ບົດທີ 28
ສາດສະໜາຈັກທີ່ບໍ່ຖືກຕ້ອງຈະຖືກສະຖາປະນາຂຶ້ນໃນຍຸກສຸດທ້າຍ—ພວກເຂົາຈະສອນຄຳສອນທີ່ຜິດ, ບໍ່ມີປະໂຫຍດ, ແລະ ໂງ່ຈ້າ—ຈະມີການຫລົງຜິດຢູ່ທົ່ວໄປຍ້ອນຜູ້ສອນປອມ—ມານຈະເຮັດໃຫ້ໃຈຂອງຄົນໂຫດຮ້າຍ—ມັນຈະສອນຄຳສອນທີ່ຜິດໃນທຸກວິທີທາງ. ປະມານ 559–545 ປີ ກ່ອນ ຄ.ສ.
1 ແລະ ບັດນີ້, ຈົ່ງເບິ່ງພີ່ນ້ອງຂອງຂ້າພະເຈົ້າ, ຂ້າພະເຈົ້າເວົ້າກັບພວກທ່ານແລ້ວຕາມທີ່ພຣະວິນຍານບັນຊາຂ້າພະເຈົ້າ; ສະນັ້ນ, ຂ້າພະເຈົ້າຈຶ່ງຮູ້ວ່າມັນຕ້ອງເກີດຂຶ້ນຢ່າງແນ່ນອນ.
2 ແລະ ເລື່ອງຂອງມັນຈະຖືກບັນທຶກອອກຈາກໜັງສື ຊຶ່ງມີຄຸນຄ່າຢ່າງໃຫຍ່ຫລວງຕໍ່ລູກຫລານມະນຸດ, ແລະ ໂດຍສະເພາະກັບລູກຫລານຂອງພວກເຮົາ, ຊຶ່ງເປັນສ່ວນໜຶ່ງທີ່ເຫລືອຢູ່ຂອງເຊື້ອສາຍອິດສະຣາເອນ.
3 ເພາະເຫດການຈະບັງເກີດຂຶ້ນໃນມື້ນັ້ນຄື ສາດສະໜາຈັກທີ່ຖືກສ້າງຂຶ້ນຈະບໍ່ແມ່ນເພື່ອພຣະຜູ້ເປັນເຈົ້າ, ແຕ່ລະແຫ່ງຈະກ່າວຕໍ່ຕ້ານຊຶ່ງກັນແລະກັນວ່າ: ຈົ່ງເບິ່ງຂ້າພະເຈົ້າ, ຂ້າພະເຈົ້າເປັນຂອງພຣະຜູ້ເປັນເຈົ້າ ແລະ ແຫ່ງອື່ນໆຈະເວົ້າວ່າ: ຂ້າພະເຈົ້າເປັນຂອງພຣະຜູ້ເປັນເຈົ້າ; ແລະ ທຸກຄົນທີ່ສ້າງສາດສະໜາຈັກຂຶ້ນທີ່ບໍ່ແມ່ນເພື່ອພຣະຜູ້ເປັນເຈົ້າຈະເວົ້າດັ່ງນັ້ນ—
4 ແລະ ພວກເຂົາຈະຂັດແຍ້ງກັນ; ແລະ ປະໂລຫິດຂອງພວກເຂົາຈະຂັດແຍ້ງກັນ, ແລະ ພວກເຂົາຈະສອນດ້ວຍການຮຽນຮູ້ຂອງພວກເຂົາ, ແລະ ປະຕິເສດພຣະວິນຍານບໍລິສຸດທີ່ປະທານການເວົ້າອອກມາ.
5 ແລະ ພວກເຂົາຈະປະຕິເສດອຳນາດຂອງພຣະເຈົ້າ, ພຣະຜູ້ບໍລິສຸດຂອງອິດສະຣາເອນ ແລະ ພວກເຂົາເວົ້າກັບຜູ້ຄົນວ່າ: ຈົ່ງເຊື່ອຟັງພວກເຮົາ, ແລະ ພວກທ່ານຈົ່ງຟັງກົດເກນຂອງພວກເຮົາ; ເພາະຈົ່ງເບິ່ງ, ທຸກມື້ນີ້ບໍ່ມີພຣະເຈົ້າ, ເພາະວ່າພຣະຜູ້ເປັນເຈົ້າ ແລະ ພຣະຜູ້ໄຖ່ໄດ້ທຳງານຂອງພຣະອົງແລ້ວ, ແລະ ພຣະອົງໄດ້ປະທານອຳນາດຂອງພຣະອົງໃຫ້ມະນຸດ;
6 ຈົ່ງເບິ່ງ, ພວກທ່ານຈົ່ງຟັງກົດເກນຂອງຂ້າພະເຈົ້າ; ຖ້າຫາກຜູ້ໃດຈະກ່າວວ່າມີສິ່ງແປກປະຫລາດກະທຳ ໂດຍພຣະຫັດຂອງພຣະຜູ້ເປັນເຈົ້າແລ້ວ, ຢ່າເຊື່ອເຂົາ; ເພາະທຸກມື້ນີ້ພຣະອົງບໍ່ແມ່ນພຣະເຈົ້າແຫ່ງສິ່ງມະຫັດສະຈັນ; ພຣະອົງໄດ້ທຳງານຂອງພຣະອົງແລ້ວ.
7 ແທ້ຈິງແລ້ວ, ຈະມີຄົນເປັນຈຳນວນຫລວງຫລາຍທີ່ຈະເວົ້າວ່າ: ຈົ່ງກິນ, ຈົ່ງດື່ມ, ແລະ ຈົ່ງມ່ວນຊື່ນເຖີດ, ເພາະວ່າມື້ອື່ນນີ້ພວກເຮົາກໍຈະຕາຍແລ້ວ; ແລະ ມັນຈະດີສຳລັບພວກເຮົາ.
8 ແລະ ຈະມີຄົນເປັນຈຳນວນຫລວງຫລາຍທີ່ຈະເວົ້າອີກວ່າ: ຈົ່ງກິນ, ຈົ່ງດື່ມ, ຈົ່ງມ່ວນຊື່ນເຖີດ; ເຖິງຢ່າງໃດກໍຕາມ, ຈົ່ງຢ້ານກົວພຣະເຈົ້າ—ພຣະອົງຈະຍອມແກ່ການກະທຳບາບເລັກໜ້ອຍ; ແທ້ຈິງແລ້ວ, ຈົ່ງຕົວະໜ້ອຍໜຶ່ງ, ຈົ່ງເອົາປຽບຜູ້ອື່ນເພາະຄຳເວົ້າຂອງເຂົາ, ຈົ່ງຂຸດຂຸມດັກເພື່ອນບ້ານ; ບໍ່ມີອັນຕະລາຍແນວໃດໃນການເຮັດສິ່ງນີ້, ແລະ ຈົ່ງເຮັດສິ່ງທັງໝົດນີ້, ເພາະມື້ອື່ນພວກເຮົາກໍຈະຕາຍແລ້ວ, ແລະ ຖ້າຫາກຈະເປັນໄປວ່າພວກເຮົາຜິດ, ພຣະເຈົ້າຈະຕີສອນພວກເຮົາສອງສາມເທື່ອ ແລະ ພາຍຫລັງມາ, ພວກເຮົາກໍຈະລອດຢູ່ໃນອານາຈັກຂອງພຣະເຈົ້າ.
9 ແທ້ຈິງແລ້ວ, ຈະມີຄົນເປັນຈຳນວນຫລວງຫລາຍທີ່ຈະສອນຕາມວິທີນີ້, ຄຳສອນທີ່ຜິດ ແລະ ບໍ່ມີປະໂຫຍດ ແລະ ໂງ່ຈ້າ ແລະ ທະເຍີທະຍານຢູ່ໃນໃຈຂອງພວກເຂົາ, ແລະ ຈະພະຍາຍາມຢ່າງໜັກ ເພື່ອເຊື່ອງແຜນຂອງພວກເຂົາໃຫ້ພົ້ນຈາກພຣະຜູ້ເປັນເຈົ້າ; ແລະ ວຽກງານຂອງພວກເຂົາຈະຢູ່ໃນຄວາມມືດ.
10 ແລະ ເລືອດຂອງໄພ່ພົນຂອງພຣະເຈົ້າຈະຮ້ອງຈາກພື້ນດິນເພື່ອຕໍ່ຕ້ານພວກເຂົາ.
11 ແທ້ຈິງແລ້ວ, ພວກເຂົາທັງໝົດອອກໄປຈາກທາງແລ້ວ; ພວກເຂົາກັບເປື່ອຍເນົ່າ.
12 ຍ້ອນວ່າຄວາມທະນົງໃຈ, ແລະ ຍ້ອນວ່າຜູ້ສອນປອມ ແລະ ຄຳສອນຜິດ, ສາດສະໜາຈັກຂອງພວກເຂົາຈຶ່ງກັບທຸຈະລິດ, ແລະ ສາດສະໜາຈັກຂອງພວກເຂົາອວດອ້າງ; ຍ້ອນວ່າຄວາມທະນົງໃຈ ພວກເຂົາຈຶ່ງອວດອົ່ງ.
13 ພວກເຂົາປຸ້ນຄົນຍາກຈົນເພາະບ່ອນຫລົບໄພອັນສວຍງາມ; ພວກເຂົາປຸ້ນສະດົມຄົນຍາກຈົນເພາະເສື້ອຜ້າອັນສວຍງາມຂອງພວກເຂົາ; ແລະ ພວກເຂົາຂົ່ມເຫັງຄົນອ່ອນໂຍນ ແລະ ຄົນຕ່ຳຕ້ອຍໃນໃຈເພາະພວກເຂົາອວດອ້າງໃນຄວາມທະນົງຕົວຂອງພວກເຂົາ.
14 ພວກເຂົາເຮັດຄໍແຂງ ແລະ ຫລຽວໜ້າຂຶ້ນ; ແທ້ຈິງແລ້ວ, ແລະ ເພາະຄວາມທະນົງໃຈ ແລະ ຄວາມຊົ່ວຮ້າຍ, ແລະ ຄວາມໜ້າກຽດຊັງ ແລະ ການໂສເພນີ, ພວກເຂົາຈຶ່ງຫລົງທາງໄປໝົດນອກຈາກບໍ່ເທົ່າໃດຄົນ, ຊຶ່ງເປັນຜູ້ຕິດຕາມທີ່ຖ່ອມຕົວຂອງພຣະຄຣິດ; ເຖິງຢ່າງໃດກໍຕາມ, ພວກເຂົາຍັງຖືກພາໄປຈົນເຮັດຜິດຫລາຍເທື່ອຍ້ອນວ່າພວກເຂົາຖືກສອນດ້ວຍກົດເກນຂອງມະນຸດ.
15 ໂອ້ ຄົນສະຫລາດ, ແລະ ຄົນມີການສຶກສາ, ແລະ ຄົນຮັ່ງມີທີ່ອວດດີ, ຍ້ອນຄວາມທະນົງໃຈຂອງພວກເຂົາ, ແລະ ຄົນທັງຫລາຍທີ່ສັ່ງສອນຄຳສອນຜິດ, ແລະ ຄົນທັງຫລາຍທີ່ທຳການໂສເພນີ, ແລະ ບິດເບືອນທາງທີ່ຖືກຕ້ອງຂອງພຣະຜູ້ເປັນເຈົ້າ, ວິບັດ, ວິບັດ, ວິບັດແກ່ພວກນັ້ນ, ອົງພຣະຜູ້ເປັນເຈົ້າຜູ້ຊົງລິດອຳນາດຍິ່ງໃຫຍ່ໄດ້ກ່າວໄວ້, ເພາະພວກເຂົາຈະຖືກຊຸກລົງນະລົກ!
16 ວິບັດແກ່ພວກເຂົາທີ່ຫັນສິ່ງທີ່ທ່ຽງທຳໄປເພື່ອສິ່ງທີ່ບໍ່ມີຄຸນຄ່າ ແລະ ໝິ່ນປະໝາດສິ່ງທີ່ດີ ແລະ ກ່າວວ່າ ສິ່ງນັ້ນເປັນສິ່ງທີ່ບໍ່ມີຄຸນຄ່າ! ເພາະມື້ນັ້ນຈະມາເຖິງ ເມື່ອອົງພຣະຜູ້ເປັນເຈົ້າຈະສະເດັດມາຢ້ຽມຢາມ ຊາວໂລກຢ່າງວ່ອງໄວ; ແລະ ໃນມື້ນັ້ນ ເມື່ອພວກເຂົາສຸກເຕັມທີ່ໃນຄວາມຊົ່ວຮ້າຍແລ້ວ ພວກເຂົາກໍຈະຕາຍ.
17 ແຕ່ຈົ່ງເບິ່ງ, ຖ້າຫາກຊາວໂລກຈະກັບໃຈຈາກຄວາມຊົ່ວຮ້າຍ ແລະ ຄວາມໜ້າກຽດຊັງຂອງຕົນ ພວກເຂົາຈະບໍ່ຖືກທຳລາຍ, ຈອມໂຍທາກ່າວ.
18 ແຕ່ຈົ່ງບິ່ງ, ສາດສະໜາຈັກໃຫຍ່ ແລະ ໜ້າກຽດຊັງນັ້ນແມ່ນໂສເພນີຂອງແຜ່ນດິນໂລກທັງສິ້ນ, ຕ້ອງພັງທະລາຍລົງສູ່ແຜ່ນດິນ ແລະ ການຕົກຂອງມັນຕ້ອງໃຫຍ່ຫລວງ.
19 ເພາະວ່າອານາຈັກຂອງມານຕ້ອງສັ່ນສະເທືອນ ແລະ ຄົນທີ່ເປັນຂອງມັນຈຶ່ງຈຳຕ້ອງຖືກກະຕຸ້ນໃຫ້ໄປສູ່ ການກັບໃຈ, ຖ້າບໍ່ດັ່ງນັ້ນ ມານຈະຈັບພວກເຂົາໄວ້ດ້ວຍໂສ້ອັນເປັນນິດຂອງມັນ, ແລະ ພວກເຂົາຈະຖືກຍຸຍົງໃຫ້ຮ້າຍກາດ ແລະ ຕາຍໄປ;
20 ເພາະຈົ່ງເບິ່ງ, ໃນມື້ນັ້ນມານຈະແຜ່ເຂົ້າໄປໃນໃຈຂອງລູກຫລານມະນຸດ, ແລະ ຍຸຍົງພວກເຂົາໃຫ້ຄຽດແຄ້ນໃຫ້ສິ່ງທີ່ດີ.
21 ແລະ ມານຈະເຮັດໃຫ້ຄົນອື່ນໆສະຫງົບ ແລະ ກ່ອມພວກນັ້ນໄປໃນຄວາມໝັ້ນຄົງທີ່ເຕັມໄປດ້ວຍກາມມະລົມຈົນວ່າພວກນັ້ນຈະເວົ້າວ່າ: ທຸກຢ່າງດີໃນສີໂອນ; ແທ້ຈິງແລ້ວ, ສີໂອນຮຸ່ງເຮືອງໃນທຸກດ້ານ—ແລະ ມານກ່ອມຈິດວິນຍານຂອງພວກເຂົາດັ່ງນີ້, ແລະ ພາພວກເຂົາລົງໄປຫານະລົກຢ່າງລະມັດລະວັງ.
22 ແລະ ຈົ່ງເບິ່ງ, ມານຍົກຍໍຄົນອື່ນໆໄປ, ແລະ ບອກວ່າບໍ່ມີນະລົກ; ແລະ ມານກ່າວກັບພວກນີ້ວ່າ: ເຮົາບໍ່ແມ່ນມານ ເພາະວ່າບໍ່ມີມານເລີຍ—ແລະ ມັນຈະຊື່ມໃສ່ໃນຫູຂອງພວກນີ້ເຊັ່ນນັ້ນ, ຈົນວ່າມັນຈັບພວກນີ້ໄວ້ ດ້ວຍໂສ້ອັນເປັນຕາຢ້ານຂອງມັນ, ຊຶ່ງຈາກນັ້ນຍ່ອມບໍ່ມີການປົດປ່ອຍ.
23 ແທ້ຈິງແລ້ວ, ພວກເຂົາຈະຖືກຈັບໄວ້ດ້ວຍຄວາມຕາຍ ແລະ ນະລົກ; ແລະ ຄວາມຕາຍ, ແລະ ນະລົກ, ແລະ ມານ, ແລະ ທຸກຢ່າງທີ່ຖືກຍຶດໄວ້ນັ້ນຕ້ອງຢືນຢູ່ຕໍ່ໜ້າພຣະທີ່ນັ່ງຂອງພຣະເຈົ້າ, ແລະ ຮັບການພິພາກສາຕາມການກະທຳຂອງຕົນ, ຊຶ່ງຫລັງຈາກນັ້ນພວກເຂົາຕ້ອງໄປຫາບ່ອນທີ່ຕຽມໄວ້ໃຫ້ພວກເຂົາ, ເຖິງແມ່ນໄປສູ່ທະເລໄຟ ແລະ ມາດ, ຊຶ່ງເປັນຄວາມທໍລະມານອັນບໍ່ມີວັນສິ້ນສຸດ.
24 ດັ່ງນັ້ນ ວິບັດແກ່ຜູ້ຊຶ່ງຢູ່ຢ່າງບໍ່ທຸກຮ້ອນໃນສີໂອນ!
25 ວິບັດແກ່ຜູ້ທີ່ຮ້ອງອອກມາວ່າ: ທຸກຢ່າງດີ!
26 ແທ້ຈິງແລ້ວ, ວິບັດແກ່ຜູ້ທີ່ຟັງກົດເກນຂອງມະນຸດ ແລະ ປະຕິເສດອຳນາດຂອງພຣະເຈົ້າ, ແລະ ຂອງປະທານແຫ່ງພຣະວິນຍານບໍລິສຸດ!
27 ແທ້ຈິງແລ້ວ, ວິບັດແກ່ຜູ້ທີ່ກ່າວວ່າ: ເຮົາໄດ້ຮັບແລ້ວ ແລະ ບໍ່ຕ້ອງການອີກ!
28 ແລະ ໂດຍສະຫລຸບ, ວິບັດແກ່ຄົນທັງຫລາຍທີ່ຕົວສັ່ນ ແລະ ໃຈຮ້າຍຍ້ອນວ່າຄວາມຈິງຂອງພຣະເຈົ້າ! ເພາະຈົ່ງເບິ່ງ, ຄົນທີ່ຖືກສ້າງຂຶ້ນເທິງດານຫີນຍ່ອມຮັບມັນດ້ວຍຄວາມດີ; ແລະ ຄົນທີ່ຖືກສ້າງຂຶ້ນໃນຮາກຖານທີ່ເປັນດິນຊາຍ ຍ່ອມຕົວສັ່ນຢ້ານວ່າຕົນຈະຕົກ.
29 ວິບັດແກ່ຜູ້ທີ່ກ່າວວ່າ: ເຮົາໄດ້ຮັບພຣະຄຳຂອງພຣະເຈົ້າແລ້ວ, ແລະ ເຮົາບໍ່ຕ້ອງການພຣະຄຳຂອງພຣະເຈົ້າອີກ, ເພາະວ່າເຮົາມີພໍແລ້ວ!
30 ເພາະຈົ່ງເບິ່ງ, ອົງພຣະຜູ້ເປັນເຈົ້າກ່າວດັ່ງນີ້: ເຮົາຈະໃຫ້ແກ່ລູກຫລານມະນຸດເປັນບັນທັດ, ເປັນຂໍ້ເລັກໆໜ້ອຍໆ, ນີ້ໜ້ອຍໜຶ່ງ ແລະ ນັ້ນໜ້ອຍໜຶ່ງ; ແລະ ຜູ້ທີ່ເຊື່ອຟັງກົດເກນຂອງເຮົາ ແລະ ງ່ຽງຫູຟັງຄຳແນະນຳຂອງເຮົາ ຍ່ອມເປັນສຸກ, ເພາະວ່າເຂົາຈະຮຽນຮູ້ເຖິງປັນຍາ; ເມື່ອເຂົາຮັບໄວ້ ເຮົາຈະໃຫ້ເຂົາອີກ; ແລະ ສຳລັບຜູ້ທີ່ຈະກ່າວວ່າ ເຮົາມີພໍແລ້ວ, ມັນຈະຖືກເອົາໄປຈາກເຂົາເຖິງແມ່ນສິ່ງທີ່ເຂົາມີຢູ່ກໍຈະຖືກເອົາໄປ.
31 ຜູ້ທີ່ໄວ້ເນື້ອເຊື່ອໃຈໃນມະນຸດ ຫລື ເຮັດໃຫ້ເນື້ອໜັງເປັນແຂນຂອງເຂົາ, ຫລື ຈະເຊື່ອຟັງກົດເກນຂອງມະນຸດ, ຍ່ອມຖືກສາບແຊ່ງ, ນອກຈາກຈະມີກົດເກນໃຫ້ເຂົາໂດຍອຳນາດຂອງພຣະວິນຍານບໍລິສຸດ.
32 ອົງພຣະເຈົ້າຈອມໂຍທາໄດ້ກ່າວໄວ້ວ່າ, ວິບັດແກ່ຄົນຕ່າງຊາດ! ເພາະວ່າເຖິງແມ່ນເຮົາຈະຍື່ນແຂນຂອງເຮົາອອກໄປໃຫ້ພວກເຂົາທຸກໆວັນ, ພວກເຂົາຍັງປະຕິເສດເຮົາ; ອົງພຣະຜູ້ເປັນເຈົ້າກ່າວ, ເຖິງຢ່າງໃດກໍຕາມ, ເຮົາກໍຈະເມດຕາພວກເຂົາຖ້າຫາກພວກເຂົາຈະກັບໃຈ ແລະ ມາຫາເຮົາ; ເພາະວ່າແຂນຂອງເຮົາຍື່ນອອກໄປຕະຫລອດວັນ, ອົງພຣະຜູ້ເປັນເຈົ້າຈອມໂຍທາກ່າວ.
