-
Ko ha fakamatala ʻo e kau Nīfaí. Ko ʻenau ngaahi taú mo e ngaahi fakakikihí, mo ʻenau ngaahi fekeʻikeʻí. Kae ʻumaʻā foki mo e ngaahi kikite ʻa e kau palōfita māʻoniʻoni tokolahi, ki muʻa ʻi he hāʻele mai ʻa Kalaisí, ʻo fakatatau ki he ngaahi fakamatala ʻa Hilamani, ʻa ia ko e foha ʻo Hilamaní, pea fakatatau foki mo e ngaahi fakamatala ʻa hono ongo fohá, pea aʻu mai ki he hāʻele mai ʻa Kalaisí. Kae ʻumaʻā foki hono fakaului ʻo e tokolahi ʻo e kau Leimaná. Ko ha fakamatala ki honau fakauluí. Ko ha fakamatala ki he māʻoniʻoni ʻa e kau Leimaná, mo e fai angahala mo e ngaahi anga-fakalielia ʻo e kau Nīfaí, ʻo fakatatau ki he lekooti ʻa Hilamani mo hono ongo fohá, ʻo aʻu mai ki he hāʻele mai ʻa Kalaisí, ʻa ia ʻoku ui ko e tohi ʻa Hilamaní, mo e ngaahi fakamatala kehe.
-
VAHE 1
ʻOku hoko ʻa Peiholani hono uá ko e fakamaau lahí pea ʻoku fakapoongi ia ʻe Kisikumeni—ʻOku hoko ʻa Peikumenai ki he nofoʻanga fakamāú—ʻOku taki ʻe Kolianitomuli ʻa e ngaahi kau tau ʻa e kau Leimaná, ʻo nau ikunaʻi ʻa Seilahemala, pea ʻoku fakapoongi ʻa Peikumenai. ʻOku ikunaʻi ʻe Molonaihā ʻa e kau Leimaná pea toe maʻu ʻa Seilahemala, pea ʻoku fakapoongi ʻa Kolianitomuli. Taʻu 52–50 K.M. nai.
-
VAHE 2
ʻOku hoko ʻa Hilamani, ko e foha ʻo Hilamani, ko e fakamaau lahí—ʻOku taki ʻe Katianetoni ʻa e kautaha ʻa Kisikumení—ʻOku hanga ʻe he tamaioʻeiki ʻa Hilamani ʻo tāmateʻi ʻa Kisikumeni, pea hola ʻa e kautaha ʻa Katianetoní ki he feituʻu maomaonganoá. Taʻu 50–49 K.M. nai.
-
VAHE 3
ʻOku hiki atu ha kau Nīfai tokolahi ki he fonua ʻi he fakatokelaú—ʻOku nau langa ʻa e ngaahi fale ʻo e sima pea nau tauhi ʻa e ngaahi lekooti lahi—ʻOku fakaului pea papitaiso ʻa e toko lau mano—ʻOku hanga ʻe he folofola ʻa e ʻOtuá ʻo tākiekina mai ʻa e tangatá ki he fakamoʻuí—ʻOku maʻu ʻe Nīfai ko e foha ʻo Hilamaní ʻa e nofoʻanga fakamāú. Taʻu 49–39 K.M. nai.
-
VAHE 4
ʻOku kau fakataha ʻa e kau Nīfai angatuʻú mo e kau Leimaná ʻo maʻu ʻa e fonua ko Seilahemalá—ʻOku tupu hono ikunaʻi ʻo e kau Nīfaí mei heʻenau fai angahalá—ʻOku fakaʻauʻau hifo ʻa e Siasí, pea kamata ʻa e kakaí ke vaivai ʻo hangē ko e kau Leimaná. Taʻu 38–30 K.M. nai.
-
VAHE 5
ʻOku fakaʻaongaʻi ʻe Nīfai mo Līhai hona taimí kotoa ʻi he malangá—ʻOku hanga ʻe hona hingoá ʻo fakamanatu mai kiate kinaua ke faʻifaʻitaki ʻena moʻuí ki heʻena ngaahi kuí—ʻOku huhuʻi ʻe Kalaisi ʻa kinautolu ʻoku fakatomalá—ʻOku fakaului ʻe Nīfai mo Līhai ha tokolahi pea ʻoku tuku pōpula ʻa kinaua, pea ʻoku takatakai ʻa kinaua ʻe he afi—ʻOku fakamalumalu ʻe ha ʻao fakapoʻuli ʻa e kakai ʻe toko tolungeau—ʻOku ngalulululu ʻa e kelekelé, pea fekauʻi ʻa e kakaí ʻe ha leʻo ke nau fakatomala—ʻOku fetalanoaʻaki ʻa Nīfai mo Līhai mo e kau ʻāngelo, pea ʻoku takatakai ʻa e fuʻu kakaí ʻe he afi. Taʻu 30 K.M. nai.
-
VAHE 6
ʻOku malanga ʻa e kau Leimana māʻoniʻoní ki he kau Nīfai fai angahalá—ʻOku tuʻumālie ʻa e ongo kakaí fakatouʻosi ʻi ha kuonga ʻo e melino mo e mahu—ʻOku hanga ʻe Lusifā, ko e tupuʻanga ʻo e angahalá, ʻo ueʻi hake ʻa e loto ʻo e kau fai angahalá mo e kau kaihaʻa ʻa Katianetoní ke fakapō mo fai angahala—ʻOku maʻu ʻe he kau kaihaʻá ʻa e puleʻanga ʻo e kau Nīfaí. Taʻu 29–23 K.M. nai.
-
Ko e Kikite ʻa Nīfai, Ko e Foha ʻo Hilamaní—ʻOku folofola ʻa e ʻOtuá ki he kakai ʻo Nīfaí te ne ʻaʻahi kiate kinautolu ʻi hono houhaú, ke fakaʻauha ʻa kinautolu ke ʻosiʻosingamālie ʻo kapau ʻe ʻikai te nau fakatomala mei heʻenau fai angahalá. ʻOku taaʻi ʻe he ʻOtuá ʻa e kakai ʻo Nīfaí ʻaki ʻa e mahaki fakaʻauha; ʻoku nau fakatomala mo tafoki kiate ia. ʻOku kikite ʻa Samuela, ko ha tangata Leimana ki he kau Nīfaí.
ʻOku kau ki ai ʻa e vahe 7 ʻo aʻu ki he ngataʻanga ʻo e vahe 16.
-
VAHE 7
ʻOku kapusi ʻa Nīfai mei he tokelaú pea ʻokú ne foki ki Seilahemala—ʻOkú ne lotu ʻi he taua ʻi heʻene ngoué, peá ne kalanga ki he kakaí ke nau fakatomala pe te nau ʻauha. Taʻu 23–21 K.M. nai.
-
VAHE 8
ʻOku feinga ʻa e kau fakamaau koví ke ueʻi hake ʻa e kakaí ke ʻita kia Nīfai—Naʻe fakamoʻoni kotoa ʻa ʻĒpalahame, Mōsese, Seinosi, Seinoki, ʻĒsaiasi, ʻĪsaia, Selemaia, Līhai, mo Nīfai kia Kalaisi—ʻOku fakahā ʻe Nīfai ʻi hono fakahinohinoʻi ia ʻe he Laumālié ʻa hono fakapoongi ʻo e fakamaau lahí. Taʻu 23–21 K.M. nai.
-
VAHE 9
ʻOku ʻilo ʻe ha kau talafekau ʻa e fakamaau lahí kuo mate ʻi he fakamaauʻangá—ʻOku tuku ʻa kinautolu ʻi he fale fakapōpulá pea toki tukuange ki mui—ʻOku fakahā ʻe Nīfai ʻi he fakahinohino ʻa e Laumālié ko Seianitumi ʻa e tokotaha fakapoó—ʻOku tali ʻa Nīfai ʻe ha niʻihi ko ha palōfita ia. Taʻu 23–21 K.M. nai.
-
VAHE 10
ʻOku foaki ʻe he ʻEikí kia Nīfai ʻa e mālohi ke fakamaʻú—ʻOkú ne maʻu ai ʻa e mālohi ke fakamaʻu mo vete ʻi he māmaní pea ʻi he langí foki—ʻOkú ne fekau ki he kakaí ke nau fakatomala pe ko ʻenau ʻauha—ʻOku ʻave ia ʻe he Laumālié mei he haʻofanga kakai ki he haʻofanga kakai. Taʻu 21–20 K.M. nai.
-
VAHE 11
ʻOku kole ʻe Nīfai ki he ʻEikí ke fetongi ʻenau taú ʻaki ha honge—ʻOku mate ha kakai tokolahi—ʻOku nau fakatomala, pea ʻoku kole ʻe Nīfai ki he ʻEikí ke tuku mai ha ʻuha—ʻOku maʻu ʻe Nīfai mo Līhai ha ngaahi fakahā lahi—ʻOku fokotuʻu maʻu ʻe he kau kaihaʻa ʻa Katianetoní ʻa kinautolu ʻi he fonuá. Taʻu 20–6 K.M. nai.
-
VAHE 12
ʻOku taʻe-angatonu mo vale pea vave ʻa e faʻahinga ʻo e tangatá ke fai kovi—ʻOku tauteaʻi ʻe he ʻEikí ʻa hono kakaí—Ko e taʻeʻaonga ʻa e mālohi ʻo e tangatá ʻi hono fakatatau ki he māfimafi ʻo e ʻOtuá—ʻI he ʻaho ʻo e fakamāú, ʻe maʻu ʻe he tangatá ʻa e moʻui taʻengatá pe ko e malaʻia taʻengatá. Taʻu 6 K.M. nai.
-
Ko e kikite ʻa Samuela, ko e tangata Leimaná, ki he kau Nīfaí.
ʻOku kau ki ai ʻa e vahe 13 ʻo aʻu ki he ngataʻanga ʻo e vahe 15.
-
VAHE 13
ʻOku kikite ʻa Samuela ko e tangata Leimaná ki hono fakaʻauha ʻo e kau Nīfaí ʻo kapau ʻe ʻikai te nau fakatomala—ʻOku fakamalaʻiaʻi ʻa kinautolu mo ʻenau ngaahi koloá—ʻOku nau kapusi mo tolomakaʻi ʻa e kau palōfitá, pea ʻoku ʻātakaiʻi ʻa kinautolu e he ngaahi laumālie ʻuli, pea nau kumi ki he fiefia ʻi he fai angahala. Taʻu 6 K.M. nai.
-
VAHE 14
ʻOku kikiteʻi ʻe Samuela ʻe maama lolotonga ʻa e poʻulí pea ʻe hā mai ha fetuʻu foʻou ʻi he ʻaloʻi ʻo Kalaisí—ʻOku huhuʻi ʻe Kalaisi ʻa e tangatá mei he mate fakasinó mo e mate fakalaumālié—ʻE kau ʻi he ngaahi fakaʻilonga ʻo ʻene pekiá ʻa e ʻaho ʻe tolu ʻo e fakapoʻuli, mo e mafahifahi ʻa e ngaahi maká, pea mo e ngaahi fuʻu liliu lahi ʻi natula. Taʻu 6 K.M. nai.
-
VAHE 15
ʻOku tauteaʻi ʻe he ʻEikí ʻa e kau Nīfaí koeʻuhi ko ʻene ʻofa ʻiate kinautolú—ʻOku tuʻu maʻu mo tuʻu ʻaliʻakiaki ʻa e kau ului Leimaná ʻi he tuí—ʻE ʻaloʻofa ʻa e ʻEikí ki he kau Leimaná ʻi he ngaahi ʻaho fakaʻosí. Taʻu 6 K.M. nai.
-
VAHE 16
ʻOku papitaiso ʻe Nīfai ʻa e kau Nīfai naʻe tui kia Samuelá—ʻOku ʻikai lava ʻo tāmateʻi ʻa Samuela ʻaki ʻa e ngaahi ngahaú mo e ngaahi maka ʻa e kau Nīfai taʻe-fakatomalá—ʻOku fakafefeka ʻe ha niʻihi ʻa honau lotó, pea mamata ha niʻihi ki ha kau ʻāngelo—ʻOku pehē ʻe he kakai taʻetuí ʻoku ʻikai ʻaonga ke tui kia Kalaisi mo ʻene hāʻele mai ki Selūsalemá. Taʻu 6–1 K.M. nai.
