Ti Libro ni Mosiah

  1 Ket ita, napasamak nga idi maibaga ni ari Benjamin dagiti balikas nga inted ti anghel ti Apo kenkuana, inwarasna dagiti matana iti ummong, ket adtoy nagpakleb dagitoy iti daga, ta simpeg kadakuada ti panagbuteng iti Apo.

  2 Ket nakitada dagiti bagida iti nailubongan a kasasaad, a nababbaba pay ngem iti tapok ti daga. Ket sangsangkamaysada a nagpukkaw, a kinunada: O, mangngaasika, ket aramatem kadakami ti manangsubbot a dara ni Cristo tapno magun-odmi ti pannakapakawan ti basolmi, ket maugasan dagiti pusomi; gapu ta mamatikami ken ni Jesucristo, ti Anak ti Dios, a namarsua iti langit ken daga, ken amin a banag; a bumabanto kadagiti annak ti tao.

  3 Ket napasamak a kalpasan a naisawangda dagitoy a balikas immay kadakuada ti Espiritu ti Apo, ket napnuanda iti ragsak, ta inawatda ti pannakapakawan dagiti basolda, ken kinatalna ti pakinakemda, gapu iti aglaplapusanan a pammatida ken ni Jesucristo nga umayto, kas iti imbaga kadakuada ni ari Benjamin.

  4 Ket linuktan manen ni ari Benjamin ti ngiwatna ket rinugianna ti nagsarita kadakuada, a kinunana: Gagayyem ken kakabsatko, kakabagian ken kakailiak, kayatko manen nga awisen ti imatangyo, tapno denggen ken awatenyo dagiti nabati pay a balikas nga ibagak kadakayo.

  5 Ta adtoy, no ti pannakaammo iti kinaimbag ti Dios iti daytoy a kanito ti nangriing kadakayo a mangusig iti kinaubbawyo, ken kinaawan ti pategyo ken pannakaiderraasyo—

  6 Kunak kadakayo, no maubogyo ti kinasayaat ti Dios, ken awan umasping a pannakabalinna, ken ti kinasiribna, ken ti kinaanusna, ken ti naunday a panagsagabana a maipaay kadagiti annak ti tao; ken kasta met, ti pannubbot a naisagana manipud iti pannakaparsua ti lubong, tapno iti kasta dumteng kenkuana ti pannakaisalakan a mamataud iti panagtalekna iti Apo, ken masapul a naregta nga agtungpal kadagiti bilin, ket agtultuloy ti pammatina iti unos ti panagbiagna, kayatko a sawen, ti biag ti nainlasagan a bagi—

  7 Kunak, a daytoy ti tao nga umawat iti pannakaisalakan, babaen ti pannubbot a naisagana manipud iti pannakaparsua ti lubong nga agpaay iti amin a tao, iti uray ania manipud iti pannakatnag ni Adan, wenno dagiti adda, wenno siasino man nga addanto, agpapan pay iti panungpalan ti lubong.

  8 Ket daytoy ti pamuspusan tapno dumteng ti pannakaisalakan. Ket awan ti sabali a pakaisalakanan malaksid iti naibagan; wenno adda uray ania nga annuroten a pakaisalakanan ti tao, malaksid kadagiti annuroten a naibagakon kadakayo.

  9 Mamatikayo iti Dios; mamatikayo nga isu, a pinarsuana ti amin a banag, iti langit ken iti daga; mamatikayo nga adda kenkuana amin a kinasirib, ken amin a pannakabalin, iti langit ken iti daga; mamatikayo a saan nga ammo ti tao ti amin a banag nga ammo ti Apo.

  10 Ket manen, mamatikayo a nasken ti panagbabawiyo iti basbasolyo ket iwagsakyo ida, ken agpakumbabakayo iti sango ti Dios; ken agkiddawkayo a naimpusuan tapno pakawanennakayo; ket ita, no mamatikayo kadagitoy a banag penkenyo nga aramidenyo ida.

  11 Ket kunak manen kadakayo a kas nasaok idin, a no naubogyon ti kinadayag ti Dios, wenno naammuanyon ti kinaimbagna ken napadasyon ti ayatna, ken inawatyon ti pannakapakawan ti basbasolyo, a nangted iti aglaplapusanan a ragsak iti kararuayo, agpapan pay a kasta kayatko a lagipenyo, ken kanayon a laglagipenyo, ti kinaindaklan ti Dios, ken ti kinanumoyo, ken ti kinaimbagna ken ti naunday a panagsagabana a maipaay kadakayo, nga awan kaikarianna a nabiag, ket agpakumbabakayo iti awan umasping a kinapakumbaba, nga inaldaw nga umaw-awag iti nagan ti Apo, ken mangitakder iti natibker a pammati iti dayta umayto, a nagaon iti ngiwat ti anghel.

  12 Ket adtoy, kunak kadakayo a kanayonkayonto a naragsak no aramidenyo daytoy, ken mapno iti ayat ti Dios, ken agtultuloy ti pannakapakawan ti basbasolyo; ket umadunto ti ammoyo maipanggep iti dayag ti namarsua kadakayo, wenno iti pannakaammo iti nalinteg ken iti pudno.

  13 Ket awanto ti gagemyo nga agpipinnasakit iti tunggal maysa, ngem agbiagkayonto ketdi a sitatalna, ken mangipaay iti tunggal tao ti naikari kenkuana.

  14 Ket diyo ipalubos nga agbisin, wenno aglamulamo dagiti annakyo; wenno ipalubos nga aglabsingda iti linteg ti Dios, ken agkakabil ken agaapa ti tunggal maysa, ken agpaay iti sairo, nga isu ti pangulo ti basol, wenno dakes nga espiritu a naibagan dagiti ammatayo a kabusor ti amin a kinalinteg.

  15 Ngem isuroyo ida a magna iti dalan ti kinapudno ken kinasimbeng; isuroyo ida nga agpipinnateg, ken agpaay iti tunggal maysa.

  16 Ken kasta met, a dakayo ti tumulong kadagiti makasapul iti tulongyo; ibinglayanyo iti taraon nga adda kadakayo dagiti makasapul; ket diyo ipalubos nga agpalama ken umararawdanto kadakayo nga awan kapapayanna, ket baybay-anyonto ida a mapukaw.

  17 Nalabit a kunaenyonto: Ti tao ti nangaramid iti kinapimpimanna; gapuna a yadayok ti imak, ket diak ikkan iti makan wenno ibinglayan iti taraon tapno saan nga agruam, ta nalinteg dagiti dusana—

  18 Ngem kunak kenka, O tao, siasino man a mangaramid iti kastoy addanto nabileg a panggapuanna nga agbabawi; ket no saan nga agbabawi iti dayta nga inaramidna, mapukawto a mamimpinsan, ket awanto ti lugarna iti pagarian ti Dios.

  19 Ta adtoy, saantayo, aya, a makilimlimos amin? Saantayo amin, aya, nga italek iti isu met laeng a Nabiag, nga isu ti Dios, ti amin a sanikua nga adda kadatayo, ti taraon ken pagan-anay, ken ti balitok, ken ti pirak, ken ti amin a kinabaknang nga adda kadatayo

  20 Ket adtoy, uray iti daytoy a kanito, aw-awaganyo ti naganna, ken idawdawatyo ti pannakapakawan ti basbasolyo. Ket pinaaynakayo kadin? Saan; imbukbokna ti Espirituna kadakayo, ket nakaragsakanna a pinunno dagiti pusoyo iti ragsak, ken kineppetna dagiti ngiwatyo tapno dikay makasao, ta nalaus unay ti ragsakyo.

  21 Ket ita, no ti Dios, a namarsua kadakayo, nga isu ti pangitaltalkanyo iti biagyo ken amin nga adda kadakayo, itedna kadakayo ti ania man a dawatenyo a nalinteg, a sipapammati, a mamati a makaawatkayo, O ngarud, nasken nga agbibinninglaykayo iti taraon nga adda kadakayo iti tunggal maysa.

  22 Ket no ukomenyo ti tao nga umar-araraw kadakayo para iti taraonyo tapno saan a maungaw, ket babalawenyo, nakarkaro la ketdi nga amang ti pannakaipakan ti linteg a mangbabalaw kadakayo gapu iti panangipaidamyo iti taraonyo, a saanyo a kukua no di ket kukua ti Dios, nga isu ti akinkukua iti biagyo; nangruna no dikay immararaw, wenno nagbabawi man la koma kadagiti banag a naaramidyo.

  23 Kunak kadakayo, asi pay dayta a tao, agsipud ta kakuyogna a mapukaw dagiti sanikuana; ket ita, ibagak dagitoy a banag kadakuada a nasaliwanwan kadagiti banag nga adda iti daytoy a lubong.

  24 Ket manen, kunak kadagiti nakurapay, dakayo nga awanan ngem ketdi addaan iti umdas, tapno agbiag iti inaldaw; kayatko a sawen a dakayo amin a saan a nangikaso iti agpalpalama ta awanankayo; kayatko a sawenyo iti pusoyo: saanak a nangted ta awananak, ngem mangtedak no addaanak.

  25 Ket ita, no kunaenyo dagitoy a sipupuso, agtalinaedkayo a nadalus, ket no saan makedngankayo; ket nainkalintegan ti pannakakednganyo ta agumanyo ti saanyo pay a naawat.

  26 Ket ita, gapu kadagitoy banag a nasaok kadakayo—a, gapu iti panagtultuloy ti pannakaugas ti basbasolyo iti inaldaw, tapno dumatagkayo nga awanan basol iti Dios—kayatko a masapul a mangtedkayo iti sanikuayo kadagiti napanglaw, iti tunggal tao a mayannatup iti adda kenkuana, kas iti panangpakan iti mabisin, panangkawes iti lamulamo, panangsarungkar iti masakit ken panangipaay iti naespirituan ken naindagaan a pakalag-ananda, a mayannatup iti pakasapulanda.

  27 Ket penkenyo a maaramid amin dagitoy a banag a nainsiriban ken naurnos; agsipud ta saan a masapul nga agtaray ti tao iti naparpardas ngem iti kabaelanna. Ket manen, nasken a naregta tapno magun-odna ti gunggona; gapuna, amin a banag nasken a naurnos ti pannakaaramidna.

  28 Ket kayatko a nasken a laglagipenyo, a siasino man kadakayo ti bimmulod iti kaarrubana, masapul nga isublina ti banag a binulodna, a maibatay iti nakitulaganna, wenno dakayo ti agbasol; wenno mapabasolyo met ti kaarrubayo.

  29 Ket kamaudiananna, saanko a maibaga kadakayo ti amin a banag a mabalin a pagbasolanyo; agsipud ta adda dagiti nadumaduma a dalan ken pamuspusan, nga adu unay ket diak ida mabilang.

  30 Ngem daytoy laeng ti makunak kadakayo, a no saanyo nga annadan ti bagbagiyo, ken ti pampanunotyo, ken ti sasaoyo, ken ti aramidyo, ken tungpalen dagiti bilin ti Dios, ken panagtultulnogyo iti pammati a nangngeganyo maipapan iti yaay ti Apotayo, agpapan pay iti kamaudianan ti biagyo, masapul a mapukawkayo. Ket ita, O tao, laglagipem, ket saanka a mapukaw.