Mo Rogoci Koya

Kemuni na taciqu kei na ganequ lomani, au vakavinavinaka vakalevu, ni kena vakayagataki na tekinolaji, sa rawa kina meda soqoni vata ka sokalou ena mataka ni Siga Tabu oqo. Eda sa kalougata dina ni da sa kila na kosipeli i Jisu Karisito sa vakalesui mai ki vuravura!

Ena vica na macawa sa oti, e vuqa vei keda a sotava na veivakataotaki ki na noda dui bula yadua. Na uneune, kama, waluvu, mate ca, kei na kedra revurevu a vakataotaka na veituvatuva tudei ka vakavuna me lailai na kakana, veika gadrevi, kei na ilavo maroroi.

Ena ka kece oqo, ko ni sa vakacaucautaki ka vakavinavinakataki ni ko sa digitaka mo ni rogoca na vosa ni Kalou ena gauna voravora oqo mo ni duavata kei keimami ena koniferedi raraba. Na butobuto sa tubu cake tiko e lako vata mai kei na veika dredre sa mai ramase cake kina na rarama i Jisu Karisito. Meda vakasamataka mada na veika vinaka eda rawa ni cakava yadua ena gauna ni yavavala oqo e vuravura. Na nomu lomana ka vakabauta tiko na iVakabula sa rawa me yavubula vei koya me kila na Vakalesui mai ni taucoko ni kosipeli i Jisu Karisito.

Ena rua na yabaki sa oti, keirau a sotava kei Sister Nelson e udolu vei kemuni e vuravura taucoko. Keimami a soqo vata kei kemuni ena veivanua ni sarasara e tuba kei na ololevu ena veiotela. Ena vanua yadua oqo, au a vakila niu a tu vata kei ira na digitaki ni Turaga kau sa raica na kena vakasoqoni o Isireli ni sa yaco tiko.

Eda sa bula tiko ena siga “era a namaka tu ena yalo vakanuinui ko ira na noda qase.”¹ Eda sa tu sara ga qo e liu meda ivakadinadina bula kina na ka a raica o Nifai na parofita ena raivotu duadua ga, ni kaukauwa ni Lami ni Kalou ena sobuti ira mai “na nona tamata ni veiyalayalati na Turaga, ka ra sa veiseyaki tu e delai vuravura; ka ra sa vakaiyaragi tu ena ivalavala dodonu kei na kaukauwa ni Kalou ena lagilagi cecere.”²

Oi, kemuni na taciqu kei na ganequ, sai kemuni na tagane, yalewa, kei na gone, a raica o Nifai. Vakasamataka mada oya!

Se vei ga na vanua o tiko kina se kemu ituvaki, na Turaga o Jisu Karisito sa nomu iVakabula, kei na parofita ni Kalou, o Josefa Simici, sa nomuni parofita. A lesi taumada o koya ni bera ni tauyavu na vuravura oqo me mai parofita ni iotioti ni itabagauna oqo, ni “sega ni vunitaki tiko e dua tale na ka”³ mai vei ira na Yalododonu. Sa savu tikoga mai na ivakatakila mai vua na Turaga ena kena tomani tiko na Vakalesui Mai.

Na cava na kena ibalebale vei iko ni sa vakalesui mai na kosipeli i Jisu Karisito ki vuravura?

Sa kena ibalebale ni sa rawa vei iko kei nomu vuvale mo dou vauci vata me tawamudu! Sa kena ibalebale ni vuku ga ni ko sa papitaiso mai vua e dua sa tu vua na lewa maivei Jisu Karisito ka sa vakadeitaki mo lewe ni Nona Lotu, sa rawa mo rekitaka na itokani wasoma ni Yalo Tabu Ena dusimaki iko ka taqomaki iko. Sa kena ibalebale ni sa sega tale mo tawavakacegui se sega tale ni yali maivei iko na kaukauwa ni Kalou me vukei iko. Sa kena ibalebale ni kaukauwa ni matabete ena vakalougatataki iko ni ko sa ciqoma na cakacaka vakalotu bibi ka cakava nomu veiyalayalati vua na Kalou ka maroroya tiko. Sa dua na iyaqa cecere sara ki yaloda na dina oqo, vakabibi ena gauna vakaoqo ni dau ravu mai na cava.

Sa tukuna tiko na iVola i Momani na kena tubu cake sara kei na nodrau vakarusai e rua na itabatamata qaqa. Na kedrau itukutuku a vakaraitaka na kena rawarawa ki na vuqa vei ira na tamata mera guilecava na Kalou, cata na nodra ivakaro na parofita ni Turaga, ka ra vakasaqara na kaukauwa, mera tamata rogo, kei na marau ni yago.⁴ Sa vakavuqa tiko mai, nodra kaya na parofita “na veika lelevu ka talei vei ira na tamata, ia era sa sega ni vakabauta.”⁵

E sega ni duidui ki na noda siga nikua. Ena veiyabaki, na veika cecere ka talei sa dau rogoci ena itutu ni vunau vakatabui e vuravura raraba. Ia e vuqa na tamata era sega ni ciqoma na dina oqo—ena vuku ni nodra sega ni kila na vanua mera raica kina⁶ se baleta ni ra vakarorogo tiko vei ira e sega vei ira na dina taucoko se baleta ga ni ra cata na dina ka vinakata ga na sasaga vakavuravura.

Sa vuku sara o vunimeca. Ena vuku ni milenia sa cakava tiko o koya me rairai butobuto na vinaka kei na butobuto me rairai vinaka.⁷ Na nona itukutuku e dau rogolevu, kaukauwa, ka dokadoka.

Ia, na itukutuku maivei Tamada Vakalomalagi sa duidui ka veilauti sara. E rawarawa, malua, ka matata sara ka veilaveti nona vosa mai e veivakurabuitaki ka da sega ni lomatarotaki Koya.⁸

Me vaka, ni gauna e dau vakatakila mai na Luvena Duabau Ga vei ira na tamata e vuravura, sa dau cakava oKoya ena vica wale na vosa momona. Ena Ulunivanua ni Vakamataliataki vei Pita, Jemesa, kei Joni, a kaya kina na Kalou, “Oqo na noqu Gone ni toko: dou rogoci koya.”⁹ Na Nona vosa vei ira na Nifaiti e Vanuasautu makawa a kaya “Raica oqo na Luvequ Daulomani ni toko, kau sa dau vinakata vakalevu, sai koya sa vakalagilagi kina na yacaqu—mo dou rogoci koya.”¹⁰ Ki vei Josefa Simici, ena ivakaro raraba cecere a dola kina na itabagauna oqo, a kaya ga kina na Kalou, “Oqo na Luvequ Lomani. Mo Rogoci Koya!”¹¹

Ia oqo, taciqu kei na ganequ lomani, ni raica na dina ena tolu na gauna oqo sa tukuni oti toka, ni bera nona vakatakila mai na Tamana na Luvena, o ira na tamata era a tiko rerere ka, so ena so na gauna era a veilecayaki sara.

Era a rere na iApositolo ni ratou sa raici Jisu Karisito ni sa voliti ena dua na o ena Ulunivanua ni Vakamataliataki.

Era a rere na Nifaiti baleta ni ra se qai sotava oti ga na veivakarusai kei na butobuto ena vica na siga.

A sotava o Josefa Simici na ivesu kaukauwa ni butobuto ni bera ni dola mai ko lomalagi.

Sa kila tu na Kalou ni gauna e voliti keda kina na veilecayaki kei na rere, na ka ena vukei keda vakalevu sara o ya ni da rogoca na Luvena.

Ena vuku ga ni da saga meda rogoca—rogoca vakaidina—na Luvena, eda na dusimaki meda kila na ka meda cakava ena ituvaki cava ga.

Na imatai sara ga ni vosa ena Vunau kei na Veiyalayalati o ya na dou vakatudaliga.¹² Sa kena ibalebale meda vakarorogo ka kena inaki meda talairawarawa.”¹³ Na vakatudaliga e kena ibalebale meda “Rogoci Koya”—meda rogoca na veika e kaya na iVakabula oti meda qai muria na Nona ivakasala. Ena rua na vosa oqori— “Rogoci Koya”—sa solia mai na Kalou vei keda na ituvatuva ni rawa-ka, marau, kei na reki ena bula oqo. Meda sa rogoca na vosa ni Turaga, vakatudaliga kina ka muria na veika sa kaya vei keda o Koya!

Ni da sa tisaipeli i Jisu Karisito, sa gadrevi sara ki na noda sasaga meda rogoci Koya me sa lomada sara. Ena taura na vakasama donu kei na sasaga gugumatua meda vakasinaita noda bula e veisiga ena Nona vosa, Nona veivakavulici, Nona dina.

Eda na sega walega ni vakararavi ki na itukutuku eda sota kaya ena itukutuku raraba. Ni sa tu e bilioni na vosa ena onolaini kei na vuravura curumiwai ena volivolitaki sa vakavulotaki ena sasaga kosakosa, ka vakatani nei vunimeca, meda sa qai gole beka kivei meda rogoci Koya kina?

Sa rawa meda gole ki na ivolanikalou. Era vakavulica vei keda na veika baleti Jisu Karisito kei na Nona kosipeli, na vakaitamera ni Nona Veisorovaki, kei na ituvatuva cecere ni marau kei na veivueti nei Tamada. Na tabadromuci e veisiga ena vosa ni Kalou sa bibi sara baleta na vakabulai vakayalo vakabibi ena iotioti ni gauna oqo sa voravora cake tikoga. Ni da sa kana magiti ena vosa i Karisito e veisiga, na vosa i Karisito ena tukuna vei keda na sala meda sabaya kina na veika dredre eda a sega ni namaka meda sotava.

Sa rawa talega meda Rogoci Koya ena loma ni valetabu. Na vale ni Turaga sa dua na vale ni vuli. E kea ena veivakavulici na Turaga na Nona sala. E kea na cakacaka vakalotu yadua ena vakavulica na veika ni iVakabula. E kea eda vulica kina na sala meda na tawasea na ilati ka veivosaki vakamatata kei lomalagi. E kea eda na vulica kina na sala meda vunauca kina na vunimeca ka taura na kaukauwa ni matabete ni Turaga me vaqaqacotaki keda kei ira eda lomana. E dodonu vakacava vei keda yadua meda vakasaqara vagumatua meda vakarurugi e kea.

Ni sa vagalalataki na vakatatabu tu-vakawawa oqo ni COVID-19, yalovinaka ni vakarautaka e dua na gauna tudei ni sokalou kei na veiqaravi e valetabu. Na veiminiti yadua ni gauna o ya ena vakalougatataki iko kei na nomu vuvale ena sala eso e sega ni rawata e dua tale. Taura na gauna mo tugana na ka o sa rogoca ka vakila ena gauna o sa tiko kina e kea. Kerea vua na Turaga me vakavulici iko ena sala mo dolavi lomalagi kina me vakalougatataka nomu bula kei na nodra bula eso o lomana ka qarava.

Me vaka ni sokalou e valetabu e sega ni vakayacori tiko, au sa sureti kemuni mo ni vakalevutaka nomuni vakaitavi ena tuva kawa, kei na vakadidike ni tuva kawa kei na kena tuvai vakamatanivola. Au yalataka ni ko vakalevutaka nomu gauna ena cakacaka ni valetabu kei na tuva kawa, o na vakalevutaka ka vakatorocaketaka nomu rawa ni rogoci Koya.

Eda sa Rogoci Koya talega vakamatata ni da vakadodonutaka noda rawa ni kila na vakasolokakana ni Yalo Tabu. Se bera mada ni bau veivakauqeti cake me kilai na sala e vosa kina na Yalo vei iko me vakataka ena gauna oqo. Ena Lewe Tolu Vakalou, na Yalo Tabu sa italai. Ena kauta mai na vakanananu ki na nomu vakasama e gadreva na Tamada kei na Luvena mo na ciqoma. Sai Koya na Dauveivakacegui. Ena kauta mai e dua na yalo ni vakacegu ki na yalomu. Sa vakadinadinataka na dina ka na vakadeitaka na ka dina ni ko rogoca ka wilika na vosa ni Turaga.

Au sa vakavoutaka na noqu kerekere ena ka mo cakava se cava ga ena taura me vakalevutaka nomu gugumatua vakayalo mo ciqoma kina na nomu ivakatakila.

Ni ko cakava oqo ena vukea mo kila na sala mo toso kina ki liu ena nomu bula, na ka mo cakava ena gauna dredre, ka kila rawa ka levea na veitemaki kei na lawaki nei vunimeca.

Ka, kena iotioti, eda sa rogoci Koya ni da rogoca na nodra vosa na parofita, daurairai, kei na dauvakatakila. O ira sa tabaki mera iApositolo i Jisu Karisito era sa dau vakadinadinataki Koya. Era sa dusimaka na sala ni da lako curuma yani na ituvatuva rarawa ni noda bula vakayago.

Na cava beka ena yaco ni ko rogoca, vakatudaliga, ka muria na ka e kaya na iVakabula kei na ka e tukuna o Koya ena gauna oqo maivei ira na Nona parofita? Au yalataka ni ko na vakalougatataki ena ikuri ni kaukauwa mo sabaya kina na veitemaki, veika dredre, kei na malumalumu. Au yalataka na cakamana ena nomu bula vakamau, veiwekani vakavuvale, kei na cakacaka ena veisiga. Kau sa yalataka ni nomu gugumatua mo vakila na reki ena vakalevutaki ke yaco mada ga na veika voravora ki na nomu bula.

Na koniferedi raraba ni Epereli 2020 sa gauna meda vakananuma kina e dua na ka e yaco ka veisau kina ko vuravura. Ni da vakanamata tu ki na vakananumi ni 200 na yabaki ni Matai ni Raivotu nei Josefa Simici, keitou vakasamataka vakatitobu na Mataveiliutaki Taumada kei na Matabose ni Kuoramu ni Apositolo Le Tinikarua na veika meda cakava me vakananumi kina vakamatau e dua na ka oqo.

Na rairai mai vakalou oqo e tekivuna na Veivakalesui mai ni taucoko ni kosipeli i Jisu Karisito ka dolava na tabagauna ni taucoko ni gauna.

Keitou vakasamataka kevaka e gadrevi me caka e dua na ivakatakarakara. Ni da vakasamataka na matalia ni itukutuku vakairogorogo kei na revurevu ni Matai ni Raivotu vakararaba, keitou vakila me caka e dua na ivakananumi ka sega ena vatu ia ena vosa—na vosa ni vakaro e vakatabu—me volai, e sega ni ceuti ena “dela ni vatu” ia e ceuti ena “lewe ni utoda”.¹⁴

Mai na gauna e tauyavu kina na Lotu, e lima walega na ivakaro e sa soli yani, na kena iotioti “Na Matavuvale: Ai Vakaro ki Vuravura Raraba,” e vakaraitaka mai io Peresitedi Gordon B. Hinckley ena 1995.

Oqo ni da vakasamataka na veigauna bibi oqo ena itukutuku kei vuravura kei na ivakaro ni Turaga me vakasokumuni ko Isireli ena vakavakarau ni Karua ni Lako Mai nei Jisu Karisito, kei sa mai soli yani kina o keitou, na Mataveiliutaki Taumada kei na Matabose ni iApositolo Le Tinikarua. Raica na “Na Vakalesui Mai ni Taucoko ni Kosipeli i Jisu Karisito: A iVakaro ni Ruanadrau na Yabaki ki Vuravura.” E volai mai Na Mataveiliutaki kei na Matabose ni iApositolo Le Tinikarua ni Lotu i Jisu Karisito ni Yalododonu Edaidai. Ena Epereli 2020. Ena vakavakarau ki na siga nikua, e katoni na ivakaro oqo ena Veikau Tabu, ka raica ki na o Josefa Simici na Tamada kei na Luvena.

Keitou sa vakaraitaka yani me kilai ni lomani ira na Luvena e veiyasai vuravura na Kalou. Sa solia vei keda na Kalou na Tamada na Luvena lomani, ka sucu vakalou, sega ni vakatautauvatataki rawa na nona bula, kei na veisorovaki nei Jisu Karisito. Ena kaukauwa nei Tamada, e tucake rawa kina o Jisu ka rawata na qaqa mai na mate. Sa noda iVakabula, noda iVakaraitaki, kei na noda Dauveivueti.

Ena rua na drau na yabaki sa oti, ena dua na mataka totoka ni vula itubutubu ni 1820, ena nona vakasaqaqara o Josefa Simici ni se cauravou na lotu me lewena, e lako yani ki veikau e voleka ki nodratou, mai Niu Ioka, Amerika me masu. E a tiko na nona vakatataro o koya me baleta na veivakabulai ni yalona ka nuitaka tu ni na vukei koya na Kalou.

Ena yalo ni vakarokoroko, keitou cauraka yani me isau ni nona masu, e rairai mai vei Josefa, na Kalou na Tamada kei na Luvena, o Jisu Karisito ka qai vakamacalataka na ‘vakaleslui mai ni veika kecega’ (Cakacaka 3:21) me vaka sa tukuni tu ena iVola Tabu. Ena raivotu oqo, e vulica kina o koya, ena gauna era mai mate kina na iApositolo taumada, sa mai yali e vuravura na Lotu ena Veiyalayalati Vou nei Karisito. Ena tiki ni kena vakalesui mai o Josefa.

Keitou vakadeitaka ena veidusimaki ni Tamada kei na Luvena, e lako mai na italai vakalomalagi ka vakaroti Josefa me tauyavutaka na Lotu i Jisu Karisito. E vakalesuya mai o Joni na Dauveipapitaisotaki na lewa ni papitaiso ena tabadromuci e wai me bokoci kina na ivalavala ca. E vakalesuya mai e tolu vei iratou na tinikarua na iApositolo taumada—o Pita, Jemesa, kei Joni—na itutu vaka iapositolo kei na idola ni lewa vakamatabete. Era lako talega mai eso tale, e wili kina o Ilaijia, ka vakalesuya mai na dodonu me semai vata na matavuvale me tawamudu ena isema tawamudu ka uabaleta na mate.

Keitou vakadinadinataka talega ni soli vei Josefa Simici na isolisoli kei na kauwakauwa ni Kalou me vakadewataka na itukutuku makawa: na iVola i Momani—E Dua Tale na iVakadinadina kei Jisu Karisito. Na draunipepa ni itukutuku vakatabui oqo e wili kina e dua na itukutuku me baleta na nona veiqaravi o Jisu Karisito vei ira na tamata ena tai kadua ni vuravura ni oti saraga na Nona Tucake tale mai na Mate. E vakatavulica na inaki ni bula ka vakamacalataka na ivakavuvuli nei Karisito, ka sa iusutu ni Nona inaki. Na iVola i Momani e ivolanikalou veitokoni ki na iVola Tabu, e vakadinadinataka ni tamata kece sara e luvena yalewa se tagane na Tamada Vakalomalagi dauloloma, ka tiko e dua na Nona ituvatuva vakalou ni noda bula, ka vosa tiko vei keda nikua na Luvena, o Jisu Karisto me vaka na veigauna makawa.

Keitou cauraka yani ni Lotu i Jisu Karisito ni Yalododonu Edadai, ka tauyavutaki ena 6 ni Epereli, 1830, sa Lotu ena Veiyalayalati Vou nei Karisito ka sa vakalesui mai. Sa itakele ni Lotu na bula uasivi ni vatu i vakadei, o Jisu Karisito, kei na Nona Veisorovaki kei na Tucaketale mai na Mate. Sa kacivi ira tale ena gauna oqo na iApositolo o Jisu Karisito ka sa solia vei ira na lewa ni matabete. Sa sureti keda kece meda lako mai Vua kei na Nona Lotu, ka ciqoma na Yalo Tabu, na cakacaka vakalotu ni veivakabulai, ka rawata na reki tawamudu.

Sa mai sivi e rua na drau na yabaki mai gauna ni Veivakalesui mai, mai vua na Kalou na Tamada kei na Luvena Lomani, o Jisu Karisito. E milioni e vuravura raraba sa ciqoma na kila me baleta na veigauna ka parofisaitaki oqo.

Keitou cauraka yani ni Veivakalesui mai yalataki e yaco tikoga ena ivakatakila. Ena sega tale ni tautauvata na vuravura, ni “sa kumuna me dua bau na veika kecega vei Karisito.” (Efeso 1:10).

Ena vakarokoroko kei na vakavinavinaka, keitou sa mai veisureti na Nona iApositolo mo ni kila—me vaka keitou sa kila—ni sa tadola tu ka lomalagi. Keitou vakadeitaka ni sa vakatakila tiko na Nona lewa na Kalou me baleti ira na luvena yalewa kei na tagane lomani. “Keitou vakadinadinataka ni o ira sa vulica ena masumasu na itukutuku ni Vakalesui mai ka cakacaka ena vakabauta ena vakalougatataki me ra rawata nodra dui ivakadinadina ni sa vakalou kei na kena inaki me vakarautaki o vuravura ki na yalataki tiko ni iKarua ni Lako Mai ni noda Turaga ka iVakabula, o Jisu Karisito.”¹⁵

Kemuni na taciqu kei na ganequ, oqo na neitou ivakaro ki vuravura me baleta na Veivakalesui mai ni taucoko ni kosipeli nei Jisu Karisito. E sa vakadewataki ena 12 na vosa. Era na vakadewataki talega ki na vosa tale eso. Ena tiko talega ena mataveilawa ni Lotu, ko na rawa ni taura mai kina e dua nomu ilavelave. Vulica yadua kei na nomu matavuvale kei na itokani. Vakasamataka vakatitobu na veika dina oqori ka nanuma na veika e rawa ni yaco ena nomu bula baleta na veika dina o na rogoca, vakamuria, ka talairawarawa ki na ivunau kei na veiyalayalati e sala vata kaya mai.

Au kila ni o Josefa Simici sa parofita sa lesi oti tu mai liu sa digitaki koya na Turaga me dolava na iotioti ni itabagauna oqo. Mai vua sa vakalesui mai kina na Lotu ni Turaga ki vuravura. A dregata o Josefa na nona ivakadinadina ena nona dra. Au sa lomani koya ka dokai koya sara!

E bula na Kalou! Sai Jisu na Karisito! Sa vakalesui mai na Nona Lotu. O Koya kei na Tamana, na Tamada Vakalomalagi, e rau sa raici keda tiko mai. Au sa vakadinadinataka ena yaca tabu i Jisu Karisito, emeni.