Tatalaina o le Faitotoa i Faamanuiaga a Aperaamo

Julie B. Beck

Peresitene Aoao o le Aualofa

Faeasaite a le OAE mo Talavou Matutua • 2 Mati, 2008 • Iunivesite o Polika Iaga

O se avanoa le lau maua lo’u lauga atu ia te outou, o se augatupulaga tamalii, o e na filifilia a o lei faavaeina le lalolagi, ina ia o mai i lenei taimi e faia se galuega taua. E toatele outou ua ou feiloai atu i ai i le gasologa o la’u tautua i le Ekalesia, ma ua faagaeetia lava au i lo outou atamamai ma lo outou lelei. Ua mafai ona ou vaai faalemafaufau i a outou potopotoga i le lalolagi atoa, mai le Iunaite Setete, Mekisiko, Pasila, ma isi atunuu i Amerika i Saute e oo atu i Filipaina, Iapani, Korea ma le tele o atunuu o Europa. Ua ou vaai atu foi i lo outou taunuu ane i loli i le Ripapelika o Tominika.

Ua tatou aoao mai i le Tusi a Mamona a oo ina liua le tupulaga faiae—o outou na—i le talalelei a Iesu Keriso ma tausia a latou feagaiga, ona lelei lea o le lumanai mo le nuu uma o le Atua. Ae a le maua ni molimau a le tupulaga faiae ma talia o latou tiutetauave, ona leai ai lea o se faamoemoe o tagata matutua ma sili atu lo latou faamaoni (tagai Mosaea 26:1–4; tagai foi 1 Nifae 8:23). Faafetai atu mo o outou olaga lelei ma le lumanai manuia tou te aumaia ia te au ma le anoanoai o isi tagata.

Ua tatou potopoto mai i lenei po, muamua ona ua i ai sa tatou molimau i le talalelei toefuataiina a Iesu Keriso. A na leai lena molimau semanu e leai se uiga o le tuuina atu o se savali ia te outou. Ou te iloa ua i ai so outou talitonuga maumaututu i lo tatou Tama Faalelagi ma le Faaola faapea foi i perofeta o aso e gata ai, a na leai semanu tou te le taumafai e auai mai i lenei sauniga. Ina ua tatou iloa e moni le talalelei toefuataiina, ua tatou taliaina atoa ma mulimuli ai ae ua le na o ni vaega e faigofie mo i tatou. Ua tatou talitonu i le fuafuaga a lo tatou Tama Faalelagi ma mea uma ua aoaoina ai i tatou e perofeta ma aposetolo. Ua ou iloa, a o outou auai mai i lenei po ma se loto matala ma se loto tatalo, o le a auina atu e le Agaga ia te outou taitoatasi ni aoaoga patino ma le taua.

A o ou manatunatu loloto ma tatalo i le Alii ia ou iloa ai po o le a se mea e finagalo o Ia ou te ta’uina atu ia te outou i le po nei, sa tele ina tau lo’u mafaufau i nai ou tei e toa 79. Sa matou savalivali faatasi ma i latou, pepese faatasi, ma faalogo foi ia latou molimau. Ou te alofa ia te i latou uma lava. Ou te iloa e tofu naunau i latou uma taitoatasi ina ia faia se eseesega mo le lelei i le lalolagi, ma ia i ai se mea e aoga ai o latou olaga. O le toaluasefulu ma le lua o nai o’u tei na e 79, e i le vaitausaga o talavou nofofua matutua. Mai lena 22, e toa 11 i latou o loo faamisiona nei pe ua uma foi misiona, a o isi la ua sauniuni misiona. O nisi ua sauniuni nei e faaipoipo. O nisi ua maea aoga, ma o loo sailiili mo o latou tulaga i le lalolagi. O i latou uma lava ua maea pe o loo faaauau foi aoaoga.

O nai o’u tei nei, e i ai ni meaalofa tupito o loo i ai, ma o nisi o i latou sa feagai ma ma’i, o manuaga, ma mafatiaga. O le iloaina o na mea i le tele o itu, ua avea ai i latou ma o outou sui, ma sa ou saunia ai lenei savali a o ou mafaufau ia i latou. A ou mafaufau ia i latou, ua ou mafaufau foi ia te outou. Ua tofu i ai outou i tulaga lava na e tasi e pei o nai o’u tei, pe o le a oo foi i ai. Sa ou saili atu mo musumusuga pe mafai faapefea ona ou fesoasoani atu ia te i latou i nisi o a latou fesili, ma i le faia ai faapea, ou te faamoemoe o le a avea foi ma se fesoasoani ia te outou taitoatasi. Ou te valaaulia outou uma ina ia avea o se vaega o lo matou aiga lautele i lenei afiafi. O le a ou lauga atu ia te outou o se uso o lo outou tina po o se tuafafine o lo outou tama e alofa ma manatu atu.

O Faamanuiaga a Aperaamo

Na oo foi le perofeta o Aperaamo i le vaitau e tasi o le olaga e pei ona outou i ai nei. Ua tatou faitau i ai i le Penina Tau Tele: “A o ou nofo i le fale o lou tama i le nuu o Kaletaia, sa oo ina iloa e au, o Aperaamo, ua tatau ona ou alu atu e saili se tasi mea ou te nofo ai” (Aperaamo 1:1). Ua oo Aperaamo i le taimi e alu ai o ia lava ma amata lona olaga faatagata matua. Fai mai a ia, o ia “o se sa mulimuli atu pea i le amiotonu” ma sa naunau ia maua “le poto maoae silisili, ma avea ma tama o atunuu e tele, ma alii o le filemu” (f. 2). Sa ia iloaina o loo i ai se “fiafiaga silisili ma le filemu ma le mapusaga” (f. 2) mo ia nai lo le mea sa i ai.

Sa sailia e Aperaamo na faamanuiaga. Sa ia manao moni lava i ai. Na tau atu e le Alii ia Aperaamo:

“Ma o le a ou faia ia avea oe ma nuu tele, ma o le a faasilisili foi ona ou faamanuiaina oe, ma faamamaluina lou igoa i atunuu uma, ma o le a avea oe ma faamanuiaga i au fanau o le a tutupu mai pe a e mavae atu, ma o latou lima foi latou te tauaveina ai lenei galuega ma le Perisitua i atunuu uma;

“Ma o le a ou faamanuia atu ia i latou e ala atu i lou igoa; aua o i latou uma o e talia lenei Talalelei, e faaigoaina i latou i lou igoa, ma avea i latou ma au fanau, ma o le a latou tutu mai foi ma viia oe, o so latou tama;

“Ma o le a ou faamanuia atu ia i latou o e faamanuia ia te oe, ae o le a ou faamalaia atu ia i latou o e fetuu ia te oe; ma o le a ala atu ia te oe . . . ma au fanau . . . aua ou te tuuina atu ia te oe se folafolaga, o le a tumau pea lenei aia ia te oe ma au fanau o le a tutupu mai pe a e mavae atu . . . ona manuia aiga uma o le lalolagi i faamanuiaga o le Talalelei, o faamanuiaga lava ia o le olataga ma le ola e faavavau” (Aperaamo 2:9–11).

O lena feagaiga na toe faamautuina e ala mai ia Iosefa Samita ia i tatou i le vaega e 132 o le Mataupu Faavae ma Feagaiga (tagai f. 30–32). O nei faamanuiaga o le fiafiaga sili, filemu, ma le mapusaga o faamanuiaga ia tatou te taufai mauaina pe a tatou osia feagaiga i malumalu paia ma faavae ai aiga faavavau. O o outou faamanuiaga faapeteriaka e fesoasoani e te malamalama ai i lou lava gafa patino ia Aperaamo.

E tele lava ina saunoa taitai o le Ekalesia i talavou nofofua matutua e uiga i le sailia o na faamanuiaga—o faamanuiaga e na o le faavaeina o aiga e faavavau e mafai ona maua ai. Ua iloa e outou taitoatasi o lou fiafia i le lumanai, o lou alualu i luma e faavavau, ma le ola o le malo o le Alii i le fogaeleele e faalagolago i lo outou faavaeina o aiga malolosi ma le fiafia e faavavau.

I le avea ai ma Au Paia o Aso e Gata Ai faamaoni o le augatupulaga faiae, o le toatele lava o outou ua i ai se molimau o la outou matafaioi e faaipoipo ma fai ni aiga. Ua outou iloa e le mafai ona outou maua atoatoa faamanuiaga a Aperaamo pe afai e te nofofua. Peitai o le toatele o outou o le a le faaipoipo a taeao. O le mea moni, o le toatele o outou e matua le iloa po o ai o le a faaipoipo i ai. O lea la, a matou talanoa atu i lau matafaioi e faaipoipo, atonu o le a matou faatupuina ni lagona o le le fiafia aua e le o i ai lenei vaega taua o lou alualu i luma e faavavau i lau lisi faatulagaina o taimi.

E faamanatu mai ai ia te au se aafiaga na oo i ai lo’u toalua a o taalo i le au pasiketipolo a le aoga maualuga. Sa saunia lelei le au taaalo ma sa malaga atu i le fale taalo o le au na latou taaalo. Sa saunia i latou i le tino ma le mafaufau e faatoilalo au na latou taaalo. Sa i ai i latou i le potu e sui ai lavalava ma faatoa uma lava le tautalaga a le faiaoga. Sa matua faatumulia i latou i le malosi ma le mautinoa a o taufetuli atu i le faitotoa e o atu ai i le malae e taaalo ai. Sa loka le faitotoa! Sa taufai tautulei solo le au taaalo i le faitotoa, ma uma ai lo latou malosi i le potu e sui ai lavalava a o lei amataina le taaloga.

O nisi taimi ou te manatu ai o le mea lena e tupu pe a matou talanoa atu ia te outou e uiga i le faaipoipoga ma le aiga. Matou te fautuaina outou ina ia sagisagi fiafia atu i avanoa, ae o le mea moni atonu tou te lagona o loo outou tuleia se faitotoa o loo loka. E le manaomia ona outou faatalale i le malosi ma le naunautaiga o loo ia te outou i le taimi nei ma o loo manaomia e le Alii mai ia te outou ina ia fausia ai Lona malo.

O le mea la lea, ia tatou taulai atu i gaoioiga e fa e mafai ona outou faia i le taimi nei. O nei gaoioiga e mafai ona avea ma ki o le a fesoasoani ia te outou e talaia ai faitotoa i faamanuiaga a Aperaamo. O gaoioiga e fa o le auauna atu i isi, faasoa atu le talalelei, auai i le faatinoina o galuega faalemalumalu ma talafaasolopito o aiga, ma le sauniuni mo lou lumanai.

O nei gaoioiga uma lava e valaaulia ai le Agaga Paia e avea ma au soa. E tausisia ai oe i nofoaga sa’o, faia mea sa’o, ma tagata sa’o, ma latou te vavaeeseina mai ai outou o ni soo o Iesu Keriso. O le auai faatasi ma a outou tupulaga i nei gaoioiga, o le a outou faavaeina ai ni faigauo ma sootaga ma maua ai aga fesootai e ono fesoasoani e maua ai se tasi e te faaipoipo i ai i le malumalu ma mafai ona oulua faavaeina ai se aiga e faavavau.

Auauna Atu i Isi

Muamua, auauna atu i isi. O tausaga o le talavou laiti ma le talavou matutua, e masani lava o taimi na o le manatu ifo o le tagata ia te ia lava. E matua tele naua faaiuga e tatau ona fai, ma e faigofie lava ona mafaufau ifo le tagata ia te ia lava. O le mea muamua, ia te au lava ia o se uso alofa o se tina po o se tuafafine alofa o se tama ou te fautuaina oe e fai, o le faagalo lea o oe lava ia. Atonu e tatau ona outou auai i ni nai gaoioiga laiti, ia e na ona faafiafia ai ae e mafai ma e tatau lava ona outou sailia auala e faafaigofie teisi ai le olaga mo se isi tagata.

O le ala aupito vave e saili ai uo, saili ai le fiafia, lagona ai le loto faafetai, ma maua ai le mafutaga ma le Agaga o lou alu ifo lea i ou tulivae ma ole atu i le Alii, “O ai o manaomia la’u fesoasoani i le asō?” ona amata loa lea ona fesoasoani atu.

E lei leva tele atu sa ou matamata ai i se tifaga e faatatau i ni alii talavou matutua se toalua sa nonofo i Egelani i le vaitau o le 1800. Sa fai e nei alii le fesili, “O ai e manaomia la’u fesoasoani?” Sa la molimauina le leaga ma le matautia o le fefaatauaiga o pologa, ma manatu ai e mafai ona la suia le lalolagi e ala i le faamutaina o le fefaatauaiga o pologa. O se galuega auauna atu lenei e matua le mafai lava ona fai. O lona uiga e tatau ona la suia le tamaoaiga atoa o lo la atunuu, ae le taulia ai aiaiga faavae o aga fesootai ma taualoa. Peitai sa fai mai nei alii, “E mafai ona ta faia lenei mea!” Na fai la la’ua faaiuga faapea ona o lo la laiti tele la te le iloa ai la te le mafai ona faia! Na umi se taimi o la tau faamaeaina lenei galuega faatino, ae na iu lava ina la tuuina atu lenei tautua tele mo tagata.

O le taimi nei, i atunuu uma o lenei lalolagi, o loo i ai mafuaaga taua e tele e mafai ona faaaoga ai lou malosi ma le tofamamao. I le lalolagi atoa, o loo i ai aai ma nofoaga malolo o loo manaomia le faamamaina. O i ai aoga ma nofoaga mo tamaiti matuaoti e tatau ona fausia ma faatotoga ma galulue ai ni tagata volenitia. E manaomia e malo le fesoasoani e ala i le mulimuli i mataupu faavae sa’o. Ua ia te outou le malosi o le mafaufau, lagona, ma la le tino e fai ai nei mea.

E tele mea taua i le talafaasolopito na taulamua ai le autalavou. E mafai ona outou auauna atu taitoatasi pe faatulagaina ma le agaga tatalo outou lava i o outou valaauga faatasi ai ma a outou vaega o talavou matutua, vaega o le uarota ma inisititiuti, ma a outou Aualofa ma korama o le perisitua; o le a mafai ona outou faia faatasi se eseesega mo le lelei i le lalolagi. O le tele lava o avanoa e auauna atu ai e maua lava e latalata i le aiga, i totonu lava o aiga ma uarota. Ua lava lo outou matutua ma lava lo outou faautauta e taulamua ai i le fuafuaina ma le faatulagaina o nei ituaiga o gaoioiga. Ua outou iloa foi le auala e maua ai tali i tatalo ina ia iloa ai po o le a le mea e finagalo le Alii tou te faia.

A o outou vaavaai atu i fafo, o le a faatasi le Agaga ma outou e taialaina outou i faaiuga uma o loo outou faia mo le suiga o le olaga, aua e mafutaina e le Agaga ia auaunaga amiotonu i taimi uma. O le a le faigata ia te outou ona maua ni nofoaga e auauna atu ai. A o outou auauna atu ma a outou tupulaga, o le a outou faavaeina ni faigauo lelei ma i ai ni aafiaga anoa o aga fesootai. Ma ona ua faalauteleina a outou faigauo, ua i ai se avanoa tele mo oe e maua ai sou toalua ma faavae ai se aiga e faavavau.

Faasoa Atu le Talalelei

Lona lua, faasoa atu le talalelei. Ua tumu lenei lalolagi i tagata latou te lei iloaina le tala fiafia o le talalelei. O outou o se vaega ua saunia faapitoa e mafai ona fesoasoani e faatumulia le lalolagi i le amiotonu ma le upumoni.

O nisi o outou sa maua le avanoa e avea ai ma uluai faifeautalai e faaaogaina le Tala’i La’u Talalelei. Ona o lena mea moni, o i latou o loo sauniuni mo misiona, o nisi ia o faifeautalai ua aupito sili ona agavaa ua i ai i le lalolagi. O i latou o loo sauniuni nei mo misiona ua sili atu ona saunia nai lo se isi lava augatupulaga e amata atu lava i le aso muamua o a latou misiona. Ona o o outou avanoa ua i ai i lenei taimi, ua tatau ona e taunuu atu [i lau misiona] ua e saunia e auauna atu. Ua tatau ona outou iloa le auala e agavaa ma maua ai le fesoasoaniga a le Agaga. E le gata i lea, o i latou ua iloa le auala e galulue malosi ai i aso taitasi, e sili atu ona fiafia i a latou misiona. Sa ou matua fiafia lava e faitau tusi mai nai o’u tei faifeautalai o loo faamatala mai ai luitau tulaga ese ma avanoa o a latou misiona. E tumu a latou tusi i le sagisagi ma le olioli. Latou te tusi mai e uiga i a latou misiona e pei ua latou oo i ni mea aupito silisili i o latou olaga.

E tatau ona faaauau pea lena afi o le faasoa atu o le talalelei pe a maea se misiona, ma, o le mea moni, o outou na faifeautalai maoae o le a le mananao lava e teu i luga o le fata o outou tomai e faasoa atu ai le talalelei. Talu ai ona o lena tou te nofofua ma e le o ia te outou le tiutetauave e tausia ai ni aiga, ua matua fetaui lelei lo outou faaauauina o le faasoa atu o le talalelei. E tofu outou ma ni uo po o ni tagata o aiga e lei liliu mai i le talalelei ma e le iloa foi le Atua e pei ona tatau ai. Toetoe o uarota uma ma paranesi o le Ekalesia ua i ai lisi o tagata ua le toe o mai e faafou a latou feagaiga i sauniga faamanatuga ona o ni mafuaaga. Ua alagatatau la outou fesoasoani i le toe aumaia o i latou. I o outou valaauga, o ni uo, po o le tagata lava ia, e mafai ona outou taulamua i le talaiina atu o le talalelei ma faatoaaga mai i latou ua le toe auai mai.

Sa ou vaaia se faataitaiga o lenei ituaiga o galuega faafaifeautalai a o avea au o se teine talavou i Pasila, i le mea sa avea ai lo’u tama ma se peresitene o le misiona. I ni nai vaiaso talu ona maea le misiona a se tasi o tamaitai faifeautalai Pasila, sa fai i lo’u tama ailoga a maua sona aiga faaletalalelei i le lumanai aua e leai ni alii o le Au Paia o Aso e Gata Ai i lo latou nuu e faaipoipo i ai.

Sa fai atu lona peresitene o le misiona, “O lena faatoa maea lau misiona sa e aoao atu ai ma faaliliu mai tagata i le talalelei. Pe sa avea oe ma se faifeautalai lelei?”

“Ioe!” o lana tali lea.

“Pe o ia te oe pea tomai ma le Agaga e faasoa atu ai le talalelei?”

“Ioe!” na ia faamautinoa mai ai.

“Ou te fautuaina la oe ina ia e foi i lou nuu. Alu i nofoaga e o i ai tagata lelei o le autalavou. Ona vaavaai lea mo se alii e i ai foliga o se faifeautalai po o se epikopo i le lumanai. Ia avea oe ma ana uo, faasoa atu ia te ia le talalelei, ma faaliliu mai o ia. E te ono maua ai se alii e te faaipoipo i ai pe a e faia lenei mea.”

O le mea tonu lava lena na fai e le tamaitai faifeautalai. Sa la feiloai ma se alii i lo latou nuu e agavaa ma lelei. Sa avea o ia ma ana uo ma faasoa atu le talalelei ia te ia, ma sa papatisoina o ia. Mulimuli ane, sa la atiina ae se alofa loloto o le tasi mo le isi, ma sa faaipoipoina i laua i le malumalu. Sa avea o ia ma epikopo ma se peresitene o le siteki ma se peresitene o le misiona ma se peresitene o le malumalu!

Ia, au uo talavou e, ou te le o fai atu o se fua faatatau faamaneta lea mo le sailia o se tane po o se ava. Faamolemole ia manatua, e pei ona faia e lenei uso Pasila, ua fautuaina faafia outou e perofeta ina ia outou saili atu i paaga e faaipoipo i ai na o i latou o tagata agavaa o le Ekalesia. Sa ou faamatalaina atu le tala e faapupula ai, a outou faaauau pea ona faasoa atu le talalelei pe a maea a outou misiona, tou te ono maua ni uo agavaa ia e mafai ona outou olioli ai i faamanuiaga o le talalelei, ma e ono mafai foi ona avea na uso fou ma itutino o la outou vaega o ni paaga ua faamoemoeina mo ni faaipoipoga.

Afai tou te faatulagaina outou lava ma le agaga tatalo i o outou valaauga ma a outou vaega nofofua matutua, vaega o uarota ma inisititiuti, ma a outou Aualofa ma korama o le perisitua e mafai ona outou fuafuaina ai ma faia gaoioiga faafaifeautalai i lalo o le taitaiga a taitai perisitua. Ua lava lo outou matutua ma lo outou faautauta e taitaia ai le fuafuaina ma le faatulagaga o nei ituaiga o gaoioiga. E manaomia e le Ekalesia lo outou malosi i lenei galuega taua. E toatele fanau a lo tatou Tama Faalelagi o loo manaomia le savali o le talalelei ae latou te lei iloaina lava le upumoni. Ua ia te outou tomai ma molimau e faasoa atu ai le talalelei. Ua ia te outou tomai ma molimau e tulei ai i luma le galuega a le Alii. Ua outou iloa foi le auala e maua ai tali i tatalo ma iloa ai le mea e finagalo le Alii tou te faia.

A o outou faasoaina atu le talalelei, o le a faatasi le Agaga ma outou e taialaina outou i faaiuga taua uma tou te faia, aua e mafuta mai pea lava pea le Agaga ma i tatou pe a tatou aoao atu ma molimau atu i le upumoni. A o outou faasoaina atu le talalelei ia outou tupulaga, o le a outou faavaeina ni faigauo lelei ma i ai ni aafiaga anoa o aga fesootai. Talu ai foi ua faalauteteleina a outou mafutaga ma faigauo ma o loo galue le Agaga ia te outou, ua i ai le avanoa faateleina e te maua ai se toalua ma faavaeina ai se aiga e faavavau.

Auai i Galuega Faalemalumalu ma Talafaasolopito o Aiga

Lona tolu, auai i galuega faalemalumalu ma talafaasolopito o aiga. O outou o se au ua saunia lelei e auai i galuega faalemalumalu ma talafaasolopito o aiga.

A o avea outou ma ni alii talavou ma tamaitai talavou, sa tuuina atu le matafaioi ia te outou e galulue ai i le Tiute i le Atua ma le Alualu i Luma o le Tagata Lava Ia. Tou te manatua o na tamaitusi o loo i ai le ata o le malumalu. Na mafua ona sa filifili e le Au Peresitene Sili le malumalu e avea ma faailoga mo le autalavou o le Ekalesia. Tamaitai, afai na e maua lau pine, pe o avea pea le malumalu ma se faailoga i lou olaga? Pe o taulai atu pea ea ou mata i le malumalu? Alii, pe mafai ea ona outou faia lena lava tala e tasi?

Ua outou iloa e toatele tagata ua maliliu i le tele o seneturi ua mavae e aunoa ma so latou malamalama i le talalelei. O na tagata o ni o outou aiga felatai pe mamao foi o outou sootaga. O loo faatalitali mai ia te outou e faia sailiiliga e tatau ai ina ia fesootai faatasi ai o outou aiga ma faia sauniga faaola mo i latou.

Ua lagolagoina le galuega faalemalumalu ma talafaasolopito o aiga e se malamalama o tekinolosi. Ua manino lava o outou o se tupulaga ua saunia faapitoa i taleni faatekinolosi e faia ai lenei galuega. Sa i ai i lo’u Tinamatua o Bangerter se molimau loloto ma se lagona faanatinati mo le galuega o talafaasolopito o aiga. I le tele o tausaga ua mavae, ina ua ia tuufaatasia igoa e 25,000 o lona aiga, sa ia tusia igoa taitasi i luga o fomu. Semanu e matua faafetai lava o ia mo se polokalama faakomepiuta e fesoasoani ai ia te ia, ina ia sili ona sa’o ma atoatoa. O lenei ua faitau selau tupulaga talavou talenia o e tupuga mai ia te ia ua mafai ona fesoasoani atu ia te ia mai lenei itu o le veli. E manaomia e lou aiga lau fesoasoani. E manaomia e lau uarota po o le paranesi lau fesoasoani i lenei gaoioiga taua.

O le tele lava o malumalu i le lalolagi e le o lava le pisi. Ua uma ona folafola mai e le Alii e toto i o outou loto ia folafolaga na faia i tama, ma o loto foi o fanau o le a liliu i o latou tama ina ia le faatafunaina lava le lalolagi atoa i Lona afio mai (tagai MFF 2:2–3). O o outou tomai faatekinolosi o se vaega o le faataunuuga o lenei valoaga, ma ou te faamoemoe ua outou maua se lagona o le faanatinati i lenei galuega. Na outou fananau mai i lenei vaitau e faia galuega faalemalumalu ma talafaasolopito o aiga.

O loo i ai foi faamanuiaga patino e mafai ona outou mauaina ona o lo outou auai i le faatinoina o galuega faalemalumalu ma talafaasolopito o aiga. O se tasi o na faamanuiaga o le mafai lea ona outou agavaa mo se pepa faataga o le malumalu, lea e faailoa atu ai lou agavaa i luma o le Alii. O se pepa faataga o le malumalu o se faatusa moni lava lea o le usiusitai. A outou auai faatasi ma la outou tupulaga i lenei galuega, e te iloa ai foi o loo agavaa i latou.

E i ai se tala e faamatala soo i lo matou aiga, e faapupula ai le taua o se pepa faataga o le malumalu. Ao avea ma se talavou matua nofofua se tasi o o’u uso matua, sa la sisiva i se tasi po ma se alii na manatu o ia e fia masani atili i ai. Ina ua foi mai o ia i le fale, sa ia faamatala i lo’u tina e uiga i lea alii. Sa le talitonu lo’u tina ma fai mai, e le mafai ona iloa pe lelei se tagata i le na o le siva i ai.

Sa tali mai lo’u uso, “E i ai lona pepa faataga o le malumalu, o lona uiga la ai e lelei.”

Sa fesili Tina, “E faapefea ona e iloa e i ai sona pepa faataga? Na e fesili i ai a o oulua sisiva, ‘E i ai sau pepa faataga?’ ”

Sa ata lo’u uso ma fai mai, “E leai, ae na fai mai sana tala o la e fuafua e o i le malumalu taeao ma sana soa faamisiona, o lona uiga la e tatau ona i ai sona pepa faataga e fai ai lena mea.”

Na fesili toto’a atu lo’u tina, “Aisea e matua taua ai le iloa o lena mea?”

Sa tali lo’u uso, “Ia, afai ou te iloa se alii e i ai sona pepa faataga, ua ou iloa na te tausia le Upu o le Poto, ou te iloa e totogi lana sefuluai, ou te iloa e auai o ia i ana sauniga, ou te iloa na te faamamaluina lona perisitua, ou te iloa na te lagolagoina taitai o le Ekalesia, ma ou te iloa foi e i ai lana molimau i le Tama Faalelagi ma Iesu Keriso. Ou te fia manao e amata i se pepa faataga e fai ma faavae o soo se sootaga ma faaauau atu ai mai iina. Afai ou te iloa e i ai se pepa faataga o se alii, e tele lava fesili ou te le tau faia.”

O faatonuga na tuuina mai talu ai nei e le Au Peresitene Sili o loo faamanino mai ai aiaiga faavae mo le mauaina o pepa faataga o le malumalu ma le mauaina o faaeega paia. Sa toe faamamafa mai ai, o le mauaina e se tagata o faaeega paia o le malumalu o se mataupu taua lea e tatau ona tuuina atu mo na o i latou lava ua lava saunia ma ua lava le matutua e tausia ai feagaiga latou te osia. Ua latou toe faamautuina mai ai foi e faapea o tagata nofofua o le ekalesia i o latou tausaga faaiuiu o ni talavou laiti pe o tausaga amata foi o ni talavou matutua e lei maua ni valaauga mo ni misiona pe lei faamau foi e faamoemoe e faaipoipo i le malumalu e le tatau ona fautuaina e ulu i le malumalu mo o latou lava faaeega paia. Ae peitai, o tagata uma o le ekalesia ua 12 tausaga po o le matutua atu foi, e mafai ona maua se Pepa Faataga e Faatapulaa le Faaaogaina e faia ai papatisoga mo e ua maliliu.¹

O outou e le o agavaa i le taimi nei mo le avanoa e tauaveina ai se pepa faataga e tatau ona oulua galulue ma lou epikopo po o le peresitene o le paranesi ina ia faaagavaaina ai outou lava mo se pepa faataga i se taimi vave e mafai ai. Faamolemole ia aua nei aunoa oe ma lenei pepa taua. Ou te molimau atu e moni le Togiola, ma e mafai ona faamagaloina agasala pe a salamo lelei.

E mafai ma e tatau lava ona outou matua faapisiina ia malumalu. O galuega faalemalumalu ma talafaasolopito o aiga o la outou galuega lena. E tele le galuega e faalagolago ia te outou! E manaomia e le Ekalesia lo outou malosi i lenei galuega taua. O outou e mafaia ona faataunuuina le tele o le galuega i lo outou malosi ma tomai.

A outou auai i galuega faalemalumalu ma talafaasolopito o aiga, ua outou mautinoa le i ai o le Agaga e faamafanafanaina outou i o outou luitau ma taialaina outou i faaiuga taua uma tou te fai. A o outou auai taitoatasi i lenei galuega, i a outou vaega o uarota ma inisititiuti, i a outou Aualofa ma korama o le perisitua, o le a outou faavaeina ni faigauo lelei ma aafiaga anoa o aga fesootai. Talu ai foi ua faalauteteleina a outou mafutaga ma faigauo ma o loo galue le Agaga ia te outou, ua i ai le avanoa faateleina e te maua ai se toalua ma faavaeina ai se aiga e faavavau.

Sauniuni mo Lou Lumanai

Lona fa, sauniuni mo lou lumanai. Ua outou i ai i se vaitau tulaga ese o le olaga. Ua tatau ona outou sauniuni mo matafaioi ma tiutetauave o le lumanai. E na o le faatasi lava ona outou maua lenei vaitau. Ia talisapaia! Ia olioli i ai!

I auga faalenatura o mea, o le toatele lava o outou o le a avea ma tane ma ava. O le a avea outou ma tama ma tina. O le a avea outou ma taitai ma faiaoga o le Ekalesia. O le a avea outou ma tagata faigaluega ma tagata foi e faafaigaluegaina tagata. Pe ua outou saunia ea mo na tiutetauave?

O le toatele o outou o loo feagai ma aoaoga. Ua faafia ona fautuaina outou e perofeta o aso e gata ai, ina ia outou maua aoaoga uma tou te mafaia. Ua outou ola i se lalolagi ua matua faateleina masini faaonaponei ma le lavelave. O le a fesoasoani aoaoga ia te outou e fausia ai le malo o le Alii ma saunia ai mea mo lou aiga i le lumanai. Ona o le taua tele o aoga mo le tupulaga faia’e, o lea na faavaeina ai le Tupe Faaagaga mo Aoga ma ua manuia ai i le taimi nei le silia ma le 30,000 tupulaga talavou i le lalolagi atoa. Ua tuuina atu foi e le Ekalesia le tele o punaoa i inisititiuti o aoaoga faalelotu i le lalolagi atoa, faapea foi i aoga ma iunivesite maoae a le Ekalesia. Ou te faamoemoe ua outou mulimuli i le fautuaga faaperofeta ina ia maua aoaoga uma ma polokalama faaleaoaoga tou te mafai ona maua.

E moni o le a sili atu ona mafai ona outou auauna atu i le Ekalesia ma fausia le malo o le Alii pe afai e lelei ni a outou galuega. O le a avea tina ma tama ma ni matua sili atu pe a aooga ma iloa pe faapefea ona foia faafitauli faaleaiga ma faafoe o latou aiga i auala poto.

O nisi o outou tamaitai o loo filifili nei pe tatau ona faaipoipo ma faia se aiga pe filifili se galuega. Tou te atamamai ma agavaa, ma ua outou maua avanoa e lei mafaufauina lava e o outou tina matutua. O avanoa mo le mauaina o faailoga ma avea ai outou lava ma ni tagata lauiloa i le lalolagi, e lei i ai se isi taimi na sili atu ai. Peitai, ou te faamoemoe o loo outou faia a outou faaiuga a o outou mafaufau i faamanuiaga a Aperaamo.

E tatau ona malamalama tamaitai o le Au Paia o Aso e Gata Ai, e tusa lava pe o le a le toatele o isi tagata latou te lisiina e fesoasoani ia i latou i o latou fale ma fanau, e le mafai ona latou faasafua atu lo latou tiute autu o se faafailele ma se faiaoga o o latou aiga. O le tulaga faaletina amiotonu, o le a oo atu i taimi uma i tulaga faaleoleo uma e tatau ona latou ausia ai manaoga o o latou aiga. I le avea ai ma se afafine o le Atua, o lē ua osifeagaiga ma Ia, ua tauaveina ai e outou taitoatasi le isi afa faaletamaitai e aupito taua ma ogaoga o le matafaioi mo le faataunuuina o le fuafuaga a le Alii.

Ua ia te outou uma taitoatasi le saolotoga e sauniuni ai ma le lotomaualalo ma le agaga tatalo ia auala e taulima ai ou avanoa faalegaluega. O filifiliga uma lava ua i ai se taunuuga. E le mafai ona e maua mea uma ma faia mea uma. E tatau lava ona e filifili faatasi ma mea e tatau ona faamuamua i le faavavau i lou mafaufau. Ou te faamoemoe o le a e malamalama, e leai ni galuega e tulaga ese. Soo se ituaiga galuega lava e i ai foi ona luitau masani. O le tele o filifiliga o loo maua i le lalolagi i aso nei, e tauva lava ma sini ma tiutetauave e faavavau. O le tele o filifiliga e mafai ona tauanauina ai oe ia tolopo pe faatapulaa le aofai o fanau e te aumaia i totonu o lou aiga. O le tele o filifiliga e mafai ona aveesea mai ia te oe ia taimi taua ma le malosi e manaomia e tausi lelei ai lou toalua, lau fanau, ma ou tiutetauave i le malo o le Alii. O nei filifiliga e i le lua va lea ma le Alii. Na te silafia manaoga o lou loto ma lou tulaga uiga ese.

O le toatele o outou i lenei aofia o le a i ai se aso e faaipoipo ai. I lenei vaitau o tapenapenaga, o e atiaeina ea ma vaavaai mo uiga talafeagai o se soa e faavavau?

O se vaitaimi ua tuanai na saunoa atu ai Peresitene Gordon B. Hinckley i alii e faapea: “O le tamaitai o le a e faaipoipo i ai, o le a ia faia se filifiliga matautia [o le faaipoipo] ia te oe. O le a ia tuuina atu lona tagata atoa i le alii talavou o le a faaipoipo i ai. O lea alii o le a tele ina taulimaina lona olaga o totoe.”²

Alii, pe o avea ea oe ma le ituaiga tagata e mafai ona fai atu i se teine e fai le filifiliga matautia [o le faaipoipo] ia te oe?

Tamaitai, o lena foi le fesili e mafai ona fai atu ia te oe. O le alii o le a e faaipoipo i ai o le a faia se filifiliga matautia [o le faaipoipo] ia te oe. I le vaega e 25 o le Mataupu Faavae ma Feagaiga, o loo tuu mai ai e le Alii le fautuaga lelei mo ava ina ia “fai . . . ma fesoasoani lea i . . . lau tane . . . i upu mafanafana, i le agaga agamalu” (MFF 25:5). Pe o le ituaiga tamaitai lena e i ai oe? O le alii e te faaipoipo i ai o le a matuai fiafia lava ona o ou aafiaga i lona fiafia.

O nisi o outou ua maua se tagata ua tosina atu i ai, o lē lua te tutusa lelei, ma i ai ni uiga e te faamemelo i ai, ae masalo o loo e popole i le faia o se tautinoga ona o loo e mafaufau e le iloa pe oo atu taeao po o le isi vaiaso po o le isi tausaga, ua e maua se isi tagata e sili atu ona lelei.

Ona o le taua tele o lenei filifiliga, o le toatele o outou e popole i le faia o se filifiliga sa’o. O faataitaiga o loo faaalia i ata tifaga ma tusi, i faiga e filifilia ai se toalua, e le tele se fesoasoani mo i tatou. E masani ona latou faaalia lenei filifiliga i se tulaga o le laki po o se taunuuga leaga, o se faiga faamaneta. O nei mafutaga mafana pupuu e masani ona faaalia le faavasivasi i le vave ona iloa i le taimi lava lena o se uo ua tasi lava.

E faatatau i se uo ua tasi lava, na saunoa mai ai Peresitene Spencer W. Kimball, “ ‘O uo ua tasi lava’ e le mo’i ma o se taufaasese; ma a o taumafai ia alii talavou ma tamaitai talavou i le filiga uma ma le agaga tatalo e sue se paaga e mafai ona sili ai le ogatasi ma le matagofie o le olaga, ae e mautinoa lava, e toetoe o soo se alii ma soo se tamaitai lelei e mafai ona maua le fiafia ma se faaipoipoga manuia pe afai e naunau uma i laua e totogi le tau.”³

Ua tuuina mai e perofeta ni taiala musuia e fesoasoani ia te oe i le sailia o se soa faaipoipo. I le luasefulu tausaga talu ai, na lisiina ai e Peresitene Ezra Taft Benson nisi o uiga e tatau ona vaavaai i ai alii i se paaga. O loo tumau pea le moni o ana saunoaga:

“O lenei uso e, aua nei outou faamoemoe e atoatoa lau paaga e te filifilia. Aua nei e filifili teine ma e misia ai ona uiga pito i taua o le i ai o se molimau malosi, ola i mataupu faavae o le talalelei, aiga agalelei, manao e avea ma se tina o Siona, ma lagolagosua ia te oe i ou tiute faaleperisitua. . . .

“Ma o se fua faatatau lelei lava e iloa ai pe ua sao le tagata lea mo oe o lenei: ao i ai faatasi ma ia, pe e te mafaufau ea i mafaufauga faatamalii, pe e te taumafai i au galuega e sili ona lelei, pe e te manao ia e sili atu nai lo le tagata o loo e i ai nei?”⁴

Ia sei o tatou faalogologo i le fautuaga a Peresitene Hinckley i tamaitai: “Ua e faamoemoe e te mauaina lena alii atoatoa. Ou te lei vaai lava i se tagata ua atoatoa. Ia maualuga lau fuafuaga, ae aua nei maualuga tele ina nei e matuai misi ai lava le faamoemoega. O le mea e sili ona taua ia alofa o ia ia te oe, ia faaaloalo ma ava ia te oe, ia faamaoni aiai ia te oe, ma o le a ia tuuina atu lou saolotoga e faaali ai ou lagona ma tuu oe e te alualu i luma i le atinaeina o au lava taleni. O le a le atoatoa o ia, ae afai e agalelei ma magafagafa, afai e iloa galue ma maua se tupe e tausia ai se aiga, afai e amio sao ma tumu i le faatuatua, o lona uiga o le a e le sese lava, o le a e matuai fiafia lava.”⁵

Sei ou fesili atu: Afai la o le a e faaipoipo taeao, ua e saunia la e avea ma se toalua lelei? Faamata o le a e aumaia i lau faaipoipoga ni uiga faaletagata ia o le a faapea ona avea ai oe ma se soa lelei? Pe o oe ea o se tagata e lelei i fesootaiga? Pe o oe ea o se tagata e lelei i le fofoina o faafitauli? O i ai ni ou tomai e fausia ai se agaga o le faafailele i totonu o lou aiga? E lava lou faatuatua, faamoemoe ma le agaalofa e fausia ai se faaipoipoga o le a faapea ona tumau ma faamanuiaina?

Alii, i le avea ai ma uso o lou tina ma se tuafafine o lou tama o le a ou talanoa manino atu nei ia te outou, ou te faamoemoe o le a outou malamalama e leai se tamaitai agavaa o le a tosina i ni lavalava eleelea, ni amioga le lelei, po o ni foliga fainaelo. Ioe, o se tamaitai amiotonu o le a alofa ia te oe mo le mea o loo i lou mafaufau ma le loto, ae o le a ia talisapaia au taumafaiga faamaoni e faaali atu le faaaloalo lelei ma le magafagafa mo ia. E tatau foi ona e iloa e leai se uo o le a le amanaiaina ma le fiafia le manatu faapito. Faamolemole ia manatua e leai ni afafine amiotonu o le Atua e onosaia ma le lotomalie ni uiga faaponokarafi o alii talavou latou te faamasani ma faaipoipo i ai. O le mea moni, afai e i ai se tamaitai talavou e iite o se alii talavou o loo ia naunau i ai, e aafia i ponokarafi o soo se ituaiga, ou te fai atu ia te ia e vaai i ai o se moli emoemo mumu o lona uiga “ia tuu loa lava lenei faamasaniga.” O lo outou taimi lenei e atiina ae ai ni uiga masani o le amiotonu ma le faaaloalo ma uiga faaKeriso o le a faapea ona faamanuiaina ai lau faaipoipoga ma le aiga i le lumanai.

Tamaitai, o le talanoa atu o se uso o lou tina ma se tuafafine o lou tama ia te outou, e leai se perenise lalelei o le a taliaina ma le fiafia ni uiga masani e le mama ma e le lelei po o ni ou foliga fainaelo. Ioe, o le a alofa se alii amiotonu ia te oe ona o mea o loo i lou mafaufau ma lou loto, ae o le a sili atu ona faafetai o ia mo se tamaitai e faatauaina le tumama ma le matagofie o ia lava ma lona siosiomaga. O alii amiotonu e tosina atu i tamaitai e susulu o latou foliga. Ma le isi, e leai se alii amiotonu e umia le perisitua e naunau e onosaia ni amioga faaponokarafi a sona toalua, pe na te fiafia foi i lana ava e faaaliali ma faasalalau atu lona tino faapelepele i isi alii e ala i lavalava fufusi po o le faiga le tauagafau ma lē talafeagai o ona lavalava ma lana amio. Ma le isi, ou te lei fetaui lava i se alii e fiafia e faalialiavale ni tulaga faalelagona ma oso ni le fiafia [i nofoaga faitele]. E leai se uo o le a le amanaiaina ma le fiafia le manatu faapito. O lou taimi lenei e atiina ae ai ni uiga masani o le amiotonu ma le faaaloalo ma uiga faaKeriso, o uiga e pei o le agalelei ma le faapalepale o le a faapea ona faamanuiaina ai lau faaipoipoga ma le aiga i le lumanai.

Faamolemole ia malamalama i le mea na faatoa ou fai atu ai. Ou te manao ia e silafia o ou le atoatoa ma vaivaiga o le a e alu atu ma oe i lau faaipoipoga ma o le a faalauteleina i lena tulaga. Sei vagana o le a e faaipoipo i le asō, o loo i ai lava lou taimi e lafoai ai uiga masani e le lelei, ae atiina ae ai uiga masani lelei ma uiga o le a faapea ona faamanuiaina ai lau faaipoipoga ma lou aiga. Ua aoao mai Peresitene Thomas S. Monson, “E aoga le vaai agai i luma, ia i ai se faiga, a le o lea, ia i ai sina sauniuniga pe a oo mai lena taimi o faiga filifiliga.”⁶

O le toatele foi o outou o le a avea ma ni tama ma ni tina o le a fausia ni aiga amiotonu mo o outou aiga. A o ou laitiiti, sa aoaoina au e lou tina e faapea, i lo’u talavou, e manaomia ona ou aoao e tausia se tagata se toatasi ma se potu se tasi, ina ia ou saunia e tausia ni nai tagata ma ni nai potu.

I le Mataupu Faavae ma Feagaiga, ua tuuina mai ai e le Alii se mamanu mo se aiga e faatumulia i le Agaga. E tatau ona avea “o se fale o le tatalo, o se fale o le anapogi, [ma] o se fale o le faatuatua” (MFF 109:8). E tatau ona avea o se fale e mafai ona mafuta ai le Agaga o le Alii, lea e leai se mea eleelea e faatagaina le oo atu i ai, ma o se fale o le aoaoga lea e suesue ai tusi e sili ona lelei, lea e aofia ai tusitusiga paia (tagai f. 7).

O lena vaega e oo mai ai le fesili lenei: Pe o le fale po o le potu o loo e nofo ai i le taimi nei, o le ituaiga fale lea? I lou potu, o fai ai ea au tatalo, o e anapogi ai ea, ma e te faitauina ai ea tusitusiga paia? E te nofo i se nofoaga o le faatulagaga maopoopo atoatoa pe o le gaogaosa? E te faatagaina mea le mama e ulu atu i ai e ala i ata tifaga, tusi, po o le Initoneti? E te faatumuina i mea faagaeetia—o mea e sili ona lelei? Pe o lou fale o loo i ai i le taimi nei o se nofoaga e mafai ona mafuta ai le Agaga o le Alii?

Ma le isi, e i ai ni tomai taua e tatau ona e atiina ae o le a fesoasoani ia te oe e avea ai o se tama po o se tina lelei ma faia ai se aiga fiafia. O nei tomai e mafai ona aofia ai le kuka, faamama ma lipea mea e malepelepe. O le faaaogaina ma le faautauta o tupe e taua foi mo se aiga fiafia. O lenei mea e aofia ai le pulea ma le totoa o nonogatupe a le tagata aoga. Na saunoa mai Peresitene Hinckley, “E leai se mea o le a sili atu ona mafua ai le feteenai tele i le faaipoipoga nai lo aitalafu mamafatu.”⁷ O se vaega o lau sauniuniga mo le faaipoipoga ma le aiga o le faaaoga lea o ni faiga masani i mea tautupe ma faataitai i le taimi nei ina ia oo atu i le taimi e te faaipoipo ai, ua mafai e oulua ma lou toalua ona amata faatasi o oulua olaga e aunoa ma ni avega mamafa tautupe.

Ua faitaulia nei outou o ni tagata matutua, ma ua outou iloa lava e outou ona tali atu mo outou. Ou te faamoemoe o loo outou faaaogaina lelei lenei meaalofa taua o le taimi ua outou maua ina ia saunia ai mo o outou matafaioi ma tiutetauave i le lumanai. Afai tou te saunia lelei mo o outou matafaioi ma tiutetauave i le lumanai, o le a outou maua le Agaga e taialaina outou i a outou faaiuga taua. Afai tou te saunia mo lo outou lumanai, ua i ai le avanoa tou te faavaeina ai faigauo ia o le a fesoasoani e te sailia ai se tasi e faaipoipo i ai i le malumalu ma faavae ai se aiga e faavavau.

O lenei la, nai o’u tei pele, o au uo, ou te fia momoli atu o’u alofaaga ma lo’u faatuatuaina o outou. E tele mea e faalagolago ia te outou. Ua aoaoina soo outou i la outou matafaioi e saili atu i faamanuiaga a Aperaamo, lea e aofia ai le faavaeina o aiga e faavavau. Ou te fautuaina outou, ia aua nei faatuai ona faaipoipo ma fanauina fanau ona o ni mafuaaga e le tatau. E oo lava i le taimi nei, o loo faatalitali mai fanau agaga totoa ia te outou ina ia valaaulia i latou i se aiga fiafia, ua faamauina.

Ua outou i ai i le vaitau o le olaga ua tatau ai ona outou sailia faamanuiaga a Aperaamo. O le tolopo o le faaipoipo seia e faataunuuina nisi o au sini, tusa lava po o le a le fai mai o le lalolagi e taua, e na ona faateleina ai o le lamatia o oe i le ola le mama, lea e ono saisaitia ai ou avanoa o le mauaina o na faamanuiaga. Faamolemole aua nei outou tuuina outou i tulaga e lamatia ai i faaosoosoga e ala i le faatuai o lenei laasaga masani ma le taua i lo outou alualu i luma e faavavau. A tau loa lau o le faaiuga po o ai e faaipoipo i ai, o le mea e sili ona e manaomia o le faatuatua. O le faatalitali seia ausia isi sini e pei o le mauaina o nisi aoaoga, nisi tupe, po o nisi mea a o lei faaipoipo ua na ona faatuai ai lava o ou faamanuiaga folafolaina.

Ua ou tautala atu ia te outou uma i le po nei, o se uso o lo outou tina po o se tuafafine o lo outou tama e alofa ia te outou. Atonu ua uma ona avatu ni fautuaga e uso o o outou tina ma tuafafine o o outou tama. Ou te talitonu ua faaalia foi le naunau o o outou taitai perisitua, faiaoga, ma faufautua i lo outou lumanai. Ou te faamoemoe i lenei vaitau taua o lou olaga, o loo e faalogologo foi ma le totoa i fautuaga a matua amiotonu, o e ua i ai le tiutetauave faavavau mo lo outou soifua sololelei.

Na saunoa Peresitene Monson: “I le faia o se faaiuga taua po o ai o le a e faaipoipo i ai, ou te fautua atu ia e sailia le fesoasoani a ou matua. Ia lava se taimi e te talanoa ai ia i laua, aua o le a la le tuua lava oe pe lafoaia oe. E alolofa tele ia te oe ma mananao i se olaga silisili ma folafolaga silisili o le faavavau mo se afafine faapelepele po o se atalii faatuatuaina.”⁸

Ua ou tautala atu i le po nei e uiga i ki e fa e mafai ona fesoasoani ia te oe e tatalaina ai le faitotoa i na faamanuiaga: E mafai ma e tatau lava ona outou auauna atu i isi. E mafai ma e tatau lava ona outou faasoa atu le talalelei. E mafai ma e tatau lava ona avea outou ma faaola i luga o mauga o Siona e ala i le auai i galuega faalemalumalu ma talafaasolopito o aiga. E mafai foi ma e tatau lava ona outou faia mea uma tou te mafaia e sauniuni ai mo o outou matafaioi ma tiutetauave i le lumanai.

O gaoioiga e fa sa ou faamatalaina atu o le a faaopoopo i lou faatuatua ma le fiafia i lou olaga atoa. O faailoga na o le avea ma soo, lea o le a faamalolosia ai a outou faaipoipoga ma aiga i le lumanai, ma valaaulia ai le Agaga tou te mafuta. A o outou auai i nei gaoioiga o ni tagata taitoatasi, ma a outou uo, ma i a outou korama, Aualofa, ma vaega o inisititiuti, o le a outou fausia aga fesootai ma faigauo o le a e tumau ai i nofoaga sa’o ma faia mea sa’o faatasi ma tagata sa’o, ma o le a faateleina ai ou avanoa e feiloai ai ma tagata e mafai ona avea ma a outou paaga faaipoipo i le lumanai.

Ou te molimau atu o lenei Ekalesia o loo taitaia e aposetolo ma perofeta o e o loo vaaia ma taitaia mataupu a le Alii i le lalolagi uma. E moni le talalelei toefuataiina a Iesu Keriso. Talu ai e moni le talalelei, o lea e faalagolago tele ai ia te outou, le tupulaga faiae. I le avea ai ma se uso o lo outou tina ma se tuafafine o lo outou tama e alofa, ou te faamoemoe o le a avea outou—e faapei o Aperaamo—ma faaaoao o le amiotonu, o le a outou sailia faamanuiaga a augatama e ala i le osia o feagaiga i le malumalu ma faavaeina ni aiga faavavau, ma o le a outou maua ai le malamalama sili atu, fiafia, filemu, ma le malologa. I le suafa o Iesu Keriso, amene.

FAAMATALAGA

1. Tagai tusi a le Au Peresitene Sili, 7 Set., 2007.

2. I le Conference Report, Ape. 1998, 66; po o le Ensign, Me 1998, 49.

3. “Oneness in Marriage,” Ensign, Mat. 1977, 4.

4. I le Conference Report, Ape. 1988, 59; po o le Ensign, Me 1988, 53.

5. “Mo Tina ma Tamaitai o le Ekalesia,” Liahona, Nov. 2003, 114.

6. “Whom Shall I Marry,” New Era, Oke. 2004, 4.

7. I le Conference Report, Ape. 1998, 68; po o le Ensign, Me 1998, 50.

8. New Era, Oke. 2004, 7.