Faamoemoega Tetele

Peresitene Thomas S. Monson

Faeasaite a le OAE mo Talavou Matutua • 11 Ianuari, 2009 • Iunivesite o Polika Iaga

Peresitene Thomas S. Monson A’u uo talavou pele, o le agaga ua faatumulia ai lenei sauniga iinei i le Marriott Center i le Iunivesite o Polika Iaga ma le anoanoai o isi nofoaga i le lalolagi atoa, o se ata lea o lo outou malolosi, o lo outou tuuto, ma lo outou lelei. E maeu lo’u faafetai ona ua tatou mafuta i lenei afiafi. Ua outou faamanatu mai ai upu na tusia e le tusisolo o Henry Wadsworth Longellow:

E maeu le matagofie o le talavou! e maeu lona susulu
Faatasi ai ma ona moomooga, manaoga, ma miti!
O le Tusi o Amataga, o le Tala e le Uma,
O tamaitai uma o ni toa manumanu, ae o alii uma o se uo!¹

E le gata ia te outou uma, a ua ou fiafia lava e mafuta ma tagata o lo’u aiga i le po nei.

Na ou toe faitauina talu ai nei se tusi tuai ou te fiafia lava i ai na tusia e Charles Dickens ua faaigoaina o leGreat Expectations. O outou na ua faitauina lenei tala masani o le a manatua o loo talanoa Dickens e uiga i se taulealea e igoa ia Philip Pirrip, e lauiloa i le igoa o “Pipo.” O le alii laitiiti o Pipo o se tamaitiiti matuaoti, na te le manatuaina pe na vaai i lona tina po o lona tama. Na ia te ia faanaunauga uma o se tamaitiiti. Sa moomoo o ia ma lona loto atoa, ma’imau pe a na o ia o se sikola. Sa moomoo o ia ma’imau pe a na o ia o se tamalii. Sa moomoo o ia ma’imau pe a na le faavasivasi Ae o ona moomooga uma lava ma ona faamoemoega sa aga atu lava ina le taunuu, seia oo i se tasi aso na talanoa atu ai se loia mai Lonetona e igoa ia Jaggers i le alii laitiiti o Pipo, ma fai atu ia te ia e i ai se tamalii agalelei e le o iloa, ua uili atu se tamaoaiga mo ia. Ona fai mai lea o lena loia o le alii laitiiti o Pipo, “o se taulealea o faamoemoega tetele.” ²

O le po nei, a o ou mafaufau pe o ai outou ma pe ni a outou, o ai tou te ono tula’i mai ai ma pe ni a foi e avea ai outou, ou te fai atu ia te outou, e pei ona fai mai lena loia e uiga ia Pipo, ua ia te outou ni faamoemoega tetele— e le faapea ona o se tamalii agalelei e le o iloa, ae ona o se tamalii agalelei ua lauiloa—o lo tatou Tama Faalelagi—ma ua faamoemoeina mai mea tetele mai ia te outou.

Sauniuni mo le Taufetuliga o le Olaga

O le toatele o outou o iinei i lenei po, ua lata ina mae’a le a’otauina o outou. (E tatau ona tatou patipatia lena mea.) O isi o loo i ai nisi vaitau faaopoopo o tapenaga faaakatemia o loo lupe. Ua tofu i ai outou i le mea e mafai ona ta’ua o le taufetuliga o le olaga.

Na tusia e le tusitala o le tusi a Failauga: “Ua le sini i le tausinioga e ua televavave, ua le malo i le taua e ua malolosi” (Failauga 9:11); o lē e tumau e oo i le iuga. E matua taua tele le taufetuliga o le olaga, e matua taua tele le taui, e tatau lava ona tuu lena faamamafa i le lava ma le auiliili o le sauniuniga.

Pe a tatou manatunatu i le natura e faavavau o a tatou filifiliga, o le sauniuniga o se itu moni taua lea i o tatou olaga. O le a oo mai le aso o le a tatou vaavaai atu ai i lo tatou vaitau o tapenaga ma tatou faafetai ona sa tatou faaaogaina tatau e i tatou lava.

I le tele o tausaga talu ai, ao lei tofia au i le Korama a le Toasefululua, sa ou maua le avanoa e lauga ai i se mafutaga faapisinisi i Dallas, i Texas—sa lauiloa “o le aai o lotu.” Ina ua maea le mafutaga, sa ou alu i se malaga maimoa a se pasi e matamata ai i faoa aai. A oo ina o le a matou pasia ia falesa matagofie, ona fai mai lea o le avepasi, “I le itu tauagavale o le Lotu Metotisi,” po o le, “I le itu taumatau o le falesa Katoliko.” Ina ua matou pasia se falepiliki lanumumu manaia e tu i luga o se mati’e, sa ta’u mai e le avepasi, “O le fale le la e lolotu ai Mamona.”

Sa fesili mai se tamaitai sa i tua o le pasi, “Avepasi, e mafai ona e faamatala maia se mea e uiga i Mamona?” Sa faatu e le avetaavale le pasi i tafaala, ona faliu mai lea i lona nofoa, ma tali mai, “Tamaitai, na pau lava le mea ou te iloa e uiga i Mamona, e lolotu i le falepiliki lanumumu le la. E i ai se tasi o i lenei pasi na te iloaina se isi mea e uiga i Mamona?”

Sa ou faataupupula atu i foliga o tagata taitasi mo se faailoga pe iloa, po o se manao e tali. E leai se mea—leai se faailoga. Ona ou iloaina ai lea o le moni o le faaupuga, “A taunuu mai le taimi mo faaiuga, ua pasi le taimi mo tapenaga.” O le 15 minute na sosoo ai, sa ou maua ai le avanoa e tuuina atu ai, e pei ona tautino mai e Peteru, “se uiga o le faamoemoe o lo o ia te outou” (1 Peteru 3:15). O le taimi lena, sa ou atiina ae ai se agaga faafetai tele e faatatau i le mataupu o le saunia.

O le mea moni, a’u uo talavou e, o le vaitau o la outou tapenaga po o le sauniuni e le i amata i le aso na outou savavali atu ai ia outou uluai vasega o le kolisi po o le iunivesite. Ua leva ona amata ae tou te lei oo mai i le olaga faitino, ina o tatou ola o ni fanau agaga a lo tatou Tama Faalelagi. Ou te matua faafetai lava ona o Lona atamai, na Ia tuuina mai ai se faamaumauga, i le tusi a Aperaamo, lea o loo faamatala mai ai e uiga i lena olaga:

“O lenei, sa faaali mai e le Alii ia te au, o Aperaamo, agaga na foafoaina a o lei i ai le lalolagi; ma sa i ai faatasi ma i latou uma na le toatele o e tautaua ma le maoae;

“Ma sa silasila atu le Atua i ia agaga ua lelei, ma sa ia tu i lo latou lotolotoi ma faapea atu: O le a ou faia ia avea i latou nei ma au faipule; aua sa ia tu i le lotolotoi o i latou [o e] o ni agaga, ma sa ia silasila atu ua lelei i latou; ona ia fetalai mai lea ia te au: Aperaamo e, o oe lava o se tasi o i latou ia; na filifilia lava oe ae e te lei fanau mai.

“Ona tulai ai lea mai ia i latou o se tasi ua faapei o le Atua, ma ua faapea atu i e na i ai faatasi ma ia: Ina tatou o ifo ia i lalo, aua o loo avanoa lava, ma tatou ave nei mea ma tatou faia ai se lalolagi e nonofo ai i latou nei;

“Ma o le a tatou faataitai ai i latou, ia iloa ai, pe latou te fai mea uma e poloaiina ai i latou e le Alii lo latou Atua;

“Ma o i latou o e e tausia lo latou uluai tofi, e faaopoopoina ia i latou, a o i latou o e e le tausia lo latou uluai tofi, o le a latou le maua le mamalu o lea malo, faatasi ma i latou o e na tausia lo latou uluai tofi; ma o i latou foi o e tausia lo latou tofi lona lua, o le a faaopoopoina i luga o o latou ulu le mamalu e faavavau faavavau lava” ( Aperaamo 3:22–26).

O le poto lea o lo tatou Tama Faalelagi, ua tatou fananau mai ai i le olaga faitino, ma tali e aiga alolofa.

Ou te manao e tau atu ia te outou le tele o talosaga o loo faia e o outou aiga mo outou. Latou te popole mo outou. Latou te fia iloa po o a mai outou. Latou te alolofa tele ia te outou. Aua ne’i outou faia se mea e le fiafia ai i latou.

Ua ta’u mai e le Alii i le Mataupu Faavae ma Feagaiga o uluai tausaga e valu o o tatou olaga, e le tuuina atu ai ia Satani le mana e faaosooso ai i tatou a o avea o ni tamaiti (tagai MFF 29:46–47). E valu tausaga sa tatou mamao ese ai mai ia Lusifelo.

O lenei faamatalaga na tuuina atu e le Alii i le Perofeta o Iosefa Samita i le 1830. I o tatou taimi, sa i ai se saienitisi logologoa, o Dr. Glen Doman, o lē atonu e lei faalogo lava o ta’ua le faaaliga, ae na ia faia se faaiuga e ala i ana suesuega e faapea “o se pepemeamea faatoa fanau mai, e toetoe lava o se atalolomi moni lava o [se] komepiuta, e ui lava ina maoae le tasi i le isi i le toetoe o itu uma.

“O le mea e tuu i le fai’ai o le tamaitiiti i uluai tausaga e valu o le olaga, atonu e tumau ai lava. Afai e te tuuina ni faamatalaga sese i lona fai’ai i lena vaitau, e matua faigata lava ona toe soloiese.” Sa talitonu o ia o le vaitausaga e aupito sili ona talileleia i le olaga o le tagata soifua, o le taimi lena o le lua po o le tolu tausaga le matua. ³

Atonu e te fesili, “Aisea ua faamamafa mai ai e Peresitene Monson lenei mea? Ua loa ona tuanai atu lo tatou uluai vaitau e valu tausaga o le aoaoina.” Peitai, o outou na o’u uso ma tuafafine, o le a i ai se aso e avea ai ma matua, ma o le a outou mananao e faamamafa atu le taua o lena vaitau muamua e valu tausaga, i a outou fanau ma a outou augatupulaga e tutupu mai ia te outou i le lumanai.

Pe a ou mafaufau i ni mea tatou te le masalosalo na tatou faia a o laiti, o talavou, ma talavou matutua, ou te manatu e maeu lava le mafai ona ola o tatou matua, ae le ta’ua ai le tumau o la latou faautautaga. Sa i ai se tasi tamaitai na feagai ma se taeao faigata tele a o taumafai e faafoe lana fanau na faapea lava ia o le a valea.

Na alu atu lana tama tama laitiiti o Mataio, ma fai atu ma le fiafia ia te ia, “Mama, e te manatua le meatuuteu lea na tuu e lou tinamatua i lou tina, ona tago lea avatu ia te oe, lea e te popole ai lava i taimi uma ne’i meaane ua ta’e ia te au?”

“I,” o lana tala lea.

“Ia,” na tali atu ai Mataio, “ua mafai nei ona e le toe popole!”

Saunia Faaakatemia

O outou, o’u uso e ma tuafafine, ua outou ulufale atu nei i se isi vaitau maoae o tapenaga ina ia mafai ai ona outou agavaa mo le taufetuliga o le olaga. Ou te talanoa e uiga i tapenaga faaakatemia. E taua lena mea aua o iina tatou te aoaoina ai lesona o le a fesoaosani tatou te taulimaina ai luitau o lenei lalolagi fesuisuiai o loo tatou ola ai.

I ni nai augatupulaga ua mavae atu, afai e talosaga se tagata mo se avanoa o tofi i le lalolagi faapisinisi, atonu e faapea atu se pule faatonu ia te ia, “E te naunau e galue malosi? E te maloloina?” Ma afai o tali i nei fesili o le “Ioe,” e mafai lava ona ia faafaigaluegaina oe.

O le mea moni, e le o le tulaga lena i aso nei. Faapea la e i ai se talosaga a se tasi—e masani lava ona auina atu i le initoneti—ua filifilia mo se faatalanoaga patino, o le a fesili atu le pule i le taimi nei i fesili e pei: O le a lou faailoga na e i ai? O le a sou sao e mafai ona e aumai i le kamupani? O a polokalama faakomepiuta e mafai ona e faaaogaina ma le tomai?

Fai se Taumafaiga

E tele tausaga ua tuanai sa ou maua ai le avanoa e faiaoga ai i le iunivesite, ma ou te manatua e i ai nisi tamaiti aoga sa foliga mai e iloa le mea la e mananao e ausia. Sa latou faatatau ia i latou lava, sa i ai o latou faamoemoega, sa i ai a latou sini sa latou galulue i ai mo le ausiaina o nei faamoemoega ma sini. Ae o isi tamaiti e matua le kea lava. Sa foliga mai o la e felafoaiina i luga o le vasa o avanoa faafuaveta, faatasi ai ma galu o toilalo o loo taufaamata’u mai e lofituina ai i latou. Muamua, e oo ina paie, ona lotovaivai ai lea, sosoo ai ma le faavaeluatai; ona le toe aooga ai lea.

Na i ai se tamaitiiti faapena na nofo ma le aoga ona alu lea i le fale ma fai i lona tina, “Mama, ua ou nofo ma le aoga. O le a ou alu e fai lo’u lava olaga i le lalolagi.” Na teu lana atopau ma alu e fai lona olaga. Ina ua mavae le tolu vaiaso o fetaiai ma le olaga, sa telefoni mai i lona tina. “Mama,” na ia fai mai ai, “e te manatua na e fai mai ia te au ina ua ou tuua le fale afai ae ou le toe a’oga, o le a le mafai ona maua sa’u galuega? Ia, e sese oe. Na o le tolu vaiaso na ou i ai i le alatele ae ua ono a’u galuega!”

I au taumafaiga mo le mea silisili, e manaomia ai ni taumafaiga mao’i. Manatua, “o le ua itiiti ana saito e lulu, e itiiti foi ana e selesele mai; a o le ua tele ana e lulu, e tele foi ana e selesele mai” (2 Korinito 9:6).

O le olaga o se vasa e faalotomaulalo ai le faamaualuga, e lāina ai le tagata fe’alofa’i i tiute ae faaalia ai le taitai. Ina ia e folau saogalemu ai ma taunuu i le uafu faamoemoeina, e te manaomia le uu i ou lima o au tomatau ma tuu i ai faamatalaga aupito lata mai. E manaomia ona e aoao e ala i aafiaga o isi, tu atu ma le mausali mo mataupu faavae, ia faalautele mea e te fiafia i ai, ia malamalama i aia tatau a isi e folau i le vasa lava e tasi, ma ia faatuatuaina i le faataunuuina o ou tiute.

O au taumafaiga i le aoga o le a i ai se aafiaga iloga mo ou avanoa pe a uma au aoga. A o e tauivi mo ni maka lelei o au vasega, aua nei galo ai le taua o le matua aoao e mafaufau. Fai mai Henry Ford, o se faipisinisi iloga, “O se tagata aoaoina e le o le tagata na koleni lona manatua e manatua ai ni nai aso o le talafaasolopito—a o le tagata ua mafai ona ausia ni mea. O se tagata e le mafai ona mafaufau e le o se tagata aoaoina, po o le a lava le tele o faailoga ua ia maua. O le mafaufau o le gauega aupito faigata lea e mafai e se tagata ona fai—atonu o le mafuaaga lea ua matua toaitiiti ai lava o tatou tagata mafaufau.” ⁴

Saunia Faaleagaga.

E sili atu nai lo le tatou vaitau o tapenaga faaakatemia o le mataupu o le tapenaga faaleagaga. E tatau ona tatou maua mo i tatou lava se molimau o le talalelei a Iesu Keriso, o lea molimau o le a avea ma se taula i o tatou agaga.

I lenei vaitau o le fiailoa, ma le le mautonu o outou olaga, atonu e fesili nisi o outou, e pei ona fesili Pilato, le kovana i Iutaia i le taimi o Keriso, “Po o le a le upumoni?” (Ioane 18:38). Tatou te toe liliu atu foi i faaaliga mo se tomatauga:

“O mea foi e le faamanuiaina e le mai le Atua a o le pouliuli.

“O mea mai le Atua o le malamalama lava ia” (MFF 50:23–24).

E fiaafe o agaga faamaoni, magafagafa na faaauau pea ona feagai ma lena fesili matuia lea na aga atu i le mafaufau o Iosefa Samita a o ia suesueina tautinoga sa faia e ekalesia o le latou nuu pe o ai e sa’o a o ai foi e sese. Fai mai Iosefa:

“O le taulotoaiga o lea tauaiupuga ma le lasi o taofi na ou faapea ifo ai ia te au lava: O le a se mea e ao ina ou faia? O ai o nei lotu uma ua sao; po o ua sese i latou uma? Afai foi ua sao se tasi o i latou, o le fea, ma pe faapefea foi ona ou iloa? …

Sa oo ifo i lo’u mafaufau le tonu e faapea, e lua mea e ao ina ou filifili ai, o lo’u nofo pea i le pouliuli ma le fenumiai, po o lou faia e pei ona faatonu mai e Iakopo, o le ole atu lea i le Atua.” (Iosefa Samita—Talafaasolopito 2:10, 13).

Sa tatalo o ia. O le taunuuga o lena tatalo o loo sili lona faamatalaina i upu a Iosefa lava ia. Ua outou iloa na upu: “Sa ou vaaia ni Tagata se toalua e le mafaamatalaina lo laua mamalu ma lo laua pupula, o tutu mai i ou luga ae i le ea. Sa fetalai mai le tasi o i laua ia te au, ma sa ia ta’u lou igoa ma fetalai mai a o tusi ane lona aao i le tasi—O Lo’u atalii Pele lenei. Faalogo ia te Ia!”” (Iosefa Samita—Talafaasolopito 2:17). Sa faalogo Iosefa; sa aoao foi Iosefa. Ua tali lana fesili.

Ia i latou o e saili ma le lotomaulalo, e leai se mea o le a tausuai ai ma tautevateva i le ala e tau atu i le upumoni. Ua uma ona maka lelei e lo tatou Tama Faalelagi. E tatau ona muamua i ai so tatou naunau ia iloa mo i tatou lava. E tatau ona tatou suesue. E tatau ona tatou tatalo. E tatau ona tatou faia le finagalo o le Tama. Ona tatou iloa ai lea o le upumoni, ma o le a faasaolotoina i tatou e le upumoni. O le a alofagia e le lagi i latou o e sailia ma le lotomaulalo. O se folafolaga lena ou te tuuina atu ia te outou. Mafaufau i ai.

Ia manatua e le mafai ona i ai le masalosalo ma le faatuatua i le mafaufau i le taimi e tasi, aua e tuliese e le tasi le isi. O le mea e faataumaoi e le masalosalo, e faatumu e le faatuatua. O se uiga faaalia o le faatuatua e latalata atili atu ai le tagata i le Atua ma Ona faamoemoega.

E tele lava ina manatua e Peresitene Tavita O. MaKei, “O le ola ai o le tagata ua na o se suega e saili ai pe o le a taulai atu ana taumafaiga, lona mafaufau, lona agaga, i mea e fesoasoani i le ola lelei ma le faamalieina o ona natura faaletino, pe o le a ia faia ma mea e tulitulimata’i i lona olaga le maua mai o uiga auau mama faaleagaga.” ⁵

O le faatuatua e i ai le talitonuina patino, o se faalagolago, i le afioga a lo tatou Mataisau.

Afai e i ai ni ou mafaufauga masalosalo, ia e manatua le fautuaga na tuuina mai e Peresitene Stephen L Richards, o se fesoasoani sa i ai i le Au Peresitene Sili, o le na saunoa: “Ia na ona faapea atu lava i na manatu taufaasese, ma le faalavelave ma le faatautee: ‘Ua ou fuafua ou te tumau i lo’u faatuatuaga, faatasi ma le faatuatua o o’u tagata. Ua ou iloa o le fiafia ma le lotomalie o loo i ai iina, ma e ou te le faatagaina oe, o talitonuga e le mafai ona malamalama e uiga i le Atua, faapea ia manatu masalosalo, ina ia faaleagaina lo’u fale o le faatuatua. Ou te faailoa atu ou te le malamalama i le faatulagaga o le foafoaga, ae ou te talia lona moni. Ou te faapea atu e le mafai ona ou faamatalaina ia vavega o le Tusi Paia, ma ou te le taumafai foi e faia, ae ou te taliaina le afioga a le Atua. Ou te le’i i ai faatasi ma Iosefa, ae ou te talitonu ia te ia. Ou te le’i maua le faatuatua e ala mai i saienisi, ma ou te le faatagaina ni mea ua ta’ua o mea faasaienisi e faaleagaina.’”⁶

A oo ina maea lou vaitau o sauniuniga i le aoga ma ua e malaga atu i le taufetuliga tele o le olaga, se’i ou fautuaina atu lava ni nai motugaafa o le a fesoasoani ia te oe e ausia ai ou faamoemoega tetele.

Aloese Mai Tulaga Matautia o le Olaga

Muamua, aloese mai tulaga matautia i le ala. Aloese mai auala ‘alo na e aveesea ai lou taui faaselesitila. E mafai ona e iloa pe a e manao ai. Atonu e faaupu mai faapea, “Se, na o le tasi lava ma o le a le afaina,” po o le “O o’u matua e tautu lava ia latou uputuu.”

E mafai foi ona avea mausa leaga ma tulaga matautia. I le taimi muamua, e mafai ona tatou momotuina pe a tatou mananao ai. Mulimuli ane, ona tatou momotuina ai lea pe a tatou mafaia. Na tusia e John Dryden, o se tusisolo ma se tusitala lauiloa o le seneturi e 17, e faapea:

“O mausa lē lelei e faaputuputu e aunoa ma le iloa,
Faapei ona maua vaitafe mai alia, o vaitafe foi e tafe atu i le sami.⁷

O mausa lelei, i se isi itu, o musele ia o le agaga. O le faatele ona e faaaogaina o le tele foi lena o le malolosi e oo i ai.

Ua apoapoai mai lo tatou Tama Faalelagi ina ia tatou “saili i mea mama, matagofie, logoleleia, ma tauleleia” (Mataupu Faavae o le Faatuatua 1:13). O le le faautauta, ole le mama, ma le malosi o uunaiga a taaga e afua ai ona felafoaiina le toatele i luga o le vasa o agasala ma olopala ai i luga o aau maamaai o avanoa ua le maua, o faamanuiaga ua taofia, ma miti ua nutipalaina.

Soo se mea lava e te faitauina, faalogologo i ai, pe matamata ai e tulai mai ai sou aafiaga.

Aloese mai soo se foliga faaponokarafi. E matautia ma aati. Afai e faaauau pea lou matamata i ponokarafi, o le a pe lou agaga ma o le a matafiese lou mafaufau manino.

Aua e te fefe e savali ese mai se tifaga, tape le televise, pe sui le alaleo o le leitio pe afai e le talafeagai mea o aumai ai ma tulaga faatonuina o lou Tama Faalelagi. I se faaupuga faigofie, afai e i ai lava sau fesili pe talafeagai se tifaga, tusi, po o se isi lava ituaiga o mea faafiafia, aua e te vaai i ai, aua le faitauina, aua ne’i e auai.

Ia Filiga mo au Sini

Lona lua, ia faaeteete i le amatalia o se mea ma le naunautai, ae le faaumaina. Ou te fiafia lava i le faautautaga o loo maua i le solo lea e le o iloa le tusisolo. Ou te le manatu o se fatuga e maoae lona tino mai, ae e mafai ona e malamalama i ai.

Pipii i lau galuega seia oo ina e masani ai.
E toatele e amataina, ae toaitiiti e faaiuina.
O le mamalu, malosi, tulaga ma le viiga
E masani ona oo mai i tagata e faatumauina.

Pipii i lau galuega seia oo ina e masani ai;
Punou i ai, ia e afu ai, ataata foi i ai;
Aua o tua atu o le punou ma le afu ma le ataata
O le a oo mai ai le manumalo o le olaga.⁸

E malie lava le fuafaatatau o le Galue: “E manuia le galue ae leai se mea e maua i le na ona manaonao faalupe o eleele naumati.” O se uiga faaalia o le galue, e taunuu i le malosi e faia ai taumafaiga faifai pea mo le ausiaina o se sini ua faatuina.

Sa avea lava au o se tagata sa tuuto le fiafia i taaloga. Ou te manatuaina pea lava se faifaasalalauga o taaloga a o ia faaviivii i le faatinoga ofoofogia a Y. A. Tittle, o se tasi o polofesa logologoa i le laina i tua o le lakapi faaAmerika. Na Ia fetalai:

“O le tama autu lea o le taaloga. Ua ma’alo mai Tittle i le ogatotonu; ua aga atu e togi le polo, peitai e le o mafai ona maua e lana laina. E foliga mai ua uma le taaloga.

“Faatali! Faatali! Ua faasē e Tittle ē na pueina o ia; la ua faapalasi mamao atu i tua o le laina. Ua sii a’e lona lima e togi le polo, ma alu atu ai le polo ma pau i le tini mo se sikoa.

“O se taumafaiga maoae lona lua lena a Y.A. Tittle.”

I le taaloga o le olaga, e tele lava ina manaomia ai se taumafaiga lona lua. E le faafeao maia le ola fiafia i soo se augatupulaga e ni talipalau ma ni pu. E tuputupu a’e i o tatou luga i lea tausaga ma lea tausaga, o sia mea itiiti ma sia mea itiiti, seia i’u lava ina tatou iloaina ua tatou maua. E ausia e se tino o le galuega ua matua lelei ona fai, ma ua mafai ai ona ea a’e o tatou ulu ma le mautinoa ma vaavaai sa’o atu i mata o le lalolagi.

Mulimuli i le faataitaiga a Christopher Columbus. Manatu i se lautusi o lana api talaaga i lana uluai malaga. O lea aso ma lea aso, a o latou faamoemoe ia vaaia se laueleele ae lei maua lava, sa ia tusia ai, “O le asō sa faaauau pea ona matou folau.”⁹ O le filiga e mauoa ona taui.

Fesoasoani i Isi

Lona tolu, fesoasoani i isi i la latou taufetuliga o le olaga. Manatua a e fesoasoani i se tasi ia a’ea se mauga, e tatau ona pito latalata oe lava i le tumutumu. Taumafai e tilotilo atu i lou uso po o lou tuafafine i le vaaiga sa’o. Fai mai se tasi tamalii, “Sa ou tilotilo atu i lo’u uso e ala i le meavaai o le faitio, ma sa ou faapea, ‘Se uso ina a faainaelo.’ Sa ou tilotilo atu ia te ia i le meavaai o le manatu faatauvaa, ma sa ou faapea, ‘Se uso ina a faatauvaa.’ Ona ou tilotilo atu lea ia te ia i le faaata o le upumoni, ma sa ou faapea, ‘Se uso ina a pei o a’u.’”

O se uiga faaalia o le alofa o uiga na o le misiona a le Matai. Na Ia faapupula i e tauaso, faasavali i e pipili, ma tuuina atu le ola i e ua oti. Atonu pe a tatou faafesagai ma le Mataisau, o le a le fesili mai ia i tatou, “E fia ni tofiga sa e umia?” ae o le, “E toafia tagata na e fesoasoani i ai?” O le mea moni, e le mafai lava ona e alofa i le Alii seia e auauna atu ia te ia e ala i le tautuaina o Ona tagata.

Saili atu i le Fesoasoani a le Alii

Lona fa ma le mea mulimuli, saili le fesoasoani a le Alii. E taua agaga—lou agaga ma lo’u agaga. O lo tatou Tama Faalelagi lava Ia na fetalai mai ai.

Manatua tatou te le o taufetuli na o i tatou i lenei taufetuliga tele o le olaga; tatou te aia tatau i le fesoasoani a le Alii. Na fautua atu le Aposetolo o Paulo i tagata Eperu:

“Tuu ese … le agasala. … , ia tatou taufetuli ma le onosai i le ala tanu ua i o tatou luma,

Ia vaavaai [mo le faaaoao] ia Iesu, o le pule ma le mataisau o lo tatou faatuatua” (Eperu 12:1–2).

Ao lei mafai ona tatou avea o Ia ma a tatou soa, ao lei mafai ona tatou mulimuli ia te Ia e avea ma o tatou taiala, e tatau ona tatou maua o Ia. Ina ia mafai ona maua o Ia, ou te fia fautua atu, o le mea muamua lava, e tatau ona tatou faia se avanoa mo Ia i o tatou olaga. Na fetalai o Ia “E fai lua o alope, e fai foi mea e momoe ai manu felelei; a o le Atalii o le tagata, e leai se mea e moe ai o ia” (Mataio 8:20).

Na faamatala e le fomai o Luka le vaaiga i le soifua mai o le Faaola: “Ua fanau e ia lana tama ulumatua, ua ia aui ia te ia i le ie, ma faataoto ia te ia i le falepovi, aua latou te le ofi i le fale e tali ai malo” (Luka 2:7).

Ua faatutonu mai le valaaulia a le Alii ia i tatou taitoatasi. Mafaufau ifo le tagata ia te ia lava ma upu a le Faaola ia te oe: “Faauta, ou te tu atu i le puipui ma tu’itu’i atu; ai se tasi e faalogo mai i lo’u leo ma tatala mai le puipui, ou te ulufale atu ia te ia,” [ma ou te faapea atu, o alii ma tamaitai]” (Faaaliga 3:20).

Aue, o’u uso e ma tuafafine talavou, ia fai se avanoa mo le Alii i o outou fale ma o outou loto, ona avea ai lea o Ia ma au soa. O le a i ai o Ia i ou autafa. O le a Ia aoao oe i le ala o le upumoni. O Lana fesoasoani, ma le sauniuniga lea sa tatou talanoaina, e mafai ai ona e agai i luma i lenei taufetuliga o le olaga ma ausia ou lava faamoemoega tetele. Ona, mafai lea ona e faapea ane i le faaiuga o mea uma, “Ua ou tau le taua lelei, ua iu ia te au le tausinioga, ua ou taofi i le upu o le faatuatua” (2 Timoteo 4:7).

O le faia o lena mea, o le a maua ai faamanuiaga o le lagi. O Ia o Lē e silafia le pau a le manuiti, o le a Ia aloaia la tatou tautua, i Lana lava ala.

Se i ou faamatalaina atu se aafiaga e faapupula ai lenei faamautinoaga.

O Uso Edwin Q. Cannon Jr., matou te faaigoaina o ia o Ted---o se faifeautalai sa i ai i Siamani i le 1938. Sa alofa o ia i tagata ma tautua ai ma le faamaoni. Ina ua maea lana misiona, sa toe foi mai o ia i lona aiga i le Aai o Sate Leki. Sa faaipoipo o ia ma amata ai lana lava pisinisi.

Ua mavae tausaga e fasefulu I se tasi aso na sau ai Uso Cannon i lo’u ofisa ma fai mai, sa fai lana salaga ata o lana misiona. (O se upu manaia lena. E auiliilia uma ata, tia’i le lua ae teu uma isi.) O na ata sa ia teuina talu mai lana misiona, e i ai nisi ata ua na le mautinoa po o ai. O taimi uma lava sa ia fuafua ai e tia’i, sa uunaia ai lava o ia e teu pea, e ui ina ia le iloaina pe aisea. O ata na pue e Uso Cannon i le taimi o lana misiona a o tautua i Stettin, i Siamani, ma o se ata o se aiga—o se tina, o se tama, se teineitiiti, ma se tamaitiiti. Sa ia iloaina o lo latou faaiu o Berndt ae sa le mafai ona ia manatua se isi mea e uiga ia i latou. Sa ia ta’ua faapea, na malamalama o ia e i ai se Berndt sa taitai i le Ekalesia i Siamani, ma sa ia manatu, e ui ina mamao, ae atonu e i ai se sootaga o lenei Berndt ma le au Berndts ia sa nonofo i Stettin ma lea e i ai i ata. A o lei tia’ia ia ata, sa mafaufau o ia o le a sau e siaki mai ia te au.

Sa ou fai ia Uso Cannon e le o toe mamao ona ou alu lea i Berlin, lea sa ou faamoemoe ma te feiloai ai ma Dieter Berndt, le taitai o le Ekalesia, ma o le a ou faaali ia te ia ata e vaai ai pe i ai sa latou faia ma pe manao foi i ata. Sa i ai foi ma se avanoa e mafai ai ona ou vaai i le tuafafine o Uso Berndt, lea sa faaipoipo ma Dietmar Matern, o se peresitene o le siteki i Hamburg.

E lei faatali le Alii sei ou taunuu i Berlin faatoa ausia Ona faamoemoega. Sa ou i ai i Zurich, i Suitiselani, e pue le vaalele i Berlin, ae o le vaalele foi lava lea na pue e Dieter Berndt. Sa nofo o ia i ou tafatafa, ma sa ou faamatala ia te ia o loo ia te au ni ata tuai o tagata e igoa ia Berndt mai Stettin. Sa ou tuuina atu ata ia te ia ma fai atu i ai pe mafai ona ia iloa i latou o loo i ai i ata. A o tilotilo o ia i ai ma le faaeteete, sa amata ona tagi. Fai mai a ia, “Sa nonofo lo matou aiga i Stettin i le taimi o le taua. Na fasiotia lo’u tama ina ua pa se pomu a le Fili i le nofoaga sa faigaluega ai o ia. E lei leva ae faoa e Rusia ia Polani ma le eria o Stettin. Ona ave lea e lo’u tina lo’u tuafafine ma au ma matou sosola ese mai le fili ua lalata mai. Sa tuua mea uma lava, e aofia ai ma o matou ata sa i ai. Uso Monson, o au o le tamaitiiti lea e i le ata, a o le teineitiiti o lo’u tuafafine lea. O le tamaloa ma le fafine, o o ma’ua matua pele. E oo mai i le aso, e leai ma se ata a o ma laiti i Stettin, e leai foi se ata o lo’u tama.”

A o soloi o’u loimata, sa ou fai ia Uso Berndt, o ana ata la. Sa ia tuuina ma le faaeteete ma le fiafia i totonu o lana ato taitai.

I le konafesi aoao na sosoo ai, ina ua malaga asiasi mai Dieter Berndt i le Aai o Sate Leki, sa asiasi atu o ia ia Uso Edwin Cannon Jr., ma lona Faletua ina ia tuu atu ai lana faafetai patino ona o le musumusuga na oo atu ia Uso Cannon e teuina nei ata taua, ma sa ia mulimuli i lena musumusuga e tausia mo le 40 tausaga.

Sa tusia e William Cowper upu nei:

E gaoioi le Atua i ala lilo
E faia Ana galuega ofoofogia;
E tu Ona tulaga aao i le sami,
Ma afio i luga o matagi matautia. …

Aua le faamasinoina le Atua i o tatou manatu vaivai,
Ae faalagolago ia te Ia ma Lona alofa;
I tua o le toasa o ona fofoga
O lo o i ai se fofoga fiafia ma le alofa.¹⁰

Ou te tuuina atu lenei tautinoga ia te outou, ou te tuuina atu foi lenei molimau ia te outou, o lo o soifua le Atua, o Iesu o le Keriso, o le Alo o le Atua Soifua, o Ia o lo tatou Uso ma le Tuagane Matua, o Ia o lo tatou Togiola, o Ia o lo tatou Faaola, o Ia o le mataisau o o tatou faamoemoega tetele.

Ou te tuuina atu la’u faamanuiaga ia te outou; ou te alofa tele ia te outou. O outou o se tupulaga faapitoa, filifilia ua i ai ni faamoemoega tetele. Ia taiala outou e lo tatou Tama Faalelagi ma ia faamanuiaina outou. Ia outou taumafai i taimi uma ina ia ausia na faamoemoega tetele, ou te tatalo ai i le suafa o Iesu Keriso, lo tatou Faaola, Amene.

Faamatalaga

1. Henry Wadsworth Longfellow, Morituri Salutamus (1875), in The Complete Poetical Works of Longfellow (1922), 311.

2. Charles Dickens, Great Expectations (New York: Alfred A. Knopf, 1992), 130.

3. Glenn Doman, sii mai i le “Too Young to Read?” Life, Nov. 27, 1964, 111; tagai foi 107.

4. Henry Ford and Samuel Crowther, My Life and Work (1922), 247.

5. David O. McKay, i le Conference Report, Oct. 1963, 89; po o le Improvement Era, Dec. 1963, 1096.

6. Stephen L. Richards, in Conference Report, Oct. 1937, 39.

7. John Dryden, “Of the Pythagorean Philosophy” (1700), from Ovid, Metamorphoses, book XV, in The Poetical Works of Dryden (1950), 881.

8. “Stick to Your Task,” in Jack M. Lyon and others, ed., Best-Loved Poems of the LDS People, (1996), 255–56.

9. Tagai Lillian Eichler Watson, ed., Light from Many Lamps (1979), 138.

10. William Cowper, “Light Shining out of Darkness,” Olney Hymns (1779), no. 35, in Masterpieces of Religious Verse, ed. James Dalton Morrison (1948), 10–11.