Kapitulo 3
Minarkaan dagiti Amlicite ti bagbagida a maibatay iti naimpadtuan a balikas—Nailunod dagiti Lamanite gapu iti yaalsada—Intugtugot dagiti tao dagiti bukodda a lunod—Pinarmek dagiti Nephite ti sabali pay a buyot ti Lamanite. Agarup 87–86 s.c.
1 Ket napasamak a dagiti Nephite a saan a napapatay babaen dagiti armas ti gubat, kalpasan ti panangipumponda kadagiti napapatay—ita saan a mabilang ti kaadu dagiti napapatay, gapu iti kaaduda—kalpasan ti panangipumponda kadagiti minatayda nagsublida amin iti dagdagada, ken iti balbalayda, ken iti assawada, ken kadagiti annakda.
2 Ita adu a babbai ken ubbing ti napapatay babaen ti espada, kasta met nga adu kadagiti pangenda ken kadagiti arbanda; kasta met nga adu ti nadadael kadagiti bukel iti kinellengda, ta inasak-asak ida dagiti pangen ti tattao.
3 Ket ita kas iti kaadu dagiti Lamanite ken dagiti Amlicite a napapatay iti teppang ti karayan Sidon ti naipuruak iti dandanum ti Sidon; ket adtoy adda dagiti tulangda iti lansad ti baybay, ket aduda.
4 Ket nailasin dagiti Amlicite kadagiti Nephite, ta minarkaanda ti bagbagida iti nalabaga iti mugingda a maibatay iti wagas dagiti Lamanite; nupay kasta dida kiniskisan dagiti uloda a kas kadagiti Lamanite.
5 Ita nakiskisan dagiti ulo dagiti Lamanite; ket lamulamoda, malaksid iti lalat a naitapar iti lomoda, kasta met ti kalasagda, a naikaratay kadakuada, ken dagiti baida, ken dagiti panada, ken dagiti batoda, ken dagiti palsiitda, ken dadduma pay.
6 Ket nangisit ti kudil dagiti Lamanite, a maibatay iti marka a naikabil kadagiti ammada, a lunod kadakuada gapu iti kinamanagbasol ken ti yaalsada a maibusor kadagiti kabsatda, a buklen da Nephi, Jacob, ken Jose, ken Sam, a nalinteg ken nasantuan a tattao.
7 Ket pinanggep dagiti kabsatda a dadaelen ida, ngarud nailunodda; ket inikkan ti Apo a Dios ida iti marka, wen, kada Laman ken Lemuel, kasta met kadagiti lallaki nga annak ni Ismael, ken dagiti babbai nga Ismaelita.
8 Ket napasamak daytoy tapno mailasin dagiti bukelda kadagiti bukel dagiti kabsatda, tapno iti kasta mataginayon ti Apo a Dios dagiti taona, tapno saanda a mailaok ken mamati iti biddut a kaugalian a mangipaneknek iti pannakadadaelda.
9 Ket napasamak nga asino man a makipulapol iti bukelna kadagiti Lamanite mangipaay met iti umarngi a lunod iti bukelna.
10 Ngarud, asino man a mangitulok iti bagina nga ipanaw dagiti Lamanite maawagan iti dayta nga ulo, ket maikkan iti marka.
11 Ket napasamak nga asino man a di mamati iti kaugalian dagiti Lamanite, ngem mamati kadagiti sinurat a nairuar iti daga ti Jerusalem, kasta met iti kaugalian dagiti ammada, nga umisu, a namati kadagiti bilin ti Dios ken nangtungpal kadagitoy, maawaganda iti Nephite, wenno dagiti tao ni Nephi, manipud iti dayta a kanito—
12 Ket isuda a nangidulin kadagiti pudno a sinurat dagiti taoda, ken kasta met dagiti tao dagiti Lamanite.
13 Ita agsublitayo manen kadagiti Amlicite, ta namarkaanda met; wen, nangikabilda iti marka ti bagbagida, wen, ti nalabaga a marka iti mugingda.
14 Kasta ti pannakatungpal ti balikas ti Dios, ta kastoy dagiti balikas nga imbagana ken ni Nephi: Adtoy, inlunodko dagiti Lamanite, ket markaak ida tapno isuda ken dagiti bukelda mailasinda kenka ken kadagiti bukelmo, manipud itoy a kanito nga agtultuloy iti agnanayon, malaksid no ipakawanda ti kinadangkesda ket umasidegda kaniak tapno itdek kadakuada ti kaasik.
15 Ket manen: Markaak ti makipulapol ti bukelna kadagiti kabsatmo, tapno mailunodda met.
16 Ket manen: Markaak ti makiranget kenka ken iti bukelmo.
17 Ket manen, kunak nga isu a mangpanaw kenka saanton a maawagan a bukelmo; ket bendisionanka, ken asino man a maawagan a bukelmo, manipud ita ken iti agnanayon; ket dagitoy ti kari ti Apo ken ni Nephi ken iti bukelna.
18 Ita saan nga ammo dagiti Amlicite a tungtungpalenda dagiti balikas ti Dios idi rugianda a markaan ti bagbagida iti mugingda; nupay kasta nagparangda a nabatad nga umalsa iti Dios; ngarud mayalubog a mayetnag kadakuada ti lunod.
19 Ita kayatko a kitaem nga ikuyogda ti lunod iti bagbagida; ken kasta met nga ikuyog ti tunggal tao a mailunod iti bagina ti bukodna a pangngeddeng.
20 Ita napasamak a saan unay nga adu nga aldaw kalpasan ti bakal a naaramid iti daga a Zarahemla, dagiti Lamanite ken dagiti Amlicite, nga adda sabali a buyot dagiti Lamanite a nangserrek kadagiti tao ni Nephi, iti isu met laeng a lugar a nangsabatan ti immuna a buyot kadagiti Amlicite.
21 Ket napasamak nga adda buyot a naibaon a mangpapanaw kadakuada iti dagada.
22 Ita gapu iti pannakasugat ni Alma saan a napan a mismo nakibakal itoy a gundaway kadagiti Lamanite;
23 Ngem nangibaon iti adu a buyot a makirupak kadakuada; ket napanda ket adu ti pinatayda a Lamanite, ket pinaruarda dagiti nabati iti beddeng ti dagada.
24 Ket kalpasanna nagsublida manen ket rinugianda a binangon ti kappia iti daga, nga awanen iti dayta a kanito ti kabusor a nangriribuk kadakuada.
25 Ita napasamak amin dagitoy a banag, wen, nalpas amin dagitoy a gubat ken panagsusupanget ket naggibus iti maikalima a tawen ti panagturay dagiti ukom.
26 Ket iti maysa a tawen rinibu ken pinullo a ribu a kararua ti naibaon iti agnanayon a lubong, tapno apitenda ti gunggonada a maibatay kadagiti aramidda, nasayaatda man wenno dakesda, tapno apitenda ti agnanayon a ragsak wenno agnanayon a pagladingitan, a maibatay iti espiritu nga inlistada nga agtungpal, uray no nasayaat nga espiritu wenno dakes.
27 Ta umawat ti tunggal tao iti tangdan isu nga inlistana nga agtungpal, ket daytoy maibatay kadagiti balikas ti espiritu ti pammadto; ngarud maaramid koma a maibatay iti kinapudno. Ket kasta ti panaggibus ti maikalima a tawen ti panagturay dagiti ukom.
