« ការប្រែចិត្តជឿគឺជាគោលដៅរបស់យើង » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរគោលលទ្ធិ និង សេចក្តីសញ្ញា ឆ្នាំ ២០២១ ( ឆ្នាំ ២០២០ )
« ការប្រែចិត្តជឿគឺជាគោលដៅរបស់យើង » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២១
ការប្រែចិត្តជឿគឺជាគោលដៅរបស់យើង
គោលបំណងនៃការរៀនសូត្រ និងការបង្រៀនដំណឹងល្អទាំងអស់ គឺដើម្បីធ្វើឲ្យការប្រែចិត្តជឿរបស់យើងលើព្រះយេស៊ូវគ្រីស្ទកាន់តែជ្រាលជ្រៅខ្លាំងឡើង ហើយជួយយើងឲ្យកាន់តែប្រែក្លាយដូចជាទ្រង់ ។ ដោយមូលហេតុនេះហើយ នៅពេលយើងសិក្សាដំណឹងល្អ យើងពុំគ្រាន់តែរកមើលព័ត៌មានថ្មីប៉ុណ្ណោះទេ តែយើងចង់ក្លាយជាអ្នក « កើតជាថ្មីវិញ » ( កូរិនថូសទី២ ៥:១៧ ) ។ នេះមានន័យថាជាការពឹងផ្អែកទៅលើព្រះវរបិតាសួគ៌ និងព្រះយេស៊ូវគ្រីស្ទដើម្បីផ្លាស់ប្ដូរដួងចិត្តរបស់យើង ទស្សនៈរបស់យើង សកម្មភាពរបស់យើង និងធម្មជាតិរបស់យើង ។
ប៉ុន្តែប្រភេទនៃការរៀនសូត្រដំណឹងល្អដែលពង្រឹងដល់សេចក្ដីជំនឿរបស់យើង ហើយដឹកនាំយើងទៅរកអព្ភូតហេតុនៃការផ្លាស់ប្រែចិត្តជឿ ពុំកើតឡើងតែម្តងក្នុងពេលតែមួយនោះទេ ។ វាបន្តមាននៅក្រៅថ្នាក់រៀនចូលទៅក្នុងដួងចិត្ត និងគេហដ្ឋានរបស់បុគ្គលម្នាក់ៗ ។ វាតម្រូវឲ្យមានការខិតខំដ៏ខ្ជាប់ខ្ជួន និងជាប្រចាំថ្ងៃដើម្បីយល់ ហើយរស់នៅតាមដំណឹងល្អ ។ ប៉ុន្តែព្រះវរបិតាសួគ៌មិនរំពឹងឲ្យយើងធ្វើតែម្នាក់ឯងទេ — ទ្រង់នឹងបញ្ជូនព្រះវិញ្ញាណបរិសុទ្ធ ដើម្បីជួយយើងឲ្យផ្លាស់ប្រែចិត្តជឿ ។
ព្រះវិញ្ញាណបរិសុទ្ធដឹកនាំយើងទៅរកសេចក្ដីពិត ហើយថ្លែងជាសាក្សីអំពីសេចក្ដីពិតនោះ ( សូមមើល យ៉ូហាន ១៦:១៣ ) ។ ទ្រង់បំភ្លឺគំនិតរបស់យើង ដាស់ការយល់ដឹងរបស់យើង ហើយប៉ះដួងចិត្តរបស់យើងដោយវិវរណៈមកពីព្រះ ដែលជាប្រភពនៃគ្រប់សេចក្ដីពិតទាំងអស់ ។ ព្រះវិញ្ញាណបរិសុទ្ធធ្វើឲ្យដួងចិត្តរបស់យើងបរិសុទ្ធ ។ ទ្រង់បំផុសបំណងប្រាថ្នាក្នុងខ្លួនយើងដើម្បីរស់នៅតាមសេចក្ដីពិត ហើយទ្រង់ខ្សឹបប្រាប់យើងពីរបៀបដើម្បីធ្វើដូចនេះ ។ ពិតណាស់ « ព្រះវិញ្ញាណបរិសុទ្ធ…នឹងបង្រៀន [ យើង ] ពីគ្រប់សេចក្ដីទាំងអស់ » ( យ៉ូហាន ១៤:២៦ ) ។
ដោយមូលហេតុទាំងនេះហើយ នៅក្នុងការខិតខំដើម្បីរស់នៅ រៀន និងបង្រៀនដំណឹងល្អរបស់យើង យើងគួរតែស្វែងរកភាពជាដៃគូពីព្រះវិញ្ញាណមុនគេ ។ គោលដៅនេះគួរតែគ្រប់គ្រងដល់ការជ្រើសរើស និងការដឹកនាំគំនិតរបស់យើង និងសកម្មភាពរបស់យើង ។ យើងគួរតែស្វែងរកអ្វីៗដែលអញ្ជើញឲ្យមានឥទ្ធិពលនៃព្រះវិញ្ញាណ ហើយបដិសេធអ្វីៗដែលបណ្ដេញឥទ្ធិពលនោះចេញ—ដ្បិតយើងដឹងថា ប្រសិនបើយើងអាចមានភាពសក្ដិសមនឹងវត្តមាននៃព្រះវិញ្ញាណបរិសុទ្ធ នោះយើងអាចមានភាពសក្ដិសមដើម្បីរស់នៅក្នុងវត្តមាននៃព្រះវរបិតាសួគ៌ និងព្រះរាជបុត្រាទ្រង់គឺព្រះយេស៊ូវគ្រីស្ទ ។