O Lesona mai le Falepuipui o Liperate

Elder Jeffrey R. Holland

O Le Korama a Aposetolo e Toasefululua

Faeasaite a le OAE mo Talavou Matutua • 7 Setema, 2008 • Iunivesite Polika Iaga

Elder Jeffrey R. Holland Au uo talavou pele, o se tulaga faagaeetia lava mo au ma Sister Holland lo tatou mafuta ai i le po nei i lenei faasalalauga faasatelite i le lalolagi atoa. Maimau pe a na mafai ona tatou mafuta i nofoaga taitasi na tou te i ai, ma vaai patino atu ia te outou ma mafai ona tatou lululima. E lei maua lava se auala e fai ai lena mea i le taimi nei, ae momoli atu o matou alofaaga ma le faamalo ia te outou uma lava i soo se mea o le lalolagi o outou i ai. E ui lava i le vavamamao o la tatou potopotoga, ae matou te faamoemoe o loo tofu lagona e outou taitoatasi lo matou alolofa mo outou, ma e mafai e outou taitoatasi ona maua se mea mai la tatou savali i le po nei e aoga i o outou olaga faaletagata lava ia.

O Le Perofeta i le Falepuipui o Liperate.

O se tasi o faamanuiaga sili o o matou tofiga o ni Au Pulega Aoao o le avanoa lea e asiasi atu ai i tagata o le Ekalesia i nofoaga eseese i le salafa o le lalolagi, ma ao mai i le talafaasolopito mea o i ai o tatou tagata i le lalolagi atoa. O le agaga lena ou te fia faasoa atu ai ni nai lagona ia te outou i le po nei, na oo mai ia te au i se tofiga faaleLotu sa ou alu ai i le tautotogo na mavae atu nei, ina ua tofi au ou te asiasi i le konafesi faalesiteki a le Aai o Palate, i sisifo o Misuri iinei i le Iunaite Setete. O le Siteki a le Aai o Palate e sosoo ma le Siteki a Liperate i Misuri, ua avea nei ma nofoaga ua matua lauiloa naua i le talafaasolopito o le Ekalesia, o loo siomia i ni vaaiga taua faaletalafaasolopito o le Ekalesia, ua aofia ai ma le Falepuipui o Liperate. Mai lo outou suesueina o le talafaasolopito o le Ekalesia o le a outou iloa uma ai se mea e uiga i le aafiaga o le Perofeta o Iosefa Samita ma ona uso a o faafalepuipui ai i lena fale i le taumalulu o le 1838–39. O se taimi matua faigata tele lena i lo tatou talafaasolopito, mo le Ekalesia lautele ma e mautinoa foi mo le Perofeta o Iosefa lava ia, o le na amoina le mamafa o sauaga i lena vaitau. Ioe, ou te lototele e faapea atu e oo atu i lona tagatavaleina i le lima ma le afa tausaga mulimuli ane, e leai se taimi e sili atu ona mamafatu i le soifua o Iosefa nai lo le faafalepuipuiina mataga, e le tusa ai ma le tulafono ma le faamasinoga le tonu i le Falepuipui o Liperate.

E le lava le taimi e talanoa auiliili ai aafiaga na oo atu ai i lena taimi i le talafaasolopito o le Ekalesia, ae ua lava le faapea atu sa faatupulaia faafitauli o soo se ituaiga talu mai lava le taimi na maua ai e le Perofeta o Iosefa se faaaliga vaaia i le masina o Iulai i le 1831, lea na ta’u patino mai ai o Misuri o le nofoaga “ua filifilia ma faapaiaina mo le au paia e faapotopoto i ai” ma le fausiaina o le “aai o Siona” (MFF 57:1, 2). E oo atu ia Oketopa i le 1838 ua foliga mai ua le mataofia taua i le va o au a Mamona ma le au le Mamona sa fevatauai ai i nei mataupu. Ina ua uma ona tutuli ese mai le tele o itumalo i le vaega i sisifo o lena setete, ma i ni talitonuga faivavale na valaaulia i latou e talanoaina ni auala e faamaui ai le tulaga matautia ua tulai mai, e toalima taitai o le Ekalesia e aofia ai ma le Perofeta o Iosefa sa savavali atu i lalo o le fu’a o le filemu agai atu i le tolauapiga a le fitafita o Misuri e lata ane i le nuu o Sisifo Mamao e tu i le Itumalo o Caldwell.

O le taunuuga, sa leai se uiga o le fu’a o le filemu ma sa vave ona lokaina taitai o le Ekalesia i filifili ma tuu i lalo o se leoleoga mautu. O le taeao na sosoo ai ma lenei puefaapagotaina, na toe puefaapagotaina ai foi isi taitai e toalua o le Au Paia o Aso e Gata Ai, e aofia ai Ailama le uso o le Perofeta, ma sa atoa ai le toafitu o i latou sa faapagotaina.

Na vave ona agai atu le fai mea le tonu i le mala matautia semanu e oo i ai, ina ua poloaiina e se “faamasinoga” faamiliteli na taloina e taitai o le au fitafita, ina ia auina atu Iosefa Samita ma isi pagota e toaono i le lotoa faitele i Sisifo Mamao ma fasiotia ai loa. E faamanuina e faavavau, le Taitai Aoao o Alesana Tonifa, o se taitai o fitafita i Misuri, na ia teena ma le le fefe ma le lototoa le faataunuuina o lenei poloaiga faatufanua, e le faavaea. I se tulaga matautia e ono faia ai foi sona lava faamasinoga faalefitafita, sa ia alaga tetee atu ai i le taitai na tuuina atu le poloaiga: “O se fasioti tagata faamoemoeina. Ou te le usitaia lau poloaiga. . . . Ma afai e te fasiotia nei tagata, o le a molia oe i se faamasinoga faalelalolagi nei, o le mea lea le Atua e fesoasoani mai ia te au!”¹ I le faaalia o lena lototoa ma le amiosa’o, na le gata ina faasaoina ai e Tonifa ia soifua o nei tamalii ae ua faavavau ai le pele o ia i le Au Paia o Aso e Gata Ai i augatupulaga uma.

Sa le faataunuuina lo latou faasalaga, ma sa faasavavali atu nei taitai e toafitu o le Ekalesia mai Sisifo Mamao i Initipene, ona o atu lea mai Initipene i Limoni. Sa taofia Parley P. Palate i le Itumalo o Daviess mo se faamasinoga iina a o isi pagota e toaono, e aofia ai Iosefa ma Ailama, sa auina atu i Liperate, o le laumua o le Itumalo tuaoi o Clay, e faatalitali ai le faamasinoga iina i le tautotogo e sosoo ai. Sa latou taunuu i Liperate i le aso 1 o Tesema, 1838, i le taimi tonu ua amata le taumalulu.

O le falepuipui, o se tasi o falepuipui e sili atu ona taufaamatau o na ituaiga fausaga i lena itulagi, ma sa manatu o se mamanu e le mafai ona sola ai se isi, ma atonu lava e sa’o. E lua fogafale. O le fogafale i luga po o le fogafale autu, sa na o se tamai faitotoa mamafa e tasi, sa mafai ona ui atu ai i le lalolagi i fafo. I le ogatotonu o lena fogafale e i ai se faitotoa tu’imau lea e tuutuu ifo ai i lalo pagota i le fogafale i lalo po o le sela. O puipui i fafo o le falepuipui e fai i maa’amu e 2 futu le mafiafia e le faalamolemolea, ma ni puipui i totonu e fai i le laau o le aruna e ta’i 12 inisi. O nei puipui e lua sa tova i se avanoa e 12 inisi sa faatumu i maa. A tuu faatasi, o nei puipui na tulai mai ai se papuipui matautia e fa futu le mafiafia, e le mafai ona sao ese ai se isi.

I totonu o le sela, o le maualuga mai le fola i le faaalo e toetoe ina le atoa le ono futu, ma o nisi o nei tamalii, e aofia ai le Perofeta o Iosefa, e sili atu ma le ono futu le maualuluga, o lona uiga a oo ina tutu, o taimi uma lava e faano’uno’u ai, ma a taooto foi e tele lava ina taooto i luga o maa patupatu o le fola o le falepuipui, e na o ni nai vaega e fola i vaovao po o nisi foi taimi e fola i se fala vaovao palapala.

O meaai na fafaga ai pagota e le lelei ma o nisi taimi e faaleaga, ma fai mai se tasi o i latou, e matua palapala lava “sa le mafai ona [latou] aia sei vagana lava ona ua matua matelaina.”² E faafa ona onana i latou ona sa tuu mea oona ia latou meaai, ma sa latou matua mama’i ai lava ma e tele ni aso a le puai e fasa, ma ua le popole ai lava pe latou te ola pe oti foi. I le tusi a le Perofeta o Iosefa, na ia ta’ua ai le falepuipui o se “seoli ua siosiomia e temoni . . . e faamalosia ai i matou e leai lava se isi mea e faalogo i ai ua na o tautoga faaoleole, ma molimauina se vaaiga o le taufaifai, ma onaga, ma pepelo ma mea inosia o soo se ituaiga.”³ E leai ni o matou . . . palanikeke e faamafanafana lelei ai i matou,” o lana tala lea, “a tafu foi se matou afi, matou te onosai lava i le asu i taimi uma.”⁴ “Ua to’ele o matou agaga”⁵ ma “ua gatete ou neura ona o le umi ona faafalepuipui.”⁶ “E le mafai e le peni po o le laulaufaiva po o agelu,” na tusia ai e Iosefa, ona faamatala sa’o “le inosia o seoli” lea sa ia mafatia ai iina.⁷ Ma o nei mea uma na tutupu i le taimi, e tusa ai ma ni faamaumauga, o le taumalulu aupito sili ona malulu na faamaumauina i le setete o Misuri.

E leai so’u faamoemoe ou te lauga e uiga i le faanoanoa ma le faigata na feagai ma nei tamalii i le Falepuipui o Liperate, o lea la se i ou faaali atu ni nai ata ona faaiu ai lea o le vaega lenei o le folasaga o la’u savali. Ou te folafola atu o loo i ai se isi mea i lo’u mafaufau e ta’u atu.

O le ata lea o le falepuipui e toeitiiti lava pei o le mea na i ai i le taimi o Iosefa ma lana usoga ina ua falepuipui ai iina.

O le ata lea na pue i ni nai tausaga mulimuli ane ai, ina ua asiasi atu i ai taitai ma le au tusitalafaasolopito o le Ekalesia. Ou te le o mautinoa pe o taumafai si alii lena e alu i fafo po o totonu.

O le vaega fetaula’i o le toefausiaina e le Ekalesia o le falepuipui, lea ua mafai nei ona vaaia i lo tatou fale autu mo tagata asiasi mai. Matau le faatulagaga faafogafalelua ma se maea ma le pakete, na pau lena o le sootaga i le va o le sela ma le fogafale i luga.

O se ata lea na vali e Liz Lemon Swindle o loo faaalia ai Iosefa la e tatalo. Matau foliga faanoanoa, ma le faavauvau o Iosefa.

Ma o se ata lea na tusia e Greg Olsen o loo faaalia ai le ala atonu na tusia ai e Iosefa nisi o faaaliga na oo atu i ai i le taimi lea na faafalepuipui ai.

Ma o la’u ata mulimuli lea, lea e tata’i atu ai au i la’u savali moni lava na ou sau e tuuina atu i le po nei.

O Se Aafiaga i le Malumalu-Falepuipui

O le toatele lava o i tatou, i le tele o taimi, e talanoa ai i fale i Liperate o se “falepuipui’ po o se “toese”—ma o le mea moni lava lena. Peitai o Elder Brigham H. Roberts, i le faamaumauina o le talafaasolopito o le Ekalesia, sa ia ta’ua ai le fale o se malumalu, pe i se isi faaupuga e sili atu ona sa’o o se “malumalu-falepuipui.”⁸ Sa faaaogaina e Elder Neal A. Maxwell lea lava fasifuaitau e tasi i nisi o ana tusitusiga.⁹ O le mea moni lava e lei mama, e lei matagofie, e lei i ai le mafana ma le mama o o tatou malumalu moni, o tatou malumalu ua faapaiaina. O talanoaga ma amioga a leoleo ma le au solitulafono na i ai iina e aunoa ma sina foliga o le malumalu. O le mea moni, o aga faatufanua ma le le tonu o lenei aafiaga i Liperate e foliga mai ai le matua feteenai ma le agaga mafana, alofa mutimutivale o o tatou malumalu ma sauniga o loo faatino ai i totonu. O lea la, o le a se tulaga e ono faaigoa ai le Falepuipui o Liperate o se “malumalu”—pe tau foi ina ta’u o se ituaiga o malumalu—i le atiina ae o Iosefa Samita lava ia, faapea foi i lana matafaioi o se perofeta? O le a foi se mea e ta’u mai i lena ituaiga o faalagiga e uiga i le alofa ma aoaoga a le Atua, e aofia ai le nofoaga ma le taimi na faaali mai ai lena alofa ma na aoaoga?

A tatou mafaufau i nei mea, pe tatou te le manatu ai ea o aafiaga faaleagaga, aafiaga o faaaliga, ma aafiaga paia e mafai ona oo mai ia i tatou uma taitoatasi i mea uma, ma vaega eseese ma tulaga o o tatou olaga pe a tatou mananao i ai, pe afai e tumau lo tatou faamoemoe ma tatalo pea, ma pe afai tatou te tausisia le malolosi o o tatou faatuatua i taimi o faigata? Tatou te alolofa ma faapelepele i o tatou malumalu ua faapaiaina ma sauniga taua, faaeaga o loo faia ai. Tatou te faafetai i le lagi ma le Usoga pulefaamalumalu, ona o loo faaopoopo pea le tele o malumalu o loo fausia ma ua saga toatele ai foi i tatou ua faigofie ona o i ai. O ni fausaga moni lava e aupito sili ona paia, e sili ona mamalu i le malo o le Atua, lea e tatau ona tatou o uma i ai ma le agavaa ma ia o soo foi i ai.

Ae o le savali i le po nei o le, afai e te manao i ai, e mafai ona e maua se aafiaga paia, faalefaaaliga, maoae faaleaoaoga ma le Alii i soo se tulaga o loo e i ai. Ioe, se’i ou toe fai atu i se tulaga e malosi atu teisi. E mafai ona e maua se aafiaga paia, faalefaaaliga, maoae faaleaoaoga ma le Alii i aafiaga aupito matautia o lou olaga—i tulaga e aupito leaga, a o e onosaia faamasinoga le tonu aupito tiga, pe a e feagai ma tetee ma mea tutupu aupito ogaoga.

Se i o tatou talanoa la e uiga i nei mea mo sina minute. O i tatou uma taitoatasi, pe tele pe itiiti, maoae pe faatauvaa, o le a faaaluina sina taimi itiiti i le Falepuipui o Liperate—i le faaleagaga. O le a tatou feagai ma mea tatou te le mananao ai ona o mafuaaga atonu ona e le o tatou e pogai ai. Atonu foi o le a tatou feagai ma tulaga faigata ona o mafuaaga e sa’o lelei lava ma ua talafeagai, o mafuaaga na oo mai ona o lea sa tatou taumafai e tausi poloaiga a le Alii. Atonu o le a tatou feagai ma ni sauaga; tatou te onosaia le lototiga ma le nonofo valavala ai mai i e pele ia i tatou; atonu foi o le a tatou fia aai ma maalilili ma faanoanoa. Ioe, a o lei uma atu o tatou olaga, atonu o le a tatou tofo laitiiti i mea e masani ona feagai ma perofeta i o latou soifuaga. Peitai, o lesona o le taumalulu o le 1838–39, ua aoao mai ai ia te i tatou o aafiaga taitasi e mafai ona avea ma aafiaga togiola pe afai e tumau lo tatou faamaoni ma le faatuatua i lo tatou Tama i le Lagi i le taimi o faigata. O nei lesona faigata ua aoao mai ai ia te i tatou, o tulaga aupito ogaoga e feagai ma le tagata o le avanoa lea o le Atua [e aoao ai ma faamanuia], ma afai o le a tatou lotomaulalo ma faatuatua, afai o le a tatou talitonu ma lē fetuuina le Atua ona o a tatou faafitauli, e mafai ona Ia liliuina falepuipui lē tonu, tufanua ma le matautia o o tatou olaga, i ni malumalu—po o se tulaga e mafai ona aumaia ai le mafanafana ma faaaliga, mafutaga faalelagi ma le filemu.

Se i ou avatu i se faaupuga e malosi atu. O lea faatoa ou fai atu e mafai ona oo mai ni taimi faigata ia i tatou. Na ta’ua e Peresitene Iosefa Filitia Samita, le tei o le Perofeta o Iosefa ma o le atalii o le atalii o Ailama lea na falepuipui, se mea e sili atu ona malosi nai lo lena ina ua ia faapaiaina le Nofoaga Autu mo Tagata Asiasi Mai i le Falepuipui o Liperate i le 1963. A tagai i le ituaiga o talaaga sa tatou toe matamata i ai i le po nei ma vaavaai atu i le vaaiga na taofia ai ma le le tonu lona tamamatua ma le uso laitiiti o lona tamamatua, fai mai a ia atonu e tatau ona tupu nei mea—e le gata e mafai ona tutupu, ae e tatau foi ona tutupu. Fai mai a ia: “Ina ua ou faitauina le talafaasolopito o na ona po, o aso na muamua atu ma aso na mulimuli mai ai, sa ou faia ai se faaiuga e faapea, o faigata, o sauaga, ma le tetee na toetoe ina aofia ai le lalolagi [agai i le Ekalesia i lena taimi] na tatau ai. Na avea lena i soo se itu ma faiaoga i o tatou tagata. Na fesoasoani e faamalolosia ai [i latou].”¹⁰

Lesona mai le Falepuipui o Liperate

Ia, e aunoa ma le taumafai e fuafua pe o fea o nei ituaiga o aafiaga i o tatou olaga “e tatau lava ona i ai” ma pe o fea foi e “tuu i le faitalia”—ae e mo lo tatou lelei—sei ou fautua atu lava e na o ni nai lesona itiiti lava na aoaoina mai i Liperate—o na aafiaga ia na avea ma “faiaoga” ia Iosefa ma e mafai foi mo i tatou, o aafiaga ua matua tele so latou sao i lo tatou aoaoga i le olaga nei ma lo tatou faaeaga i le faavavau.

I le filifilia o nei lesona ua ou manatuaina ai se isi ituaiga o faamanuiaga na oo mai i lenei mafatiaga. Ina ia tuu atu ni manatu ia o loo ou taumafai e avatu i lau savali i le po nei, sa ou suesueina ma o le a ou faaaogaina upu tonu na sau mai fofoga o Iosefa Samita i le taimi o lona lotonutimomoia, o upu ua tatou folafolaina o se mau e paia i le Mataupu Faavae ma Feagaiga. Ou te masalo e le tatau ona i ai ni a tatou mau e pele, ma e lava a’u mau e pele e le mafai ai ona outou faapea e na o le tasi pe lua ni mau e pele ia te au, ae o le mea moni soo se lisi o a’u mau ou te fiafia i ai, e aofia ai ma mau na sa tusia i le pogisa o le Falepuipui o Liperate.

O le mea la ua tatou aoaoina mai ai, e le gata ina sa aoaoina e le Atua ia Iosefa Samita i tulaga o lena falepuipui ae sa Ia aoaoina ai foi i tatou uma, mo augatupulaga fai mai. Oka se meaalofa faaletusipaia! Ma e maeu foi se tau maualuga na totogia mo lea! Peitai, e maeu le gaogao semanu e i ai o tatou olaga o ni Au Paia o Aso e Gata Ai pe a na tatou le maua vaega e 121, 122, ma le 123 o le Mataupu Faavae ma Feagaiga. Afai e te lei faitauina lata mai nei vaega na, ou te manao ia te oe ina ia e faitauina i le po nei, po o a taeao—ae le o se isi taimi. O lau galuega lena e fai i le fale ma o le a ou siakiina oe! E na o le ono lava le aofai o itulau o le tusiga, ae o na itulau e ono o le a pa’i atu i lou loto faatasi ma lo latou matagofie ma le mana. O le a faamanatu ai foi ia te oe, e tele taimi “e le mafaamatalaina le ala e gaoioi ai le Atua i le faatinoina o Ana galuega ofoofogia.”¹¹ O lea la, Na te liliuina moni lava mafatiaga e avea ma faamanuiaga i le aumaia lea ia i tatou o nei tusitusiga paia ma ata, e matua mama a’ia’i, e tamalii ma Kerisiano le fati ma le aano, ae o lea na faatino mai i se nofoaga e le mama, inosia, ma e le kerisiano.

1. E Feagai Tagata Uma ma ni Taimi Faigata

Ia, e tolu ni lesona mai le Falepuipui o Liperate: Ou te fia fautuaina atu, o le uluai lesona ua i ai lava i totonu o mea ua uma ona ou ta’ua—o tagata uma lava, e aofia ai (ma atonu aemaise ai lava) o e amiotonu, o le a feagai ma ni taimi faigata. A oo ina tupu lena mea, e i ai taimi e mafai ai ona tatou matatau faapea ua tuulafoaiina i tatou e le Atua, ma e ono tuua i tatou, mo sina taimi, e taumanatunatu ai pe mata e i’u o tatou faafitauli. I le avea ai ma tagata taitoatasi, o aiga, o nuu ma o malo, atonu e i ai se taimi e lagona ai e tagata uma e faapei ona lagona e Iosefa Samita ina ua ia fesili pe aisea lava ua oo mai ai lea faanoanoaga ma pe o le a foi le umi o le a i ai lona pogisa ma le mafatiaga. Ua tatou malamalama ma faavauvau foi faatasi ma ia, ina ua ia aue mai le loloto ma le lotovaivai i lenei falepuipui: Le Atua e, o i fea ea oe? . . . Pe taofia ea lou aao seia afea . . . ? Ioe, le Alii e, e tigaina ea [lou nuu] seia afea . . . a o le’i . . . faamaluluina lou finagalo ia i latou?” (MFF 121:1–3).

O se aue faamaoni patino, ma tiga—o se aue mai le loto, o se lagona tuulafoaiina faaleagaga atonu e tofu lagonaina uma e i tatou i nisi taimi o o tatou olaga.

Atonu ua outou oo i ni taimi faapena i o outou olaga. Afai o lea, ou te faamoemoe e le i tele naua. Peitai, soo se taimi tatou te feagai ai ma taimi ua matua ogaoga ai, e le tatau ona tatou lilifa atu i le atuatuvale faapea ua tuulafoaiina i tatou e le Atua, ua le faafofogaina mai a tatou tatalo. E faafofoga mai o Ia ia te i tatou. E silasila mai o Ia ia te i tatou. E alofa o Ia ia te i tatou. A oo ina tatou i ai i tulaga matautia ma mananao e tagi atu “O i fea ea Oe?” e taua ona tatou manatua o loo i ai lava o Ia iina faatasi ma i tatou—i le mea lava sa i ai i taimi uma! E tatau ona tumau pea lo tatou talitonu, tumau lo tatou faatuatua, tumau ona tatalo ma ole atu faatasi ma le lagi tusa lava pe tatou te lagonaina mo se taimi, e le o faafofogaina mai a tatou tatalo ma e pei ua afio ese le Atua. O loo i ai lava o Ia iina. E faafofogaina a tatou tatalo, ma a tatou fetagisi foi e tutulu foi o Ia faatasi ma agelu ma i tatou.

A oo mai taimi tuulafoaiina, maatiati, ma faigata, e tatau lava ona tatou onosai, tumau, ma finafinau. O le savali lena a le Faaola i le faataoto i le fafine ua oti lana tane i lona faatauanau atu (tagai Luka 18:1–8; tagai foi Luka 11:5–10). Ia saga tuitui atu pea i lena faitotoa. Ia saga aioi atu pea. A o e tuitui atu pea, ia e iloa o loo faafofogaina e le Atua au tagi ma ua silafia lou puapuaga. O Ia o lou Tama, ma o oe foi o Lona atalii/afafine.

A uma le aafiaga lea e manaomia ona tatou maua, a uma foi ona aoaoina le lesona e manaomia ona tatou iloa, ona faia ai lea ia i tatou e faapei foi ona faia i le Perofeta o Iosefa. E pei lava o le taimi na ia lagonaina ai ua matua tuulafoaiina ma faapea ua le faafofoga mai le Atua ia te ia, o le taimi foi lena na ia mauaina ai le auaunaga ofoofogia a le Agaga, ma tali matagofie mai lona Tama i le Lagi. I totonu o le sela mataga ma lenei taimi lofituina, na oo mai ai le siufofoga o le Atua ua faapea mai:

“Lo’u atalii e, ia i ai le filemu i lou agaga; o lou tiga ma ou puapuaga o le a na o sina ituaso itiiti lava;

“Ona faaeaina lea o oe e le Atua i le mea maualuga; afai e te onosai o le a e manumalo foi i ou fili uma” (MFF 121:7–8).

E ui lava atonu e tulai mai ni tulaga ogaoga ma le le tonu i o tatou olaga ma e ui lava foi atonu e tele ni mea e le manuia ma agaleaga e fai mai ia te i tatou—atonu e faia e i latou tatou te manatu o ni o tatou fili ae o nisi foi taimi e faia mai e i latou sa tatou manatu o ni a tatou uo—e ui i lea, o na mea uma e i ai lava le Atua faatasi ma i tatou. O le mea lena na lagiina ai i le po nei e la tatou aufaipese matagofie le viiga Kerisiano masani a Sara Adam “Ta Felata’i Nei, le Atua ma Oe” ma lena fuaiupu lona 4 lea e seasea usuina:

“Mai o’u mafatiaga matuia
O le a ou fausia ai Peteli;
O lea o o’u faanoanoaga o le a
Ta felata’i nei, le Atua ma oe.”¹²

E le o tuua na o i tatou i o tatou tama’i falepuipui iinei. A oo ina tatou puapuagatia, o le mea moni ua sili atu ona tatou felata’i ma le Atua nai lo nisi taimi i o tatou olaga atoa. O lena malamalama e mafai ai ona liliu se tulaga faapena e avea ma se aafiaga paia faalemalumalu sa.

E tusa ai ma la tatou malaga faalelalolagi nei, ua folafola mai e le Alii: “Ou te muamua atu i o outou luma. Ou te i ai foi i lo outou itu taumatau ma lo outou itu tauagavale, a o lo’u agaga o le a i o outou loto, e siomia foi outou e a’u agelu, e lagolagoina outou” (MFF 84:88). O se folafolaga e faavavau lena o le alofa ma le tausiga a le Atua mo i tatou, e aofia ai—pe atonu aemaise ai lava—i taimi o puapuaga.

2. E Oo Lava i Tagata Tauaogaina o Le a Puapuagatia Foi

Lona lua, e manaomia ona tatou iloa ona e tutupu mea faigata—o nisi taimi e faapitoau ma matuai le tonu lava—e le faapea tatou te amioletonu pe tatou te le agavaa mo faamanuiaga pe ua le fiafia le Atua ia te i tatou. E moni lava o le agasala e aumaia ai le mafatia ma na o le pau lava le tali i lena amioga, o le salamo. Peitai e i ai nisi taimi e oo mai ai foi mafatiaga i e amiotonu. O le a outou manatua lena mai le lotolotoi o le Falepuipui o Liperate, ina ua faamanatu atu ia Iosefa e moni lava ua “lafoina . . . i puapuaga,” sa feagai ma mafatiaga ma ua molimolitai seseina o ia, ua momotu ese mai lona aiga ma lafoina i le lua, i lima o le au fasioti tagata, ae ui i lea sa tatau ona ia manatuaina o le mea foi lava lea na upu i le Faaola o le lalolagi,ma ona sa manumalo o Ia, o le a faapena foi ona tatou manumalo (tagai MFF 122:4–7). O le aumaia ia i tatou o lenei faamanatu manino i mea na oo i ai le Faaola, o loo tusia ai i le faaaliga mai le Falepuipui o Liperate: “Na oo ifo i lalo o mea uma le Atalii o le Tagata. Pe sili ea oe i lo ia?” (MFF 122:8).

Ia, e leai. E le sili atu Iosefa Samita nai lo le Faaola e le sili ae foi i tatou. Ma a tatou folafola atu e mulimuli i le Faaola, e savavali i Ona tulaga aao ma avea ma Ona soo, ua tatou folafola atu lena e o i le mea e taitai i tatou i ai e lena ala paia. Ma o le ala i le faaolataga, e taitaiina ai e le aunoa i Ketesemane. O lea la, afai sa feagai le Faaola ma na faamasinoga le tonu ma lotovaivai, sauaga, amioletonu, ma puapuaga, e le mafai ona tatou faapea o le a tatou le feagai ma nisi o na mea, pe afai tatou te faamoemoe pea e ta’ua i tatou lava o Ona soo moni ma tagata e mulimuli faamaoni ia te Ia. Ma ua faamamafaina moni ai lava le mea moni, o e amiotonu—i le tulaga na i ai le Faaola, o le faatusa o le amiotonu—e mafai ona agavaa atoatoa i luma o le Atua ae e puapuagatia lava.

O le mea moni, e ao ina avea ma faamafanafanaga faavae ia i tatou o Iesu, i le ala o le Togiola, na ia oo ai i tiga o’oo’o uma ma faanoanoaga, o mafatiaga ma faamasinoga le tonu uma ua oo mai ma o le a oo mai i le aiga atoa o tagata mai ia Atamu ma Eva e oo atu i le iuga o le lalolagi, ina ia tatou le fetaiai ma na mea uma i se tulaga e matua ogaoga ma o’oo’o. E ui i lea, po o le a le mamafa o a tatou avega, semanu e sili atu ona mamafa pe a na le ta’imua ona uia e le Faaola o lena ala ma tauaveina faatasi lena avega ma i tatou, ma mo i tatou.

I le popofou o le galuega a le Perofeta o Iosefa, na aoao atu ai ia te ia e le Faaola le aoaoga faavae lea. Ina ua uma ona fetalai atu e uiga i puapuaga e matua o’oo’o le faalogona ma e matuai faigata ona tauaveina, ona fetalai atu lea o Iesu, “O a’u le Atua na puapuagatia i nei mea mo tagata uma, ina ia latou [o lona uiga o oe ma au ma tagata uma] le puapaugatia pe afai latou te salamo” (MFF 19:16). I taimi tatou te tiga ai ma tofotofoina i tatou, ou te masalo tatou te fefefe e mafaufau e ono sili atu ona leaga, ae o le tali i lena mea ua manino lava, e mafai ona sili atu ona leaga ma o le a leaga tele atu. E na o le faatuatua ma le salamo ma le usiusitai i le talalelei ua saunia ai le Togiola paia e puipuia ai mai le oo atu i le leaga e sili atu.

E le gata i lea, tatou te matauina foi e le gata ina sa mafatia le Faaola, o Ia sa matua leai se sala, ae faapea foi i le toatele o perofeta, ma isi tamalii ma tamaitai maoae o loo tusia i tusitusiga paia. Ta’u mai se perofeta o le Feagaiga Tuai po o le Tusi a Mamona, ta’u mai se Aposetolo o le Feagaiga Fou, ta’u mai soo se taitai lava i soo se tisipenisione, e aofia ai lo tatou taimi, ma ia e ta’u mai foi se tasi sa feagai ma faigata.

O le a le uiga o la’u tala? Afai ua i ai sou aso e le lelei, e anoanoai au paaga—o paaga e sili ona lelei. O paaga aupito sili ua ola ai.

Ia, aua nei faaluafesasia outou. Tatou te le tau o e saili le faanoanoa. Tatou te le tau sailia e avea ma maturo. Ua i ai lava le ala e maua ai i tatou e faigata tusa lava pe tatou te le sailia. Ae a oo ina iloagofie, ua faatalitali mai sina taimi itiiti i le Falepuipui o Liperate mo oe, (i le faaleagaga) ia manatua nei upumoni e lua na aoao atu ia Iosefa i lena malumalu-falepuipui. Muamua, e le o faagaloina oe e le Atua ma le lona lua, sa i ai le Faaola i le mea lena ua e i ai, ma mafai ai e Ia ona saunia lou saolotoga ma lou faamafanafanaga.

E pei ona tusia e le perofeta o Isaia, “ua tusilolomi e le Alii oe i [Ona] alofilima,” ua tusimauina iina i tulaga manifi iloga o fao a Roma na avea ma peni tusitusi. Ina ua uma ona totogiina le tau lea na mafatia ai, ua uma ona La totogiina mo oe, o le a le faagaloina lava e le Tama ma le Alo pe tuulafoaiina foi oe i ou mafatiaga (tagai Isaia 49:14–46; tagai foi 1 Nifae 21:14–16). Ua uma ona la fuafuaina, saunia ma faamaonia lou manumalo pe afai e te manao ai, o lea la ia e talitonu ma “ia e onosai” (MFF 1221:8). I le faaiuga, “e avea ia mou lelei” (MFF 122:7), ma o le a e vaai i le “malo e faavavau” o tafe atu ia te oe e faavavau, faavavau lava, “e aunoa ma faiga faamalosi” (MFF 121:46).

3. Ia Tumau i le Toafilemu, Onosai, Agaalofa, ma Lotofaamagalo

Lona tolu, ma o le mea mulimuli foi lea i lenei po, ou te fia faamanatu atu ia i tatou uma lava, i le lotolotoi o nei lagona faigata pe a ua talafeagai ona ita se tasi pe tetee i se suiga pe fia tauimasui, pe manao e taui atu le mata i le mata ma le nifo i le nifo, ua faamanatu mai e le Alii ia i tatou mai le Falepuipui o Liperate i le malumalu-falepuipui, “o aia tatau a le Perisitua e faafesootaiina e le mavavaeeseina ma mana o le lagi, e le mafaia foi ona faatonuina pe faaaogaina ia mana o le lagi tau lava [pe ‘vagana’] o mataupu faavae o le amiotonu” (MFF 121:36). O le mea lea, tusa lava pe tatou te fetaiai ma tulaga atuatuvale i o tatou olaga, ma ua i ai se mea i totonu o i tatou ua manao e tavavae ese le Atua po o se tagata po o se uo po o se fili foi, e tatau ona tatou manatua “e le mafai pe tatau ona faatumauina se mana po o se uunaiga [vagana] o le tauanau atu, o le faapalepale, agalelei ma le agamalu, ma le alofa faamaoni; . . . e aunoa ma le pepelo, e aunoa ma le faa’ole’ole” (MFF 121:41–42; ua faatusilima mea e faamamafa).

E avea pea ma molimau ofoofogia ia te au le maoae o le Perofeta o Iosefa faapea foi le maoae o o tatou perofeta uma, e aofia ai ma aemaise ai lava le Faaola o le lalolagi i Lona silisili ese, ona o le lotolotoi o na mafatiaga ma faigata sa mafai lava ona tumau lo latou toafilemu ma le onosai, agaalofa ma le lotofaamagalo—sa mafai lava ona latou saunoa faapena, ma soifua ai faapena. Ae sa latou mafaia, ma sa latou faia lava. Sa latou manatua a latou feagaiga, sa latou pulea i latou lava, ma sa latou silafia e tatau ona tatou ola i le talalelei i taimi uma, ae le na o taimi e faigofie ai ma sologa lelei mea uma. Ioe, sa latou silafia o le suega moni o lo tatou faatuatua ma le avea ai ma soo Kerisiano, o le taimi e le sologa lelei ai mea. O iina tatou te vaai ai i mea o loo fausia ai i tatou, ma po o le a foi le malosi moni o la tatou tautinoga i le talalelei.

O le faataitaiga tonu lava o lena mea, o taimi aupito tiga o le Faasatauroga na mafai e le Faaola ona fetalai atu, “Lo’u Tama e, ia e faamagaloina atu ia te i latou, aua ua latou le iloa le mea ua latou faia” (Luka 23:34). O se mea faigata lena e ole atu e fai pe a tatou tiga. O se mea e faigata ona fai pe a faatiga mai ia i tatou—pe ua tatou le lavava pe mafatia ona o le faapuapuagatiaina e aunoa ma se sala. Peitai, o le taimi lena e matua taua ai lava le amio faaKerisiano. Ia manatua “e le mafai ona faatonuina pe faaaogaina mana o le lagi [sei vagana ai] o mataupu faavae o le amiotonu.” Ma e tatou te manaomia mana o le lagi mo i tatou i taimi faapena! E pei ona sa aoaoina ai Iosefa i le malumalu-falepuipui, tusa lava po o mafatiaga ma faanoanoaga e tatau lava ia i tatou ona “tumu [o tatou] loto . . . i le alofa atu i tagata uma . . . ; ona malosi ai lea o [lo tatou] faatuatua fai ifo i luma o le Atua; ma . . . avea ai le Agaga Paia ma [o tatou] aumea tumau” (MFF 121:45–46).

O le tumau faamaoni i a tatou mataupu faavae Kerisiano, e na o le pau lena o le ala e mafai ai ona fesoasoani mai uunaiga paia ia i tatou. E toetoe lava ina a le mafai e le Agaga ona faaaafia se loto ua faatumulia i le inoino po o le ita po o le tauimasui po o le manatu ifo mo ia lava. O tetee uma mea na i le Agaga. I se isi itu, e vave lava ona maua e le Agaga le ala i se loto e taumafai e agaalofa ma loto faamagalo, onosai ma agalelei—o mataupu faavae o le avea ma soo. Oka se molimau, e tatau ona faaaoga mataupu faavae o le talalelei i taimi uma i tulaga uma, ma afai tatou te taumafai e tumau i le faatuatua, e le mafai lava ona faatoilaloina le manumalo o se olaga Kerisiano, tusa lava po o le a le matuia o le tulaga e i ai. Ou te fiafia tele i le malualii na aoao mai e nei aoaoga mamalu, faaselesitila, i se tulaga e lei mafaufauina, i se nofoaga ma se taimi inosia.

Fai Mea Uma ma le Fiafia

E avea o se manatu faaiu i lesona mai le Falepuipui i Liperate, ou te faasino atu i le fuaiupu mulimuli o le vaega faaiu o nei vaega e tolu sa ta’ua i lenei po. I lenei faamatalaga faaiu aloaia o le aafiaga i le Falepuipui i Liperate, ua fetalai mai ai le Alii ia te i tatou e ala mai i Lana perofeta, o Iosefa Samita, “O lea uso pele e [ma tuafafine pele e, pe a tatou oo foi i taimi e sili ona faigata], se’i tatou faia ma le fiafia mea uma o loo i ai i lo tatou mana; ona mafai ai lea i tatou ona tumau lava ma le mautinoa mausali, e vaavaai atu i le faaolataga o le Atua, ma le faaalia o lona aao” (MFF 123:17; ua faatusilima mea e faamamafa).

Oka se tautinoga faaiu maoae mautinoa ma le faamaoni ua tuuina mai i se malumalu-falepuipui! Ina ua ia tusia na laina, e lei iloa e Iosefa le taimi o le a tatalaina ai o ia ae pe faamata foi o le a toe tatalaina o ia. Sa i ai lava faailoga o loo fuafua pea ona fili e faaumatia lona ola. E le gata i lea, sa tuua na o lona toalua ma le fanau, sa fefefe, e tele lava ina fia aai, sa taumanatunatu pe faapefea ona latou tausia i latou lava e aunoa ma se tane ma se tama. O le Au Paia foi latou, sa leai ni fale e nonofo ai ma sa leai so latou perofeta. Sa tuua e i latou ia Misuri, ma agai atu i Ilinoi, ae o ai na iloa mala sa faatalitali mai mo i latou iina? E moni lava, ou te toe ta’ua foi, o taimi aupito sili ia ona leai se faamoemoe ma aupito sili ona pogisa i taimi uma.

Peitai i nei taimi malulu, ma le tuulafoaiina na fai mai ai Iosefa, ina tatou faia ia o mea uma tatou te mafaia ma ia faia ma le fiafia. Ona mafai ai lea ona tatou liliu atu faamaoni i le Alii, ma faatalitali i Lona alofa mutimutivale, ma vaaia Lona aao ua faaalia mo i tatou.

Oka se uiga maoae e faatumauina i taimi e taugalemu ai po o taimi foi e le taugalemu ai, i le faanoanoa po o le olioli!

Faamanuiaga ma le Molimau

A’u uo talavou pele e, i le avea ai ma se vaega o la’u molimau faaiu ia te outou i le afiafi nei, ou te fia tuuina atu ia te outou se faamanuiaga. E foliga mai ia te au e faapea, a o tuuina atu a matou molimau faaaposetolo i le lalolagi, matou te maua ni avanoa se lua ma, e moni, atonu o ni tiute. O le tasi, ia molimau atu ma faamaonia, e pei ona sa ou taumafai e fai ma o le a ou faia i le faaiuga. O le isi ia faamanuia—e pei ona faia e Aposetolo anamua ina ua valaaulia i latou e le Faaola e fai e pei ona Ia faia, vagana ai o le a faia i le lalolagi uma lava.

O lea la, mo outou uma o e ua faatasi mai i lenei afiafi—iinei i lenei fale tele po o isi nofoaga i le lalolagi atoa—ou te faamanuia atu ia te outou taitoatasi uma i o outou tulaga taitoatasi, e pei o loo tuu ou lima i luga o o outou ao. Ou te ofoina atu lena mea ia te outou i le faamaoni uma e mafai ona ou tuuina atu ai la’u molimau. Ou te faamanuia ia te outou i le suafa o le Alii e alofa le Atua ia te outou, e faafofoga mai i a outou tatalo, ma o loo i o outou tafatafa, ma e le tuua lava outou.

Ou te faamanuia atu i le usoga ina ia outou—ina ia tatou—agavaa mo le perisitua o loo tatou tauaveina, ina ia tatou ola faamaoni i le tofiga ua valaauina i ai i tatou, i lena faatulagaga sili, o le Perisitua Paia, e pei o le Faatulagaga a le Alo o le Atua. Ou te faamanuia atu ia te outou ina ia tatou matuai pei o le Matai—ia tatou mafaufau atili e pei ona finagalo ai o Ia, ia tatou tautatala atili e pei ona fetalai o Ia, ma ia tatou faia ni mea se tele atu o mea sa Ia faia. Ou te faamanuia atu ia te outou le usoga a o outou taumafai e faamaoni, o le a outou maua faamanuiaga uma o le perisitua, o le tele o na faamanuiaga sa tatou ta’ua i le afiafi nei mai nei lava vaega o le Mataupu Faavae ma Feagaiga.

Ou te faamanuia atu i tuafafine o loo i totonu o lenei aofia ma i latou foi o oo atu i ai lo’u leo. Ou te manao ia outou silafia lo matou faapelepele tele ia te outou, e matuai faapelepeleina outou e le Atua, ma le maoae o le faaagiagiaina o le tagavai o le faatuatua e tuafafine o lenei Ekalesia mai lava i le amataga. I augatupulaga uma lava, o le a foliga mai, mai le amataga o taimi e oo mai i le itula lenei ma tua atu, o le tele o taimi o tamaitai i o tatou olaga—o o tatou tinamatutua, o o tatou tina, o o tatou taitoalua, o o tatou afafine, o o tatou tuafafine, ma fanau teine a a tatou fanau—na aveina lena sulu o le faatuatua ma lena tagavai o le ola lelei, ma tauaveina mataupu faavae o le talalelei po o fea lava latou te o i ai, e ui lava i soo se faigata, e agai atu i o latou lava tamai faatusa o le Falepuipui o Liperate ma taimi faigata. Tuafafine, matou te alolofa ia te outou ma faamamalu outou ma faamanuia ia te outou. Matou te tatalo ina ia tali i o outou luga soo se manaoga amiotonu o o outou loto, i le afiafi nei ma le faavavau atoa, ma ia outou tuumuli atu mai lenei sauniga ma se malamalamaaga ma le poto ua faamausaliina i lou loto i le tele o le alofa ma le faamamaluina o outou e le Atua ma le lagi ma le Usoga pulefaamalumalu o lenei Ekalesia.

E to lo’u pulou ia te outou le autalavou matutua o lenei Ekalesia i lenei aofia toatele a le OAE ma faapea atu, ua i o outou lima le lumanai. O tagata o la matou augatupulaga, i se taimi e le o toe mamao, o le a matou tuuina atu ai le fu’a ia te outou. Ia faamanuia outou e le Atua ina ia outou taulimaina na taimi ma le totoa, faamaoni, ma le amiosao ua tatou talanoaina i lenei afiafi.

I le faaiuga, ou te molimau atu o loo soifua le Tama ma le Alo. Ma ou te molimau atu o loo latalata mai i Laua, atonu foi o loo sili ona latalata mai e ala i le Agaga Paia, pe a tatou feagai ma taimi faigata. Ou te molimau atu (ma o le a molimau mai ai foi la tatou viiga faaiu, “My Kindness Shall Not Depart from Thee,” e sii mai ai le perofeta o Isaia) o le a le aveesea lava le agalelei o le lagi mai ia i tatou, tusa lava po o le a le mea e tupu (tagai Isaia 54:7–10; tagai foi 3 Nifae 22:7–10). Ou te molimau atu o le a oo mai le iuga o aso leaga, e manumalo pea le faatuatua ma e tausisia lava e le aunoa ia folafolaga. Ou te molimau atu o le Atua o lo tatou Tama ma o Iesu o le Keriso, ma o le talalelei moni lenei ma le ola—o loo maua i lenei Ekalesia moni ma le ola. Ou te molimau atu o Peresitene Thomas S. Monson o se perofeta a le Atua, o lo tatou perofeta mo lenei itula ma lenei vaitaimi. Ou te alofa ia te ia ma ou te lagolagoina o ia e pei foi ona ou iloa o loo outou faia. I upu o le aafiaga i le malumalu-falepuipui o Liperate, au uo talavou e, “Ia tumau pea i lou ala. . . . Aua le fefe . . . , e i ai le Atua faatasi ma oe e faavavau faavavau lava” (MFF 122:9). I le suafa o Iesu Keriso, amene.

FAAMATALAGA

1. I le History of the Church, 3:190–91.

2. Alexander McRae, i le A Comprehensive History of the Church, 1:521.

3. History of the Church, 3:290.

4. Letter to Isaac Galland, Mar. 22, 1839, in Personal Writings of Joseph Smith, rev.ed., comp. Dean C. Jessee (2002), 456.

5. Letter to the Church in Caldwell County, Dec. 16, 1838; “Communications,” Times and Seasons, Apr. 1840, 85.

6. Letter to Emma Smith, Mar. 21, 1839, in Personal Writings, 449.

7. Letter to Emma Smith, Apr. 4, 1839, in Personal Writings, 463, 464; ua faatulagaina le sipelaga ma le faamataitusi lapopoaina.

8. Tagai Comprehensive History, 1:521 autu o mataupu; tagai foi 526.

9. Tagai, mo se faataitaiga, “A Choice Seer,” Ensign, Aug. 1986, 12.

10. “Text of Address by Pres. Smith at Liberty Jail Rites,” Church News, Sept. 21, 1963, 14; ua faatusilima mea e faamamafa.

11. “God Moves in a Mysterious Way,” Hymns, no. 285.

12. Viiga, nu. 59; ua faatusilima mea e faamamafa.