O Le Tusi a Moronae

 1 Lou atalii pele e, ua ou toe tusi atu ia te oe ina ia e iloa o loo ou ola pea; ae ou te tusi teisi e uiga i mea ua matua faanoanoa tele.

 2 Aua faauta, sa ou tauina se taua tuga ma sa Lamanā, lea sa matou le manumalo ai; ma ua pau Akeanetusi i le pelu, ma Lurama ma Emirona foi; ioe, ma ua toesea mai ia te i tatou se aofai tele o o tatou tagata sili ona lelei.

 3 Ma o lenei faauta, lou atalii e, ou te fefe nei faaumatia e sa Lamanā lenei nuu; ona ua latou le salamo, ma ua faaosooso pea i latou e Satani ia feitagai ma le tasi.

 4 Faauta, o loo ou galue pea e le aunoa ia te i latou; ma a ou tautala atu ia te i latou le afioga a le Atua ma le ^asaolele latou te tetete ma feita faasaga mai ia te au; ma a ou le tautala atu foi ma le saolele ua latou faamaaa o latou loto e faasaga i ai; o le mea lea, ou te fefe nei mea ane ua le toe ^efinafinau le Agaga o le Alii faatasi ma i latou.

 5 Ona ua latou matua feita tele e foliga mai ia te au ua leai so latou fefefe i le oti; ma ua toesea lo latou alofa, o le tasi i le isi; ma ua latou ^agalala i le toto ma le taui ma sui e le aunoa.

 6 Ma o lenei, lou atalii pele e, e ui i lo latou maaa, ia ta galulue pea ma le ^afiliga; aua afai ta te tuu le ^egalulue, o le a aumai i taua i lalo o le tausalaga; ona ua i ai sa taua galuega e fai ao ta i ai i lenei fale apitaga omea, ina ia ta faatoilaloina le fili o le amiotonu uma, ma malolo ai o taua agaga i le malo o le Atua.

 7 Ma o lenei ou te tusi atu teisi e uiga i mafatiaga o lenei nuu. Aua e tusa ma le malamalama lea na ou maua mai ia Amorona, faauta, ua maua e sa Lamanā ni pagota e toatele, ia sa latou aumai mai le olo o Serisa; ma sa i ai tane, fafine, ma tamaiti.

 8 Ma o tane ma tamā o ia fafine ma tamaiti ua latou fasiotia; ma ua latou fafaga fafine i aano o a latou tane, ma tamaiti i aano o o latou tamā; ma ua latou le avatu ia te i latou se vai, vagana ai sina mea itiiti.

 9 Ma e ui i lenei mea inosia tele a sa Lamanā, ua le sili atu i le mea ua faia e o tatou tagata i Morianetuma. Aua faauta, e toatele afafine o sa Lamanā ua latou ave faapagota; ma ina ua uma ona latou aveesea mai ia te i latou o le mea lena ua silisili ona pele ma taua i luga o mea uma lava, o le ^alē gaōiā lea ma le ^emama—

 10 Ma ina ua uma ona latou faia o lenei mea, sa latou fasioti i latou i se auala e silisili ona paaa, ua faatauga o latou tino seia oo ina feoti; ma ina ua uma ona latou faia o lenei mea, ua latou ai lotulotu o latou tino e pei o manu aivao, ona o le maaa o o latou loto; ma ua latou faia lenei mea o se faailoga o le toa.

 11 E, lou atalii pele e, e mafai faapefea e ni tagata faapenei, ua aunoa ma le tu malamalama—

 12 (Ma e nao ni nai tausaga itiiti ua mavae atu, sa avea ai i latou ma ni tagata tu malamalama ma tauagafau)

 13 Ae lou atalii e, e mafai faapefea e ni tagata faapenei, o e o lo latou fiafia ua i ai lea i le faia o mea inosia e tele—

 14 E mafai faapefea ona tatou faamoemoe o le a ^ataofi e le Atua lona aao i le faamasinoga e faasaga ia te i tatou?

 15 Faauta, ua tagi ae loʼu loto: Oi talofa i lenei nuu. Afio mai ia, le Atua e, i le faamasinoga, ma natia a latou agasala, ma amioleaga, ma mea inosia mai luma o ou fofoga!

 16 O lenei foi, lou atalii e, e toatele o ^afafine ua oti a latou tane, ma a latou tama teine, o loo nonofo pea i Serisa; ma o le vaega lena o meaai sa le avea e sa Lamanā, faauta, ua ave e le autau a Senifae, ma ua tuua ai i latou e feoai solo i soo se mea e mafai ona latou o atu i ai mo ni meaai; ma e toatele fafine matutua ua matapogia i ala ma feoti ai.

 17 Ma o le autau ua faatasi ma au ua vaivai; ma o autau a sa Lamanā o loo i le va o Serisa ma au; ma o le toatele o e na sosola atu i le autau a ^aArona ua pauu fasia i lo latou saua matautia faamanu.

 18 E, le leaga e o lou nuu! Ua latou aunoa ma le maopoopo ma aunoa ma le alofa mutimutivale. Faauta, o au ua nao se tagata, ma ua nao le malosi o se tagata ua ia te au, ma ua le mafai ona ou toe faamalosia au faatonuga.

 19 Ma ua latou malolosi ia latou faapiopioga; ma ua tutusa lo latou saua faamanu, ua latou le faasaoina se tasi, pe matutua pe laiti; ma ua latou fiafia i mea uma, vagana ai le mea lelei; ma o le mafatia o o tatou fafine ma a tatou fanau i luga o le laueleele atoa lenei ua sili atu i mea uma; ioe, e le mafai e le laulaufaiva ona faamatala, pe mafai foi ona tusia.

 20 Ma o lenei, lou atalii e, ou te le toe fia tautala umi atu e uiga i lenei vaaiga leaga matautia. Faauta, ua e iloa le amioleaga o lenei nuu; ua e iloa ua latou aunoa ma se mafaufau lelei, ma ua latou le toe lagona se lelei; ma o lo latou amioleaga ua ^asili atu i lo sa Lamanā.

 21 Faauta, lou atalii e, e le mafai ona fautua atu i latou i le Atua nei taia au e ia.

 22 Ae faauta, lou atalii e, ou te fautua atu oe i le Atua, ou te faalagolago ia Keriso ia faaolaina oe; ma ou te tatalo atu i le Atua ia ^afaasaoina e ia lou ola, e molimauina le toe foi mai o ona tagata ia te ia, po o lo latou faafanoga atoa; ona ua ou iloa e o le a fano i latou vagana ai ua latou ^esalamo ma toe foi mai ia te ia.

 23 Ma afai e fano i latou o le a pei o sa Iaretō, ona o lo latou ^asaili ma le loto i ai o o latou loto, mo le toto ma le ^etauimasui.

 24 Ma afai e faapea o le a fano i latou, ua tatou iloa e toatele o tatou uso ua ^asosola atu ia sa Lamanā, ma e toatele atu foi ni isi o le a sosola atu ia te i latou; o le mea lea, ia e tusi teisi ni nai mea itiiti, pe afai e faasaoina oe ma o le a ou fano ma le vaai ia te oe; ae ou te faalagolago ia mafai ona lata ona ou vaai ia te oe; ona ua ia te au ni au talafaamaumau paia ou te manao e ^etuu atu ia te oe.

 25 Lou atalii e, ia e faamaoni ia Keriso; ma ia le avea mea ua ou tusia ma mea e te faanoanoa ai, e faamamafa ai oe i lalo sei e oti; ae talosia ia sii ae oe i luga e Keriso, ma talosia ia mau e faavavau i lou ^amafaufau ona ^emafatia ma lona maliu, ma le faaali mai o lona tino i o tatou tamā, ma lona alofa mutimutivale ma le tali-tiga, ma le faamoemoe o lona mamalu ma le ⁱola faavavau.

 26 Ma talosia ia i ai, ma mau faatasi ma oe e faavavau, le alofa tunoa o le Atua le Tamā, o le o lona nofoalii ua maualuga i le lagi, ma lo tatou Alii o Iesu Keriso, o le ua afio i le ^aitu aao taumatau o lona mana, seia oo ina pule o ia i mea uma. Amene.