• Print
• Listen
  • MP3
• E-mail

Epikopo H. David Burton,  “O Le Auala o le Olaga” 

Faeasaite a le OAE mo Talavou Matutua• 2 Me, 2010 • Iunivesite o Polika Iaga–Hawaii

Aloha, uso e ma tuafafine! Ua ma fiafia lava ma Sister Burton e faaalu ni nai minute tatou te mafuta ai i lenei aso Sapati matagofie iinei i le lotoa o le Iunivesite o Polika Iaga–Hawaii, faatasi ai ma le autalavou matutua mai le tele o atunuu. E ese le manaia o le vaaia o le tele o aganuu ua i ai i lenei lotoa ma i lenei lava foi aofia. Ma te moomoo maimau pe ana mafai ona ma vaavaai tino atu i isi aofia i faleautu o siteki ma inisitituti i le salafa o le lalolagi, o e ua faapotopoto ai iina e auai i lenei faasalalauga o le faeasaite a le OAE.

Ou te fiafia lava i le faaleoga ma le uiga o le upu aloha! Atonu ua outou silafia e tele ni mea e faauiga i ai le upu aloha i le gagana Hawaii e pei o le [alofa] loloto, alofa, filemu, agaalofa, tiga alofa, alofa tunoa, agalelei, po o le alofa fua. Ua silia i le 150 tausaga ua mavae, ua faaaogaina ai foi i se faauigaga tutusa ma upu faaPeretania o le hello [talofa] ma le good-bye [tofa]. O nei tuufaatasiga ua avea ai o se upu faafeiloai matagofie ma se upu faamavae.

Ua Tatou Ola i se Vaitaimi o le Feteenai o Tulaga Faatauaina

O le manatu faavae o le aloha e taua tele i Hawaii lea ua aofia ai le “Aloha Spirit” [“Agaga o le Aloha”] i tulafono a le setete o Hawaii. O le Aloha o lona uiga o le faaalia o lagona mafanafana ma le alofa loloto e aunoa ma le faapea o se tiute e toe faafoi ai. O lona uiga e faailoa ai le taua o tagata taitoatasi o se aofia atoa. O lona uiga foi o le “faalogo lea i manatu e le o faaleoina, o le vaai i mea e le o mafai ona vaaia, ma iloa mea e le o iloa.” 1 O le Agaga o le Aloha ua siomia ai mataupu faavae matagofie o le talalelei—mataupu faavae o le faatuatua, mataupu faavae ua siomia ai le “aua tou te faamasino atu ina nei faamasinoina outou” (Mataio 7:1). Ua faamamafaina ai le taua o le tagata ma le agaalofa. Pe le matagofie ea le lalolagi pe afai e fusia faatasi uma i tatou i le agaga o le aloha?

Na saunoa talu ai nei General David H. Petraeus i le Brigham Young University–Provo. Sa faaalia lona agamalie ina ua ia amataina lana savali i le lisiina o mafuaaga e 10 e avea ai tagata e faauu mai i le BYU o ni fitafita lelei. O ni nai mafuaaga na aofia ai o le: “E le o se faafitauli pe latou te le iloa le tulaga o se tagata, aua latou te ta’uina uma lava i latou o Tuagane po o Tuafafine Pai ma Lafai.” “Latou te le galulue e aunoa ma ni livi [AWOL]. E pau lava le latou ta’u e ta’u ai o le le toaga.” “O le a vave ona latou opogi soo se faamoemoega pe afai e te fai atu i ai o le a faia se taumafataga mamā.” “E i ai o latou manatu fatufatuai mo le taulimaina o tagata faalogotata—e pei o le tofi i ai o faiaoga o aiga.” Ma le mea mulimuli, ma atonu foi o le mea aupito taua lea: “O i latou o avetaavale filifilia e sili ona faatuatuaina o le lalolagi.”2 E i ai se vaifofo i le ataata i mea sese a se tasi.

O se faamanuiaga tulaga ese le avea ai o ni atalii ma ni afafine o se Tama Faalelagi soifua, ma ua tuuina mai se auala e fesootai ai ma Ia ma talosagaina Lona Agaga i a tatou sauniga ma olaga patino. Ou te mautinoa ua tatou iloa uma lava e i ai se eseesega tele i le va o le faia o se tatalo ma le tatalo. Sa fautua mai St. Augustine, “Ia tatalo ia pei lava e faalagolago mea uma i le Atua. Galue ia pei lava e faalagolago mea uma ia te oe.”3 O se faaupuga anamua e ese lo’u fiafia i ai “O le tootuli soo o le a lelei ai lou tulaga.” Ou te matuai le talitonu i nai aso ua tuanai, sa faia ai e se faamasino o le malo o le Iunaite Setete se faaiuga e faapea, o le tuuina atu o le faitalia i le tagata lava ia e faamamaluina ai le Aso Tatalo a le Malo o se mea moni e le faavaea.

I le tele o vaega o le lalolagi, e aofia ai le Iunaite Setete, o le tatalo i faatasiga faitele ma le faaalia o soo se ituaiga o faailoga faalelotu i se nofoaga faitele, ua faapea o se mea e le faavaea pe ua le tusa ai ma le tulafono. I le mafaufau atu i lenei mea, ua ou iloa ai e ese le malie o se mea moni laitiiti e tau le iloa: I Uosigitone, D.C., e le mafai ona i ai soo se ituaiga fale lava e maualuga atu nai lo le Maafaamanatu o Uosigitone. O le tumutumu alamini o le maafaamanatu e 555 futu, 5.125 inisi mai le eleele. O loo vaneina i le tumutumu o lena maafaamanatu, e alamini lona tino, i se vaega e toaitiiti ni tagata e mafai ona iloaina, ia upu Latina Laus Deo. Laus Deo! O ni upu se lua e foliga mai e faaletaua, ua tuu i le pito i luga e tilotilo mai agai i lalo o le laumua o se atunuu taua. O le a le uiga o nei upu Latina e lua, e na o le fa ona silapale ma e na o le fitu ona mataitusi? O lona uiga, “ia i le Atua le viiga.”  E i ai nisi faailoga e faatatau i le atua ma i lo tatou Tama oi le Lagi ua teuteuina ai lenei fausaga matagofie.

Ia i le Atua le Viiga. Laus Deo! A o tatou tuuina atu a tatou viiga faaletagata lava ia ma viiga fai faatasi i se Tama alofa oi le Lagi, tau ina ia tatou manatua le uiga moni o le agaga o le aloha a o tatou ole atu mo le atamai ma le poto ma a o tatou faaali atu ia te Ia lo tatou agaga faafetai mo Lona agalelei ma Lona alofa tunoa o loo Ia faaali mai o se Tama oi le Lagi atamai ma alofa. E masani ona faamanatu mai e Peresitene Thomas S. Monson ia i tatou e faapea “a tatou manatua o i tatou taitoatasi o se atalii po o se afafine agaga o le Atua, o le a le faigata ia i tatou ona o atu ia te Ia i le tatalo. Na te silafia i tatou; E alofa o Ia ia i tatou; E finagalo o Ia mo le mea sili ona lelei mo i tatou.”4

Fai mai Aperaamo Linikone, o le peresitene lona sefuluono o le Iunaite Setete: “A ou sauni ou te talanoa atu i tagata, ou te faaaluina le lua-vaetolu o le taimi e mafaufau ai i mea latou te fia faalogo i ai ae o le tasi-vaetolu o le taimi ou te mafaufau ai i mea ou te manao e ta’u atu ia i latou.”5 O le faaaogaina o le auala na sauniuni ai Linikone, na ou tatalo ai ma mafaufau loloto i mea tou te mananao ma outou fia faalogo i ai ma mea e tatau ona ou taumafai e ta’u atu ia te outou. Sa ou taumafai ou te see i o outou seevae ma mafaufau pe faapeī le savali i le auala o loo outou savavali ai i le 2010. Atonu e mafai ona outou fesili sao mai, “O le a le mea e iloa e lenei toeaina e 50 tausaga e matua ai ia i matou, e uiga i faafitauli o loo feagai ma le autalavou i aso nei?” O se fesili manaia ma talafeagai tonu lena! O le mea moni, o le tali atonu “E le tele tele pe a faatatau atu i gaoioiga o lea aso ma lea aso, ma faaosoosoga ma mea uma tou te oo i ai.” Ae peitai, o loo i ai vaega taua o o tatou olaga e tumau, o taimi uma lava e tumau ai, ma e le mafai ona suia. O ou tausaga o le poto masani e ono maua ai ni vaega lelei i ni nai iloiloga na maua mai i faafitauli ma faigata. Ina ua ou talanoa atu i fanau a la’u fanau ua aooga i kolisi pe o a ni o latou manatu i ni mea e tatau ona ou talanoa atu ai, o a latou tali o le: “Tamamatua, ia faafaigofie.” “Tamamatua, faamatala e pei lava ona i ai.” Ma atonu o le mea aupito taua, “Tamamatua, faamolemole e faapuupuu.” O le a ou taumafai i le lelei e gata ai ia ausia o latou faamoemoega ua sili ona maualuluga.

Pe mafai ona ou faasoa atu nisi o manatu ia atonu ua iloa lelei e le toatele o i tatou?  Ua tatou ola i se vaitaimi ua matuai tetele ai faigata i le va o malo ma atunuu o le lalolagi; ua feteenai atunuu. E le o manino mai le auala i le lumanai o tagata. Ua tele ina tutumu loto o tagata talavou i le fefefe. O le toatele ua leai ni faatuatua i le Alii o Iesu Keriso, ae mo le toatele o isi, o le faamoemoe ua na o se miti puupuu lava. O le taumafaiga e le iu a Satani mo loto ma agaga o tagata o loo faaauau pea ona le faaitiitia. O le augatupulaga ua taua o le augatupulaga “X” e foliga mai e le o mautinoa ma atonu e le o mautonu ona o faailo fenumiai o loo tuuina atu e le lalolagi.

Ua Tatou Iloa le Auala e Ao Ona Tatou Uia

Ina ua uma ona ou mafaufau i le mea o le a ou talanoa atu ai ma fesili atu i le Agaga, na musumusu mai le Agaga, na leotele mai, e manaomia ona faamautu atu i tagata talavou o le Au Paia o Aso e Gata Ai, o i latou moni o ni atalii ma ni afafine o se Tama alofa oi le Lagi, agalelei, ma agaalofa. E tatau ona faamautinoa atu ia i latou, e taua le faatuatua i le Alii o Iesu Keriso. E manaomia ona latou iloa e matuai leai se mafuaaga e ono matatau pe faanoanoa ai pe afai tatou te mulimuli i le fetalaiga a le Alii. E manaomia ona latou iloa, o le faamoemoe e moni ma e mafai ona avea ma mea moni, o loo tele avanoa, ma o le usiusitai o se mea e manaomia mo le fiafia—o loo i ai se faamoemoega maoae ma faavavau o lenei olaga, ma o le a faiaina Satani ma ana au. E moni le talalelei a Iesu Keriso. O loo tele perofeta i le fogaeleele.

O a’u o se tagata e lagolagoina le manatu e faapea, e moni ua lata ina taumasuasua le ipu ae le o le toeitiiti leai se mea. A’u uo talavou e, o se vaitaimi matagofie lenei e ola ai. Ua i ai sa tatou misiona maoae e fai ma se taunuuga paia. O nei mea uma ma le tele o isi mea ua tatou iloa ona ua faamanuiaina i tatou e malamalama i le fuafuaga a lo tatou Tama oi le Lagi, le fuafuaga ua Ia mamanuina faapitoa mo lo tatou fiafia a o tatou auai atoatoa i le talalelei a Iesu Keriso.

O Charles Dodgson, o se tusitala Peretania o le seneturi lona 19, o se tagata iloga i le matematika, ma o se faitofa, o se tusitala na faaaogaina le igoa fatu o Lewis Carroll, na ia tusia le Alice’s Adventures in Wonderland ma lona vaega na sosoo ai o le, Through the Looking Glass. Na lauiloa foi o ia mo le tele o ana faaupuga maaleale, o se tasi o ia faaupuga o le “Afai e te le iloa le mea o loo e alu i ai, soo se auala lava o le a e taunuu ai.”6 E talitutusa lava ma le manatu ua faaalia i le solo faatupu manatu a Robert Frost, “O Le Auala e Le’i Uia”:

E magalua le auala i se togavao samasama,
E le mafai ona ou ui uma ai i na auala
Na umi ona ou tutu toatasi ai
Ma autilo i le mamao e gata ai lo’u mafai
I le pioga agai i le pupuvao sa iloa atu ai;

Ona ou oso lea, i le isi ala e pei foi o le muamua,
Atonu ua sili atu le lona lua,
E vaoa ma e le’i tele ona uia;
E ui i lea, o le ui atu iina
Ua talitutusa lava le tele o le faaaogaina,

I lena taeao na tutusa lo la taatitia mai
Sa ufitia i laulaau e lei i ai se tasi ua savali ai.
Sa ou tuua le muamua mo se isi aso!
Ae sa ou iloa lava e tau atu le tasi ala i le isi auala,
Ae ailoga a ou toe foi mai lava.

O le a ou maofa pe a ou faamatalaina
I tausaga ma tausaga e tele lenei vaaiga:
E magalua se auala i le togavao, ma sa—
Ou oso i le auala e uia ae seāseā,
Le ala lea na i ai le eseesega iina.7

Ona ua faamanuiaina i tatou i se malamalama i le fuafuaga a le Atua mo le fiafia e faavavau o Lana fanau, o i tatou o le Au Paia o Aso e Gata Ai ua tatou iloa lo tatou taunuuga faaiu, po o le fea le ala e uia e taunuu saogalemu ai. Ua tatou iloa le mea tatou te o i ai aua ua tatou iloa le mea na tatou o mai ai ma le mea o loo tatou o i ai.

O Le Fuafuaga a le Atua o se Fuafuaga o le Fiafia

Atonu o le a aoga se faamanatu laitiiti o le fuafuaga a le Tama Faalelagi. O i tatou uma o fanau a le Atua, ma sa tatou ola ae tatou te lei o mai i lenei lalolagi. O le fuafuaga ua mamanuina e faataunuu le faaofuina [o le tagata] i le tino ola pea ma le ola e faavavau. Sa na o le tasi lava le fuafuaga e faavavau, ma ina ua faailoa mai e le Tama lena fuafuaga sa tatou alalaga uma i le fiafia. O le fuafuaga lea na tuuina mai e le Atua lava Ia. Sa leai ni mau fuafuaga lea e taitaiina i tatou i nisi taimi e talitonu i ai. O elemene o le fuafuaga e aofia ai kenera. E moni, o kenera o se vaega taua o le fuafuaga. O le fuafuaga sa faauuina a o lei foafoaina lenei lalolagi ma tuuina mai ai se ala mo tagata uma, ia mafai ai ona faaeaina. O aiga ua faauuina e le Atua ma e taua tele i le fuafuaga. E fetalai mai lo tatou Tama oi le Lagi i Ana fanau e ala i perofeta soifua. O malumalu, faatasi ai ma ona sauniga faaola, tatou te fesootai atu ai i le faavavau. O le fuafuaga na manaomia ai se tagata e toatasi e faaali mai ia i tatou le ala ma avea ma o tatou fautua i le Tama. Na tali atu le Faaola, o Iesu Keriso, ma le atoatoa ma ofoina mai o Ia lava ina ia mafai ona tatou maua le saolotoga e galulue ai mo i tatou lava. Na tetee Lusifelo (po o Satani) ma saili e faamalosi [le tagata] nai lo le tuu i le faitalia o le fanau a le Atua. I lo tatou alalaga i le olioli, sa tatou fiafia ina ina ua filifilia Iesu Keriso ma sa tuuina mai ia i tatou le avanoa e o mai ai i le lalolagi, maua se tino, maua le poto masani, ma ia faamaonia ai i tatou lava.

A o tatou savalia le auala o le olaga, ua faamoemoe ia tatou mulimuli i tulafono ma faailo o le auala. Ua faamalamalama mai e Alema le perofeta o le Tusi a Mamona: “O le mea lea na aumai ai e le Atua ia poloaiga ia te i latou, ina ua uma ona ia faaali ia te i latou le ala o le toigola, ina ia latou le fai le leaga ua fai mona sala le oti faalua, o le oti lea e faavavau i mea e uiga i le amiotonu; aua e leai se pule o le ala o le togiola i e faapea, aua e le mafai ona faaumatia galuega a le faamasinoga, e tusa ma le agalelei silisiliese o le Atua” (Alema 12:32).

Afai tatou te usiusitai ma faamaoni i le pipii ai i le ai uamea ma savavali ai i le ala faatonuina, e mafai ona tatou faamoemoe i le avanoa mamalu ma matagofie o le toe foi atu ma mafuta e faavavau ma lo tatou Tama oi le Lagi, olioli i faamanuiaga uma ua Ia faaalia mai mo i latou o e faauu mai i le lelei silisili i lenei olaga i le tino. O le uumau i tulaga faatonuina o le Ekalesia, o le a e maua ai le fiafia sili atu i lou olaga ma avea ma se faataitaiga lelei ia i latou e siomia outou. Ou te sii mai le folafolaga i le aiga: “E maua le fiafia i le olaga faaleaiga pe a faavae i aoaoga a le Alii o Iesu Keriso. O faaipoipoga ma aiga manuia, e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi.”8 O le mea e malie ai, o nei upumoni faigofie, na faavaeina i le fuafuaga o le fiafia a lo tatou Tama Faalelagi, e tele ina le malamalama i ai le toatele [o tagata] e le auai i la tatou ekalesia.

Tatou te manaomia le taimi e mafaufau ai, taimi e suesue ai, taimi e tomanatu ai, taimi e mafaufau loloto ai i lena fuafuaga ofoofogia. E tatau ona tatou mafaufau i le fiafia o loo teuina mo i tatou e lo tatou Tama oi le Lagi, e pei ona faataatia mai i Lana fuafuaga mo Lana fanau. Manatua o le fuafuaga a le Alii o se fuafuaga o le fiafia. Ou te fiafia i le faaupuina e Peresitene Gordon B. Hinckley: “O le a mama le ala, o le a tuuitiitia popolega, o le a le faigata tele ia finauga pe afai tatou te faatupuina se agaga o le fiafia.”9

“O le 2007 na suesueina ai e ni faalapotopotoga tetele se lua o ala o faasalalauga a le I.S. ia tagata talavou o le vaitausaga 12 i le 24 e sue ai po o a mea latou te maua ai le fiafia.

“O nisi nei o mea na maua mai i le suesuega:

• “• O le autalavou, ‘e faalagolago i matua o se punavai taua lea o le saogalemu ma le fiafia.’

• “• ‘O le a faateleina ona sue e le autalavou le fiafia e ala i le faaleagaga ma le faatuatua.’

• “• ‘O le a faateleina le toe aliae mai o le fiafia o le autalavou i tulaga na masani ai aiga.’

“Fai mai se tasi o aotelega o faamatalaga o le suesuega, ‘E ui ina maua a matou sailiga amata o le autalavou i aso nei e matele o ni talavou masani nai lo tupulaga na muamua atu, ae na faateia i matou i le iloa o le tele lava o talavou ua tulimatai atu i a latou lava faaipoipoga ma aiga ma le fiafia tele.’”10

E Mafai Ona Tatou Uia ma le Manuia le Auala o le Olaga

Ou te fiafia tele e femalagaai, ae maise lava pe a lava le taimi e faimalaga ai i se taavale e sopoia ai le atunuu. Atonu o se faataitaiga i femalagaaiga o le a tatou malamalama lelei ai i le auala o le olaga o loo tatou malaga uma ai.

Mo se faataitaiga, afai ua e manao e te malaga mai Vermont i le itu i sasae po o le talafatai o le Vasa Atalani o le Iunaite Setete, e agai atu i San Francisco i le itu i sisifo po o le talafatai o le Vasa Pasefika ae e te ui atu i alatetele e fesootai ai setete, fai mai le MapQuest, o le auala e sili ona talafeagai o le 3,073 maila ma e toeitiiti 48 itula e alu ai i se taavale. O le faigamalaga e faitau selau avanoa e sui ai lou auala, o ia taimi taitasi e faaopoopo ai nai nisi maila i le faigamalaga. Ina ia fesoasoani ia e taunuu saogalemu atu i le taunuuga fuafuaina, o loo i ai faailo auala, lapataiga, saosaoa faatulagaina, faailoga, ma atonu foi o se polokalama e faatulaga ai le faafanua i le taavale. O maila taitasi e malaga ai e faaalia mai i le fuamaila o le taavale, ma o lona alualu i luma e fuaina i lea maila ma lea maila ma le itula ma lea itula. E i ai taimi, a o tatou malaga, e tatau ai ona malolo, utu le kesi, ma fafaga le tino ma le mafaufau.

O le malaga o le olaga mai le fanau mai e oo i le oti, ua i ai foi ni a tatou filifiliga se tele e fai. O lo tatou alualu i luma, o se vaega e fuaina i le matua ma mea e ausia. Ua tatou maua tusitusiga paia e tuuina mai ia i tatou le taitaiga, lapataiga, ma faamalosiauga, ma se faafanua e mamanu i ai o tatou olaga. E masani ona ta’ua e Peresitene James E. Faust le Tusi a Mamona o le “tusi mo lo [tatou] tisipenisione.”11 Ou te manatu sa ia fautuaina mai o le Tusi a Mamona ua faavae ai le tusi o aoaoga mo le tuufaatasia o se faigamalaga faamanuiaina o le olaga. E pei lava ona tatau ona tatou talitonuina le aoga o faamatalaga ua tatou maua mai i faailo o auala e fesootai ai setete, e tatau foi ona i ai sa tatou molimau patino i tusitusiga paia.

Na faamanatu mai e Nifae le pogai e taua ai tusitusiga paia mo le faigamalaga o le olaga ina ua ia tusitusi mo le au faitau o o tatou aso:

“Ua ou iloa foi e faapaiaina e le Alii le Atua a’u tatalo ia aoga ai i lo’u nuu. O upu ua ou tusia i le vaivai, e faamalosia ia te i latou aua e faaoleole ai i latou ia amiolelei; e faailoa atu foi ia te i latou o latou tamā; ua i ai upu e uiga ia Iesu, ma ua faaoleole ia te i latou ia talitonu ia te ia, ma ia tumau lava e oo i le iuga, o le ola faavavau lea.

“Ua tautala mai foi ma le saua i le agasala e tusa ma le malamalama o le upu moni, o le mea lea e le ita ai se tagata i upu ua ou tusia, sei iloga o lo le agaga o le tiapolo o ia” (2 Nifae 33:4–5).

O nisi ia o upu mulimuli na tusia e Nifae i lenei vaega o le Tusi a Mamona. I nei fuaiupu e lua ua faailoa mai ai e Nifae ni mafuaaga se lima tatou te suesueina ai tusitusiga paia, e pei lava o lo tatou suesueina o se faafanua o le auala e sauniuni ai mo se malaga umi e sopoia ai se atunuu.

E faapena foi, na faamalamalama mai e le perofeta mulimuli na saofaga i le Tusi a Mamona le auala e mafai ai ona tatou maua lena molimau e sili ona manaomia e uiga i le moni o le Tusi a Mamona, ina ua ia faamanatu mai ia i tatou: “Pe a maua e outou nei mea, ou te apoapoai atu ia te outou, ia outou ole atu i le Atua, le Tama Faavavau, i le suafa o Iesu Keriso, pe le moni ea nei mea; afai tou te ole atu ai ma le loto faamaoni, ma le manatu tonu i ai, ma le faatuatua ia Keriso, na te faaalia le tonu i ai ia te outou i le mana o le Agaga Paia” (Moronae 10:4).

O le faagasologa na faataatia mai e Moronae e aofia ai le muamua, suesue; lona lua, fai le fesili sa’o. I le tulaga lenei, o le fesili e le o le pe moni ae o le, pe le moni ea. Tolu, faaali atu se manao faamaoni ia iloa le upumoni. Fa, ia lava le faatuatua e iloa ai o le a tali mai lau fesili. Lima, saunia e maua le tali mai le Agaga Paia.

Ona o la tatou malaga i le ala tatou te tau atu ai i aai tetele, ma auala lavelave i soo se itu, ma le poloka o taavale e femasauai ane, o lea e faigofie ai ona tatou afe i se auala sese ma leiloa ai pe tu foi i se auala e gata. E mafai ona oo mai le fefe, e oo lava i le popole a o tatou saili mo le sulufaiga saogalemu po o le auala saogalemu e manaomia. E faapena foi i le olaga: e mafai ona avea i tatou ma ni tagata ua se, gauai atu i faaosoosoga, ma i le aluga o taimi, e le iloa atu ai lo tatou uluai taunuuga.

I le aluga o le olaga na faia ai e se Tama agalelei oi le Lagi i Lana fuafuaga matagofie ni tulaga mo nei auala ’alo. Na Ia auina mai Lona Alo Pele e Toatasi e avea ma o tatou Faaola ma o tatou Togiola. Ia aua lava nei sese ai, o le agasala e manaomia ai le salamo. Ua faamanatu mai ia i tatou e le perofeta o Alema e faapea, “e le mafai lava le Atua ona silasila i le agasala ma sina alofa itiiti.” (Alema 45:16). E pei lava o le inisiua tatou te faatauina mai e puipuia ai la tatou taavale ina nei faaleagaina po o faafitauli e ono tulai mai i le taimi o le tatou faigamalaga, e mafai foi ona tatou mauaina, i le salamo faamaoni ma le atoatoa, ia faamanuiaga e o mai faatasi ma le Togiola a Iesu Keriso. Ua Ia tuuina mai foi le “au laveai” ua tofia mai le lagi o e ua tatou ta’ua o epikopo, e fesoasoani ia tatou toe maua le ala sao. Ia manatua, ua folafola mai le Alii “e ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe” (Isaia 1:18). I lenei tisipenisione na fetalai mai ai le Alii:

“Faauta, o le ua salamo i ana agasala e faamagaloina o ia, ma o au le Alii, ou te le toe manatua lava.

“Tou te iloa faapea se ua salamo i ana agasala—faauta, na te ta’uta’u atu ma lafoaia” (MFF 58:42–43).

Afai na e uia se auala ’alo pe se ese foi mai le ala faatonuina o le olaga, e mafai ona fesoasoani atu lou epikopo lelei. Alu e sue o ia; e alofa o ia ia te oe!

A o tatou sopoia le atunuu, e ofoina mai e ofisa eseese o le malo ni faamanuiaga ma ni avanoa pe afai e ausia e a tatou taavale ni tulaga faapitoa. O nei tulaga e mafai ona aofia ai lona faaaogaina, ma tulaga e manaomia mo le saogalemu. O isi taimi e i ai le mamafa faatapulaaina. E mautinoa lava e tatau ona i ai laisene o taavale. Ma o nisi itu latou te tuuina mai le faamuamua pe afai tatou te ausia ni vaega patino o maila i le kalone o a tatou taavale. A o tatou malilie e usitai ma faaali atu o lo tatou tiutetauave lea, atonu o le a mafai ona tatou faaaogaina ni itu auala faapitoa e aloese ai mai le poloka [o taavale], sopoloa mai i ofisa mo lafoga, pe maua foi nisi o faamanuiaga faapitoa.

I le olaga, ua faamoemoe mai lo tatou Tama oi le Lagi ia tatou ulu atu i maliliega tatou te ta’ua o feagaiga. Mai lava i le amataga, na taulimaina ai e lo tatou Tama oi le Lagi ia Ana fanau e ala i le osia o feagaiga. O le a outou manatua na osia ni feagaiga ma Atamu, Aperaamo, ma Mose. O aso nei, o se vaega o le faamoemoega o le osia o feagaiga, tatou te osia ai feagaiga o le papatisoga, tatou te osia feagaiga o le perisitua, ma tatou te osia feagaiga o le malumalu. Tatou te ta’ua nei feagaiga uma o le “feagaiga fou e faavavau.” O feagaiga taitasi ua ta’ua e faatatau i se sauniga paia e manaomia mo lo tatou faaeaga. A tatou faamamaluina feagaiga paia, e tuuina mai e lo tatou Tama oi le Lagi ia faamanuiaga e pei ona Ia folafolaina mai. E le tatau ona tatou manatu mama i a tatou sauniga ma feagaiga.

Ua faamanatu mai e Elder Russell M. Nelson ia i tatou le folafolaga a lo tatou Tama oi le Lagi: “O Lona faamoemoega mo i tatou o le ola e faavavau. Tatou te agavaa mo le ola e faavavau e ala i le usiusitai i feagaiga ma sauniga o le malumalu—mo i tatou lava, o tatou aiga, ma o tatou tuaa. E le mafai ona faaatoatoaina i tatou e aunoa ma i latou. E le mafai e le moomoo ona maua lo tatou auala i le afioaga o le Atua. E tatau ona tatou usitai i tulafono ua valoia mai ai na faamanuiaga.”12

Au uo talavou e, tatou te le iloa le umi po o le mamao o le auala o le olaga, ae e na o le tumau e oo i le iuga i olaga ua tatou totoina ma le mausali i eleele o le talalelei, tumau i tulaga masani o le Ekalesia, auauna atu ma le lotomaulalo i o tatou uso a tagata, ola i ni olaga e faapei o Keriso, ma le tausia o a tatou feagaiga paia, o le a tatou manuia ai i le mauaina o le fiafia i totonu o le mamanu faatulagaina o le fuafuaga a lo tatou Tama oi le Lagi.

Ina ia mafai ona maua le olioli atoatoa mai se tietiega umi i taavale, e tatau lava ona tatou faia ni nai malologa e matamata ma fiafia i aganuu o le lotoifale ma nofoaga e fiafia i ai. O ia mea uma e faaopoopo atu i le mataalia, naunautai, ma faamatagofie atili ai le faigamalaga. O mea ofoofogia o le natura ua foafoaina mo i tatou e talisapaia ma fiafia ai, ma a o tatou matauina ia mea, o le a tele ni mea tatou te aoaoina mai ai.

Ina ia feoai ma le manuia i le auala o le olaga, ia faaalu se taimi e auauna atu ai ma aapa atu i isi. Fai mai le sa avea muamua ma Tamaitai Sili o Barbara Bush, “I le faaiuga o lou olaga, o le a e le salamo lava i lou le pasia o se isi suega se tasi, o le le manumalo i se isi faamasinoga se tasi, pe o le le faamauina o se isi maliega se tasi. O le a e salamo i le le faaaluina o lou taimi ma lau tane, se tamaitiiti, se uo, po o se matua.”13

E pei lava ona e manaomia se laisene e ave ai se taavale, e te manaomia foi se pepa faataga ina ia mafai ona e olioli ai i faamanuiaga e maua i le auauna atu i le maota o le Alii.

O Taiala a le Atua e Mafai Ai Ona Tatou Manumalo

Na taua e Albert Schweitzer, o se faifeau lauiloa, o se misionare fomai, ma se fai tofa: O le manuia e le o le ki lea i le fiafia. O le fiafia o le ki lea i le manuia.”14 E oo mai le fiafia o se taunuuga o le mulimuli i aoaoga o le fuafuaga e faavavau o le tatou Tama oi le Lagi mo Lana fanau. A o tatou ola i aso uma i o tatou olaga, ia manatua le faamoemoega paia o lo tatou foafoaga.

O se taimi e lei mamao atu, na fesoasoani ai se tina atamai lava o le matou uarota ia matou malamalama i le mafuaaga e tuuina mai ai e le Alii ni tuaoi e pulea ai o tatou olaga. I se sauniga faamanatuga sa fai mai ai o ia, e moeiini o matou mata ma vaai faalemafaufau i se vaaiga toafilemu. O le a ou fai atu ia te outou taitoatasi e fai foi lea lava mea. Moeiini o outou mata. Ia vaai faalemafaufau i se vaaiga matagofie: O se aso lagilelei i le matafaga, o loo fafati lemu mai ai ni galu i luga o le oneone paepae. O le vaitaimi o le tautotogo ma e le o vevela tele le oneone. E mafai lava ona e tamoe ai e leai ni ou seevae ae feosofi mai oneone i va o ou tamatamaivae O loo i ai se savili manaia o loo agiagi mai, e fetaui tonu lava mo le faaleleina o maua. O le maua na fai lava i le fale, na fai i pepa solo, fasilaau, ma le manoa. O loo pipii ai se siusiu lanu sesega ina ia mau lelei ai. Sa e filifilia ma le faaeteete le manoa o lau maua. O se maua manaia lenei ma e te le manao e mamulu ese. Ua e manao foi e faalele maualuga i le mea e gata mai ai.

Ia tuu i luga lau maua ma tamoe i le atoa i le matafaga, ma tuu ia maua e le savili le ie o lau maua ma toso atu ai i le lagi. O le taimi muamua e fai si vaivai, o lea e tau pau mai ai i lalo seia oo lava ina mafai ona e faaleleina maualuga ma maua ai se savili lelei. Ona amata ai lea ona faigofie le alu agai i luga a o e talatalaina lau manoa. E lei umi ae alu maualuga tele lea ua na o sina togi lava o loo e iloa atu i le lagi lanumoana matagofie.

O e iloa atu? O e lagona le toso a le manoa a o maua pea lava pea e le savili? E mafai ona e faatofuina. E mafai ona e faataamiloina. E mafai ona e faaifoina ma toe alu ae i luga i le faatonutonuina o le manoa. O lena manoa miti, ae malosi e puleaina ma taulaina i lalo lau maua. Ia fiafia laia i le lagona o le faafoeina ma le matagofie o le aso.

Ia e i ai la’u fesili mo outou. O le a le mea o loo taofia i luga le maua? O le savili? E foliga mai o lea. O le a ou fai atu nei tou te faia se mea atonu e faigata ona outou faia. Ooti vave ese loa le manoa. Tuu le maua e alu. Tuu i ai le saolotoga e lele mamao ai ma maualuga atu. E mautinoa lava le pulea e le savili ma o le a saogalemu ai.

Ae o le a nei le mea ua tupu ina ua ooti le manoa? Ua amata ona sau i lalo ma fai ifo, alu faasapasapa ma supasupa, ma iu lava ina pau mai i le eleele. E ave solo lava e le savili, ma a o faaitiitia le maualuga, e le iloa atu i lau vaai, ae ua e iloa o le taunuuga mulimuli lava o le pau mai i le eleele. O lena maua manaia sa e faaaluina ai le tele o le taimi e tuufaatasi ua le toe mafai nei ona tumau i le lagi, ae ua pau mai i le eleele ma e le mafai e se savili ona toe aveina i luga. O e lagonaina se le fiafia ma se lagona o le maumau?

Ia pupula loa o outou mata. O le mea moni e ui lava ina foliga mai o le manoa o loo puleaina le maua, ae o loo tuuina atu ai i le maua le gafatia e lele maualuga ai ma avea ai ma le mea na tatau ona avea ai.

Sa ou taumafai e vali se ata faamatala i o outou mafaufau o se upumoni o le talalelei o le ki lea i lo tatou faaolataga. O le maua ua faatusa ia i tatou taitoatasi. Na faia i tatou e le Atua i Lona faatusa, ma ua matagofie i tatou i Lana silafaga. Na Ia faia se galuega maoae, ae Na te le faamalosia i tatou e faia se mea. O le mea na Ia tuuina mai ia i tatou o se sootaga malosi e tau atu ia te Ia, e pei o le manoa i le maua. O le manoa ua faatusa i taiala mo le fiafia ma le ola e faavavau e pei ona i ai i Lana fuafuaga ofoofogia.

Ia Tumau Pea le Taulai Atu i le Sini Aupito Taua o le Ola Faavavau

E tofu le malaga ma se amataga, se faaiuga, ma e masani lava o ni nai vaega e malolo ai i le ala. E faamoemoe o le a itiiti ni faaletonu ma ni faafitauli o le taavale, ma ia vava mamao. Po o fea lava o loo e i ai nei i le auala o le olaga, atonu o le a aoga ma atamai le iloiloina taitoatasi o le maloloina ma le malosi o lou ola faaleagaga, e pei lava o lou siakiina o le ea o pau o le taavale, ma le tele o le penisini i le tane, ao lei toe amatalia lau faigamalaga. Afai o faalavelaveina lou manuia faaleagaga e le agasala, faatuatuai, le manatu popole, tuinanau, fualaau faasaina, lē tauagafau, po o se isi lava faafitauli, o le taimi lenei e toe faia ai se tautinoga. Ou te fiafia i le fautuaga a Mother Teresa. Fai mai o ia: “O ananafi ua alu. O taeao e lei oo mai. Ae ua na o le asōua ia i tatou. Tatou amata loa.”15

Tatou amata uma! Tatou amata uma i le taimi lava lenei! Aua nei o tatou tolopoina le avanoa e auai atoa ai i le fiafia lea e oo mai mai le ola i se olaga amiotonu ma le aoga.

O tausaga ua alu na ou maua ai le avanoa maoae e taalo tapolo ai, i ni taimi eseese, ma Jack Nicklaus, Johnny Miller, Mike Weir ma Arnold Palmer. O nei tamalii taitoatasi o ni tagata sili ona tulaga ese ma o ni tagata ta polo maoae. Na i ai se mea e foliga e faaletaua na tupu a o ma taaalo ma Arnold Palmer lea na i ai se aafiaga tumau ma loloto ia te au. Atonu e manatua e nisi o outou le tala lenei na ou faamatalaina muamua ae ou te lei alu i lau misiona i Ausetalia.

Ina ua uma a ma ta amata, sa ou tu i talaane o Mr. Palmer a o faamatala e lana keli talavou nisi o faafitauli o le pu na ma ta ai. Na tai faapenei le aluga o le talanoaga:

Keli talavou ia Mr. Palmer: “Lau susuga, o talaane o le lanuvao i le agavale teisi ane o loo i ai se auvai laitiiti e le iloa atu, e lua inisi ua maualuga teisi ai le patupatu lena.”

Mr. Palmer i le alii keli—i se tali mausali, puupuu, ae na fai faalelei atu i ai “Faamolemole alii, aua e te totoina i lo’u mafaufau le mea o loo i le itu tauagavale ma pe o a foi ni faafitauli ma te ono feagai i le itu taumatau. Na pau lava le faamatalaga laitiiti e taua o le mamao o le polo lenei i le laau o le fu’a.”

E tele taimi o le olaga tatou te taulai ai i mea o loo i le itu tauagavale ma mea o loo i le itu taumatau, nai lo le mea o loo i le ogatotonu sao lava. Na taua e le sa avea ma Failautusi o le Soifua Maloloina, A’oga, ma le Uelefea, o John W. Gardner, “O mea o loo i o tatou luma atu, o nisi ia o avanoa maoae ua faafoliga mai o ni faafitauli e le mafai ona foia.”16 O le foiaina o o tatou luitau faaleagaga o se avanoa e mafai ona tatou manuia uma ai i le ausiaina.

Na ta’ua e faapea “o mea tatou te faia i le olaga e oo atu i le faavavau.”17 Au uo talavou e, tau ina ia tatou manuia i le faimalaga ai i auala o le olaga ma ia avea ma e mauaina le fiafia lea e oo mai mai lo tatou ola atoatoa i le fuafuaga a lo tatou Tama oi le Lagi mo i tatou. O se taimi ofoofogia lenei e ola ai!

E faailoa atu lo’u alofa ma le faaaloalo mo outou taitoatasi ma talosagaina faamanuiaga o le lagi, ina ia mafai ona faamanuiaina outou i le fiafia i o outou olaga patino a o outou mulimuli ma le faamaoni i le fuafuaga a le Atua, ina ia faamanuiaina outou i le iloatino e iloa ai mea lelei, ae lafoai ai mea e leaga, ma ia outou maua le tomai ma maua le olioli tumau i le auauna ai i Lona malo, faapea ai ma le mauaina o le manuia i a outou o taumafaiga faaleaoaoga pe faalegaluega.

Ou te iloa o loo soifua Iesu Keriso. Ou te iloa o Ia o lo tatou Faaola. Ou te iloa sa togiola o Ia mo a tatou agasala. Ou te faafetai ona o Ia o lo tatou fautua i lo tatou Tama oi le Lagi. Ou te iloa o upu o loo i tusitusiga paia, ae maise lava i le Tusi a Mamona, e tuuina mai ai ia i tatou le taitaiga i o tatou olaga, ina ia mafai ona tatou sopoia le malaga o le olaga ma foi atu i lo tatou tama oi le Lagi ma se fuataga atoatoa o le fiafia. Ou te faafetai ma faailoa atu lo’u agaga faafetai mo perofeta soifua. Ou te iloa ua faamanuiaina i tatou i nei aso i se perofeta soifua, o Thomas S. Monson. O nei mea uma ua ou iloa ma molimau atu ai ia te outou i le suafa paia o Iesu Keriso, lo tatou Togiola ma le Faaola, amene.

© 2010 e le Puletaofia e le Intellectual Reserve, Inc. Ua taofia aia tatau uma. Faamaonia le faaPeretania: 10/09. Faamaonia le faaliliuga: 10/09. Faaliliuga o le The Road of Life. Samoan. PD50021016 890

^ Back to top