Usa ka Sagrado nga Responsibilidad sa Paghigugma ug Pag-amuma sa Usag Usa Elder L. Tom Perry Sa Korum sa Napulog Duha ka mga Apostoles Pagbalansi sa Atong mga Responsibilidad Ang hilisgutan nga gisangon kanako mao ang mosunod nga mga pulong nga gikan sa pamahayag kabahin sa pamilya: “Ang bana ug asawa may sagrado nga responsibilidad sa paghigugma ug pag-amuma sa usag usa ug sa ilang mga anak.”1 Gusto ko nga isulti kini nga hilisgutan sa paagi nga lahi kaayo sa pamilyar na tingali ninyo nga gigamit sa ubang mga miting sa pagbansay. Dili ko mokutlo og daghan sa tamdanang basahon, hinoon, gusto ko nga makigsulti ninyo sa dinayganay sa inyong serbisyo sa gingharian sa atong Amahan sa Langit. Ang tuyo mao ang pagtan-aw kon mas masabtan ba nato og maayo kon unsaon pagbalansi ang atong mga responsibilidad sa paghigugma ug pag-amuma sa atong mga pamilya kay sa uban nga espesyal nga mga calling nga gihatag kanato sa atong Amahan sa Langit. Sa pagtukod sa Simbahan niadtong Abril 6, 1830, si Propeta Joseph Smith nakadawat og pagpadayag nga girekord karon sa ika-21 nga seksyon sa Doktrina ug mga Pakigsaad. Ang kabahin sa pagpadayag mabasa: “Tan-awa, adunay talaan nga gitipigan diha kaninyo ug sa sulod niini ikaw pagatawgon nga manalagna, maghuhubad, propeta, apostol ni Jesukristo, anciano [elder] sa simbahan pinaagi sa kabubut-on sa Dios nga Amahan, ug sa grasya sa inyong Ginoong Jesukristo, “Ingon nga gidasig sa Espiritu Santo sa pagpahimutang sa tukuranan niini, ug sa pagtukod niini ngadto sa labing balaan nga tinuohan. . . . “Busa, nagpasabut sa simbahan, ikaw maminaw ngadto sa tanan niya nga mga pulong ug mga sugo diin siya mihatag nganha kanimo ingon nga siya nakadawat kanila, maglakaw sa tanan nga pagkabalaan diha sa akong atubangan; “Kay ang iyang pulong ikaw makadawat, ingon og gikan sa akong kaugalingon nga ba-ba, sa tanan nga pagpailub ug hugot nga pagtuo” (D&P 21:1–2, 4–5). Diha sa una nga mga pagpanudlo nga gihatag niini nga bag-ong gitukod nga Simbahan mao ang pagsunod sa inspirasyon ug pagpadayag gikan sa Ginoo, pinaagi sa Iyang propeta, sa pagtuman sa atong mga katungdanan sa pagpalambo sa Iyang Gingharian. Misaad siya nga tudloan kita sa padulngan nato aron pagtuman niini nga mahinungdanon nga buhat. Ang Tambag sa Propeta Naghunahuna ako nga si Presidente Gordon B. Hinckley, nga atong propeta karon, mihatag nato sa yawe aron sa pagbalansi sa atong mga responsibilidad niadtong unang tibuok kalibutan nga miting sa pagbansay sa mga pangulo, nga gihimo niadtong Hunyo 21, 2003. Niadto nga sibya siya miingon: “Inyo . . . ang kahigayunan sa pagrepresentar sa Manunubos sa kalibutan samtang kita mopadayon niini nga buhat. Inyo ang kahigayunan sa pag-sulti mahitungod sa katahum sa matubsanon nga dugo sa Ginoong Jesukristo sa ngalan sa Iyang mga anak nga lalaki ug babaye. Anaa pa bay mas halangdon nga kahigayunan kay niini? “Pagmalipayon sa inyong kahigayunan. Ang inyong kahigayunan dili molungtad sa hangtud. Sa dili madugay ang mahibilin ra unya mao ang inyong panumduman sa dako nga kasinatian nga inyong nasinati karon. “Walay usa kanato ang makahimo sa tanan nga buot natong buhaton. Apan buhaton nato ang atong pinakamaayo kutob sa mahimo. Malipay ako nga ang Manunubos mosulti unya, ‘Maayong pagkabuhat, maayo ug kasaligan nga sulugoon’ (Mateo 25:21).”2 Kon mahinumdoman ninyo, niadto nga sibya mipasabut siya sa atong upat ka mga responsibilidad. Ang una magamit sa hilisgutan nga atong gisulti niini nga sibya. Miingon siya: “Una, kinahanglan nga dili ninyo pasagdan ang inyong mga pamilya. Walay lain nga labaw pa niini kabililhon. Ang inyong mga asawa ug ang inyong mga anak angayan sa pagtagad sa ilang mga bana ug mga amahan. Kon ang tanan nasulti ug nahimo na, kini nga relasyon sa pamilya mao ang atong madala ngadto sa sunod kinabuhi. Sa lain nga pagkasulti sa mga pulong sa kasulatan, ‘Kay unsa may kapuslanan sa usa ka tawo kon bisan tuod og matinud-anon siyang nag-alagad sa simbahan apan mawala sa iyang kaugalingong pamilya?’ (tan-awa sa Marcos 8:36).”3 Nagpadayon kini nga mensahe sa atong mga propeta sukad sa una pa nga panahon sa pagkatukod sa Simbahan. Ang labing importante nga dapit sa pagtudlo sa ebanghelyo ug sa pagpangulo anaa diha sa pamilya ug sa panimalay. Kon sundon nato kini nga mga panudlo, makahatag kita og mga buluhaton ug makaplano og mga programa, mga kalihokan, ug mga klase nga makatabang ug mosuporta sa atong mga pamilya. Pagpahimutang sa mga angay nga Unahon Kon giunsa nato paggamit ang panahon ug paghimo sa atong mga kinabuhi nga balansi maoy basehan kon giunsa nato pagbuhat ang atong mga katungdanan sa pamilya ug sa atong serbisyo sa Simbahan. Disiplinaha ang inyong kaugalingon pagsunod sa tambag sa propeta unsaon pagpahimutang sa inyong panahon kon unsay angay unahon. Ang Imong Mahangturon nga Kapikas Pagsugod pinaagi sa paghisgut uban sa imong mahangturon nga kapikas kon unsa kadugayon ang inyong panag-uban aron malig-on ang inyong kaminyoon, aron pagpakita sa gugma sa usag usa. Mao kini unahon. Ang Simbahan motabang sa matag tawo ug mga pamilya sa pagduol kang Kristo ug makabaton og kinabuhing dayon. Ang kinabuhing dayon maoy labing dakong gasa sa Dios ngadto sa mga anak Niya, ug mabatunan pinaagi sa kasuod sa pamilya. Kini nga panagsuod magsugod gayud uban sa panag-uban tali sa bana ug asawa, nga sagrado sa Ginoo ug butang nga dili katiaw-tiawan. Ang pakigsaad sa kaminyoon mahinungdanon sa plano sa Ginoo ug maoy katuyoan sa paglalang Niya sa mga langit ug yuta. Sa tibuok kasaysayan, Iyang gihatag ang Iyang balaanong sugo aron mobantay ug manalipud sa balaang panaghiusa sa bana ug asawa. Ang Inyong mga Anak Ikaduha, hunahunaa ang espirituhanong panginahanglan sa inyong mga anak. Unsa ka dugay ang gikinahanglan aron mapaniguro nga masuod kamo kanila? Responsibilidad ninyo isip mga amahan ug inahan sa paggahin og panahon sa pagtudlo kanila, ang labing importante nga panudlo nga madawat sa mga bata kinahanglan nakagikan sa ilang mga ginikanan. Kinahanglang pamilyar kita sa gipanudlo sa Simbahan sa atong mga bata aron mapaangay kita nianang pagtulun-an sa atong pagtudlo sa matag bata. Pananglitan, ang pamplit, Alang sa Kalig-on sa Kabatan-onan, nagkutlo sa pamahayag sa pamilya, naghatag sa mga batan-on niini nga tambag kabahin sa mga pamilya: “Ang kalipay diha sa kinabuhi sa banay mahimo nga makab-ot kon gipasukad diha sa mga pagtulun-an sa Ginoong Jesukristo. Ang malampuson nga kaminyoon ug mga banay natukod ug napadayon diha sa mga baruganan sa hugot nga pagtuo, pag-ampo, paghinulsol, pagpasaylo, pagtahud, gugma, kalooy, buhat, ug maayong makalingaw nga kalihokan.”4 Ang pamplit nagpadayon: “Ang pagkasakop sa usa ka banay usa ka dako nga panalangin. Ang inyong pamilya makahatag og panag-uban ug kalipay, makatabang ninyo nga makat-un og husto nga mga baruganan sa mahigugmaong palibot, ug makatabang nga maandam kamo sa kinabuhing dayon. Dili managsama ang mga pamilya, apan kada usa importante sa Langitnong plano. “Buhata ang imong parte sa pagtukod og malipayong panimalay. Pagmalipayon, pagmatinabangon, ug pagmahunahunaon sa uban. Daghang problema sa panimalay ang nahimo kay ang mga sakop sa pamilya hakog ug walay pagbati ang sinultihan o linihokan. Hunahunaa ninyo ang panginahanglan sa ubang sakop sa pamilya. Tinguhaa nga ma-tigpasiugda sa kalinaw imbis mangomedya, makig-away, ug makiglalis. Hinumdumi nga ang pamilya maoy labing sagrado nga yunit sa Simbahan.”5 Pagsangkap Alang sa Atong Pamilya Ang atong ikatulo nga prayoridad mao ang pagsangkap sa atong mga pamilya. Sa gihapon gikan sa pamahayag kabahin sa banay: “Pinaagi sa balaanon nga laraw, ang mga amahan mangulo sa ilang mga banay diha sa gugma ug pagkamatarung ug adunay kapangakohan sa pagsangkap sa mga kinahanglanon sa kinabuhi ug pagpanalipud alang sa ilang mga banay.”6 Nagkinahanglan kita og maayong kahanas aron makatrabaho. Sa nagkausab nga kalibutan, kinahanglan nga makakat-on gayud kita og bag-o, kay tingali og biya na ang atong nakat-onan. Bisan kon nalinga kita sa mga buluhaton sa Simbahan, dili gayud kita mopalabay sa higayon sa pagdugang sa atong nakat-onan ug palamboon ang kaayohan sa atong mga pamilya. Kinahanglan nga gahinan nato og igong panahon ug pagplano aron pagpangandam sa umaabut. Kini nga tambag magamit sa mga babaye ingon usab sa mga lalaki. Bisan kon ang kapangakuhan sa pagsangkap sa pamilya iya gayud sa mga amahan, ang pamahayag nagpasabut nga “ang kakulangan, kamatayon, o sa laing pagkabutang”7 nagkinahanglan usab ninyo mga sister sa paggamit ug pagpalambo sa inyong mga nakat-onan aron pagtabang sa pagsangkap sa inyong mga pamilya. Ang Pag-alagad sa Simbahan Ang ikaupat sa atong prayoridad mao ang pasalig nga atong gigahin sa kalihokan sa Simbahan. Bililhon sa mga aktibong Santos sa Ulahing mga Adlaw nga pamilya ang ilang panahon sa Simbahan ug naggahin sila og igong higayon niini nga kalihokan. Kinahanglan ang mga lider magbinantayon sa managlahing kahimtang sa pamilya kon mamisita ug mohimo og mga pasalig. Mga pamilyang may batan-ong mga anak diin ang duha ka ginikanan may mga bug-at nga calling nga makapabiya kanila sa panimalay maoy sagad mobati nga makalangan kanila ang kalihokan sa Simbahan. Ang mga lider sa Simbahan makatabang pinaagi sa pag-ila ug paglig-on sa mga paningkamot sa pagbalanse sa serbisyo sa Simbahan ug sa ilang mga reponsibilidad sa pamilya. Pagpanginlabot sa mga Miyembro sa Pamilya May mga paagi sa pagdugang sa pakig-uban sa atong mga pamilya samtang nagtuman sa mga calling sa Simbahan pinaagi sa ilang pagpanginlabot, kon angay, sa atong serbisyo sa Simbahan. Tugoti ako sa paghatag og personal nga ehemplo. Ang akong amahan sa bata pa ako nag-alagad nga bishop. Daghan siya ug kabilinggan tungod kay abogado. Aktibo usab siya sa publikong mga kalihokan ug nagustohan kaayo isip mamumulong. Ug, sa tinuod, amahan siya sa unom ka anak. Kanunay ako nga magpasalamat nga ang akong amahan may hustong prayoridad. Ang akong inahan ang kanunay niyang unahon pagtagad. Klaro kaayo sa iyang pagdala kaniya. Gisundan kini og matinud-anon nga pagtagad sa matag usa sa iyang mga anak Sa unom pa ako ka tuig nakadawat ako og pula nga gamay nga wagon isip pinaskohan. Sama gayud niini kagamay nga wagon. Ang gamay nga pula nga wagon ang nagbugkos tali kanako ug sa akong amahan. Sa iyang kadaghan ug bulohaton, mangita gayud siya og paagi nga malakip ang iyang pamilya sa mga kalihokan sa walay pagminus sa iyaha. Daghan sa iyang serbisyo isip bishop nahinabo atol sa Great Depression niadtong 1930. Daghan sa among mga miyembro sa ward naglisud kaayo. Isip bishop, responsibilidad niya ang paghatag sa mga panginahanglan aron sila mabuhi. Ingon og maayo kini nga kalihokan sa usa ka bishop, sa iyang anak, ug sa gamay nga pula nga wagon. Mopauli ako gikan sa eskwelahan ug makita ang gipundok sa kilid sa garahe—harina, asukar, trigo, ug ubang mga sangkap. Nasayud ako nga nianang gabhiona ang akong amahan ug ako may kahigayonan nga mag-uban. Sa pag-abot niya sa balay, ang gamay nga pula nga wagon mapuno sa mga sangkap nga dad-on sa usa ka pamilya. Kaming duha, maglakaw ug mag-istorya, mohuman sa among welfare nga buluhaton sa pagdala sa mga pagkaon. Nakasaksi ako mismo sa gugma ug pag-atimang gihimo sa maayong lider sa priesthood sa iyang mga miyembro sa ward. Labaw ka importante, nakahigayun ako sa paggahin og bililhong panahon uban sa akong amahan. Pagtumong sa Nag-una nga mga Prayoridad Tugoti nga modasig ako kaninyo pagbuhat sa gitudlo namo kaninyo sa miaging miting sa pagbansay sa mga pangulo. Nagpahinumdum kami kaninyo nga tanang mga yunit sa Simbahan nga anaa sa nagkalahing ang-ang sa pag-uswag, ug tanan nga mga yunit may managlahing panginahanglan. Kon magplano kita sa mga programa sa Simbahan, kinahanglan gayud nga hunahunaon ang mga pamilya. Usab, mopasidaan kami nga dili hatagan ang inyong miyembro og subra sa usa ka calling sa Simbahan ug sa home teaching ug visiting teaching. Disiplinaha ang inyong kaugalingon sa pagsunod sa nag-unang mga prayoridad, ug mahibulong kamo kon giunsa sa inspirasyon sa Ginoo paggiya ninyo sa pagtuman ninyo sa inyong mga responsibilidad nga mahimong sulugoon sa Iyang gingharian. Ang katapusang tumong sa napahiuling Simbahan mao ang pagpahigayun ug paghatag kanato og mga kahigayunan sa pagtabang sa Ginoo sa Iyang buhat sa pagpahinabo sa pagka-imortal ug sa kinabuhi nga dayon sa tawo. Buhaton nato kini pag-una pinaagi sa pamilya. Niini nga nagkaubos nga moralidad, gubot nga politika, kasamok sa mga nasud, ug way klarong ekonomiya, ang tumong nato nga lig-unon ug palungtaron ang mga pamilya madugangan ug palamboon gayud. Ang mismong tuyo sa Simbahan mao ang pagtabang sa mga pamilya nga maluwas ug mahimaya sa walay katapusang gingharian sa langit. Ang Sumbanan nga Basahon sa Banay Sa miaging mga tuig gimantala nato ang usa ka espesyal nga Sumbanan nga Basahon sa Banay. Para gamiton kini sa mga miyembro, ilabi na sa bag-ong nakabig o limitado ang kasinatian sa Simbahan. Nag-awhag kami nga gamiton kini. Kini nagsugod sa pamahayag nga: “Ang pamilya maoy sukaranang yunit sa Simbahan ni Jesukristo sa mga Santos sa Ulahing mga Adlaw ug labing importanting sosyal nga yunit karon ug sa kahangturan. Gitukod sa Dios ang pamilya aron mohatag og kalipay sa Iyang mga anak, nga makahimo kanila sa pagkat-un og hustong baruganan sa mahigugmaong palibut, ug pag-andam kanila sa kinabuhing dayon. “Ang panimalay maoy pinaka- importanting dapit sa pagtudlo, pagkat-on, ug paggamit sa mga baruganan sa ebanghelyo.“8 Sa gihapon, amo kamong gidasig nga mobasa sa makatabang nga mga pagtulun-an niini nga booklet. Ang Ebanghelyo sa Manluluwas Ang Ginoo ug Manluluwas nato personal nga mialagad sa mga tawo, nagbayaw sa nilupigan, naghatag og paglaum sa nawad-an og kadasig, ug nangita sa nawala. Sa Iyang mga pulong ug binuhatan, gipakita Niya sa mga tawo nga siya nahigugma ug nakasabut ug nagtahud kanila. Giila Niya ang balaang kinaiya ug mahangturong bili sa matag tawo. Gani sa pagtawag sa mga tawo nga maghinulsol, gihimaraut Niya ang sala sa walay paghimaraut sa nakasala. Sama sa Manluluwas nato, isip mga lider sa Simbahan higugmaon gayud nato ang mga tawo nga gialagaran nato, mopakita og pagtagad ug kabalaka sa matag tawo. Unta panalanginan kita sa Ginoo niining sagrado nga responsibilidad nga gihatag Niya kanato maoy akong giampo, sa pangalan ni Jesukristo, amen. Mubo nga mga sulat 1. “Ang Banay: Usa ka Pamahayag ngadto sa Kalibutan,” Liahona, Okt. 2004, 49. 2. “Maglipay sa Kahigayunan nga Makaalagad,” Tibuok Kalibutan nga Miting sa Pagbansay sa mga Pangulo, Hunyo 21, 2003, 24. 3. Tibuok Kalibutan nga Miting sa Pagbansay sa mga Pangulo, Hunyo 21, 2003, 22. 4. Liahona, Okt. 2004, 49. 5. Alang sa Kalig-on sa Kabatan-onan (pamplit, 2001), 10. 6. Liahona, Okt. 2004, 49. 7. Liahona, Okt. 2004, 49. 8. Sumbanan nga Basahon sa Banay (2001), 1. Ang Sumbanan nga Basahon sa Banay (item no. 31180) mahimong makuha pinaagi sa mga Church distribution center ug service center.