Elder D. Todd Christofferson, “Ia E Foai Mai Ia Te i Matou I Le Aso Nei a Matou Mea e Ai e Tatau Mo Le Aso,” Jan 2011
Faeasaite a le OAE mo Talavou Matutua • 9 Ianuari, 2011 • Iunivesite o Polika Iaga
O i matou ua matutua, e aofia ai matua ma taitai o le Ekalesia ma polofesa ma uo, e masani lava ona matou fautuaina outou e fuafua mo le lumanai. Matou te faamalosiauina outou e tulimatai aoaoga ma aoaoga faalematata e fai ma tapenaga mo le olaga i tausaga a sau. Matou te uunaia outou e faataatia se faavae mo se faaipoipoga ma se aiga ma galulue i na fuafuaga. Matou te lapataia outou e mafaufau i taunuuga e ono tulai mai i le ala pe a faia faaiuga i mea tou te faia nei (mo se faataitaiga, o mea e tuu i luga o le Initoneti). Matou te fautuaina outou ia mafaufau pe faapefea ona e fuaina le manuia i lou olaga ona faatutu lea o mamanu ma faatinoga o le a tau atu ai i lena manuia.
O nei mea uma e faaalia ai se ala poto ma le faautauta i le olaga, ma o mea o le a ou tautalagia i le po nei, ou te le faaitiitia ai lava i soo se itu le taua o le mafaufau ma le fuafua mamao. O le fuafua ma le sauniuni ma le mafaufau lelei i ai, e taua mo se lumanai faamanuiaina, ae tatou te le o ola i le lumanai—o loo tatou ola i le taimi nei. Tatou te galueaiina i lea aso ma lea aso a tatou fuafuaga mo le lumanai; tatou ausia i lea aso ma lea aso a tatou sini. E taitasi lava aso i le taimi tatou te tausia ma faafailele ai o tatou aiga. E taitasi lava aso i le taimi tatou te faatoilaloina ai o tatou faaletonu. Tatou te tumau i le faatuatua e oo i le iuga e taitasi lava le aso i le taimi. O le faaputuputuga o aso e tele lea e maua ai se olaga atoa ma se tagata ua paia. O lea la, ou te fia talanoa atu ai ia te outou e uiga i le ola lelei mai lea aso i lea aso.
Vaavaai atu i le Atua mo Mea e Manaomia i Aso Taitasi
O loo tusia i le Luka na fesili se tasi o Ona soo ia Iesu, “Le Alii e, ia e aoao mai ia te i matou i tatalo; e faapei o Ioane foi ona aoao i ona soo” (Luka 11:1). Ona tuu atu lea e Iesu o se mamanu mo le tatalo lea ua lauiloa ai o le Tatalo a le Alii. O loo tusia foi i le Mataio o se vaega o le Lauga i luga o le Mauga (tagai i le Mataio 6:9–13).
O loo aofia i le Tatalo a le Alii le talosaga “Ia e foai mai ia te i matou i le aso nei a matou mea e ai e tatau ma le aso” (Mataio 6:11) po o le “Ia e foai mai ia te i matou i lea aso ma lea aso a matou mea e ai e tatau ma le aso” (Luka 11:3). Ou te talitonu tatou te faailoa atu ma le fiafia o loo i ai ni o tatou manaoga o aso taitasi tatou te manaomia ai le fesoasoani a lo tatou Tama Faalelagi e taulimaina ai. Mo nisi, i nisi aso, o le falaoa— lava le meaai e manaomia e ola ai i lena aso. Po o le malosi faaleagaga foi po o le faaletino e feagai ai i se isi aso se tasi ma se ma’i faaumiumi po o se togafitiga faifai malie ma tiga. O nisi tulaga, atonu o ni manaoga e le tinoa, e pei o mea e faatatau i ni matafaioi a se tasi po o ni gaoioiga i lena aso—aoao atu o se lesona po o le sueina o se suega, mo se faataitaiga.
Ua aoao mai e Iesu i tatou, o Ona soo, e tatau ona tatou vaavaai atu i le Atua i aso taitasi mo le meaai—le fesoasoani ma le tausiga—tatou te manaomia i lena lava aso. E ogatusa lena ma le apoapoaiga ia “tatalo e le aunoa aua le faavaivai; aua tou te faia se mea e tasi i le Atua, sei iloga tou te muai tatalo i le Tama i le suafa o Keriso, ina ia faapaiaina e ia la outou galuega ia te outou, ina ia aoga la outou galuega e faamanuiaina ai o outou agaga” (2 Nifae 32:9).
O le valaaulia a le Alii e saili a tatou mea e ‘ai i aso taitasi i aao o lo tatou Tama Faalelagi, e ta’u mai ai se Atua alofa, ua silafia e oo lava i nai manaoga iti o Ana fanau i aso taitasi ma ua naunau e fesoasoani ia te i latou, taitoatasi. O loo Ia faapea mai e mafai ona tatou ole atu i le faatuatua i lena Atua “o lē foai tele mai i tagata uma ma le le toe ta’uta’ua; ona foaiina mai ai lea ia te ia” (Iakopo 1:5). Ioe, o se faamautinoaga maoae lena, ae e i ai se mataupu faavae o loo aofia ai i lea aoaoga e sili atu ona taua nai lo le na ona fesoasoani e ola ai i lea aso ma lea aso. A o tatou saili ma maua le mea e ‘ai mai le lagi, e faatupulaia lo tatou faatuatua ma le faalagolago i le Atua ma Lona Alo.
O Le Vaavaai i le Atua i Aso Taitasi mo Mea Tatou te Manaomia e Faafailele ai le Faatuatua
O le a outou manatua le tala i le malaga a ituaiga o Isaraelu mai Aikupito ma le 40 tausaga i le vao a o lei ulu atu i lo latou nuu na folafolaina. O lenei motu o tagata e silia mamao ma le miliona na tatau ona fafagaina. E mautinoa lava o se aofaiga faapena i se nofoaga e tasi e le mafai ona umi ona ola i tuliga manu, a o le ituaiga olaga foi na ola ai e le umi ona nonofo i se mea ae toe masii, sa le mafai ai ona fai ni faatoaga po o ni lafumanu i se tele e mafai ai. Sa foia e Ieova lea luitau i le tuuina atu faavavega lea o mea e ‘ai mai le lagi—le manai. O lenei meaai itiiti na alia’e mai i le laufanua i taeao taitasi, o se mea fou ma e le i iloa e se tasi. O le mea moni lava, o le igoa manai, na sau mai upu e uiga “O le a lea mea?” Na faatonuina e le Alii ia tagata, e ala atu ia Mose, e faaputu manai ia lava mo lena aso i aso taitasi, vagana ai le aso e sosoo ma le Sapati, lea e tatau ai ona latou faaputu ia lava mo aso e lua.
I le amataga, e ui lava i faatonuga ma’oti a Mose, ae sa taumafai lava nisi e faaputuputu ia silia ma mea e manaomia mo le aso e tasi ma teu mea na totoe:
“Ona fai atu lea o Mose ia i latou, Aua ne’i tuu e se tagata sina toe mea i le taeao.
“A e lei faalogo i latou ia Mose; ua tuu e nisi tagata toe mea i le taeao, i le ua tupu ai ilo, ua elosia” (Esoto 16:19–20).
Peitai, e pei ona folafola atu, ina ua faaluaina le aofai o manai sa latou faaputuputu i le aso lona ono, e le’i leaga:
“Ua latou tuua foi i le taeao, pei ona poloai mai ai o Mose: e lei elosia lava, e leai lava se ilo o i ai.
“Ona fai atu lea o Mose, Tou te aai lea i le aso; aua o le sapati le aso nei ia Ieova: tou te le maua se mea i le vao i le aso.
“O aso e ono tou te faaputu ai, a o le aso fitu, o le sapati lea, e le i ai se mea” (Esoto 16:24–26).
E ui i lea, sa le mafai ona talitonu nisi e aunoa ma le vaai i ai, ma sa latou o lava e su’e ina ia faaputu ai le manai i le Sapati.
“Ona fetalai mai lea o Ieova ia Mose, Tou te le mafafai seia afea ona tausi i a’u poloaiga ma a’u tulafono?
“Faauta ea, ua tuuina mai e Ieova le sapati ia te outou, o le mea lea ua ia foaiina mai ai i le aso ono o le mea e ‘ai mo aso e lua; ina ia outou nonofo e taitasi i le mea e nofo ai, aua le alu i fafo se tagata i le mea e nofo ai i le aso fitu” (Esoto16:28–29).
E foliga mai na oo lava i aso anamua, e pei lava foi o aso nei, na i ai lava tagata e le mafai ona teena le faatau i le Sapati.
E ala i le tuuina mai o mea e ‘ai i aso taitasi, e tasi le aso i le taimi, sa taumafai Ieova e aoao atu le faatuatua i se malo ua silia pe tusa ma le 400 tausaga ua mou atu le tele o le faatuatua o o latou tuaa. Sa Ia aoaoina i latou ia talitonu ia te Ia, ia “faalagolago ia te [Ia] i manatunatuga uma; aua le masalosalo, aua le fefe” (MFF 6:36). Sa lava mea na Ia tuuina atu i ai mo le aso e tasi i le taimi. Vagana ai le aso lona ono, ae sa le mafai ona latou teuina le manai mo le faaaogaina i se isi aso e sosoo ai. O le mea moni, sa tatau ona savavali le fanauga a Isaraelu faatasi ma Ia i le aso ma talitonu o le a lava meaai Na te foai mai mo le aso e sosoo ai i le aso lava lea, ma faapena ai lava. O lena faiga, o le a le mafai ai lava ona mamao ese o Ia mai o latou mafaufau ma loto.
Tasi o le mea, e tatau ona tatou manatua, o lena 40 tausaga o le manai e lei fuafuaina o le a avea o se mea e maua fua. O le taimi lava na tulai mai ai le fanauga a Isaraelu ua mafai ona saunia mea mo i latou lava, o le mea lava lena na manaomia e fai. Ina ua uma ona latou laasia le isi itu o le Vaitafe o le Ioritana ma ua saunia e amata ona latou manumalo ia Kanana, e amata mai i Ieriko, na faamaumauina i tusitusiga paia faapea “ua latou aai foi i mea na tutupu i le fanua [o seleselega o le tausaga ua mavae] i le aso na sosoo ma le paseka. …
“E le toe ai ni manai i le aso e aupito ane i le aso na latou aai ai mea na tutupu i le fanua; e lei toe maua lava ni manai e le fanauga a Isaraelu; a ua latou aai i fua o le laueleele o Kanana i lea tausaga” (Iosua 5:11–12).
E faapena foi, pe a tatou ole atu i le Atua mo mea e ‘ai i le aso—mo se fesoasoani i le taimi ua le mafai ai ona tatou mauaina e i tatou lava—e tatau lava ona tatou toaaga e fai ma saunia mea e mafai i lo tatou malosi.
Faalagolago i le Alii—E Mafai ona Oo mai Tali i le aluga o Taimi
I se taimi a o lei valaauina au e avea ma se Pulega Aoao, sa ou feagai ai ma se luitau patino faaletamaoaiga na faifai pea mo ni nai tausaga. E lei tupu ona o se taunuuga o se mea sese na faia e se tagata po o ni faamoemoega lotoleaga; ua na o se tasi o na mea e oo mai i nisi taimi i o tatou olaga. O le matuia o lenei faafitauli o nisi taimi sa faigata a o nisi foi taimi ua faigofie, ae e le’i te’a ese atu atoatoa. Sa i ai taimi na faamata’uina ai le ola manuia o a’u ma lo’u aiga, ma sa ou manatu o le a matou feagai ma se mala tautupe. Sa ou tatalo mo se faalavefau faavavega e laveaiina i matou. E ui sa ou ofoina atu lena tatalo i le tele o taimi ma le faamaoni tele ma le naunautai, ae o le tali lava i le faaiuga o le “Leai.” Na iu lava ina ou aoao e tatalo e pei ona faia e le Faaola: “A e aua le faia lo’u loto, a o lou finagalo” (Luka 22:42). Sa ou sailia le fesoasoani a le Alii i nai laa iti taitasi i le ala seia oo i se faaiuga faaiu.
Sa i ai taimi na matuai uma lelei ai lava a’u punaoa, sa leai se mea po o se tasi ou te tapa i ai i lena taimi, sa leai se isi lava tagata e mafai ona ou valaau i ai e fesoasoani mai e faataunuu mea sa manaomia ona ou faia. Faatasi ai ma le leai o se isi lava mea e filifili mai ai, sa sili atu ma le tasi ona ou faapau fao i luma o lo’u Tama Faalelagi ma augani atu ma le tagi mo Lana fesoasoani. Ma sa Ia fesoasoani mai. O isi taimi sa leai se mea na sili atu nai lo se lagona o le toafilemu, se lagona o le faamautinoaga o le a lelei mea uma. Atonu sa ou le iloa pe faapefea ae po o le a foi le ala, ae sa Ia tuuina mai ia ou iloa lena mea, i auala tuusao pe le tuusao foi, o le a Ia tatalaina se ala. Atonu e suia tulaga, e ono oo mai se manatu fou ma aoga i le mafaufau, atonu foi e maua mai se tupe maua po o se isi punaoa sa le’i mafaufauina i le taimi tonu e manaomia ai. Ae sa i ai lava se fofo.
E ui lava ina sa ou puapuagatia i lena taimi, ae a ou toe tepa i tua, ou te faafetai lava ona sa le’i i ai se fofo vave i lo’u faafitauli. O le mea moni e faapea sa faamalosia au e liliu atu i le Atua mo le fesoasoani na toetoe lava o aso uma mo ni tausaga se tele, na aoaoina moni ai a’u i le ala e tatalo ai ma maua mai tali o talosaga, ma aoaoina ai au i se ala moni e maua ai le faatuatua i le Atua. Sa oo ina ou iloa lo’u Faaola ma lo’u Tama Faalelagi i se ala ma se maualuga lea na semanu e le oo i ai, ia pe atonu foi e umi atu se taimi ou te ausiaina ai. Sa ou aoaoina o mea e ‘ai i aso uma o se oloa faapelepele. Sa ou iloaina o le manai i aso nei e mafai ona moni e pei foi o le manai faaletino i tala o le tusi paia. Sa ou aoao ai e faalagolago i le Alii ma lo’u loto atoa. Sa ou aoao ai e savavali faatasi ma Ia i lea aso ma lea aso.
Galue i Faafitauli Tetele i Taumafaiga Laiti, i Aso Taitasi
O le ole atu i le Atua mo a tatou mea e ‘ai i aso taitasi, nai lo a tatou mea e ‘ai i le vaiaso, masina, po o le tausaga, o se ala foi lea tatou te taulai atu ai i faafitauli laiti, ma e sili atu ona mafai ona taulimaina. O le feagai ma se faafitauli tele lava, e tatau ai ona tatou galulue i ai i ni taumafaiga laiti i aso taitasi. O isi taimi na pau lava mea e mafai ona tatou taulimaina, o le aso e tasi (pe na o se vaega foi o le aso e tasi) i le taimi. Sei ou tuuina atu se faataitaiga e le mai tusitusiga paia.
Sa ou faitauina talu ai nei le tusi e, ta’ua o le Lone Survivor,o loo faamatala ai se tala matautia i ni alii se toafa o se Vaegaau Faapitoa o le Neivi a le I.S. [Navy SEAL] sa o i se misiona faalilolilo i se vaega taumamao o Afakanisitani i le lima ma le afa tausaga ua mavae. Ina ua maua faafuasei i latou e ni leoleo mamoe— e toalua tamaloloa ma se tamaitiiti— sa i ai i nei alii fitafita sa aoaoina faapitoa se filifiliga pe fasioti le toalua lea pe faasao, ma le iloa a latou faasaoina i laua o le a laua ta’uina le mea o loo latou i ai ma o le a vave ona osofaia i latou e le vaegaau a le al Qaeda ma le Taliban. E ui i lea, sa latou faasaoina nei leoleo mamoe e leai ni agasala, ma i le taugafana na sosoo ai, sa na o le tusitala lava o, Marcus Luttrell, sa faasaoina ai mai le silia ma le 100 o tagata sa osofaia i latou.
I lenei tusi, o loo faamatala ai e Luttrell le mamafa o toleniga ma le onosai e manaomia e se tagata e agavaa ai e avea o se SEAL i le Neivi a Amerika. Mo se faataitaiga, i le au koleni a le vaega a Luttrell, mai le 164 o alii sa amata ai, sa na o le 32 sa mafai ona faamaeaina le kosi. Sa latou onosaia le tele o vaiaso i gaoioiga mamafa faaletino i totonu ma fafo o le sami malulu, e feausi, alo, ma amo vaa pa’u, taufetuli i le oneone, fai faamalositino e selau i le aso o le tulei i luga o le tino e lima, amoina o ogalaau i auala lavelave, ma isi mau mea. Sa toetoe ina latou vaivai i taimi uma.
Sa faagaeetia au i se faamatalaga na fai atu e se ofisa sinia i lea vaega a o amata le vaega mulimuli ma sili ona mamafa o le latou toleniga.
“ O le mea muamua lava,” na ia fai atu ai, “Ou te le manao e te fiu i le mamafa o le mea o loo e faia i le taimi e fai ai. Soo se taimi e te lavea leaga ai lava, ia onosai ai lava iina. Faauma le aso. Ma afai o loo i ai pea ou lagona le lelei, ia e matuai mafaufau lelei ma loloto lava i ai, ae e te le’i filifili e togi le solo. Lona lua, ia fai e tasi le aso i le taimi. Tasi le [fasifuaitau] i le taimi.
“ Aua nei faatagaina le soona alu solo o ou mafaufauga, aua e te amata fuafua e te aluese ona o lou popole i le lumanai ma po o le a le tele o mea e mafai ona e gafatia. Aua e te vaai mamao i le tiga. Tau lava o le faauma o le aso, ma o loo i ai se matata matagofie i le lumanai mo oe.”1
O le mea masani, e lelei le taumafai e faatalitali mo le mea e oo mai ma sauniuni ai e taulima. Ae peitai, e i ai taimi, e aoga ai le fautuaga a lenei kapeteni, “Ia fai e tasi le aso i le taimi. … Aua e te vaai mamao i le tiga. Tau lava o le faauma o le aso.” O le popole i le mea e oo mai pe ono oo mai e faavaivai tagata. E mafai ona tatou gagase ai ma fiu.
I le vaitau o le 1950 sa manuia ai lo’u tina mai se taotoga faigata o le kanesa, e ui lava i le faigata sa i ai lena mea, ae sa sosoo le taotoga ma le tele o togafitiga tiga e faaaoga ai le leisa, i le mea e mafai ona ta’ua i aso nei o ni tulaga faafomai o aso anamua. Sa ia toe manatua le mea na aoao ai o ia e lona tina i lena taimi lea na fesoasoani ai lava ia te ia: “Sa ou matuai ma’i lava ma vaivai, ma sa ou fai atu ia te ia i se tasi aso, ‘Se, Tina, ou te le mafai lava ona ou onosaia le toe faia o nisi togafitiga se 16 o na togafitiga.’ Fai mai a ia, ‘E mafai ona e alu i le aso?’ ‘Ioe.’ ‘Ia, lau pele, e na o le pau lava lena o lau mea e fai i le aso.’ Na fesoasoani tele ia te au i le tele o taimi pe a ou manatua e faaaoga se aso se tasi po o le faia o se mea se tasi i le taimi.”
E mafai ona taiala i tatou e le Agaga i le taimi e vaai ai i luma ma le taimi e tatau ai ona tatou taulimaina na o lenei lava aso e tasi, i lenei lava taimi e tasi. Afai tatou te ole atu, o le a faailoa mai e le Alii ia i tatou e ala i le Agaga Paia le taimi e talafeagai ai ona tatou faaaogaina i o tatou olaga le poloaiga sa Ia tuuina mai i Ana Aposetolo anamua: “O lenei, aua tou te popole i le aso a taeao, aua e popole le aso a taeao i ana lava mea. E lava le aso i lona lava leaga” (3 Nifae 13:34; tagai foi i le Mataio 6:34).
E Manaomia le “Mea e ‘Ai i Aso Taitasi” mai le Atua mo le Ausiaina o le Malosi Tatou te Gafatia
Ua ou fautua atu o le ole atu mo le mea e ‘ai ma le mauaina i aso taitasi i aao o le Atua, e i ai se sao taua i le aoao e faalagolago i le Atua ma le onosaia o luitau o le olaga. Tatou te manaomia foi se luutaga i aso taitasi o mea e ‘ai faalelagi e avea ai i tatou ma ituaiga tagata e tatau ona tatou i ai. Ia salamo, alualu i luma, ma iu ai ina oo “ i le fua o le ua matua, e tatau ma le tumu o Keriso” (Efeso 4:13), e pei ona ta’ua ai e Paulo, o se faagasologa o lea laasaga ma lea laasaga. O le tuufaatasi o mausa fou ma lelei i o tatou uiga, po o le faatoilaloina o mausa leaga po o mea ua fai ma vaisu, e masani lava ona faauigaina o se taumafaiga i le asō, sosoo ai ma le isi taeao, ma le isi, atonu mo ni aso se tele, masina ma ni tausaga, seia oo ina ausia le manumalo. Ae e mafai ona tatou faia aua e mafai ona tatou ole i le Atua mo a tatou mea e ‘ai i aso taitasi, mo le fesoasoani tatou te manaomia i aso taitasi.
O le vaitau lenei o faiga faaiuga o le Tausaga Fou, ma ou te fia siiina atu ia te outou le saunoaga a Peresitene N. Eldon Tanner, o le sa avea ma se fesoasoani i le Au Peresitene Sili: “A o tatou manatunatu i le taua o le faia o se faaiuga ia lelei atu ona tatou faia ni mea, ia tatou naunau e pulea i tatou lava ia filifili ma le toto’a i faaiuga tatou te faia, ia mafaufau i le faamoemoega e fai ai, ma le mea mulimuli, ia faia ni tautinoga mo le tausia o ia faaiuga ae aua le faatagaina soo se faafitauli e taofia i tatou. Ia tatou faamanatu ia i tatou lava i le amataga o aso taitasi e mafai ona tatou tausisia se faaiuga mo na o lena lava aso. Pe a tatou faia faapea o le a atili ona faigofie seia oo ina avea ma se mausa.”2
Ua silia laitiiti atu ma se tausaga, na saunoa ai Elder David A. Bednar e uiga i le tumau i faiga faigofie i aso taitasi e pei o le tatalo faaleaiga, suesueina o tusitusiga paia, ma afiafi faaleaiga e taua i le fausia o ni aiga faamanuiaina. O taumafaiga faifai pea i laasaga i aso uma e foliga mai e laiti, o se mataupu faavae autu i le ausia o soo se galuega tele, e aofia ai le agai atu i le ala o le avea ma soo. O se lesona faatino, sa faatusaina ai e Elder Bednar ia gaoioiga i aso taitasi i ōlo taitasi o le pulumu i se ata vali lea e maua ai i le aluga o taimi se galuega o faatufugaga. Na ia saunoa:
“ I lo’u ofisa o loo i ai se atavali matagofie o se togasaito. O le atavali o se tuufaatasiga tele o ōlo taitasi a le pulumu—e leai ma se ōlo tuutasi e manaia pe faatosina. O le mea moni, a e tu latalata i le ata na pau lava le mea e te iloa atu o le anoano o tosi e matua le fesootai lava ma lē mananaia o vali lanu samasama ma le lanuauro ma le enaena. E ui o lea, a e agaigai malie ese mai le ata, o tosi taitasi uma lava a le pulumu ua tuufaatasia ma maua mai ai se vaaiga ofoofogia o se togasaito. …
“… Ae pei lava ona paleni ia tosi lanu samasama ma le lanu auro ma le lanu enaena ma maua mai ai se faiva alofilima matagofie naua, o le mea la lea, o lo tatou faia pea e le aunoa o nai mea iti faigofie, e mafai ona tulai mai ai taunuuga faaleagaga maoae. ‘O lea, aua ne’i loto vaivai i le faia o mea lelei, aua o lo o oulua faataatia le faavae o le galuega tele. O mea iti foi e tutupu mai ai mea tetele’ (MFF 64:33).”3
Sa tuuina mai e Peresitene Ezra Taft Benson le fautuaga lenei, a o saunoa e uiga i le salamo:
E ao ona tatou faaeteete, a o tatou saili ia avea atili e [faapei o Keriso], ina ia tatou le lotovaivai ma aveesea ai le faamoemoe. O le avea faapei o Keriso o se taumafaiga i le olaga atoa ma e masani lava ona aofia ai le tuputupu ae ma suiga e tuai lava, ma e toetoe ina a le iloa. O loo tusia i tusitusiga paia ni tala matagofie i alii na suia faafuasei o latou olaga, i se taimi puupuu, e pei ona sa i ai: Alema le Itiiti, Paulo i le ala i Tamaseko, Enosa sa tatalo i le po atoa, Tupu o Lamonae. O na faataitaiga iloga o le mana e suia ai, e oo lava ia i latou sa i ai i le loloto o le agasala ua aumai ai se faamaoniga e faapea, e mafai foi ona oo atu le Togiola ia i latou o i ai i le loloto o le faanoanoa.
“Ae e tatau ona tatou faaeteete a o tatou talanoaina nei faataitaiga mataina. E ui lava e moni ma mamana, ae o ni mea tulaga ese ia ae e le masani ona tupu. Mo Paulo uma lava, mo Enosa uma lava, ma mo Tupu Lamonae uma lava, e faitau selau ma faitau afe tagata ua iloa o le faagasologa o le salamo e sili atu ona maaleale, sili atu ona tau le iloa. Latou te latalata atu i le Alii i lea aso ma lea aso, ae latou te tau le iloa o loo latou fausia se olaga e faapei o le atua. Latou te ola i ni olaga faatauvaa o le agalelei, auauna atu, ma le tuuto. …
“E le tatau ona uma lo tatou faamoemoe. O le faamoemoe o se taula i agaga o tagata. E manao Satani ia tatou lafo ese lena taula. O lenei auala e mafai ai ona ia aumaia le lotovaivai ma le fiugofie. Ae e le tatau ona uma lo tatou faamoemoe. E fiafia le Alii i taumafaiga laiti uma, e oo lava i taumafaiga faatauvaa, i aso taitasi lea tatou te taumafai ai ia avea atili e faapei o Ia.”4
Saili le Fesoasoani a le Alii e Auauna Atu ai i Isi
Ia manatua e le tatau ona tatou vaavaai mo na o totonu pe a tatou sailia se luutaga o mea e ‘ai faaleagaga i le aso. Afai e fia avea atili i tatou e faapei o le Matai, e lei sau o Ia “ina ia auauna tagata ia te ia, a e peitai ia auauna atu o ia” (Mareko 10:45), o le a tatou sailia Lana fesoasoani i le auauna atu i o tatou uso a tagata i lea aso ma lea aso.
O loo sili atu ona soifua ai Peresitene Thomas S. Monson i lenei mataupu faavae nai lo se isi lava tagata ua ou iloa. E i ai pea i lona loto se tatalo ia faaali mai e le Atua manaoga ma auala e mafai ai ona ia fesoasoani atu ia i latou o siomia o ia i soo se aso po o soo se taimi o le aso. O se tasi o faataitaiga mai lona taimi a o avea ma se epikopo ua faaalia ai le mea moni e faapea, o isi taimi e mafai foi e si taumafaiga laitiiti, faatasi ai ma galuega a le Agaga, ona aumaia ni fua matagofie. Ou te sii mai i le tusi a Heide Swinton o le talaaga o le soifuaga o Peresitene Monson, To the Rescue:
“O se tasi sa aapa atu i ai [Peresitene Monson] o Harold Gallacher. Sa malolosi lona toalua ma lana fanau i le Ekalesia, ae sa le lotu ia Harold. Sa talosagaina e lona afafine o Sharon ia Epikopo Monson pe mafai ona ia ‘faia se mea’ e toe faamalosi mai ai lona tama. I le avea ai ma se epikopo, sa musuia o ia i se tasi aso e asiasi atu ia Harold. O se aso vevela o le taumafanafana na tu’itu’i atu ai o ia i le faitotoa valavala o le fale o Harold. Sa mafai ona iloa atu e le epikopo ia Harold o nofonofo i lona nofoa, ma ula lana sikaleti ma faitau lana nusipepa. ‘O ai lea?’ o le fesili faalii mai lea a Harold, e aunoa ma le ea mai i luga.
“‘O lou epikopo,” o le tali lea a Tom. ‘Ua ou sau ta te faamasani ma uunaia lou auai mai ma lou aiga i a tatou sauniga lotu.’
“‘Leai, ou te pisi tele,’ o le tali inoino mai lea. Sa le’i ea lava i luga. Sa faafetai atu i ai Tom mo lona faalogo atu ma sa aluese loa mai le faasitepu. Sa siitia ese le aiga e aunoa ma le auai atu o Harold i sauniga lotu.
“O tausaga mulimuli ane, na telefoni mai ai se Uso Gallacher i le ofisa o Elder Thomas S. Monson ma talosaga mai e faatulaga se taimi e vaai ai ia te ia.
“‘Fesili i ai pe o lona igoa o Harold G. Gallacher,’ na fai atu ai Elder Monson i lana failautusi, ‘ma pe sa nofo i le 55 Vissing Place ma pe i ai sona afafine e igoa ia Sharon.’ Ina ua fesili i ai le failautusi, sa te’i Harold i le manatua pea e Elder Monson o na faamatalaga. Ina ua feiloai le toalua lea i se taimi mulimuli ane, sa la feopoai. Sa faapea atu Harold, ‘Ua ou sau e faatoese atu ona o lo’u le aluese mai lo’u nofoa ae avatu oe i totonu i lena aso o le taumafanafana i lena tausaga ua leva.’ Sa fesili i ai Elder Monson pe na malosi o ia i le Ekalesia. Sa tali atu Harold ma se ataata: ‘O loo avea nei au ma fesoasoani lua i le au epikopo o le matou uarota. O lau valaaulia e sau i le lotu, ma la’u tali le lelei, lea na faatalutalusā ia te au ma ou naunau loa e faia i ai se mea.’”5
O Filifiliga o Aso Taitasi e I Ai Taunuuga e Faavavau
O le mafaufau i a tatou mea e ‘ai i lea aso ma lea aso tatou te nofouta ai i mea e tutupu i o tatou olaga, i le taua o mea laiti e faaaoga ai o tatou aso. Mo se faataitaiga, na aoao mai i se aafiaga i totonu o se faaipoipoga, o le faia pea e le aunoa o ni galuega agaalofa faigofie, fesoasoaniga, ma le amanaiaina, e sili atu ona faatumau ai le alofa ma faafailelei ai fegalegaleaiga nai lo taga matagofie pe taugata e seasea ona faatinoina. E le faapea ai la, uso—outou o e ua faaipoipoina—o le a le talisapaia ai e lou toalua se mea fou ma manaia e ofu pe o se isi lava meaalofa e fai e faaalia ai, ma le matilatila, ou lagona e uiga ia te ia (ioe, i totonu o puipui o si au paketi utiuti). Ae o le faaalia pea lava pea, i aso taitasi o le alofa, i upu ma amioga, e sili atu ona ‘anoa i se taimi umi.
E faapena foi, i filifiliga i aso taitasi, e mafai ona tatou taofia ni aafiaga e mautinoa le matautia mai le oo mai i o tatou olaga ma avea ma se vaega o o tagata. I sa matou talanoaga faasamasamanoa ma Elder Neal A. Maxwell i nai tausaga ua mavae, ma se taitai perisitua i se konafesi faalesiteki, sa matou matauina ai, e mafai e se tagata ona aloese mai le tele o ponokalafi ma ata faaponokalafi i le na o le faia o filifiliga lelei. Mo le tele lava o itu, e na o le loto pulea lava ia aua nei alu atu i le mea e ono i ai ponokalafi— i le tino po o luga o le initoneti. Ae ui i lea, na matou iloa, ona e matuai faatosina leaga faia lava, o lea e mafai ai e ponokalafi ona osofaia se tagata e leai sana mea o faia ma i se tulaga e faateia ai. “Ioe,” o le matau lea a Elder Maxwell, “ae e mafai lava ona ia teena i le taimi lava lena. E le faapea e tatau ona ia valaaulia e sau i totonu ma ofo atu i ai se nofoa e saofai ai.” E faapena foi i isi faatosinaga ma vaisu—o le faainaelo i foliga vaaia, amioga faatamala, gagana mataga ma masoa, faitioga le lelei, faatuutuu, ma isi—o lo tatou gauai atu i aso taitasi ia aloese mai le amataga o mea faapena, e mafai ona puipuia ai i tatou mai le iloa ae i se aso o i luma, ona o lo tatou le nofouta, ua faapea ai ona mauaa nisi o amioga leaga po o vaivaiga i o tatou loto.
O le mea moni, e tau le tele ni mea i se aso e faapea ua matuai leai se taua. E oo lava foi i mea masani ma faisoo e mafai ona avea ma ni sao taua lea e i ai le taimi e faatuina ai le loto pulea ma uiga ma le faatulagaga e manaomia e iloa ai a tatou fuafuaga ma sini. O le mea lea, a e ole atu i le tatalo mo au mea e ‘ai i lea aso ma lea aso, ia e mafaufau loloto i mea o loo e manaomia— i mea e te le o maua ma mea e tatau ona puipuia mai ai oe. A e alu e moe, mafaufau i mea na lelei ma lē lelei o le aso, ma mea o le a lelei teisi atu ai le aso o le a sosoo ai. Ma faafetai i lou Tama Faalelagi mo le manai na Ia tuuina i lou ala na tausia ai oe i le asō. O ou manatu o le a faateleina ai lou faatuatua ia te Ia, a o e vaaia Lona aao o fesoasoani atu ia te oe ia onosaia ma suia nisi o mea. O le a mafai ona e olioli i se isi aso, i se isi laasaga e agai atu i le ola e faavavau.
O Iesu Keriso o le Areto o le Ola
E ui i mea uma, ia manatua ua tatou maua o Ia o le ituaiga ma le faatusa lea o le manai, o le areto lava lea o le Ola, le Togiola.
“Ua fetalai atu Iesu ia te i latou, o A’u nei le areto o le ola: o lē sau ia te a’u, e le laina lava ia, o lē faatuatua foi ia te au, e le toe fia inu lava ia. …
“E moni, e moni, ou te fai atu ia te outou, o lē faatuatua mai ia te au, ua ia te ia le ola e faavavau.
“O A’u o le areto o le ola.
“Na aai e o outou tamā le manai i le vao, a ua oti i latou.
“O lenei le areto ua alu ifo mai le lagi, ai se ‘ai ai ona le oti lea o ia.
“O A’u le areto ola na alu ifo mai le lagi, pe a ‘ai se tasi i lenei areto ona ola ai lea o ia e faavavau: o le areto foi ou te avatua, o lo’u tino lea, ou te avatua ma ola o le lalolagi” (Ioane 6:35, 47–51).
Ou te tuuina atu ia te outou la’u molimau i le ola ma le moni o le Areto o le Ola, o Iesu Keriso, ma le mana e le iu ma le mamao o Lana Togiola. Mulimuli ane, o Lana Togiola lea, o Lona alofa tunoa, o la tatou mea lea e ‘ai e tatau mo le aso. E tatau ona tatou saili ia te Ia i aso uma, ia faia Lona finagalo i aso taitasi, ia tasi ma Ia e pei ona tasi o Ia ma le Tama (tagai i leIoane 17:20–23). Ou te faamanuia atu ia te outou a o outou saili atu ia te Ia, o le a foai atu e lou Tama Faalelagi ia te oe au mea e ‘ai e tatau mo le aso, i le suafa o Iesu Keriso, amene.
© 2011 Puletaofia e le Intellectual Reserve, Inc. Ua taofia aia tatau uma. Faamaonia le faaPeretania: 10/10. Faamaonia le faaliliuga: 10/10. Faaliliuga o le Give Us This Day Our Daily Bread. Samoan. PD50028437 890
Notes
1. Marcus Luttrell ma Patrick Robinson, Lone Survivor: The Eyewitness Account of Operation Redwing and the Lost Heroes of SEAL Team 10 (2007), 124.