Mme Obio Ubɔŋ

Ke otode ediyarare ke eyo mfin nnyin imifiɔk ite ke se enimde enɔ kpukpru mbon emi edude ke ererimbot idihe ifiɔk heaven emi mikemke owo ye nsi nsi ufen ke hell inɔ mbon eken. Edima uduak emi Abasi enyenede ɔnɔ nditɔ Esie esine akpanikɔ emi Andinyaŋa, Jesus Christ ekpepde ete: “Ediwak ubet edu ke ufɔk Ete mi.”¹

Ediyarare ukpep-ŋkpɔ eke Ufɔk Abasi Jesus Christ eke Ndisana Owo ke Ukperedem Usen ekpep ete kpukpru nditɔ Abasi—ye nsio-nnim emi ekpride akaha nditiŋ mbaŋa mi—eyenyene kiet ke otu obio ubɔŋ ita, kpa andikpri nkan emi “akande kpukpru ifiɔk.”² Ke ini emi mbon ntit-utɔŋ ema ekebɔde ufen mmɔ ebede, ufen emi ebeŋede mmɔ idem ɔnɔ se ididide, kpukpru eyedemere enyuŋ eka Akpatre Ubiere Ikpe eke Ɔbɔŋ Jesus Christ. Do, edima Andinyaŋa, emi, ekpepde nnyin ete ke, “okpono Ete, onyuŋ anam kpukpru mme utom ubɔk esie,”³ eyenɔ kpukpru nditɔ Abasi eka mme obio ubɔŋ emi nte asaŋade ye mme udɔŋ ewutde eto mme edimek mmɔ.

Akpan ukpep-ŋkpɔ efen ye ido Ufɔk Abasi emi efiakde emen edi edi mme uyo ye mme ediomi emi ɔnɔde kpukpru nditɔ Abasi edisana ufaŋ ndidot ndika ubɔŋ emi okponde akan ke obio ubɔŋ celestial. Utit isaŋ emi okponde akan—edimenede ke obio ubɔŋ celestial—edi se Ufɔk Abasi Jesus Christ eke Ndisana owo ke Ukperede Usen eyomde.

Oto ke ediyarare eke eyo mfin, Ndisana owo ke Ukperede Usen enyene saŋa saŋa ifiɔk emi ebaŋa uduak Abasi enyenede ɔnɔ nditɔ Esie. Uduak oro ɔtɔŋɔ ye uwem nnyin nte mme spirit mbeŋ-iso nnyin ikimana, ndien enye ayarare ntak ye mme usuŋ isaŋ emi nnyin imekde ke uwem mkpa ye udɔŋ ebiet emi nnyin inyenede ke oro ebede.

Nnyin imifiɔk ito ediyarare eke eyo mfin ite ke “kpukpru obio ubɔŋ enyene mbet emi enɔde”⁴ ndien ke obio ubɔŋ emi nnyin ibɔde ke Akpatre Ubiere Ikpe ɔkɔŋɔ ke mme mbet emi nnyin imekde ndinim ke isaŋ uwem mkpa nnyin. Ke edima uduak oro, ediwak obio ubɔŋ edu—ediwak ubet—ke ntre kpukpru nditɔ Abasi enyene obio ubɔŋ emi mmɔ edikande “inim” mme mbet esie nte ɔfɔnde ye mmɔ.

Nte nnyin itiŋde ibaŋa edu ye se eyomde ke mme obio ubɔŋ ita emi kiet kiet ke uduak Ete, nnyin itɔŋɔ ye enye emi okponde akan, emi edide ndise ndisana mbet ye mme ediomi emi Abasi ayarerede oto Ufɔk Abasi Jesus Christ eke Ndisana Owo ke Ukperedem Usen. Ke obio ubɔŋ “celestial”⁵ ikpehe ita edu,⁶ emi andikpon nkan edide edimenere ke obio ubɔŋ celestial. Emi edi ebiet iduŋ mbon “emi ebɔde eto uyɔhɔ esie, ye obio ubɔŋ esie,” ke ntre, “mmɔ edi mme abasi, kpa nditɔ iren [ye iban] Abasi”⁷ ndien “eduŋ ke iso Abasi ye Christ esie ke nsi nsi ye nsi nsi.”⁸ Oto ke ediyarare, Abasi ayarare mme nsi nsi mbet, mme edinam, ye mme ediomi emi anade nte enam man enyene mme edu Abasi emi eyomde man enyene edisana odudu emi. Ufɔk Abasi Jesus Christ eke Ndisana Owo ke Ukperedem Usen eyire ke mme ŋkpɔ emi koro uduak mfiak-men-ndi Ufɔk Abasi emi edi ndibeŋe nditɔ Abasi idem nnɔ erinyaŋa ke obio ubɔŋ celestial, akpan akpan, nnɔ edimenere ke idaha emi okponde akan.

Uduak Abasi, emi esiakde eto akpanikɔ, oyom ete ke ekeme ndinyene edimenere nto mbuɔtidem ke mme ediomi ye nsi nsi ndɔ ke ufɔt eren ye nwan ke edisana temple ikpɔŋ,⁹ ndɔ emi ke utit odude ɔnɔ ofuri mbon emi ebuɔtde idem. Oro edi ntak emi nnyin ikpepde ite ke “ndidi eren mme nwan edi akpan edu ɔnɔ owo kiet kiet ke uwem mbemiso uwem emi, uwem mkpa, ye nsi nsi idiɔŋɔ ye ntak.”¹⁰

Isio-isio ufɔn ukpepŋkpɔ emi edinwamde ibeŋe nnyin idem edi etop eke 1995 abaŋade ufɔkemana.¹¹ Mme ikɔ esie anam aŋwaŋa mme ŋkpɔ mbeŋe idem emi enamde nnyin iduŋ ye Abasi Ete ye Eyen Esie, Jesus Christ. Mbon emi mitimke ifiɔk edima uduak emi Ete enyenede ɔnɔ nditɔ Esie ekeme ndida etop ufɔk emana emi nte ikɔ emi ekemede ndikpuhɔ. Ke ukpuhɔre, nnyin imisɔŋɔ ite ke etop ufɔkemana, emi ekesiakde edori ke eti ukpepnkpɔ, owut mme oruk ebuana ufɔkemana emi ata akpan idaha emi nsinsi nkɔri nnyin ekemeke nditibe.

Paul Apostle etiŋ abaŋa mme ikpehe obio ubɔŋ ita, odomo mmɔ ye mme ubɔŋ utin, ɔfiɔŋ, ye mme nta-nta ɔfiɔŋ.¹² Enye osio andikoŋ nkan enyiŋ nte “celestial” ye udiana nte “terrestrial.”¹³ Enye isioho andikpri nkan enyiŋ, edi ediyarare emi ekenɔde Joseph Smith ama adian enyiŋ esie: “telestial.”¹⁴ Ediyarare efen ŋko ama etiŋ abaŋa edu mme owo emi esinde ɔnɔ mme obio-ubɔŋ emi ke kiet kiet. Mbon emi mimekke “ndinim mbet obio-ubɔŋ celestial”¹⁵ eyenyene obio ubɔŋ efen, emi ekpride akan celestial edi ekem ye mme mbet emi mmɔ emekde ye emi ɔfɔnde ye mmɔ ndinim. Ikɔ oro ndinim, emi ɔyɔhɔde mme ŋwed Abasi, ɔwɔrɔ ndinim ke ebiet ɔsɔŋde ada.¹⁶ Ke nte uwut-ŋkpɔ, mbon emi edude ke obio ubɔŋ terrestrial—emi edade edomo ye ekikere ekondo heaven—“edi mbon emi ebɔde iso Eyen, edi idihe uyɔhɔ eke Ete.”¹⁷ Mmɔ edi “nti owo eke ererimbot, emi ŋkari mme owo akanamde mmɔ edi nnan,”¹⁸ edi “isɔŋɔke ke ikɔ ntiense ibaŋa Jesus.”¹⁹

Ediyarare eke etiŋde ebaŋa mbon esinde ke obio ubɔŋ emi ekpride akan, telestial, edi “enye emi mikanke iduŋ … ke obio ubɔŋ terrestrial.”²⁰ Oro etiŋ abaŋa mbon emi esinde Andinyaŋa inyuŋ inyeneke edisana adaŋa ke ido mmɔ. Emi edi obio ubɔŋ emi mbon ibak edude, ke ini mmɔ ema ekebɔ ufen ke ntak mme idiɔk-ŋkpɔ mmɔ. Etiŋ ebaŋa mmɔ ke ediyarare eyo mfin nte “mbon emi mibɔhɔ ikɔ Abasi Christ, inyuŋ inyeneke ikɔ ntiense Jesus.

“Mmɔ edi mme osu-nsu, mme okut-ŋkukut, mme anam use, mme akpara, ye owo ekededi emi amade onyuŋ osude nsu.”²¹

Ke eketiŋde abaŋa mme obio ubɔŋ ita ye ŋkukut esie nte prophet, President Russell M. Nelson ke mibihike ikaha ama ewet ete: “Uwem eke uwem mkpa edi ata ibio ini ke edomode ye nsi nsi uwem. Edi nsotɔ akpan ibio ini ke enye edi! Ke baŋa eti eti nte enye edide: Ke ini uwem emi afo eyemek mme mbet emi afo oyomde ndinim—eke obio ubɔŋ celestial, mme eke terrestrial, mme eke telestial—ndien, ke ntre, obio ubɔŋ emi afo oyomde ndidu ke nsi nsi. Nsutɔ uduak! Edi uduak emi okponode edimek fo ofuri ofuri.”²²

Paul Apostle ama ekpep ete ke ekenɔ mme ukpep-ŋkpɔ Jehovah ye mme mbet man kpukpru nnyin inyene “ofuri ofuri idaha uyɔhɔ Christ.”²³ Usuŋ oro oyom sikponde ikan ndinyene ifiɔk ikpɔŋ. Ikemke ndinam ekut ikɔ Abasi; ana nte nnyin inam man nnyin ikabare esit ito enye. Ke ukpuhɔre kabaŋa ukwɔrɔ ikɔ efen, emi ekpepde nnyin ete ifiɔk ŋkpɔ, ikɔ Abasi Jesus Christ ekpep nnyin ete idi ŋkpɔ.

Ke otode mme ukpep-ŋkpɔ ntem nnyin ibiere ite ke Akpatre Ubiere Ikpe idihe ubiere ikɔ kabaŋa ofuri eti mme idiɔk ido—emi nnyin inamde. Enye ɔkɔŋɔ ke akpatre utom mme edinam ye ekikere nnyin—se nnyin ikabare-idi Nnyin idot nsi nsi uwem ito usuŋ edikabare. Nte ɔwɔrɔde mi, ikɔ emi emi ɔwɔrɔde ediwak ŋkpɔ ada ɔnɔ ata ukpuhɔre ke nte obot edide. Ikemke inɔ owo ndomo kiet ndinam mme ŋkpɔ emi ikpɔŋ. Mme mbet, mme edinam, ye mme ediomi ikɔ Abasi idihe udim ikɔ emi eyomde ete esin ke ebiet unim okuk ke heaven. Ikɔ Abasi Jesus Christ edi uduak emi owutde nnyin nte idikabare idi se Ete nnyin ke Heaven oyomde nnyin ete idi.²⁴

Ke ntak Jesus Christ ye Mkpa Usio-isop Esie, ke ini nnyin iduede ke uwem emi, nnyin imikeme ndikabare esit nyuŋ mfiak-nduk usuŋ emi adade aka se Ete nnyin ke Heaven aduakde ɔnɔ nnyin.

Ŋwed Mormon ekpep ete ke “uwem emi edi ini ɔnɔ [nnyin] ndibeŋe idem ndisobo ye Abasi.”²⁵ Edi mfina oro ye “uwem emi” ema ɔnɔ idorenyin (ke usuk idaha ɔnɔ usuk owo) ke se Jehovah ekeyarade ɔnɔ President Joseph F. Smith, emi ewetde idaha emi ke Doctrine and Covenants section 138. “Ami mma nkut,” prophet ama ewet, “nte mme ɔbuɔtidem ebio owo ke eyo emi, ke ini mmɔ ekpɔŋde uwem mkpa emi, eka iso ke utom mmɔ ke ndikwɔrɔ ikɔ ukabare esit ye edifak, oto ke uwa Nkukure Eyen Abasi emi Okobonde obon ke otu mbon emi edude ke ekim ye ke idak ufin idiɔk ŋkpɔ ke akwa ererimbot mme spirit mme akpa-mkpa.

“Eyefak akpa-mkpa emi edikabare esit, oto ke nkop-item nnɔ mme edinam eke ufɔk Abasi,

“Ndien ke ini mmɔ ema ekekpe utip idiɔk ŋkpɔ mmɔ, enyuŋ eyet mmɔ esana, eyebɔ utip nte asaŋade ye mme utom mmɔ, koro mmɔ edide mme adia-akpa erinyaŋa.”²⁶

Ke ediande do, nnyin imifiɔk ite ke Millennium, isua tɔsin emi etienede Udiana Edidi Andinyaŋa, edidi ini ndinam mme edinam emi eyomde enɔ mbon emi mibɔhɔ mmɔ ke uwem mkpa mmɔ.²⁷

Ediwak edu emi nnyin mifiɔkke ibaŋa mme akpan ini ita ke uduak edinyaŋa ye se mmɔ ebuanade ye kiet eken: (1) uwem spirit mbemiso uwem emi, (2) uwem mkpa, ye (3) uwem efen. Edi nnyin imifiɔk mme ŋkpɔ emi ibaŋa mme nsi nsi akpanikɔ: “Edinyaŋa edi ŋkpɔ owo kiet kiet, edi edimenere edi ŋkpɔ ufɔk emana .”²⁸ Nnyin iminyene edima Ete ke Heaven emi edikutde ete ke nnyin imibɔ kpukpru edidiɔŋ ye kpukpru unen emi mme udɔŋ ye edimek nnyin eyakde. Nnyin ŋko imifiɔk ite ke Enye idikpakke owo ndomo kiet isin ke ebuana edidian ke ini enye mimaha. Mme edidiɔŋ eke ebuana edidian edu enɔ kpukpru mbon emi enimde mme ediomi mmɔ edi idihe ke ndikpak ebuana edidian ye owo efen emi midotke ye emi mimaha.

Ndima nditɔ-eka mi irenowo ye iban, ami metie ntiense akpanikɔ mbaŋa mme ŋkpɔ emi. Ami metie ntiense mbaŋa Ɔbɔŋ Jesus Christ nnyin, “ntɔŋɔ ye utit mbuɔtidem nnyin,”²⁹ emi Erisio-isop Esie, emi esinede ke uduak Ete nnyin ke Heaven, anamde kpukpru etibe, ke enyiŋ Jesus Christ, amen.