O Aiga Faalelagi, O Aiga e Faavavau PERESITENE THOMAS S. MONSON Fesoasoani Muamua i le Au Peresitene Sili Fausiaina o se Aiga Faavavau I le agaga o le lotomaulalo, ou te tu atu ai e avea ma sui o le Au Peresitene Sili e fai ma tootoo faaiu mo lenei fonotaga. Ua musuia lava i tatou ma faamalamalamaina i saunoaga a Elder Bednar, Elder Perry, ma Sister Parkin. Ua taula’i atu o tatou mafaufauga i le aiga ma le auaiga a o faamanatu mai ia te i tatou “o le aiga o le faavae lea o le olaga amiotonu, ma e leai lava se isi meafaigaluega e mafai ona suia lona tulaga pe faatinoina ana matafaioi taua.”1 O se aiga, e sili atu i le na o se fale e fausia i laupapa, piliki po o ni maa. E fausia se aiga i le alofa, ositaulaga ma le faaaloalo. O i tatou e i ai le matafaioi mo aiga tatou te fausia. E tatau ona tatou fauina ma le poto, aua o le faavavau e le o se malaga puupuu. O le a i ai le toafilemu ma matagi, o le lasusulu ma ao pogisa, o le olioli foi ma le faanoanoa. Peitai, afai tatou te taumafai moni lava, e mafai ona avea o tatou aiga ma sina vaega o le lagi i le fogaeleele. O mea tatou te mafaufau i ai, o mea tatou te faatino, o olaga tatou te ola ai, e le gata ina ta’a’ina ai le manuia o la tatou malaga i lenei lalolagi; ae e faailogaina ai foi le ala i a tatou sini mo le faavavau. O nisi o aiga o le Au Paia o Aso e Gata Ai o loo i ai se tina, se tama, ni atalii, ma ni afafine o loo mafuta faatasi uma i le fale, ae o i ai foi nisi ua molimauina ma le faavauvau le toesea o se tasi, ona sosoo ai lea ma le isi, ma le isi o lo latou aiga. O nisi taimi e na o le toatasi lava se tagata o se aiga. Pe o le a lava le tulaga, e faaauau pea le aiga—aua e mafai ona faavavau aiga. E mafai ona tatou aoao mai le mataisau tusiata—o le Alii lava lea. Ua uma ona Ia aoao mai i tatou i le ala e tatau ona tatou fausia ai. Sa Ia fetalai mai: “O aiga . . . uma e fevaevaea’i, e le tumau” (Mataio 12:25). Na ia toe lapatai mai mulimuli ane: “Faauta, o lo’u fale o le fale faatulagaina tonu ma tatau . . . ae le o se fale o le faasoesa.” (MFF 132:8). I se faaaliga na tuuina mai e ala mai i le Perofeta o Iosefa Samita i Katelani, Ohio, 27 Tesema, 1832, sa apoapoai mai ai le Matai, “Ia outou fatulagaina; ia saunia mea tatau uma; ma faatuina se fale, o se fale tatalo lea, o se fale o le anapogi, o se fale o le faatuatua, o se fale o le aoaoga, o se fale o le mamalu, o se fale o le tulaga maopoopo, o se fale o le Atua” (MFF 88:119; tagai foi 109:8). O fea se mea e mafai ona maua ai e se isi o i tatou se ata pito sili ona lelei e mafai ona fausia ai ma le poto ma le sa’o [se fale]? O lena fale ua talafeagai tonu lava ma le fale o loo faamatala mai i le Mataio, o se fale ua fauina “i luga o le papa” (Mataio 7:24, 25; tagai foi i le Luka 6:48; 3 Nifae 14:24, 25), o se fale e lavatia uaga o puapuaga, o lologa o mea tuu faafeagai ma matagi o masalosaloga i soo se mea i lo tatou lalolagi fesuisuiai ma lu’itauina. Atonu o le a fesili nisi, “Ae o le faaaliga lena na tuuina mai e saunia ai se taiala mo le fausiaina o se malumalu. Pe i ai sona sootaga ma tulaga o aso nei?” Ou te tali atu, “Pe lei fai mai ea le Aposetolo o Paulo, ‘Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou?’ ” (1 Korinito 3:16). Ia avea le Alii ma matuaofaiva autu mo le fauina o lo tatou fale. Ona mafai lea ona avea i tatou taitoatasi ma aufaigaluega e tofu ma se vaega taua o le galuega atoa. O lona uiga o i tatou uma lava o ni faufale. E le gata i le fauina o o tatou lava fale po o aiga, ae ua ia te i tatou foi le tiutetauave e fesoasoani e fausia le malo o le Atua i luga o le fogaeleele e ala lea i le auauna lelei atu ma le faamaoni i o tatou valaauga i le Ekalesia. Se’i ou tuuina atu ni taiala mai le Atua, o lesona mai le olaga, ma manatu e mafaufau i ai a o amata ona tatou fauina. Tootuli i lalo e tatalo. “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala” (Faataoto 3:5–6). O le saunoaga lea a Solomona le alii poto, le atalii o Tavita, le tupu o Isaraelu. I lenei konetineta o Amerika, sa tautino mai ai foi e Iakopo, le uso o Nifae: “Ia outou faamoemoe atu i le Atua ma le le faagaeetia o le manatu, ma ia tatalo ia te Ia ma le faatuatua tele lava” (Iakopo 3:1). Ua oo mai lenei fautuaga paia musuia ia i tatou e pei o se vai e manino i se eleele naumati. O loo outou soifua ma tatou ola i taimi faigata. I ni nai augatupulaga ua mavae atu, sa le mafai ona iloa faalemafaufau e se tagata le lalolagi lea ua tatou ola ai nei ma faafitauli o le a tula’i mai ai. Ua siomia i tatou i le ola le mama, o ponokarafi po o tusi ma ata mataga, o faiga malolosi ma le matautia, o fualaau oona, ma le anoanoai o mea leaga ua mafatia ai le lalolagi i nei ona po. Ua feagai i tatou ma le lu’i, faapea foi ma le tiutetauave, e le gata ia tausia i tatou lava “ina ne’i pisia mai i le lalolagi” (Iakopo 1:27) ae ia taialaina foi a tatou fanau ma isi o i lalo o la tatou tausiga, ia saogalemu mai vasa louloua o le agasala o loo siomia ai i tatou, ina ia i ai se aso tatou te toe foi atu ai e nonofo faatasi ma lo tatou Tama Faalelagi. O le aoaoina o o tatou lava aiga, e manaomia ai lo tatou i ai, o o tatou taimi, ma a tatou taumafaiga aupito sili. Ina ia lelei lo tatou aoao atu, e tatau ona tatou malolosi i a tatou faataitaiga mo tagata o o tatou aiga, ma ia avanoa foi mo taimi patino e mafuta ai ma tagata taitoatasi, faapea foi se taimi e faufautua atu ai ma taiala. E tele taimi tatou te maua ai le lagona lofituina ona o le galuega o i o tatou luma. Peitai, e i ai pea lava le fesoasoani i taimi uma. O Ia o Lē na te silafia Ana fanau taitoatasi, o le a tali mai ia tatou tatalo faatauanau ma le loto, pe a tatou saili atu mo se fesoasoani e taialaina ai i latou. O na tatalo o le a foia ai faafitauli, e tuumamaina ai le tele o mafatiaga, e puipuia ai mai nisi solitulafono, ma maua ai le filemu sili atu ma mafai ona maua ai le fiafia o le tagata i soo se itu. E le gata ina moomia lena ituaiga o taiala mo o tatou lava aiga, ae ua tofia foi i tatou i tulaga tatou te tauaveina ai le tiutetauave mo le vaaiga o isi. O se epikopo po o se fesoasoani, o se taitai o se korama a le au perisitua po o se taitai o se ausilali, ua ia te oe le avanoa e faia ai se suiga i olaga o isi. Atonu e i ai nisi e o mai i aiga e le lolotu uma, po o aiga foi e le malolosi i le lotu; o nisi atonu ua o ese mai o latou matua, ua le amanaia a latou talosaga ma fautuaga. E mafai ona avea i tatou ma tufugaaao i le Alii e faia se suiga po o se eseesega i le olaga o se tasi ua i ai lena tulaga. Peitai, a aunoa ma le taiala a lo tatou Tama Faalelagi, e le mafai ona tatou faia mea uma ua tofia i tatou e fai. E maua mai lena fesoasoani i le tatalo. Sa fesiligia se faamasino lauiloa o Amerika, pe o le a se mea e mafai e i tatou o tagatanuu o atunuu o le lalolagi, ona faia e faaitiitia ai le solitulafono ma le le usiusitai i tulafono, ma aumaia ai le filemu ma le fiafia i o tatou olaga ma totonu o o tatou atunuu. Sa tali mai o ia ma le faaeteete, “Ou te fautuaina le toe foi i le faiga tuai o le faia o tatalo po o lotu faaleaiga.” I le avea ai o i tatou o se nuu, pe tatou te le faafetai ea aua o loo avea pea le tatalo faaleaiga ma aga o loo tatou faia pea? E i ai se uiga moni o i tua atu o se muagagana masani e faapea, “O le aiga e tatalo faatasi e mau faatasi foi.” O le Alii lava Ia na poloaiina i tatou ina ia faia tatalo faaleaiga ina ua Ia fetalai mai, “Ia tatalo i o outou aiga i le Tama i lo’u igoa, ina ia manuia a outou ava, ma a outou fanau” (3 Nifae 18:21). I le avea ai o i tatou ma matua, o faiaoga, ma ni taitai i soo se itu lava, e le mafai ona tatou taumafai e faia lenei malaga matautia i le olaga nei, e aunoa ma le fesoasoani faalelagi e lagolago ai i tatou i le taialaina o i latou o i lalo o la tatou vaaiga. A faia a tatou tatalo faaleaiga ma a tatou tatalo taitoatasi i le Atua, ia tatou faia ma le faatuatua ma le faalagolago ia te Ia. Laa i Luga e Auauna Atu Ina ia avea ma a tatou faataitaiga, tatou liliu atu i le soifuaga o le Alii. Sa pei o se moliuila susulu o le agalelei, le soifuaga o Iesu a o galue auauna o Ia i tagata. Sa Ia aumaia le malosi i vae o e pipili, o le malamalama i mata o e tauaso, faalogo i e tutuli, ma le ola i le tino ua oti. O loo aoao mai i Ana faataoto Lona mana. O le faataoto i le Samaria agalelei, sa Ia aoao mai ai, “Ia e alofa atu i le lua te tuaoi” (tagai Luka 10:30–35.) O lona agalelei i le fafine sa molia atu i le mulilua, sa Ia aoao mai ai le malamalama ma le alofa (tagai Ioane 8:3–11). I Lana faataoto e uiga i taleni, sa Ia aoao mai ai i tatou ina ia faaleleia i tatou lava ma taumafai ina ia atoatoa (tagai Mataio 25:14–30). Pe Na te lei saunia ea i tatou mo a tatou matafaioi i le fausiaina o se aiga e faavavau. O i tatou taitoatasi—pe o se taitai perisitua po o se taitai i se faalapotopotoga o se ausilali—ua tali atu i lona valaauga paia. Ua uma ona vaetofia i tatou mo le galuega ua tofia i ai i tatou. I le Mataupu Faavae ma Feagaiga e 107:99, o loo fetalai mai ai le Alii, “O lea, ia taitoatasi ai le tagata ma aoaoina lana tiute, ma galue i le tofi ua tofia ai o ia, i le ma’elega atoatoa.” A o tatou taumafai e fesoasoani ina ia manuia ma malolosi i latou tatou te vaaia i o tatou tofiga i le Ekalesia, o le mea moni lava, o le a tatou faamanuiaina ma faamalolosia o latou aiga. O le mea lea, o le galuega po o le tautua o loo tatou faia i o tatou aiga ma o tatou tofiga i le Ekalesia, e mafai ona faavavau o latou taunuuga. I le tele o tausaga ua mavae, a o avea au ma se epikopo i se uarota tele o tagata eseese, i le Aai o Sate Leki, ma e silia ma le afe tagata, sa ou feagai ai ma le anoanoai o luitau. I le aoauli o se tasi Aso Sa, sa telefoni mai ai le pule o se faleoloa e i tuaoi o la matou uarota. Sa ia faamatala mai o le taeao lena, sa alu atu ai se alii talavou i lona faleoloa ma faatau mai ai se aisakulimi ma se faguinu. Sa ia totogiina lana faatau i se tupe mai se teutusi, ma sa alu o ia, ae galo ai le teutusi [i le faleoloa]. Ina ua maua se avanoa o le pule e tilotilo ai i ai, sa ia iloa ai o se teutusi o le taulaga anapogi ma o loo lolomi ai le igoa ma le telefoni a la matou uarota. A o faamatala mai e ia ia te au le tamaitiiti sa i ai i le faleoloa, sa vave ona ou iloaina le alii—o se tiakono talavou mai la matou uarota, e sau mai se aiga e le malolosi i le lotu. Sa muamua ona oso mai lo’u te’i ma lo’u le fiafia, pe a manatu pe mafai faapefea e se tasi o a matou tiakono ona ave le tupe o le taulaga anapogi o loo faamoemoe mo i latou e manaomia [le fesoasoani], ma alu i se faleoloa i le Aso Sa ma fai ai sana faatau. Sa tonu ia te au ou te asiasi i le tamaitiiti i lena afiafi, ina ia aoao o ia e uiga i tupe paia a le Ekalesia, ma lona tiute o se tiakono e aoina mai ma puipui na tupe. A o alu atu la’u taavale i le fale o le tiakono lea ma lona aiga, sa faia sa’u tatalo le leoa mo se taitaiga, i a’u tala e fai ina ia ta’u atu ai le mea ua tupu. Sa ou taunuu ma tuitui le faitotoa. Sa tatala mai e le tina o le tamaitiiti, ma sa ia valaaulia a’u i totonu o le potu malolo. E ui lava ina tau le iloa se mea i totonu o le potu, ae sa mafai ona ou iloa le laitiiti tele ma le tulaga faaletonu o i ai. O nai meaafale sa i ai, ua aliali mai filo. Sa matua foliga le lava le tina. Sa mou ese atu lo’u le fiafia sa i ai i lena taeao ona o le mea na fai e lana tama, ina ua ou iloaina o se aiga ua matua manaomia lava se fesoasoani. Sa musuia au e fesili atu i le tina pe o i ai ni meaai i le fale. Sa ia ta’u mai ma loimata, e leai se mea. Sa ia fai mai, ua fai si leva ona le toe faigaluega lona toalua ma ua matua manaomia lava e i latou e le gata o meaai, ae faapea foi se tupe e totogi ai le lisi o le fale, ina ia aua ai ne’i tutulieseina mai si o latou tamai fale. Ou te lei ta’ua lava le mataupu e uiga i le tupe o le taulaga anapogi, aua sa ou iloaina atonu sa matua fiaai lava le tamaitiiti ina ua tu i le faleoloa. Sa vave ona ou faia se fuafuaga mo se fesoasoani mo le aiga, ina ia maua a latou mea e ‘ai ma so latou malutaga. E le gata i lea, sa fesoasoani foi taitai perisitua i le uarota, ma sa matou maua ai se galuega mo le tane ina ia mafai ai ona ia saunia mea e manaomia e lona aiga i le lumanai. O le avea ai o i tatou ma taitai perisitua ma taitai i ausilali, ua ia i tatou le aia tatau e maua ai le fesoasoani mai le Alii mo le faalauteleina ma le faataunuuina o o tatou valaauga ma tiutetauave. Saili atu mo Lana fesoasoani, ma a oo ina e maua ia musumusuga, ia e faatinoina loa i luga o lena musumusuga pe o fea e te alu i ai, pe o ai e vaai, pe o le a le tala e fai, ma pe faapefea foi ona ta’u atu. E mafai ona tatou fefulifulisa’i faafia se manatu i o tatou mafaufau, ae seiloga lava tatou te faatinoina lena manatu, ona mafai lea ona tatou faamanuiaina olaga o tagata. Ia avea i tatou ma leoleo mamoe faamaoni mo i latou o i la tatou vaaiga. Sa tusia e John Milton i lana solo, o le “Lycidas,” “Ua tilotilo a’e mamoe fiaaai ae le fafagaina” (laina 125). O le Alii lava Ia na fetalai atu i le perofeta o Esekielu, “Oi talofa i leoleo mamoe o Isaraelu . . . ua le fafaga i le lafu” (Esekielu 34:2–3). O lo tatou tiutetauave le vaaia ma fafaga le lafu, aua e ao ona sailia mai nei mamoe faapelepele, ma nei tamai mamoe mu’amu’a i soo se mea—i fale o o tatou lava aiga, o fale o o tatou aiga lautele, ma o loo faatalitali mai mo i tatou i o tatou valaauga i le Ekalesia. O Iesu o lo tatou Faaa’oa’o. Na fetalai o Ia, “O a’u nei o le leoleo mamoe lelei; ua ou iloa a’u mamoe” (Ioane 10:14). E i ai so tatou tiutetauave o ni leoleo mamoe. Ina taitasi ia i tatou ma laa i luga e auauna atu. Aapa atu e laveai mai. I le malaga i le ala o le olaga, e i ai tagata ua pagatia. O nisi ua o ese mai faailoga o le auala lea e tau atu i le ola faavavau, ma ua faatoa iloa ai o le auala ‘alo lea sa filifilia, e gata. O le faasausili, faatamala, ma le manatu faapito, ma le agasala, e i ai lo latou aafiaga faatama’i i le soifua o tagata. E i ai i latou, ona o ni mafuaaga e le mafaamatalaina, e ese le pa’o o le talipalau e fia savavali ai, ae o latou iloa ane mulimuli o le Ili Fagufagu o le faanoanoa ma le mapuitiga lea la sa latou mulimuli ai I le 1995 sa tusitusia e le Au Peresitene Sili i latou sa o ese mai le lafu a Keriso, ma tuu i ai se faaupuga faapitoa e faaulutala faapea, “O Se Valaaulia e Fo’i Mai.” O loo i ai i le savali le talosaga lenei: “Ia te outou ua i fafo o le li’o o le Ekalesia tusa lava pe o le a le mafuaaga, matou te fai atu, fo’i mai. Matou te valaaulia outou ina ia toe foi mai ma taumamafa i le fiafia sa outou iloa muamua. O le a outou vaaia le tele o lima mafola e faafeiloai ia te outou, ma fesoasoani atu ia te outou, ma avatu ia te outou le mafanafana. “E manaomia e le Ekalesia lou malosi, alofa, lotonuu, ma le faamaoni. Ua uma ona faalelei le ala, ma ua mautinoa o le ala lea e mafai ona toe foi mai ai se tagata i faamanuiaga atoatoa o le avea ai ma tagata o le Ekalesia, ma ua matou faatalitali atu e talia outou uma e mananao e foi mai.” Atonu o se vaaiga e masani ai o le a e taulalata mai ai i le fale i lou avanoa patino e te aapa atu ai ma laveai mai. Se’i o tatou tilotilo i se aiga e i ai se atalii e igoa ia Siaki. Mai lava i le amataga o le olaga atoa o Siaki, e tele lava a la feupuaiga matuia ma lona tama. I se tasi aso, ina ua sefulufitu ona tausaga, sa matua ogaoga sa la tauupuga. Sa fai atu Siaki i lona tama, “Ua lava lea. O le a ou alu, ma ou te le toe foi mai lava!” Sa alu o ia i lona potu ma teu lana ato. Sa aioi atu lona tina e nofo, ae sa le mafai ona faalogo ona o lona ita tele. Sa alu o ia ae tutu ai lona tina ma tagi i le faitotoa. A o tuua e ia le lotoa, toeitiiti a oo atu i le faitotoa, ae faalogo atu o valaau mai lona tama ia te ia, “Siaki, ou te iloa o le tele o le mafuaaga o lou alu ese, e pau ia te au. O lea ou te matua faamalie atu ai lava. Ou te manao ina ia e iloa afai e i ai se taimi e te toe fia foi mai ai, e talia lava oe. Ma o le a ou taumafai ia avea a’u o se tama ua sili atu mo oe. Ou te manao ia e iloa, ou te alofa ia te oe, ma o le a ou alofa pea lava ia te oe.” E leai se tala a Siaki ae sa alu i le fale faatali pasi, ma totogi lona pasese e malaga ai i se mea mamao. A o nofo o ia i le pasi ma matau maila ua te’a, sa toe foi lona mafaufau i upu a lona tama. Sa amata ona ia iloa le tele o le lototoa, le tele o le alofa sa manaomia e lona tama e ta’u mai ai tala sa ia valaau mai ai. Ua faatoese mai lona Tama. Sa ia toe valaauliaina o ia e foi atu, ma ua tagitagi ai pea i le ea o le taumafanafana ia upu, “Ou te alofa ia te oe.” Sa iloa e Siaki, o le isi taga e sosoo ai, o ia. Sa ia iloa e na o le pau le ala e mafai ona ia maua ai le filemu mo ia lava, o le faatino lea i lona tama o le ituaiga mafaufau matua lava lea e tasi, o le lelei, ma le alofa sa faaali atu e lona Tama ia te ia. Sa oso ese Siaki mai le pasi. Sa toe totogi lona pasese e toe foi mai ai ma amata loa lana malaga i le fale. Sa taunuu o ia a ua te’a laitiiti le vaeluaga o le po, ma sa ulufale atu i le fale, ma ki le moli. O loo nofo mai ai lona tama i le nofoa faalue, ma lona ulu o loo punou. Ina ua pupula a’e i luga ma iloa atu Siaki, sa tu a’e o ia mai le nofoa; ma sa faataalise ona taufai opo mai e le tasi le isi. Sa ta’ua mulimuli ane e Siaki e faapea, “O na tausaga mulimuli sa ou i ai i le fale, o tausaga aupito fiafia na o lo’u olaga.” O se tamā lenei, sa faamutaina faamalosi ona lagona ma faagutu lona faamaualuga, ae aapa atu e laveai mai lona atalii a o le’i oo ina avea ma se tasi o le anoano o “fu’a leiloloa” ona o aiga ua afaina ma malepelepe. O le alofa, o le noataga mau lea, ma le pulupasama faamalolo; o le alofa e tele taimi e lagona ai, ae seasea ona faaalia. Mai le Mauga o Sinai o loo taalililili mai ai i o tatou taliga, “Ia e ava i lou tama ma lou tina” (Esoto 20:12), ma mulimuli ane, mai le Atua lava lea e tasi, le poloaiga, “Ia outou nonofo faatasi i le fealofani” (MFF 42:45). Mulimuli i le Atatusi Auiliili a le Alii Tootuli i lalo e tatalo. Laa i luga e auauna atu. Aapa atu e laveai mai. O nei mea taitasi o se itulau taua lea o le atatusi auiliili a le Atua, e fau ai se fale o se aiga, ma avea ai se aiga o se lagi. O le paleni o le ki lea mo i tatou i o tatou tiutetauave paia i o tatou aiga ma o tatou valaauga i le Ekalesia. E tatau ona tatou faaaogaina le poto, o musumusuga, ma le faautautaga, a o vaaia ma tausia o tatou aiga ma faataunu o tatou tofiga i le Ekalesia, aua e tofu taua tele ia mea taitasi. E le mafai ona tatou tuulafoa’ia o tatou aiga; e le tatau foi ona tatou tuulafoa’ia o tatou tofiga i le Ekalesia. Ia tatou fausia ma le tomai, aua nei faaaogaina ni auala ‘alo, ae mulimuli i Lana atatusi auiliili. Ona fetalai mai lea o le Alii, o lo tatou asiasi fale, ia i tatou, e pei ona Ia fetalai atu ia Solomona, o se tufuga foi o se isi vaitau, “Ua ou faapaiaina lenei fale ua e faia e tuu ai lo’u igoa e faavavau; e faasaga i ai o’u mata ma lo’u loto i aso uma” (1 Tupu 9:3). Ona maua ai lea o o tatou aiga faalelagi ma aiga e faavavau, ma o le a mafai foi ona tatou fesoasoani, ia malolosi ma manuia ai foi isi aiga. Ou te tatalo ai ma le lotomaulalo tele ma le faamaoni ina ia tofu maua e i tatou uma lenei faamanuiaga. I le suafa o Iesu Keriso, amene. Faamatalaga 1. Tusi a le Au Peresitene Sili, 11 Fep. 1999; tagai Liahona, Tes. 1999, 1.