Elder L. Tom Perry, “O I Matou o Le Tupulaga sa Silisili,” Mar 2011
Faeasaite a le OAE mo Talavou Matutua • 6 Mati, 2011 • Iunivesite a Polika Iaga
O se lagona lofituina i taimi uma pe a ou tu atu ma vaavaai atu i lenei vaega o le autalavou matutua aulelei ma lalelei. Ua atili foi le le maumanatu i le iloa e fiasefulu afe outou o loo aofaga potopoto i vaega eseese o le lalolagi.
O Outou o le Lumanai o le Ekalesia.
A o telelise le aluga o tausaga, o le a outou toe tepa i tua i lenei taimi o se tasi o taimi e sili ona faafiafiaina o vaitaimi o o outou olaga. Ou te matua faatuatuaina ma talitonuina le autalavou matutua o le Ekalesia. O se tasi o faaaliga sili ona manino sa ou mauaina, na oo mai a o ou sauniuni e pulefaamalumalu i le Eria o Europa Tutotonu.
I se po o le le maua o se moe na ou maua ai se uunaiga e faapea, o talavou matutua o le lumanai lea o le ekalesia i Europa ma sa manaomia ona ou taulai atu ia i latou Na avea o se tasi o vaitaimi sili ona faamanuiaina o la’u galuega umi. Sa tupu nisi o taunuuga faamalieina tele i nai tausaga ua mavae atu a o matou faalogo atu i o outou manatu ma popolega.
Sa tatou aoao faatasi ai i le auala e fesoasoani ai ia te outou e aumai ni uo se toatele tou te tapuai faatasi. Ua ou vaaia le mana faatauanau faaleagaga o le autalavou matutua o le Ekalesia. Ou te iloa o outou malosiaga. Ua ou vaaia le auala tou te faamalolosia ai le tasi ma le isi ma aumai ai faauooga i se malamalama o le talalelei toefuataiina a Iesu Keriso.
Tou te talavou, ae ua ou matua. E tele tausaga tatou te va ai. A o ou pei o outou, sa ou faaaogaina se tulafono vave e su’e ai a’u tali i la’u vasega tausi tusi. O le a ou tuu atua se faatinoga i le auala e galuea ai lenei tulafono. Ou te tautala i se saoasaoa e 140 upu i le minute pe a ou lauga. Pe a ou faaaogaina le tulafono vave lea i le aofaiga o upu ou te tautala ai, ou te matauina le umi o le a i ai le lauga. Mo au lava ia, o lenei tulafono e sili atu ona vave nai lo masini faaonapo nei. Ae ina ia ogatasi ma o outou mafaufau atamamai, mo le toetoe lava o masini uma na ia te au ua ou masani ai i meafaigaluega faaonapo nei o aso nei.
Ina ia o faatasi ma lo outou saoasaoa sa manaomia ai ona ou faia le tele o suiga ina ia latalata ai i tekinolosi fou. Sa ou aoaoina le auala e faaaoga ai se komepetomita, o se kata e ta ai mea o le 1401 ma se komepiuta e teu ai tisiketi e 360, o se komepiuta feavea’i, se Masini Eletonika Feavea’i e tusitusi ai, se Blackberry, se iPod, se iPhone ma lea ua i ai la’u iPad. Faaopoopo na mea i le Facebook, Twitter, blogs, ma le YouTube. Mafaufau la pe faape’ī mo se toeaina ua 88 tausaga le matua o loo taumafai e o faatasi ma outou!
O se tofotofoga tele mo la’u tupulaga i le taumafai e ola ai ma matau mea o loo outou atiina ae. Ae e tasi se mea e sili atu ai matou ia te outou. Ua matou oo i suiga uma nei. Ua matou maua ai se aafiaga e ala i se malamalama o nisi o na mea faavae taua ia o loo i ai pea se taua tele e fai ma faavae e fausia ai. E na ona outou faitau lava i ai. Ou te fia talanoa atu ia te outou e uiga i nisi o nei faavae autu e le tatau ona lafoaia pe faaleaogaina.
Ia Fai Outou ma Tupulaga E Aupito Silisili
I nai tausaga ua mavae atu na faamatala ai e se tusitala lauiloa ia alii ma tamaitai o lo’u vaitaimi “o le tupulaga silisili.” Na faamalamalama mai e le tusitala o Tom Brokaw:
“O nei alii ma tamaitai na tuputupu ae i le taimi o le Pau Tele o le Tamaoaiga, a o sosolo le faaletonu faaletamaoaiga e pei o se mala i le laueleele. Na latou vaai i o latou matua ua leai ni a latou pisinisi, o a latou faatoaga, o a latou galuega, o latou faamoemoe. Na tatau ona latou aoaoina e talia se lumanai e tupu i le tasi le aso i le taimi. Ae ina ua tau toe amata ona lelei le tamaoaiga, sa tupu se taua tele i Europa ma Asia. … Na tofia lenei tupulaga i le laueleele e saunia ai fitafita ma faatonu ia saunia mo le taua. Na latou tuua a latou faatoaga … , a latou galuega i le taulaga … , na lafoaia o latou tulaga i falegaosi oloa … ma a latou galuega i Wall Street, na faamuta le a’oga pe o mai sa’o lava mai le faauuga i le toniga a fitafita. …
“Na latou feagai ma faafitauli tetele ma le tuai ona auai atu i le taua, ae latou te lei tetee. I se taimi i o latou olaga lea sa tatau ai ona faatumulia o latou ao ma po i se malaga le ta’usalaina, alofa, ma lesona o le galue ina ia maua mea e ola ai i le lalolagi, sa latou tau faatasi pea, i tulaga sili faaanamua. … Sa latou i ai i le vateatea i aso uma, i le vanimonimo na faatumulia i le matautia, ma na latou o atu i le vasa i luga o sami o le fili ua aveesea mamao mai o latou laueleele. …
“Ina ua maea le taua, o alii ma tamaitai na aofia ai … na auai i se fiafia puupuu ma le olioli, ona amata loa lea o le galuega o le toefausia o o latou olaga ma le lalolagi na latou mananao i ai. Na matutua atu i latou nai lo o latou tausaga, na fetuuna’ia i mea na latou oo i ai, ma aoaiina i mea na latou … aoaoina ma osigataulagaina. Na latou faaipoipo lelei ma fanau mai ai se isi … tupulaga. … Na latou faamaoni i o latou tulaga faatauaina o tiutetauave patino, matafaioi, mamalu, ma le faatuatua.”1
A o ou pei o outou na ou tulimatai atu lava i mea e tasi ia tou te mananao ai i aso nei. Sa matou naunau i fealofaniga faaleuō, aoaoga, galuega ma faaipoipoga. Ae na valaauina i matou ma auina atu i tulimanu e fa o le lalolagi ia tau ai i taua matautia e puipui a matou aia tatau ina ia olioli ai i le saolotoga e mafaufau ai, galue, tutu faatasi ai ma pulea, ia malupuipuia e tulafono. O la matou tautua e lei faia mo na o i matou lava—sa fai ma o matou sao mo tupulaga o le a mulimuli mai ia i matou. Sa matou o atu ma le loto i ai. Sa i ai se lototoa tele.
E ui ou te le umia le suafa mo na o au lava ia, ae o au o se tasi o totoe mai “o le tupulaga silisili.” A o ou vaai atu i le lumanai—ma a o ou vaai atu i lo outou lumanai—ou te tatalo o le a outou laa atu i luma ma amatalia o outou tiutetauave o le faasaoina o le tofi tautupu o o tatou taimi ua tuanai. Ou te tatalo ia i ai se aso i le lumanai o le a lauiloa ai outou “o le tupulaga aupito silisili.”
O le a matuai ese lava la outou taua. Ou te matua nofouta o le a sili atu o outou luitau nai lo matou. Na matou iloa o matou fili i le malae o le taua. Na latou tafanaina i matou! O le fili i aso nei ua sili atu ona taufaamatau. E na te le faafetaia’ia pea i tatou mai luma. Ae lafi o ia toetoe lava o masini uma ia ua iloa e tagata. O lana fuafuaga ia toto ni manatu leaga iinei ma iina, e taitai ese ai i tatou mai uiga mama na aoao ai i tatou e la tatou talafaasolopito mamalu. I ana fuafuaga poto ua ia fatuina ai se auala e faavaivaia ai lo tatou faatuatuaga faa-Kerisiano.
O le po nei ou te fia talanoa atu ia te outou e uiga i le faavae ua faavaivaia o le faatuatuaga Kerisiano i le lalolagi atoa.
Faamalosi le Faatuatua i le Faaola
Ua ia te oe se matafaioi e fesoasoani ai i le fanau a lo tatou Tama i le Lagi ia toe foi mai i o latou faavae faaKerisiano e ala i le atiina ae o le faatuatua i le Faaola ma Ona ala.
Na faaalia le faanoanoa o Pope Benedict le XVI [i le] faavaivaia [o] ekalesia i Europa, Ausetalia, ma le [Iunaite Setete. Na ia fai mai:] ‘Ua le o toe i ai se faamaoniga mo se manaomia o le Atua, e oo foi ia Keriso. … E foliga mai ua mate atu lotu ia na ta’ua o ekalesia faavae.’”2
Ua tatou o ese mai tapuaiga faaanamua. E toatele tagata ua faapea mai o latou o tagata faaleagaga nai lo o ni tagata faalelotu—afai e talafeagai se aoaoga ma o latou olaga, o le a latou taliaina ma avea o se vaega o lo latou faatuatua. Afai e leai, latou te atiina ae se faatuatua e fai e le tagata lava ia. O le faatuatua ma le faaleagaga ua tagai nei i ai o ni fua e faaaoga e tagata. Ua suitulaga mea faalelalolagi i le Atua. E tatau ona lagonaina o tatou leo i le tetee atu i nei faiga matautia ia ua fuafuaina e faaumatia le faatuatua o tagata.
Ua lapatai mai pea lava pea i tatou e le Tusi a Mamona i le suitulagaina o lo tatou faatuatuaina o le Atua i mea na e le tumau. I le faamatalaina o se taimi na see ese ai sa Nifae mai lo latou faatuatua, na ta’ua e le Tusi a Mamona, “Ua faamaualuluga i latou, aua ua fefete o latou loto ona o a latou oloa matua tele; o lea ua tamaoaiga ai i latou i la latou lava vaai, ma ua le mafafai ai ona gauai i upu a [perofeta], e savavali ai ma le tonu i luma o le Atua” (Alema 45:24).
Au uo talavou e, a o outou vaaia le faavaivaia o le faatuatua Kerisiano i malo, e tatau ona faateleina le mausali ma le mautinoa sili o lou lava faatuatua. Fai mai Helamana “Ia manatua lava, e ao ina oulua atiina ae lo oulua faavae i luga o le papa o lo tatou Togiola, o le Keriso lea, o le Alo o le Atua. Pe a faaoo mai e le tiapolo ana matagi tetele, ioe, o ana u fanafana i le asiosio, ioe, pe a pesi mai ia te oulua lana uatoa uma lava ma ana afa, e le malo ai ia te oulua, e toso ifo ai oulua i le vanu o le puapuaga ma le auega e le gata, ona o le papa ua atiina ae ai oulua, o le faavae mau lea, o le faavae foi lea, afai e ati ae tagata i ona luga, e le mafai lava ona pauu i latou” (Helamana 5:12).
Na faamanatu mai e Nifae ia i tatou: “Ua matou tautalatala ia Keriso, ua matou olioli ia Keriso, ua matou talai atu Keriso, ua matou vavalo atu foi ia Keriso, ua matou tusitusi e uiga i a matou valoaga, ina ia iloa e a matou fanau le mea latou te faamoemoe ai mo le faamagaloina o a latou agasala [ma] o lena ola o loo ia Keriso., [ma] o le ala moni lenei ia talitonu ia Keriso.” … Aua o le ala moni lenei ia talitonu ia Keriso” (2 Nifae 25:26–28).
Pe i ai sa tatou faavae e lagolago ai sea manatu?
O Faatusa o le Taulaga a Keriso Ua Tumau i Augatupulaga Uma
O le mea moni silisili na faamaumauina i le talafaasolopito uma o le tala lea i le misiona a lo tatou Alii ma le Faaola i le lalolagi. Na valoia Lana misiona mai le amataga o aso o le tagata i le lalolagi.
Sei o tatou faaaogaina lava se faataitaiga se tasi. I le Mose mataupu 5 tatou te faitau ai:
“Ma ina ua uma ona auina ese atu e Au le Alii le Atua, i laua, sa oo loa ina amata ona galueaiina e Atamu le eleele, ma pule i manu vaefa uma o le fanua, ma ai ana mea ai ma le afu o ona mata e pei ona poloaiina ai o ia e Au le Alii. Ma sa galue foi lana ava o Eva faatasi ma ia. …
“Ma sa oo ina valaau atu Atamu ma Eva, lana ava, i le suafa o le Alii, ma sa oo ina la faalogoina le siufofoga o le Alii ua fetalai mai ia i laua mai le itu i le Faatoaga o Etena, ae sa la lei vaai atu ia te ia; aua ua aveeseina i laua mai ona luma.
“Ona tuuina atu lea e le Alii ia i laua ni poloaiga, ia la tapuai atu i le Alii lo la Atua, ma tuuina atu uluai manu o a laua lafu mo se taulaga e osi atu i le Alii. Ma sa usiusitai lava Atamu i poloaiga a le Alii.
“Ma ina ua mavae aso e tele, ona alu ifo lea o se agelu a le Alii ia Atamu ma ua faapea ia Atamu: Se a le mea ua e osi atu ai taulaga i le Alii? Ona tali atu lea o Atamu ia te ia: Ou te le iloa, ae ua poloaiina ai au e le Alii.
“Ona fai mai lea o le agelu, ua faapea mai: O lenei mea o se faatusa o le taulaga a le Alo e Toatasi na Fanaua e le Tama, o Le ua tumu i le alofa tunoa ma le upumoni.
“O le mea lea, ia e faia mea uma ua e faia i le suafa o le Alo, ma ia e salamo ma ia faavavau ona e valaau atu i le Atua i le suafa o le Alo” (fuaiupu 1, 4–8).
O lea, na faavae ai taulaga i le lalolagi e avea ma sauniga o le talalelei, ina ia faatinoina ma faia i le pule o le perisitua, e fai ma faatusa o le taulaga o le a oo mai a le Atalii o le tagata, Lē o le a tuu atu Lona soifua mo agasala a le lalolagi.
O le faatusa o le sauniga na fetuunai lava ia faailoa ai ia manatu patino o le taulaga a le Alii pe a ia oo mai i le taulotoaiga o taimi. O le taulaga o le Paseka, mo se faataitaiga, na faatulagaina ina ia filifilia se mamoe po’a o le uluai tausaga, e aunoa ma se pona ma se ila, e fai ma taulaga. Na faamasaa le toto, ma sa faaeteete ina ne’i i ai se ivi e gau—, o faatusa uma ia o le ala o le maliu o le Faaola.
E ofoofogia ia te au, o le tuuina atu o taulaga sa faaauauina i tupulaga uma mai ia Atamu seia oo lava i le taimi o le Faaola. E ui lava na oo tagata i le tele o ni vaitaimi o le liliuese, ae o le faamoemoe o le a togiola e le Alii agasala a tagata e ala mai i Lona Alo e Toatasi na Fanaua ma le faamoemoe o Lona toto togiola o le a maua ai le tino ola pea, sa tumau pea le manino i o latou mafaufau.
O le tuuina atu o taulaga na faamutaina lona faatinoga ina ua afio mai le Faaola i le lalolagi. Na faavae le faamanatuga e faamanatu mai ai i Ona soo na i ai o Ia i le lalolagi ma sa faatinoina Lana misiona i le lalolagi. Tatou te faitau i le Luka 22:19–20:
“Ona tago ai lea o ia i le areto, ua faafetai, ua tofitofi, ma avatu ia te i latou, ua faapea atu, O lo’u tino lenei, ua foaiina atu mo outou; tou te faia le mea nei e fai ma faamanatuga ia te au.
“Sa faapea foi ona tago i le ipu, ina ua uma ona talisua, ua faapea atu, O lenei ipu o le feagaiga fou lea i lo’u toto, ua faamaligiina mo outou.”
Ua ou toe maofa ai foi ona o lenei faamanatu, e oo lava i le vaitau o le pogisa o le liliuese, ae sa faatinoina lava i le tele o ituaiga faiga ma auala i augatupulaga o na taimi seia oo i le taimi o le Toefuataiga o le talalelei, ina ua toe i ai le mana o le perisitua i le lalolagi e faatino ai le sauniga faaola paia.
I vaitau uma o le talafaasolopito faamaumauina, tatou te maua ai le faamanatu pea lava pea o le misiona a lo tatou Faaola. Na afio mai o Ia i le lalolagi o sē e itulua ona tagatanuu—o le tasi o le Atua, a o le tasi o le tagata. Na mafai ai ona Ia faatinoina lana taulaga sili faafotualii mo i tatou uma, e ala i Lana Togiola. Pe o i ai ea se isi faamaoniga e malosi atu e faapea o Ia o Iesu le Keriso, le Faaola o le lalolagi, nai lo le na ona mulimuli i aoaoga faavae i vaitau uma o le olaga? Ua Ia tuuina mai ia i tatou Lana talalelei e taialaina ai ma faatonutonu i tatou i lo tatou nonofo lē tumau ai i le lalolagi.
Faaali atu i le Lalolagi le Moni o le Talalelei a Iesu Keriso
Na saunoa Peresitene Tavita O. MaKei:
“O le tiutetauave o le faaali atu i le lalolagi e faapea, o le talalelei a Iesu Keriso o le a foia ai faafitauli, ua i ai lea i tagata ua faia le tautinoga. … Ou te talitonu … e mafai ona foia faafitauli uma o le lalolagi e ala i le usiusitai i mataupu faavae o le talalelei a Iesu Keriso. …
“O tali i faafitauli aupito ogaoga i le lalolagi, ua i ai iinei i le Ekalesia a Iesu Keriso. Ua lava tapenaga ua faia e le gata mo tulaga manaomia o tagata taitoatasi ae faapea foi malo ma atunuu. … Ou te ioe atonu e foliga mai ua tatou taunapa faapea ua sili lo tatou poto, ae e leai. Ua na o le faaaogaina lava o le fuafuaga a le Atua i faafitauli o le lalolagi. O oe lena o loo umia le perisitua, ua sili atu ona tele lou tiutetauave i le asō, aua ua e soifua i le taimi fatufatua’i lenei o le talafaasolopito o le lalolagi, nai lo se isi taimi muamua i le Ekalesia. Ou te toe fai atu. Afai ua tatou tautino atu ua tatou umia le upumoni, o le matafaioi la a tagata uma o le Au Paia o Aso e Gata Ai, ia ola ai, a o mai la tagata o le lalolagi e tali mai i le valaau, e tofo i le fua o le laau, o le a latou iloa ai e matagofie a’ia’i ma lelei” (Gospel Ideals: Selections from the Discourses of David O. McKay, p 5).3
O le feau sili tatou te avatu i le lalolagi o le talalelei a lo tatou Alii ma le Faaola ua toefuatai mai i le lalolagi. Ua toe i ai Lana Ekalesia i le fogaeleele faatasi ai ma le mana ma le mamalu o le Perisitua Paia.
Ua tuuina atu ia i latou ua faauuina i le mana e galulue ai mo Ia o Ona sui e aumaia aoaoga faavae, o sauniga, mataupu faavae, ma mana e fusifusia ai i le lalolagi e faapei ona faia i le lagi. O le Ekalesia lenei a le Faaola. Na te taitaia mataupu o Lana ekalesia e ala i Ana perofeta filifilia. Ona aoao atu lea e perofeta le talalelei i isi ma molimau atu o Iesu o lo tatou Faaola ma le Togiola. O le vaitau lenei o le tisipenisione o le atoaga o taimi, lea na tulei saunoa i ai perofeta mai lava i le amataga o taimi. O le taimi o le faataunuuina o mea uma na tusia o le a oo mai, e pei lava ona ta’ua e perofeta a le Alii ma ua tusia i tusitusiga paia. E le o se ekalesia fou, ae o se ekalesia ua toefuatai mai i le lalolagi i lenei vaitaimi.
O outou o le tupulaga sa faasaoina e le Alii mo le taimi nei. Sa outou o a’e mai le vai o le papatisoga faatasi ma se feagaiga ma se folafolaga i le Alii, e fai ma sui o Ia e fesoasoani atu ai i tagata e tia’i ese o latou ala faalelalolagi ae foi mai i faamanuiaga ua folafola mai mo i tatou, pe afai tatou te mulimuli ia te Ia ma ola ai i Lana talalelei. E mafai ona outou fesoasoani i fanau a lo outou Tama Faalelagi e toe foi mai i lo latou faatuatuaga Kerisiano, ma atiina ae se faatuatua ia te Ia ma toe foi mai i Ona ala.
O Mea e Mafai Ona E Faia
Atonu e te fesili, “O le a se mea e mafai ona ou faia?” I ni nai masina talu ai, sa lauga ai lo matou peresitene o le siteki i le sauniga faamanatuga, ma sa fautuaina mai ai ni mea se fa e mafai ona matou faia e toe aumai ai isi ia i matou.
Muamua o le tatalo i aso taitasi. Ou te fiafia i le faaupuga lea e i le Lomifefiloi o le Tusi Paia: “A outou aoaoina loa le sootaga moni o i tatou ma le Atua (faapea, o le Atua o lo tatou Tama, ma o i tatou o ana fanau), ona avea lava lea o le tatalo ma a tatou mea masani ma faaosofia i le loto (Mata. 7:7–11). O le tele o faigata ia e ta’ua e uiga i le tatalo, e tulai mai mai le galo o lenei sootaga. O le tatalo o le taga lea e feutagai ai le finagalo o le Tama ma le manao o le tamaitiiti. O le faamoemoega o le tatalo, e le ina ia suia ai le finagalo o le Atua, ae ia faamautu ai mo i tatou lava ma isi ia faamanuiaga ua naunau le Atua e to mai, ae e faalagolago i lo tatou ole atu mo na faamanuiaga. O faamanuiaga e manaomia ai le galue po o se taumafaiga i la tatou vaega, a o lei mafai ona maua mai. O le tatalo o se ituaiga o galuega, ma o se auala ua atofaina mo le mauaina o faamanuiaga e aupito maualuga i lo faamanuiaga uma.”4
Na saunoa Peresitene Thomas S. Monson:
“Mo i latou o loo lagona mai lo’u leo, o e o tauivi ma luitau ma faigata tetele ma faigata laiti, o le tatalo o le punavai lea o le malosiaga faaleagaga. … O le tatalo o le auala lea tatou te sōsō atu ai i lo tatou Tama oi le Lagi, o lē e alofa ia i tatou. Talanoa atu ia te Ia i le tatalo ona faalogologo lea mo le tali. E tutupu vavega e ala i le tatalo. …
“Manatua ia tatalo ma le loto i ai.”5
Ia fai au tatalo i aso taitasi ma fesoasoani i isi e toe foi mai i lo latou faatuatuaga Kerisiano e ala i le faamalosiauina o i latou e tootutuli i o latou tulivae ma tatalo i le Atua.
Lua,suesue i tusitusiga paia i aso taitasi. Mata e i ai se isi molimau e malosi atu e uiga ia Iesu Keriso nai lo molimau ua tatou maua i le Tusi a Mamona? Mai le 239 o mataupu, e 233 o loo ta’ua ai le Faaola. Pe le ofoofogia ea lena mea?
Ia mautinoa e fai au oe lava suesuega o tusitusiga paia. Ona e fesoasoani lea i isi e toe foi mai i lo latou faatuatuaga Kerisiano e ala i le faamalosiauina o i latou e suesue foi i tusitusiga paia i aso taitasi.
Tolu, agavaa mo le malumalu. E i ai nisi o outou ua o i le malumalu, a o isi e le’i o. E lelei ona malamalama i mea e manaomia ina ia maua ai se pepa faataga o le malumalu. Ua tatou malamalama lelei i le faagasologa, lea tatou te o ai i se faamasino o Isaraelu ma faamautinoa atu ia te i latou lo tatou agavaa e umia se pepa faataga o aoga o le malumalu, ona ola ai lea i tulaga faatonuina e manaomia i le umiaina o lena pepa faataga.
Ia e ola i se tulaga o le a faapupula atu ai e lau faataitaiga amiotonu le auala e ola ai ina ia agavaa mo faamanuiaga o le malumalu.
Fa, o galuega auauna atu i aso taitasi. Manatua upu a le Tupu o Peniamina: “Faauta foi, ou te fai atu nei mea ia te outou ina ia outou aoao i le poto; ina ia outou iloa lenei mea, pe a i ai outou i le galuega a o outou uso, ua na ona i ai outou i le galuega a le Atua” (Mosaea 2:17). E tali faatino mai lava le Alii i a tatou tatalo e ala i le auaunaga tatou te tuuina atu i isi.
Ia avea o se faataitaiga o le auaunaga faa-Keriso, ma fesoasoani i isi e toe foi mai i lo latou faatuatuaga faa-Kerisiano e ala i le uunaia o i latou ia o atu ma auauna atu i o latou uso a tagata.
“Savali i Luma le Autau Kerisiano”
A o ou faapei o outou, sa i ai so’u aafiaga sa fesoasoani ou te malamalama ai i le taua o le auauna atu. I le sefulu tausaga talu ai, sa faamatala ai lea aafiaga i se vitio, O Molimau Faapitoa a Keriso. Ou te fia faasoa atu ia te outou i le po nei:
“Sa i ai se aafiaga i lo’u olaga sa tele ina faamanatu mai ai ia te au le olioli e maua mai le fesili ‘Mata o le a le mea e fai e le Faaola i le tulaga lenei?’
“O au o se tasi o uluai Marini na tuvae i le pa’umatu o Iapani ina ua uma ona sainia le feagaiga o le filemu ina ua maea le Taua Lona Lua a le Lalolagi. A o matou ulu atu i le aai ua faatafunaina o Nagasaki, o se tasi o aafiaga e sili ona faanoanoa o lo’u olaga. Sa matua faataumaoia se vaega tele o le aai. E lei tatanuina nisi o tagata oti. Sa matou faatuina se ofisa autu o ni vaega faigaluega, ma matou galulue loa.
“Sa matua matautia le tulaga, ma e toaitiiti i matou na mananao e foai tele atu. Sa matou o i le failotu o la matou vaega ma talosagaina se faatagaga e fesoasoani ai i le toe fausiaina o falesa Kerisiano. Ona o puipuiga a le malo i le taimi o le taua, o lea na toetoe ai lava ina le toe faaaogaina nei falesa. Sa matua faaleagaina lava nai o latou fale. Sa ofofua atu se vaega o i matou e toe lipea ma toe fai le sima o nei falesa i le taimi matou te malolo ai, ina ia mafai ai ona avanoa e toe fai ai a latou tapuaiga faa-Kerisiano.
“Matou te le iloa le gagana. Na pau le mea sa mafai ona matou faataunuuina o le galuega faatino o le lipeaina o fale. Sa matou sailia ia faifeau sa le mafai ona fai la latou tautua i tausaga o le taua ma faamalosiau atu ia i latou e toe foi i o latou pulelaa. Sa maoae so matou aafiaga ma nei tagata, a o latou toe oo i le saolotoga e faatino ai o latou talitonuga faa-Kerisiano.
“Sa i ai se mea na tupu a o matou tuua Nagasaki e toe foi, ou te manatuaina pea lava. A o matou tulioso i le nofoaafi matou te o ai e pue le vaa e foi ai i le aiga, sa taufaifai mai le toatele o isi Maligi ia i matou. Sa i ai ma a latou uo teine na o ane e faamavae i ai. Sa talie mai ia i matou ma fai mai ua matou misia le malie o le i ai i Iapani. Sa na ona matou faamaimauina le taimi e faigaluega ai ma fai le sima o puipui.
“A o faifai tetele la latou taufaalilili, sa manu a’e i si mati’e laitiiti i talaane o le nofoaga o nofoaafi pe tusa ma le 200 Kerisiano Iapani maoae mai nei falesa sa matou lipeaina, ma usu mai le ‘Savali i Luma le Autau Kerisiano.’ Na latou o mai ma la’u mai meaalofa mo i matou. Ona fai lea o la latou laina i autafa o le ala o le nofoaafi, ma a o amata solosolo malie atu le nofoaafi, sa matou aapa atu ma pa’i atu i o latou tamatamai lima a o matou malaga ese atu. Sa matou le magagana; sa matua o’otia o matou lagona. Ae sa matou faafetai aua sa mafai ona matou fesoasoani i sina ala itiiti e toefaatuina le faa-Kerisiano i se atunuu ina ua mavae le taua.”6
Tulai Mai i se Lagona Fou o Tautinoga
Ou te iloa o loo soifua le Atua. Ou te iloa o i tatou uma o Ana fanau ma e alofa o Ia ia te i tatou. Ou te iloa na Ia auina mai Lona Alo i le lalolagi e avea ma taulaga togiola mo tagata uma, ma o i latou foi o e talia Lana talalelei ma mulimuli ia te Ia, o le a olioli i le ola e faavavau, o le meaalofa aupito sili o meaalofa uma a le Atua. Ou te iloa na Ia taitaia le Toefuataiga o le talalelei i le lalolagi e ala i le galuega a le Perofeta o Iosefa Samita. Ou te iloa na pau le olioli ma le fiafia tumau e maua i lo tatou aafiaga i la le tino nei, o le a maua e ala i le mulimuli i le Faaola, usitai i Lana tulafono, ma tausia Ana poloaiga.
O le po nei a’u uo talavou e, ou te tuuina atu se lu’i ia outou tutulai mai i se lagona fou o le tautino atu. Ou te tuuina atu se lu’i ia avea outou ma “tupulaga silisili” e ala i le fesoasoani atu i fanau a lo tatou Tama i le Lagi ia toe foi mai i lo latou faatuatuaga faa-Kerisiano, ma le faavae faalelotu malosi lea e matua tatau ai e olioli ai i le filemu o le mafaufau ma le fiafia moni i lenei vaitau o le faanofo vaavaaia i le olaga faitino.
Ia faamanuiaina outou e le Atua i le lototoa, lototetele, le naunautai ma le mananao e toefuatai le faatuatua i le talalelei a lo tatou Alii ma le Faaola. O loo soifua o Ia. O la’u molimau lea ia te outou i Lona suafa paia. I le suafa o Iesu Keriso, amene.
© 2011 Puletaofia e le Intellectual Reserve, Inc. Ua taofia aia tatau uma. Faamaonia le faaPeretania: 6/10 Faamaonia le faaliliuga: 6/10 Faaliliuga o le We Were the Greatest Generation. Samoan. PD50029874 890
Notes
2. Noelle Knox, “Religion Takes a Back Seat in Western Europe,” USA Today, Aug. 11, 2005, http://www.usatoday.com/news/world/2005-08-10-europe-religion-cover_x.htm.