Ti Maikadua a Libro ni Nephi

  1 Ket kalpasan ti panagungar ni Cristo, agpakitanto kadakayo, annakko, ken kadakayo patpatgek a kakabsatko; ket agbalinto a paglintegan a nasken a surotenyo dagiti balikas nga isaona kadakayo.

  2 Ta adtoy, ibagak kadakayo a naawatak nga adunto ti aglabas a kaputotan, ket addanto dadakkel a gubgubat ken panagsusupanget dagiti taok.

  3 Ket kalpasanto ti yaay ti Mesias addanto maited kadagiti taok a tanda iti pannakayanakna, kasta met ti ipapatay ken ti panagungarna; ket naindaklan ken nakabutbutengto dayta nga aldaw kadagiti nadangkes, ta maungawdanto; ket maungawda ta pinapanawda dagiti propeta, ken dagiti santo, ket binatoda ida, ken pinatayda ida; gapuna agpangatonto iti Dios manipud iti daga ti araraw ti dara dagiti santo a maibusor kadakuada.

  4 Gapuna, amin dagiti napalangguad, ken dagiti agaramid iti dinadangkes, umayto dayta nga aldaw a manguram kadakuada, kinuna ti Apo ti Pangen, ta kasladanto la garami.

  5 Ket isuda a nangpatay kadagiti propeta, ken dagiti santo, alun-onento ida ti kaunggan ti daga, kinuna ti Apo ti Pangen; ket gaburanto ida dagiti bantay, ken itayabto ida dagiti alipugpog, ken tupakanto ida dagiti pasdek ket magirsagirsay ken marumrumekdanto a kasla pulbos.

  6 Ket sarungkaranto ida dagiti gurruod, ken kimkimat, ken ginggined, ken amin a kita ti panangdadael, ta agpingkinto ti apuy ti pungtot ti Apo a maibusor kadakuada, ket kasladanto la garami, ket ibusento ida ti dumteng nga aldaw, kinuna ti Apo ti Pangen.

  7 O ti saem, ken ti ladingit ti kararuak iti pannakapukaw dagiti napapatay a taok! Ta siak, ni Nephi, naimatangak, ta asidegen ti pannakadadaelko iti sidong ti Apo; ngem nasken a yararawko iti Diosko: Nainkalintegan dagiti wagasmo.

  8 Ngem adtoy, dagiti nalinteg a dumngeg kadagiti balikas dagiti propeta, ken saan a mangdadael kadakuada, ngem mangnamnamada ken ni Cristo a sitatalingenngen kadagiti tanda a naited, iti baet ti amin a panangidadanes—adtoy, isuda dagiti saan a maungaw.

  9 Ngem agparangto kadakuada ti Anak ti Kinalinteg; ket paimbagennanto ida, ket maaddaandanto iti kappia kenkuana, agingga a lumabas ti tallo a kaputotan, ken adu kadagiti maikapat a kaputotan ti pumusay iti kinalinteg.

  10 Ket iti pannakapasamak amin dagitoy a banag dumteng ti nadaras a pannakadadael dagiti taok; ta, iti baet ti panagsagaba ti kaunggak, naimatangak; gapuna, ammok a mapasamak; ket inlakoda ti bagbagida iti awan kaes-eskanna; ta, para iti gunggona ti kinapalangguad ken kinamaagda sagrapendanto ti pannakadadael; ta gapu iti isusukoda iti sairo ket pinilida dagiti aramid iti kasipngetan idinto koma nga iti lawag, ngarud maigarangugongda iti impierno.

  11 Ta saan a kanayon a pareggeten ti Espiritu ti Apo ti tao. Ket no nagsardengen ti Espiritu a manggutugot iti tao nadaras metten ti yaay ti pannakadadael, ket daytoy ti mamagleddaang iti kaunggak.

  12 Ket iti panagsaok maipanggep iti pannakaallukoy dagiti Hudio, a ni Jesus ti talaga a Cristo, nasken met a maallukoy dagiti Gentil a ni Jesus ti Cristo, ti Agnanayon a Dios;

  13 Ken nagpakita kadagiti amin a mamati kenkuana, babaen ti bileg ti Espiritu Santo; wen, iti tunggal pagilian, kakabsat, pagsasao, ken tattao, nga agaramid iti naindaklan a milagro, tanda, ken pagsidsiddaawan, kadagiti annak ti tattao a maibatay iti pammatida.

  14 Ngem adtoy, ipadtok kadakayo ti maipanggep kadagiti maudi nga aldaw; maipanggep kadagiti aldaw a yegto ti Apo a Dios dagitoy a banag kadagiti annak ti tattao.

  15 Kalpasan ti pannakapukaw ti pammati dagiti bukelko ken ti bukel dagiti kakabsatko, ken nadangran idan dagiti Gentil; wen, kalpasan ti panagkampo ti Apo a Dios iti aglawlawda, ken naalikubkobdan iti bangen, ken nabangonen ti puerto a maibusor kadakuada; ken kalpasan ti pannakaipadagada iti katapukan, uray no saanda, maisuratto latta dagiti balikas dagiti nalinteg, ket matimudto ti kararag dagiti napudno, ket saanto a malipatan dagiti amin a napukaw ti pammatida.

  16 Ta agtimekto kadakuada dagiti nadadael manipud iti daga, ket agtaudto ti timekda iti katapukan, ket kaslanto iti am-ammo nga espiritu ti timekda; ta ikkanto ti Apo a Dios iti bileg, tapno makapagarasaas iti maipanggep kadakuada, a kasla agtaud iti daga; ket arasaasto a lumtuadto iti katapukan ti saoda.

  17 Ta kinuna ti Apo a Dios: Isuratdanto dagiti pasamak a maaramidto kadakuada, ket maisuratdanto ken maitalimeng iti libro, ket saandanto a maited kadagiti napukawan iti pammati, ta kayatda a dadaelen dagiti aramid ti Dios.

  18 Gapuna, kas kadagiti nadadael a nadaras ti pannakadadaelda; ket kaslanto taep nga aglabas ti ummong dagiti pagam-amkanda—wen, ta kinuna ti Apo a Dios: Mapasamakto iti apagdarikmat, saan a mapakpakadaan—

  19 Ket mapasamakto, a madangranto dagiti napukawan iti pammati kadagiti ima dagiti Gentil.

  20 Ket maitag-ayto dagiti Gentil nga adda palangguad kadagiti matada, ket naitublakda, gapu iti kinabileg ti lappedda, ta nangbangonda iti adu a simbaan; nupay kasta, imbabada ti bileg ken milagro ti Dios, ket inkasabada iti bagbagida ti bukodda a pagsiriban ken bukodda nga adal, tapno adda maulloda ken magilingda ti rupa dagiti nakurapay.

  21 Ket adu a simbaan ti nabangon a nangparnuay iti innapal, ken panagririri, ken guranggura.

  22 Ken adda met nalimed a kinnunsabo, uray pay kadagidi nagkauna a panawen, kas maibatay iti kinnunsabo ti sairo, ta isu ti nangisungsong amin kadagitoy a banag; wen, insungsongna ti panagpatay, ken dagiti aramid iti kasipngetan; wen, indauluanna ida nga adda nalamuyot a lubid iti tengngedda, agingga a pinungona ida iti nalagda a lubid iti agnanayon.

  23 Ta adtoy, patpatgek a kakabsatko, kunak kadakayo a saan nga agtrabaho ti Apo a Dios iti kasipngetan.

  24 Saan nga agaramid iti ania man malaksid ti pagimbagan ti lubong; ta patpatgenna ti lubong, uray pay no ipustana ti biagna no mayasidegna la ketdi amin dagiti tao kenkuana. Gapuna, awan ti binilinna a di makiranud iti panangisalakanna.

  25 Adtoy, indawatna iti asino man, a kinunana: Umadayoka kaniak? Adtoy, kunak kenka, Saan; ngem kinunana: Umasidegkayo amin kaniak nga adda iti igid ti daga, gumatangkayo iti gatas ken tagapulot ti uyokan, a di agaramat iti kuarta ken di manggatad.

  26 Adtoy, binilinna kadi ti asino man a nasken a pumanawda kadagiti sinagoga, wenno kadagiti balay a pagdaydayawan? Adtoy, kunak kadakayo, Saan.

  27 Binilinna kadi ti asino man a dida makiranud iti panangisalakanna? Adtoy, kunak kadakayo, Saan; ngem intedna a nawaya iti amin a tao; ket imbilinna kadagiti taona nga allukoyenda ti amin a tao nga agbabawi.

  28 Adtoy, binilin kadi ti Apo ti asino man a saanda a makiranud iti kinaimbagna? Adtoy kunak kadakayo, Saan; ngem naikkan ti amin a tao iti gundaway a kas iti tunggal maysa, ket awan ti mapawilan.

  29 Imbilinna nga awan koma ti panaginsasaserdote; ta, adtoy, kayat a sawen ti panaginsasaserdote nga ikasaba dagiti tao ken itag-ayda ti babagida a mangted iti lawag iti lubong, tapno makaullo ken makagun-odda iti pammadayaw iti lubong; ngem dida ikagumaan ti pagimbagan ti Zion.

  30 Adtoy, ipawil ti Apo daytoy a banag; gapuna, nangted ti Apo a Dios iti bilin a panangngaasi ti amin a tao, ta ayat ti panangngaasi. Ta awan ti kaes-eskanda malaksid no mangngaasida. Gapuna, no adda panangngaasida dida ipalubos a maungaw dagiti mangmangged iti Zion.

  31 Ngem nasken a mangged iti Zion dagiti mangmangged iti Zion; ta maungawdanto no manggedda iti kuarta.

  32 Ket manen, imbilin ti Apo a Dios a nasken a saan a mamapatay ti tao; a nasken a saanda nga agulbod; a nasken a saanda nga agtakaw; a nasken a dida pagang-angawan ti nagan ti Apo a Diosda; a nasken a dida agiinnapal; a nasken a dida aggiginnura; a nasken a dida agsisinnupanget; a nasken a dida agaramid iti inaabig; ken nasken a dida agaramid iti ania man kadagitoy a banag; ta maungaw ti asino man a mangaramid kadagitoy.

  33 Ta awan kadagitoy a kinamanagbasol ti asideg iti Apo; ta nagaramid iti nasayaat kadagiti annak ti tattao; ket awan ti inaramidna a di nalawag kadagiti annak ti tattao; ket awisenna amin ida nga umasideg kenkuana ket makiranudda iti kinasayaatna; ket awan ti idaddadumana kadagiti umasideg kenkuana, nangisit ken puraw, adipen ken nawaya; lalaki ken babai; ken malagipna dagiti pagano; ket agpapada ti amin iti Dios, Hudio man ken Gentil.