Mau parau ’ōmuara’a

E au mau taea’e here, e au mau tuahine here, ’ua tīa’i maoro noa mātou i te putuputu-fa’ahou-ra’a ia ’outou i roto i teie ’āmuira’a rahi nō ’Ātopa a te ’Ēkālesia. Fāri’i mai i te tāpa’o aroha o tō mātou ’ā’au, ia ’outou tāta’itahi. ’Ua māuruuru roa mātou i tā ’outou mau pure pāturura’a. Tē putapū nei mātou i tō te reira maita’i. Māuruuru !

’Ua māuruuru mātou nō tā ’outou mau tauto’ora’a rahi i te pe’era’a i te mau parau a’o i hōro’ahia i te ’āmuira’a rahi ’a ono ’āva’e i teienei. ’Ua ’imi te mau peresideni titi nā te ao nei i te heheura’a tei tītauhia nō te fa’anaho fa’ahou ā i te mau pupu peresibutero. Tē ha’a itoito nei te mau taea’e o teie mau pupu autahu’ara’a ’e tae noa atu i tō tātou mau tuahine itoito nō te Sōtaiete Tauturu, nō te aupuru i tō tātou mau taea’e ’e mau tuahine nā roto i te rāve’a teitei a’e ’e te mo’a a’e. E fa’aurura’a nō mātou tō ’outou maita’i ’e tā ’outou mau tauto’ora’a rahi e fa’atae i te here o te Fa’aora i tō ’outou mau ’utuāfare, mau ta’ata tupu ’e mau hoa, ’e nō te aupuru ia rātou mai tāna e rave.

Mai te ’āmuira’a nō ’Ēperēra ra, ’ua fārerei māua te tuahine Nelson i te mau melo i ni’a e maha fenua rahi ’e te mau motu o te moana. Mai Ierusalema i Harare, mai Winnipeg i Bangkok, ’ua ’ite māua i tō ’outou fa’aro’o rahi ’e te pūai o tō ’outou ’itera’a pāpū.

’Ua hope roa tō māua ’oa’oa i te rahira’a feiā ’āpī tei ’āmui mai i te nu’u feiā ’āpī a te Fatu nō te ha’aputuputu ia ’Īserā’ela i purara.¹ Te ha’amāuruuru nei māua ia ’outou ! ’E ’ia tāmau noa ’outou i te pe’e i tā’u mau anira’a tei hōro’ahia i te ha’apurorora’a nā te feiā ’āpī ’ati a’e i te ao nei, tē ha’amau ra ïa ’outou i te hō’ē reva nō te toe’a o mātou e pe’e atu. E ’ere te maita’i rahi nā ’outou te feiā ’āpī nei !

Te mau matahiti a’enei, ’ua taputō ri’i mātou te mau ’āpo’ora’a peresideni o te ’Ēkālesia i te uira’a rahi ē : nāhea mātou i te fa’atae i te ’evanelia ’e tōna ateate ’ōhie, nā reira ato’a te mau ’ōro’a ’e tō rātou maita’i mure ’ore, i te mau tamari’i ato’a a te Atua ?

Tātou te feiā mo’a i te mau mahana hope’a nei, ’ua mātau tātou i te feruri i te « ’ēkālesia » ’ei ’ohipa e tupu i roto i tō tātou mau fare purera’a, turuhia e te mau mea e tupu nei i te ’utuāfare. Tītauhia te tahi fa’atanora’a nō teie mea. ’Ua tae te taime nō te hō’ē ’Ēkālesia fa’atumuhia i ni’a i te ’utuāfare, turuhia e te mau mea e tupu i roto i tō tātou mau fare ’āma’a, pāroita ’e titi.

Tē tāmau noa nei te ’Ēkālesia i te ’ā’ano nā te ao nei, e rave rahi melo e ora ra i te mau vāhi ’aita e fare purera’a—’e e’ita iho ā paha i te mau mahana i muri nei. Tē ha’amana’o nei au i te hō’ē ’utuāfare, nō tō rātou vaira’a, tītauhia ’ia putuputu rātou i tō rātou iho fare. ’Ua ui atu vau i te metua vahine e aha te huru te haerera’a i te purera’a i tōna iho fare. ’Ua nā ’ō mai ’oia : « E mea au ! » ’Ua maita’i roa mai te huru paraparau a tō’u hoa i te fare nei, i’ō nei ho’i ’oia e ha’amaita’i ato’a ai i te ’ōro’a i te sābati tāta’itahi. »

Te fā o te ’Ēkālesia e mea maoro i teienei, ’o te tauturura’a ïa i te mau melo ato’a ’ia fa’arahi i tō rātou fa’aro’o i tō tātou Fatu Iesu Mesia ’e i tāna tāra’ehara, ’ia tauturu ia rātou ’ia rave ’e ’ia ha’apa’o i tā rātou mau fafaura’a ’e te Atua ’e ’ia ha’apūai ’e ’ia tā’ati ho’i i tō rātou ’utuāfare. I roto i teie orara’a ’ātitirau (complexe), e ’ere i te mea ’ōhie. Tē fa’arahi noa atu ra te ’enemi i tāna ’arora’a i te fa’aro’o ’e ia tātou nei ’e i tō tātou mau ’utuāfare, ’ua ’ū’ana roa. Nō te oraora i te pae vārua, tītauhia te tahi fa’anahora’a e pāto’i atu i te reira, nā reira ato’a te ’ohipa itoito roa. Nō reira, ’ua hina’aro mātou e rave i te tahi mau fa’atanora’a e ha’apūai atu ā i tō tātou mau melo ’e tō rātou ’utuāfare.

E rave rahi matahiti tō te feiā fa’atere o te ’Ēkālesia ha’ara’a i ni’a i te hō’ē fa’anahora’a ha’api’ira’a e ha’apūai i te mau ’utuāfare ’e te ta’ata hō’ē nā roto i te hō’ē fa’anahora’a e fa’atumuhia i ni’a i te ’utuāfare ’e ’o tei turuhia e te ’Ēkālesia, nō te ’apo i te ha’api’ira’a tumu, nō te ha’apūai i te fa’aro’o ’e nō te fa’arahi a’e i te ha’amorira’a a te ta’ata hō’ē. E riro tā tātou mau tauto’ora’a i te mau matahiti a’enei nō te fa’atura i te Sābati—nō te fa’ariro i te reira ’ei mahana hina’arohia ’e ’ei tāpa’o i te Atua nō tō tātou iho here iāna—i te mara’a atu ā i teie mau fa’atanora’a e vauvauhia atu i teienei.

I teie po’ipo’i, e fa’aara atu mātou i te hō’ē ’aifāitora’a ’āpī ’e te tū’atira’a ’āpī i roto i te ha’api’ira’a ’evanelia i te ’utuāfare ’e i te ’Ēkālesia. Tei ia tātou tāta’itahi te hōpoi’a nō tō tātou iho tupura’a pae vārua. ’E tē ha’apāpū roa nei te mau pāpa’ira’a mo’a ē, tei te mau metua te hōpoi’a mātāmua e ha’api’i i te ha’api’ira’a tumu i tā rātou mau tamari’i.² ’O te hōpoi’a a te ’Ēkālesia te tauturura’a i te melo tāta’itahi i roto i te fā tei ha’amauhia e te Atua, ’ia fa’arahi i tōna ’ite i te evanelia.

I teienei, e fa’ata’a mai ’o Elder Quentin L. Cook i teie mau fa’atanora’a faufa’a rahi. ’Ua tāhō’ē te mau melo ato’a o te ’Āpo’ora’a o te Peresidenira’a Mātāmua ’e te pupu nō te Tino ’Ahuru Ma Piti ’āpōsetolo nō te ha’amana i tāna mau parau. Mā te māuruuru, tē fā’i nei mātou i te fa’aurura’a nō ’ō mai i te Fatu tei arata’i i te hāmanira’a i te mau fa’anahora’a ’e te mau terera’a ’ohipa e vauvauhia mai e Elder Cook.

Te mau taea’e e te mau tuahine here ē, ’ua ’ite au tē ora nei te Atua ! ’O Iesu te Mesia ! ’O teie tāna ’Ēkālesia ’o tāna e arata’i nei nā roto i te tohura’a ’e te heheura’a i tāna mau tavini ha’eha’a. Tē faʼaʼite pāpū atu nei au i te reira i te i’oa o Iesu Mesia, ’āmene.