O SE LAGONA I LE PAIA

Elder D. Todd Christofferson

O Le Au Peresitene o Fitugafulu

Faeasaite a le OAE mo Tupulaga Talavou Matutua
7 Novema, 2004
Iunivesite o Polika Iaga

Elder D. Todd Christofferson Ua ou faaulutalaina nei manatu “O Se Lagona i le Paia” o lona uiga, o se talisapaia ma le migao o mea paia. ” I lo’u ta’ua ai o le sosaiete i se tulaga lautele, ou te mata’u ona o le toatele o la’u augatupulaga sa faatamala i le auina atu i la outou augatupulaga o se lagona mo mea e paia, ma se malamalama pe faapefea ona faaaloalo i ai.

I le mea e gata mai ai lo’u mafaia, ou te faamoemoe, e le afea nisi o faataitaiga leaga ua tele ina vaaia i o outou siosiomaga. Ou te faamoemoe e fesoasoani atu ia te outou ina ia faaleleia lo outou tomai e iloatino ai mea e paia, ma tali atu ai ma le migao i mea uma e paia.

O le taua o le i ai o se lagona i le paia o lona uiga—afai e le talisapaia e se tagata ia mea paia, o le a na le maua. O le leai o se lagona o le migao, o le a matuai faateleina ai uiga faatalale ma le manatu māmā i le amio. O le a se’e ese mai taula e mafai ona maua i ana feagaiga ma le Atua. O le a tuuitiitia ona lagona e tali atu ai i le Atua ma i’u ai lava ina galo atu. A uma lena, o le a na o lona lava tulaga sololelei e manatu i ai ma le faamalieina o ona tuinanauga ua lē taofiofia. Mulimuli ane, ona ia inoino ai lea i mea paia, e oo lava i le Atua, ona ia inoino ai foi lea ia te ia lava.

I se isi itu, o le i ai o se lagona i le paia, e faatupula’ia ai le malamalama o le tagata i le upumoni. E avea e le aunoa le Agaga Paia ma ana soa ma i’u ai lava ina avea ma soa tumau. O le a ia saga tu ai i nofoaga paia, ma tuu atu i ai mea e paia. O le faafeagai tonu o le le talitonu ma le leai o se faamoemoe, o lona iuga o le ola e faavavau.

I se faaupuga e le talafeagai ae moni lava, o le tele o mea ou te manao e ta’u atu e le mafai ona pasi atu mai le tasi i le isi. E tatau lava ona tupu a’e i totonu. Ae afai e mafai ona ou fesoasoani atu ina ia e mafaufau i nisi mea i se faiga e tuutuu ai i le loloto, ona mafai lea e le Agaga ona galue ia te oe ina ia e le toe tau manaomia ai a’u po o se isi na te ta’u atua ia te oe po o le a le mea e paia po o le ala e tali atu ai—-o le a e lagonaina lava. O le a avea ma se vaega o lou lava natura; o le mea moni, o le tele lava na ua i ai.

O nisi taimi a o sailiili ina ia malamalama i se konasepi [concept], e fesoasoani pe a e manatunatu i lona faafeagai. O le eseesega e faamanino ai. A o tatou taumafai la ia malamalama atili i le uiga o le i ai o se agaga talisapaia ma le migao i mea paia, tatou vaavaai totoa i ni nai faataitaiga o le i ai o se lagona i le paia ma le leai foi.

1. O Perofeta ma Tusitusiga Paia

Manatu muamua i perofeta ma tusitusiga paia. O se tasi o mea ua tatou vaaia, ma o nisi taimi e oo lava ia i tatou, o se tulaga ua tauau ina faatemutemu i avefeau a le Atua ma a latou savali. E le o se mea fou lenei. Talu mai i ona po o Atamu, e toatele ua latou le amana’ia ma ua oo lava ina osofa’ia i latou e auina mai e le Alii i Lona igoa. Sa faamalamalama e Iesu lenei mea i se faataoto:

“O le tasi matai ua fai le tovine, ua ia lotoāina i le āi, ua eli ai le soligavine . . . , ua faia foi le ‘olo, ua tuuina atu e ia i e galulue i vine, ona alu malaga ai lea o ia i le nuu ese.”

Ua outou malamalama i le faatusa: sa foafoaina e le Alii mo i tatou se tovine, le lalolagi lenei, ma o i tatou o Ana tagata nofo lisi po o tausimea i se li’o faaletino ua aveeseina mai i Lona afioaga.

“Ua latalata le po e matua ai le fuata, ona aauina atu ai lea e ia o ana auauna i e galulue i vine, ia maua ona fua.”

I se isi faaupuga, ua auina mai e le Atua ana perofeta ma isi avefeau e aoao i tatou ina ia maua se tala o la tatou tausiga o ana mea.

“Ona pupue ai lea e e galulue i vine i ana auauna, ua latou sasa i le tasi ma fasioti le isi ma fetogi le tasi i maa.

“Ona toe auina atu ai lea e ia o isi auauna e sili ona toatele i e na muamua: a ua faapea lava a latou amio ia te i latou.

“Ae mulimuli ane ua auina atu ai e ia o lona atalii ia te i latou, ua faapea ane, Latou te ava mai i lo’u atalii.

“A o ia tagata galulue i vine, ua iloa atu lona atalii, ona latou fetautalatalaai ai lea, O le suli lenei; o mai ia, tatou te fasioti o ia, a e fai mo i tatou lona fanua (Mataio 21:33–38).

O le matua lē mafaufau a’ia’i lava, aua o Iesu Keriso, o le Atalii moni o le Atua, sa teena ma oo ai lava ina fasiotia. Ma o loo fai pea lava. I le tele o vaega o le lalolagi i ona po nei, ua tatou vaaia le faateleina o le teena o le Alo o le Atua. Ua fesiligia Lona paia. Ua foliga ua le taua le talalelei. I le olaga i aso faisoo, ua lē amanaia Ana aoaoga. O i latou e faataga ona tautala i Lona igoa, e tau le amanaia e tagata o le lalolagi.

Afai tatou te le amanaia le Alii ma Ana auauna, ua sili ai ona avea i tatou ma tagata faapaupau—o le taunuuga lava e tasi. O le mea lea na faamatala e Mamona, o se mea e masani ai pe a mavae ni vaitau uumi o le filemu ma le manuia: “O le aso lava lea latou te faamaaa ai o latou loto, ma faagalogalo foi ia te i latou le Alii lo tatou Atua, ma soli i lalo o latou vae Lē Paia” (Helamana 12:2). Ma o lea e tatau ai ona tatou fesili ifo ia i tatou lava, pe tatou te ava ea ma migao i Lē Paia ma i latou e auina mai e Ia?

I ni tausaga a o le’i tofia o ia e fai ma aposetolo, sa faamatala ai e Elder Robert D. Hales se aafiaga e faaalia ai le lagona o lona tama i lena valaauga paia. Fai mai Elder Hales:

“I ni nai tausaga ua mavae, o le taimi lena ua silia ma le valusefulu tausaga o Tama, sa faatalitali ai le asiasi atu o se uso o le Korama a Aposetolo e Toasefululua i se aso malulu o le kiona. Sa tusia e Tama, aua o ia o se tusiata, se ata o le maota o le Aposetolo. Sa manao lenei Aposetolo agamalu e alu atu lava ia e piki mai lana ata, ma faafetai atu i lo’u tama nai lo le tilivaina atu ia te ia. O lo’u iloaina o le a popole Tama ina ia saunia mea uma mo lea asiasiga, o lea sa ou asiasi atu ai i lona fale. Ona o le mafiafia o le kiona, o lea na mafua ai ona faula’i kiona i luma i le auala agai mai i le faitotoa ona ua sua mai i ai. Sa asu ese e le Tama ia [kiona] mai le ala savali ona galue ai lea e la’u ese le mauga kiona. Sa foi o ia i le fale ua vaivai ma lagona le tiga. Ina ua ou taunuu atu, o la e oi i le tiga o le fatu ona ua matua ova le galue ma le popole. O le mea muamua na ou popole i ai, o le lapata’ia lea o ia e uiga i ana taumafaiga faaletino lē faautauta. Pe na te le’i iloaina le taunuuga o lana galuega?

“ ‘Robert,’ sa ia fai mai ai a’o tau manava, “e te iloa o se Aposetolo a le Alii o Iesu Keriso lea e sau i lo’u fale? E tatau ona mama le auala. E le tatau ona ui mai i se mauga kiona.’ Sa sii a’e lona lima ma faapea atu, ‘Se Robert, aua lava nei galo pe manatu faatalale i le avanoa e iloa ai ma galulue faatasi ma Aposetolo a le Alii’” (in Conference Report, Apr. 1992, 89; po o le Liahona, Iulai 1992, 64).

Ou te manatu ua le na o na feauga lelei, ona o le a faamanuiaina lea tama i le i ai o sona atalii e auauna atu o se Aposetolo.

E mafai ona e fesili ifo ia te oe lava, “Pe ou te vaai atu ea i le valaauga o aposetolo ma perofeta e paia? Pe ou te taulimaina ea a latou fautuaga ma le loto atoa pe o se mea māmā ea ia te au?” Mo se faataitaiga, sa fautuaina i tatou e Peresitene Gordon B. Hinckley, ina ia tulitulimata’i a’oga ma aoaoga mo galuega, ia aloese mai ponokarafi e pei o se mala, ia faaaloalo i tamaitai, ia soia le aitalafu, ia loto faafetai, ia atamamai, ia mama, faamaoni, lotomaulalo, ma loto tatalo, ia faia le mea sili, le mea sili tatou te mafaia.

Pe o faaalia ea i au taga e te manao ia e iloa ma faia mea o loo ia aoao mai? Pe o e toaga ea e suesue i ana afioga ma saunoaga a le Usoga? Pe o se mea ea lenei e te fiaai ma fiainu i ai? Afai o lea, ua ia te oe se lagona i le paia o le valaauga o perofeta o ni molimau ma avefeau a le Alo o le Atua.

O se itu taua o le tofi faaperofeta i le gasologa o augatupulaga, o le faamaumauina lea o le talafaasolopito ma le afioga a le Atua. E paia tusitusiga paia. Ina ua tuuina atu e Alema papatusi a Nifae ma isi faamaumauga ia Helamana sa ia lapata’i atu, “Ia manatua lo’u atalii e, ua tuuina mai nei mea ia te oe e le Atua, ma ua paia, ua ia tausia. . . . Ia e tausia nei mea paia, ia e vaai atu i le Atua ma ola ai” (Alema 37:14, 47; faamamafa faaopoopo).

Ua i o tatou lima ni tusi maoae o tusi e paia. O faamaumauga e oo lona mamao i tua i uluai peteriaka ma agai mai i luma i o tatou lava taimi. Ou te manatu ua tele atu nei tusi paia nai lo le mea sa i ai i tagata i le talafaasolopito, ma o le mea tonu ua tele atu foi nofoaga ua maua ai nai lo le mea na i ai tusi paia i le taimi ua fano. Ou te talitonu pe ana fai na e umia pe ou te umia foi uluai tusitaai na tusitusi ai Mose po o papatusi metale sa tusia e Mamona, semanu ua tatou lagonaina se lagona loloto o le migao ma le maofa ma taulimaina ma le faaeteete tele na mea. Ma o lea e tatau ai lava, aua o ni mea e paia, na galulue ai ma ositaulaga ia perofeta paia o e sa sauniaina ma le faautauta.

Peitai o le tulaga taua aupito sili e le o tusitaai po o papatusi, ae o upu o loo i ai. E paia na upu aua o afioga ia a le Atua, ma e ui lava tatou te le o umia ia tusitusiga faapogai, ae ua tatou umia ia upu. O le mea lea, o mea ua ia te i tatou e paiatusitusiga paia.

O lo tatou umiaina o afioga tusitusia a le Atua, ua tatau ai ona tatou fesili ifo ia i tatou lava, pe o tatou faaaloalo ea i le natura paia o nei tusi. O nisi ua latou solipalaina le paia o tusitusiga paia i lo latou amusia pe faafitia lo latou taua. Ioe, o se tulaga matuia tele lena mea.

Ae o le toatele o i tatou, o ē ua uma ona latou faailoa atu le moni o Tusitusiga Faavae, afai e tausalaina i tatou i le le migao i le natura paia o tusitusiga paia, e mafua ona o lo tatou lē amanaiaina. O le tulaga matautia e tatau ona tatou puipui i ai i aso uma, o le aga’iga’i atu ina manatu māmā i ai, po o le lē amanaiaina foi, o le afioga paia. I se saunoaga i toeaina i le 1832, na fetalai atu ai le Alii i le a’oa’iga:

“Na faapouliuligia foi o outou mafaufau i aso ua mavae ona o le le talitonu, ma lo outou manatu mama i mea ua uma ona outou talia—

“O le faatalale lea ma le le talitonu ua aumaia ai le ekalesia atoa i lalo o le ta’usalaga. . . .

“O le a latou tumau ai i lalo o lenei ta’usalaga seia latou salamo ma manatua le feagaiga fou, o le Tusi a Mamona lea ma poloaiga muamua na ou tuuina atu ia te i latou, ae le na ona fai atu, a ia faia e tusa ma lea na ou tusia (MFF 84:54–55, 57; faamamafa faaopoopo).

O se lagona i le paia e aofia ai se agaga talisapaia— ma se fiafia—i tusitusiga paia. O se lagona o le paia e oo atu ai se tasi ina fiafia i afioga a Keriso (tagai 2 Ni. 31:20; 32:3) lea e sosoo ma le faalolotoina o le migao i Ana afioga.

2. O Le Tino—o se Malumalu o le Atua

O le a ou liliu atu nei i se isi faataitaiga mo la tatou autu—o le natura paia o o tatou tino faaletino. E faapei ona tatau ai i le Atua ma Keriso lo tatou migao, e faapena foi ona tatau ai la tatou faaaloalo ma le migao i a La’ua galuega. Ioe, e aofia ai ma le foafoaga ofoofogia o le lalolagi nei. Peitai, e ui ina ofoofogia lenei lalolagi, ae e le o lena e aupito silisili o foafoaga a le Atua. E sili atu ona ofoofogia o lenei tino faaletino. O le faatusa o le peresona o le Atua. E taua mo lo tatou aafiaga faalelalolagi ma o le ki i lo tatou mamalu e faavavau.

O se faamanuiaga ia te au lo’u i ai i le taimi sa fananau mai ai le ma fanau uma e toalima. O taimi taitasi, sa ou lagona ai o se aafiaga e paia. E manino lava e i ai se mea paia ma le ofoofogia sa tupu. E mafai ona ou faalogoina lo’u toalua o faapea, “E faigofie lava ia te oe ona tautala ai. E le o oe sa tigaina.” E moni e tele mea atonu tatou te ta’ua o “aafiaga moni faalelalolagi” e o faatasi ma le fanau mai. I tina uma lava i soo se vaipanoa, ou te ioe atu ou te le’i tauaveina lo outou tiga ma ou te le faatagā faapea ua ou malamalama.

Ae tautala atu ma le maua’i, pe le faaopoopo atu ea le tigaina o se tamaitai i le foafoaina o se tino faaletino i le paia o lena foafoaga, ma le tamaitai lava ia? O lana osigataulaga ua saga faapaiaina ai se mea e paia lava ia.

E i ai nisi ua faaseseina o latou manatu faapea, e faatatau i o latou tino, latou te le tali atu i se isi. Peitai, ua ta’u patino mai lava ia te i tatou, e tumau lo tatou tali atu i le Atua. “Tou te le iloa ea o lo outou tino o le malumalu lea o le Agaga Paia ua i totonu ia te outou, o loo ua ia te outou mai le Atua, e le aia foi outou ia te outou?

“Aua ua faatauina outou i le tau; o lenei, ia outou vivii atu i le Atua i o outou tino ma o outou agaga, o mea a le Atua ia” (1 Korinito 6:19–20).

“Afai e faaleaga e se tasi le malumalu o le Atua, e faaleagaina lena tagata e le Atua; aua e paia le malumalu o le Atua, o outou lava ia” (1 Korinito 3:17). ”Ou te aioi atu ia te outou . . . ona o le alofa mutimutivale o le Atua, ia outou tuuina atu o outou tino i le Atua, o le taulaga ola, ma le paia, ma le malie, o le mea lea e tatau ai ona outou faia” (Roma 12:1).

Pe faapefea ona tatou tausisia le paia o lenei mea aupito sili ona taua o foafoaga paia a le Atua? I se tulaga aupito itiiti, tatou te le faaleagaina o tatou tino. Ina ia faapatino atu, afai e ia te i tatou se lagona i le paia, o le a tatou le faaleagaina lava o tatou tino i le ta ai o ni pe’a pe tatui foi. E tuufesilisili nisi i le matauina e le Peresitene o le Ekalesia o lenei mea. O loo fenumiai i latou i le tuusa’o mai ma le patino o lana fautuaga e uiga i lenei mataupu. Sa ia saunoa mai:

“O se pe’a [po o se tatau] o ni tusitusiga ia i luga o le malumalu, o le tino lea.

“E faapena foi le tatui o le tino mo ni mama se tele i taliga, o le isu, ua oo lava i le laulaufaiva. Mata e mafai ona latou manatu ua matagofie lenei mea? O se tifiga foi, ae e mafai ona tumau ona aafiaga. . . .Ua poloai mai le Au Peresitene Sili ma le Korama a le Toasefululua ina ia fautuaina le lē taina o ni pe’a faapea foi “le tatui o le tino sei vagana ai togafitiga faafomai.” Peitai, matou te lē āiā “i le tuiina o se pu se tasi o taliga o tamaitai mo se pea tautaliga se tasi— tasi le pea” (Gordon B. Hinckley, Liahona, Ianuari 2001, 67—68).

Aisea o le a talanoa ai le perofeta a le Atua e uiga i nei mea e matua foliga mai e leai se taua? Aua e le faapea e le taua. O le faaleagaina o foafoaga a le Atua, o Lona malumalu, e amusia ai le mea e paia. Ua na o le tagata lava ua leai sona lagona o le paia, e mafai ona lē taua i lana vaai. Aua le faia.

O ofu e le talafeagai e aveesea ai foi le paia o le tino o le tagata. Ua tele fetuuna’iga ua faaalia ina ia ta’uamiotonuina ai tifiga ma ponokarafi po o tusi ma ata mataga.

Ua matua ta’utino mai e nisi e leai se tulafono e mafai ona fai e puipuia na faiga, ona finau mai lea e le mafai ona sese aua e leai se tulafono e faasaga i ai.

O le isi fetuuna’iga ua leva ae ua toe alia’e mai foi ma faaaogaina e ta’uamiotonuina ai tagata afeleti o le Olimipeka sa tutu faatosina e leai ni laei mo mekasini ponokarafi. Sa faaupu e se tasi faatonu, “O nei tamaitai. . . e tulaga ese o latou tino ma o se avanoa lenei e faaalialia vale ai i nei tino” (i le tusiga a Steve McKee, “An Olympic Pose Isn’t What It Used to Be,” Wall Street Journal, Aug. 18, 2004, A8). O le uiga moni o lana tala, o le “Masalo ua alagatatau lava ona maua ni a’u tupe i nei tino tulaga ese.”

Pe o le a lava le fetuunaiga, o le a tele lava ina e iloa ai o le uunaiga moni lava e faaautu i ai le le talafeagai o laei, o le manao lea o se tagata e maua ana mea mai le faaosofia o lagona feusua’i, le tuinanau mo tupe. O le tino o se malumalu lea o le Atua, ma o tusi ma ata mataga ma ofu fufusi o ni mea ia e faamaonia ai le toe faaleagaina o le malumalu e i latou e fefaataua’i.

E mafai ona tatou ta’ua le Upu o le Poto ma isi mea, ae mai mea uma e mafai ona faaleagaina ai le tino, le mea e aupito faatama’i, ma aupito faataumaoi, le taga aupito pagatia o le lē migao o le feusua’i lē mama—ma lona tausoga o le, feusua’i faatautala.

E le mafai ona manatu se tasi i se faaleaga e sili atu ona loloto o foafoaga a le Atua nai lo le solia o lona faaaogaga e aupito sili ona paia. E le tatau lava ona e faia se mea faapena. Aua lava ne’i e faata’ita’ia. “Ina sosola ese ia outou i le faitaaga. . . . [O] le faitaaga, e agasala ia i lona lava tino” (1 Korinito 6:18). “Ia e sola ese i tuinanau o taulelea” (2 Timoteo 2:22). ”Ia outou faalatalata atu i le Atua, ona faalatalata mai lea o ia ia te outou. Ia outou tetee atu i le tiapolo, ona sola ese ai lea o ia ia te outou” (Iakopo 4:7, 8). Ia tausisia le paia o outou tino o se taulaga ola i le Atua. (Tagai Roma 12:1.)

3. O Nofoaga Paia ma Mea e Tutupu

Tatou manatunatu nei mo sina taimi i nofoaga paia ma mea e tutupu. E ala atu i le perofeta o Esekielu sa fetalai atu ai le Alii ma aoa’iina faitaulaga o Isaraelu ona o lo latou le aoaoina atu o le faaaloalo mo le natura paia o ni gaoioiga patino ma nofoaga:

“Ua solia e ana faitaulaga o la’u tulafono, ua latou faaleaga foi a’u mea paia, ua latou le faailogaina mea paia, ma mea e le paia, ua latou le faailoa foi le eseese o mea leaga, ma mea e mama, ua latou liliu ese o latou mata i o’u sapati, ma ua solia a’u e i latou” (Esekielu 22:26).

O le tele lava o mea sa ta’ua e le Alii e faatatau ia i le malumalu. O loo faasino foi i le sapati. Ua tatou masani i le mafaufau i o tatou malumalu ma faletatalo, ua faapaiaina i le Alii, o se nofoaga e paia. I fausaga taitasi o malumalu o loo i ai, e fai ma se faamanatu manino, ia upu “E Paia i le Alii—o le Maota o le Alii.” O se lagona o le paia, e tatau lava ona taitaiina i tatou e gaoioi ma tautala ma le migao i totonu ma autafa o nei fale. E taula’i atu ai foi i tatou i se tulaga patino e fai ai laei pe a tatou i ai iina.

Sa tatou talanoa i ofu e le talafeagai, o se le faamamaluina lea o le tino, le foafoaga e aupito sili ona paia. O le a ou tautala nei e uiga i ofu ma teuga e le talafeagai, soona fai, faainaelo [tulou] ia e i ai taimi faapitoa ma nofoaga e ulagia ai le paia o le mea o loo fai po o le nofoaga foi lava ia.

Se’i ou tuuina atu se faataitaiga. I se taimi e lei mamao atu, sa sau ai se tamaitai talavou mai se isi setete, e nonofo ma ona aiga i le eria o le Aai o Sate Leki mo ni nai vaiaso. I lona Aso Sa muamua, sa sau ai i le Lotu ma si ona sakete e pau i tuli ma lona palausi taatele ae manaia, ma lona ofumafanafana lanuvaivai e faamau uma i luga. Sa fai ona totini silika ma seevae, ma sa selu faalelei foi lona lauulu. O le aotelega o ona foliga mai, sa aumai ai se tulaga tausaafia faatalavou.

O le mea e leaga ai, sa vave ona faaletonu ona lagona. Sa foliga mai o isi tamaitai talavou uma lava o lana tupulaga pe talitutusa foi ma ia, sa soona fai o latou sakete, o nisi e le oo ifo i tuli, e fufusi mitiafu e tau le oo ifo i le fusi o le sakete (o nisi sa le na ona tau aliali puimanava ae sa aliali) leai ni totini, ma sa fai ni seevae taalo po o ni “seevae tosotoso.”

E ono faamoemoe se tasi faapea talosia ia vaai atu i le teine fou lea, ona iloa ai lea e isi teineiti le matua le talafeagai o o latou ofu mo se faletatalo ma le Aso Sapati, ona vave ai lea ona sui ia manaia atu. Peitai, ou te faanoanoa e faapea atu, latou te le i faia, ae o le tamaitai na asiasi ane, sa ia faata’ita’i foi i tifiga na (pe a mafai ona e ta’u ai faapea) a le uarota sa asiasi i ai, ina ia taliaina ai o ia.

O se popolega le vaai atu i le faatupulaia o nei tifiga ua le gata i tamaitai talavou ae ua faapena foi tamaitai ua matutua atu, o alii, ma tama talavou. I le tele o tausaga ua mavae, sa faaaoga e la’u uarota i Tennessee se aoga maualuga mo a matou sauniga faale-Lotu i Aso Sa, a o toe faafou le matou falelotu sa faaleagaina e se asiosio. Sa faaaoga foi e se potopotoga a se isi faatuatuaga lea lava aoga maualuga mo a latou foi sauniga tapuai a o fauina lo latou falesa fou.

Sa ou maofa i laei o tagata o le isi faapotopotoga sa fai mai i le lotu. Sa leai se alii na suti pe fai se fusiua. Sa foliga na o mai pe o agai atu foi i se malae tapolo. Sa faigata ona iloa atu se tamaitai sa fai sona ofu lelei po o se isi ituaiga nai lo ofuvae masani po o ofuvae pupuu. A na faapea ou te le’i iloaina o la na o mai i le faleaoga mo a latou sauniga faalelotu, semanu ou te faapea o la e fai ni a latou taaloga.

Sa manaia atu laei o o tatou tagata pe a faatusatusa i lea faataitaiga leaga, peitai ua amata ona ou mafaufau ua le o toe matua ese i tatou aua ua foliga ua tatou see atu foi i lena tulaga maualalo. Sa masani ona tatou faaaogaina le faaupuga “[laei] sili o le Aso Sa.” Sa malamalama tagata o lona uiga o o latou laei pito sili o i ai. O laei patino e eseese e tusa ma aganuu eseese ma tulaga o le tamaoaiga, ae o o latou laei aupito sili.

O se faatausuai i le Atua le o mai i Lona maota, aemaise i Lona aso paia, ae le o teu faalelei ma laei i se tulaga e faatagaina i o tatou tulaga, ma le matua faaeteete ma talafeagai. A fai o se tagata mativa o le au paia mai atumauga o Peru e tatau ona asaina se vaitafe ina ia sau ai i le Lotu, o le mea moni o le a le tiga le Alii i se pisia o lona ofutino paepae i le vai palapala.

Ae e mafai faapefea ona lē tiga le Atua i le tagata e tele ona lavalava ma faigofie ona alu i le falelotu ae sau i le Lotu i ofuvae maanuminumi tetelē ma se mitiafu. E iloagofie, i a’u malaga taamilo i le lalolagi, o tagata o le Ekalesia e tau leai ni mea e ola ai, latou te sailia lava se auala e taunuu ai i sauniga o le Sapati e mama lelei o latou laei, e mananaia, o o latou laei sili o i ai, a o i latou e tele a latou mea, o i latou na e lē faia faalelei o latou laei, ma faainaelo [tulou].

Fai mai nisi e le afaina le ofu po o le faiga o le ulu—ae o totonu e taulia. Ou te talitonu e sa’o lava o le mea o i totonu o se tagata e taua, ae o le mea lena ua faapopoleina ai au. O ofu e le faia faalelei i nofoaga paia ma mea paia, o se savali lena i le mea o i totonu o se tagata. O loo faapea mai, “Ou te le o malamalama. Ou te le iloa le eseesega o le paia ma le le migao.” O lena tulaga, e faigofie ai lava ona latou o ese mai le Alii. Latou te talisapaia le taua o mea ua ia te i latou. Ou te popole mo i latou. A le mafai ona latou maua se malamalamaaga; a latou le maua ni lagona mo mea e paia, ua latou i ai i se tulaga lamatia e i’u ai ina latou le maua mea e sili atu ona taua. O outou o le au paia o aso sili o le tisipenisione e gata ai—tula’i mai o ni tagata o i ai lena tiute.

E faatatau foi nei mataupu faavae i gaoioiga ma mea e fai, ia e paia pe fesoota’i foi ma mea ua tatau i ai le faaaloalo—o sauniga o le perisitua, mo se faataitaiga: papatisoga, faamauga, faauuga, faamanuiaina o le faamanatuga o le Talisuaga a le Alii, faamanuiaga o ē mama’i, ma isi mea. O loo ta’u mai e le Mataupu Faavae ma Feagaiga, i sauniga o le perisitua, “ua faaalia ai le mana o le amioatua” (MFF 84:20).

Fai mai Alema “ua faapea ona faia nei sauniga . . . ia faamoemoe le nuu i le Alo o le Atua, o le faatusa lenei i lona tofiga, o lona tofiga lava lea; o lenei foi ina ia latou faamoemoe ia te ia ina ia faamagaloina a latou agasala, ina ia latou ulu atu i le malologa o le Atua” (Alema 13:16).

Ou te talisapaia i latou e faataunuuina nei sauniga ma i latou foi e molimauina pe tuuina atu i ai, pe a latou faaalia le faaaloalo mo le perisitua ma le natura paia o le mea o loo fai.

Ou te talisapaia ositaulaga, o aoao, ma tiakono e fai faalelei o latou ofutino ma fusiua e faatino ai o latou tiute aloaia i le taulimaina o le faamanatuga.

Ou te talisapaia alii e fai o latou ofutino ma fusiua, pe a i ai tulaga faatagaina, e faamanuia ai ē mama’i. Ou te talisapaia i latou e auai i le faauuga o se alii i se tofi o le perisitua, e fai o latou “laei sili o le Aso Sa” tusa po o le a le aso ae po o fea foi e fai ai le faauuga. O loo latou taufai faaalia se agaga talisapaia ma le faaaloalo mo le Atua ma le mea o loo faatino. O loo latou faaalia se lagona i le paia.

E pei lava foi ina paia pe a fanau mai se tagata, e faapena foi ona paia pe a i’u le soifua i le olaga nei. Ma ou te talitonu e faapena foi ona moni i le faatinoga e aupito sili ona taua lea e mafai ona tula’i mai i le olaga—faaipoipoga, aemaise lava o le faaipoipoga e faavavau. Ona o lea le mafuaaga, e faanoanoa i le vaai atu i tagata ua faatalalē, ma lē migao ma lē faaaloalo, i upu, o laei, ma amioga pe a latou auai i sauniga o maliu ma faaipoipoga.

O nisi sauniga o maliu ua avea ma sauniga e manatu mama i ai, ma fai ai agamalie e le talafeagai. O mea patino e faamanatu, i se tulaga e talafeagai, e mafai ona faaalu ai se itula pe lua, ae o le Togiola ma le Toetu o le Alii ma Lana ata o le faaolataga ua na ona ta’u lava, pe afai e oo i ai.

E i ai nisi taimi i faaipoipoga, ma e tele lava i taumafataga o faaipoipoga, e o mai tagata ma lavalava e le faia faalelei. E foliga mai latou te le kea e faamama pe a uma a latou galuega po o taaloga o lena aso. E ta’u mai i o latou lavalava, e lē taua le faaipoipoga sa valaaulia ai i latou e o mai e faamamalu.

Talu ai nei, sa ou faitau ai i se tusi mai se alii sa tauanauina ana soa e ofu se peleue ma se fusiua, pe a latou malaga faatasi atu i se sauniga faitele e faamamaluina ai la latou faalapotopotoga ma mea ua latou ausia. O la latou sauniga o se sauniga faitele e le faalelotu lona natura, ma o le a tatou le faaupuina e paia, ae sa malamalama o ia i le mataupu faavae e i ai mea e tatau i ai le faaaloalo, o o tatou laei o se vaega o le faaalia o lena tulaga. Sa fai mai o ia, sa tuu e matuai fai faalelei ona laei, “e le faapea ona e taua a’u, ae ona o lenei sauniga e matua taua tele.” E ta’u mai i lana faamatalaga se upumoni taua. E le faapea ona o i tatou. O aga ma laei e faamamaluina ai se sauniga ma nofoaga paia, e faatatau i le Atua.

4. Tautalaga

O le liliu atu i se isi mataupu, e i ai tulaga o upu e fai e fāiā ma se lagona i le paia. Ua ia te i tatou le tiute i upu tatou te fai, ma ua manino mai le fetalaiga a le Alii “O upu faatauvaa uma e faia e tagata, latou te talatala atu ai le tala i le aso faamasino” (Mataio 12:36). Ua lapata’ia foi i tatou e le Tupu o Peniamina, ina ia leoleo o tatou manatu ma a tatou upu (tagai Mosaea 4:30), ua ta’utino mai foi e Alema a aunoa ma le salamo, pe a faamasinoina i tatou, “o a tatou upu e ta’usalaina ai i tatou, ioe, . . . ; e le maua foi i tatou uma ma le le pona” (Alema 12:14).

Ua outou silafia i mea tou te oo i ai, ua tupu atili le leaga o le lalolagi, ua matua masoā upu e fai, ae e le mafai ona tatou tuuina atu i tatou lava e pauu atu i lena mamanu. O le gagana fetuu ma le masoā e tauemuina ai le Atua ma Keriso ma a la’ua foafoaga. E le tatau lava ona ta’usalaina i tatou i le ulagia o le Faaola e pei ona tula’i mai i Lona Faasatauroga.

“O i latou foi na ui ane, ua latou upu leaga ia te ia ma lialia’i o latou ulu, ua faapea mai, Ue! O oe na o lē lepeti le malumalu, ma toe faia i aso e tolu,

“Ina faaola ia oe ia te oe, ma alu ifo i le satauro.

“Ua faapea foi le au ositaulaga sili ua faatauemu i latou faatasi, atoa ma le au tusiupu, ua faapea ane, Na Ia faaolaina isi tagata, na te le mafaia ona faaola o ia ia te ia.

“Ina alu ifo nei lava ia le Keriso, le tupu o Isaraelu, i le satauro tatou te iloa ai, ma tatou talitonu ai. O e na faasatauroina foi faatasi ma ia, ua la upu leaga ia te ia (Mareko 15:29–32).

O le ta’usalaga o “atalii o le malaia” ua latou “faasatauroina [Keriso] ia te i latou lava ma faalumaina o ia i luma o tagata” (MFF 76:35). E le mafai ona tatou soona faia se mea faapena i a tatou upu e fai. E le tatau ona tatou ta’ua Lona suafa pe tautala tuulafoa’i pe soona tautala foi i Lona suafa.

I le Mataupu Faavae ma Feagaiga tatou te faitau ai i lenei faatonuga po o se lapataiga:

“Faauta, o a’u o le Alefa ma le Omeka, o Iesu Keriso lava.

“O lea ia faaeteete ai tagata uma i le ala latou te faaaogaina ai lo’u igoa i o latou laugutu—

“Aua faauta, e moni ou te fai atu, e toatele ē lavea i lenei ta’usalaga, o ē faaaoga le igoa o le Alii, ma ta’u fua, e aunoa ma le pule. . . .

“Ia manatua o mea mai luga e paia, e ao foi ina tautala i ai ma le faaeteete, ma le uunaiga a le Agaga; . . . ma tou te maua le Agaga i le tatalo; o lea a aunoa ma lenei e tumau pea le ta’usalaina” (MFF 63:60–62, 64).

E ui lava ua ia te i tatou le pule e faaaoga ai le suafa o Iesu Keriso, ae e ao lava ona tatou faia ma le faaeteete. O Lona suafa ma “mea mai luga e pa’ia, e ao foi ina tautala i ai ma le faaeteete, ma le uunaiga a le Agaga.” E tatau ona tatou manatuaina lenei mea pe a tofia i tatou e lauga i le Lotu, pe tuuina atu foi a tatou molimau.

Ua tatou iloa o tulaga nei, e tatau ona faaiu “i le suafa o Iesu Keriso,” o lona uiga o mea sa tatou tautala atu ai, ua tatou fai atu ai i Lona suafa. O le mea lea, e ao ai ina tatou matua faaeteete i upu tatou te fai, ma le auala foi tatou te fai atu ai. E leai se avanoa mo ni mea valea po o ni lauga faavalevalea. E sili atu i na mea uma, e tatau ona tatou saili i le Agaga e ala i le tatalo ina ia tatou tautala atu e ala i le uunaiga a le Agaga ma aloese ai mai le ta’usalaga.

Ua ou matauina e masani ona faaiu e Peresitene Gordon B. Hinckley ana saunoaga “i le suafa paia o Iesu Keriso.” Ou te le o faapea atu ia outou faia foi faapena; Ou te le talitonu o lona faamoemoega lena, pe ua tatau foi ia i tatou ona faia faapena. Ae o loo ou taloina lo outou gauai atu i le mea moni, e matua loloto le tofa a le Perofeta i le tiutetauave o le tautala i le suafa o le Alii, ma e paia ia te ia. Na te faaaogaina ma saunoa i lena suafa ma le migao, ma o le faataitaiga lena e tatau ona tatou mulimuli ai.

5. Mata’u Faaleatua

O la’u faataitaiga mulimuli, e mafai ona tuu i lalo o le ulutala o le “mata’u faaleatua.” E tele vaega o tusitusiga paia o loo fautuaina ai le tagata ina ia mata’u i le Atua. I o tatou taimi, ua masani ona tatou faauigaina le upu “mata’u” o le “faaaloalo” po o le “migao” po o le “alofa,” o lona uiga, o le mata’u i le Atua o lona uiga o le alofa o le Atua po o le faaaloalo mo Ia ma Lana tulafono. E ono tulai mai lena i le tele o taimi, o se faitauga sa’o, ae ou te le iloa pe o nisi taimi o le mata’u e le o lona uiga moni o le fefe, pe a saunoa perofeta i le fefe e faatausuai i le Atua e ala i le solia o Ana poloaiga.

Mo se faataitaiga, manatu i le faataoto lenei: O le mata’u foi ia Ieova, ua ‘alo ese ai tagata i le leaga” (Faataoto 16:6). Sa faamatalaina Iopu o se tagata e atoatoa ma amiosa’o, “sa mata’u i le Atua, ma [o lea] ua ‘alo’alo ese ai i mea leaga” (Iopu 1:1). O se faataitaiga lelei o lea uiga, o Iosefa i Aikupito. Ina ua taumafai le ava a Potifara e faaamioleaga o ia, sa tali atu Iosefa, “Pe faapefea ona ou faia lenei mea leaga tele ma ou agasala ai i le Atua?” (Kenese 39:9). Sa fefe o ia e agasala i luma o le Atua. E toatele i latou i le taimi nei e manatu e moto le tali a Iosefa. Latou te aamu i le leai o sona poto masani i mea o le lalolagi, e latou te le fefefe e agasala i luma o le Atua.

Sa i ai se taimi na faasa’oina ai Iosefa Samita i le lē lava o lona popole i mea sa finagalo ai le Atua. Sa fetalai atu le Alii ia te ia, “Sa le tatau ona sili lou fefe i le tagata i lo lou mata’u i le Atua. E ui ina faaleaogaina e tagata faatonuga a le Atua, ma inosia ana afioga—Ae na tatau ona e faamaoni” (MFF 3:7–8).

Ou te fautuaina, o le mata’u i le Atua, po o le mea lea e ta’ua e Paulo o le “mata’u faaleatua” (Eperu 12:28), e tatau ona avea ma se vaega o lo tatou migao mo Ia. E ao ina tatou alolofa ma migao ia te Ia, ia tatou matata’u ai e faia soo se mea e sese i Lana silafaga, tusa pe o a manatu po o uunaiga mai isi tagata. Ua uuna’ia i tatou e Moronae, “Ia amata e pei o anamua, ma ia o mai i le Atua ma o outou loto atoa, ma ia galulue ma le matata’u, ma le gatete i ona luma, ina ia outou ola ai” (Mamona 9:27).

Talu ai e faatuatuana’i e le lalolagi o siomia ai i tatou ia le Atua, e faigofie ia i tatou i nisi taimi ona galo e tumau lava lo tatou tiutetauave, o le iloa ma faia Lona finagalo. E toatele latou te le iloaina, pe le talitonu foi, e i ai se aso i le lumanai o le a taitasi ai i tatou ma tali atu i le Atua mo lona lava olaga: o mafaufauga, o upu, ma taga. O le galueaiina o lo tatou lava faaolataga ma le mata’u ma le gatete, o lona uiga, o le taumafai i faaiuga ma gaoioiga o le olaga i aso taitasi, e saunia ai se lipoti lelei.

Ona ua faamanuiaina e maua mea ua tatou mauaina, e mafai ona alualu i luma faaleagaga nai lo isi tagata, peitai e tele atu foi lo tatou tulaga lamatia nai lo nisi lava. E le mafai ona tatou faia agasala latou te faia e aunoa ma se ta’usalaga tele o i tatou, aua afai tatou te agasala, tatou te agasala i se malamalama ua sili atu. E le mafai ona tatou faatalale i mea paia ua tuuina mai i le tatou tausiga ma manatu e ta’umamaina i tatou e faapei o i latou e le iloa le Atua.

O loo sailia i tatou e le Atua ina ia iloa pe faamaonia lo tatou faamaoni, ma afai e ia te i tatou le amiosa’o ma le lagona vave e faamamalu i mea paia, o le a tele atu mea tatou te mauaina. Ae afai e leai, o le a liua o tatou faamanuiaga e fai ma ta’usalaga. O le mamanu sa’o o loo ta’ua e le Alii i le Mataupu Faavae ma Feagaiga:

“O lea, o lē agaga maulalo ma tatalo, o ia lea e talia e a’u pe afai na te usiusita’i i a’u sauniga.

“O lē na te tautala atu, e aga maulalo, e filemu ma faamatagofieina lana gagana, o ia lava lea e mai le Atua pe afai na te usiusita’i i a’u sauniga.

“O lenei foi, o lē gatete ona o lo’u mana o le a faamalosia o ia, o le a aumaia foi fua o le viiga ma le poto, e tusa ma faaaliga ma mea moni ua ou tuuina atu ia te outou (MFF 52:15–17).

Talia le augani faatamā a Alema ia Korianetona: “Lo’u atalii e, ou te loto ina ia e le toe faafitia le amiotonu a le Atua [i lou faapea e leai ma e le tatau ona i ai se faasalaga o le tagata agasala]. Aua e te taumafai ona ta’uamiotonuina oe i se mea aupito faatauvaa ona o au agasala, e faafiti ai le amiotonu a le Atua; . . . ae peitai, ia e tuu atu i le amiotonu a le Atua ma lona alofa, ma lona faapalepale e pule aoao i lou loto; ia e tuu i ai foi e aveina ifo oe i le efuefu i le loto faamaulalo. (Alema 42:30).

O Se Lapataiga

Ou te faaiu atu i se upu o se lapataiga mo outou. O le i ai o se migao loloto mo mea e paia, o le a tupu atili ai lou malamalama. O loo tautala i ai tusitusiga paia o se malamalama e tupu pea “e tuputupu pea le pupula o lea malamalama seia oo mai le aso atoatoa ona lelei” (MFF 50:24). O loo faamatala mai foi lena faiga o se alualu i luma mai le alofa tunoa i le alofa tunoa. Sa alualu foi i luma le Faaola lava ia i lena tulaga seia iu ina Ia maua le atoatoa, ma e mafai ona e mulimuli ai i Ona tulaga aao (tagai MFF 93:12–20).

O iina e tata’i atu i ai oe e se lagona o le paia. Peitai, ia manatua e le aunoa, a o tuputupu a’e le paia i totonu ia te oe, ma e maua le malamalama faateleina, e ao ona e taulimaina ma le faaeteete nei mea. Sa tatou faitau muamua i le mau o loo faamautinoa mai ai, o mea mai lugā e paia, ma e tatau ona tautalagia ma le faaeteete ma i le uunaiga a le Agaga. Ua poloai mai le Alii, e fai lava si tuusa’o, e le tatau ona tatou avatu penina i puaa po o mea paia i ulī (tagai 3 Nifae 14:6 ma le MFF 41:6), o lona uiga e le tatau ona faailoa atu mea paia pe talanoaina foi ma i latou e le o saunia e talisapaiaina lo latou taua, ma e ono osofaia nai lo le talisapaiaina.

Ia faautauta i mea ua tuuina atu e le Alii ia te oe. Mo se faataitaiga, e te le soona faamatalaina solo fua mea o tusia i lou faamanuiaga faapeteriaka.

Sa fautua mai Peresitene Boyd K. Packer:

“Ua ou talitonu foi e le o se atamai le saga talanoa pea i aafiaga faaleagaga tulaga ese. E ao ona puipuia ma le faaeteete ma sei vagana lava ua uunaia ai i tatou e le Agaga ona faatoa faasoa atu lea ina ia manuia ai isi.

Ou te manatua pea upu a Alema:

“ ‘Ua tuuina mai i nisi e toatele e iloa mea lilo a le Atua, e ui i lea, ua tuuina mai foi ia te i latou le poloaiga mamalu, latou te le avatu ai, tau lava o le tufaaga o ana afioga ua tofia mai e ia mo le fanauga a tagata, e tusa ma lo latou gauai ma filifiliga ia te ia’ (Alema 12:9).

“Sa ou faalogo ia Peresitene [Marion G.] Romney o fautuaina peresitene o misiona ma o latou faletua i Sineva. “Ou te le faamatala atu mea uma ua ou iloa. Ou te le’i faamatalaina lava i lo’u toalua mea uma ou te iloa, aua ua ou iloa afai ou te tautala ma le lē manatu mamafa i mea e paia, o le a le toe talitonuina a’u e le Alii.’

“Ou te talitonu, e tatau ona tatou tausia nei mea ma manatunatu loloto i ai i o tatou loto, e pei ona ta’ua e Luka le mea na faia e Maria i mea paia na tutupu e uiga i le soifua mai o Iesu. (Tagai Luka 2:19.)” (“That All May Be Edified” [1982], 337).

O mea uma e sa ma paia, e tatau ona faaalia ma aumai faatasi i lenei tisipenisione faaiu ma le sili ona matagofie. O le Toefuataiina o le talalelei, le Ekalesia, ma le perisitua a Iesu Keriso, ua i o tatou lima se faleteuoloa e toetoe a lē mafaamatalaina o mea paia. E toetoe o se faamanuiaga ua matua maoae naua ua tatou tauaveina nei, i se taimi ma nofoaga na moemiti ma moomoo i ai perofeta ua mavae, ia oo mai ai faamanuiaga ofoofogia i o tatou olaga. E le mafai ona tatou lē amana’ia pe tuu foi e se’e ese atu.

Nai lo lou aga’iga’i atu ina faatalalē, ia faateleina le atoatoa o le usiusitai i lou olaga. Ou te faamoemoe o le a e manatu ma lagona, ma fai ou lavalava, ma au taga i ala e faaalia ai lou migao ma le faaaloalo i mea paia, o nofoaga paia, ma sauniga e paia.

Ou te tatalo ia toto ifo i lou agaga e pei o le sau mai le lagi se lagona o le paia. Ia faalatalata atili atu ai oe ia Iesu Keriso o lē na maliu, o lē na toetu, o lē o soifua, o lou Togiola ia. Ia faapaiaina oe e Ia aua e paia o Ia, ina ia mafai ai ona e nofo i Lona malo ma e le toe ulufafo ai. (Alema 7:25). I le suafa o Iesu Keriso, amene.