O Upumoni Faigofie mai le Lagi—O Le Mamanu a le Alii

Elder Earl C. Tingey

O Le Au Peresitene o Fitugafulu

Faeasaite a le OAE mo Talavou Matutua • 13 Ianuari, 2008 • Iunivesite a Polika Iaga

Elder Earl C. Tingey A’u uo talavou pele, ua faagaeetia lava ma faamamaluina i maua ma lo’u toalua tatou te mafuta i lenei afiafi. Ua ou mafaufau ia te outou i le tele o nofoaga i le salafa o le lalolagi, a o faasalalauina atu lenei faeasaite i le satelite a le Ekalesia i gagana e 32. Ou te talitonu ma tatalo ina ia outou malamalama ma pe o fea lava o e i ai, o le a e lagonaina le Agaga ma malamalama ai i la’u savali.

Ua ou malamalama o lenei aofia, o talavou matutua nofofua e eseese tulaga o i ai. O le toatele o outou ua faauu mai aoga maualuluga. O isi ua matutua teisi atu, ma ua tele ni tausaga o fiafia e aooga i kolisi po o iunivesite. O le toatele o outou o loo faigaluega pe ua lesitala foi i aoga e aoaoina ai tomai ina ia tausia ai oe lava ma sou aiga. Ioe, e toatele foi outou ua taliu mai i misiona ma ua sagisagi fiafia atu i le isi laasaga o le olaga, lea o le a ma talanoa atu ai i le po nei. E maeu lo’u faafetai ona o outou taitoatasi—i o outou tulaga eseese uma—ua potopoto mai ina ia tatou mafuta mo sina taimi ma lagonaina le agaga masani o loo fuaao i lenei Ekalesia.

O Upu Moni Faigofie e Sefulu Mai le Lagi

Ua ou faaautuina la’u lauga O Upumoni Faigofie mai le Lagi—O Le Mamanu a le Alii. O le fasi fuaitau muamua o la’u autu ua maua mai lea i se saunoaga ofoofogia na tuuina mai e le Perofeta o Iosefa Samita i Navu i le 1844, le tausaga lava lea na faamaturoina ai. Sa saunoa Iosefa Samita i le falelauasiga o se tasi o le Ekalesia o lona igoa o King Follett. Sa amata lana saunoaga i le faamatalaga lenei: “Ou te le . . . taumafai e faamalie o outou taliga i upu susua po o upu faafailauga, po o le atamai; ae ou te . . . [faamoemoe] ina ia faamalamalamaina ai outou i upumoni faigofie mai le lagi.“¹

O le fasi fuaitau lona lua o la’u autu o loo maua lea i le mau. O loo faasino le mamanu a le Alii i le Mataupu Faavae ma Feagaiga: “Ou te tuuina atu ia te outou se faatusa i mea uma, ina ia le faaseseina outou; aua o loo i ai Satani i le atulaulau ma o loo fealuai na te faaseseina atunuu“ (MFF 52:14).

Ou te manao e aoao atu ia te outou upumoni faigofie o se mamanu na faatuina e le Alii a o le’i faavaeina le lalolagi, ma mea na amata ona tatou aoaoina ina ua tatou faitau e uiga ia Atamu ma Eva ina ua tuu i le Faatoaga o Etena. O se mamanu e ao ina outou naunau e auai i le faatinoga. O foliga tulaga ese o lenei mamanu ma le fuafuaga, o le a mafai ona outou iloa ai le olioli e faavavau. Manatua le faamatalaga a Liae o loo i le 2 Nifae: “Na pau Atamu ina ia i ai le tagata, ua ola tagata ina ia latou maua le olioli“ (2 Nifae 2:25). Ina ia auai la i le faatinoina o lenei mamanu, o le faaiuga aupito taua lea o le a e faia.

Ia faaeteete ina ia aua nei e teenaina le mamanu faapea ua matuia tele. E toatele perofeta sa latou aoaoina mai lenei mamanu. Ia manatua, e alolofa perofeta ma e latou te saunoa foi i upumoni, ma e latou te le faavaivaia foi pe fetuunaia upumoni ina ia tautala mai ai i mea faigofie e fia faalogo i ai tagata (tagai Isaia 30:20; 2 Nifae 9:40). O lea ia faaeteete ai ina ia aua nei outou teenaina perofeta ona o outou tulaga patino ma fuafuaga o mea e fai i le olaga e le ofi mai ai a latou fautuaga i le taimi nei.

Ou te tatalo a’o ou tautala atu, ia talaia o outou loto ma mafaufau e talia e ala i le uunaiga ma musumusuga a le Agaga e taiala outou, a’o outou faia faaiuga taua e aafia ai o outou olaga. Ou te molimau atu, o mea ua ou tautala atu ai, o le finagalo lea o le Alii mo Ana fanau—aemaise lava o outou, le autalavou matutua o lenei Ekalesia.

Ina ua faatulaga lenei lalolagi e lo tatou Tama Faalelagi alofa, e ala i Lona Alo Pele, o Iesu Keriso, sa Ia faatuina se mamanu e tusa ai ma le faatulagaga o le aiga, lea o loo faaauau i le taimi nei. O lea la, i le faitauina mai le tusi a Mose i le Penina Tau Tele, se’i o tatou toe iloiloina lava ni upumoni faigofie se 10 ma talanoaina pe faapefea ona avea na upumoni ma se mamanu mo outou i le taimi nei.

1. Na Faia e le Atua Lenei Lalolagi Tatou te Nonofo ai ma Faaaoga

Muamua: “Ma o Au, le Alii le Atua, na ou ave le tagata ma tuu o ia i le Faatoaga o Etena na te galueaiina, ma tausia” (Mose 3:15).

E pei ona outou iloa, sa foafoaina e le Atua le lagi ma le lalolagi ma mea ola uma ma avatu i Lana fanau le pule i na mea ola uma. Sa faia foi e le Atua le Faatoaga matagofie o Etena ma tuu i ai le tagata i le faatoaga e teuteu ma tausia. Atonu tatou te le o nonofo i le Faatoaga o Etena e pei ona sa i ai Atamu, ae ua tatou maua le avanoa e teuteu ai ma tausia lena vaega o le lalolagi o loo tatou nonofo ai. E ao ona tatou maua ai le olioli.

O lea, o la’u upumoni faigofie muamua mai le lagi o le, na faia e le Atua lenei lalolagi tatou te nonofo ai ma faaaoga. E ao ina tatou galulue. E ao ina faaleleia o tatou tulaga ma tulaga o i latou o siomia ai i tatou. Ua i ai so tatou tiutetauave ia galulue ma gauai atoatoa e ola i se olaga e tumu i faamoemoega ma le tauaveina o o tatou tiutetauave uma ua tuuina mai e lo tatou Tama Faalelagi.

O le fuafuaga faavavau o le faaolataga, lea na faapogai e le Tama ae faataunuu e Iesu Keriso ma avea ai o ia ma Faufautua Sili, ina ia tatou maua ai le avanoa e o mai ai i lenei lalolagi e maua se tino faitino ma faamaonia ai lo tatou naunautai e tausia poloaiga a le Atua. Ia, o lea ua tatou i ai iinei. Ua tatou ola i se lalolagi matagofie. Ua tatou maua le malamalama i le talalelei toefuataiina. Ua tatou maua avanoa uma lava e maua e le tagata soifua. O le a la le tatou mea e fai i nei avanoa manaomia?

2. E Le Tatau ona Mau Toatasi le Tagata

Se’i o tatou vaavaai atu nei i le upumoni faigofie lona lua mai le lagi. Ou te toe faitauina mai le tusi a Mose: “Ma o Au le Alii le Atua, na ou fai atu i lou Atalii e Toatasi na Fanaua, e le lelei ona nofo toatasi o le tagata; o lea, o le a ou faia se fesoasoani mo ia“ Mose 3:18).

O i lea ua tatou iloa ai o se tasi o upumoni faigofie mai le lagi o le, e le lelei ona mau toatasi o le tane po o le fafine. E tatau ona i ai sona fesoasoani. E toaitiiti, pe a o i ai, e sili atu ona taua upumoni faigofie mai le lagi ia i tatou nai lo le malamalama e tatau ona i ai se fesoasoani mo i tatou, se ava mo se alii po o se tane foi mo se tamaitai.

Masalo e tatau ona faamalamalama le uiga o le fesoasoani. E le tatau ona faaluafesasi ia te oe le uiga o le fetalaiga a le Alii ina ua fai atu ia Atamu e tatau ona i ai sona fesoasoani. O se fesoasoani, o se soa lea e fetaui lelei pe tutusa ma i tatou. Tatou te savavali faatasi ma se fesoasoani, e le savali le tasi i luma ae savali le isi i tua. O se fesoasoani o se paaga tutusa o se tane ma se ava. E ao ina tutusa Eva ma Atamu e faapei foi ona tutusa o le tane ma le ava o le tasi i le isi.

Sa i ai lava Atamu i le Faatoaga o Etena ina ua ta’u atu i ai e le Alii e tatau ona i ai sona fesoasoani. Na te le’i ‘aia le fua o le laau i le taimi lena lea na oo atu ai i le tutuli ese mai le Faatoaga o Etena ma oo ai ina oti faaletino. Ona o lena mea, na maua ai e Atamu lona fesoasoani mo le faavavau. Sa le o se sootaga faasamasamanoa. O se sootaga i se feagaiga.

A o e mafaufau mo sou fesoasoani, fuafua mo le faavavau. Fuafua e ulu atu i se malumalu paia. Ia e agavaa e ulufale atu i le malumalu. O le malumalu o iina e mafai ai e oe ma lou fesoasoani ona amataina se aiga o le a faavavau. So o se mea lava e mafai ai, o outou uma lava na alii talavou, ia auauna atu i se misiona faamamaluina a o le’i faia lau faaiuga e filifili sou fesoasoani. O lau auaunaga i le misiona o le a saunia ai oe mo lau matafaioi i le lumanai, e avea ai o se tane amiotonu ma se tama, ma o le a avea o se faamanuiaga mo oe i lou olaga atoa. O le a manuia ai au fanau i le lumanai.

E i ai nisi taimi matou te feiloai ai ma tagata o le ekalesia, e aofia ai talavou matutua nofofua, o e ua faalogo, vaai, po o ni tagata foi lava o aiga e le’i maua se fiafia i se faaipoipoga i le malumalu ma ua faaleaogaina. Ona o le le manao e oo i lena ituaiga taunuuga, ma ona o le fefe ne’i sese, ua i ai nisi ua faatuatuai pe ua aloese foi mai tiutetauave o le faaipoipo aemaise lava o se faaipoipoga i le malumalu.

O le po nei ou te aioi atu ia aua lava nei faatagaina ni faatinoga a nisi tagata, e tata’i ese ai oe mai le faia o faaiuga amiotonu ma mulimuli i mamanu o le faavavau. O Satani, lea e le manao e te fiafia po o lou alualu i luma e faavavau, o le a tuuina lena fefe ma le faalotolotolua i lou mafaufau ina ia faatalitonu ai oe faapea e le tatau lava ona e taumafai e saili se fesoasoani, o le e mafai ai ona e maua se soa faavavau ma le olioli. Uso e ma tuafafine, ia faatuatua, aua le fefefe, ma ia agavaa e ulu atu i malumalu paia.

Ou te uunaia outou uma ina ia faamautu i lou mafaufau e manaomia ona e saili ma sue sau soa, e pei ona poloaiina ai e le Alii. Ina ia faia lena mea, e tatau ona e sailia avanoa e fegalegaleai ai ma tagata o le isi itupa o e ua iloa ou tulaga faatauaina o le talalelei. Mo lena faamoemoega, matou te fautuaina outou ia le gata ina malosi i le Ekalesia ae ia auai foi i avanoa uma ua saunia e le Ekalesia mo le atiina ae o le tagata lava ia faapea foi mafutaga. O le inisitituti o mataupu faalelotu, o nofoaga matagofie tele na e mafai ona outou faapotopoto ai ma feiloai atu ai le tasi i le isi, ma faaaoga ai uiga taua ma taleni faaleta’ita’iga, ina ia mafai ai ona outou iloa i latou o loo siomia ai oe, ia e ono fetaui lelei ona avea ma ou fesoasoani.

Ou te iloa o le toatele o outou e mananao e faaipoipo ae le lava avanoa. Matou te tiga alofa i le toatele naua o outou talavou nofofua matutua faamaoni o i ai i lena tulaga. Ou te masani i se aiga faamaoni i le Ekalesia, e toatele ni atalii sa i ai foi i lena tulaga. Sa tonu i matua ma atalii o le a matua faateleina le tapuai i le malumalu ma faaauau pea ona “faasoesa i le Alii” e uiga i lenei mataupu. Sa i’u ina oo mai faamanuiaga maoae, na maua ni soa, ma sa faia ni faaipoipoga i le malumalu. Ia faia mea uma e te mafaia ina ia agavaa ai mo le fesoasoani a le Alii i lea itu. Ia onosai, faalagolago i le Alii. O le a oo mai lava ia faamanuiaga.

Ia manatua, o se upumoni faigofie mai le lagi, e le tatau ona tuua na o oe i lau malaga i le faavavau. E tatau ona e sailia se soa amiotonu, ma fetuleni atu i luma i le faatuatua tele ina ia mafai ai, i Lona taimi, ona e faataunuuina le taunuuga e faavavau sa fuafuaina e lo tatou Tama Faalelagi mo oe.

3. O Le Fuafuaga Ia Faatasi le Tane ma le Fafine ma Pipii atu Le Tasi i Le Isi o se Tane ma se Ava.

I lalo ifo, e pei ona ta’ua ai i le mataupu lava lena o le Mose, na faia ai e le Alii ia Eva. Ona fetalai atu lea o le Alii, “O le mea lea e tuua ai e le tane lona tama ma lona tina, ae faatasi atu i lana ava; ona avea ai lea o i la’ua ma tino e tasi“ (Mose 3:24).

O la’u upumoni faigofie lona tolu lea mai le lagi, e tuua e le tane lona tama ma lona tina ae faatasi atu i lana ava, ma avea ai i la’ua ma tino e tasi. Ou te manatu e mafai foi ona tatou faapea, e tuua e se tamaitai lona tama ma lona tina ae faatasi atu i lana tane.

O le taunuuga o le faatasia o se tane ma se ava, i le tele lava o taimi, o le o ese mai lea mai le puipuiga ma lou faalagolago sa i ai i ou matua. E ui i lea, a o e faia lenei suiga, lenei sootaga fou—ina ia faamautuina, vavalalata, ma le le maluelue i se tane po o se ava—o le a le faaitiitia ai lou alofa faavavau ma le faaaloalo mo ou matua.

E leai se mea e suitulaga i lenei upumoni faigofie mai le lagi. O loo tautala faaaliga e uiga i se sootaga i le va o se alii ma se tamaitai. O le malamalama i lenei upumoni faigofie, o le a aveesea ai le fenumiai e tusa ai ma faafitauli ia e faaigoaina ma le le tatau i nisi taimi “o tifiga fesuisuia’i o le olaga.” O na tifiga fesuisuia’i o le olaga, o faiga na a Satani.

Faamolemole ia iloa le taua o lenei upumoni faigofie mai le lagi. E tatau i se tane ma se ava ona pipii atu le tasi i le isi. I se isi faaupuga, e tatau ona pipiimau ma le faamaoni le tasi i le isi i le faaleagaga, lagona, ma le faaletino.

E pei ona sa ou ta’ua muamua, e talafeagai lelei lenei sootaga ona o le sauniga matagofie o le faaipoipoga faaselesitila o loo faia i o tatou malumalu. Ina ua e fanau mai i le feagaiga pe faamauina foi oe i ou matua i totonu o se malumalu, o noataga sa fusia ai oe i ou matua, o le a toe faatulagaina ina ia mafai ai e oe ma lou fesoasoani, o se alii ma se tamaitai, ona faamauina le tasi i le isi. O le sauniga lenei, o le a atili malosi ai lou faamauga i ou matua aua o le faamauina o oe i se fesoasoani, e faalautele ai le faamauga mai ou matua e ala atu ia te oe ma oo atu ai i au fanau ma tupulaga o le lumanai.

Ou te le iloa se isi faaiuga e sili atu o le a faia e se tasi o outou nai lo le filifilia o se soa, se tamaitai mo se alii po o se alii foi mo se tamaitai, ina ia avea ma tino e tasi i le silafaga a le Alii e ala i le faamauga i le malumalu. O le mamanu lea a le Alii ina ia faaipoipoina le alii ma le tamaitai ma pipii atu le tasi i le isi. Afai o i ai se isi lava mamanu, e le o se mamanu a le Alii.

4. E Taua le Saolotoga

Ua i ai se mataupu faavae matagofie na saunia e lo tatou Tama Faalelagi alofa, o le a ou faasino i ai o le upumoni faigofie lona fa mai le lagi. O le mataupu faavae lea o le saolotoga. I le tusi a Mose tatou te faitau ai: “E ui lea, ia faitalia oe ma lau filifiliga, aua ua tuuina atu ia te oe“ (Mose 3:17).

Ua tofu i tatou ma le saolotoga. O le a le faamalosia lava i tatou e le Alii e faia soo se faaiuga e solia ai lo tatou saolotoga patino. E ui i lea, e tatau lava ona tatou naunautai e talia le tiutetauave e oo mai i le faaaogaina o le saolotoga ua tuuina mai ia te i tatou e filifili ai. Ia manatua, sa taumafai Satani e fai faamalosi tagata uma e mulimuli atu ia te ia. Sa teena lena mamanu e le Tama Faalelagi. Ona fouvale ai lea o Satani ma “saili e faaumatia le saolotoga o le tagata“ (Mose 4:3). Ae ui i lea, o le fuafuaga a lo tatou Tama Faalelagi, e i ai lo tatou saolotoga. O se tasi o faaaogaga o lena saolotoga, o le sailia lea ma filifilia se soa.

Ua tatou iloa o a tatou aga masani, e tatau i le alii ona matua’ia avanoa e oo atu ai i fegalegaleaiga e faamasani ai. Ou te fia fautuaina alii talavou uma—ioe, alii uma, o e o mafai ona lagona mai lo’u leo ina ia fai ma tiutetauave le faamatua’ia o nei avanoa. Aua nei faatuatuai i lenei mataupu. E i ai se eseesega o se “avanoa ua le maua” ma se “avanoa ua maimau.” Aua le faamaimaua le taimi. Aua le faatuutuu i avanoa e te maua e sailia ai ma filifili se soa. E anoanoai mea na saunoa i ai perofeta i nei ona po, e uunaia ai outou ina ia sailia se soa. E patino lava le faatatau o lenei fautuaga i faifeautalai ua uma mai misiona, ma i latou ua agai i luma aoaoga ma ua lava le matutua e talia ai tiutetauave faatagata matua, lea e aofia ai le tiutetauave o le faaipoipo.

A o ou tuuina atu foi lenei fautuaga, ou te matua iloaina lava o loo i ai nisi o outou atonu ua iloa le le fiafia i ni fegalegaleaiga ua mavae. O se mea na foliga mai e sa’o, ae e le’i manuia, ma ua tatau ai ona toe amata. Atonu e faavasegaina lena mea o se “amataga sese.” O le toatele lava o talavou matutua ua oo i lea aafiaga. E tele mafuaaga: e eseese sini, e le tutusa aga fesootai, e le’i matua ma e le’i saunia mo se faaipoipoga, ma e matua le sa’o lava se lagona e maua. Aua e te lotovaivai. O loo e galue agai i faaiuga e faavavau ona taunuuga. Ia mataala. Ia loto tatalo. Ae ia mausali i lou manao e faaaoga lou saolotoga e sue ai ma filifili le fesoasoani sa’o.

Se i ou talanoa atu mo sina taimi i se mataupu maaleale, lea e tele ina aafia ai le saolotoga. O se mataupu atonu e malolosi lagona o o outou matua ma taitai e uiga i ai, ae atonu latou te le silafia pe faapefea ona talanoa atu ai ia te outou. O le mataupu o foliga vaaia o le tagata.

O le faaaogaina o le saolotoga, o nisi taimi e uunaia i le foliga vaaia o le tagata, ia te oe lava faapea le isi. E i ai taimi, e faigata ai ona faamasani ma le ituaiga tagata moni e i ai se isi, ona o se foliga na e mua’i vaaia ia te ia.

Ia e naunau e nonofo i lalo ma se uo faatuatuaina ma fai i ai le fesili lenei: O le a se mea e te fautuaina mai ou te faia ina ia faaleleia ai o’u foliga vaaia? Faalogologo i mea o le a fai atu ai. Aua ne’i e ita, ae ia e talia lelei lana fautuaga. Afai e tatau ai, ia faaleleia oe lava ma le fiafia ma le olioli, pe aofia ai le tatau ona e mata ataata, faaitiitia lou mamafa, pe sui le teuga o lou laulu, teuga, faiga o lavalava, uiga faaaloalo, tumama, po o se isi lava mea.

Ia, lena ua i’u ina ou ta’uina atu. O tiga ai la lou loto ia te au? Ia e manatua, o lou tino o le malumalu o lou agaga. Ia mautinoa o loo mama, teuteu, ia lelei, ia talafeauga, ma atoatoa ina ia mafai ai e lou agaga ona susulu atu ma ia vaaia e tagata uma.

Ioe, ou te iloa, e pei ona tatou iloa uma, o le a le maua e tagata uma le avanoa e faaipoipo ai i lenei olaga. Ae ui i lea, o le po nei ou te tautala atu ai e uiga i le tulafono ae le o le tuusaunoaga. O le tulafono, e tatau ona tatou sailia se soa e ui lava ina o le a toatele tuusaunoaga ona o le soifua maloloina, le lava le avanoa, ma isi mea talafeagai. O le mea e sili ai, o le fuafuaga atoa o le talalelei, e pei ona tatou malamalama ai, o i latou e faamaoni i lenei olaga ae ua le maua le avanoa e faaipoipo ai, o le a maua faamanuiaga ua latou le maua i lenei olaga i se isi taimi o mulimuli mai. E maeu lo’u faafetai ona o lena aoaoga faavae.

5. Tatou te Ola e Ala i le Galulue i Aso Uma o o Tatou Olaga

Ina ua tuua e Atamu ma Eva le Faatoaga o Etena, na tuuina atu e le Alii ia te i la’ua le faatonuga lenei, ma o la’u mataupu faigofie lona lima mai le lagi. Ou te faitauina mai le tusi a Mose: “O le a e ‘ai foi au mea ‘ai ma le afu o ou mata, seia oo ina e toe foi atu i le eleele—aua o le a e oti lava—aua o le eleele na faia ai oe; aua o le efuefu oe, ma o le a e toe foi atu lava i le efuefu“ (Mose 4:25).

E tatau ona tatou galulue a o tatou aumau ai i lenei lalolagi. E tatau ona tatou saunia i tatou lava ina ia faalagolago le tagata ia te ia lava, ma e tatau ona tatou naunau ma ia mafai ona tausia se aiga.

O le mea e lelei ai, e toatele outou ua maua le avanoa e maua ai se aoaoga i iunivesite ma kolisi. O isi o outou ua maua le avanoa matagofie ma le tulaga ese, e maua ai tomai ma aoaoga o le a faalaeiauina ai outou ina ia mautu ai se galuega lelei, ma saunia ai mea tautupe mo lou aiga. Ou te tautala atu e tusa ai ma le vaega mulimuli, e uiga i le Tupe Faaagaga mo Aoga. O au o se tasi o le au faatonu o lenei tupe, ma ua ou iloa faamanuiaga sili o lena tupe mo outou o loo taumafai ma le naunautai e faaleleia outou lava ma outou sauniuni e faaipoipo atu i se soa, ma tausia se aiga amiotonu i le Ekalesia. Ou te fai atu, ia te outou uma lava, ia outou naunau e galulue malosi e saunia mea manaomia mo lou aiga, a o e ola ai i lenei lalolagi.

Ua faatele ona uunaia outou e Peresitene Hinckley ina ia maua aoaoga uma tou te mafaia—ina ia mafai ai ona e tausia lou lava aiga ma tautua i le Ekalesia.

6. E Tatau i Tane ma Ava Ona Maua Ni Fanau ma Foafoa ai se Aiga

I lo’u mafaufau, o le upumoni faigofie lona ono mai le lagi, ma o le upumoni aupito taua e sosoo ma le pipii atu o le tasi i le isi o se tane ma se ava, o le upumoni lea o loo maua i le mau lea mai le tusi a Mose: “Ma sa oo ina iloa e Atamu lana ava, ona fanauina ai lea e Eva ia Atamu atalii ma afafine, ma sa amata foi ona latou fanafanau ma uluuluola i le fogaeleele“ (Mose 5:2).

O lenei upumoni faigofie mai le lagi ua vaaia ai le tiute o le fanauina o fanau. O lea, ua i o outou luma lenei upumoni—ae aua le faia a’o le’i faaipoipo! Faamolemole ia teumau i lou loto ma lou mafaufau, lou naunau ina ia avea o se matua [tama po o se tina] i le taimi e tatau ai. Fai ia maua nei uiga e tatau ai ina ia avea o se tama po o se tina alofa i fanau o e o le a faamatagofieina ai lou aiga i se taimi. Saili ina ia maua le onosai ma tomai o le a e manaomia, e aoao atu ai ma tausia se fanau i le malamalama o le Alii.

Ua faateleina le malolosi o le Usoga o le Ekalesia e fautuaina ulugalii talavou ina ia agai i luma ma faia ni aiga. O le a fautua mai le lalolagi atonu e le lelei ona fai se aiga seia tulaga lelei fuafuaga faaletino. Fai mai le lalolagi e faatali seia mae’a lau aoga; faatali seia maua se fale lelei, o meaafale, ma isi mea e manaomia; faatali seia maua se galuega mautu e lava se tupe e maua ai; faatali seia maua ni meataalo ma mea faafiafia ma faafaigofie ai. O nei faatalitali uma lava, o mea o le lalolagi ma o le uunaiga foi lena a Satani i lona taumafai e faataumaoi le aiga.

Ua aoao mai e perofeta a maea ona manatunau i auala ma tulaga—e aofia ai le soifua maloloina patino—ma isi tulaga moni ua silafia e ulugalii taitasi, ua le tatau loa ona tatou toe faatali pe faatuai ona fai se aiga. Ia i ai le faatuatua e laa ai i luga i lenei vaega o lou olaga, ma le iloa o le a fesoasoani lou Tama Faalelagi ia te oe ma lagolagoina oe i ou luitau faapitoa ma tupito lea e oo mai i le avea ai ma se matua.

E le tatau ona faatuai le faia o se aiga se’i maua uma mea sa maua e ou matua ina ua e tuua lou aiga. Ia manatua, e tele tausaga sa galulue ai ou matua, e fiasefulu tausaga, faatoa maua le fale manaia ma meaafale ua i ai nei, ma e tatau foi ona e naunau ia i ai le faatuatua e amata i le mea ua e i ai nei, ma galueaiina, tuputupu a’e, ma atiina ae a o i ai sou aiga. I le avea ai o se tane ma se ava, ia sagisagi fiafia e galulue faatasi ma ositaulaga ina ia faataunuuina ai lenei faamoemoe.

Ia faaeteete ia aua nei e faatuatuai i le faia o se aiga, ona se’i mafai ona faatau meataalo po o mea faafiafia, a o lona taunuuga, e le faamanuiaina ai oe e faavavau.

Afai e te talanoa i le tele o ulugalii matutua i lau uarota po o le paranesi ma isi au uo, o le a e iloa ai e toetoe lava o ulugalii uma sa latou amataina o latou olaga faaipoipo ma o latou aiga i ni nai meatotino itiiti—aemaise lava pe a faatusatusa ia latou mea ua i ai nei.

Sa ma faaipoipo ma Sister Tingey ma sa fanau le ma ulumatua a o o’u aoga faaloia. O le fale muamua sa ma mautotogi ai, o se fale i le fogafale i lalo, ma o se tulaga matuai maulalo lava mai le mea sa ma i ai muamua i fale o o ma matua. O le taualuga o alasavali taitasi i faitotoa, e i ai ni paipa faavevela, ma o le uumi o paipa e feagai tonu ma lo’u muaulu. Ou te le iloa pe faafia ona tau ai lo’u ulu pe a ou alu atu mai lea potu i lea potu. E manatua e Sister Tingey, pei ona ia faaigoaina ai, le “pepa mataga sa ufi ai puipui,” e i ai ata o toa [moa] tetele lanumumu. E leai ni masini ta lavalava, sa ma faaaogaina le Fale Tata Lavalava mo le 18 masina.

O lo matou fale mautotogi lona lua, a o ou tautua i le militeli, o fale soofaatasi e lua aiga e nonofo ai, ae tasi le faletaele e faaaoga e tagata uma, e tu i le va o fale. Atonu tou te mate’ia le mafaufau o lo’u toalua i lena tulaga. Sa ma momoe i se moega faamoe, sa faigofie ona fesiita’i ae o le matua le manaia lava i le moe. O le ma laulau muamua lava o le umukuka, o se laulau e fai i pepa malo e faamomoe vae. O le tele lava o taimi i le tausaga sa ma faaaogaina ai lena laulau, ma sa faafuasei ona leua ia te au se tasi o vae, ma salalautasi uma ai le laulau ma mea sa i ai i luga o le fola.

Mo le tele o tausaga ina ua toafa le ma fanau e i lalo ifo o le iva tausaga, sa matou nonofo ai i se fale mautotogi e na o le lua potumoe. Pe na matou feoma’i ea? Ioe! Ae, i le taimi nei, o nisi o mea sili ona matagofie e manatuaina e lo matou aiga, e maua mai i lena vaitaimi.

Ua outou vaai i ai, sa na o ni nai mea iti lava o le olaga na ma maua, leai ni mea se tele i le faatoa faatulagaina o lo ma’ua aiga. A toe tilotilo nei i ai, ona ma iloa ai lea e le’i afaina lava lea itu. Sa uluitino lo ma’ua alofa, sa ma mananao e amata se aiga, ma sa na ona ma faalagolago lava i le Alii ma faatuatua o le a manuia mea uma.

O le taimi nei, i le 48 tausaga mulimuli ane ai, ua i ai so ma’ua fale matagofie ua i ai mea uma, ma atonu ua tele atu, mea e tatau ona i ai ma te manaomia ma faafaigofie ai le olaga. Peitai, ina ua ma faatoa amata, sa matua itiiti lava ni mea sa ma maua. Ua sili atu lo ma fiafia i le taimi nei, aua sa faatupulaia lo ma alolofa e ala i tulaga faigata o le olaga sa ma fefaasoaai ai i nisi taimi, ae le ona ua sili atu ni oa o le lalolagi ua ma maua.

E tatau foi ona ia te outou lena lava faatuatua ma ia naunau e agai i luma i lena olaga. Ia sauniuni e amata i le mea ua e i ai nei, ma tuputupu a’e ai ma atiina ae lou aiga i le alofa ma le talisapaia o ou faamanuiaga.

7. E Faaauau Pea se Aiga, ma Avea ma se Aiga e Autupulagā

O le isi upumoni faigofie mai le lagi o le mamanu lea na faatuina e Atamu ma Eva, ia le gata ina i ai fanau ae ia uluuluola. E faitauina: “Ma sa amata mai i le taimi lena ona o eseese atu taitoalua atalii ma afafine o Atamu i le laueleele, ma galueaiina le fanua, ma faia lafu manu, ma sa latou fananauina foi ni atalii ma afafine“ (Mose 5:3).

O loo tatou taumafai e atiina ae se Ekalesia e autupulagā. O le uluuluola—e le gata ina avea o ni matua ae ia avea foi o ni matua matutua ma matua o matua matutua—o se tasi lea o faamanuiaga faatamaoaigaina e oo mai i tagata faamaoni o le Ekalesia.

A o matauina e le Au Pulega Aoao le faatupulaia o le Ekalesia ma ua atiina ae i le tele o atunuu o le lalolagi, o se tasi o aafiaga faamalieloto ua tatou maua, o le vaaia lea o aiga faamaoni o augatupulaga eseese o nonofo i le mea sa i ai le Ekalesia mo sina fiasefulu o tausaga. Ua tatou vaaia fanau, o fanau a fanau, matua matutua, ma isi. O le faataitaiga lea. O le mea lea e tatau ona tatou galulue i ai i soo se mea e mafai ai: o se aiga tele ma le matagofie o le a fesoasoani i le faatupulaia ma le atiina ae o le Ekalesia, i soo se atunuu po o soo se nuu o e nofo ai.

O loo i ai se mau matagofie ma le auiliili i le Salamo:

“Faauta, o le fanau o le tofi lea mai ia Ieova; o e ua fanau mai, o le taui lea mai ia te ia.

“E pei o u fanafana i le lima o le toa, e faapea lava atalii o taulelea.

“Amuia le tagata ua tumu ai lana utu” (Salamo 127:3–5).

Pe ua e naunau ea e faaaoga lou mafaufau e vaai atu ai i le mea o le a e i ai, po o le mea e te manao ia e i ai i le 20 po o le 25 tausaga o lumanai? Afai ua 20 nei ou tausaga, o le a le ituaiga olaga o le a e i ai pe a 40 pe 45 ou tausaga?

Toetoe lava o taimi uma ou te faia ai lena fesili i talavou matutua nofofua, latou te faamatalaina le “aiga” o la latou uluai faamuamua lea. O oa faaletino ma meataalo e le o se mea e taulai soo i ai. O le siosiomia e se aiga alolofa—o a outou fanau ma fanau a fanau—o le mea lea e faamatala e le toatele o outou, tou te mananao ai.

Amata nei ona fai lena vaaiga mamao patino, ia avea ma valoaga a oe lava ia o le a taunuu.

8. Ia Tatou Faailoa atu le Atua, Tapuai ia te Ia, ma Osi Atu a Tatou Taulaga ia te Ia

Ina ua amata le olaga o Atamu i fafo atu o le Faatoaga o Etena, sa amata ona ia osia taulaga. Tatou te faitauina faapea:

“Ma ina ua mavae aso e tele, ona alu ifo lea o se agelu a le Alii ia Atamu ma ua faapea atu ia Atamu: Se a le mea ua e osi atu ai taulaga i le Alii? Ona tali atu lea o Atamu ia te ia: Ou te le iloa, ae ua poloaiina ai au e le Alii.

“Ona fai mai lea o le agelu, ua faapea mai: O lenei mea, o se faatusa o le taulaga a le Alo e Toatasi na Fanaua e le Tama, o Le ua tumu i le alofa tunoa ma le upumoni.

“O le mea lea, ia e faia mea uma ua e faia i le suafa o le Alo, ma ia e salamo ma ia faavavau ona e valaau atu i le Atua i le suafa o le Alo” (Mose 5:6–8).

O lenei upumoni faigofie mai le lagi a o lua faavaeina lo oulua olaga o se ulugalii faaipoipo faatasi ma se aiga, ia manatua pe o ai oe i le va feagai ai ma lou Tama Faalelagi. Ia manatua o Ia o lou Atua ma lou Tama ma o oe o Lona atalii po o le afafine. Avatu taulaga o lou taimi ma taleni ia te Ia. Ia faamaoni i le Ekalesia. Auauna atu i ou uso a tagata. Saili e atiina ae le amiotonu. Faailoa atu ou mau faamanuiaga e ala i le ofoina atu ma toe faafoi atu ia te Ia se sefuluai o au tupe maua ina ia faailoa atu ai ma aloaia e ala i le lotomaulalo lou faalagolago i lou Tama Faalelagi.

9. E oo mai Faamanuiaga Folafolaina Ona o Nei Osigataulaga

O le upumoni faigofie [lona iva] mai le lagi o le aloaiaina lea o faamanuiaga e maua ona o lau osigataulaga. Fai mai le mau:

“Ma o lena lava aso na afio ifo ai i luga o Atamu le Agaga Paia, o Le e molimau i le Tama ma le Alo, o le na faapea mai: O Au o le Atalii e Toatasi na Fanaua o le Tama mai le amataga, ma mai i le taimi nei e oo lava i le faavavau, ina ia togiolaina oe, talu ai ona ua e pau, atoa ma le fanauga uma a tagata o e salamo.

“Ma sa viia e Atamu le Atua i lena aso ma sa faatumuina o ia i le Agaga Paia, ma sa amata ona ia perofeta ane e uiga i aiga uma o le lalolagi, ua faapea atu: Ia viia le suafa o le Atua, aua ua pupula ou mata ona o lou solitulafono, ma o le a ou maua le olioli i le olaga nei, ma o le a ou toe vaai i le Atua i le tino.

“Ma sa faalogo Eva, le ava a Atamu, i ia mea uma, ma sa ia fiafia, ma faapea atu: Ana le seanoa la ta solitulafono, semanu ta te le maua ni fanau, ma le iloa le lelei mai le leaga, ma le olioli o le togiolaina o i taua, ma le ola faavavau e tuuina mai e le Atua ia i latou uma o e usiusitai.

“Ona viia lea e Atamu ma Eva le suafa o le Atua, ma sa la faailoa atu ia mea uma i o la atalii ma afafine” (Mose 5:9–12).

Pe na outou matauina nisi o faamanuiaga na maua e Atamu ma Eva ona o la la’ua taulaga? Sa la olioli i le mafutaga ma le Agaga Paia, o le sa molimau atu i le Tama ma le Alo, ma taiala ma taitai i la’ua ia la’ua faaiuga uma. Sa faamanuiaina i la’ua e olioli i le agaga o valoaga e faatatau i lo la’ua aiga ina ia taialaina i la’ua i faaiuga la te faia ma le ala e tausia ai a la’ua fanau. Sa pupula o la’ua mata ina ia mafai ai ona la iloa le lelei ma le leaga ma mafai ona faia filifiliga tonu mo lo la’ua aiga.

Ua ta’u mai i tusitusiga paia o le a maua e Atamu ma Eva le olioli ma fiafia ai i faamanuiaga na oo mai i lo la’ua aiga. Ma sa folafola atu foi ia i la’ua, o nei mea uma ma faamanuiaga o le a faailoa atu i o la’ua atalii ma afafine—o a la’ua fanau.

Tou te talitonu e mafai foi ona avea nei folafolaga ma outou, o se taunuuga o lo outou naunautai e talia tiutetauave o le faaipoipoga ma le aiga? Ou te molimau atu o le a fai mo outou, ma e mafai foi ona outou maua na lava faamanuiaga i o outou tulaga e faapei foi ona i ai ia Atamu ma Eva mo lo la’ua aiga.

10. O Le Atoaga o le Talalelei, e Aofia ai Sauniga Uma o le Malumalu, Ua Avanoa Nei mo i Tatou

O le toe upumoni faigofie mai le lagi o le a ou faasoa atu ia te outou i lenei po, e faatatau i faamanuiaga e maua mai i sauniga paia. Tatou te faitau i fuaiupu faaiu o le mataupu e lima o le Mose e faapea:

“Ma sa faapea lava ina amata ona talai atu le Talalelei mai le amataga e agelu paia na auina mai i le afioaga o le Atua, ma Lona lava foi siufofoga, atoa ma le meaalofa o le Agaga Paia.

“Ma sa faapea ona faamauina atu ia Atamu mea uma i se sauniga paia, ma le Talalelei ua talai atu, ma sa auina atu se poloaiga, e tatau ina i ai i le lalolagi, seia oo i le iuga o le lalolagi; ma ua faapea lava ona faia. Amene” (Mose 5:58–59).

O le mau, lea ua avea ma a’u upumoni faigofie mai le lagi, ua folafola mai ai o mea o le a fai mou pe afai e te mulimuli i le mamanu lea ua tatou talanoaina. O lona uiga, ioe, o faamanuiaga uma lava o le Ekalesia toefuataiina o au ia. E patino lava, pe a faasino i “se sauniga paia,” e faasino atu ai i malumalu ma sauniga matagofie o le malumalu ma sauniga o loo maua ai iina. Se faamanuiaga ina a matagofie tatou te tulitulimatagau i ai, ina ia mafai ai ona e olioli i faamanuiaga atoatoa o le talalelei a Iesu Keriso, e aofia ai faamanuiaga o le malumalu, pe a e naunau e faatino upumoni faigofie ma le matagofie mai le lagi ua ou faasoa atu ia te outou i lenei afiafi.

Mulimuli i Fautuaga Musuia

I se aotelega, o upumoni faigofie e 10 mai le lagi ua tatou talanoaina i lenei afiafi o:

1. Na faia e le Atua lenei lalolagi tatou te nonofo ai ma faaaoga.

2. E le tatau ona mau toatasi le tagata.

3. O le fuafuaga ia faatasi le tane ma le fafine ma pipii atu le tasi i le isi o se tane ma se ava.

4. E taua le saolotoga.

5. Tatou te ola e ala i le galulue i aso uma o o tatou olaga.

6. E tatau i tane ma ava ona maua ni fanau ma foafoaina ai se aiga.

7. E faaauau pea se aiga, ma avea ma se aiga e autupulagā.

8. Ia tatou faailoa atu le Atua, tapuai ia te Ia, ma ofoina atu ia te Ia a tatou taulaga.

9. E oo mai faamanuiaga folafolaina ona o nei osigataulaga.

10. O le atoaga o le talalelei, e aofia ai sauniga uma o le malumalu, ua avanoa nei mo i tatou.

Faamolemole aua nei teena lenei fautuaga. Taumafai e aua nei faatuai ona faaipoipo pe a maua le avanoa. Aua le saili ia atoatoa lelei se soa. E masani lava, e leai se atoatoa. Ia manatua, e te le o atoatoa. Ae ia saili se tane po o se ava o le a oulua tuputupu a’e faatasi seia oo ina atoatoa.

Aua nei faatuai le faia o se aiga. Ia naunau e ositaulaga ma tausia se aiga faatasi ai ma luitau uma o le a tulai mai ai, ma le iloa o le a i ai ni mea matagofie e manatua i le gasologa, o le a faamalosia ai ma lagolagoina le aiga i tausaga a sau.

Ou te iloa ua mamafa tele la’u fautuaga ia te outou i lenei po. O le a foliga mai i nisi, e le mafai ona maua. Ae faamolemole ia faatuatua, ma ia tuufaatasia lena faatuatua ma galuega. Ua silafia e le Alii outou taitoatasi ma o outou tulaga patino. O le a Ia faamanuiaina oe. O le a fesoasoani o Ia ia te oe i le faataunuuina o le mea sa’o, ma le mea lena ua e naunau i ai ma le amiotonu. Faamolemole ia e faatuatua.

I le faaiuga, ou te talitonu e toatele outou e ono faapea ane, “Ou te talitonu i mea uma ua e fai mai ai, ma ua ou manao foi ia ou maua ma mulimuli i nei mamanu i lo’u olaga. Peitai, e faapefea ona ou iloa pe ua sa’o a’u faaiuga?”

Ou te fia tali atu: O le a e iloaina i le ala lava e tasi e faapei ona maua ai e taitai o le Ekalesia i le taimi nei ia uunaiga e tau atu ai i le faiga o le tele o faaiuga taua. O le a e iloa i le Agaga.

Ua ia te oe le aia tatau mo le filemu ma se molimau faaleagaga, lena o le a faamautu ai ou lagona ua sa’o. O ou lagona o le alofa o le tasi i le isi ma lo oulua tutu faatasi o se ulugalii o le a faailoa atu ia te oe, i le ala ua ta’u mai i le Mataupu Faavae ma Feagaiga:

“E moni, e moni, ou te fai atu ia te oe, ou te tuuina atu ia te oe se vaega o lo’u Agaga, o le a faamalamalamaina ai lou mafaufau, e faatumuina foi lou agaga i le olioli;

“Ma o le a e iloa ai, po o le ala lenei e te iloa ai, mea uma e te manao ai mai ia te au, o mea e uiga i le amiotonu, i le faatuatua ma le talitonu ia te au o le a e maua” (MFF 11:13–14).

Aua e te saili atu nisi mea e pei o le leo o se mafui’e, ae faalogologo mo le leo itiiti, ma le filemu. O le a oo mai, ma o le a e iloa lava.

Ia faamanuia outou e le Atua, a’u tupulaga talavou pele—outou na o tama, tina, tama matutua, tina matutua, ma taitai o le Ekalesia i le lumanai. Matou te alolofa ia te outou. E alofa le Alii ia te outou. E finagalo o Ia ina ia outou fiafia. E finagalo o Ia ina ia outou maua le olioli. E finagalo o Ia tou te mulimuli i le mamanu o le faavavau ua uma ona Ia faavaeina.

Ou te molimau atu o mamanu o nei upumoni faigofie mai le lagi, e moni ia, i le suafa o Iesu Keriso, amene.

FAAMATALAGA

1. History of the Church, 6:303; ua faaopoopo le faatusilima.