’Ohipa misiōnare : Fa’a’itera’a i te mea i roto i tō ’outou ’ā’au

Terā rā, hou ’a ’eu ai tātou i te hō’ē faraoa monamona, ’a ueue ai i te hu’ahu’a fa’anehenehe, ’e ’a ha’apoupou ai ia tātou iho nō taua manuiara’a fa’ahiahia ra, e mea maita’i ’ia hi’o ātea tātou i te reira tupura’a.

Te vai nei e hitu miria ’e te āfa rahira’a ta’ata i roto i te ao nei, fa’aauhia i te 16 mirioni melo o te ’Ēkālesia a Iesu Mesia i te Feiā Mo’a i te mau Mahana Hope’a nei—’oia mau, e nana iti ha’iha’i roa.¹

’Āre’a te rahira’a ta’ata ti’aturi keretetiano i roto i te tahi mau tuha’a o te ao nei, te iti atura ïa.²

I roto ato’a i te ’Ēkālesia a te Fatu i fa’aho’i-fa’ahou-hia mai—’a tāmau noa ai te fāito melo i te mara’a—e mea rahi roa te melo ’aita e tītau nei i te mau ha’amaita’ira’a o te haere-tāmau-ra’a i te purera’a.

Te aura’a, noa atu te vāhi tā ’outou e pārahi ra i te fenua nei, ’ua rau te mau rāve’a nō te fa’a’ite i te parau ’āpī maita’i³ o te ’evanelia a Iesu Mesia i te mau ta’ata tā ’outou e fārerei, e tuatāpapa, ’e e ora ’e e rave i te ’ohipa ’e o rātou, ’e e ha’amātau ia rātou.

I te roara’a o teie matahiti i ma’iri a’e nei, ’ua fāri’i au i te rāve’a fa’ahiahia i te ’āmuira’a atu i roto i te ’ohipa misiōnare a te ’Ēkālesia nā te ao ato’a nei. ’Ua feruri hōhonu pinepine au ’e ’ua pure nō ni’a i te fa’auera’a rahi a te Fa’aora i tāna mau pipi : « E teie nei, e haere ’outou e fa’ariro i te mau fenua ato’a ’ei pipi, ’a bāpetizo atu ai ia rātou i roto i te i’oa o te Metua, ’e nō te Tamaiti, ’e nō te Vārua Maita’i ».⁴

’Ua uiui noa vau i te uira’a ē, « Nāhea e ti’a ai ia tātou, ’ei melo ’e ’ei pipi nā te Mesia, ’ia fa’aoti maita’i a’e i taua fa’auera’a rahi ra i roto i tō tātou orara’a i te mau mahana ato’a ? »

I teie mahana tē ani nei au ia ’outou ’ia feruri ato’a i taua uira’a ra i roto i tō ’outou ’ā’au ’e tō ’outou ferurira’a.⁵

E rave rahi ’ahuru matahiti tō te feiā fa’atere o te ’Ēkālesia ha’apāpūra’a mai i te ta’i pū ra, « E misiōnare te mau melo ato’a ! »⁶

’Ua fa’a’ite te mau melo o te ’Ēkālesia a Iesu Mesia—i mūta’a ihora ’e i teie tau—ma te ’ana’anatae ’e te ’oa’oa, i te ’evanelia i te mau hoa ’e i te feiā mātauhia. ’Ua ’ama tō rātou ’ā’au i te ’itera’a pāpū nō Iesu Mesia, ’e tē hina’aro nei rātou ’ia fāri’i ato’a vetahi ’ē i te reira ’oa’oa tei ’itehia e rātou i roto i te ’evanelia a te Fa’aora.

E au ra ē, tē vai ra te tahi mau melo nō te ’Ēkālesia e ō tō rātou nō te reira ’ohipa. E mea au nā rātou ’ia riro ’ei mau ti’a nō te ’evanelia. Tē tāvini nei rātou ma te itoito ’e te ’oa’oa ’e tē fa’atere nei i te ’ohipa ’ei mau melo misiōnare.

Terā rā, te tahi atu pae o tātou, e mea ’ōti’ati’a ri’i ïa. ’Ia paraparau-ana’e-hia te ’ohipa misiōnare i roto i te mau putuputura’a a te ’Ēkālesia, e pi’o marū noa te mau upo’o i raro ē mo’e roa atu i muri mai i te pārahira’a, ma te rōtahi te mata i ni’a i te mau pāpa’ira’a mo’a ’aore rā, ’ua piri te mata i roto i te hō’ē māna’ona’ora’a hōhonu, ’eiaha ’ia ’ite atu i te mata o te tahi atu mau melo.

Nō te aha mai te reira ai ? Tē vai ra paha te mana’o fa’ahapa nō te ’orera’a e rave rahi atu nō te fa’a’ite i te ’evanelia. Tē vai ra paha te pāpū ’ore nāhea ’ia rave i te reira. ’Aore ra, tē ha’amā nei paha tātou ’ia haere nā rāpae i tō tātou vāhi au maita’i.

Tē ta’a nei au i te reira.

Terā rā ’a ha’amana’o na ē, ’aita roa te Fatu i tītau i te mau tauto’ora’a ’ohipa misiōnare ’aravihi ’e te hapehape ’ore. Terā rā, « tē tītau nei te Fatu i te ’ā’au ’e te mana’o ’ana’anatae »⁷

Mai te mea ē, tē rave nei ’outou i te ’ohipa misiōnare ma te ’oa’oa, ’a tāmau noa mai te reira, ’e ’a ti’a ’ei hi’ora’a nō vetahi ’ē. E ha’amaita’i mai te Fatu ia ’outou.

Mai te mea rā ē, tē mana’o ra ’outou ē, tē fa’atautau ra ’outou ’ia fa’a’ite i te parau poro’i o te ’evanelia, tē hina’aro nei au e hōro’a atu ia ’outou e pae mana’o fa’ahapa ’ore e nehenehe te mau ta’ata ato’a e rave nō te ’āmui atu i roto i te fa’auera’a rahi a te Fa’aora ’ia tauturu i te ha’aputuputura’a ia ’Īserā’ela.

’A tahi, ha’afātata atu i te Atua. Te ture mātāmua ’e te rahi, ’o te herera’a ïa i te Atua.⁸ Te tumu mātāmua ïa i tae mai ai tātou i te fenua nei. ’A ui ia ’outou iho, « tē ti’aturi mau ra ānei au i te Metua i te ao ra ? »

« Tē here ra ānei au ’e tē ti’aturi ra ānei au iāna ? »

Rahi atu tō ’outou ha’afātatara’a i tō tātou Metua i te ao ra, rahi ato’a atu tōna māramarama ’e te ’oa’oa i te ’ana’ana i roto ia ’outou. E ’ite mai vetahi ē, tē vai ra hō’ē mea ta’a ’ē i roto ia ’outou. ’E e ui rātou nō ni’a i te reira.

Te piti, fa’a’ī i tō ’outou ’ā’au i te here nō vetahi ’ē. ’O te ture piti ïa ’e te rahi teie.⁹ ’A tāmata i te hi’o mau i te mau ta’ata ato’a ’āti a’e ia ’outou ’ei tamari’i nā te Atua. ’A aupuru ia rātou—ma te hi’o ’ore, tei ni’a ānei tō rātou i’oa ’aore rā ’aita, i tā ’outou tāpura tuahine ’aore rā, taea’e aupuru.

’A ata ’e o rātou. ’A ’oa’oa ’e o rātou. ’A ’oto ’e o rātou. ’A auraro ia rātou. ’A fa’aora, ’a fa’ateitei, ’e ’a ha’apūai ia rātou.

’A tūtava i te fa’ahōho’a i te here o te Mesia ’e ’a aroha ia vetahi ’ē—terā ato’a feiā e ’ere i te mea maita’i i ni’a ia ’outou, ’o te tāhitohito mai ia ’outou ’e ’o te hina’aro e hāmani ’ino ia ’outou. ’A here ia rātou ’e ’a fa’ariro ia rātou ’ei mau tamari’i nā te Metua i te ao ra.

Te toru, ’a tūtava ’ia haere nā ni’a i te ’ē’a o te ti’ara’a pipi. ’Ia rahi ana’e tō ’outou here i te Atua ’e i tāna mau tamari’i, e nā reira ato’a tō ’outou hina’aro ’ia pe’e ia Iesu Mesia.

E ha’api’i mai ’outou nō ni’a i tōna haere’a nā roto i te poupoura’a i tāna parau ’e te ha’apa’ora’a ’e te fa’a’ohipara’a i te mau ha’api’ira’a a te mau peropheta ’e te mau ’āpōsetolo. E tupu ’outou i te rahi i roto i te ti’aturi ’e te itoito nō te pe’e i tōna haere’a ’a tureia ai ’outou i te Metua i te Ao ra ma te ’ā’au fāri’i i te ha’api’ira’a.

Tītauhia ’ia ha’api’ipi’i i te haere nā te ’ē’a o te ti’ara’a pipi—i te mahana tāta’itahi, ma te marū noa, « mai te aroha i te aroha »,¹⁰ « ’ua a’o ’e ’ua nā ni’a iho i te a’o ».¹¹ I te tahi taime e piti ta’ahira’a i mua ’e hō’ē ta’ahira’a i muri.

Te ’ohipa faufa’a ’oia ho’i, ’eiaha e fa’aru’e ; a tāmau noa i te fa’aoti maita’i. Tē vai ra te taime e maita’i a’e ’outou, e ’oa’oa a’e, ’e e ta’ata mau. E riro mai te paraparaura’a ia vetahi ’ē nō ni’a i tō ’outou fa’aro’o ’ei ’ohipa mātarohia ’e te ’ōhie. E riro mau te ’evanelia ’ei tuha’a faufa’a ’e te tao’a rahi nō tō ’outou orara’a, ’e nō reira, e ’ere ïa i te mea tano roa ’ia ’ore e paraparau i te reira ia vetahi ’ē. E’ita paha te reira e tupu ’oi’oi—e tauto’ora’a te reira nō te orara’a tā’āto’a. Terā rā, e tupu te reira.

Te maha, fa’a’ite i te mea i roto i tō ’outou ’ā’au. ’Aita vau e ani nei ’ia ti’a ’outou i te hō’ē peho o te purūmu ’e te hō’ē micro, ’e ’a tutuo ai i te mau ’īrava o te Buka a Moromona. Tā’u e ani nei o te ’imira’a ïa ’outou i te mau taime ato’a i te mau rāve’a nō te fa’a’ite i tō ’outou fa’aro’o i roto i te mau fārereira’a i te ta’ata ma te ’ōhie ’e te au māite. Tē ani nei au ’ia « ti’a ’outou ’ei mau ’ite »¹² nō te mana o te ’evanelia i te mau taime ato’a—’e mai te mea e tītauhia, ’a fa’a’ohipa i te parau.¹³

Nō te mea ho’i ē, « te ’evanelia a te Mesia … o te mana ïa o te Atua, ’ia ora te feiā ato’a i fa’aro’o ra », e nehenehe ïa ’outou e ti’aturi, e itoito, ’e e ha’eha’a, ’a fa’a’ite ai ’outou i te reira.¹⁴ Mai te huru ra ē, te ti’aturi, te itoito ’e te ha’eha’a, e mau huru teie ’aita rātou e tū’ati. Tē fa’a’ite nei te reira i te ani-manihini-ra’a a te Fa’aora ’eiaha e huna i te mau faufa’a ’e te mau parau tumu o te ’evanelia i raro a’e i te hō’ē pa’epa’e, e vaiiho rā i tō ’outou māramarama ’ia ’ana’ana, ’ia fa’ahanahana ho’i tā ’outou mau parau maita’i i tō ’outou Metua i te Ao ra.¹⁵

Tē vai ra e rave rahi rāve’a mātarohia ’e te au noa nō te rave i te reira, mai te mau ’ohipa maitata’i i te mau mahana ato’a e tae atu i tō ’outou iho ’itera’a pāpū i ni’a ia YouTube, Facebook, Instagram, ’aore rā, Twiter, ’e ’oia ato’a i te mau ’āparaura’a ’ōhie i te mau ta’ata tā ’outou e fārerei. I teie matahiti tē ha’api’i nei tātou i te Faufa’a ’Āpī i roto i tō tātou mau ’utuāfare ’e i roto i te Ha’api’ira’a Sābati. Terā ïa hō’ē rāve’a nehenehe roa nō te ani manihini i tō tātou mau hoa ’e te mau ta’ata tupu ’ia haere mai i te purera’a ’e i te fare nō te ha’api’i mai ’e o ’outou nō ni’a i te Fa’aora. ’A fa’a’ite ia rātou i te fa’anahora’a itenati nō te Gospel Library app, i reira e ’itehia ai ia rātou Mai, pe’e mai. Mai te mea ē, ’ua mātau ’outou i te feiā ’āpī ’e tō rātou ’utuāfare, ’a hōro’a ia rātou i te buka iti ra Nō te Pūai ’o te Feiā ’Āpī ’e e ani manihini ia rātou ’ia haere mai ’e ia hi’o e mea nāhea tō tātou mau feiā ’āpī ’ia tauto’o i te ora i te reira mau parau tumu.

Mai te mea ē, e ui mai hō’ē ta’ata ia ’outou i te huru o tō ’outou hope’a hepetoma, ’eiaha e taiā ’ia parau nō ni’a i te mau mea tā ’outou i fāri’i i te fare purera’a. ’A parau nō ni’a i te mau tamari’i na’ina’i o tei ti’a i mua i te ’āmuira’a ’a hīmene ai ma te ’ana’anatae e mea nāhea rātou i te tāmata ’ia riro mai ia Iesu te huru. ’A parau nō ni’a i te pupu feiā ’āpī tei hōro’a i te taime nō te tauturu i te feiā ruhiruhia i roto i te mau pū fa’afa’aeara’a nō te pāpa’i i tō rātou iho mau ’ā’amu. ’A parau nō ni’a i te tauira’a i tupu iho nei i roto i tā tātou mau putuputura’a i te sābati, ’e e mea nāhea te reira i te ha’amaita’i i tō ’outou ’utuāfare. ’E ’aore rā, ’a fa’ata’a ē, nō te aha tātou e ha’apāpū ai ē, teie te ’Ēkālesia a Iesu Mesia, ’e o tātou te Feiā Mo’a i te Mau Mahana Hope’a Nei, mai te mau melo o te ’Ēkālesia i mūta’a ihora i pi’ihia Feiā Mo’a.

’A fa’a’ite i te ta’ata, nā roto i te rāve’a ’ōhie ’e te au maita’i nō ’outou ē, nō te aha Iesu Mesia ’e tāna ’Ēkālesia i riro ai ’ei mea faufa’a nō ’outou. ’A ani ia rātou ’ia « haere mai, ’e ’ia hi’o ».¹⁶ I muri iho, ’a tauturu ia rātou ’ia haere mai ’e ’ia tauturu. ’Ua rau te mau rāve’a e vai ra nō te mau ta’ata ’ia tauturu i roto i tā tātou ’Ēkālesia.

’Eiaha ’ia pure noa ’ia ’ite te mau misiōnare i te mau ta’ata mā’itihia. ’A pure ra i te mau mahana ato’a i roto i tō ’outou ’ā’au ’ia ’itehia ia ’outou te feiā e haere mai’e e hi’o ’e e haere mai ’e e pārahi mai. E ha’amana’o noa i te mau misiōnare rave tāmau. E au rātou i te mau melahi, ’ua ineine nō te tauturu !

’A fa’a’ite ai ’outou i te parau ’āpī maita’i, te ’evanelia a Iesu Mesia, ’a rave ma te here ’e te fa’a’oroma’i. Mai te mea e ’ohipa tātou i pīha’i i te ta’ata ma te ti’aturi hō’ē roa ē, e’ita e maoro e ’ō’omo rātou i te ’ahu ’uo’uo, ’e ma te ani ē, teihea te vāhi bāpetizora’a fātata a’e, ’ua hape ïa tātou.

Te tahi mau ta’ata ’o tē haere mai ’e e hi’o, penei a’e e’ita roa atu rātou e ’āmui mai i te ’Ēkālesia; te tahi ra, i te tahi atu ïa taime. Tā rātou te reira mā’itira’a. ’Aita rā te reira e taui i tō tātou here ia rātou. ’E ’aita ato’a te reira e taui i tā tātou mau tauto’ora’a ’oa’oa ’ia ani manihini tāmau noa i te ta’ata ’e te mau ’utuāfare ’ia haere mai ’e ’ia hi’o, ’ia haere mai ’e ’ia tauturu, ’e ’ia haere mai ’e ’ia pārahi mai

Te pae, ’a ti’aturi i te Fatu nō te fa’atupu i tāna mau temeio. ’Ia pāpū maita’i ia ’outou ē, e ’ere nā ’outou e fa’afāriu i te ta’ata. E ’ohipa te reira nā te Vārua Maita’i. Tā ’outou o te fa’a’ite ïa i te mea i roto i tō ’outou ’ā’au ’e ’ia ora mai te au i tō ’outou mau ti’aturira’a.

Nō reira, ’eiaha e ha’aparuparu i te mana’o mai te mea ē, ’aita te hō’ē ta’ata e fāri’i i te parau poro’i o te ’evanelia i terā iho taime. E ’ere nō ’outou te manuia ’ore.

E ’ohipa te reira i roto i te ta’ata ’e te Fatu.

Tā ’outou o te herera’a i te Atua ’e i tō ’outou mau ta’ata tupu, tāna mau tamari’i.

Ti’aturi, here, e rave.

’A pe’e i teie ’ē’a, ’e e fa’atupu te Atua i te mau temeio nā roto ia ’outou nō te ha’amaita’i i tāna mau tamari’i tao’a rahi.

E tauturu teie nā mana’o tauturu e pae ia ’outou ’ia rave i te mea tā tē mau pipi a Iesu Mesia i rave i tahito ra. E tuha’a faufa’a mau tāna ’evanelia ’e tāna ’Ēkālesia nō tō ’outou orara’a ’e nō tō ’outou huru ’e nō te ’ohipa tā ’outou e rave ra. Nō reira, ’a ani ia vetahi ’ē ’ia haere mai, ’e ’ia hi’o ’e ’ia haere mai ’e ’ia tauturu, ’e e rave te Atua i tāna ’ohipa fa’aora, ’e e haere mai rātou ’e e fa’aea mai.

« Terā rā », e ui paha ’outou ē, « mai te mea ē, e rave au i teie mau mea ato’a, ’e ’aita te ta’ata e tau’a mai ? E mai te mea e fa’a’ino mai rātou i te ’Ēkālesia ? E mai te mea ē, ’aita rātou e fāri’i ? »

’Oia mau, e nehenehe te reira e tupu mai. Mai tahito mai, pinepine te mau pipi a Iesu Mesia i te hāmani-’ino-hia.¹⁷ ’Ua parau te ’āpōsetolo Petero, « e ’oa’oa rā i te mea te rave ato’a ra ’outou i te mau pohe o te Mesia ».¹⁸ ’Ua ’oa’oa te reira feiā mo’a « i te mea nō tōna i’oa i mana’ohia ai rātou e au ia rātou taua hāmani ’ino ra »¹⁹

’A ha’amana’o, e ravera’a māere tā te Fatu. Penei a’e, nā roto i tā ’outou pāhonora’a mai te huruMesia i mua i te pāto’ira’a, e tāmarūhia te hō’ē ’ā’au ’eta’eta.

Ei ’āpōsetolo nā Iesu Mesia, tē ha’amaita’i nei au ia ’outou i te ti’aturira’a ’ia riro ’ei fa’a’itera’a ora nō te mau faufa’a o te ’evanelia, ma te itoito ’ia ’ite-noa-hia ’outou i te mau taime ato’a ’ei melo nō te ’Ēkālesia a Iesu Mesia i te Feiā Mo’a i te mau Mahāna Hōpe’a nei, i te ha’eha’a ’ia tauturu i tāna ’ohipa ’ei tāpa’o fa’a’ite nō tō ’outou here i te Metua i te ao ra ’e i tāna mau tamari’i.

E au mau hoa here, e ’oa’oa ’outou ’ia ’ite ē, e tuha’a faufa’a ’outou i roto i te ha’aputuputura’a o ’Īsera’ela i tohu-ātea-hia, i roto i te fa’aineinera’a nō te ho’ira’a mai o te Mesia ma te « mana ’e te hanahana rahi ; ’e te mau melahi mo’a ato’a »²⁰

’Ua ’ite te Metua i te ao ra ia ’outou. ’Ua here te Fatu ia ’outou. E ha’amaita’i mai te Atua ia ’outou. Nāna i fa’aue mai i teie ’ohipa. E nehenehe ’outou e rave i teie. E nehenehe tā tātou pā’āto’a e rave ’āmui i te reira !

Te fa’a’ite pāpū nei au i te reira nā roto i te i‘oa o Iesu Mesia, ’āmene.