Ko e Tui mo Ngāue ʻi ha Māmani Taʻe Lotu

Pīsope Keith B. McMullin

Tokoni Ua ʻi he Kau Pīsopeliki Pulé

Faeasaiti ʻa e CES maʻá e Kakai Lalahi Kei Talavoú 5 Nōvema, 2006 • ʻUnivēsiti Pilikihami ʻIongí

Pīsope Keith B. McMullin ʻE hoku ngaahi tokoua mo e tuofāfine, ko ha meʻa fakatupu loto fakatōkilalo ke mamata atu kiate kimoutolu, kuo mou haʻu mei he ngaahi hala kehekehe ʻo e moʻuí pea mo e ngaahi tapa kehekehe ʻo e fonuá. ʻOku ou fakakaukau ki he ʻetau fakatahataha mai he efiafí ni ʻi he ngaahi feituʻu ʻi he funga ʻo e māmaní. ʻI he taimí ni ki hono toe fakamafola atu ʻo e polokalama ko ʻení, ʻe fakatahataha mo kau fakataha mai ai e kakai lalahi kei talavou kotoa ʻo e Siasí ʻi ha polokalama peheni. ʻOku fakaofo moʻoni ia.

Naʻe hoko ha meʻa nāunauʻia moʻoni ʻi he konifelenisi lahi ʻo e māhina kuo ʻosí. Naʻe ʻikai fakatokangaʻi ʻeni ʻe ha tokolahi ʻi māmani ka kiate kinautolu ʻoku nau ʻiloʻi mo ‘ofa he moʻoní pea ʻofa aí naʻe fakangalongataʻa ia ʻo hangē ko e longoaʻa ʻa e pā ʻa ha ngaahi mana ʻe 10,000.

Fakafoki angé hoʻo fakakaukaú ki he fakatahaʻanga fakaʻosí. Naʻe hivaʻi ʻe he Kuaea ʻa e Tāpanekalé ʻa e fasi ko ʻení ʻa ia ʻoku tau maheni lelei mo ia:

[ʻOku mau fakamālō atu ʻe ʻOtua, koeʻuhí ko ha palōfita
Ke tataki ʻa kimautolu he ngaahi ʻaho fakaʻosí ni.
ʻOku mau fakamālō hono foaki mai ʻo e ongoongoleleí
Ke fakamaama homau ʻatamaí ʻe hono maama ngingilá.]¹

Naʻe fakafokifā ʻa e tuʻu ki ʻolunga ʻa e kakai tangata mo fefine, ʻa e fānau tangata mo e fānau fefine kuo nau fakatahataha hake ki he Senitā Konifelenisí ʻi he ongoʻi ʻo e ʻapasia mo e loto fakafetaʻi koe'uhi ko e ngaahi tāpuaki ko ia ne leaʻaki ʻi he himi ko ʻení. Naʻa tau tuʻu ʻo fakahā ʻi he loto fakafetaʻi ʻa ʻetau ʻiloʻi kuo toe fakafoki mai ʻa e ongoongolelei ʻo Sīsū Kalaisí, naʻe folofola mai ʻa e ʻOtua ko e Tamaí mo Hono ʻAlo ʻOfaʻangá mei he loto langí, ko Siosefa Sāmitá ko ha palōfita ia, pea ko Palesiteni Kōtoni B. Hingikelī ko e palōfita ia ʻa e ʻEikí ʻi he māmaní he ʻaho ní.

Ko ha ongo fakalaumālie ia. Ko ha taimi ia naʻe tuʻu hake ai ʻa e kakai ʻo e puleʻanga ʻo e ʻOtuá ʻi hono ueʻi kinautolu ʻe he mālohi ʻo e Laumālie Māʻoniʻoní ʻo fakahā ʻa ʻenau tuí!

Naʻe meʻa ʻa Palesiteni Hingikelī ki muʻa ange he ʻaho pē ko iá ʻi heʻene ongoʻi mo e loto fakafetaʻi fekauʻaki mo hono taʻu motuʻá pea mo e tuʻunga moʻui lelei naʻá ne ʻi aí. ʻOkú ne hoko ʻi he taimi kotoa pē ko ha faʻifaʻitakiʻanga ʻo e ngāue faivelengá, ko ia naʻá ne toe fakatapui foʻou ʻa ʻene moʻuí ke fakahoko e ngaahi ngāue ʻa e ʻEikí. Naʻá ne pehē:

“Kuo tuku mai ʻe he ʻEikí ke u moʻui; ka ʻoku ʻikai ke u ʻiloʻi pe ko e hā hono fuoloá. Ka neongo pe ko e hā hono fuoloá, te u kei hokohoko atu pē ʻi hono fai ʻa hoku lelei tahá ʻi he ngāue he lolotongá ni. . . .

. . . Te tau kei hoko atu pē ʻo fakatatau mo e finangalo ʻo e ʻEikí. . . . Ka hokosia e taimi ki hoku fetongí, ‘e fakahoko lelei pē ʻa e liliu ko iá ʻo fakatatau mo e finangalo ʻo e Tokotaha ʻoku ʻAʻana ʻa e Siasí ni. Ko ia ai te tau laka atu ki muʻa ʻi he tuí—pea ko e tuí ʻa e kaveinga ʻoku ou fie lea ai he pongipongi ní.”²

Naʻe fakahoko ʻa ʻene pōpoakí ʻi he taimi totonu pea ʻi he ueʻi ʻa e Laumālié. Naʻe fakahoko mai ia ko ha fakamanatu fakalaumālie ʻo e taumuʻa ʻo e moʻuí pea mo e founga ʻe lava ke ikunaʻi ai ʻe he fānau ʻa e Tamai Hēvaní ʻa e faingataʻa kotoa pē. Naʻe fakahoko mai ia ki ha māmani kuo fonu ʻi he taʻe lotú, taʻe tuí, pea mo e fai angahalá.

Poto Fakaēmamaní

ʻOku tokoni lahi ʻa e ako ki he ngaahi meʻa fakamāmaní ke toe lelei ange ai ʻa e māmani ʻoku tau moʻui aí. ʻOku tupulaki lelei taha ʻa e tuʻunga ʻo e ako ki he ngaahi meʻa fakamāmaní ʻi ha ʻātakai ʻo e angamāʻoniʻoni, ʻo e moʻui angamaʻa, moʻoni fakalaumālié pea mo e tuí.

ʻOku lahi hono fakalāngilangiʻi ʻo e ngaahi sosaietí he ʻahó ni koeʻuhí ko honau tuʻunga poto fakaemāmaní. ʻOku pōlepole ʻa e kakaí mo e ngaahi puleʻangá ʻi honau poto fakaemāmaní, ʻi he tuku ʻenau tokangá ki he “ngaahi meʻa ʻo e māmaní pe [ʻi he] ngaahi meʻa ʻoku ʻikai lau ko e meʻa fakalotu, fakalaumālie, pe toputapú.”³

ʻOku pehē tokua ʻe he konga lahi ʻo māmani he ngaahi ʻahó ni ʻoku mahuʻinga ʻa e poto fakaemāmaní ki he potupotutatau, ki he fakamaau totonu, pea mo e maau ʻa ha puleʻanga. ʻI heʻene peheé, ʻoku ʻikai ke nau poupouʻi hono fakahā ʻo e tui fakalotú ʻi he ngaahi fakatahaʻanga fakapuleʻangá, ʻoku fakafalala leva ʻa e ngaahi totonu fakapuleʻangá ki he ngaahi fakamāuʻangá mo e ngaahi founga fakalaó, pea vave pē ke fekumi ʻa e kakai tangatá mo e kakai fefiné ki he ngaahi founga fakalaó ke fakaleleiʻi mo fakatonutonu ʻaki ʻenau ngaahi palopalemá. Pea ʻi heʻene tōtuʻa ʻa e taʻe lotú ʻi he nofo fakasosaietí, ʻoku ʻikai ke nau fakatokangaʻi ʻe kinautolu ʻa e foʻi fakakaukau ko ia kau ki he moʻui taʻengatá ʻo nau fokotuʻutuʻu ʻa e meʻa kotoa pē ʻo fakatatau ki hono tuʻunga ʻi he māmaní, ʻo iku ai ki heʻenau ngāue taʻe ʻi ai ha tui.

ʻOku fie maʻu ke ʻi ai ʻa e tokanga mo ha ngāue lahi ke tau hoko ai ko ha kau tangata mo ha kau fefine ʻo e tuí ʻi ha māmani taʻe lotu. Ko e natula pē ia ʻo e tangatá ke ne “ʻuluaki kātaki, hili ko ia pea manavaʻofa, pea tali ”⁴ ʻi he taimi kuo lomēkina ai ʻe he ngaahi meʻa ʻo māmaní. Ko e ola ʻo e taʻe lotú ʻokú ne lomēkina ʻa e kakai ʻo e ʻaho ní.

ʻI he taʻe tui ʻa e māmani taʻe lotu pe anga fakakakano ko ʻení ko Kalaisi ʻa e Huhuʻi ʻo e faʻahinga ʻo e tangatá, ʻoku tupu mei ai ha kau tangata mo ha kau fefine “loto pōlepole, siokita, fakavahavahaʻa, fakafepaki, taʻe toe fakafalala ki ha taha, ʻo tataki pē kinautolu ʻe heʻenau ngaahi holí, ʻe honau uʻá [pea] mo e fakahīkihiki ʻa e māmaní . . . .ʻI hono fakakātoá, ko e tangata fakaekakanó ko ha tangata ia kuo teʻeki ai huhuʻi, ko ha tangata ʻoku ʻeveʻeva . . . ʻi he maama ʻo [ʻene] afi [ʻaʻaná] . . . [vakai, 2 Nīfai 7:10–11]. Kuo anga ʻa e tangata peheé ki he natula ʻo e ngaahi meʻa ʻoku ʻātakaiʻi iá, ʻo ne fakaongoongo ai ki he ngaahi meʻa ʻoku ʻoatu ʻe ha māmani kuo ʻi ha tuʻunga ʻo e hingá.”⁵ ʻOku fakamatalaʻi mahino ia ʻi ha ngaahi lea siʻi pē, “Ko e kakai ʻoku nau ʻi ha tuʻunga fakanatulá . . . ʻoku ʻikai te nau maʻu ʻa e ʻOtua ʻi māmani” (ʻAlamā 41:11).

Koeʻuhí ʻoku ʻikai faʻa tokangaʻi ʻa e ngaahi meʻa ʻo e taʻengatá ʻe he tuʻunga ʻo e poto fakaemāmaní, ʻe lava pē ke iku ai ki he taʻe tuí. Naʻe pehē ʻe ha palōfesa ʻo e ngaahi meʻa fakalotú ko Ulufihaati Panenipeeki ʻo e ʻUnivēsiti ʻo Miunikí:

“ʻOku hanga ʻe he ʻātakai ʻo e poto fakaemāmaní ʻo fakavaivaiʻi mo holoki ʻa e tui mālohi ʻa e kakai Kalisitiané ki he moʻoni ʻoku nau tui ki aí. . . .

“ʻOku aʻu ki he ngaahi ʻilo tefito ʻo e lotu faka-Kalisitiane ʻoku holoki māmālie ia ʻi he ʻātakai ʻo e poto fakaemāmaní. ʻOku ʻikai ke kei hoko ia ko hano taʻe tali pē ʻo e ngaahi akonaki faka-Kalisitiané; ʻoku tokolahi fau ha kakai ʻoku ʻikai haʻanau ʻilo ʻe taha ki he ngaahi akonaki ko iá. . . .Ko e lahi ange ʻene mafola ʻa e taʻe ʻilo ki he tui faka-Kalisitiané, ko e lahi ange ai pē ia ʻa e fakafepaki ki he tui faka-Kalisitiané. . . .

“. . . ʻOku fakautuutu ange ʻa e faingataʻá ʻi he faʻahinga tui ko ia ʻoku pehē ko e moʻoní ʻoku ʻikai ke tuʻu maʻu ka ʻoku fakatatau pē ia ki he taimí mo e feituʻu. . . . ʻI he maʻu ʻa e tokolahi . . . ko e ngaahi tokāteline faka-Kalaisitiané ko ha ngaahi fakakaukau pē ia, ʻa ia ʻoku malava ke fakamoʻoniʻi pe ʻikai, ʻo fakatatau pē ki he ngaahi fie maʻu fakafoʻituituí. . . .

“. . . ʻOku hanga ʻe he fokotuʻutuʻu ʻa e poto fakaemāmaní ʻo ʻomai ha faʻahinga ongo ʻoku taʻe ʻuhinga ki he moʻuí.“⁶

ʻOku fetongi ʻaki ʻa e tui kia Kalaisí ʻa e tui ki he tangatá. ʻOku ʻikai ke ngata pē hono ʻikai ke aleaʻi ʻi he malangá mo e ngaahi fakakaukau fakafoʻituituí ʻa e ngaahi fehuʻi ko ia ʻo hangē pe ko ʻetau haʻú mei fē, pe ʻoku tau ʻalu ki fē ʻi he hili ʻa e moʻuí ni, pe ko e ha koā ʻokú ne puleʻi ʻa e ngaahi meʻa ʻoku hoko ʻi he moʻui ʻi he māmaní, ka kuo pehē ʻoku ʻikai hano ʻaonga. Kuo hoko ʻa e kalasi taʻe tui pehení ko ha meʻa fakatuʻutāmaki fakaʻulia.

Naʻe ʻosi ʻafioʻi ʻe he Tamai Hēvaní ʻe hoko ʻeni. Naʻe hanga ʻe hono Toe Fakafoki Mai ʻo e ongoongoleleí ʻo tafunaki ʻa e tui kia Sīsū Kalaisí ko e Tupuʻangá, ko e Fakamoʻui, pea mo e Huhuʻí. Naʻá ne toe fakafoki mai ʻa e mahino totonu fekauʻaki mo e ngaahi taumuʻa ʻo e moʻuí. Naʻe fakahā ʻeni ki he fānau ʻa e Tamai Hēvaní ʻi he 1831:

“Ko ia, ko au ko e ʻEikí, ʻi heʻeku ʻiloʻi ʻa e fakatuʻutāmaki ʻa ia ʻe hoko mai ki he kakai ʻo e māmaní, naʻá ku ui ai ki heʻeku tamaioʻeiki ko Siosefa Sāmita, ko e Siʻí, peá u lea kiate ia mei langi, ʻo u fai kiate ia ʻa e ngaahi fekau; . . .

“Koeʻuhí foki ke lava ʻa e tuí ʻo tupulaki ʻi he māmani” (T&F 1:17, 21).

Ki muʻa pea fakatoka ʻa e tuʻunga ʻo e māmaní, ki muʻa pea fokotuʻutuʻu ʻa e ngaahi meʻa ʻo e ʻataá, naʻe nofo ʻa e tangatá mo e fefiné pea nau ngaungaue mo nau moʻui (vakai, Ngāue 17:28). ʻOku hanga ʻe he foʻi fakakaukau ko ia ʻo e poto fakaemāmaní ko ia ʻoku pehē ko e moʻuí naʻe tupu pē ʻiate ia, ʻo fakaʻikaiʻi ʻa e tefitoʻi moʻoni ko ia ʻoku ʻi he laumālie moʻui kotoa pē, ʻa ia ʻoku pehē “Naʻe ʻi he kamataʻangá foki ʻa e tangatá mo e ʻOtuá.” (T&F 93:29; ko e tānaki atu hono fakamamafaʻí). He ʻikai lava ke liliu mo fakaʻikaiʻi ʻa e moʻoni ko ʻení.

Naʻe hoko mai ai ʻa ʻĪteni ʻi hono tuʻunga faka-Palataisí mo ʻetau ʻuluaki ongo mātuʻá, ʻa ʻĀtama mo ʻIvi, koeʻuhí ke lava ʻe he tangatá, ʻi heʻene aʻusia ʻa e ngaahi meʻa ʻo e moʻui matelié mo e Huhuʻi ʻa Kalaisí, ʻo hoko ko ha tokotaha kuo kakato ʻene tupulakí pea kuo fakahaohaoaʻi. Naʻe fokotuʻu ʻe he kuonga ʻo e kau pēteliaké, ʻe he hāʻele mai ʻa hotau Fakamoʻuí mei he langí pea mo ʻEne Fakalelei taʻe hano tatau ʻi he vahevaheʻanga ʻo taimí, pea mo e “kuonga ʻo e liliu ʻo e meʻa kotoa peé” (Ngāue 3:21), ʻa ia naʻe kamata ʻi he 1820, ʻa e tuʻunga ʻa ia ʻe toe lava ai ke puleʻi pē ʻe he kakai tangata mo fefine, fānau tangata mo fefine, ʻa ʻenau moʻuí mo honau ngaahi ʻātakaí ʻaki ʻenau “tui ki he ʻEiki ko Sīsū Kalaisí.” (Tefito ʻo e Tui 1:4).

Siʻoku ngaahi kaumeʻa ʻofeina kei talavou, ʻoku mou ʻi he fetaulakiʻanga ʻo e ngaahi meʻa ko ʻeni ʻoku hoko ʻi he māmaní. “Ko e meʻa kuo hilí ko ha talateu pē ia, pea ko e ngaahi meʻa kuo ʻi aí ʻe hoko mai ia.”⁷ Ko e meʻa ʻe malava ke hokó, ʻa e meʻa kuo pau ke hokó, ko hono fakatuaiʻi ʻe hoʻo tuí fakataha mo hoʻo ngaahi ngāué ʻa e fakaʻau ke toe lahi ange ʻa e taʻe tuí. Ko ho tufakanga ʻeni ʻi he moʻui ní. Ko ho fatongia toputapú ʻeni.

Ngaahi Tuʻunga ʻo e Tuí

Naʻe folofola hotau ʻEikí ʻo pehē, “Kapau ʻe ʻai hoʻomou tuí ʻo hangē ko e foʻi tengaʻi mūsitá,. . . ʻe ʻikai ha meʻa ʻe taha ʻe taʻe fai ʻe kimoutolu.” (Mātiu 17:20). Naʻe fakamanatu mai ʻe Palesiteni Hingikelī kiate kitautolu:

“Hili hono leaʻaki mo fakahoko ʻa e meʻa kotoa pē, ko e koloa mahuʻinga taha pē ʻa e Siasí ko e tui ʻa hono kakaí.”⁸

“ʻI he ngāue maʻongoʻonga mo taʻetūkua ko ʻení, ko e meʻa ʻoku tau fie maʻu tahá ko e tui ʻoku tupulaki. Ka ʻikai ʻa e tuí, ʻe tuʻu maʻu ʻa e ngāué ni. Ka ʻi hono maʻu e tuí, he ʻikai lava ʻe ha taha ʻo taʻofi ʻa ʻene fakalakalaká.”⁹

ʻOku hulu hake ʻa e tui peheé ʻi ha ʻulungāanga pē, hulu hake ia ʻi ha tui pē, hulu hake ia ʻi ha fakamoʻoni ʻoku ʻilo ʻe ha taha pe ongoʻí. ʻOku fanauʻi ʻe he tui moʻoní, ʻa e tui ko ia naʻe lea ki ai hotau palōfita ʻofeiná, ʻa e angamāʻoniʻoni ʻi he moʻuí ni pea mo e fakamoʻuí ʻi he moʻui ka hoko maí. ʻOku fakatefito ia ʻi he ʻOtua moʻoni mo moʻuí pea mo Sīsū Kalaisi ʻa ia naʻá Ne fekauʻi maí (vakai, Sione 17:3). ʻOku makatuʻunga ia ʻi he moʻoní, ʻo muʻomuʻa ai ʻa e ʻiló, pea fakahaohaoaʻi ʻi he ngāué. ʻOkú ne fakatupu hono maʻu ʻe he tangata matelié ʻa e mahinó pea ʻulungāanga taau mo ha fānau ʻa e Tamai Hēvaní. Ko e tui [ko ʻení] “ʻa e ʻuluaki tefitoʻi moʻoni ko ia ʻoku [tau lava ai ke maʻu ʻa e] mālohi, pule, mo e mafai”¹⁰ ki he anga ʻetau fakakaukaú, ki he anga ʻo ʻetau ngāué, pea mo e anga ʻoku taau mo kitautolu ko e kakai tangata mo e kakai fefine.

Naʻe ʻomai ʻe he ʻAposetolo ko Sēmisí kiate kitautolu ʻa e founga ke maʻu ai ʻa e faʻahinga tui ko iá:

“He ko e hā hono ʻaonga. . . . ki ha tangata ke ne pehē ʻokú ne maʻu ʻa e tuí, kae ʻikai ʻi ai mo e ngāué? . . .

“ʻIo, ʻe pehē ʻe ha tangata, te u fakahā kiate koe ʻoku ou maʻu ʻa e tuí taʻe ʻi ai mo e ngāué; ka ʻoku ou talaatu, fakahā kiate au ʻa hoʻo tui taʻe ʻi ai ha ngāué, pea te u fakahā kiate koe ʻa ʻeku tuí ʻaki ʻeku ngaahi ngāué. . . .

“. . . Ko e tui ʻoku ʻikai ʻi ai ʻa e ngaahi ngāué, ʻoku mate ia, pea ʻoku tuʻu taha pē ia. . . .

“ʻOkú ke mamata ki he ō fakataha ʻa e ngaahi ngāué mo e . . . . tuí, pea [ʻoku] fakahaohaoaʻi ʻa e tuí ʻe he ngaahi ngāué?” (LSS, Sēmisi 2:14–15, 17, 21).

ʻOku lahi ʻetau fanongo ʻo kau ki he ngaahi tuʻunga ke aʻusiá (benchmarks). Ko e tuʻunga ke aʻusiá ko ha “tuʻunga ʻo ha ngāue lelei [pe] lavameʻa. . . ʻa ia ʻoku fakafuofuaʻi pe fua mei ai ha ngaahi meʻa ʻoku tatau.”¹¹

ʻOku ʻi ai ha ngaahi tuʻunga ʻe fā ʻe lava ke nau tokoniʻi kitautolu taki taha ke tau ʻiloʻi pe ʻoku hanga ʻe heʻetau ngaahi ngāué ʻo “fakahaohaoaʻi” ʻa ʻetau tui fakatāutaha kia Kalaisí. Ko e ngaahi tuʻungá ʻeni (1) ko e ngaahi fili ko ia ʻoku tau fakahokó, (2) ko e ngāue mateaki ʻoku hā meiate kitautolú, (3) ko ʻetau talangofuá, mo e (4) ko e ngāue tokoni ʻoku tau fakahokó. Tuku muʻa ke u fakamatalaʻi atu kinautolu.

Ko e Ngaahi Fili ʻOku Tau Faí

‘Uluakí, ko e tuʻunga ʻo e filí. “ʻOku tui [e Kāingalotu ʻo e Siasí] ʻoku totonu ke faitotonu, angatonu, sino maʻa, angalelei mo anga māʻoniʻoni. . . Kapau ʻoku ʻi ai ha meʻa ʻoku māʻoniʻoni, fakaʻofoʻofa, pe ongoongo lelei pe feʻunga mo hono vīkivikiʻí, ko e ngaahi meʻa ia ʻoku mau fekumi ki aí” (Tefito ʻo e Tuí 1:13; ko e tānaki atu hono fakamamafaʻí).

Fakakaukau angé ki ha kaumātuʻa kei talavou te tau pehē pē ko hono hingoá ko Pila. Naʻá ne ako ʻeni ʻi he Palaimelí. Naʻá ne tui ki ai he taimi ko iá; ʻokú ne tui ki ai he taimí ni. Neongo ia, kuo fuoloa ʻeni hono maʻu ʻo Pila ʻe he ponokalafí. Naʻe ʻikai te ne matuʻuaki ʻene ngaahi fakatauelé pea naʻá ne maʻunimā ia. Ko ʻene hili ange pē e mamata ʻa Pila ʻi he ngaahi ponokalafí, naʻá ne ongoʻi loto ha ongoʻi faikeheʻia, mā mo taʻe feʻunga.

ʻI he ngaahi uike siʻi kuo hilí naʻe ʻalu ai ʻa Pila ki he konifelenisi lahí. Naʻá ne fanongo ʻi he lea ko ʻeni ʻa Palesiteni Hingikelī ʻi he fakataha ʻa e lakanga fakataulaʻeikí:

“ʻOku ʻikai ha tangata pe tamasiʻi he haʻofangá ni te ne taʻe lava ʻo fakaleleiʻi ʻene moʻuí. Pea ʻoku fie maʻu ke hoko ia. He ʻoku tau maʻu foki ʻa e lakanga fakataulaʻeiki ʻo e ʻOtuá. . . .

“ʻOku haʻu fakataha e lakanga fakataulaʻeikí ni mo ha tufakanga maʻongoʻonga ke tau moʻui taau mo ia. He ʻikai lava ke tau fakahōhōloto ʻi he ngaahi fakakaukau ʻulí. Kuo pau ke ʻoua naʻa tau kau atu ki he ponokālafí. Kuo pau ke ʻoua naʻa tau ʻefihia ʻi ha faʻahinga founga ʻo e ngaohikoviá. Kuo pau ke tau mavahe hake mei he faʻahinga meʻa ko iá. ‘Tuʻu hake kau tangata ʻa e ʻOtuá!ʻ pea siʻaki e ngaahi meʻá ni pea ʻe hoko leva ʻa e ʻEikí ko ho fakahinohino mo e poupou.”¹²

Naʻe fakakaukau ʻa Pila, “Kuo taimi ke u taukaveʻi ʻeku tuí!”

Naʻá ne ʻalu ki hono kiʻi feituʻu fakapulipulí, tānaki mai e ngaahi fakatātā ʻulí, ʻa e ngaahi filimi mo e ngaahi tohi fakalieliá, pea fakaʻauha kinautolu. Naʻá ne fakamaʻa ʻene laipelí ʻaki hono toʻo mei ai ʻa e ngaahi fasi leʻo lahi mo hohaʻa pea ʻuli mo fakamātatuʻa honau ngaahi fakaleá. Naʻá ne tāmateʻi mei heʻene komipiutá ʻa e ngaahi tuʻasila kotoa pē ʻoku maʻu mei ai e ngaahi ponokalafí peá ne fokotuʻu ha meʻa maluʻi ai, pea naʻá ne tuku foki ʻene komipiutá ʻi ha feituʻu ʻe lava ke mamata ki ai mo e niʻihi kehé ke maluʻi ia mei haʻane toe fakahoko ʻa e faiangahala ko ʻení.

Naʻe fakahā ʻe Pila ʻene ngaahi maumaufonó ʻi he ʻao ʻo e ʻOtuá. Naʻá ne lotu fakamātoato ke ne maʻu ʻa e mālohi ke fakatomala, ke ne siʻaki ʻa e angakoví ni mei heʻene moʻuí. Naʻá ne kumi tokoni mei heʻene pīsopé mo kinautolu naʻa nau ʻofa ʻiate iá. ʻI he taimi faingataʻaʻia ʻa Pilá, naʻá ne ongoʻi ʻa e ongo fakafiemālie ko ʻení, “ʻE hoku foha, ʻokú ke ʻi he hala totonú.” Koeʻuhi ko ʻene ngaahi ngāué, naʻe fakapapauʻi mo fakamālohia ai ʻa ʻene tuí.

ʻOku kei toe lahi pē ʻa e meʻa ke faí. ʻE fie maʻu ʻa e ʻaukaí, lotú, ako folofolá, mo ha ngaahi loʻimata. ʻE fakahoko ʻe ha pīsope lelei ha tokoni taʻe ʻi ai hano tatau. ʻE feau ʻe he faitōnunga mo e ngaahi lotu ʻa e mātuʻá mo kinautolu ʻoku ʻofa ʻiate iá ʻa e poupou ko ia ʻe fie maʻú. Ka neongo ia, ʻoku hā ʻi he tuʻunga ke aʻusiá ʻo peheni: ʻOku kamata ke maʻu ʻe Pila ʻa e tui ke fakatomala—kuó ne fai ʻa e fili totonú!

Ko e Ngāue Mateaki ʻOku Tau Fakahaaʻí

Uá, ko e tuʻunga ʻo e ngāue mateakí. “ʻOku tui [e Kāingalotu ʻo e Siasí] ki he meʻa kotoa pē kuo fakahā mai ʻe he ʻOtuá, mo e ngaahi meʻa kotoa pē ʻokú Ne fakahā mai he taimi ní, pea ʻoku mau tui te Ne kei fakahā mai ʻa mui ha ngaahi meʻa lalahi mo mahuʻinga kau ki he Puleʻanga ʻo e ʻOtuá.

“ʻOku mau tui ki hono tānaki fakataha moʻoni ʻo ʻIsilelí pea ki hono fakafoki mai ʻo e Faʻahinga ʻe Hongofulú; pea ko Saione (ko e Selusalema Foʻoú) ʻe langa ia ʻi he konitinēniti ʻo ʻAmeliká” (Tefito ʻo e Tuí 1:9–10) pea ʻoku “ui [ʻa e tangatá mo e fefiné] ʻe he ʻOtuá, ʻi he kikite” pea mo e mafai fakalangi ke fakahoko ʻeni (Tefito ʻo e Tuí 1:5).

ʻOku ō fakataha ʻa e ngāue mateakí mo e ngaahi taumuʻa fakalangi naʻe fakahoko ki muʻa ʻi hono ʻai e tuʻunga ʻo e māmaní. Naʻe kau ki ai ʻetau ngaahi kui angamāʻoniʻoní ʻo nau foaki ʻenau moʻuí ke fakahoko e ngaahi taumuʻa ʻa e Tamai Hēvaní. Kuo tuku mai kiate kitautolu ke tau hoko atu e ngāué, ʻo tau hoko atu mei he ngaahi ngāue ne nau fakatapuí.

Ko ha talanoa eni ʻe taha ʻoku maheni mo e niʻihi ʻo kimoutolu:

Naʻe mavahe ʻa Lōpeti mo ʻAna Paaka mo ʻena fānau ʻe toko faá mei ʻIngilani ʻi he 1856 ke kau fakataha mo e Kāingalotu ʻi ʻIutaá. Kuo lea ha palōfita ʻo fakahā kiate kinautolu ke nau fakataha ki he Teleʻa Lahí (Great Basin) ʻo tokoni ki hono langa ʻo Saioné. Naʻe taki taha pē ʻe he mēmipa kotoa ʻo e fāmili ʻo e kāingalotu ʻo e kaungāfononga teke saliote ʻa Mekiʻafá ha ngāue ke fai. Naʻe toho ʻe he tangataʻeikí mo e fineʻeikí ʻa e fuʻu saliote mamafá, teke ʻa Mekisī (ʻa ia naʻe taʻu 12), pea toʻotama leva ʻa Maʻata (taʻu 10) ʻia kiʻi ʻAfa (taʻu 6). Naʻe fuofua pē ʻa e kiʻi pēpē ko ʻAtá (taʻu 1), pe fakaheka he salioté.

Naʻe nofo hifo ʻa kiʻi ʻAfa ʻi he feituʻu ʻe taha ʻi Nepulasikā ke mālōlō peá ne mohe ia. Naʻe tō fakafokifā mai ha matangi. Naʻe fononga fakavave atu e kaungā-fonongá pea fokotuʻu honau ʻapitangá. Ko e taimi ia ne nau fakatokangaʻi ai naʻe ʻikai ke ʻi ai ʻa ʻAfa mo e fānau kehé.

Ne lau ʻaho ʻenau kumi mo e ʻikai ha ola. Naʻe pau ke hoko atu ʻenau fonongá. Ko e taimi ʻeni naʻe ngāue ai ʻa Lōpeti mo ʻAna Paaka ʻo fakatatau mo ʻena tuí. Naʻe hiki ʻe ʻAsa Uolotā ʻi heʻene tohinoá ʻi he ʻaho 2 ʻo Siulai 1856, ʻo pehē, “Naʻe ʻikai ke ʻiloa . . . e kiʻi tamasiʻi ʻa Misa Pāká, ko ia ne foki ai ʻene tamaí ke kumi ia.”

ʻI he mavahe atu ʻa Lōpetí, naʻe nonoʻo ʻe ʻAna ha pulupulu lanu kulokula maama ʻi hono umá mo ne pehē ange: “Kapau te ke ʻilo ia kuó ne mālōlō, kofukofu ʻaki ia e pulupulú ʻo tanu. Kapau te ke maʻu ʻokú ne kei moʻui, fakaʻaongaʻi ia ko ha fuka ke ke taʻataʻalo mai ʻaki kiate kimautolu.” Naʻá ne hoko atu leva mo e toenga ʻo e fānau ʻi hono teke ʻo e salioté mo fāinga atu mo e kaungā-fonongá.

Naʻe toe foki ʻa Lōpeti ʻi ha ngaahi maile lahi he hala he vaotaá ʻo ui, kumi, mo lotua pē hono kiʻi fohá. Faifai peá ne aʻu ki ha fale naʻe tauhi ai e meilí mo faiʻanga fakatau ʻo ne ʻilo ai naʻe tokangaʻi ʻena kiʻi tamasiʻí ʻe ha tangata tā fefie mo hono uaifí. Naʻe puke ʻa ʻAfa tupu mei he momokó mo ʻene ilifiá, ka naʻe ongoʻi ʻe he ʻOtuá e ngaahi lotu ʻa ʻene ongomātuʻa ʻofá.

Naʻe fakasio maʻu pē ʻe ʻAna mo ʻene fānaú e halá he pō taki taha. ʻI he kamata ke tō e laʻaá he efiafi hono tolú, naʻe mamata atu ʻa e faʻē lototoʻá ni ki he ʻasi mai e kapa kulokula ʻo e pulupulú pea ne siʻi hoholo hifo ai pē ki he ʻoneʻoné. Naʻe helaʻia ʻaupito ʻa ʻAna pea ko e fuofua taimi ʻeni naʻá ne toki lava ai ʻo mohe hili ha ngaahi ʻaho mo e pō ʻe ono.¹³ Ko e moʻoni naʻe angaʻofa mo manavaʻofa ʻa e ʻOtuá; kuo hanga ʻe he ngaahi ngāue ʻa e Kāingalotú ʻo ʻomi ʻa e fakapale ʻo ʻenau moʻui mateakí mo fakamāʻoniʻoniʻi ʻa ʻenau tuí, pea naʻa nau hiva ʻi he fiefia ʻa honau lotó ʻo pehē, “ʻOku lelei ʻa e meʻa kotoa!”¹⁴

Naʻe tupu hake ʻa e kiʻi pēpē ko ʻAitá, ʻa ia ko ʻeku kui fefiné ia, ʻo fuʻu fefine peá na mali mo Pilikihami ʻIongi Mekimālini. Ko e akonaki ʻeni. Naʻe ʻikai te ne teitei tuku ke ngalo ʻi heʻene fānaú naʻá ne fononga mai ʻi he ngaahi potu tokaleleí mo hono fāmilí ʻi he kaungā-fononga ʻo Taniela D. Mekiʻafá. Naʻe hoko e talanoa ki he pulupulu kulokulá ko homau talanoa—pea hoko foki mo e tukufakaholo ʻo ʻenau tuí ko homau tukufakaholo. Ko ia ʻoku mau “hoko atu e ngāué,”¹⁵ ʻe kimautolu hono kotoa pea ʻoku mole atu ai ʻa e ngaahi faingataʻa lahi ʻo hangē ko e puli atu ʻa e hahaú ʻi he laʻā ʻo e pongipongí.

ʻOku fakahā mai ʻeni ʻe he taumuʻa ke aʻusiá fekauʻaki mo e Kāingalotu ko ʻeni mei muʻá: Naʻe hoko ʻenau ngaahi ngāué ko ha tefitoʻi ʻulungāanga ia ʻo e tuí, pea hoko ʻenau mateakí ko ha fuka ke moʻui honau hakó ʻo fakatatau ki ai.

Ko ʻEtau Moʻui Talangofuá

Tolú, ko e tuʻunga ʻo e talangofuá. “ʻOku tui [e Kāingalotu ʻo e Siasí] ʻe lava fakamoʻui ʻa e faʻahinga ʻo e tangatá kotoa pē ʻi he Fakalelei ʻa Kalaisí, tuʻunga ʻi he talangofua ki he ngaahi fono mo e ngaahi ouau ʻo e Ongoongoleleí.” (Tefito ʻo e Tuí 1:3; ko e tānaki atu hono fakamamafaʻí).

Tau fakakaukau ange heni ki ha ongo meʻa kei talavou ʻokú na fakafofongaʻi ʻa kinautolu ko ia ʻoku nau moʻui ʻi he māmani ʻo e poto fakaemāmaní ko ʻení. Ne ʻilo pē ʻe Tēvita ia mo Mīseli ʻa e tefito ʻo e tui ko ʻení ki muʻa peá na toki mahení. Ka ne na kei fepaki pē mo e ngaahi meʻa ʻoku fehangahangai mo homou tokolahi. He ko Tēvita mo Mīselí ʻokú na kei ʻi hona taʻu uofulu tupu lahí pē. Kuo fuoloa ʻena mahení, ʻokú na “ō fakataha” holo pē, pea ʻokú na feʻofaʻaki. Ka ʻoku teʻeki ai ke na fakapapauʻi pe te na mali mo ʻi ai haʻana fāmili. ʻOku totonu nai ke na toloi ʻena malí kae ʻoua leva kuo ʻosi ʻena akó, kae ʻoua leva kuo ʻi ai haʻana paʻanga feʻunga, pea ʻoua leva kuo aʻusia ha niʻihi ʻo ʻena ngaahi taumuʻa fakatāutahá?

ʻOkú na toe fakakaukau foki ki he fakautuutu ʻo e mali veté, ki he ngaahi tau mo e ngaahi moveuveu ʻoku hoko ʻi he māmaní, pea mo e fuʻu tokolahi ʻa e kakai ʻo e māmaní. ʻE tolonga nai ʻena nofo-malí? ʻOku totonu nai ke na ʻomi ha fānau ki ha māmani pehē?

ʻOiauē, ʻe Tēvita mo Mīseli, ngāueʻaki hoʻomo tuí. Manatu: “Ko e mali ʻi ha vā ʻo ha tangata mo ha fefine naʻe tuʻutuʻuni ia ʻe he ʻOtuá.”¹⁶“Pea . . . ko ia kuo fakatahaʻi ʻe he ʻOtuá, ʻoua naʻa fakamāvae ʻe ha tangata.” (Mātiu 19:6; vakai foki, T&F 132:19–20). “Ko e fānaú ko e tofiʻa mei [he ʻEikí].” (Saame 127:3). “He ʻoku fonu ʻa e māmaní . . . ʻoku ʻi ai ha ngaahi meʻa feʻunga pea hulu ange.” (T&F 104:17).

Ngāue ʻo fakatatau mo ia ʻokú ke ʻiloʻi ʻoku moʻoní pea ʻe fakahaohaoaʻi ʻe hoʻo ngaahi ngāue māʻoniʻoní ʻa hoʻo tuí. ʻE kakato pea fakaʻofoʻofa ʻa hoʻo moʻuí. Muimui ʻi he faʻifaʻitakiʻanga lelei ʻa hoʻo mātuʻá. Naʻe ʻikai te na maʻu ha meʻa feʻunga ke na malí, ka naʻá na mali. Naʻá na hohaʻa foki mo kinaua ki he taú mo e moveuveú, ka naʻá na ngāueʻaki ʻa ʻena tuí pea maʻu ai koe! Naʻe ʻikai taʻofi ʻe he ngaahi fiemaʻu ʻo e nofo-malí mo e fāmilí ʻa ʻena akó; naʻa na fakatupulaki ia. Pea ko e meʻa ki heʻena ngaahi taumuʻa fakatāutahá, kuo pukepuke fakataha ai kinaua ʻo na kakato mo na fiefia ʻi heʻena lelei taki taha ʻanauá mo hoʻo lelei ʻaʻaú, lelei ʻa ho ngaahi tuongaʻané mo e tuofāfiné, pea ʻa e makapuná.

Naʻe ʻikai faingofua ʻa e moʻuí ki hoʻo mātuʻá. Naʻe pau ke na fakasiʻisiʻi ʻena fakamolé ka na fakahaofi ha paʻanga, peá na fiemālie pē he meʻa naʻá na maʻú. Naʻá na fetaulaki foki mo ha ngaahi fehuʻi pea mo ha ngaahi tūkunga naʻe ʻikai ke na maʻu ʻa e tali ki aí, ka naʻá na ʻiloʻi naʻe fakahā mai ʻe he hala kuo fokotuʻu ʻe he ʻOtua Māfimafí ke hoko atu ʻena moʻuí. Pea ʻokú ke “koloaʻia ange” koeʻuhí ko ia.

ʻOkú ke ʻilo mei he ngaahi talanoa kuo nau toutou fai atú naʻe faingataʻa ʻa e meʻa kotoa pē kiate kinautolu. Ka naʻe hanga ʻe heʻenau ngaahi ngāué ʻo fakamāʻoniʻoniʻi ʻa ʻenau tuí.

Ko e moʻoni ʻokú na matuʻotuʻa ange kinaua. ʻOku ʻikai kei vave ʻa ʻena laká, ʻikai kei mālohi ʻena tōʻongá, pea ko ʻena fotú naʻe ʻikai feʻunga ia mo e ngaahi fiemaʻu ʻa e kakai tuʻuaki koloá. Ka ʻoku hā mei heʻena ʻofa ki he ʻOtuá pea mo ʻena feʻofaʻaki ʻiate kinauá ʻa e ʻapasia moʻoni mo e ʻofa mamahi. Kuo ʻoange kiate kinaua ʻe he ngaahi meʻa fakamamahi ʻo e moʻuí ʻa e potó, faʻa kātakí, mo e loto houngaʻiá. Kuó na hoko kinaua ʻi ha ngaahi founga iiki kae mahuʻinga ko e “tuʻunga ʻo e ngaahi meʻa ʻoku ʻamanaki lelei ki ai, ko e fakamoʻoni ʻo e ngaahi meʻa taʻe hā mai” (Hepelū 11:1)—ʻa e ngaahi meʻa naʻe ʻikai ke na lava ʻo mamata ki ai ʻi he konga ki muʻa ʻo e moʻuí. Ka naʻá na talangofua. Naʻá na ngāueʻaki ʻa ʻena tuí ʻo na sila ai ʻi he temipalé, tāpuakiʻi kinaua ʻaki ha fānaú, pea ʻokú na ʻiloʻi he taimí ni ʻa e ngaahi feituʻu totonu ʻoku maʻu mei ai ʻa e fiefiá. ʻOku hā peheni ʻi he tuʻunga ke aʻusiá: ʻOku ʻomi ʻe he talangofuá ʻa e ngaahi tāpuaki ʻo e langí—naʻe hoko ʻeni ki hoʻo mātuʻá pea ʻe hoko pehē kiate koe.

Ko e Ngāue Tokoni ʻOku Tau Fakahokó

Faá, ko e tuʻunga ʻo e ngāue tokoní. “ʻOku tui [e Kāingalotu ʻo e Siasí] ki he ʻOtua, ko e Tamai Taʻengatá, pea ki Hono ʻAlo ko Sīsū Kalaisí, pea ki he Laumālie Māʻoniʻoní. . . .

“ʻOku mau tui . . . . ko Kalaisi pē ʻe pule ʻi he māmaní; pea ʻe fakafoʻou ʻa e māmaní ʻo maʻu ʻe ia ʻa hono nāunau fakapalataisí.” (Tefito ʻo e Tuí 1:1, 10).

ʻOku lahi ange ʻetau ʻilo kau ki he Toluʻi ʻOtuá ʻi he meʻa kuo ʻiloʻi ʻe he ʻatamai ʻo e tangatá—pea ʻoku moʻoni e meʻa ʻoku tau ʻiloʻí. ʻIkai ko ia pē, ka ʻoku tau ʻilo e ngaahi taumuʻa ʻa e ʻOtuá maʻá e māmani ko ʻení mo hono kakaí kātoa. Koeʻuhí ko e meʻa ko ʻeni ʻoku tau ʻiló pea koeʻuhí kuo hilifaki mai ʻe he ʻEikí ki hotau ngaahi umá ʻa e fatongia toputapu ke fakahoko iá, kuo pau ke ʻoua naʻa tau fakaʻapiʻi ʻa ʻetau kau ki he Siasí.

ʻOku fakataueleʻi ha niʻihi ke ʻoua naʻa nau fuʻu ngāue mālohi he Siasí naʻa pehē tokua ko ha kakai fielotu kinautolu. ʻOku nau pehē “ko e Siasí ko ha kautaha pē, ka ʻoku ʻikai ko ha puleʻanga.”¹⁷ “Kau talavou [ko e kau ʻea hoko fakaʻeiʻeiki],”¹⁸ ʻai ke hoko e ngāue ʻa e Siasí mo e puleʻanga ʻo e ʻOtua ko e uho ia ʻo hoʻo moʻuí. Tali “ʻIo” ʻo ka ui koe ke ngāue, pea fai ho lelei tahá. Fanongo ki he fekau ko ʻeni mei he ʻEikí: “Ko ia, ke ʻoua naʻa mou kumi ki he ngaahi meʻa ʻo māmaní, ka mou fuofua kumi ke langa hake ʻa e puleʻanga ʻo e ʻOtuá, pea ke fokotuʻu ʻa ʻene māʻoniʻoní pea ʻe fakalahi atu ʻaki e ngaahi meʻá ni kotoa pē kiate kimoutolu.” (LSS, Mātiu 6:38).

ʻI ha ʻaho ʻe fā mei he taimí ni, ʻa ia ko e ʻaho 9 ia ʻo Nōvemá, ko e ʻosi ia ha taʻu ʻe 150 mei he taimi naʻe feinga hū atu ai ki he Teleʻa Sōlekí e kau paionia faingataʻaʻia ʻi he kaungā-fononga teke saliote ʻa Uilí. Kuo nau fou mai ʻi he fakamamahi lahi mo e mate. Kuo mālōlō ha tokolahi tupu mei he ngaahi matangí pea mo e vaivai honau sinó—naʻe toe tokolahi ange mo e faʻahinga naʻe fakamoʻui ʻe he kau fakahaofi moʻuí.

Naʻe kau ʻa Līvai Sēvesi ʻi he faʻahinga naʻa nau tūʻuta ki ai he ʻaho ko iá. ʻOku hā ʻi he hisitōliá ʻene ngāue faivelenga mo ngāue lahi ke fakahaofi e Kāingalotú mo ʻoatu kinautolu ke nau hao moʻui ki he teleʻá. Ka naʻe ʻikai toki kamata pē ʻene ngāue tokoni fakaʻeiʻeikí ʻi he ngaahi tokalelei ʻo Uaiōmingi naʻe ʻufiʻufi ʻe he sinoú. Ko ha vahe pē ia ʻe taha ʻo ha moʻui kuo fakatapui ke ngāue tokoni, pea mahalo ko e tumutumú ia.

Naʻe papitaiso ʻa Līvai ʻi Sune ʻo e 1846 ʻi hono taʻu 26. ʻI hono ui ia ʻe he palōfitá ke ne hiki ki he feituʻu faka-hihifó, naʻá ne hiki ʻo pehē “naʻa mau teuteu ʻaki ʻemau lelei tahá ki ha fononga lōloa ki ha fonua foʻou naʻe ʻikai ke mau ʻilo ki ai . . . Naʻa mau lea fakamāvae ki he konga kelekele mo e fale ne hoko ko e ʻapi ki homau fāmilí. . . pea hanga fakahihifo ʻemau fonongá, ʻo ʻikai te mau ʻilo pe ʻe iku ki fē, ngata pē ʻi heʻemau ʻamanaki ke mau aʻu ki ha feituʻu ʻi he tafaʻaki fakahihifo maomaonganoa ʻo e ʻOtu Moʻunga Maká.”¹⁹

ʻI he ʻaho 16 ʻo Siulai, 1846, naʻá ne toe tali fakataha mo ha kau tangata lototoʻa kehe ʻa e kole mei he palōfitá ke nau kau atu ki he Konga Kau Māmongá, ʻo nau laka atu ai ʻi ha maile ʻe 2,000 (kolomita ʻe 3200) nai mei Kaunisila Palafu ʻi ʻAioua ki Seni Tieko ʻi Kalefōnia, pea hoko atu ai ki Losi ʻEnisilesi. Naʻe tukuange kinautolu heni mei heʻenau ngāue maʻá e puleʻangá. Neongo naʻe ʻikai ke nau ʻiloʻi e ngaahi feituʻu naʻe ʻi ai honau ngaahi ʻapí mo honau ngaahi fāmilí, ka naʻe kamata ʻenau fononga ki he teleʻa ʻo e Ano Māsima Lahí. Ko ha toe maile kehe ia ʻe 1,300 naʻe fononga atu ai ʻa Lēvai Sēvesi ʻi he ngaahi potu tokakovi mo faingataʻá, ka naʻe faifai pē ʻo ne aʻu ki he Teleʻa Sōlekí.

Naʻe hoko heni ʻa Līvai ko ha paionia, ʻo ne fepaki ai mo e fanga heʻé, mali, ʻi ai hono foha peá ne tanu hono uaifí hili pē ha ngaahi māhina siʻi mei hono fāʻeleʻi hono fohá. Hili ha māhina ʻe hongofulu mei he mālōlō ʻa hono uaifí, naʻe uiuiʻi ia mo ha kau tangata faivelenga tokolahi ʻe he palōfitá ʻi he konifelenisi ʻo ʻOkatopa ʻo e 1852 ke nau ō ʻo ngāue fakafaifekau ke fakangofua hono malangaʻi ʻo e ongoongoleleí ʻi Saiemi (ʻa ia ʻoku ui ko Taileni he ʻaho ní).

ʻI heʻenau fononga ko ʻení naʻa nau ʻalu fakataha ai ʻi ha ngaahi sāliote ʻo foki hifo ki he matāfanga ʻo Kalefōnia mo e ʻŌseni Pasifikí. Naʻa nau folau mei Seni Felenisisikou ki Kalakata ke fakahoko ʻenau ngāue fakafaifekau ki Saiemí. ʻOku ʻomi ʻe he fakamatala naʻe hiki ʻe Līvai ʻi heʻene tohinoá ʻi he ʻaho 29 ʻo Sānuali, 1853, ha meʻa ke tau ʻilo ai ki he anga e loto naʻe maʻu ʻe he kau faifekau ko ʻení. ʻOku peheni e meʻa naʻá ne hikí:

“Ne kiʻi havilivili ʻo ne puhi atu homau vaka toʻá ʻo ne tētēkina atu ʻi he loto moana hoú ki he feituʻu naʻa mau fakataumuʻa ki aí; ka mau sītuʻa ki homau fonua tupuʻanga ne mau ʻofa aí. . . .Ne taki taha kumi ʻe he tangata ha feituʻu ke ne fakalaulauloto ai mo fakakaukau ki he ngaahi fiemālie ʻo hono ʻapí, ʻa e ʻofa ʻa hono uaifi ʻofeiná mo ʻene fānaú pe ngaahi kaumeʻá. . . . Ka ko ʻeni kuo ui ia ke ne ʻalu atu ʻo nofo ʻi he ngaahi potu mamaʻo ʻo e māmaní, pea koeʻumaʻā? Ke maʻu ʻa e koulá mo e silivá, pe ke maʻu maʻana ʻa e lāngilangi, ngeia mo e lelei ʻo e māmaní? ʻIkai, ko hono moʻoní ʻoku ʻikai! Ka ko e talangofua ki he ngaahi fekau ʻa e ʻEikí ke ʻave ʻa e pōpoaki ʻo e moʻoní mo e . . . fakamoʻuí ki he ngaahi puleʻanga fakapoʻuli mo kei manavahē taʻe ʻuhinga ʻi he ngaahi meʻa taʻe hā maí. Ne ʻikai fuoloa mei ai kuo ʻalu ʻa e tangata taki taha ki hono moheʻangá ke mohe mo mālōlō. Pe naʻá ne mohe pe ʻāʻā pē, ka naʻe kei ʻalu pē ʻa ʻene fakakaukaú ki he ngaahi meʻa moʻoni kuo hokó, pea mo e ngaahi meʻa ʻe hoko mai ʻi he kahaʻú.”²⁰

Hili e ngāue fakafaifekau ʻa Līvaí, naʻá ne folau ko e foki ki ʻapi ʻo fou mai ʻi Positoni ʻi Masasūseti, ʻo ne aʻu hake ai ki Kulinifila ʻi ʻOhaiō, ʻa e feituʻu naʻe fāʻeleʻi ai iá, pea ko e meʻa ʻeni naʻá ne tohi ʻi heʻene aʻu ki aí, “Kuó u folau takai ʻi he kolopé.”²¹ Naʻá ne kau atu ki he kaungā-fononga toho saliote ʻa Uilí ʻi ʻAiouā Siti ʻi ʻAiouā, ʻa ia ko e kamataʻanga ʻeni ʻo ha talatupuʻa naʻe taʻengata hono mahuʻingá kiate ia, ki hono fāmilí mo e Siasí fakakātoa. Ko e tumuʻaki ʻo ʻene ngaahi ngāue ʻi he meʻa fakahisitōlia ko iá ko e moʻui feilaulau mo e tokoni. ʻOku fakahā ʻe he tuʻunga ke aʻusia ʻe he kau paionia ko ʻení ʻo pehē: Naʻe hoko ʻenau tuí mo ʻenau ngaahi ngāué ko ha tūhulu ʻi ha maama taʻe tui, naʻe hoko ʻenau tokoní ko ha sīpinga ke tau taki taha muimui ki ai.

ʻOku ueʻi hotau lotó ʻe he ngaahi lea ʻa e tangata malanga ko Feletiliki W. Feipá:

ʻOku kei tuʻutai e tui ʻa ʻemau ngaahi tamaí,
Neongo ʻa e fale fakapōpulá, heletaá mo e afí;
Hono ʻikai nēkeneka homau lotó mo fiefia
ʻI heʻemau ongona e lea nāunauʻia ko iá.

Ko e tui ʻa ʻemau ngaahi tamaí ʻe tupu ai ʻemau feingá
Ke ikuna e puleʻanga kotoa maʻá e ʻafioná,
Pea ʻe fakatauʻatāinaʻi moʻoni e faʻahinga ʻo e tangatá,
ʻE he moʻoni ʻoku mei he ʻOtuá.

Ko e tui ʻa ʻemau ngaahi tamaí ʻe tupu ai ʻemau ʻofá
Ki he kaumeʻa mo e fili fakatouʻosi ʻi heʻemau ngaahi feingá,
Pea malangaʻaki foki ʻa e ʻafioná ʻi he founga ʻo e ʻofa,
ʻI he lea ʻofa pea ʻi he moʻui angamaʻa.

Ko e tui ʻa ʻemau ngaahi tamaí, ʻa e tui māʻoniʻoní,
Te mau kei mateakiʻi ai ʻa e ʻafioná ʻo aʻu ki ha mole ʻa ʻemau moʻuí!”²²

Siʻi ngaahi tokoua mo e tuofāfine, ʻoku ou fakamoʻoni kiate kimoutolu— ʻOku ʻafio ʻa e ʻOtuá ʻi he langí, ko Hono huafá ko ʻElohimi, pea ʻokú Ne ʻafioʻi ʻEne fānaú kotoa, tatau ai pē pe ko ʻenau haʻu mei fē pe ko e fē feituʻu ʻoku nau nofo aí. Ko Sīsū, ko e Tokotaha Māʻoniʻoni ʻo ʻIsilelí, ʻa Hono ʻAlo ʻOfaʻangá, ko e Huhuʻi ʻo e faʻahinga ʻo e tangata kotoa pē. Ko Siosefa Sāmitá, ko ha kiʻi talavou, naʻe ui ʻe he leʻo ʻo e ʻOtuá pea mo Hono ʻAlo Māʻoniʻoní ko ha palōfita, pea hoko mei he ui ko iá ko e Siasi moʻoni mo e puleʻanga ʻo e ʻOtuá kuo toe fakafoki mai ki he māmaní. Ko e tāpuaki eni kiate kitautolu ke tau ʻiloʻi ʻa e ngaahi meʻá ni, pea mo koe ʻe hoku ngaahi tokoua mo e tuofāfine, ʻoku mou tutuʻu ʻi he fetaulakiʻanga ʻo e hisitōliá. Naʻa mou haʻu mei he ngaahi fonua nāunauʻia. Ko ho faingamālie fakafoʻituitui ia ke ke tauhi moʻoni ki he tuí pea hoko atu ʻi he ngaahi ngāue leleí. Fai ki he lea ʻa e kau palōfitá. Naʻe nofo ʻa e ngaahi toʻu tangata ʻo e kuo hilí ʻo ʻamanaki atu ki ai, ʻoku fakamoʻui ai ʻa e ngaahi toʻu tangata ʻo e lolotonga ní, ʻoku fakafalala ki ai ʻa e ngaahi toʻu tangata ʻo e kahaʻú, pea ʻe tataki koe ʻe he Laumālie Māʻoniʻoní ʻi he foʻi laka kotoa pē te ke fai.

ʻI he huafa ʻo Sīsū Kalaisí, ʻēmeni.

NGAAHI MAʻUʻANGA FAKAMATALÁ

1. “Fakamālō ki he ʻOtuá,” Ngaahi Himi, fika 10.

2. ʻI he Conference Report Sept.—Oct. 2006, 87; pe Ensign, Nov. 2006, 82; ko e toki tānaki atu hono fakamamafaʻí.

3. Random House Webster’s Unabridged Dictionary, 2nd ed. (2001), “secular,” 1731.

4. Alexander Pope, An Essay on Man, epistle 2, line 220.

5. Book of Mormon Reference Companion, ed. Dennis L. Largey (2003), 582.

6. “How to Think about Secularism,” First Things, June–July 1996, 27, 30, www.firstthings.com/ftissues/ft9606/articles/pannenberg.html.

7. Boyd K. Packer, fakataha ako ʻa e Kau Taki Māʻolungá, ʻOkatopa 2006; vakai, William Shakespeare, The Tempest, ed. W. J. Craig, Oxford Shakespeare (1924), act 2 scene 1, line 261.

8. ʻI he Conference Report, Apr. 1991, 74; pe Ensign, May 1991, 54.

9. ʻI he Conference Report, Sept.–Oct. 2006, 90; pe Ensign, Nov. 2006, 85.

10. Joseph Smith, comp., Lectures on Faith (1985), 5, 8.

11. Random House Webster’s Unabridged Dictionary, “benchmark,” 193.

12. ʻI he Conference Report, Sept.—Oct. 2006, 66; pe Ensign, Nov. 2006, 60.

13. Vakai Boyd K. Packer, Memorable Stories and Parables by Boyd K. Packer (1997), 4–6.

14. “Haʻu Kāinga ʻOua Manavahē” Ngaahi Himi, fika 18.

15. “Fai Atu ʻa e Ngāué” Ngaahi Himi, fika 158.

16. “Ko e Fāmilí: Ko ha Fanongonongo ki Māmani,“ Ensign, Nov. 1995, 102.

17. Neal A. Maxwell, ʻi he Conference Report, Oct. 1992, 89; pe Ensign, Nov. 1992, 66.

18. “Fai Atu ʻa e Ngāué,” Ngaahi Himi, fika 158.

19. ʻI he Levi Savage Jr. Journal, comp. Lynn M. Hilton (1966), xii.

20. ʻI he Levi Savage Jr. Journal, 5; ko e toki tānaki atu hono fakamamafaʻí.

21. ʻI he Levi Savage Jr. Journal, 59.

22. “Faith of Our Fathers,” Hymns, no. 84.