafesi a le Siteki o Toronto Kanata, na faamanatu ai le iupeli po o le 50 tausaga.

I le 1964, na o le fa tausaga talu ona faavaeina le siteki lona 300, ae faatulagaina le siteki lona 400. O isi siteki e lua selau na faatulagaina i le isi iva tausaga na sosoo ai, ma o le siteki lona 900 na faatulagaina ia Mati o le 1978. E le o toe mamao ae faavaeina le siteki lona 3000.

E faapefea ona faiā lenei mea ma outou alii ma tamaitai talavou? Faapea la e faavaeina e le Ekalesia siteki e 100 i le tausaga. O lona uiga e oo atu i le 2040, e na o le tolusefulu tausaga mai le asō, o le a faaluaina le aofai o siteki pe tusa ma le 6,000. O le a ta’i 40 ma ona tupu o outou tausaga po ua amata foi le ta’i 50. Fesili ifo la ia te oe lava— o fea o i ai peresitene o siteki e 6,000? O fea o i ai o latou fesoasoani muamua, fesoasoani lua, failautusi faapitoa, failautusi? O fea o i ai le 6,000 faatele i le sefululua, po o le 72,000 o fautua maualuga? Ma a faapea e tofu siteki ma iunite e taisefulu— e tali tutusa lava ma le averesi o i ai siteki i le aso—o fea o i ai epikopo e 60,000, o fesoasoani muamua, ma fesoasoani lona lua, failautusi faapitoa, o failautusi, o peresitene o korama a toeaina ma o latou fesoasoani, o taitai vaega o faitaulaga sili ma o latou fesoasoani, o peresitene o le Aualofa, Tamaitai Talavou, ma le Peraimeri ma o latou fesoasoani, ma faapena ai lava? O fea o i ai i latou? O loo ou tautala atu ia i latou i le taimi nei. O outou o i latou! Ua outou saunia e talia valaauga o le a tuuina atu e le Alii ia te outou?

E I Ai se Fuafuaga e Faavavau mo Outou

E i ai se fuafuaga e faavavau a le Tama Faalelagi mo outou. O lo outou tofi, o le avanoa ua outou maua i le avea ai ma tagata o Le Ekalesia a Iesu Keriso o le Au Paia o Aso e Gata Ai, e pei lava o se vavega i se lalolagi o i ai ni tagata e ono piliona. Sa outou faia ni folafolaga e sili ona taua ma ni tautinoga i le Tama Faalelagi a o ola faatasi ai ma Ia i le muai olaga i le lalolagi o agaga.

Atonu tou te tau manatu pe faapefea ona oo atu igoa o taitai o ausilali, o epikopo, o peresitene o siteki, ma le Pulega Aoao i mafaufau o i latou ua i ai le tiutetauave e tuuina atu na valaauga e galulue ai. Pe faapefea ona iloa e se peresitene o se siteki le tagata o le a avea ma se epikopo? Pe faapefea ona iloa e le Pulega Aoao se tagata o le a avea ma se peresitene o se siteki? (O le asō na tuu ai ou lima i luga o le ao o se peresitene o le siteki fou e vaetofiaina o ia. Sa matou toe faatulagaina le siteki i le faaiuga o le vaiaso. O se fiafiaga lena mea—o se tiutetauave faagaeetia!) Pe faapefea ona iloa e le Peresitene o le Ekalesia se tagata o le a avea ma se Pulega Aoao? Ofaaaliga e iloa ai e i latou ia igoa ua faamaonia ua latou faamaoni ma tauaogaina ma o loo ola i aoaoga faavae autu o le talalelei a Keriso.

Aua lava nei maea se aso e te lei tauivi e saunia e auauna atu. Manatua, o le olaga faaletino o le taimi lea tatou te saunia ai e fetaiai ma le Atua. Ioe, na aoao mai Amoleka:

“Aua faauta, e tatau i tagata ona sauniuni i lenei olaga e fetaia’i ma le Atua; ioe, faauta, o le aso o lenei olaga, o le aso lea e tatau ona fai ai e tagata a latou galuega.

“O lenei foi, e pei ona ou muai fai atu ia te outou, ona ua ia te outou nei molimau e toatele, o le mea lea, ou te aioi atu ai ia te outou, aua tou te faatuai le aso o lo outou salamo e oo i le iuga; aua pe a mavae atu le aso nei o le ola, ua tuuina mai e sauniuni ai i le ola faavavau, faauta, afai tatou te le faaaoga o tatou aso manu o i lenei olaga, ona oo mai ai lea o le po o le pogisa, e le mafai ona fai ai se galuega e tasi” (Alema 34:32–33).

O aso uma lava o lou olaga o le a fesoasoani atu ai le Alii ia te oe pe afai e te faalagolago ia te Ia ma tausia Ana poloaiga. E faailoa atu e le Alii i le taitai o loo i ai lea tiutetauave ua e saunia e auauna atu aua o loo e tumau i le ala o le talalelei, o loo e ola i tautinoga na e faia ae e te lei fanau mai, ma o le talalelei a Iesu Keriso e taialaina lou olaga i aso uma.

Ou te fia fautua atu ia e amata nei ona talia valaauga. O le a saunia ai oe mo valaauga i le lumanai e auauna atu ai i le Ekalesia.

Ia fai mea e talafeagai e fausia ai se sootaga moni ma lou Tama Faalelagi. O outou o Ona atalii ma afafine faaleagaga. O o outou matua faalelagi e alolofa ia te outou ma ō La’ua loto atoa, e pei foi o le Alii o Iesu Keriso. Latou te finagalo ia outou mulimuli i le ala sili o le fiafia o le a taitai saogalemu atu ai outou e foi atu i lo Latou afioaga.

Tumau le Taula i le Talalelei a Iesu Keriso

A o tatou faamaeaina faatasi lenei sauniga, ou te tatalo ia taitasi outou ma tauivi e le aunoa e tumau le taula i mataupu faavae ma sauniga o le talalelei. Ia tuu atu e le aunoa i le Alii taimi tutusa ina ia le felafoaiina a outou molimau i aoaoga sese a le lalolagi. Faalogo i le Usoga. Ua matou faia mea uma matou te iloa e aoao atu ai ia te outou le upu moni ma uunaia outou e pipiimau atu i na mea o le a tausia outou ina ia saogalemu ma saoloto. Ia faia le mea sa’o mo mafuaaga sa’o, ona e saogalemu ai lea.

Ia tapena i auala uma e saunia ai pe a manaomia la outou auaunaga e le Alii i Lana Ekalesia. A o e alu atu i le lalolagi, o le a tofotofoina pea oe. O le isi faamoemoega lena o le olaga. Ua aumai i tatou iinei e iloa ai pe faapei moni la tatou tautinoga ma le tuuto. E faafiafiaina le talitonu e mafai ona tatou siitia atu i luga ma ia avea ma e sili atu le mulimuli i poloaiga ma aoaoga a le Alii o Iesu Keriso.

Ou te fiafia i le solo lenei; e faatatau ia i tatou uma lava.  Ua faaautuina “O Le Laau o le Aruna” na saunia e Johnny Ray Ryder Jr.

O se matagi malosi e agi i le po ma le ao.
Na te gaoia mai le laau o le Aruna ona lau,
Ona gauia lea o ona lala tetele ma ona pa’u ua saeia
Seia oo ina vaivai le aruna ua ōia.
Ae o loo mau pea le laau o le aruna i le palapala
A ua pauu ifo i lalo isi laau i ona autafa.
Sa fiu le matagi ua vāivāi ma fai atu ina ua uma,
“Ua mafai faapefea ona e saga tu, Aruna?”
Fai mai le laau o le aruna, “Ou te iloa
E mafai ona e ta’i gauluaina o’u lala,
Ma aveesea taitasi o’u lau,
Luluina o’u pona, ma felafoaiina a’u.
Ae e i ai o’u aa ua faaloloa i le eleele,
Ua atili malolosi talu mai lo’u pepe.
O le a e lē pa’i lava i ai,
Aua o o’u vaega loloto ia ou te to’a ai.
E oo mai lava i le asō, ou te lei mautinoa
Le tele e mafai ona ou onosa’ia atoa.
O lea ua ou iloa, ma e avatu ai la’u faafetai,
Ua sili atu lo’u malosi nai lo le mea sa i ai.

Ou uso e ma tamaitai talavou pele, ia faapei o le laau malosi o le aruna. Ia e iloa pe faapei lou malosi. Tulei lo outou faatuatua ma le faalagolago i le Atua ma Keriso i le loloto o le eleele o le talalelei. Faaeteete i lago fai ua faailoa mai ia i tatou e le faifaiva taufaasese o tagata, o Lusifelo. Ia tatou maua le atamai ma le malamalama faaleagaga e iloatino ai ma teena ana ofo matautia e tele. Ola i aoaoga faavae a Keriso, o mataupu faavae autu faigofie o le talalelei, i aso taitasi—ia faatuatua i le Alii o Iesu Keriso, salamo, faamamalu i feagaiga o le papatisoga, ola agavaa ina ia avea ai le Agaga Paia ma ou soa, ma ia tumau ai seia oo i le iuga. Ia faia lenei mea i aso uma, ma o le a i ai le Agaga o le Alii faatasi ma outou e tausia saogalemu outou i le ala e tau atu i le ola e faavavau.

Molimau

Ou te tuuina atu lau molimau ia te outou. Ou te manao ia outou iloa matou te alolofa ia te outou. O le a outou amoina i o outou tauau le lumanai o lenei Ekalesia. E maoae lo outou taunuuga. Ou te tatalo ma lou loto atoa o le a outou faia na mea e manaomia tou te faia i le po nei ina ia faasao ai nisi o ala o loo outou ola ai. Ma e ou te molimau atu ia te outou o Iesu o le Keriso.  O loo soifua o Ia. O Lana Ekalesia moni lenei. Ua tatou i ai i Lana galuega. O i tatou o Ona tagata o le feagaiga. Ou te iloa lena mea. Ou te molimau atu ma tatalo atu i le taimi nei ina ia faamanuiaina outou e le Alii. Ou te tuuina atu ai lena faamanuiaga i outou luga i Lona suafa paia—ma ia outou maua le filemu, olioli, ma le faamautinoaga toafilemu i o outou lava loto o loo outou faia le mea sili tou te mafaia ina ia agavaa ai mo Lona suafa paia. Ia faamanuiaina outou i le aso ma aso uma o o outou olaga, o lau tatalo ma lau molimau lea i le agaga lotomaualalo, faatasi ai ma faamanuiaga i le suafa o Iesu Keriso, amene.

© 2010 Puletaofia e le Intellectual Reserve, Inc. Ua taofia aia tatau uma. Faamaonia le faaPeretania: 10/09.  Faamaonia le faaliliuga: 10/09.  Faaliliuga o le Follow the Doctrine and Gospel of Christ. Samoan. PD50021042 890

^ Back to top