O LE FAAMANUIAGA O LE GALUE Elder David E. Sorensen O Le Au Peresitene o le Au Fitugafulu Faeasaite a le CES mo Tupulaga Talavou Matutua 6 Mati, 2005 Brigham Young University Ou te fia faafetai atu i taitai perisitua uma ma o latou faletua, o e ua mafuta mai ma i tatou i lenei afiafi. E faapitoa la’u faafetai ona o loo susu mai foi Elder ma Sister Cecil O. Samuelson. O se faamanuiaga tele lo matou galulue faatasi ai ma Elder Samuelson i le Matagaluega o Malumalu i le tele o tausaga. E mafai ona ou faamautinoa atu i le au aooga i le Iunivesite o Polika Iaga, faapea foi faiaoga, ua faamanuiaina i latou i lalo o le taitaiga tamaoaiga a Peresitene ma Sister Samuelson. I le po nei, a o ou mafaufau i se mea ou te manao e tautala atu ai, sa ou manatua, o le toatele lava o tupulaga a le Ekalesia o le au aooga. Ae o le mea moni lava, a’u uo talavou pele, o i tatou uma lava o le au aooga o le talalelei, e le sa’o? Sa i ai se tagata sa faigaluega i le Matagaluega o le Tupe a le Iunaite Setete. O lana galuega o le suesueina lea o mataupu e aofia ai tupe taufaasese. Sa matua lelei tele o ia i lana galuega, ma e na o na ia tilotilo vave lava i se tupe pepa ona mafai lea ona ia iloa pe o se tupe moni pe o se tupe taufaasese. I se tasi afiafi i se fonotaga ma le au faasalalau, ina ua uma ona ia faailoa mai se vaega autu o tagata e faia tupe taufaasese, sa fai atu se tasi o le au fai lipoti ia te ia: “Ai se tele o ou taimi e te suesue auiliilia ai tupe taufaasese fua i le matua faigofie tele ia te oe ona e iloa.” O lana tali atu i ai, “E leai, ou te le suesueina lava ni tupe pepa taufaasese. Ou te faaaluina lo’u taimi e suesue auiliili ai tupe pepa moni; ona faigofie ai lava lea ona iloa le mea e faaletonu.” E faapena foi i le talalelei, uso e ma tuafafine pele. Ua tatou i ai iinei e aoao atu le talalelei a Iesu Keriso. E le manaomia le suesue o le mea taufaasese, aua ua ia te i tatou le upumoni. A outou aoaoina le Ekalesia moni ma tuu le Agaga e galue i totonu ia te outou, o le a outou maua tali ma iloa ai ona tali atu i tulaga eseese tou te feagai. Sa faasoa mai e se faifeautalai talavou le manatu lenei, e faatatau i le Tusi a Mamona, lea ua ou faamaonia i le tele o tausaga: Manatua e le o tofotofoina le Tusi a Mamona—o tatou. O le afiafi nei, ou te fia tautala atu ai e faatatau i le mataupu faavae aupito taua i le talalelei atoa. Ou te tautala atu i le aoaoga faavae, o le galue. Ou te faamoemoe, o le a fesoasoani mea o le a ou tautala atu ai, e taialaina ai lou lumanai faapea foi le galuega o loo e faia i le taimi nei po o le lumanai foi. O outou ua faauu mai i aoga maualuluga po o kolisi, pe ua faigaluega foi, atonu tou te fesili ifo ia te outou lava i ni fesili faapea pe a talosaga mo se galuega, “O a o’u itula faigaluega? O a nisi penefiti ou te maua? O a aso malolo o le a ou malolo ai? Mata e lava se taimi matou te tafafao ai ma a’u uo ma fai mea ou te fiafia i ai?” Ae ui o lea, o fesili faapenei, afai e te taula’i atu i taimi paganoa ma mea e fiafia i ai nai lo itula faigaluega, e ono punitia ai oe mai le iloa atu o se avanoa e sili atu. Galuega a le Atua O le galue o se mataupu faavae e faavavau. O ai e te iloaina ua ia te ia oa uma o le lalolagi ma isi mea, ae o la lava e galue? O lo tatou Tama Faalelagi! O ia o se tagata galue. Ua faaalia mai ia i tatou e lo tatou Tama Faalelagi ma Iesu Keriso e ala i a La’ua faataitaiga ma aoaoga, e taua le galue i le lagi faapea foi le lalolagi. Sa galue Ieova e foafoa le lagi ma le lalolagi. Sa ia faapotopotoina le vai i se tasi itu, ae faaaliali mai le laueleele matutu. Sa ia faia le la, o le masina, ma fetu. Sa ia faia meaola uma i le sami ma le laueleele. Ona tuuina ai lea o Atamu ma Eva e le Tama, i le laueleele la te tausia ma vaaia, ma pulea isi meaola. (Tagai Kenese 1:1–28.) Ae e lei uma ai i le foafoaga la La’ua galuega. I le Penina Tau Tele ua tatou faitau ai, “O la’u galuega lenei ma lo’u mamalu—ia faataunuuina le faaofuina o le tagata i le tino ola pea ma le ola e faavavau” (Mose 1:39; ua faaopoopo le faatusilima) Ioe, o lenei mea e aofia ai tagata uma, o tamaitai, ma tamaiti. Mai mea uma lava e mafai ona popole i ai o Ia, sa filifili lo tatou Tama Faalelagi e galue mo le manuia o o tatou agaga e faavavau—o o outou agaga ma lo’u agaga. Sa fetalai Iesu, “O loo galue lo’u Tama e oo mai i le aso nei; o loo galue foi au” (Ioane 5:17). Sa ia fetalai mai foi, “E tatau ona ou faia galuega a lē ua auina mai a’u” (Ioane 9:4). O Le Galue o se Faamanuiaga E i ai fo’i lau galuega ma la’u galuega e tatau ona faataunuu. O le a faaosoosoina i tatou e Satani ia tatou talitonu, e le taua le tatou galuega, po o le faapea foi e le moomia ona tatou galulue. E sese o ia i na mea uma. E moomia ona tatou galulue. Ua ia te i tatou se tiutetauave e saunia mea tatou te manaomia, faapea foi manaoga o o tatou aiga. O lenei aga masani o le faalagolago o le tagata ia te ia lava, o le ala lava lea a le Alii talu ona tuua e Atamu ma Eva le Faatoaga o Etena. Sa fetalai atu le Alii ia Atamu, “e te ‘ai foi au mea e ‘ai ma le afu o ou mata” (Kenese 3:19). Sa galulue Atamu ma Eva i le fanua ina ia mafai ona la maua mea la te manaomia faapea foi mea e manaomia e a la’ua fanau (tagai Mose 5:1). Peitai, o le saunia o mea mo i tatou lava e le na o le pau lena o le faamoemoega o le galue. A faapea ua tuuina atu ia te oe se tinoitupe tele, pe o le a lava se mafuaaga ua te’i ai ua vave tele au tupe. Tusa lava pe o le a, e le faapea ua aveesea ai le poloaiga ia galulue. Na fetalai le Alii i le nuu o Isaraelu, “O aso e ono e te galue ai” (Esoto 20:9). Na te lei tuuina i ai se tuusaunoaga i lena poloaiga mo i latou ua lava ma totoe a latou mea! E pei ona faamatala mai e Elder Neal A. Maxwell, “O le galue o se tulaga faaleagaga e moomia pea lava pea tusa pe le moomia e nisi i le tulaga tau i le tamaoaiga.” (i le Lipoti o le Konafesi, Ape. 1998, 50; po o le Liahona, Iulai 1998, 43). O le galue e le o se fetuu ae o se faamanuiaga; o le galue e le gata ina tatou usitai ai i le poloaiga a le Atua ae e mafai ai e i tatou ona auai i le alofa lavea’i o le Atua. Ua fetalai mai le Faaola, “Afai tou te alolofa mai ia te au, ia outou tausi mai i a’u poloaiga” (Ioane 14:15). O lea sa faamanino mai ai e Keriso, afai tatou te alolofa atu ia te ia ma mananao e mafuta ma ia, e tatau ona tatou usitai i ana poloaiga, e aofia ai ma lena uluai poloaiga ia Atamu ina ia galue. Ua ta’u mai e le Alii i le Au Paia o Aso e Gata Ai i le amataga o le Toefuataiga, “O lenei, o a’u le Alii, ua ou le fiafia i e nonofo i Siona, aua o i ai e [nofonofovale] ia te i latou” (MFF 68:31). E faapena foi i le seneturi e 20, sa saunoa ai Peresitene Heber J. Grant, o se perofeta a le Atua, “E tatau ona faamamaluina le galue e avea ma mataupu faavae e faafoe ai olaga o tagata o la tatou Ekalesia” (i le Conference Report, Oct. 1936, 3). Pe ua e mafaufau ea i le mea e tupu pe a na le galulue tagata? Mafaufau i ai mo sina minute. Mata e tino mai a tatou aoga? Mata e gaoioi le tatou malo? Mata e i ai ni polokalama televise? E ui lava o nisi taimi tatou te mafaufau ai e manaia pe ana faapea tatou te maua tupe uma tatou te mananao ai, ma tatou te le toe faigaluega, ae e mafai ona ou faamautinoa atu ia te oe, e le o le ala lena i le fiafia moni. O nisi o tagata e sili ona faanoanoa ua ou feiloai i ai, o i latou na ua le mafai ona galulue mo le tele o taimi ona o ni mafuaaga. O le galue o se tiutetauave faaleaiga. Ou te iloa o nisi o outou ua nonofo ese mai i aiga. Ou te fia faamanatu atu, o le taimi nei, o loo faamanuiaina oe mai galuega a lou aiga. Sa galulue punoua’i ou matua ina ia e maua ai se olaga solo lelei faaletino, faaleagaga, ma faalelagona. Latou te le faamoemoe lava i se tasi tagata na te tauaveina lena tiutetauave mo i latou. Ua latou faamoemoe ia te outou ia tauaveina se vaega o le avega. Ina ua ou auai i le faauuga o lo’u atalii mai le Aoga Faapisinisi i Harvard, sa faatonu e le Faufautua o Kim Clark, o se uso o le Ekalesia, ia tamaiti faauu taitoatasi sa ofu o latou ofu faauu ma nonofo i le pito i luma, e faliu i tua ma tilotilo i e pele ia i latou. Sa tu le Faufautua o Dean Clarke ma faapea atu, “A na leai le lagolago a o outou aiga, semanu tou te le mauaina lenei mamalu i le aso.” Ma e faapena foi ia te outou taitoatasi. Ua tele mea ua outou maua. E i ai foi le taimi, e faamoemoe mai ia te outou—e manaomia ai—ona outou tuuina atu foi lea o lena lagolago ma le alofa i a outou lava fanau ma aiga. E le faapea la, (pe a faaaoga le anaga o le taimi nei) o le a faifai ai pea lava le “tafafao.” A o agai ina outou matutua, e faamoemoe o outou matua tou te saunia mea mo outou lava ma ia outou tutoatasi. Tatou te taufai fefaasoaa’i i le galuega. Manatua e taua le vave amata i le olaga ona aoao lau fanau, e tatau ona faia la latou vaega i galuega a le aiga. O i latou ua oo i le tulaga o le ola a’e i se aiga sa aoao ai outou e galulue, e mafai ona molimau atu i lona aoga i lou olaga i le taimi nei. O le Aso Tofi lava na te’a nei, sa saunoa mai ai Elder Samuelson ia te au, e ese lona faafetai i le aoaoina o ia e lona tama e galue, faapea foi le aoaoina o lona toalua e ona matua ia galue. I le mamao tatou te gafatia ai, e ao i tagata o le Ekalesia ona latou faia le mea sili e saunia ai mea masani e manaomia mo le olaga—meaai, lavalava, ma fale mo o latou aiga. Tatou te malamalama, e i ai nisi atunuu o le lalolagi, atonu tou te feagai ai ma faigata pe a taumafai e saunia mea mo o outou aiga. O ia faigata e mafai ona aofia ai ma’i tumau, o le maliu o se toalua, o le faaopoopo mai o se matua tausi, po o le faaaoogaina o lau fanau. E silafia e lo tatou Tama Faalelagi aiga i tulaga nei. O lo’u talitonuga maumaututu, Na te tuuina atu ia i latou le malosi e faaauau ai pea. O le a Ia faamanuiaina pea lava i tatou pe afai tatou te fesili atu ia te Ia i le faatuatua. O Le Galue o se Tautua O uiga lelei e faaalia i le galue, o amio masani, ma tomai, e aoaoina mai i aafiaga manuia o le galue. Se’i ou faapupulaina atu. I le lotoamanu sa ou ola a’e ai, e tatau ona tatau susu o povi i aso taitasi a o lei malamalama pe po foi. E le afaina pe o se Aso Sa po o le Kerisimasi po o se isi lava aso. E le afaina foi pe malulu. E le afaina foi pe fulū se isi. E le afaina foi pe susulu le la pe matamataita se afa kiona. O taeao uma ma afiafi, o le mea lava e tasi—e tatau lava ona tatau susu o povi. A o lei tofia o’u uso e o i le taua, o latou lava sa tele ina tatauina le susu. Ae i le 1943, ina ua faatoa 10 o’u tausaga, ou te alu atu ai i le papovi, pe tusa ma le 10 i le 12 povi o loo faatalitali mai ou te alu atu e tatala le fale taususu e o i ai. E masani ona tauvalaau atu lo’u tina ma lo’u tama i povi, “Talofa. Ua fiafia foi e vaai atu ia te outou!” Ou te fia ta’u atu, a o ou talavou, e lei faapena so’u lagona i povi. A uma ona tatau le povi e tasi, ona ou sasaaina lea o le pakete susu i totonu o le tane e 10-kalone [le tele]. O tane taitasi, e tusa ma le 80 pauna le mamafa pe a tumu. O iina sa falōlō ai o’u musele mu’amu’a, a o o’u la’uina i le auala e faatali ai le taavale e piki ai. E tele lava ina fesoasoani lo’u tama ia te au i le tatauina o povi, ae seāseā fesoasoani mai Tina. Ou te manatua sa fai pea lava e lo’u tama ma lo’u tina le tatauina o le susu seia oo ina ua toeitiiti atoa lo la ta’i ivasefulu tausaga. Ae e lei tatauina e Tama le susu ona faapea o ia e tatau ona faia; sa ia faia aua e tatau ona tatau le susu. O loo i ai se eseesega. Ia te ia, o nei manu ua le na o ni povi—O Big Blackie ma Bossie ma Sally ma Betsy. Sa manao ia fiafia i latou. O lana lava tala fai mai, o povi fiafia, e maua mai ai le suasusu lelei. O le manatu o lo’u tama, o le tatauina o povi—i lona faatauvaa e pei ona foliga mai ai—e le o se matafaioi; ae o se avanoa. O le tatauina o le susu e le o se galuega mo ia; ae o se tautua. O lea filosofia, o se mea sa fesoasoani ai ia te au ao ou tuputupu ae. Sa fesoasoani ia te au ou te iloa ai, e mamalu galuega faamaoni uma. I ni nai tausaga, sa ou iloa ai, o le faia pea lava pea o nei feau, sa amata tonu ai ona ou maua se lagona o le mautinoa ma le malosi. Sa ou mitamita i la’u galuega. Sa ou iloaina e leai lava se tasi e mafai ona faia se mea ou te manatu faatauvaa ai i le galuega sa ou faia. E pei ona ta’ua e Elenoa Roosevelt, “E leai se tasi e mafai ona faia se mea e te maua ai se lagona faatauvaa e aunoa ma lou malie i ai.” (“Points to Ponder,” Reader’s Digest, Feb. 1963, 261). E te pulea ou lava uiga, aemaise—outou na tupulaga talavou—i ou uiga faaalia i le galue. E tautuaina lelei oe e lou lava lagona mautinoa ma le malosiaga—i totonu o le potuaoga, i le Magaala o Setete po o le Magaala o Wall [po o soo se mea lava]. Nai lo le mafaufau i a tatou galuega i aso taitasi faapea o se avega mamafa, e ao ona tatou mafaufau i ai o se avanoa. O le auala tonu lena sa aoao ai a’u e lo’u tama ia ou lagonaina mo povi. O loo tumau pea na aoaoga ia te au i lo’u olaga atoa, ma o loo ou asiasi pea lava foi i le lotoamanu i le tele o taimi e mafai ai. Mafaufau i ai. Afai ua maua e lo’u tama se faamoemoega i ni nai povi, o le mea moni e mafai foi e i tatou taitoatasi ona maua se faamoemoega i a tatou galuega. Aoao ia Fiafia e Galue O se tasi o ala sili ua ou iloa e fiafia ai i le olaga, o le aoao lea ia fiafia e galue. O lo’u toalua, o Verla, o se faataitaiga tonu lava lena. Sa amata ona faigaluega o ia mo Aunt Bertha, o le uso o lona tina, ae faatoa 10 ona tausaga, i le fufuluina o ipu ma faamama le fale. Talu mai lava lena taimi o la lava e galue. E eseese lava ituaiga o galuega sa ia faia i laasaga eseese foi o lona olaga atoa. Sa matua maoae lona tulaga faaleaoaoga, sa faiaoga i le vasega muamua mo ni nai tausaga, tausi le ma fanau e toafitu, tautua i le PTA, tautua i le au faatonu o aoga i le matou nuu, galue faamisiona, ua fiaselau lauga ua ia tuuina atu i le Lotu, ma sa i ai foi i le tele o au faatonu o alaalafaga, ma sa avea foi o se volenitia. O nisi o ana galuega, atonu e manatu le lalolagi o mea masani lava na mea e pei o le tausiga o le aiga toatele. O nisi o ana galuega, o le faaauauina lea o ana kosi mo faailoga maualuluga, ma o le taumafaiga sili atu faaleatamai ma faaleagaga o le aoaoina atu o le talalelei. Ae e pei lava ona masani ai, e le afaina pe o le a le galuega, ae na te faia i lona malosi atoatoa. E tele lona olioli i ana galuega. O ananei lava sa ia ta’u mai ai ia te au, sa ia moomoo ia faapei o Aunt Vera, ina ua 90 ona tausaga sa ia fai mai, e faamoemoe lava o le a mafai pea ona galue tusa lava pe o le a lona loomatua. O tagata e aupito sili ona fiafia ua ou iloa, o i latou e fiafia i a latou galuega—tusa lava pe o le a. Atonu tou te manatua le tala lenei, o loo faaalia ai le ala e mafai ai ona tele se eseesega ona o o tatou uiga faaalia i a tatou galuega. “Sa pasi atu se tagata malaga i se vilimaa i se tasi aso ma vaaia ai ni alii se toatolu o galulue. Sa ia fesili atu i alii taitasi pe o a a latou mea o fai. Sa faaalia i tali a alii taitasi uiga faaalia eseese i le galuega lava lea e tasi. “O lea ou te veteina maa,” sa tali atu ai le alii muamua. Sa tali le lona lua, “O lea ou te galue e maua ai a’u fasi auro e tolu i le aso.” Sa ataata le alii lona tolu ma faapea atu, “O lea ou te fesoasoani i le fauina o le fale o le Atua.” Manatua le faaupuga masani, “O ou uiga faaalia e iloa ai lou maualuga.” E tatau ona mafai ona tatou iloa ni mafuaaga se tele i lo tatou galulue. I soo se galuega faamaoni lava, e mafai ona tatou auauna atu ai i le Atua. Na saunoa le Tupu o Peniamina, le perofeta o sa Nifae, “Pe a i ai outou i le galuega a o outou uso, ua i ai outou i le galuega a le Atua” (Mosaea 2:17). Tusa lava pe o a tatou galuega ua na o le fesoasoani ai ia maua mea e manaomia mo o tatou aiga, o lena lava tatou te fesoasoani i fanau a le Atua. E le fiafia le Alii ia i latou e paie pe nofonofovale. Na Ia fetalai mai, “E leai se mea mo le faatalanoa [le tagata paie] i le ekalesia, se’i iloga na te salamo ma faaleleia ona ala” (MFF 75:29). Na poloai mai foi le Alii, “Aua e te paie; aua o le paie e le ‘ai i le areto pe ofu i ofu o le e galue” (MFF 42:42). Mai lava i uluai aso o le Ekalesia sa aoao mai ai e perofeta ia le Au Paia o Aso e Gata Ai, ina ia tutoatasi ma ia mafai ona tausi e le tagata ia lava ma ia aloese mai le paie. O tagata moni o le Au Paia o Aso e Gata Ai, latou te le tuu atu fua lava i se isi tagata le avega o le tausiga o i latou. Ua tatau ona e faia se faaiuga iinei a’u uo talavou e, i le taimi nei lava, i le mea e te mafaia, i lou lava tulaga, o le a e faalagolago ia te oe lava i lou olaga atoa. O le toatele o outou tamaitai talavou ua avea nei o ni tina, pe o le a avea foi ma tina, ma e atonu o le a faamanuiaina i le tele o ni tausaga e nonofo ai i le fale e tausi le fanau. O isi o outou tamaitai atonu e le mafai ona avea ma tina, pe o outou foi o ni tina, ae le mafai ona nonofo i le fale i le aso atoa. Pe o le a lava le tulaga e te i ai, ou te uunaia outou uma o tamaitai talavou ina ia mulimuli i le fautuaga a le perofeta ma ia aooga i le mea e gata mai ai lo outou mafai. O le a’oga lava ia, e taua tele. O lau a’oga e te maua ai se lagona o le mautu, pe afai e te nofo i le fale e tausi le fanau. Afai foi e tatau ona taitai oe e lou lumanai ia e faigaluega totogi, o le a mafai i lau a’oga ona e maua ai se galuega e sili atu ona aoga ma faafiafia loto. O a tatou galuega e tatau ona i ai le faamaoni ma faia mo faamoemoega ta’uaogaina. E le fiafia lo tatou Tama Faalelagi pe a maua a tatou mea mai faiga faatiapolo po o faiga faapaie. Sa faaupuina e Peresitene Spencer W. Kimball e faapea: “E malosi lo’u lagona o i [latou] e taliaina tupe po o ni totogi ae latou te le tuuina atu i ai le taimi [talafeagai], o le malosi, faamaoni ma le auaunaga, ua latou mauaina ni tupe e le mama” (i le Conference Report, Oct, 1953, 52). E fai lava si malolosi o nei upu, a ea? Na ia toe faapea mai foi, o tupe e maua mai i faiga faatiapolo po o faiga faapaie, o le gaoi lea; o taaloga faitupe, e aofia ai le loto [lotto]; tupe po o mea e maua i auala pi’opi’o; faatauina atu o fualaau faasaina; faapologaina o tagata matitiva; ma mea faapena, o tupe eleelea. Sa faamalamalama mai e Peresitene Kimball le eseesega o le galuega faamamaluina ma le galuega faatiapolo: “O tupe mama, o le taui lea e maua mo se galuega faamaoni o le aso atoa. O le totogi talafeagai mo le tautua faamaoni. O le polofiti e fetaui lelei ma oloa e faatau atu, o uta o oloa, po o se galuega. O le tupe na maua mai i se fefaataua’iga e taufai manuia ai itu uma.” “O le matape’ape’a i tupe . . . o tupe . . . e maua i le gaoi ma le faomea . . . o taaloga faitupe . . . o pisinisi e tumu i le agasala . . . o le faatogafalea ma le . . . faatautala” (in Conference Report, Oct. 1953, 52). O aso nei, ua toatele i latou e ofoina atu tupe e faigofie ona maua, ma fautuaina atu ai auala vave e mau’oa ai ma faigofie le olaga. Tatou te faalogo i ai i taimi uma. O na ofo, o ni foliga taufaasese, ma o loo fautua mai pea lava pea ia perofeta ina ia aua nei gauai atu i faaosoosoga o “tupe e faigofie ona maua.” E le tatau lava ona lafoa’ia lo tatou tomai e faia faamasinoga poto, e faamasino ai le tulaga e ono lamatia ai ma le tulaga manuia e ono oo i ai i nisi o faatinoga, ma malamalama ai i le uiga sili atu o le olaga. I le lalolagi o galuega i aso taitasi, e toatele e le faigofie ona maua ni lagona faaleagaga, aua e loto i la le tino. Latou te taumafai e aloese mai ai. E maeu se tulaga mata’utia o le a i ai, pe afai e tuu i tatou e fesootai ma i latou o le a faatama’iaina lo tatou faaleagaga ona o galuega tatou te faigaluega ai, “aua se a le aoga i le tagata, pe afai na te maua le lalolagi uma, a e maumau ai lona ola?” (Mareko 8:36). Ua uma ona ta’u mai e le Alii ia te i tatou “e le talia e le tagata faaletino o mea a le Agaga o le Atua: aua o mea valea ia ia te ia: na te le mafai foi ona iloa, aua e faamasinoina faaleagaga” (1 Korinito 2:14). O le natura lava ia, e tatau ona tatou sailia ia paleni lelei le galue, malolo, ma le toafimalie. A le galue, e leai se uiga o le malolo ma le toafimalie. E i ai se faaupuga ua leva, “O le leai o se mea e fai, o le galuega aupito sili lea ona faigata i lo galuega uma.” E le gata ina mālie ma e tatau foi ona malolo, ae ua poloaiina foi i tatou ina ia malolo i le aso Sapati (tagai Esoto 20:10). Mo i latou e tausia le aso Sapati na folafola mai e le Alii, “o le atoatoa o le lalolagi e a outou ia” (MFF 59:16). Atonu ua silafia e nisi o outou sa ma nonofo ma Sister Sorensen i Asia mo ni nai tausaga. A o ma nonofo ai iina, sa ma faalogo ai i se faaupuga faapea, “Filifili se galuega e te fiafia i ai, ona e le tau galue lava lea i se aso i lou olaga.” O le vaega tele lava ou te talitonu o se mafaufauga faivavale. Ou te le manao e avatu se faamatalaga e le lelei. Ae o le mea moni lava ia, o le galue e le faapea o taimi uma e foliga faatosina mai ai. Ou te manatu o se faaupuga e sili atu ona talafeagai o le fautuaga lea a Peresitene Thomas S. Monson. Na ia saunoa, “Filifili po o ai e te alofa i ai; alofa i lē na e filifilia” (in Conference Report, Oct. 1988, 82; po o le Ensign, Nov. 1988, 71). Sa saunoa o ia e uiga i faaipoipoga, ae ou te fautua atu e faatatau foi lenei fautuaga i lau galuega filifilia. Filifili le galuega e te alofa i ai, ona e alofa lea i le galuega ua e filifilia. O le uiga o la’u tala, e toatele tagata e tamau lava o latou mafaufau faapea e tatau ona sili atu ona manuia a latou galuega, pe sili atu ona manaia, pe ua pasiā foi! A oo ina faigata le olaga—ma o le a faigata lava—ona amata ai lea ona latou mafaufau atonu e le o le mea tonu lea sa mafaufau e tatau ona i ai a latou galuega sa filifilia. Ua amata ona latou talitonu e lauusiusi atu le vao i le isi itu o le pa. O le a outou faalogo o faapea mai tagata nei, “A na ou filifili e aoao le faafomai ae le o le tulafono, semanu ua avea a’u ma se fomai maoae.” Pe faapea foi, “Maimau e pe ana ou faigaluega i le galuega taua lea. A na faapea ou te Pule e pei o ia, semanu ua ou matua galue malosi ma fai faalelei tagata ma ou manuia ai.” O tagata e le mafai ona suia pe fetāla’i foi o latou mafaufau, e tele lava ina faigata ona ausia se tulaga maoa’e i soo se galuega. E alolofa naunau i se galuega, ae le fiafia i ni nai mea faatauvaa ma le faavalea ma i’u ai lava ina faamavae ina ia tulitulimata’i ai a latou miti faivavale i talaatu o le isi tafa’ilagi. Latou te tafetafea atu mai lea galuega i lea galuega, e le umi se taimi e mau ai [i se galuega] e mafai ai ona ausia moni le tulaga silisili maualuga. (Afai e i ai nisi o outou ua faaletonu ni lagona i a’u faamatalaga, ou te valaau atu ia outou salamo.) A e filifilia loa lava lau galuega, alofa loa i ai! E leai lava se galuega e atoatoa. E tofu lava galuega ma luitau ma ona foi aso o galuega mamafa. E pei lava foi o le faaipoipoga, o le manuia ma le tulaga silisili maualuga i lau galuega e ono manaomia ai ni tausaga se tele o taumafaiga faamaoni ma le finafinau. Sei ou tuuina atu se faataitaiga. O Michelangelo, o le valiata ma le vane faatagata e maoae lona tomai, sa ia faasoa mai le malamalama maoae lenei e uiga i lana galuega. Na ia fai mai, “Pe ana fai e iloa e tagata lo’u galue malosi ina ia maua lo’u tomai, semanu e le matua ofoofogia tele naua.” Atonu ua vaaitino nisi o outou i galuega matagofie a Michelangelo. Ae toafia i tatou ua nonofo ma mafaufau i le faasoloatoa o lona galue ai, ma tiga ai le papatua i le tofiina o le faatagata o Tavita mai se poloka maa tioata mao’i! Ma fatuina ai se faatagata e 14-futu o Tavita! Ma o le mea moni foi o Tavita e le o le faatagata vane muamua lea a Michelangelo. E le taumateina lona tauivi ma le galue malosi i le faiga o le fia selau afe o faatagata vane, a o lei ausia e ia lena galuega sili ona maoa’e. Mata e le mata’utia—pe ana tonu ia Michelangelo ina ua mae’a ni nai tausaga o le matua’i matautia o le vaneina o le maa, ma faapea ai ua faigata tele, e matua le manaia lava ma lē mālie—ua sili ai ona avea ma se tusitala? E le taumate foi, a na faapea na te faia lena suiga, semanu na te iloa ai e mafai foi ona lē manaia ma lē mālie le tusitusi ia! O le a sili atu ona manuia pe afai e te finafinau pea ma le naunautai i lou galue ai, tusa lava pe o a faaletonu e tula’i mai i lau galuega, ma tusa foi pe o a “mea iti ma le faatauvaa” e tulai mai i aso taitasi. Ia taulai atu i le galuega o loo e faia, ae tetee i faaosoosoga o mata autilotilo solo. O le mea moni, ou te le fefe lava e faapea atu e le afaina tele pe o le a le galuega e te filifilia. Ou te folafola atu ia te oe, afai e te tumau ai ma tulimata’i atu i le tulaga silisili maualuga o lau galuega na filifili, o le a e matua olioli i se faamanuiaga tele ma o le a i’u ina e alofa i lau galuega e sili atu nai lo le mea atonu sa e mafaufau i ai. O Upu Apoapoa’i Se’i ou faaopoopo atu nai nisi upu apoapoa’i. Muamua, galue malosi ina ia outou felagolagoma’i ma isi. Ia avea oe ma se vaega o le faaiuga, ae le o se vaega o le faafitauli. Ioe, ia avea o se sulu, ae le o se faamasino. Ua faatele ona faamaonia e suesuega, e le masani ona aveesea mai tagata a latou galuega ona o le le lava o le silafia e manaomia po o tomai. E masani lava, o le faigata ona o le le mafai ona latou felagolagoma’i ma isi tagata. Ou te iloa atonu e le mafai ona e faamalieina tagata uma i taimi uma, ae e mafai ona e faamalieina le toatele o tagata i le tele o taimi—aemaise lava pe afai, o le tasi o na tagata o lou pule. Lona lua, manatua o tagata e seāseā ona faaleleia pe afai e na o le latou fuafaatatau po o le latou lava faamasinoga e fua ai i latou. E mafai ona ou faamautinoa atu ia te outou e tele atu mea na faaleleia i lo’u olaga ma la’u pisinisi ona o faitioga a isi, nai lo mea na maua mai i a latou upu faaviivii. Aoao e fua oe i nisi taimi i se fua po o se faamasinoga a se isi tagata. Afai e fai atu lou pule e vave tele ona oso lou ita, ia e mafaufau mamafa i ai. Afai e fai atu lou toalua, e vave tele ona oso lou ita, ma fai atu foi au uo e vave tele ona oso lou ita, o lona uiga e foliga mai e te itaitagofie tele. A e faalogo i na ituaiga o manatu, faalogo ae e te lei faafitia. Tago e iloilo. Mafaufau i ai. Pe e te manatu ea ua tatau ona fai ni suiga? Pe o a lava faitioga, aoao ia fegalegalea’i lelei ma tagata. Afai e te manao tou te fegalegalea’i lelei ma i latou, e te mafaia. Lona tolu, vaai i le itu lelei. Aua e te faalotolotolua aemaise lava pe a faasagasaga tonu atu ia te oe. Aua nei e taliaina ni faamatalaga faalotolotolua e uiga i lou Tama Faalelagi. Mafaufau i le mea na mapuna mai ai—e mai ia Satani. Aua nei e taliaina ni faamatalaga faalotolotolua e uiga i taitai o lenei Ekalesia po o le Ekalesia lava ia. E manaomia le galue e teena ai savali a Satani, ae o lena galuega o le a tau atu i le fiafia. O se upu mo faifeautalai ua mae’a misiona, aua le tia’ia mataupu faavae, po o mea sa masani ai, po o aafiaga sili sa outou aoaoina mai i le misiona. Aua le tia’ia ou foliga vaaia [sa i ai i le misiona]. E le o faamoemoe le Usoga e fai sou fusiua ma sou ofutino paepae ma sou suti lanu paauli, i le taimi nei i le aoga, peitai e tatau ona e faatumauina lou tulaga mama sa e aoaoina i le misiona. Laei faalelei mo lou lelei! A oo ina atagia mai i ou uiga masani faaletagata lou tumama, mamalu, ma mataupu faavae o le talalelei sa e aoao atu a o avea ai ma se faifeautalai talavou, o le a aoga tele ia te oe i le mea e te faigaluega ai. Aotelega O la’u savali i lenei afiafi, e mafai ona aotele i ni faamatalaga se lua. Muamua, e mai ia Peresitene Tavita O. MaKei. Na ia saunoa mai, “Ia tatou iloa o le avanoa e galue ai o se meaalofa, o le malosi e galue ai o se faamanuiaga, ma o le fiafia e galue o le manuia lea” (Pathways to Happiness, [1957], 381). O le lona lua, e mai i lo tatou perofeta soifua pele, o Peresitene Gordon B. Hinckley. Na ia saunoa mai: “O galuega autu o le lalolagi e le faia e le au atamamai. O loo faia e tagata lautele, o loo paleni o latou olaga, o ē na aoao ina ia galulue i se tulaga ofoofogia” (Our Fading Civility, Brigham Young University inauguration and spring commencement exercises, Apr. 25, 1996, 15). O le a i ai foi se le fiafia ma se lotovaivai i le ala, uso e ma tuafafine. Ua faamafanafanaina i tatou e Orson F. Whitney: “E leai se tiga tatou te feagai, leai ni tofotofoga tatou te oo i ai, e maimauina. E aoga tatou te aoao ai, e atiina ae ai uiga taua, e pei o le onosai, faatuatua, malosi ma le lotomaulalo. O mea uma tatou te mafatia ai ma mea uma tatou te onosa’ia, aemaise pe a tumau ai ma le onosa’i, e fausia ai o tatou uiga, e faamama ai o tatou loto, e faalautele ai o tatou agaga, e atili ai ona agamalu ma agaalofa, e atili ai ona agavaa e ta’ua o fanau a le Atua. O le faanoanoa ma mafatiaga, o le galue ma faigata, e maua ai o tatou a’oa’oga ia na tatou o mai iinei ia maua, ma lea e avea ai i tatou ia faapei o lo tatou Tama ma le Tina i le lagi” (sii mai i le Spencer W. Kimball, Faith Precedes the Miracle, [1972], 98). O a’u o se auauna faatauvaa a le Alii, ou te folafola atu ma faamanuia atu ia te oe, a e galue e tausia tulaga o le Alii ua tuuina mai i tusitusiga paia ma Ana perofeta, a e suesue, a e tatalo, a e totogiina au sefuluai ma taulaga mai tupe sa maua mai i lau galuega, o le a atili ai ona e manuia i lou olaga atoa, faapena foi i au galuega i aso taitasi. O le a avea oe o se tagata galue e sili atu. O le a atili ai ona fua mai lou tagata faigaluega. O le atili ai ona mataalia lou tagata faigaluega. E mafua nei mea uma ona o le a i ai le agaga o le Alii ia te oe, ma fesoasoani ia te oe, ma faamalosi ia te oe. Ou te ta’uina atu alofaaga mai lo tatou perofeta pele, o Peresitene Hinckley. E lei leva tele atu, i se saunoaga i le au paia o lana siteki, sa saunoa ai Peresitene Hinckley e faapea, “O nisi taimi tatou te manatu ai ua faaletonu tele ae leai . . . . E tele o’u lagona lelei e faatatau i lenei Ekalesia. E tele foi o’u lagona lelei i le autalavou o lenei Ekalesia. E le tatau ona tatou atuatuvale. E leai se mea tatou te atuatuvale ai, afai tatou te ola i le talalelei, a faavae a tatou faaiuga i le malamalama o le talalelei, afai tatou te tootutuli ma tatalo atu i le Alii mo Lana faamalamalamaga, poto, taitaiga ma le lototele, e le tatau lava ona tatou atuatuvale.” O lea a’u uo talavou pele i lenei po, ou te fia tuuina atu la’u molimau ia te outou i le aso. Ou te talitonu i lenei Ekalesia. Ou te talitonu ia Iesu Keriso. Ou te talitonu i mea ua Ia fetalai mai ai. Ou te talitonu ina ua ia fetalai atu ia sa Nifae, “Na ou faia le lagi, ma le lalolagi, ma mea uma o i ai. Sa ou faatasi ma le Tama talu le amataga” (3 Nifae 9:15). Ou te iloa o Ia o le Alo o Elohima, le Tama na faia Atamu ma Eva. Ou te iloa, a’u uo talavou pele, o Ia, o le Alo, na fanau mai ia Maria i Peteleema i Iutaia. Ou te iloa Lona fanau mai e pei ona ta’ua e Mataio, i ona po o Herota le Tupu. Na fetalai Iesu Keriso, “O a’u nei o le Malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola” (Ioane 8:12). Ou te talitonu ia Iesu Keriso ina ua Ia fetalai, “Ai se tausi i la’u upu, e le iloa e ia le oti, e oo i le faavavau” (Ioane 8:51). Ou te iloa o Ia ma Lona Tama sa faaali atu i le taulealea perofeta o Iosefa Samita. Ou te iloa e mafai ona fesoasoani Iesu Keriso ia i tatou taitoatasi i a tatou galuega, pe afai o le a tatou fesoasoani ia te Ia i Lana galuega. “Aua e tusia igoa o e amiotonu i le tusi o le ola, ou te avatu foi ia te i latou le tofi i lo’u itu taumatau. O lenei foi, o’u uso e, se a sa outou e finau mai i lenei mea? Ou te fai atu ia te outou, afai tou te finau i ai e le afaina lava ia, aua e ao ina faataunuuina le afioga a le Atua” (Alema 5:58). Ou te iloa ma molimau atu o loo i ai so tatou perofeta soifua, o Gordon B. Hinckley, o lē e mafai ona fesoasoani ia te i tatou pe a tatou manaomia sana fautuaga. O outou, a’u uo talavou pele, o le faamoemoega o lenei Ekalesia. O outou o le faamoemoega o nuu ma alaalafaga o loo outou nonofo ai. O le a avea outou ma taitai i le lumanai o lenei Ekalesia, o taitai o le lumanai i alaalafaga, ma le lalolagi. Ou te tuuina atu la’u molimau ma le lotomaulalo, afai o le a outou galulue mo lo tatou Tama Faalelagi ma Lona Alo o Iesu Keriso, o le a La puipuia ma tausia outou i aso uma o lo outou ola. Ma ou te molimau atu ai i Lona suafa paia, o lo tatou Alii, lo tatou Togiola, lo tatou Faaola, o Le Paia o Isaraelu, o Iesu Keriso, amene.