Kapitulo 27
Bilinen ti Apo ni Ammon a mangidaulo kadagiti tao nga Anti-Nephi-Lehi iti natalged—Iti panagsarakda ken Alma, inuyos ti rag-o ni Ammon ti pigsana—Ited kadakuada dagiti Nephite ti daga ti Jershon kadagiti Anti-Nephi-Lehi—Maawaganda iti tattao ni Ammon. Agarup 90–77 s.c.
1 Ita napasamak nga idi nasarakan dagiti Lamanite a nakigubat kadagiti Nephite, kalpasan ti adu a risiris a mangdadael kadakuada, nga awan ti nagmamaayan ti panangtuntonda iti pakadadaelanda, nagsublida manen iti daga ti Nephi.
2 Ket napasamak a dagiti Amalekite, gapu iti pannakaabakda, nalaus ti pungtotda. Ket idi nakitada a dida mabales dagiti Nephite, rinugianda a sinugsogan dagiti tao nga agpungtot kadagiti kabsatda, dagiti tao nga Anti-Nephi-Lehi; ngarud rinugianda manen a dadaelen ida.
3 Ita nagkedked manen dagitoy a tao a mangala kadagiti armasda, impalubosda ti bagbagida a mapapatay a maibatay iti tarigagay dagiti kabusorda.
4 Ita idi nakita ni Ammon ken dagiti kabsatna daytoy aramid a panangdadael kadagiti ipatpateg nga ay-ayatenda, ken kadagiti nangipateg a nangayat unay kadakuada—ta tinaripatoda ida nga awan dumana kadagiti anghel nga imbaon ti Dios a mangisalakan kadakuada iti awan inggana a pannakadadael—ngarud, idi nakita ni Ammon ken dagiti kabsatna daytoy dakkel nga aramid ti panangdadael, natignayda a makipagrikna, ket kinunada iti ari:
5 Ummongentayo dagitoy tao ti Apo, ket bumabatayo iti daga ti Zarahemla kadagiti Nephite, ket aglibastayo kadagiti ima dagiti kabusortayo, tapno saantayo a madadael.
6 Ngem kinuna ti ari kadakuada: Adtoy, dadaelendatayo dagiti Nephite, gapu iti adu a pammapatay ken basbasol a naaramidtayo kadakuada.
7 Ket kinuna ni Ammon: Mapanak agsaludsod iti Apo, ket no kunana kadatayo, mapankayo kadagiti kabsatyo, mapantayo kadi
8 Ket kinuna ti ari kenkuana: Wen, no kuna ti Apo a mapantayo, mapantayo kadagiti kabsattayo, ket agbalintayo nga adipenda agingga a maikarotayo ti adu a pammapatay ken basbasol a naaramidtayo kadakuada.
9 Ngem kinuna ni Ammon kenkuana: Maisuppiat iti paglintegan dagiti kabsattayo, nga impaulog ti amak, nga adda kadakuada agbalin nga adipen; ngarud bumabatayo ket agtalektayo iti kaasi dagiti kabsattayo.
10 Ngem kinuna ti ari kenkuana: Agsaludsodka iti Apo, ket no kunana a mapantayo, mapantayo; wenno mapukawtayo iti daga.
11 Ket napasamak a napan ni Ammon nagsaludsod iti Apo, ket kinuna ti Apo kenkuana:
12 Yadayom dagitoy a tao ditoy a daga, tapno saanda a mapukaw; ta napigsa ti pananggemgem ni Satanas iti puspuso dagiti Amalekite, a nangsugsog kadagiti Lamanite a manggura kadagiti kabsatda tapno patayenda ida; ngarud yadayom ida itoy a daga; ket mabendisionan dagitoy a tao itoy a kaputotan, ta taginayonek ida.
13 Ket ita napasamak a napan ni Ammon imbaga iti ari ti amin a balikas nga imbaga kenkuana ti Apo.
14 Ket inurnongda amin dagiti taoda, wen, amin dagiti tao ti Apo, ken inurnongda amin dagiti arban ken dinguenda, ket pimmanawda iti daga, ket dimtengda iti langalang a nangbingay iti daga ti Nephi ken iti daga ti Zarahemla, ket immasidegda iti nagbeddengan ti daga.
15 Ket napasamak a kinuna ni Ammon kadakuada: Adtoy, mapankami kadagiti kabsatko iti daga ti Zarahemla, ket agbatikayo ditoy agingga nga agsublikami; ket padasenmi ti puspuso dagiti kabsattayo, no palubosandatayo a mapan iti dagada.
16 Ket napasamak nga iti papan ni Ammon iti daga, a nakasaritada kadagiti kabsatna ni Alma, iti lugar a nasaon; ket adtoy, naragsak daytoy a panagkikita.
17 Ita napnuan rag-o ni Ammon nga uray la a napnek; wen, inalimon ti rag-ona iti Dios, nga uray la a nauyos ti pigsana; ket naglusdoy manen iti daga.
18 Ita saan kadi nga aglaplapusanan daytoy a rag-o? Adtoy, rag-o daytoy nga awan ti mabalin nga umawat malaksid ti napudno nga agbabawi a silaladingit ken napakumbaba nga agsapsapul iti ragsak.
19 Ita talaga a napnuan rag-o ni Alma a nangsarabo kadagiti kabsatna, kasta met ti rag-o ni Aaron, ken ni Omner, ken ni Himni; ngem adtoy saan a rinimbawan ti rag-oda ti pigsada.
20 Ket ita napasamak nga indauluan ni Alma dagiti kabsatna nga agsubli iti daga ti Zarahemla; uray pay iti balayna. Ket napanda imbaga iti pangulo nga ukom ti amin a napasamak kadakuada iti daga ti Nephi, kadagiti kabsatda, dagiti Lamanite.
21 Ket napasamak a nangipatulod ti pangulo nga ukom iti pakdaar iti intero a daga, a tarigagayanna ti timek dagiti tao maipanggep iti panangawatda kadagiti kabsatda, a tattao dagiti Anti-Nephi-Lehi.
22 Ket napasamak a dimteng ti timek dagiti tao, a nagkuna: Adtoy, itedmi ti daga ti Jershon, nga adda iti daya nga asideg ti baybay, a nayariping iti daga ti Bountiful, nga adda iti abagatan ti daga ti Bountiful; ket daytoy daga a Jershon ti daga nga itedmi a tawiden dagiti kabsattayo.
23 Ket adtoy, ikabiltayo dagiti buyottayo iti nagbaetan ti daga ti Jershon ken ti daga ti Nephi, tapno masalaknibantayo dagiti kabsattayo iti daga ti Jershon; ket aramidentayo daytoy para kadagiti kabsattayo, gapu iti butengda a mangitag-ay iti armas a maibusor kadagiti kabsatda wenno makaaramidda iti basol; ket napasamak daytoy nalaus a butengda gapu iti napasnek a panagbabawida, a gapu iti adu a pammapatayda ken nakaam-amak a kinadangkesda.
24 Ket ita adtoy, kastoy ti aramidentayo kadagiti kabsattayo, tapno matawidda ti daga ti Jershon; ket salaknibantayo ida kadagiti kabusorda kadagiti buyottayo, no la ketdi ibingayandatayo iti taraonda a pangtulongda kadatayo a pangtaginayontayo kadagiti buyottayo.
25 Ita, napasamak nga idi nangngeg daytoy ni Ammon, nagsubli kadagiti tao nga Anti-Nephi-Lehi, ken kasta met a kimmuyog ken ni Alma, iti langalang, a nagipatakderanda kadagiti toldada, ket impakaammoda kadakuada amin dagitoy a banag. Ken kasta met nga insarita ni Alma kadakuada ti pannakapasurotna a kaduana da Ammon ken Aaron, ken dagiti kabsatna.
26 Ket napasamak a nangipaay daytoy iti dakkel a rag-o kadakuada. Ket bimmabada iti daga ti Jershon, ket tinagikuada ti daga ti Jershon; ket inawagan ida dagiti Nephite iti tattao ni Ammon; ngarud naam-ammoda iti kasta a nagan kalpasanna.
27 Ket naibilangda kadagiti tao ni Nephi, kasta met a naibilangda kadagiti tao nga adda iti simbaan ti Dios. Kasta met a naam-ammoda babaen iti kinareggetda iti Dios, ken kasta met iti tattao; ta awan ti pagkurangan ti kinapudnoda ken nalintegda iti amin a banag; ken natibker ti pammatida ken ni Cristo, agingga iti panungpalan.
28 Ket kagurada la unay ti agpaayus iti dara dagiti kabsatda; ket didanto a pulos kabaelan ti agiggem iti armas a maibusor kadagiti kabsatda; ket pulos a dida kinita ti patay iti nakaam-amak a kasasaad, gapu iti namnama ken paniriganda ken ni Cristo ken ti panagungar; ngarud, inalimonda ti patay babaen ti balligi ni Cristo itoy.
29 Ngarud, lak-amenda ni patay iti kadagsenan ken katuokan a wagas a mabalin nga ipaay dagiti kabsatda, sakbay a mangalada iti espada ken kampilan a pangdangranda kadakuada.
30 Ket kasta ti karegta ken pannakaay-ayatda a tao, ti naidaddaduma a tattao ti Apo.
