• Print
• Listen
  • MP3
• E-mail

Elder Neil L. Andersen,  “Sauniuni mo Lou Taunuuga Faaleagaga” 

Faeasaite a le OAE mo Talavou Matutua • 10 Ianuari, 2010 • Iunivesite a Polika Iaga

Ou uso e ma tuafafine talavou pele, e le mafai ona ou iloa atu o outou foliga uma iinei i le Marriott Center ma, ioe, e le o mafai ona ou iloa atu o outou foliga i le fiaafe o faletapuai i le lalolagi atoa, ae e mafai ona ou lagonaina lo outou lelei, lo outou naunau e fai le mea sa’o, ma lo outou alolofa i le Alii ma Lana talalelei toefuataiina. O se tasi o faamanuiaga o le avea ai ma se Pulega Aoao, o le maua lea o le avanoa tatou te mafuta ai i le salafa o le lalolagi. I ni nai masina ua mavae atu, sa ma vaavaai atu ai i o outou foliga ma faatalofa ma outou i le tele o vaega i le Iunaite Setete. Sa matou malaga ma Peresitene ma Sister Uchtdorf ia Iuni talu ai i Europa i Sasae, Rusia, ma Peretania. O le masina o Oketopa, sa matou i ai i Aferika i Saute ma Aferika i Sisifo Ia Novema, sa matou toe taliu mai ai mai Amerika Tutotonu. O loo i ai se mana tele o le amiotonu i talavou matutua ma le autalavou laiti o lenei Ekalesia. Ia outou iloa o loo outou auai faatasi ma le fia selau afe o isi tagata i luitau e tasi o loo outou feagai, faapea foi faamoemoega taua o loo outou lagonaina. Ou te alofa ia te outou, ma ou te tatalo ina ia mafuta mai le Agaga o le Alii ma i tatou a o tatou talanoaina mea e taua mo outou i le po nei.

Ua ou ola i lenei olaga pe tolu i le fasefulu tausaga e umi atu ai nai lo le toatele o outou, ae e le ona o mea ua ou oo i ai, ua aumaia au i o outou luma. I le iloaina o o’u lava vaivaiga, ua ou tu atu ai i o outou luma o se Aposetolo a le Alii o Iesu Keriso, ua faauuina ma ua poloaiina e molimau atu ia te Ia ma tautala atu i mea semanu Na te fetalai atu ai. O lo’u tofiga i le po nei, na aumai e le Aposetolo autu a le Alii, o Peresitene Thomas S. Monson.

Ao ou tilotilo atu ia te outou, ou te mafaufau ia te au lava i le 37 tausaga ua mavae. Faatoa ou foi mai mai la’u misiona i Farani. Sa utiuti mea e maua, ma sa na o sina tupe itiiti sa nono mai, na ou sau ai i le Iunivesite o Polika Iaga. Sa maua sa’u galuega o le fufulu faamalama i le aoga. Na atoa le tausaga faatoa ou feiloai i le sulu o lo’u olaga, o Kathy Williams. Sa ou lagona le tuulafoaiina ma sa ou le mautinoa le ala sa i o’u luma. Ou te manatua lo’u mafaufau, “Pe o le a lo’u lumanai ae pe faapefea foi ona ou sauniuni i ai?”

O le manatuaina o nei mafaufauga, ua ou faaautuina ai la’u savali i le po nei “Sauniuni mo Lou Taunuuga Faaleagaga.”

A o i ai Iesu i luga o le fogaeleele, sa tele lava ina fetalai o Ia e uiga i mea faitino e fesoasoani ai i Ona soo ia malamalama atili i mea e leai ni tino, o le faaleagaga lea. Sa fetalai o ia e uiga i fatu ma saito ma fale saito, ma matuamoa, ma fuga o laau ma alope ma le anoanoai o isi mea faitino, e fesoasoani ai i tagata ia malamalama atili e uiga i le faatuatua ma le salamo, o le mana faaleagaga ma le faaolataga.

E lei talanoa o ia e uiga i vaalele aua sa lē o se vaega o Lona siosiomaga, peitai na faia e Peresitene Uchtdorf i nai tausaga ua mavae ma sa ia tuuina mai ai ia te i tatou ni aoaoga matagofie mai ona lava aafiaga o se pailate.

E i ai sa’u tala i le vaalele o le a aoao ai i tatou e uiga i le sauniuni mo o tatou taunuuga faaleagaga.

O Kapeteni Sullenberger ma le Faigamalaga 1549 a le US Airways

Ua atoa lelei le tausaga e tasi talu ai i le vaiaso nei—15 o Ianuari, 2009—na tuua ai e le Faigamalaga 1549 a le US Airways le Malaevaalele o LaGuardia i le Aai o Niu Ioka ma na vave lava ona masii ae i le tafailagi, i le mea sa faamoemoe o se malaga masani i Charlotte, i Karolaina i Matu i le talafatai i sasae o le Iunaite Setete. O le kapeteni o le vaalele o Kapeteni Chesley B. “Sully” Sullenberger. E oo atu i le taimi o le Faigamalaga 1549, ua silia ma le 19,000 itula le poto masani o Kapeteni Sullenberger ma sa manatu o ia o le isi itula ma le afa o se gaoioiga masani lava.

Ao aga’iga’i ae le vaalele o le Airbus A320 i le 3,000 futu le maualuga, na te’i ua faalava ane faafuasei i ona luma se mea e lei mafaufauina. O se lafu kusi lapopo’a Kanata ma o latou apaau ta’i ono futu sa i le alavaa tonu lava o le vaalele. Na taia le vaalele e nei manu lapopoa. O le mea e sili ona leaga, o afi tetele e i apaau e lua, lea e mimitiina le ea i totonu o tapili ma le malosi tele, na mimitiina mai ai foi ma kusi sa i le alavaa o le vaalele. Sa faalogoina se pao tele o le vilia o kusi i totonu o afi. Ona sosoo ai lea ma se sāō tele—ua le toe ola afi o le vaalele.

Sa vave ona mafaufau Kapeteni Sullenberger pe o le a faapefea ona ia faatulaueleeleina ma le saogalemu le vaalele. Sa mafaufau muamua o ia e toe foi atu i le malaevaalele, po o le isi malaevaalele e le mamao atu. Sa matuai tele lava le tulaga lamatia ma le pagatia. Na te lei iloaina pe o le a le umi e mafai ona ia faaleleina ai le vaalele e aunoa ma le malosiaga o ona afi. Sa laitiiti lava se taimi e fai ai lana faaiuga. Na tonu ia Kapeteni Sullenberger o lona avanoa lelei lava o le faatulaueleele o le vaalele i le Vaitafe o le Hudson, o se vaitafe e tafe latalata atu i le Aai o Niu Ioka. I lena taimi puupuu, na ia faaaogaina ai aoaoga uma na ia mauaina i le avea ai o se kapeteni avevaalele, o lana faautautaga uma, o ona manatu, ma ana taleni e faatino ai lona faatulaueleeleina faafuasei o le vaalele.

Na iloa atu fale tetele i fafo o faamalama, ma na vave lava le palasi ifo o le vaalele, lea sa na o le 900 futu na lele ae ai i luga ae o le Alalaupapa o Siaosi Uosigitone. O le faalalava lelei foi ona apaau i luga o le vaitafe, sa ia faau ae ai i luga le taumua o le vaalele ae faasesee lona ogatotonu i le vai. Na sesee atu le vaalele, e 120 tone le mamafa, i luga o le vai ona tu lelei ai loa lea ma le saogalemu.

O le tau malulu sa matuai maaatiati lava, ma sa iloa e le kapeteni o le a amata ona goto ifo le vaalele. Sa vave ona aveesea mai le pasese mai auala faaleoleo ma tuu i luga o apaau o le vaalele. Sa saunia vaafaaola o le vaalele ma na vave foi ona oo atu vaa mai le matafaga e laveai le pasese. Sa toetoe ina a le talitonuina le tala fou. E ui ina maumau se vaalele e $60-miliona lona tau, ae na tulaueleele saogalemu lava le vaalele a Kapeteni Sullenberger, ma sa saogalemu uma foi le pasese ma le auvaa e 154, faapea ai foi ma Kapeteni Sullenberger.

E pei foi ona sa faia e Iesu i Ana aoaoga, sei o tatou faatatauina mea faitino i mea e leai ni tino, o mea faaletino i mea faaleagaga. Sei o tatou talanoaina vaega e tolu ia e mafai ona vaaia ai o tatou taunuuga faaleagaga —lou taunuuga faaleagaga— i le faigamalaga #1549 a le US Airways. Muamua o loo e i ai i se malaga i le olaga faitino. Lona lua, e tatau ona avea oe o se kapeteni faaleagaga i le galuega a le Alii ua i ai se misiona faapitoa ia ausia. Tolu, o lou tiute paia o le toe foi saogalemu atu ma aumai ni agaga se tele faatasi ma oe.

Malaga i le olaga faitino.

Numera 1: O loo e i ai i se malaga i le olaga faitino.

E lei amataina e le pasese o le Malaga 1549 o latou olaga ina ua latou ulu atu i le vaalele i Niu Ioka. Sa latou o i se faigamalaga. E tele mea na tutupu i o latou olaga a o lei o i lena faigamalaga, ma e tele mea o le a tutupu i le tuanai ai o lena faigamalaga. E faapena foi, o lenei olaga faitino e le o le mea lea na tatou amata ai pe o le a faamaeaina ai foi. O loo tatou o i se faigamalaga. Na amataina lenei faigamalaga i se taimi ua leva lava i se tulaga o le muai olaga na tatou maua ai a tatou “uluai lesona i le lalolagi o agaga, ma sa saunia e o mai i le taimi e tatau ai a le Alii” (Mataupu Faavae ma Feagaiga 138:56). O i tatou moni lava o atalii ma afafine agaga o ni matua faalelagi. Ua fetalai mai le Alii, “O Au o le Atua; na Ou foafoaina le lalolagi ma tagata a o lei i ai i latou i la le tino” (Mose 6:51), “aua na Ou foafoaina i latou i le lagi” (Moses 3:5).

Na tusia e le fatusolo o William Wordsworth upu matagofie nei:

O lo tatou fanau mai ua na o se moe ma se faagalo:
O le Agaga lea e ala mai ma i tatou, o lo tatou Fetu lea i le olaga,
Sa i ai se isi ona nofoaga e goto i ai,
Mai se mea mamao:
E le o se galo nimo,
Po o le leai o se faamoemoe,
Ae na tatou o mai mai le mamalu i le lagi
Mai le Atua, o lo tatou aiga lea.1

O lo tatou olaga i le muai olaga sa le o se nofoaga le mautu. Sa tatou faia ni filifiliga iina e pei ona tatou faia iinei. Sa tatou alualu i luma ma manaomia ni tino faaletino ma ni poto masani i le olaga faaletino. Na tatau lo tatou faamaonia atu o lo tatou naunau e ola i le faatuatua. Na faailoa mai e lo tatou Tama Faalelagi se fuafuaga ia i tatou. E totonugalemu i lena fuafuaga o le tiute o Lona Alo Pele e Toatasi e saunia se ala tatou te toe foi atu ai. Sa tatou taliaina le fuafuaga a le Tama ma olioli i le Faaola filifilia. O avanoa ma tiutetauave na muai faauuina ai i tatou e fesoasoani e mamanu ai mea e tatau ona tatou faia i le olaga nei. I auala tatou te le malamalama atoatoa i ai, “o a tatou amioga i le lalolagi o agaga e uunaia ai i tatou i le olaga nei”.2

Ua tatou i ai nei iinei—i lo tatou olaga faitino ua leva ona faatalitali i ai. E ui ina tatou le manatua lo tatou olaga i le muai olaga, e tagitagi pea lava ia i tatou le moni o lena mea. E oo lava foi i lenei olaga, tatou te le manatuaina uma mea e taua. Mo se faataitaiga, o e manatua au uluai upu na e tautala ai po o au uluai laa? E te manatua lou mafaufau, “E te iloa e le toe siiina a’u e lo’u tina e pei ona sa masani ai. O lea, afai e tatau ona ou feosofai e pei ona ou manao ai, e tatau ona ou tu i luga e savali”? E le faigata ia i tatou ona lagona i o tatou loto, o tagata ua avea ai i tatou e lei amataina i lo tatou fanau mai i le olaga faitino. O i tatou o atalii ma afafine o le Atua. E i ai se fuaitau i le Alema e faamatala ai le tiutetauave o tusitusiga paia e “[faateleina] ai manatu o lenei nuu” (Alema 37:8). Ua faateleina o tatou manatua, ma ua tatou iloa ua tatou saunia mo le olaga o loo tatou ola ai nei.

E pei lava ona amataina lo tatou olaga ae tatou te lei fananau mai i le olaga faitino, e le muta foi lo tatou olaga i le oti. O le a tatou faaauau pea. O le tagata ua e i ai—o oe, o le tagata tulaga ese e tasi—o le a e avea ai pea lava. Atonu e fai mai nisi, “Ou te le fiafia i le tagata ua ou i ai.” Ia e malie. E mafai ona e mamanuina le tagata ua avea ai oe, e mafai ona avea oe ma se tagata e sili atu nai lo le tagata o loo e i ai i le taimi nei, ae o oe, o oe lava lea.

O Se Kapeteni i le Galuega a le Alii

Numera 2: O oe o se kapeteni faaleagaga i le galuega a le Alii, ua i ai se misiona faapitoa e ausia.

Ua ia te oe ma au se taunuuga faaleagaga, ma e le mafai ai ona tatou tietie faalēano ai i le pito i tua o le vaalele e faimalaga ai i le olaga faitino. Na folafola atu e le Alii ia Aperaamo o le a faamanuiaina atunuu uma o le lalolagi ona o ia (tagai Kenese 22:18; Aperaamo 2:9). Sa fetalai o Ia e uiga i faamanuiaga faaleagaga e aumaia i le lalolagi e ala mai ia i tatou, o lea na Ia faatatau i ai o “fanau o le feagaiga” (3 Nifae 20:26). Na faamatalaina e Alema nisi ua “valaauina ma saunia talu le faavaeina o le lalolagi, e tusa ma le silasila mamao o le Atua” (Alema 13:3).

Pe na e mafaufau ea: Pe aisea ua avea ai au ma tagata o i ai nei? Aisea ua ou manatu ai faapenei? Aisea ua ou filifili ai e talitonu atoatoa i le Alii o Iesu Keriso? Aisea ua ou filifili ai e tausi i Ana poloaiga ae e le o popole lava i ai isi tagata? Aisea ua ou manatu ai faapenei e uiga i le Tusi a Mamona? Aisea e o mai ai upu mai itulau o tusitusiga paia ma o mai sa’o lava i lou loto, ae o isi e toetoe lava a le popole i lenei tusi paia? Aisea ua ou naunau ai e osia feagaiga paia e ala i le papatisoga, osia feagaiga i le malumalu, ma —mo le toatele o outou—faia se misiona?

Na filifilia ma muai faauuina oe ina ia e maua le talalelei i lou olaga, ma ia avea ma se taitai i le galuega o le talalelei toefuataiina.

E oo mai i le taimi o le Faigamalaga 1549, ua 19,000 itula ua lele ai Kapeteni Sullenberg. A mafaufau atu i lana filifiliga e avea ma se pailate, fai mai o ia, i le 16 o ona tausaga, ina ua  maea le itiiti ifo ma le 8 itula o le aveina o vaalele laiti e taitasi afi, na ia iloa ai o le avevaalele o le a avea ma se vaega o lona taunuuga.3

Ia talia ua i ai sou taunuuga e faavavau lona taua, o se taunuuga faaleagaga. Faitau lou faamanuiaga faapeteriaka. E pei ona ta’u atu i le Masiofo o Eseta o anamua, “E iloa foi e ai … ona o se aso faapenei” (Eseta 4:14). Talitonu i ai, ma taofimau i ai!

O le iloa po o ai oe ma le tagata e tatau ona avea ai oe, e le faia ai oe ma se kapeteni i le galuega a le Alii. O loo i ai faafitauli ma faaosoosoga e sili atu ona taufaasese nai lo se lafu kusi lapopoa Kanata, o le a taofia ai oe mai lou taunuuga. E tatau lava ona e mataala. Ina ia avea oe ma se kapeteni i le galuega a le Alii, e manaomia le faia o ni sauniuniga. Ma o na sauniuniga e le faigofie! Na fetalai le Faaola, “Ai se tasi e fia mulimuli mai ia te au, aua nei usiusitai o ia ia te ia, a ia ave e ia lona satauro, i le mulimuli mai ai ia te au” (Mataio 16:24). Na ia faamalamalama atili mai “ina ia ave foi e se tagata lona satauro, [o lona uiga] e tatau ona ia lafoai mai ia te ia lava [o] mea uma e le mama, ma tuinanau uma o le lalolagi, ae [ia] tausia poloaiga [a le Alii]” (Mataio 16:24, vaefaamatalaga d; mai le Faaliliuga a Iosefa Samita, Mataio 16:26).

O le toe mafaufau i taimi o ana aoaoga faamasani i le Aoga o le Ea Fosi, na fai mai ai Kapeteni Sullenberger:

“O se aafiaga ogaoga. … Sa suesueina i matou, … luitauina. Ma sa matou vaai i nisi o a matou au na maliliu. …

“… Na ou iloa ai afai ou te matuai taumafai malosi, e mafai ona ou maua le malosiaga ou te lei iloa na ia te au. Ana le faamalosia lo’u uunaia o a’u lava … , semanu ou te le iloa lava le anoanoai o punaoa faaleagaga na tatau ona ou utuvai ai.”4

O sauniuniga faaleagaga o le a iloa ai o tatou lava punaoa o i totonu. E i ai le mana i le tatalo. E i ai le malosiaga i tusitusiga paia. Ua tatou aoao e savavali agai i luma i le faatuatua, ma ia saga usiusitai atili. O le saunia ma le agavaa mo le faamanatuga, ma aai ma feinu ai i vaiaso taitasi e faafouina ai ma puipuia ai i tatou. Tatou te maua le meaalofa e le mafaatauina o le Agaga Paia. O lenei meaalofa faalelagi e moni ma e matuai taua lava i le tausia o i tatou ia saogalemu.

I le talanoa ai e uiga i le avea ma se kapeteni o se vaalele, na lapatai mai ai Kapeteni Sullenberger:

“E le o tulaga uma e mafai ona muai iloaina pe faamoemoeina. E leai se lisi o mea e fai mo mea uma.5

“E tatau ona e iloa mea e tatau ona e iloa ma mea e te le iloa. …

“E tatau foi ona e malamalama i auala e aafia ai faaiuga i tulaga e tutupu mai.”6

E faatatau lava foi nei mataupu faavae i la tatou misiona faaleagaga. O faaaliga faaletagata lava ia e maua e ala mai i le meaalofa o le Agaga Paia, e taialaina ai i tatou i tulaga e le muai iloaina i le ausiaina o mea ua tatou i ai iinei e fai. Ma o le amiotonu o le tagata lava ia e taua i le mauaina o le meaalofa o le Agaga Paia. O le a le taialaina i tatou e le Agaga Paia pe afai tatou te le popole i lo tatou usiusitai.

E totonugalemu i mea uma tatou te mafaufau i ai ma faia, o le Alii o Iesu Keriso lea . O Lona soifuaga o la tatou faataitaiga lea. O Ia o le a mafai ai ona tatou toe ola. E ala mai i le mana o Lana Togiola e mafai ai ona tatou tutu ma le mama i le afioaga o lo tatou Tama. Tatou te aoao e alolofa i lo tatou Tama Faalelagi ma Lona Alo o Iesu Keriso ma o tatou loto atoa, mafaufau, manatu, ma le malosi atoa. Ou te fiafia i le saunoaga “E alofa o ia i le Alii ma lona loto atoa, o le e leai se mea e alofa i ai pe a faatusa ia te ia, e leai se mea e faatatau ia te ia.”7 Na fetalai Iesu, “Afai tou te alolofa mai ia te au, ia outou tausi mai i au poloaiga” (Ioane 14:15).

E toatele tagata lelei i le lalolagi. E toatele foi tagata e le manatu faapito. E i ai foi isi e talitonu ia Keriso e pei foi o i tatou. E le o tuulafoaiina lava i tatou i le tatalo atu i lo tatou Tama Faalelagi po o le mauaina o tali i a tatou tatalo; e alofa lo tatou Tama i Ana fanau uma. Ae e le tatau ona galo ia i tatou e na O Le Ekalesia a Iesu Keriso o le Au Paia o Aso e Gata Ai e i ai le perisitua a le Atua. E na o iinei foi ua i ai le perofeta a le Alii. E na o iinei foi ua i ai le mana paia o faamauga e mafai ai e aiga ona faaauau o ni aiga e faavavau.

E ui ina auina atu lenei faasalalauga i gagana e 33, e toaitiiti lo tatou aofai e faatusa atu i le faitau piliona o tagata i luga o le fogaeleele. Na taua i tatou e Peteru o se “tupulaga ua filifilia, o tupu ma ositaulaga [perisitua tautupu], … o le nuu paia” (1 Peteru 2:9). Aua nei tafiesea pe faaitiitia le tiute ma le matafaioi faapitoa ua tuuina mai ia te oe. E tatau ona avea oe ma se kapeteni i le galuega a le Alii, ua tofia e uuina maualuga le tagavai o le talalelei toefuataiina, aua ua fetalai mai le Alii e faapea, O Le Ekalesia a Iesu Keriso o le Au Paia o Aso e Gata Ai o le a avea ma “avefeau mo [Ia] e teuteu le ala i [Ona] luma” (Mataupu Faavae ma Feagaiga 45:9).

O Lou Tiute Paia

Numera 3: O lou tiute paia o le toe foi saogalemu atu ma aumai ni agaga se tele faatasi ma oe.

O le tele o lou taunuuga faaleagaga o le a tamau i soifuaga o tagata e te fesoasoani i ai faaleagaga. O le a le mea na avea ai Kapeteni Sullenberger ma toa? O le a le mea na faaaloalogia ma talisapaia ai o ia? Pe ona e mafai ona ia mafaufau vave? Po o lona faia o filifiliga sa’o ina ua pepe ia afi? Pe ona sa ia iloa ona faagatusa lelei apaau o le vaalele a o ia faatulaueleeleina i luga o le vaitafe? Ia, o mea uma lava na! Ae o le mea e sili ona taua, e 154 soifua na semanu e faigofie lava ona maumau, ae na ia faasaoina i latou. Ma o le faasaoina o ia soifua, na faasaoina ai foi ma ia lava.

Na fai mai Kapeteni Sullenberger e uiga i le faasaoina o olaga faaletino o lana pasese: “I se tulaga le mautinoa, o le 155 ua na o se fuainumera. Ae o le vaai atu i foliga o na pasese uma—sosoo ai ma foliga o i latou uma e pele ia i latou—na oo mai ai ia te au se lagona, e ese le o’oo’o o le matagofie na i ai, o le i ai lea o se taunuuga lelei o le Faigamalaga 1549.”8

Mata e mafai ona tatou faatatauina lenei mea i la tatou misiona? E tele naua le agalelei o tagata o lenei Ekalesia i le fesoasoani atu i e matitiva ma e le tagolima i le Ekalesia ma le lalolagi atoa. Peitai, o la tatou misiona paia, o le faamanuiaga lea na fetalai le Alii o le a oo mai e ala mai i le fanau a Aperaamo i le lalolagi, e sili atu le taua faaleagaga.

E tatau ona tatou taulai atu i isi tagata e ese mai ia i tatou, fesoasoani atu i isi ia tatou foi atu faatasi i lo tatou Tama Faalelagi.

Ua fetalai mai le Alii, “O lē maua lona ola, e maumau ai ia te ia: a o le faamaumau i lona ola ona o au, e maua e ia” (Mataio 10:39). Sei ou faitau atu le Mataio e 25, ia mafaufau i la tatou matafaioi o ni kapeteni faaleagaga, ma tuu i ai le upu faaleagaga:

“Ona fai atu ai lea o le Tupu i e o i lona itu taumatau, O mai ia, o outou ua faamanuiaina e lou Tama, ia fai mo outou tofi le malo ua saunia mo outou ao lei faavaeina le lalolagi:

“Aua na ou fia ’ai [faaleagaga], ona outou avane ai lea ni mea ou te ai ai: na ou fia inu [faaleagaga], ona outou avane ai lea ni vai ou te inu ai: sa fai au ma tagata ese [faaleagaga], ona outou talia lea o au. …

“Ona tali mai ai lea ia te ia o e amiotonu, e faapea mai, Le Alii e, o anafea na matou iloa ai oe ua fia ai [faaleagaga], ma matou fagaina oe? po o fia inu [faaleagaga], ma matou avane e te inu ai? …

“Ona tali atu ai lea o le Tupu ua faapea atu ia te i latou, E moni ou te fai atu ia te outou, Aua na faia e outou i le tasi o e aupito itiiti o ou uso nei, o au lea na outou faia i ai” (Mataio 25:34–35, 37, 40).

O ai e tatau ona outou o mai faatasi? E muamua lava, mo i latou uma e maua le avanoa, e tatau ona e faaipoipo ma aumai lou toalua ma lou aiga. O lou tiutetauave muamua lava lea. O aiga o le faalapotopotoga lea o le lagi.

Ina ia talisapaia lenei tiutetauave, tatou te vaai atu ai i tua atu o mea tatou te vaaia e i luma tonu o i tatou. O le aafiaga faaleagaga o le tausia o se aiga amiotonu na pau lava le ala e malamalama ai o lo tatou vaai lea i lo tatou augatupulaga, i fanau a a tatou fanau, fanau a fanau a fanau, ma tua atu. Na malamalama Kapeteni Sullenberger i lenei mataupu faavae e oo lava i le faasaoina o ola faaletino o lana pasese. Fai mai o ia: “Ou te le iloa mea lelei e tatau ona ausia e nei tagata e 154 o la’u faigamalaga. E le mafai ona ou malamalama i saofaga e mafai ona faia i le lalolagi e a latou fanau, fanau a a latou fanau, ma fanau a fanau a fanau e lei fananau mai.”9

Sei ou faasoa atu ia te outou aafiaga o le saunia faaleagaga o se aiga i le tele o tupulaga.

Na soifua ia Henry Arline mai le 1841 i le 1919. I le 1898, i le 57 o ona tausaga, sa faalogo ai o ia i faifeautalai o talai atu le talalelei i se faleaoga i le setete o Florida i le Iunaite Setete. Sa fai atu o ia i lona toalua, “O le taimi muamua lenei, ua ou faalogo ai i le mea moni.” Na papatisoina o ia ma lona aiga. O ni nai tausaga mulimuli ane sa latou malaga atu ai i Iuta i le nofoaafi, o se malaga e silia ma le 2,000 maila, ina ia mafai ona latou maua sauniga o le faamauga i le malumalu. Sa toe foi atu o ia i Florida ma tumau faamaoni ai i aso uma na totoe o lona soifua.

O lona afafine o Soforonia Arline Williams ae o lona atalii o James Bernard Williams. Sa feiloai Bernard Williams i se tamaitai talavou lalelei, o Martha Aman. Sa sailiili faamaoni o ia i le Ekalesia, atiina ae se molimau mausali, ma papatisoina ai.

E valu tausaga talu ona uma le la faaipoipoga, ae faamauina i laua i le Malumalu i le Aai o Sate Leki faatasi ma le la fanau e toatolu. O lo la afafine laitiiti o Kathy Williams, lea na ou feiloai i ai i tausaga mulimuli ane i le BYU ma ou augani atu i ai e avea ma ou toalua. Ua toafa nei la maua fanau ma fanau a fanau e toa 13.

O le a faavavau ona ou faafetai mo le tina amiotonu o Kathy ma lona tamamatua amiotonu o ē na auai i le Ekalesia ma tumau faamaoni ai i aso uma na totoe o o laua olaga. O nei tagata e toalua, e lei iloa e le tasi le isi i le olaga faitino. Sa eseese ni vaitaimi na soifua ai. Ae o i laua o ni kapeteni i le galuega o le Alii, na fesoasoani e aumai lo matou aiga faatasi ma i la’ua ona o a laua filifiliga faaleagaga.

E moni e le faapea o le a maua e tagata uma le avanoa e faaipoipo ai i lenei olaga, ae ua folafolaina mai se soa e faavavau i le olaga e faavavau mo i latou e amiotonu ma mananao i na faamanuiaga. O i latou o e e le faaipoipo e tele foi mea e mafai ona latou faia e faatautaia ai le faamoemoega o le Alii ma aumaia agaga faatasi ma i latou. O le konafesi na tuanai atu nei, na faasoa mai ai e Sister Barbara Thompson, o le au peresitene aoao o le Aualofa ma e nofofua foi, ia upu nei:

“Ina ua uma la’u aoga maualuga, o a’u sini na i ai ia ou aoga i le kolisi … , faaipoipo i se alii aulelei, ma maua se fanau aulelei ma atoatoa se toafa. …

“Ia, e pei ona outou silafia, o le tele o a’u sini sa lei faataunuuina i le ala na ou faamoemoe i ai. Na maea au aoga i le kolisi, faia se misiona, maua se galuega, faaauau a’u aoga … , ma faaauau ona ou galue i la’u matata mo le tele o tausaga. … Peitai na leai se alii aulelei, leai se faaipoipoga, leai se fanau. …

“Na fai mai ia te au se tasi o au uo i le galuega ma e le o se tagata o la tatou Ekalesia, ‘Aisea e te saga alu ai i se lotu e matuai faamamafaina faaipoipoga ma aiga?’ O la’u tali faigofie ia te ia o le, ‘Auā e moni!’ …  O le i ai o le Ekalesia ma le talalelei a Iesu Keriso i lo’u olaga, na ou maua ai le fiafia ma na ou iloaina sa ou i ai i le ala ua finagalo le Faaola ou te mulimuli ai.”

Ona ia saunoa lea e uiga i se auala e tasi e mafai ona ia uunaia faaleagaga ai isi a o avea ma se tagata nofofua: “Na ou maua le avanoa e auauna atu ai mo ni tausaga se tele i Tamaitai Talavou ma sa ou lagona o lena mea na aumaia ai ia te au se avanoa e aoao atu ai ma molimau atu ai i tamaitai e laiti ifo o e na atiina ae ni a latou lava molimau.”10

I le lua sefululima tausaga ua mavae na avea ai Sister Thompson ma faufautua o le Lora ia Shellie Nielson. O Shellie Nielson—o le ua suafa nei ia Shellie Nielson Seager— na tusi atu ia Sister Thompson i le silia ma le 20 tausaga talu ona aluese mai lana vasega o le lora, ma faailoa atu lona agaga faafetai. Na tusia e Sister Seager:

“Na ou ala a’e i le 5:15 i le taeao ma amata ona ou mafaufau atu ia te oe ma oka se aafiaga na e faia i lo’u olaga. …

“… Sa avea i matou ma tagata na ave i ai lau faamuamua. Sa e faaalia ma faaaluina ia i matou i taimi uma le tele o lou taimi, agalelei ma le alofa. Na malie taimi uma na tatou faatasi ai! … Ae o le mea aupito taua, na matou iloa sa i ai sau molimau malosi o le Talalelei a Iesu Keriso.”11

Ua i ai nei se aiga ma se fanau e toalima a Sister Seager. O uunaiga a Sister Thompson mo le lelei o le a faavavau ona pai atu ia Sister Seager ma augatupulaga o le a mulimuli mai.

Na fetalai le Alii:

“Ia manatua e taua tele le aoga o agaga i le silafaga a le Atua. …

“Afai foi e faapea ona oulua galulue i o oulua aso uma i le alagaina o le salamo i lenei nuu, [ma o le alagaina o le salamo o lona uiga o le fesoasoani atu i tagata ia toe foi atu i le Atua] ma aumaia, tau lava o se agaga e toatasi ia te au, faauta i le tele o lo outou olioli faatasi ma ia i le malo o lo’u Tama!

“Ma o lenei, afai o le a tele lo outou olioli faatasi ma se agaga se toatasi ua oulua aumaia … , faauta i le sili atu o lo outou olioli pe afai lua te aumaia ni agaga e toatele ia te au!” (Mataupu Faavae ma Feagaiga 18:10, 15–16).12

A o tatou taulai atu i isi—muamua i o tatou taitoalua, sosoo ai ma o tatou aiga, ma sosoo ai ma isi —o le a faapea ona tumau ma mausali le siitiaina o i latou i le faaleagaga ma le fesoasoani atu ia i latou, ua tatou faasaoina ni augatupulaga ma faataunuuina ai lo tatou taunuuga e faavavau.

O Luciano Cascardi o le peresitene o le Siteki a São Paulo Pasila Ipiranga. Sa ono tausaga o Brother Cascardi i le taimi na papatisoina ai lona aiga i São Paulo, Pasila. Na oo mai Peresitene Cascardi i le Iunaite Setete ia Oketopa na sei mavae atu nei e saili le faifeautalai na aoaoina lona aiga i le 40 tausaga ua mavae. E tasi le mea mautinoa na ia iloaina: o le igoa muamua o le faifeautalai o Elder.

Na ala mai i se vaega o vavega, na maua ai o ia e Brother Cascardi— o Brother Larry Wilson, o se taitai malosi o le Ekalesia i Kalefonia i matu. I se tusi ia Brother Wilson, na faatusaina ai e Peresitene Cascardi le mauaina o lana faifeautalai i le mauaina o se tamā ua tele tausaga o leiloa. Ma, o le faatatau atu i le fatu faaleagaga na tuputupu ae i le 40 tausaga ua mavae, ma ua sosolo ma pai atu i le tele o olaga talu mai lena taimi, na saunoa ai Peresitene Cascardi, “E mafai ona e faitauina ni fatu i totonu o se apu, ae e le mafai ona e faitauina ni apu i totonu o se fatu.”13

E le faapea e tatau lava ona tatou o i se misiona e faamalosi ai ma siitia ai isi. O loo aoao mai e le aunoa Peresitene Monson ina ia tatou aapa atu ma laveai mai i latou o siomia ai i tatou. Tou te manatua le tala i lona aapa atu i se tagata sa le toe alu atu i le lotu, a o avea o ia ma se epikopo talavou?

Na saunoa Peresitene Monson:

“Ina ua valaauina au e avea ma se epikopo, na ou iloaina o au o le peresitene o le korama a le au ositaulaga, ma sa ou manao ai ia auai uma mai alii. Sa i ai se alii se toatasi e lei sau lava, ma sa ou faapea ifo ia te au lava: ‘O loo matou saofafai iinei ma le au ositaulaga. O loo i ai so latou faufautua. O le a ou tuua i latou e fai e le faufautua le lesona. O le a ou alu e sue mai Richard Casto.’ Ma sa ou alu atu i lona fale. Sa i ai lona tina ma lona tama i le fale, ae sa la fai mai o loo faigaluega o ia i le Faletaavale i West Temple.

“Sa ou alu i le Fifth South ma West Temple, ma sa matala le faitotoa, ae na leai se isi [na] i ai O lea na amata ai ona ou autilo solo, tou te iloa, na leai ma se isi. O lea na ou alu ai i le pito i tua, ma sa i ai iina se lua tuai suau’ua.

“Ma sa ou tilotilo ifo i lalo i le pogisa, ma na mafai ona ou iloa atu ai ni mata se lua o tilotilo mai ia te au. Sa ia fai mai, ‘Ua e maua au, Epikopo. O le a ou alu atu i luga.’ Ma sa sau o ia i fafo mai le lua suau’ua.

“Sa manaia si a ma talatalanoaga puupuu. Ma sa ou faapea atu, ‘Richard, matou te manaomia oe. E te lelei tele i le va ma tagata. Ma ou te manao ia auai mai uma le au ositaulaga. E mafai ona e sau?’ Sa ia faapea mai, ‘O le a ou alu atu.’ Ma sa sau o ia.”

I nai tausaga ua mavae atu, na faasoa mai ai e Richard Casto le mea na tupu ina ua mavae atu lena tulaga:

“ Ina ua mavae lena, sa ou faia se misiona. Sa faamauina au i lou toalua i le malumalu. E toalima la maua fanau lelei— e toalua ua uma misiona. Sa faalua ona avea au ma se epikopo. E ese le alolofa o la’u fanau ia te ia [Peresitene Monson], ma e alofa tele foi lo’u toalua ia te ia ona o le mea na ia faia mo au. Atonu o se tasi lea o faamanuiaga silisili na ou maua i lo’u olaga.”14

I le konafesi aoao ia Oketopa 2009, na saunoa mai ai Peresitene Monson: “Ou te talitonu ua ta’u mai e le Faaola ia i tatou a tatou le faamaumau o tatou ola ona o isi, o le a itiiti se faamoemoega o o tatou lava olaga. O i latou o e ola mo na o i latou lava e iu ina maanuminumi ma maumau ai lo latou ola, a o i latou o e faaalu o latou lava ola e auauna atu ai i isi, e ola ma lauusiusi—ma faasaoina ai o latou ola.”15

E tatau ona avea oe ma se kapeteni i le galuega a le Alii, faatasi ai ma se misiona faapitoa ina ia toe foi atu ma le saogalemu ma aumai ni tagata se toatele faatasi ma oe.

Ia Tumau ai ma ua i ai se Faamoemoe Atoatoa Lelei

Ou te faaiu atu i se aafiaga patino. E faatatau foi i se tala i se vaalele.

O le aso 9 o Novema na sei mavae atu nei, sa ma malaga toe foi mai ai ma lou toalua o Kathy, mai le Aai o Kuatemala ma na i ai se isi ma vaalele na toe pue i Miami, Florida. Sa ma o i se tofiga taua lava ma sa matuai taua lo ma mauaina o le vaalele i Miami. Sa ma feala po i lena taeao ma tuua lo ma faletalimalo o Antigua, Kuatemala mo se malaga i le 8:55 i le taeao mo Miami. A o ma malaga atu i le Aai o Kuatemala, sa o se mea e le masani ai le tumu o taavale. Sa ma popole ina ia ma taunuu atu i le malaevaalele i le taimi tonu. Sa ma taunuu ma lava sina taimi e pue ai le ma vaa.

Sa ma faananati atu i le ofisa o femalagaaiga ma agai atu i le faitotoa e pue ai le vaalele. I le faitotoa, na ma iloa ai e itula ma le afa o le a tuai ai ona malaga ese le vaa. Sa tuai ona taunuu mai le vaalele i le po ua te’a ona o le leaga o le tau. Sa manaomia ona lava le malologa a pailate ma le auvaa. Faatasi ai ma lenei faatuai, sa ma popole ai i le pueina o le isi a ma vaalele i Miami. Sa ma o atu loa i le vaalele ina ua mavae le itula ma le afa, ae ina ua solomuli ese mai le vaalele mai le faitotoa, sa matou iloa ai sa i ai se faaletonu faaeletonika i le potu o le avevaalele. O lenei tulaga na atili tuai ai mo le isi 40 minute. Sa ma mafaufau loloto pe i ai se avanoa e maua ai le isi a ma vaa.

Sa lelei le taimi na alu ai le vaalele mai le Aai o Kuatemala agai atu i Miami. Sa ma taunuu atu ae toe 30 minute aluese le isi a ma vaa. Sa foliga mai na le lava le umi o le tolusefulu minute, ae sa ma naunau lava e taumafai ia maua. Sa ma taufetuli i le vave na ma mafaia. O le mea na ma tetei ai, e lei umi le laina a le ofisa o Femalagaaiga. Sa ma o atu i le Tiute a le I.S. ma tatalo lemu ina ia aua nei siakia a ma ato na tatoso atu. Sa tali mai a ma talosaga. O lou tepa ae i faailo o le malaevaalele, na ou matauina ai o le ma vaa sa i le Faitotoa D-3. Ina ua maea ona ma taufetuli atu i le itufalega D na ma oo atu ai i le faagasologa faigata o le siakiina mo le saogalemu: Na talaiese o ma seevae. O mea suavaia i tagapepa palasitika. Aveese le komepiuta feaveai. Talosia ia le ee le faailo mo le saogalemu pe a ui atu i faitotoa suesue.

Ina ua maea le siaki mo le saogalemu, sa na o le 10 minute na totoe lea na fuafua e aluese ai le vaalele. Sa ou toe tilotilo ae i le faailo. I lou atuatuvale, na ou faia ai se mea sese—sa le o le faitotoa D-3 na aluese mai ai le vaalele ae o le E-3. Sa ma i ai i le itu sese. Sa ma tau momole. Atonu ua tapuni faitotoa o le vaalele i le taimi lenei, ae na sili atu ma le selau iata lo ma mamao mai le faitotoa. Sa ma mafaufau e tuu ia. Ae o le mauaina o le faamalosiauga mai le tasi i le isi, sa ma taufetuli atu ai i le taunuuga. Sa ma faataalise atu ma a ma ato na tatoso mai tua. A o ma pio atu i le Faitotoa E-3, sa ma faalogoina se valaau mo o ma igoa. Sa o se vavega lava. Sa matala mai lava le faitotoa. Sa ma maua!

O le a i ai i lou taunuuga faaleagaga ni faafitauli, mea e ono faatuai ai, ma faaletonu i masini. O le a i ai sasi. E te mafaufau foi pe mata o le a e taunuu atu i ai. Ia aua nei e lotovaivai! O le a i ai foi ni ou taimi o le faamoemoe ma le faatuatua a o matala mai faitotoa ma foia luitau. Ia faaauau pea, finafinau, ae o le mea sili, ia talitonu ia Keriso ma aoao e mulimuli ia te Ia ma Ana perofeta; ia tumau e pei ona fai mai Nifae “ua i ai le faamoemoe atoatoa lelei” (2 Nifae 31:20). Pe a outou faia, ou te folafola atu ia te outou, o le a i ai se aso e te faalogo ai i lou igoa. O le a e taunuu lelei lava.

O loo soifua lo tatou Tama Faalelagi. O i tatou o Ona atalii ma afafine. O Iesu Keriso o lo tatou Faaola ma le Togiola. Na Ia toefuataiina mai Lana talalelei e ala mai i le Perofeta o Iosefa Samita. O Peresitene Monson o Lana perofeta i aso nei. Ou te tatalo ina ia fai mo outou faamanuiaga uma o le lagi o loo faatalitali mai mo outou ao outou sauniuni mo o outou taunuuga faaleagaga. I le suafa o Iesu Keriso, amene.

© 2010 Puletaofia e le Intellectual Reserve, Inc. Ua taofia aia tatau uma. Faamaonia le faaPeretania: 5/09. PD50018081

^ Back to top