O A Ituaiga Alii ma Tamaitai e Tatau Ona Avea ai Outou? Epikopo H. David Burton Epikopo Pulefaamalumalu Faeasaite a le OAE mo Talavou Matutua • 2 Novema, 2008 • Iunivesite o Polika Iaga Ua matou fiafia lava ma Sister Burton ma nisi o lo matou aiga, e aofia ai ni tamaiti aoga se toatolu o le Iunivesite o Polika Iaga, ma se tasi e a’oga i le Iunivesite o Iuta, ma se uo lalelei o Crystal Ming, o loo auai i le inisitituti o mataupu faalelotu i le Iunivesite o Uosigitone, tatou te mafuta i le afiafi o lenei Sapati. Ma te fiafia tele ma Barbara e faifai mea faatasi ma le tupulaga faiae. Ma te fiafia i lo outou sagisagi mai. Ma te fiafia i lo outou faamaoni. Ma te alolofa ia te outou ona o mea ua outou ausia i o outou olaga talavou, ma mea o le a outou ausia a o outou auauna atu ma se eseesega tele i le Alii ma le tasi i le isi. Ma te alolofa ia te outou ona o le tausaafia ma le lelei o loo faaalia i o outou foliga ma ua outou aumaia i la tatou mafutaga i lenei afiafi. O le lua vaiaso talu ai, sa ma auai ai ma Sister Burton i se faigalotu mo tagata e galulue i le malumalu i le Malumalu o Navu. O le toatele o na tagata maoae e tele ni nai tupulaga e matutua atu ai i lo le toatele o outou. Na ma lagonaina le i ai o se agaga matagofie i lena sauniga i totonu o lena maota paia. Ua ma lagonaina foi lena lava agaga matagofie a o tatou faatasi ai i lenei afiafi. Ae ui i lea, ua fai si o outou taufaafefe ona ua outou tauaofia i se faapotopotoga toatele, e le gata i lenei maota matagofie ae faapea foi ma le tele o isi nofoaga i le lalolagi atoa e ala i satelite ma tekinolosi. O le a le galo lava ia te au lo’u aafiaga muamua na ou lauga ai i se konafesi aoao. O le valaaulia na ou maua ou te lauga na ou iloa ai o le a ou lauga mo le 14 minute i le sauniga i le taeao o le Aso Sa ma e sosoo atu ia Peresitene Howard W. Hunter. Ou te le tau fai atu, sa matua taufaafefe lava foi lena tulaga ia te au. O se vaiaso pe a, a o lumanai le konafesi aoao, na ma feiloai ai ma Elder Russell M. Nelson i le potu tele ma ia fesili mai ai pe na a mai le faagasologa o lau lauga. Sa ou faailoa atu se mea lilo ia Elder Nelson e faapea, sa ou tauivi lava ma au tapenaga, ona ou iloa ai lea na pau lava le mafuaaga na ia iloaina ai ou te lauga ona o lona valaaulia na faaalia ai o ia e sosoo mai ia te au. O lea la, i lo’u iloaina ai o lena fasi faamatalaga sili ona taua, na ou fesili atu ai ma le lototele ia Elder Nelson pe aisea ua tuu ai se tagata palaai ma le matafefe pei o au e faaogatotonu ia i laua ma Peresitene Hunter. Na mafaufau o ia mo sina taimi ona fai mai lea ma le susulu masani i ona fofoga, “Epikopo, na pau lava le mafuaaga e mafai ona ou mafaufau i ai o le, ua tuuina oe iina e ala i musumusuga ina ia ma foliga lelei ai. Na atili ai le oso i luga o lo’u popole ina ua mavae lena talanoaga puupuu. “Po o le a E Faia Ea Se Mea Lelei mo Oe Lava?” Toeitiiti atoa le afa seneturi talu ai, a o lumanai ai la’u auaunaga faafaifeautalai i Ausetalia, na ou maua ai se faamanuiaga tele ou te faigaluega ai mo le tusa ma le fa tausaga i se faleoloa o mea tapolo mo se tamalii Sikotilani e maoae le atamai i le tapolo. O lona igoa o Alex C. McCafferty. E le auai o ia i le ekalesia, ma e ui ina sa nofo o ia mo le silia ma le 25 tausaga i se nofoaga sa i ai ni tagata o le AAG, ae sa le malamalama moni o ia i a tatou aoaoga faavae po o le talalelei. O ia o se tamalii lelei e faigaluega ai ma ou te faafetai pea ia te ia ona o lona agalelei ma le agaalofa. O lona aoaoina o [au] ma le onosai i le faiga o le taaloga o le tapolo, na fesoasoani e faamanuiaina ai nisi o ou aafiaga i tauvaga a o ou talavou, ma ua mafai ai foi ona ou fiafia i se olaga tapolo mo se gaoioiga faafiafia. O nisi taimi, o lana gagana lea sa afifi i se faaSikotilani malosi sa fai foi si felanulanuai. A le feauauta’i la’u galue ma faamoemoega o Alex pe ou te faia foi se mea sese i le tautuaina o se tagata e oo atu i le faleoloa, na te faia i le tautala faaSikotilani sili ona malu ae mautinoa se upu le lelei ma sosoo ai ma le fesili lava lenei e tasi: “David, lou atalii, pe o le a e faia ea se mea lelei mo oe lava?” Ou te manatua pea ia upu tonu na faaaogaina e Alex ina ua ou maua le lototele e ta’u atu ai ia te ia na ou taliaina se valaau mai le perofeta a le Atua e auauna atu mo le lua tausaga o se faifeautalai i Ausetalia; ma o lea o le a ou le toe faigaluega ai mo ia. I lenei tulaga o lana tali mai sa muamua lava ta’u ni upu e le logolelei ona ia tautino mai lea, “David, lo’u atalii, e le mafai ona e faia se mea lelei mo oe lava i lou feosofai solo i le lalolagi ma tautala atu e uiga i ni mea faalelotu.” O se aso pe lua ae ou te le’i malaga ese atu mo la’u misiona, sa ou afe ai ou te faatofa i la’u uo lelei o Alex. A o ma lululima ma ou faailoa atu lo’u agaga faafetai ia te ia, sa ia toso atu a’u ma tuu mai i lo’u lima se teutusi. Na maligi o ma loimata, ma sa ou teleai atu i la’u taavale. Na ou tietie atu mo ni nai minute i se paka lata ane, i le toafilemu o le siosiomaga, ma ou faitauina ai lana tusi ma iloa ai sa ia tuuina ai i totonu se tupe tele e fesoasoani i le faatupeina o la’u misiona. Pe a ma se tausaga mulimuli ane, a o ou auauna ai i Adelaide, Ausetalia, na ou mauaina ai se tusi mai ia Alex. Fai mai le tusi: “David, lo’u atalii, sa latou tau mai ia te au e manaomia e se faifeautalai se suti fou pe a mavae le tausaga e tasi. Faamolemole, faaaoga le tupe lenei, e faatau ai sou suti e fai i le fulufulu mamoe aupito sili ona lelei mai Sikotilani.” O ni nai aso talu ona ou foi mai Ausetalia, sa ou afe ai i le malae tapolo e faafou le ma masaniga. Na fesili mai Alex pe na ou sauni e taalo tapolo. Na ou fai atu i ai, ua uma aso na ou mafaufau loloto ai i le tapolo, auā na ou faataueseina a’u pate tapolo ma la’u taavale e fesoasoani e totogi ai la’u misiona, ma le isi ua leva ona tea le taimi sa tatau ona ou mafaufau loloto ai i au aoaoga. Na tali mai o ia, na amata lava i upu le logolelei masani, “David, lo’u atalii, e le mafai ona e faia se mea lelei mo oe lava pe afai e te le taalo tapolo. Ia e alu sao lava i totonu o le faleoloa o mea tapolo ma filifili mai sau seti pate tapolo e te manao i ai.” O le mea tonu lava lena na ou faia, ma toeitiiti atoa le 50 tausaga, o loo ia te au pea na pate tapolo. Ioe, ou te lei fiafia i le gagana le logolelei a Alex, ae o le a ou faafetai pea mo lesona maoae o le faamaoni, amio sao, ma le agalelei na ou aoaoina mai ai a o ou faigaluega ai ia te ia. I le aluga o tausaga e masani lava ona ou tomanatu ai i le fesili a Alex: Pe o le a e faia ea se mea lelei mo oe lava? Na faaalia e Alex i lana lava ala, lona le fiafia ia te au. Na ia fesiligia lo’u mafai ona mulimuli i faatonuga: na ia fesiligia lo’u gauai atu i au feau sa fai, ma lo’u tautino i le galuega. Na ia fesiligia foi pe na i ai sou naunau ina ia [ou] avea ma se tagata matua faamanuiaina, aoga, ma saofaga [i mea e fai]. Na ou mafaufau loloto pea lava pea i na fesili. Ou te tautino atu o ia fesili na avea o ni fesili iloga i na aso ma o loo tumau pea ona avea o ni fesili iloga i aso nei. O loo avea lava a’u ma se “galuega o loo faagasolo pea.” Na ou faia foi le faaiuga e faapea, sa fesiligia e Alex mea e ausia i lo’u olaga ae le o le malaga o le olaga. Ae peitai, o lana fesili ua tulai mai ai le fesili, O a mea e faavae ai le manuia i lenei olaga? Mauaina o Uiga FaaKeriso Atonu o se fesili e sili atu le lelei mo i tatou e taulai atu i ai e le o le, pe o le a tatou faia ea ni mea lelei mo i tatou lava, ma faamanuiaina ai i le vaaiga a le lalolagi, ae o le fesili na fesiligia e le Faaola lava Ia: “O lea, pe faapefea la outou [alii ma tamaitai] amio e tatau ai? Tou te manatua o le tali i Ana fetalaiga o le, “E moni ou te fai atu ia te outou, e pei lava o a’u nei.” (3 Nifae 27:27). Na faailoa atili atu e le Faaola, “Aua o mea ua outou vaai mai ua ou faia, o mea lava ia tou te faia” (f. 21). O a ituaiga alii ma tamaitai e tatau ona avea ai outou? I ou mafaufauga loloto, e faaauau ai ona ou fesili: O a ni uiga o se olaga faaKeriso? O le a le mamanu talafeagai e faaaoga i le taulimaina o luitau o le olaga? O le a le uiga o le ia “pei o au nei”? O le mea moni ou te le iloaina uma mea ua faamoemoeina mai, ae o uiga e pei o le alofa o le Atua ma uso a tagata, agalelei, faataitaiga, usiusitai, auauna atu, ma le tausiga o feagaiga, o ni nai vaega ia. Lata mai nei na maliu ai sa matou uo lelei lava, ma o se uo vavalalata a le ma tama teine ma lona toalua, ina ua iu sana tauiviga lototoa ma le faaumiumi ma le gasegase o se fula i le faiai. A o lei maliu o ia, na auina atu e se uo se solo na tusia e faailoa atu ai ona lagona i le faletua o la matou uo. Faatasi ai ma la latou faatagaga, ou te faasoaina atu ai ona anotusi, e le ona o le lelei o le tusisolo, ae o lagona o loo faaalia ai. E amataina: “[Le pele] Diane, Faamolemole fai atu ia Herota ‘faafetai lava,’ Mo le suia o lo’u olaga, Ma le faaali mai ia te au o se faataitaiga, O le taitaiga faaleperisitua, O le tausia o tagata taitoatasi, O auaunaga le faatuaoia, ma le le faavaivai, Ma le alofa moni, faaKeriso. “Faamolemole tau atu ia Herota le tele o mea e manatua Ou te tauaveina i aso taitasi E faamalosia ai au, Ma taialaina ai au— O mea e manatua sa ia tuuina mai ia te au A o ma galulue faatasi. . . . “Faamolemole tau atu ia Herota le ala na avea ai ana faataitaiga, O se tane alofa, Ma se tama agalelei, O se auauna faamaoni a le Alii O mea malie e tumu ai, O le tofamamao foi e sapi ai. Ua ou maua ai se tulaga ou te taumafai e ausia O olaga o lo’u toalua ma la’u fanau ua manuia. “Faamolemole tau atu ia Herota o se faamamaluga tele Le iloa o ia i lenei olaga Ma le auauna faatasi ma ia le pele. “Faamolemole tau atu ia Herota o’u loimata maligi, O lo’u loto foi ua ma’iniini, Aua e le o toe mamao ae toe fo’i Ma tuuina atu se lipoti. “Faamolemole tau atu ia Herota ou te alofa ia te ia Mo lona agalelei, O Ana faaaoaoga, Ma lana faauoga. “Faamolemole tau atu ia Herota o le a ou misia o ia Ae o le a ou saunia ma le naunautai Ma te toe olioli faatasi ai I maota i le lagi o le Atua Silisili Ese o i ai. “Faamolemole tau atu ia Herota o le a ou auauna atu i le Alii Ma lo’u loto, manatu, mafaufau ma le malosi atoa E manatua ai ana faaaoaoga, Ma le naunautai, Ma le tuuto i le Alii. “Faamolemole tau atu ia Herota . . . Faafetai lava.”1 O saafiafiga “faamolemole tau atu ia Herota” atonu foi e agavaa ona faaaofia i o tatou olaga. A mafai ona faafetaia i tatou i ia uiga e pei o le faataitaiga, pule o le perisitua, tausia o tagata taitoatasi, auauna atu, alofa, tane ma le tama alofa, agalelei, faauo, tautino ma le tuuto, e pei ona faia mo Herota, e moni lava o le a ta’ua o tatou olaga e faaKeriso, e tauia ma faamanuiaina. E masani ona taua e Peresitene Thomas S. Monson lona tupuaga Sikotilani ma ona aafiaga a o avea ma se taulealea laitiiti na ola vavalalata lava ma ona matuamatutua, tamaloloa ma fafine o lona aiga, ma ona tausoga. Ou te mafaufau pe faafia ona ia faalogo i se faaupuga e talitutusa ma le “Tom, lo’u atalii, pe o le a e ausia ea se mea aoga i lou olaga?” Ou te masalo i le avea ai o se taulealea e tele naua mea e fiafia i ai, ma se mafaufau e sili ona fatufatuai ma sogasoga, ma e aumalosi foi, atonu na fesiligia o ia i lena fesili i ni nai taimi. O le soifuaga o Peresitene Monson ua tuuina mai ai mo i tatou se mamanu e mulimuli ai i o tatou lava olaga. E faapitoa le moni o lenei tulaga i lea mea ou te taua o ana galuega e le faalauaiteleina. O ana galuega faalauaitele, i le isi itu, ua lau silafia e tagata uma, ua faatumulia i auaunaga maoae i le uarota, siteki, misiona, ma le Ekalesia aoao. Ou te masalo e leai se tagata i lenei tisipenisione e sili atu ona tuuto i ona tofiga taitasi faale-ekalesia nai lo Peresitene Thomas S. Monson. Mai lea taimi i lea taimi tatou te maua ai sina vaaiga i ana galuega e le faalauaiteleina. O le tautua, o le manatu popole, aapa atu ma le faamanuiaina o le “tasi,” ma le ofoina atu o le faamalosiauga ma le faamafanafanaga—o itu taua uma ia o lana galuega e le faalauaiteleina. Talu ai nei lava na manaomia ai e se tuaoi lelei lava se taimi puupuu e nofo ai i se falemai. Ina ua ma asiasi atu ma lo’u toalua o Barbara ia te ia, sa le’i toe faatali o ia i le faamatalaina mai sa asiasi atu Peresitene Monson i la latou sauniga faamanatuga. “Sa matua latalata mai lava o ia,” na ia alaga ai, “sa mafai lava ona ou aapa atu ma pai atu ia te ia.” Na matua fiafia lava o ia i lona lagonaina sa manatu atu le Peresitene o le Ekalesia mo ia. O loo soifua Peresitene Monson i le talitonuga lea e masani ona ia aoaoina mai: “O upu e lima e aupito taua i le gagana faaPeretania o le, Ou te mitamita ia oe. O upu e fa e sili ona taua o le, O leā lou finagalo? O upu e tolu e sili ona taua o le, Pe mafai faamolemole. O upu e lua e sili ona taua o le, Faafetai lava. O le upu e aupito itiiti lona taua o le A’u.2 E masani ona faaaoga e le Faaola ia faataoto e aoao ai lesona taua. E faapena foi ona fiafia Peresitene Monson e faaaoga tala e faamalamalama ai ana aoaoga. Na ta’ua e Peresitene Henry B. Eyring, le faaaogaina e Peresitene Monson o tala e faapea, e te manatu lava na e faalogo muamua i ai i le tala, ae afai e te onosai ma faalogo ma le totoa, o le a e iloa ai e le tutusa ia tala, aua o le a musuia oe e le Agaga ina ia e maua le savali i se auala e ese mai. O se tasi o tala na faaaogaina e Peresitene Monson na aumai mai ona aso a o avea ma se tiakono. Na tofia o ia ma isi alii o lana korama e avea ma ni Esikimo i le faaaliga tala pupuu a le uarota. Na faatino e le tuafafine o Peresitene Monson le vaega o le Tamaitai o le Saolotoga. Ina ua tigaina lona tuafafine i le faaletonu o lona faai i le taimi o le faafiafiaga, sa popole lava ina ne’i le mafai ona tautala ma faaletonu ai le faaaliga. Na tonu loa i “Esikimo” o le a fai se mea i lenei tulaga. Na latou faapotopoto i se potu i le falealalo o le latou falelotu ma tootutuli ai i le tatalo. Na latou sailia le Agaga laveai o le Alii mo le tuafafine o Peresitene Monson. I le taimi atofaina, sa mafai lava e le Tamaitai o le Saolotoga ona fai lana vaega i se leo manino. Na manatua e le tuafafine o Peresitene Monson le aafiaga o se vavega i lona olaga ma sa faafetai ai o ia ona o na Esikimo. O lenei tala faatauvaa e faamanatu mai ai ia i tatou e faapea, o Peresitene Monson sa avea i taimi uma ma se tagata e maoae le faatuatua ma se tagata o le [agaga] tatalo. O loo ia faaaogaina na meaalofa e faamanuia ai olaga o le toatele o tagata i aso nei. O ia o se faataitaiga o ituaiga alii ma tamaitai e tatau ona avea ai i tatou, o tagata o le faatuatua ma tagata o le tatalo. E taua le tatalo mo lo tatou malosi faaletagata ma le tautinoga. Manatua le fesili a Nifae i ona uso le talitonu: “Po ua outou fesili atu ea i le Atua?” (1 Nifae 15:8). O le soifua auauna atu o Peresitene Monson o se mamanu lea e mafai ona tatou faaaogaina e faamatala ma faatulaga ai o tatou lava olaga. Tatalo mo le Fesoasoani i le Faiga o Filifiliga O le toatele o outou ua outou i ai i se tulaga o le olaga o le a outou faia ai filifiliga ia o le a faapea ona mamanuina ai o outou olaga faaleolaga nei faapea ma o outou olaga e faavavau. O nisi o outou o loo i ai i le faagasologa o le faia o filifiliga e uiga i a outou aoaoga. O nisi o outou atonu o loo mafaufau i se misiona. O le toatele atonu o loo taumafai e filifili le mea e te manao e fai mo se matata, po o se galuega i le olaga. Atonu o nisi o outou o loo taumafai e filifili pe o lea tagata o le tagata sao e avea ma au soa e faavavau. O nei filifiliga o le a sili atu ona faigofie pe afai e te molimoliina atu i luma o le Alii i le tatalo. O se vaega toaitiiti o outou atonu o loo tauivi ma le agasala, ma o loo taumafai e filifili pe e te manao e faamamaina e ala i le mana togiola o Iesu Keriso. O nisi o outou atonu ua vaivai a outou molimau i le talalelei ma o loo taumafai e iloilo pe o le a se mea e mafai ona fai e toe suia ai ia tulaga. O filifiliga e uiga i nei mea ma isi tulaga taua, o le a i ai se aafiaga tele i le ituaiga alii ma tamaitai o le a outou i ai, ma mea o le a outou ausia i o outou olaga atoa, pe o le faaaoga foi o upu a lau uo o Alex, o a ituaiga tagata o le a outou i ai. O le olaga lava ia e faigata, ma o filifiliga mamanuina foi o le olaga e masani lava e sili ona faigata ona fai. E i ai lava i taimi uma ia na upu laiti o le ana, ma, po o le peitai, lea e pei ai e faafaigata ma faatuai ai le tali. E masani ona ou moomoo maimau pe a na i ai se fualaau faamaneta e mafai ona tatou inuina lea e mafai ai ona tatou faia i taimi uma le filifiliga e sili ona lelei. Ae o le leai o se fualaau faamaneta, pe mafai la ona ou ofoina atu na o se fautuaga se tasi e fesoasoani ia te oe i le faagasologa o lau faiga filifiliga? Saili le auai mai o lo tatou Tama oi le Lagi e ala i le tatalo faamaualalo ona e faatuatua lea ma naunau e mulimuli i Lana fautuaga a o faaali mai e le Agaga Paia. Ua fetalai mai le Alii e tatau ona tatou suesue i ia mea i o tatou mafaufau ona ole atu lea ia te Ia. Ua Ia folafola mai, “Ou te faia ia mu lou loto i totonu ia te oe; o lea la, o le a e lagona ai ua tonu” (MFF 9:8). O le ituaiga alii ma tamaitai o le a avea ai outou o le a faaleleia atili a o outou faalogo atu ma usitai i le leo itiiti, ma le malu. Ia manatua, o le vaega o le faalogo o le “lagonaina lea ua sao.” I le Iunaite Setete ua faatoa tatou faamaeaina ai se isi vaitau o le pesipolo. Ua maea le Taamilosaga o le Lalolagi ma ua faapaleina se siamupini fou. E sili mamao atu ma le 50 tausaga ua mavae na amata taalo ai se tagata taalo lelei lava i le talituaa i le itu tauagavale mo le au a le Boston Red Sox. E faalua ona faasalaveia lana matata i le pesipolo i ni taimi eseese se lua ona o ni valaau e tautua i le militeli o se pailate o vaalele tau. Na faaigoa o ia e le au fai faasalalauga o le “Tuaniu Maoae” aua o ia o se tagata paee lava ae e ese le malosi o lona taina o le polo. O le mafuaaga e sili ai ona tautaua o ia i taaloga ona o ia o le tagata taalo faapolofesa mulimuli na silia i le .400 le averesi o ana ta mo le tausaga atoa. O le uiga o lenei mea, na faamanuiaina lona oo atu i le tulaga muamua aua e sili atu i le faafa (4) ona ia taina mamao le polo mo taimi taitasi e 10 sa maua ai lona avanoa e ta. E leai se tasi na mafai ona ia faaluaina mea na ia ausia i le afa seneturi ua mavae. O le igoa o lena tagata taalo o Ted Williams. Ina ua mavae le tele o tausaga talu ona maea lana matata o le pesipolo, sa iloa ai e tagata lautele se mea e sili ona maoae e uiga ia te ia–o lana vaai sa sili atu nai lo le toatele o tagata. O le mea moni faatasi ai ma lenei vaaiga e sili atu ona lelei ma maoae atu, sa maua ai e Ted se faasiliga sili atu lea e mafai ai ona ia iloa le polo i se lelei sili atu nai lo isi tagata taaalo, ma maua ai le tasi vae miliona o le sekone e filifili ai pe tatau ona ia sasauina le pate i le te’a. Na mafai ona ia iloa pe na taavilivili le polo pe na faaifo i totonu po o fafo o le vaega e pe ai le te’a. O i tatou o e ua papatisoina ma maua le meaalofa o le Agaga Paia e avea ma se soa tumau, ua tatou maua foi se faasiliga pe a oo i le faiga o filifiliga faigata. E pei ona faamatalaina le faamanuiaina i le faatauga o fanua o le nofoaga, nofoaga, nofoaga, o le faaaogaina o le Agaga Paia e faalagolago tele lea i le faalogo, faalogo, faalogo! Aua Le Lotovaivai O nisi taimi ou te popole ai, ma fai foi sina ou matamuli, ona ua faamamafa e lau tupulaga la outou tupulaga i mataupu ma luitau lea na tatau ona matou foiaina. E ui i le tele o taumafaiga ua faia ina ia fai ai le olaga ma olaga lelei atu, umi teisi, saogalemu teisi, ma sili ona faamalieina, ae o loo i ai lava le tele o mea e tagitui ai e faatatau i le manao tele, mafutaga, ma le siosiomaga, na o ni nai mea ua taua. Ua tatou feagai ma le le mautonu lea ua tulai mai ona o taimi faigata ua tatou i ai. O le a faigofie lava ona lagona le lotovaivai, ma atonu foi o si popole laitiiti pe a tatou mafaufau i le tele o aafiaga e ono oo i ai. O le le mautonu o le maketi o galuega faatasi ma le suiga tele o le tamaoaiga e faaopoopo uma lava i faigata o aso nei. O loo faaauau pea ona fetauai le tasi atunuu ma le isi atunuu. E ui lava i nei mea uma, au uo talavou e, e le tatau ona tatou matatau pe tatou te faalogo foi i lo tatou matatau. Ua faamanatu mai e tusitusiga paia ia i tatou e faapea, afai ua tatou saunia, afai tatou te usiusitai, ma afai o i tatou o tagata o le Ekalesia a le Alii, e le tatau ona tatou matatau i le tulaga o le a i ai le lumanai. “E le aoga ona fefefe o e amiotonu” (1 Nifae 22:22; tagai foi Alema 1:4; MFF 10:55). O le ituaiga alii ma tamaitai o le a avea ai i tatou, o se vaega, o le a faaosofia e le lelei o lo tatou taulimaina o tulaga taufaamatau ma le le mailoa o le olaga. O le iloaina o le olaga e aofia ai tauiviga, faafitauli, mea sese, avanoa, ma lesona, faamolemole ia manatua le faataoto faaSaina anamua e faapea, “E le mafai ona polesiina le maataua e aunoa ma le oloia, e le mafai foi ona faaatoatoaina le tagata e aunoa ma tofotofoga.” Na taua foi i le ala a le Alii, “Aua e ao lava ina i ai le faafeagai o mea uma” (2 Nifae 2:11). E ui lava i le le mautonu uma ma vaivaiga o le lalolagi, ae e tele lava mea e tatau ona faafetai ai ma fiafia ai. O au o se tagata e talitonu o le a lelei mea uma. Ua ou talitonu o le 2008 o se taimi sili lea ona manaia i le talafaasolopito o le lalolagi e ola ai ma maua ai faamanuiaga faalelagi o lo tatou mauaina o le atoaga o le talalelei a Iesu Keriso. Ou te lagona le fiafia i lo’u vaavaai atu i le oo atu o le talalelei i loto ma mafaufau o fanau a le Tama i le lalolagi atoa. Ou te masalo e toalaiti lava outou, pe afai e i ai, e silafia le mea e tupu i le laumua o le Ekalesia i tausaga taitasi i le Aso Faraile muamua o Tesema. O le aso masani lena ua atofaina mo le usuiaina o le Fono mo le Faaaogaina o Sefuluai e pei ona faatonuina ai e le Alii i le vaega e 120 o le Mataupu Faavae ma Feagaiga. I lalo o le taitaiga a le Au Peresitene Sili, e fono uma ai le Korama a le Toasefululua ma le Au Epikopo Pulefaamalumalu e iloilo le faiga o le a faaaogaina ai punaoa a le Ekalesia i le tausaga a sau. E ese le manaia o le vaaia o mea e tutupu mai mai lena fonotaga. E faafiafiaina le vaaia o le tele o maota tapuai fou ua faapea ona faamaoniaina ma fausiaina. O le aofai o malumalu fou o loo faaauau pea ona faateleina. Ua tuuina atu i epikopo uma i le lalolagi ia punaoa e saili ai ma fesoasoani ai i e matitiva. O loo tausia faifeautalai i le silia i le 350 misiona. O galuega faatino e faatelevave ai le galuega o malumalu ua uma ona faamaonia. Ua faataatiaese tupe e faagaoioi ai aoga maualuluga atu ma aoaoga faalelotu. O loo agai i luma le galuega a le Alii i le ausiaina o lona faasinomaga faaperofeta. Ou te maua le lototele pe a ou mafaufau i le saunoaga maoae o le faatuatua lea na saunoa i ai le Perofeta o Iosefa Samita: “E leai se lima e le paia e mafai ona taofia le galuega mai lona alualu i luma.”3 Pe le matagofie ea le iloaina o le a maua e oe ma au le avanoa e tutu ai i le pito i luma o lenei vavega lea ua fuafuaina e faataunuu? O le a le ituaiga alii ma le tamaitai o le a e i ai, o se vaega o le taunuuga o le faatinoina o lou naunautai ma le lagolago i le faaalualuina i luma o Lona malo. Faatasi ai ma le naunautai, e tele naua le loto pulea e manaomia ai. Fai mai Jim Rohn, o se failauga lauiloa, “O le loto pulea o le alalaupapa lea i le va o sini ma mea e ausia.”4 E ese lou fiafia i musika paia, ae maise lava i viiga o le faafetai po o viiga e musuia ai. O se tasi o na viiga e masani ona tatou usuina o le “Come, Let Us Anew.” O upu na tusia i le vaitau o le 1700 e Charles Wesley, ma o le musika e faafetaia ai James Lucas. O le a lagiina e le aufaipese maoae lenei mai le Inisitituti o le Iunivesite a le Setete o Iuta lenei viiga matagofie mo i tatou pe a tatou faaiuina lenei faatasiga. E faatasitasi le Au Paia o Aso e Gata Ai i sauniga faamanatuga, faigalotu, ma isi nofoaga e vivii, tatalo, ma faafou feagaiga ma tautinoga, faapea ai ma le ofoina atu o faamalosiauga lelei o le tasi i le isi. Tatou te maua se ituaiga malosi faafouina pe a tatou faatasitasi. E faia e musika se vaega taua i lenei faagasologa. E mafai ona faatoafilemu ai o tatou loto ma faamataalia ai o tatou agaga i mea faalelagi. Ua faamanatu mai e le Alii ia i tatou e faapea “o le pese a e amiotonu o le tatalo lea ia te au” (MFF 25:12). Faamolemole matau upu o lenei viiga faamalosiau: Omai, e faaauau la tatou malaga o fai nei, Ia galulue faatasi ma le tausaga, Ia aua nei muta seia afio mai le Matai. Tatou faia ma le fiafia Lona finagalo, Ma faaleleia a tatou taleni E ala i le onosai o le faamoemoe ma le alofa. . . . O lo tatou olaga o se miti, o lo tatou taimi o se vaitafe E seesee malie ese atu, Ma e musu le taimi ua sola e nofo mai; Ua fana le u ma ua sola le taimi. O le tausaga o le meleniuma Ua lata mai, ma ua oo mai le faavavau. . . . I lena aso o Lona afio mai e faapea mai ai tagata uma, “Sa ou tauivi lava; Ua ou faamaeaina le galuega na e tuuina mai ou te faia.” O le a maua e tagata uma mai le Alii le tala fiafia: “Na faia lelei ma le faamaoni; Ulufale mai i lo’u fiafia ma nofo i lou nofoalii.”5 O le savali o le faamalosiauga ua faaalia i lenei viiga e manino lava. O loo fautuaina ai e faapea, i la tatou sailiga ina ia avea ma tagata na fautuaina mai e le Faaola, “e pei o au nei,” e tatau ona tatou faafouina e le aunoa lo tatou naunautai ma ia aua lava nei muta a tatou galuega lelei seia oo ina afio mai le Matai. Afai tatou te faatuai, o le a tatou misia le taimi ma o le a faavavau ona sola le taimi. O i tatou taitoatasi i le aso o Lona afio mai, o le a mananao e lipoti atu, “Na ou tauivi lava; ua ou faamaeaina le galuega na e tuuina mai ou te faia.” Ma o se lagona maoae o le a tatou lagonaina pe a tatou faalogoina le tali, “Na faia lelei ma le faamaoni; ulufale mai i lou fiafia ma nofo i lou nofoalii.” E mafai ona avea lenei tulaga ma o tatou taunuuga pe afai o lo tatou faamoemoega o le avea lea ma alii ma tamaitai lea na fautuaina mai e le O Au sili ina ia avea ai i tatou. E masani lava ona ogaoga le suesueina o tagata o la tatou Ekalesia ma faamoemoe ia ola i se tulaga maualuga atu nai lo a tatou uo i isi ekalesia. Pe ua outou matauina e masani lava ona lipotia ma faaaoga i talafou ia faaulutala e pei o “Solia e se Epikopo Mamona . . .” Na aafia se tagata na avea muamua ma Faifeautalai a le AAG i se . . .,” po o le “Tuuaia se Tina Mamona ona . . .”? O mea tatou te faia faalilolilo e tutusa lava le taua ma mea tatou te faia pe a matauina e le lautele. E masani lava ona i ai mata e mataituina i tatou mai le tele o nofoaga e le vaaia. O loo tatou i ai i tulaga e iloa uma mai ai i tatou e tagata. O ni nai masina talu ai, sa ou lipeaina ai se alapaipa na pa. I lea gaoioiga na susu ma palapala ai ou lavalava, ma na lilofia ou lima i le suauu. Ina ua ou iloaina sa ou manaomia si mea laitiiti e lipea ai le paipa, sa ou le maimaua se taimi e faamama ai, ae sa ou oso loa i le taavale ma ou alu atu i le [faleoloa] Home Depot. A o ou iloiloina ma le totoa le tele o ituaiga paipa ina ia mautinoa ou te faatauina le ituaiga fasipaipa sao, sa savali mai se alii ou te le masani i ai ma oso ifo i ou tua. A o savali ese atu o ia i ni nai futu, sa ou faalogo atu o faapea lana tala, “E le o ni foliga na o se Epikopo Pulefaamalumalu i la’u vaai.” Na le mafai e upu ona faamatalaina lo’u maasiasi ona sa ou le ola i le tulaga na faamoemoeina mai ia te au. O le taimi lenei ou te fesili loloto ai ia te au lava, “David, lo’u atalii, o afea ea e te malamalama ai?” Taulai Atu i Mea e Sili ona Taua O sini ma le galue malosi o ni luutaga taua ia i le ausiaina o faamoemoega taua. O outou o se augatupulaga o folafolaga maoae. Ua faamanuiaina outou i le tele o meaalofa mai le Atua. Tou te atamamai; tou te popoto. O outou o loo faaaogaina o outou atamai e ausia ai sini ua faatulagaina lelei ua fuafuaina tou te manuia ai. Ae o outou o e popoto, masani i le taialaina i sini, ma naunautai o le a mafai ona avea ma ituaiga alii ma tamaitai e faamoemoe i ai lo tatou Tama oi le Lagi e tulei i luma Lona malo. Ina ua lata i le faaiuga o la’u misiona, na faia ai le Taamilosaga Tapolo a le Lalolagi i le malae tapolo i Royal Melbourne, na tuuina atu ai se avanoa i tapolo tau amata e taaalo ai ma se tapolo polofesa i se taamilosaga faataitai a o lei amataina le taamilosaga. I le aso mulimuli lava o la’u misiona, na mafai ona ou auai i lenei taamilosaga faataitai, e ui o le a ou le faatulemomoeina outou i tala i le pogai na mafua ai lena mea. Ina ua oo i lo’u taimi e se’i mai ai i le pulou le igoa o le polofesa o le a ma taaalo, sa ou seiina le igoa o Arnold Palmer. E fai la’u tala i le fefe lea e o mai faatasi ma le lauga i le konafesi aoao! O lena fefe tele, sa le tutusa ma lo’u fefe na ou lagonaina i le taimi lava na ou vaaia ai le igoa o “Aronld Palmer” i luga o la’u fasipepa. O le mea moni, ou te lei toe uuina se pate tapolo mo le silia ma le lua tausaga, ma, i le faaaogaina o le gagana i aso nei, sa matua ou palaai lava! E le tele se mea o ou toe manatua e uiga i le taamilosaga tapolo vagana ai sa matua leaga lava lau taalo. I le pu lona 17 sa ta ai a ma taaga amata. Na ma savavali i ni nai futu ma ou taina ai lau ta lona lua ma e lei mamao atu ae ta lau taaga lona tolu, ae faatoa ma tau atu i le polo a le Susuga a Palmer. Na taumafai malosi lava le alii talavou Ausetalia sa toso ato i le Susuga a Palmer e faafiafia o ia. Na ou faalogo atu o faapea atu le alii toso ato i le Susuga ia Palmer, o le itu agavale e faaifo i lalo ma e i ai se auvai e tafe ai e le mafai ona iloa atu. Ona ia toe fai atu lea, o le itu taumatau e uumi naua le vao ma na faigata ona sasau ai se pate. Na toe tuu e le Susuga ia Palmer lana pate tapolo i totonu o le ato ma fai atu ma le filemu ma le to’a i le alii talavou toso ato, “Faamolemole aua e te faalavelave i lo’u mafaufau i mea o loo i le itu taumatau, ma ou te le fia iloa foi po o a mea o loo i le itu tauagavale. Na pau lava le fasi faamatalaga ou te manaomia mai ia te oe o le mamao sao o le polo lenei mai le fu’a o loo i le laugatasi e alu ai le polo i le lua.” Oka, o se aoaoga mamana lea mo au. Na vave ona ou iloaina le taua o le taulai tonu atu i mea e taua ma ia le faalavelaveina i mea o loo i le itu tauagavale po o le taumatau. O le taulai [atoatoa] e taua i le ausiaina o a tatou sini. E toatele naua i tatou o loo popole i mea o loo i le itu taumatau ma mea o loo i le itu tauagavale ae le taulai atu i le faamoemoega autu o loo i ai tonu i le ogatotonu. A tatou toilalo e taulai atu i mea sao, e faigata lava ona avea i tatou ma “ituaiga alii ma tamaitai” lea tatou te matua mananao lava ia avea ai i tatou. I lenei taumafaiga, ia manatua na folafola mai le Alii: “Ou te muamua atu i o outou luma. Ou te i ai foi i lo outou itu taumatau, a o lo’u Agaga o le a i o outou loto, e siomia foi outou e a’u agelu, e lagolagoina outou” (MFF 84:88). Ou te tatalo ina ia tatou taumafai i taimi uma o o tatou olaga e taulai atu i mea e sili ona taua. Ou te molimau atu o loo tatou i ai i le feau a le Alii. Ua faamanuiaina i tatou e taitaiina e ni perofeta soifua. Ua faamanuiaina au e galue i lalo o le taitaiga a ni perofeta se toafa o lenei tisipenisione. Ou te lagona ua ou iloa se mea e uiga i perofeta ma ou te molimau atu o Thomas S. Monson o se perofeta a le Atua i uiga uma lava o le upu. Ou te iloa o loo i ai so tatou Tama Faalelagi alofa ma o loo soifua. O i tatou o Ona atalii ma afafine. Ou te faafetai mo Lona Alo Pele e Toatasi, o lo tatou Faaola o le na togiolaina mo a tatou agasala. Mo outou uma o e atonu o lagona le leiloa, pe o lagona ua leai se faamoemoe, pe ua lagona ua faavaivaia e le agasala lou alualu i luma, ou te molimau atu o loo i ai Lana Togiola ma o Lona alofa tunoa e tumau e faavavau. Ou te iloa o Iosefa Samita o le perofeta o le Toefuataiga. Ou te faaaogaina lenei avanoa e talosagaina ai faamanuiaga o le lagi i o outou luga taitoatasi. O lenei faamanuiaga ou te talosagaina ma ole atu ina ia outou mataala ma naunau e avea ma ituaiga alii ma tamaitai o loo finagalo lo tatou Tama oi le Lagi e avea ai outou, ma ou te faia ai i le pule ua tuuina mai ia te au ma i le suafa paia o Iesu Keriso, o lo tatou Faaola ma lo tatou Togiola, amene. FAAMATALAGA 1. Christian Weibell ia Diane Lefrandt, fesootaiga patino; faaaogaina ina ua faatagaina. 2. Originally from Robert Woodruff; tagai Thomas S. Monson, i le Conference Report, Oct. 1987, 82; po o le Ensign, Nov. 1987, 68–69. 3. History of the Church, 4:540. 4. Jim Rohn, The Treasury of Quotes (2001), 40. 5. Hymn, no. 217. © 2008 e le Intellectual Reserve, Inc. Ua taofia aia tatau uma. Faamaonia le faaPeretania: 5/07. Faamaonia le faaliliuga: 5/07. Faaliliuga o le What Manner of Men and Women Ought Ye to Be? Samoan. 04526 890