• Print
• Listen
  • MP3
• E-mail

Rosemary M. Wixom,  “Ua Oo Ina Iloa,”  May 2011

Faeasaite a le OAE mo Talavou Matutua • 1 Me, 2011 • Iunivesite a le Setete o Utah

Ou te faafetai ona ua ou i ai iinei i Logan, Utah, i le Iunivesite a le Setete o Utah. A o ui mai le ma taavale ma lo’u toalua o Jack i Sardine Canyon ma taunuu mai ai i lenei vanu i le po nei, sa foliga mai ia te au o lea ua ou toe sau i lo’u aiga. Sei ou faamatala atu le mafuaaga.

O Iinei Na Amata ai Ona Ou Iloa mo A’u Lava

I le tele o tausaga ua mavae, o se aso matagofie sa uta ai i le taavale a le matou aiga a ma meatotino uma lava. Tou te silafia, o le a ma o i le iunivesite ma lo’u uso masaga, ma e alu lo’u tina e momoli mai i ma’ua i Logan ina ia mafai ai ona ma aooga iinei i le Utah State. Sa matou matamata i ata o lenei lotoa matagofie. I nisi o nei ata, sa ola faatulimanu faapea laau. Fai mai e le agi le matagi i Logan; e faapena lava le ola o laau. E ui o lea, sa ma fiafia lava. Sa uta i le taavale o ma lavalava uma, o o ma seevae, faapea meaai e faatumu ai a ma kapoti. Sa matou tau le iloa atu se mea i faamalama. A o sau le matou taavale i le vanu lenei, sa ou sagisagi fiafia ma sa fai foi si o’u fefe. Sa toetoe ina le mafai ona faatali i le mea o le a oo i ai.

I le a’oga, sa mafai ona lagonaina le faatumulia o le siosiomaga i le sagisagi fiafia a o la’u ese mai e tamaiti aoga a latou mea mai taavale ma la’u atu i fale o le au nofotumau ma fale mautotogi. O i ma’ua ma lo’u uso, o le taimi muamua lea ua ma nonofo ese ai mai lo ma’ua aiga, ma sa ma lagonaina ua ma maua le faatagaga, a o faatautau o ma lavalava i le pusatu ma faatulaga lo ma potu. E lua ni pepa o ni savali e faapipii i puipui o lo ma potu. O le tasi e faitauina, “Ia e faatuatua ia Ieova ma lou loto atoa; a e aua le faalagolago i lou lava atamai” (Faataoto 3:5). Na aumai e lo ma tuagane matua le isi pepa e i ai se savali. E faitauina, “O laugutu e pa’i i le ava malosi e le pa’i mai lava ia te au.”

Ina ua leai se mea i le taavale, sa ma tutu i le alasavali i luma o le Moen Hall iinei, a’o uuina nai mea mulimuli sa i le nofoa i tua. Sa ma tutū ma fagu o fualaau ‘aina suamalie i o ma lima a o talotalo faatofa atu i lo ma tina. Ona ma iloa ai lea o le mea tonu lea ua tupu, a o lilo atu o ia i le vaai. Sa ma taufai faliu atu le tasi i le isi, ma faapea atu ma le maligi o loimata, “O le a le ta mea lea ua fai? O le a le mea lea ta te mafaufau i ai? E mafai faapefea ona taufaafefe ma taufaamata’u se mea sa ta manatu o le a matuai segia ai mauli?” Sa ou le iloaina o le a oo mai aso ma tausaga i lenei lotoa, o le a ou faia ai faaiuga o le a faavasega ai aso uma o totoe o lo’u ola. O iinei sa ou iloaina ai e i ai o’u lava talitonuga, ma sa ou feagai ai ma le puipuiga o lo’u faatuatua. Sa ou maua ai ni uo o le olaga atoa. Sa sili atu ona faamaoni a’u tatalo. Sa amata ona tupu la’u molimau. Sa ou aoaoina ai, o se filifiliga faaletagata lava ia le tu atu mo o’u tulaga faatonuina ma uuna’ia a’u lava ia tuputupu a’e faaleatamai ma faaleagaga.

O ai moni lava a’u? O na tausaga uma, sa i ai taimi na ou lagona ai le faatoilaloina ma le le mafaia o se mea—ma mai lea taimi i lea taimi, sa ou tofoina ai le faamoemoe ma le manuia. O se faagasologa sa fālō mai le ma’imanatu—oi, o le matuitui o le ma’imanatu—i le faagaeetia o le tutoatasi. Sa pei a’u o Amona ma ona uso i le Tusi a Mamona na oo i le “faanoanoaga, mafatiaga, ma … le olioli e le mafuatia” (Alema 28:8) i le taimi lava lea. Ua ou iloaina nei sa manaomia ona ou tuua lo’u aiga manaia ina ia ou alualu i luma ma aoaoina nei lesona o le olaga. E leitioa a matagofie naua le Vanu o Cache, lenei iunivesite, ma lenei lotoa ia te au. Aua o iinei sa amata ai ona ou iloaina a’u lava, ma i le faagasologa o lo’u iloaina o a’u lava, o le a amata ai ona ou iloa le Faaola. I lou olaga, o le a se mea ua e iloa ae o fea foi na e aoaoina ai?

O le “oo ina iloa” lea ou te fia talanoa atu ai ia te outou i le po nei.

Sue se Nofoaga e Mafai Ai Ona Oo ina E Iloaina mo Oe Lava

Ina ua tatou tuua le afioaga o lo tatou Tama Faalelagi ma le mafanafana o lo tatou aiga i le muai olaga ae o mai i lenei lalolagi, sa tatou o mai sauniuni e aoao ma ia tofotofoina. O lenei, i lenei lalolagi atonu tatou te faapea ifo ia i tatou lava, “O le a la’u mea ua fai?” Ua tatou i ai iinei e savavali i se ala. O loo tatou ola i le fuafuaga a lo tatou Tama Faalelagi—o le ata o le faaolataga, le atoaga o lenei talalelei. Ma o se fuafuaga o le fiafia! Fai mai Iosefa Samita o le ata o le faaolataga o se “tasi o meaalofa sili a le lagi i le tagata”1

O lenei aafiaga o le olaga faitino, lea sa tatou mafaufau o le a matuai segia ai mauli, e mafai ona i ai taimi e taufaafefe ma taufaamatau ai—ma matuai faigata ai lava!  Ua punitia e le veli i tatou mai le manatuaina o mea sa tatou iloaina muamua. O lenei ua tatou savavali i le faatuatua, peitai, tatou te savavali ma le iloa o le fesoasoani mai o le Alii e mafai ai ona tatou iloa le mea sa tatou iloaina muamua. E tele naua le alofa o lo tatou Tama Faalelagi ia i tatou.  Ua foafoaina i tatou ma le faamoemoega tupito e le gata ina toe foi atu ia te Ia, ae ia avea moni e faapei o Ia. O lea ua tatou toe aoaoina le tele na tatou iloa ai o Ia. Fai mai Polika Iaga, “Ua outou masani lelei ma lo tatou Tama Faalelagi, … aua e leai se tasi o outou e lei ola i lenei maota ma ola ai faatasi ma ia i lea tausaga ma lea tausaga [i le muai olaga]; ae o lea ua outou i ai [nei i lenei lalolagi] e saili ina ia faamasani ma ia, a o le mea moni, ua galo ia te outou le mea sa outou iloa” 2

Sa tatou iloaina o Ia i lena taimi, peitai ua na o a tatou taumafaiga lava o le a tatou iloa ai o Ia iinei. E le o tuulafoaiina i tatou i la tatou taumafaiga, aua sa Ia fetalai, “Ou te i ai foi i lo outou itu taumatau ma lo outou itu tauagavale, a o lo’u Agaga o le a i o outou loto, e siomia foi outou e a’u agelu, e lagolagoina outou” MFF 84:88

Na oo ina iloa e Alema le Faaola ona ia aoaoina lea o tagata i le vai o Mamona. Sa ia “talai atu ia te i latou le salamo, ma le togiola atoa ma le faatuatua i le Atua” (Mosaea 18:7). O iina na ulu ifo ai tagata i se feagaiga o le papatisoga e “laulaututu e fai ma [se molimau] a le Atua i aso uma, ma mea uma, atoa ma nuu uma … , ina ia [latou] maua le ola faavavau”  (Mosaea 18:9). Sa latou tuputupu ae i le faatuatua, sa latou aoao e tausia le aso Sapati, sa latou aoao e galulue i o latou lava lima mo lo latou tausiga, ma sa latou “savavali foi ma le amio sa’o i luma o le Atua, ua foai e le tasi i le tasi o mea faaletino atoa ma mea faaleagaga” (Mosaea 18:29; tagai i ff. 20–29).

Faaauau pea le faitau: “O lenei foi, ua oo ina faia nei mea uma i Mamona, ioe, i tafatafa o le vai o Mamona, i le vao matua e latalata ane i le vai o Mamona; ioe, i le nuu o Mamona, le vai o Mamona, le vaomatua o Mamona, ua matua matagofie ia mea i le vaai a e na maua i lea mea le iloa lelei o lo latou Togiola” Mosaea 18:30

Aisea ua tata’i atu ai i tatou e lenei mau i le vai o Mamona i le vaaiga o lona siosiomaga? E faapefea i lona faamatalaga ona tatou maua le lagona e uiga i lena nofoaga—le vai o Mamona? Atonu e tatau ona tatou mafaufau i le vaaiga i laufanua o o tatou siosiomaga ma lana matafaioi i la tatou sailiga ia iloa lo tatou Togiola.

O le taimi lenei. Afai e te lei faia lava, o le taimi lenei e saili ai le nofoaga e mafai ona e iloa ai lou Togiola. O fea o i ai lou vai o Mamona? O le a le matagofie i lau vaai o lena nofoaga?

Ina ia maua lena nofoaga matagofie, atonu e te manao e fesili ifo ia te oe lava i nei fesili e fa.

1. Ua Oo Ina Iloa le Agaga Paia

Fesili numera 1: Pe o le a faapefea ona ou iloa le Uunaiga a le Agaga Paia?

Sa i ai se aafiaga o se alii talavou ina o tamaitiiti o ia, o se tamaitiiti laitiiti tele naua, e lei atoa lona tolu tausaga. Sa vaetamaina o ia i se aiga o Le Ekalesia a Iesu Keriso o le Au Paia o Aso e Gata Ai. Sa matua tele se suiga o lona siosiomaga, ina ua vaetamaina o ia ma tuua lona aiga i Europa i Sasae, ma sa sau ma nofo i le Iunaite Setete i sasae—o se laueleele ua i ai se aiga fou, gagana fou, ma ni faalogoga fou. O le Aso Sa e ave ai o ia e lona aiga fou i le vasega pepe. O le lotu, i le potu taalaelae, i lena potu o le vasega pepe na ia lagonaina ai—ina ua ia iloaina se malupuipuia ma se alofa na te lei lagonaina muamua. O lona uluai aafiaga o le iloaina moni o le Agaga. O lea, ua talavou, ae na te filifili i nisi taimi e alu i le potu taalaelae i lena lava potu o le vasega pepe, e faalogo ai i leo, ma vaavaai i foliga ma lagonaina le Agaga sa ia faalogoina iina muamua. Oka se matagofie o le vasega pepe i mata o lena tamaitiiti, lea na oo mai ai le iloa o le uunaiga a le Agaga Paia.

Sa ta’u mai e Mamona, “Ona o le agamalu foi ma le lotomaulalo e oo mai ai le asiasiga a le Agaga Paia; o lea Fesoasoani e oo mai ai le faamoemoe ma le alofa atoatoa” (Moronae 8:26).

Sa faamatala e Mamona le mea semanu e faamatala e le Faaola: “O le a e maua foi lo’u Agaga, o le Agaga Paia, o le Fesoasoani lea, o lē o le a aoaoina oe i mataupu tau le filemu o le malo” (MFF 36:2).

I le tusi a Alema ua tatou aoao ai i le ala na iloa ai e atalii o Mosaea le uunaiga a le Agaga Paia. Fai mai:

“Ua latou suesueina tusi paia ma le filifiliga, ina ia latou iloa ai le afioga a le Atua.

“A e peitai ua le gata i lea, a ua latou tatalo faatauanau ma ua anapogi” (Alema 17:2–3).

Ona latou o atu ai lea e aoao atu. O ni taulelea e le taualoa sa ofoofogia lo latou lotototoa ona o le Agaga Paia ma se manao ia iloa le afioga a le Atua.

Fai mai Amona, “Ua nofo foi se vaega o lea Agaga i totonu ia te au, ma ua aumaia ai ia te au le poto atoa ma le mana, e tusa ma lo’u faatuatua ma le manao i la le Atua” Alema 18:35

Sa lagona e le tamā o Lamonae le Agaga e ala i aoaoga a Arona ma sa ia fai mai, “Ou te tuu ese … mea uma ua ia te au, ioe, ou te tuua lava lo’u malo ina ia ou maua lena olioli tele” (Alema 22:15).

Na taufai lagona e Lamonae ma le tamā o Lamonae le Uunaiga a le Agaga Paia, ina ua aoaoina i la’ua i le ata o le faaolataga. O faifeautalai i ona po nei, e faatumulia i le Uunaiga a le Agaga Paia ma latou aoao atu foi lena lava savali e tasi i le lalolagi atoa. O outou na ua mae’a misiona: Pe o e manatua lou lagonaina o le malosi o le Agaga ina ua e tulai ma molimau atu i le moni o le talalelei a Iesu Keriso?

Fai mai se tasi faifeautalai a o malaga atu i le malaevaalele, “Ua ou fefe ou te alu i le fale. O le a le mea e tupu pe a ou le lagonaina lenei malosi o le Agaga pe a mae’a la’u misiona?”

Sa ou fai atu ia te ia, “A e valaauliaina le Uunaiga a le Agaga Paia ma e ola agavaa ai ia maua, o le a i ai pea lava pea ma oe.”

2. Ua Oo ina Iloa le Moni o le Tusi a Mamona

Fesili numera 2: Pe o le a faapefea ona ou iloa e moni le Tusi a Mamona?

I se faigalotu a le BYU–Idaho ia Iuni o le 2004, sa faamatala ai e Elder Clayton–M. Christensen, o se polofesa o le Aoga Faapisinisi a Harvard, le faaiuga sa ia faia e aoao pe moni le Tusi a Mamona.  Ina ua maea ona ia faauu mai le BYU, sa ia maua se sikolasipi e alu ai i le Iunivesite o Oxford i Egelani. O iina na ia faia ai se faaiuga [na te] lei iloaina lava pe moni le Tusi a Mamona. Sa [ia] faitauina le Tusi a Mamona ma ua oo i le faafitu i lona olaga, ma o taimi taitasi o na taimi e fitu pe a oo o [ia] i le faaiuga o le tusi, sa ia tootuli ai e tatalo ma fesili atu i le Atua e ta’u atu ia te [ia] pe moni, ae sa leai lava se tali na [ia] maua. Sa [ia] iloaina, a o [ia] mafaufau pe aisea ua na [ia le maua ai] se tali, o na taimi taitasi e fitu ua mavae, sa [ia] faitauina ona o se mea sa atofa atu ia te ia e fai, a lē mai [ona] matua po o se faiaoga o le BYU po o [lona] peresitene o le misiona po o se faiaoga o le seminare, ma o [lona] faamoemoega lava o le faauma o le tusi. Peitai, o le taimi la lenei i [lona] olaga sa [ia] matua manaomia lava ona iloa mo [ia lava] pe moni le Tusi a Mamona. O le taimi lena i [lona] olaga, sa ia lagolagoina [ia lava] i se talitonuga i le tele o aoaoga faavae o le ekalesia ma i le talitonuga o [ona] matua aua sa [ia] iloaina na iloa e [ona] matua e moni, ma sa [ia] faatuatuaina [ona] matua. Peitai, mulimuli ane, ina ua taunuu o [ia] i Oxford, o le taimi muamua lea i [lona] olaga na [ia] matua manaomia ai lava ona iloa pe moni.

O Oxford o se tasi o iunivesite ua sili ona leva. Sa nofo o ia i se fale na fausia i le 1410---Fai mai a ia e ese le “manaia i le tilotilo i ai, [ae] sa matua lē lelei i le nofo. E i ai si tama’i avanoa sa eli ai se pu i le puipui ma’a ma sa tuu ai iina se [magalafu]. Sa tonu ia te [ia] o le a [ia] tuuto atu afiafi taitasi mai le 11 i le 12:00 [i le po] e faitau ai le Tusi a Mamona e su’e ai pe moni.” Fai mai a ia, sa ia “taumafaufau pe tatau ona [ia] faaaluina lena taimi tele, aua sa matua mamafatu [lana] polokalama faale-aoaoga o le faatinoga faafuainumera o le tamaoaiga, ma sa taumafai o [ia] e faamae’a lana polokalama i le lua tausaga, a o le toatele o tagata e tolu tausaga e faamae’a ai, ma sa [na] le iloa pe mafai ona [ia] faaavanoaina se itula i aso taitasi mo lenei taumafaiga. Ae sa [ia faia].” Na ia “amata i le 11:00 i lona tootuli e tatalo i autafa o le nofoa i tafatafa o le magalafu ma [tatalo] leotele ai. Sa [ia] ta’u atu i le Atua [lona] naunau e fia iloa pe moni lenei tusi, ma sa [ia] ta’u atu ia te Ia afai Na te faailoa atu ia te [ia] e moni, ona [ia] tuuto atu lea o lona ola i le fausiaina o Lona malo. Sa [ia] ta’u atu foi i le Alii afai e le moni, [na] te fia mautinoa foi, ona [ia] tuuto atu lea o lona ola e saili le mea moni. Ona [ia] nofo lea i le nofoa ma … faitau [lena] itulau muamua o le Tusi a Mamona, ma a oo [lana] faitau i le pito i lalo o le itulau, sa taofi, ona mafaufau lea e uiga i mea sa [ia] faitauina i lena itulau, ona [ia] fesili ifo lea ia te [ia] lava, ‘Mata na tusia lenei tusi e se Tagata taufaavalea sa taumafai e faasese ia tagata, pe sa tusia moni e se perofeta a le Atua? A o [le] a foi lona uiga ia te au i lo’u olaga?’… Ona [ia] tuuina lea o le tusi i lalo ae tootuli ma tatalo ma toe fesili leotele atu foi i le Atua, ‘Faamolemole ta’u mai pe moni lenei tusi.’ Ona [ia] toe nofo foi lea i le nofoa ma su’e le itulau ma faitau le isi itulau, malolo i le faaiuga, ma toe fai foi le mea lava lea e tasi. Sa [ia] faia lenei mea mo se itula i po taitasi, o lea po ma lea po i lena potu malulu, ma le susū i le Iunivesite o Queen Oxford.

“E oo atu i le taimi ua oo ai [lana] faitau i mataupu o le faaiuga o le 2 Nifae, i se tasi afiafi ina ua fai [lana] tatalo ma saofai i [lona] nofoa ma tatala lana tusi, sa faafuasei ona oo mai i totonu o lena potu se agaga matagofie, mafanafana, manaia sa siomia ai o [ia] ma faatumulia ai [lona] agaga ma ufitia ai o [ia] i se lagona o le alofa, [na] te le’i mafaufauina e mafai ona [ia lagona]. Ma sa amata ona [ia] tagi, ma … sa le’i … uma lona tagi aua sa [ia] tilotilo atu i ona loimata i upu o le Tusi a Mamona, sa mafai ona [ia] iloa atu le moni i na upu na te lei mafaufau muamua o le a mafai ona [ia] malamalama i ai. Sa mafai ona [ia] vaaia le olioli o le faavavau. Sa mafai ona [ia] iloa atu mea sa teuina e le Atua mo [ia] o se tasi o Ona atalii. [Ma] sa lei manao o [ia] e tuu lona tagi. Sa tumau ia te [ia] lena agaga i le itula atoa, ona oo ai lea i afiafi uma lava pe a tatalo o [ia] ma saofai ma le Tusi a Mamona i tafatafa o le [magalafu] i [lona] potu, e toe foi atu lava lena agaga, ma sa suia ai [lona] loto ma [lona] olaga e faavavau.”

O le taimi nei, fai mai a ia, pe a toe tilotilo i le feteenaiga sa ia oo i ai, “ma mafaufau pe sa mafai ona [ia] faaaluina se itula i aso taitasi e ese mai suesuega e fia iloa ai pe moni le Tusi a Mamona.” Fai mai a ia, “mai a’oa’oga uma sa ia tulitulimatagauina, o le vaega aupito sili lea ona taua ma aoga o le iloa ua [ia] mauaina.”

O le taimi nei e fiafia lava e toe foi i Oxford. Fai mai a ia, “O le toatele lava o tagata iina a le o ni tamaiti a’oga, o ni tagata tafafao e o atu e matamata i le iunivesite matagofie.” Ae e fiafia lava o ia “e toe foi i ai ona [o se] nofoaga e paia, ma e mafai ona [ia] tilotilo atu i faamalama o lena potu sa [ia] nofo ai, ma mafaufau, “O le nofoaga lena sa ou iloaina ai o Iesu o le Keriso, [ma] o Ia o lo’u Togiola soifua, ma o Iosefa Samita o le perofeta o le toefuataiga o le ekalesia moni.”

Na saunoa atu Elder Christensen i le au aooga i le BYU–Idaho:  “O nisi o outou atonu na o mai iinei i Rexburg ua outou iloaina e outou lava, o le Ekalesia lenei a le Atua. Peitai, o outou o loo ola lava i molimau a isi, ou te valaaulia outou ina ia faataatia ese se itula i aso taitasi e saili ai mo oe lava ia pe moni, aua o le a suia ai lou loto e faapei foi ona suia ai lo’u loto.”3

I le Ioane 5:39 tatou te faitau ai, “E suesue outou i Tusi, aua ua outou manatu tou te maua ai le ola e faavavau: o  tusi foi ia o loo molimau ia te au.”

Na saunoa Elder Bruce C. Hafen, “E mafai ona tatou maua le ola faavavau pe afai tatou te mananao ai, ae pe afai lea e leai se isi mea tatou te mananao ai.”4

O le oo ina iloa le upumoni e manaomia ai se taumafaiga. Ma o le tele o la tatou taumafaiga e tuuina atu, o le tele foi lea o le taui. Fai mai Moronae, “Pe a maua e outou nei mea, ou te apoapoai atu ia te outou, ia outou ole atu i le Atua, le Tama Faavavau, i le suafa o Iesu Keriso, pe le moni ea nei mea; afai tou te ole atu ai ma le loto faamaoni, ma le manatu tonu i ai, ma le faatuatua ia Keriso, na te faaalia le tonu i ai ia te outou i le mana o le Agaga Paia” (Moronae 10:4).

3. Ua Oo ina Iloa le Fuafuaga a le Tama Faalelagi

Fesili numera 3: Pe o le a faapefea ona ou iloa le fuafuaga patino a le Tama Faalelagi mo a’u?

E tofu i tatou ma filifiliga e fai a o tatou agai atu i le Tama Faalelagi. O Lana fuafuaga mo i tatou o se fuafuaga o le fiafia. Fai mai Iosefa Samita, “O le fiafia o le faamoemoega lea ma le mamanu o lo tatou ola ai iinei.”5 E finagalo lo tatou Tama Faalelagi ia tatou lagonaina le olioli. E tosi e i tatou taitoatasi lona lava ala e ui ai. E eseese i tatou. O o tatou uiga patino, taleni, ma o tatou uiga faaletino ma faalelagona e eseese. O nisi e to mai lagī. O le tele lava e maua mai i le amio pulea o le tagata lava ia. E mafai e o tatou mana’o ona faatoilalo o tatou vaivaiga.

O se faataitaiga lenei: Sa i ai se teineitiiti i le vasega lua i le tulagalua sa maua i se ma’i e le mafai ai ona ia manatua mea e vaai i ai. Fai mai le faufautua faalemafaufau a le a’oga, “Ona o lenei tulaga e le mafai ai ona manatua ma taulotoina, o le a ulivaa ai lava o ia i lana vasega.” Sa filifili ona matua e aua ne’i faailoa atu ia te ia lona manaoga faapitoa. I ana taumafaiga ia tau lava ina manuia lana a’oga, sa tatau ai ona ia galue malosi ia ausia le tele o mea e faigofie ona ia ausia. Sa siomia o ia e ni uo lelei sa lelei tele i le aoga. Sa fesoasoani lena i ana taumafaiga. Sa umi atu se taimi na te aoaoina ai le faatele i le vasega tolu, ma aai autu o le Iunaite Setete i le vasega lima. Sa lesitala o ia i le a’oga maualuga ma agaigai ai pea lava i luma. O le anoanoai o itula na ia faaalu e suesue ai na iloga ai lona tuuto faamaoni.  O le taimi nei, o ia o se tausi soifua o gasegase tigaina o le fatu. Ma o se tausi soifua lelei tele! Sa i ai se la fuafuaga ma lona Tama Faalelagi.

O se isi tala: Pe tusa ma se tausaga talu ai, sa ou asiasi ai i se vasega a Tamaitai Talavou. Sa fesili mai le faiaoga e tusi ni a matou faamuamua se 10 i se lisi. Sa vave ona amata ona ou tusia. E tatau ona ou ta’u sa’o atu, o le mafaufau muamua lava na amata i le “Numera 1: faamama le pusatoso penitala i le umukuka.” Ina ua maea a matou lisi, sa fai mai le taitai o Tamaitai Talavou e faasoa uma a matou mea sa tusia. O Abby lea faatoa atoa talu ai lona 12 tausaga i le lua masina na mavae atu, sa nofo i o’u tafatafa. O le lisi lea a Abby:

• 1. Alu i le Iunivesite a Iuta.

• 2. Avea ma se faimamanu o totonu o fale.

• 3. Alu e faamisiona i Initia.

• 4. Faaipoipo i le malumalu i se alii ua mae’a le misiona.

• 5. Ia toalima sa’u fanau ma ia i ai se fale.

• 6. Auina la’u fanau i misiona ma iunivesite.

• 7. Avea o se tinamatua e “ofoina atu kuki”.

• 8. Faamatanana ia fanau a fanau.

• 9. Aoao atili i le talalelei ma fiafia i le olaga.

• 10. Toe foi e mau faatasi ma le Tama i le Lagi.

Tou te talitonu i ai! Ou te faapea atu, “Faafetai lava, Abby, mo le aoaoina o a’u e uiga i le i ai o se vaaiga mamao i le fuafuaga a le Tama Faalelagi mo i tatou taitoatasi.” E te faia se fuafuaga ma ia e ola ai i le mea sili e te mafaia. O le a i ai auala ‘alo. Atonu o le a motu se alalaupapa, atonu e te fetaiai ma ni poloka o le auala, pe atonu foi e te feseseta’i ma leiloa, ae e mafai lava ona e toe foi mai i le ala.

Na saunoa Peresitene Thomas S. Monson, “Afai e te faia se mea e tulai mai e le o le mea tonu lea sa e… fuafuaina, e toetoe lava ina mafai ona e faasa’oina i taimi uma, lafoai, ma aoao mai ai.”6 Atonu e te mafaufau e leai se auala e toe foi ai. E ataata le fili i lena mafaufauga. Sei ou faamautinoa atu ia te oe, o loo i ai le ala e toe foi ai. Na fetalai le Faaola, “Ua faaloaloa atu pea lo’u lima i le aso atoa” (2 Nifae 28:32). Ua Ia fetalai mai, “Faauta, o la’u galuega ma lo’u mamalu lenei—ia faataunuu le faaofuina o le tagata i le tino ola pea ma le ola faavavau” (Mose 1:39). Ou te fia mafaufau faapea, o loo sili atu le galue malosi o le Atua nai lo i tatou ina ia tatou toe foi atu.

Muamua, o loo faamoemoeina e Ia ia maua lo tatou tulaga i Lana fuafuaga ma ia faia mea uma tatou te mafaia ina ia ola ai, e ala i le usiusitai i poloaiga ma tutu i nofoaga paia. Afai o la tatou sini faatumutumu o lo tatou faaeaga, o la tatou fuafuaga ina ia oo atu iina o le a amata i le faafoeina o faaiuga uma tatou te faia. Tatou te le savavali na o i tatou. E alofa o Ia ia te i tatou ma Na te silafia i tatou taitoatasi. E aofia ai o Ia i auliiliga uma o o tatou olaga, ma e i ai taimi e mafai ai ona tatou lagonaina Ona alofilima i o tatou papatua a o tatou savavali ai i le ala.

4. Ua Oo ina Iloa le Tama ma le Alo

Fesili numera 4: Pe o le a faapefea ona ou iloa le Tama ma Lona Alo Pele?

O le iloa o le Tama ma Lona Alo o le faamoemoega lea o lo tatou ola ai iinei.

Na fetalai mai le Faaola, ina o tatalo atu i le Tama, “O le ola e faavavau foi lenei, ia latou iloa oe le Atua moni e toatasi, atoa ma Le ua E auina mai, o Iesu Keriso lea” (Ioane 17:3).

Sa “le iloa [e Lamana ma Lemuelu] galuega a le Atua, o Le na faia i la’ua” (1 Nifae 2:12). Fai mai C. S. Lewis, “A tumau lou faamaualuga, e le mafai lava ona e iloa le Atua.”7 E manao le tiapolo ia aua nei o tatou iloa le Atua. E manao foi o ia ia tatou nopia’i i mea ua tuanai, ia fenumia’i, ma siosiomia i le pisapisao, o mea faalavefau, ma soo se mea lava e taofia na taimi paganoa tatou te sailiili patino ai i le Alii. O le soona faaaofia ai i soo se mea o se tasi foi na o meafaigaluega a Satani. E na o i tatou lava e mafai ona fatuina se taimi ia lava e iloa ai le Alii.

A tatou lotomaulalo, gauai gofie, pe agamalu foi, ua tatou latalata atu ia te Ia. Fai mai Francis Webster, o lē sa savalia le alasopo naumati o Wyoming faatasi ma le vaega o taavaletosolima a Matini i le 1856, i le puipuiga o lea vaega, “O i matou uma lava taitoatasi na o mai ma le iloa a’ia’i o loo soifua le Atua aua na matou masani ma ia i o matou mafatiaga ogaoga.”8

E oo ina tatou iloa le Faaola pe a tatou faatagaina o Ia i o tatou olaga. E sili atu lo tatou naunau e faamagalo atu ma auauna atu pe avea o Ia ma se vaega o o tatou olaga. A tatala o tatou loto ma talia gofie, ona atili ai lea ona avea i tatou e faapei o Ia. O iina tatou te iloa ai sa tatou i ai lava faatasi ma Ia i taimi uma. Tatou te maua le filemu. E le toe avea o tatou tofotofoga ma ni avega, a o ni faamanuiaga, aua sa fola ai le ala na tatou oo atu ai ia te Ia.

“Tatou te mitamita i puapuaga,” sa fai mai ai Paulo, “ua tatou iloa o le puapuaga e tupu ai le onosai;

“O le onosai e tupu ai le mautinoa, o le mautinoa e tupu ai le faamoemoe:

“O le faamoemoe foi e le ma ai, aua ua faamaligi mai le alofa o le Atua i o tatou loto e le Agaga Paia ua foaiina mai ia te i tatou” (Roma 5:3–5).

Na faatatau e C. S. Lewis i latou o ē ua iloa Keriso “o tagata fou.” Fai mai a ia, “O tagata fou ua togitogi solo i i ma o ma ua soo ai le lalolagi uma. … O lea taimi i lea taimi e feiloai atu ai se tasi ia i latou. O o latou … [foliga ma o latou leo] e ese mai lo i tatou, e malolosi atu, e lemu, e fiafia, e sili foi ona susulu. Latou te amata mai i le mea lea e toatele i tatou e gata ai, … . Latou te le faatosina atu mo i latou lava. Tou te tau manatu [faapea] o loo outou agalelei atu ia i latou, ae o le mea moni o latou e agalelei mai ia te outou. E sili atu lo latou alolofa ia te outou nai lo le alofa o tagata, ae latou te tau le manaomia outou. … E masani lava e foliga mai e tele atu o latou taimi: o le a e tau mafaufau pe o fea e maua mai ai …

“… Ina ia avea ma ni tagata fou, o lona uiga o le lafoai o le mea lea tatou te faaigoaina nei o le ‘tatou lava.’ O ese mai ia i tatou lava, o atu ia Keriso, o le mea lea e tatau ona tatou o i ai. Ia avea Lona finagalo mo i tatou, ma e tatau foi ona tatou mafaufau i Ona mafaufauga9

O Le Faasologa e Oo ai ina Tatou Iloa mo i Tatou Lava

O le iloa o le Agaga Paia, o le iloa lea o le moni o le Tusi a Mamona, o le iloa o le fuafuaga a le Tama Faalelagi mo i tatou taitoatasi, ma o le iloa o le Tama ma le Alo o se faagasologa matagofie lea.

O loo i ai se mamanu e o faatasi ma manaoga taitasi ia iloa. Pe o mafai ona e iloa atu?

Na faamanino mai e Nifae le mamanu ina ua ia fai mai, “Tou te le manatua ea se mea ua fetalai mai ai le Atua? —Pe afai tou te le faamaaa o outou loto, a e aioi mai ia te au, ma le filiga i le tausiga o a’u poloaiga, o talitonu tou te maua lava, e moni, e faailoaina ia mea ia te outou” (1 Nifae 15:11).

Pe o mafai ona e iloa atu le faasologa?

Ua ta’u mai e Nifae ia i tatou le faasologa e aofia ai:

• • Ia i ai se lotomaulalo.

• • Ole atu i le faatuatua; valaau atu i le fesoasoani a le Alii e ala i le tatalo.

• • Galue ma le maelega e tausia poloaiga ma faia le finagalo o le Alii.

• • Ma faailoa le aao o le Alii. O le ala lena o le a faailoa atu ai ia te oe. A e vaaia Lona aao i lou olaga, o se faamautuina lea o Lona alofa. O le tele o lou faailoaina o Lona aao, o le tele foi lena o Lona aofia ai i lou olaga. Ma o le ala lena o le a e iloa ai le Faaola lea sa e iloaina muamua.

O tagata i le vai o Mamona sa tuputupu ae i le faatuatua e ala i le tatalo. O le maelega, sa latou galulue ai ma aoao ai e tausia le aso Sapati. Sa latou aoao e galulue i o latou lima ma auauna atu e ala i le tufatufa atu o a latou mea i le faaleagaga ma le faaletino i isi. Sa suesue e atalii o Mosaea ia tusitusiga paia, ma sa latou matua tuuina atu i latou lava i le tatalo ma le anapogi. Sa latou totogiina le tau ina ia latou iloa ai.

Sa faagaeetia au ona sa tatalo leotele ia Elder Christensen ma folafola atu i le Alii, afai Na te faaali atu ia te ia le moni o le Tusi a Mamona, o le a ia tuuto atu lona ola i le fausiaina o le malo. Sa maelega o ia, ma o lana osigataulaga i po uma, na ia iloa ai.

Sa amatalia e Abby se fuafuaga, ma sa ia ola ai ma le maelega. O lana sini mo le toe foi atu i lona Tama Faalelagi o le a faamautuina ai ana faaiuga i aso taitasi. Ua oo ina ia iloa e i ai le fuafuaga a le Alii mo ia.

O lo tatou iloaina mo i tatou lava, e matuai patino i le tagata lava ia. Ma e mafai ona tele taimi i o tatou olaga tatou te vaaia ai lena “oo ina iloa”.  O se faasologa o le manatuaina o mea sa tatou iloa muamua. Tau lava ina iloa lenei mea: Ua e iloa o Ia,, ma afai e te fesili pe Na te silafia oe, tau lava o le fesili. O le pese a le Peraimeri “O Le Tatalo a Le Tamaitiiti” e amata i le, “Le Tama e, o e iai iina? Pe o e lagona mai tatalo uma?”10 Ou te molimau atu, Ioe! Na te lagonaina ma tali mai i ai! E mafai ona aoaoina i tatou e le Alii pe a tatou fesili. Tootuli e tatalo ma fesili leotele i ai, “Pe o a’u moni ea o sou atalii po o se afafine? Pe e te alofa ea ia te au?” Ona e faalogologo lea. E i ai se mea faatauvaa e uiga i le fesili. O le fesili o se taga o le faatuatua.

O Iosefa Samita, o se taulealea i le 14 o ona tausaga i le taulaga o Palamaira, i se vao paia, sa fesili ai i le faatuatua ina ia iloa ai. Fai mai a ia, “Sa ou vaai i ni Tagata se toalua, ma e moni lava sa la fetalai mai ia te au. … sa ou vaai i se faaaliga; sa ou mautinoa lava lena mea, ma sa ou mautinoa foi ua silafia e le Atua le moni o lena mea, ma e le mafai lava ona ou faafitia” (Iosefa Samita—Talafaasolopito 2:25). “O lenei, ina ua uma ona faia molimau e tele e uiga ia te ia, o le molimau tupito mulimuli lenei i mau uma lava, ma te faia ia te ia: O loo soifua o ia!” (MFF 76:22).

I Ierusalema, i le tuugamau, i le faaiuga o le Sapati ina ua amata ona tafa ata o le uluai aso o le vaiaso, sa faafeiloaia ai Maria le Makatala ma le isi Maria e ni agelu se toalua i se nofoaga matagofie i se togalaau. Fai mai le agelu:

“Aua lua te matatau, aua ua matou iloa o loo oulua sailia Iesu, o le sa faasatauroina.

“E le o i ai o ia iinei: aua ua toetu o ia” (tagai Mataio 28:1–6, vaefaamatalaga 2a, 3a, ma le 5a; mai le Faaliliuga a Iosefa Samita).

E ala i le iloa ua toetu le Faaola, o Iesu Keriso, ua tatou iloa ai o Lana Togiola, o le a Ia faamalolo ai tiga uma. Na te aumaia le faaolatotoga ma le toafilemu mai popole uma. E mafai ona Ia tauaveina a tatou avega ma aumaia le filemu i lagona uma lava o le le agavaa ma manaoga uma ina ia suia.

Na saunoa Peresitene Ezra Taft Benson, “E leai [leai] se mea o le a sili ona tatou ofo ai pe a tatou pasi atu i le isi itu o le veli, nai lo le iloaina tatou te iloa lelei lo tatou Tama ma e tatou te masani lelei i ona foliga.”11 Tatou te iloa o Ia!

O iinei i le Iunivesite o le Setete o Iuta, o lo’u vai lea o Mamona. E matagofie lenei lotoa i la’u vaai, aua o iinei sa amata ai ona ou iloa lo’u Togiola. Ou te tu atu ma le mitamita o se molimau a le Tama Faalelagi ma le Faaola. O le mana o le Agaga Paia ua ou iloa ai o loo soifua i La’ua. E patino ma pele oe ia te i La’ua. Na e iloa lelei i La’ua ae e te lei sau i lenei lalolagi. A e savali i le ala, pipiimau. O loo faatalitali mai le opo a le Tama Faalelagi ia te oe. Ou te alofa ia te outou. Ou te tatalo foi mo outou o Ana fanau. I le suafa o Iesu Keriso, amene.

© 2010 Puletaofia e le Intellectual Reserve, Inc.Ua taofia aia tatau uma. Faamaonia le faaPeretania: 2/11. Faamaonia le faaliliuga: 2/11. Faaliliuga o le Coming to Know. Samoan. PD50031652 890

^ Back to top