Asomdwee Asɛmpa no Ɔsɛnkã

Mo nuambanyin na me nkyerɛbaa adɔfo, mema hom akwaaba dze ba wiadze mfɛndzanan ehyiadzi yi ase! Mahwɛ da yi kwan ara yie. Mobɔ mpaa ma hom dabiara. Mabɔ mpaa so dɛ ehyiadzi yi bɛyɛ sunsum mu nkenyan mber ama hom mu kor biara.

Ofitsi ndaansa ehyiadzi no, wiadze yi mu nkõdzen no akɔ do. Wiadze nsan yarba no da ho nya nsunsuando wɔ hɛn abrabɔ do. Na sesei ɔkõ esi wiadze yi mu a oruhue esian huuhu gu mbanyin, mbaa, nye mbofra a wɔnnyɛɛ bɔn biara do.

Nkɔnhyɛfo edzi kan ehu hɛn nda yi, ber a wɔbɛtse akõkoekõ nye ɔkõ ho nsɛm, na asaase no do nyina bɛyɛ begyabegya.¹ Dɛ yɛyɛ Jesus Christ akadofo yi, yɛtotɔ serɛ amanaman baanodzifo no dɛ wɔnhwehwɛ hɔn ntamu nsonsonee ne nsiesie asomdwee mu ara. Yɛfrɛ adasa nyina a wɔwɔ beebiara dɛ wɔmbɔ mpaa mfa mma hɔn a wohia no, wɔnyɛ dza wobotum dze aboa hɔn a wɔtseetsee no, na wɔnhwehwɛ Ewuradze no mboa mfa ntwa ɔkõ kɛse biara do.

Nuambanyin na nkyerɛbaa, Jesus Christ asɛmpa ekehia ndɛ kyɛn mber biara. Wentwiwentwi tsia biribiara a Agyenkwa no sii ho egyina na Ɔkyerɛkyerɛe no. Modɔ Ewuradze Jesus Christ na megye dase dɛ N’asɛmpa no nko nye asomdwee ho nyiano a otsim. N’asɛmpa yɛ asomdwee ho asɛmpa.²

N’asɛmpa no nye mbuae nko a oyi dodow a wɔwɔ wiadze yi mu a suro akye hɔn no.³ Iyi kyerɛ Ewuradze ahyɛdze a Ɔdze maa N’esuafo no ho hia ohia dɛ yedzi do “Hom nkɔ … wiadze nyina mu nkɛkã asɛmpa no nkyerɛ abɔdze nyina.”⁴ Yɛwɔ asodzi krɔnkrɔn dɛ yɛnye obiara a obetsie no kyɛ Jesus Christ no tum na asomdwee no na wɔbɛma kwan ma Nyankopɔn edzi nyim wɔ hɔn abrabɔ mu.

Nyimpa biara a ɔnye Nyankopɔn edzi ahyɛmu no abɔ anohoba dɛ ɔbɔdwen nkaafo no ho na ɔasom hɔn a wohia no. Yebotum ama gyedzi wɔ Nyankopɔn mu ada edzi na yɛayɛ krado daa dɛ yebeyi ano akyerɛ obiara a obisa hɛn “enyidado a ɔwɔ [hɛn] mu no ase.”⁴ Hɛn mu kor biara wɔ asodzi wɔ Israel mboano no mu.

Ndɛ misi do enyiber do dɛ Ewuradze ase aberantsɛ a odzi mu na obotum biara dɛ ɔnyɛ ahoboa na ɔnsom asɛmpakã dwuma. Latter-day Saintfo mberantsɛ no, asɛmpakã som yɛ asɔfodzi asodzi. Hom mberantsɛ, wɔnye hom esie ama mber yi a Israel mboano a wɔabɔ ho anohoba no rokɔ do no. Ber a erosom asɛmpakã dwuma horow no, eyɛ asɛdze a ohia kɛse wɔ dwumason yi mu!

Hom nkataasia no a hom botum no, asɛmpakã dwuma no so yɛ kwan a ɔyɛ ndam, mbom hom ara nsan mu nyi. Yɛdɔ nkyerɛbaa asɛmpasomafo na yɛdze hɛn akoma nyina ma hɔn akwaaba. Hom ntoboa ma edwuma yi yɛ nwanwa! Hom mbɔ mpaa mfa nhu sɛ Ewuradze bɛpɛ dɛ hom bosom asɛmpakã dwuma a, na Sunsum Krɔnkrɔn no dze ho mbuae bɛba hom akoma na adwen mu.

Mbasirmba adɔfo, hom mu kor biara ho hia Ewuradze tsitsir. Ɔdze hom esie kesi sesei ama hom aaboa Israel mboano no. Hom adwenpɔwbɔ dɛ hom bɔsom asɛmpakã dwuma, dɛ hom kyima kã asɛmpa anaa hom yɛ ɔsom dwuma no, behyira hom na nkaafo dodow. Yɛma mpanyimfo adamfo dɛ wɔnsom ber a hɔn gyinabew horow no ma ho kwan. Hɔn mbɔdzembɔ no yɛ soronko.

Asɛmpasomafo nyina kyerɛkyerɛ na wɔgye Agyenkwa no ho dase. Sunsum mu sum a ɔwɔ wiadze no ma wohia Jesus Christ ne kan no kyɛn mber biara. Obiara wɔdɛ onya kwan dze hu Jesus Christ asɛmpa no ho nsɛm. Nyimpa biara wɔdɛ onya kwan dze hu bea a obotum ahwehwɛ enyidado na asomdwee no a “[ɔtra] ntseasee nyina no.”⁶

Ehyiadzi yi nyɛ asomdwee mber na sunsum mu aponto mma hom. Nkyɛ hom ahwehwɛ na hom enya ankorankor nyikyerɛ wɔ ehyiadzi yinom mu, mobɔ mpaa wɔ Jesus Christ ne dzin krɔnkrɔn no mu, amen.