“Iakwe Anij, iakwe ritūrum̧,” N̄an Kōkajoorļo̧k Jodikdik ro: Juon Tōl n̄an Kōm̧m̧ani Kālet ko (2022)
“Iakwe Anij, iakwe ritūrum̧,” N̄an Kōkajoorļo̧k Jodikdik ro
Iakwe Anij, iakwe ritūrum̧
Matu 22:37–40
N̄an jipan̄ kwe kōm̧m̧ane kālet ko rem̧m̧an, Anij ej letok kein ko. Ej kōm̧m̧ane menin kōnke E ej iakwe kwe. Im un eo em̧m̧an tata n̄an kōjparok kien ko an Anij ej bwe kwoj iakwe E. Iakwe ej aorōk ilo kien ko an Anij.
M̧ool ko indeeo
Anij ej iakwe eok. E ej Jem̧ōm̧. Iakwe eo An eweppān emaron̄ im̧we kwe n̄an iakwe E. N̄e iakwe eo am̧ n̄an Jemedwōj Ilan̄ ej kālet eo aorōk tata ilo mour eo am̧, kālet ko relōn̄ renaaj pidodo.
Kien ko ruo reļļap iaan aolep kien, Jisōs ekar katakin, rej n̄an iakwe Anij im iakwe ritūrum̧. Im wōn eo ritūrum̧? Aolep! Aolep men ko jet rekar katakin ilo jeje ko rekwojarjar im jān rikanaan ro rej ekkeijel ippān kien kein ruo.
Aolep armej rej am̧ būratōr im sister—ekoba, aaet, armej ro reoktak jān kwe ak rej jab errā ippam̧. Jemedwōj Ilan̄ ej kōņaan bwe ajri ro Nejin ren iakwe doon. N̄e kwōj jerbal n̄an ajri ro Nejin, kwoj jerbal n̄an E.
Kūr ko
Kwaļo̧k iakwe n̄an Anij ilo kōjparok kien ko An. N̄an waanjon̄ak, ilo ad kwojarjar raan in Jabōt, ekoba ilo tiljek kōppopo n̄an im bōke kwojkwoj eo, kwoj kwaļo̧k iakwe n̄an Anij bwe kwonaaj leļo̧k juon raan ilo juon wiik n̄an E. Ilo am̧ jitlo̧k im kōļļā juon m̧ōttan jon̄oul im joortak ko, kwoj kwaļo̧k n̄an Anij bwe jerbal eo an eļapļo̧k an aorōk n̄an kwe jān m̧weiuk ko. N̄e kwoj kōjerbale etan Anij im Kraist ilo kauteij, ejjab ilo kajje ak ba bajjōk, kwoj kwaļo̧k bwe kwoj kam̧m̧oolol kōn aolep men ko Rekar kōm̧m̧ane n̄an kwe.
Kōm̧m̧an n̄an aolep āinwōt juon ajri nejin Anij. Āinwōt rikalo̧o̧r an Jisōs Kraist, komaron̄ tōl ilo kōm̧m̧an n̄an aolep armej ro rej itok jān joko im kabun̄ ko reoktak im kurup ko jet kōn iakwe, kauteij, im ippān doon—eļaptata ro jet iien rej armej ro rej bōk naan ko im m̧akūtkūt ko rekōmetak. Etal ippān ro rej en̄jake ajimakeke, make iaer, ak rej jab maron̄ jipan̄ er make. Jipan̄ er en̄jake iakwe eo an Jemedwōj Ilan̄ jān kwe.
Lale bwe kajin eo am̧ en kwaļo̧k iakwe eo an Anij im ro jet—men̄e kwoj kōnono ilo lukkuun armej ak ilo online. Ba men ko rej kōketak—ejjab men ko remaron̄ kōm̧m̧an akweel, metak, ak kalulu, aaet en jab barāinwōt kōm̧m̧an kōjak. Naan ko am̧ remaron̄ kajoor. Kōtļo̧k bwe ren kajoor ilo em̧m̧an.
Iakwe aolep ajri ro nejin Anij ej jino ilo m̧weo. Kōm̧m̧an ijo koņaam̧ bwe m̧weo im̧ōm̧ en juon jikin aolep rej en̄jake iakwe eo an Rilo̧mo̧o̧r.
Kōjeram̧m̧an ko em̧ōj kallim̧ur kaki
Jemjerā eo am̧ ippān Anij enaaj m̧wūlaļļo̧k ilo am̧ kwaļo̧k iakwe eo am̧ ilo am̧ pokake kien ko An im kōjparok bujen ko am̧ Ippān.
Jemjerā eo am̧ ippān ro jet enaaj m̧wūlaļļo̧k ilo am̧ kwaļo̧k iakwe eo am̧ ilo jerbal in jipan̄ āinwōt Kraist. Kwonaaj lo lan̄lōn̄ ilo am̧ kōm̧m̧an bwe laļ in en lapļo̧k an juon jikin iakwe.
Kajjitōk ko im uwaak ko
Ekōjkan aō en̄jake iakwe eo an Anij? Iakwe eo an Jemedwōj Ilan̄ ej aolep iien pojak. En ekkā am̧ ekōnono ippān ilo jar. Kwaļo̧k en̄jake ko am̧ Ippān, im ron̄jake im̧we ko jān E. Riiti naan ko an ilo jeje ko rekwojarjar. Ļōmņak kōn aolepen men ko E kar kōm̧m̧ane n̄an kwe. Bōk am̧ iien ilo ijoko im m̧akūtkūt ko ijo Jetōb ej pād ie.
Irooj ej ke kōņaan bwe in iakwe aolep, barāinwōt ro rej nana n̄an n̄a? Irooj ekōņaan bwe kwon iakwe rikōjrat ro am̧ im jar kōn ro rej nana n̄an kwe. Bōtaab, ejjab meļeļein bwe kwoj iakwe pād ilo juon wāween eo ej kōm̧m̧an bwe kwon metak ilo kōlmenļo̧kjen, ānbwin, im jetōb. Kōm̧m̧ane jon̄an pedped ko n̄an kōjparok eok. N̄e rej wōtan n̄an eok ak ko̧kkure eok—ak n̄e kojeļā ke men in ej waļo̧k n̄an bar juon—kōnaan ippān juon rūtto eo kwoj lōke.
N̄aat im ewi wāween aō jeļā kajeen membōr ļaddik ro n̄e n̄a leddik ak leddik ro n̄e n̄a ļaddik? Wāween eo em̧m̧an tata n̄an jeļā kajeen ro jet ej ilo m̧ōttā eo em̧m̧an. Ilo am̧ dik wōt, kalōk m̧ōttā ko ippān elōn̄ armej. Ilo jet m̧anit, jodikdik ro rej jeļā kajeen ļaddik n̄e er leddik im leddik rej jeļā kajjien ļaddik ilo iien m̧akūtkūt ko an kurup ko. N̄an kōjparok im eddōkļo̧k eo an en̄jake im jetōb eo am̧, m̧akūtkūt ko me ebōk ruo armej ej aikuj tartar m̧aanļo̧k m̧ae iien erūtto aer kōļmenļo̧kjeņ—iiō ņe 16 ej juon laajrak in tōl eo em̧m̧an. Ko̧o̧njeļ ippān ro jnōm̧ im jem̧ōm̧ im ritōl ro am̧. Kakwoņ jemjerā ko rekajoor an ruo armej jān doon m̧ae iien kwoj rerūttoļo̧k. Bōk am̧ iien ippān ro rej jipan̄ kwe kōjparok kallim̧ur ko am̧ n̄an Jisōs Kraist.
Ta eo imaron̄ kōm̧m̧ane n̄e m̧weo im̧ō ejjab juon jikin iakwe? Rilo̧mo̧o̧r ejeļā kōn ta eo kwoj ioone, im E ej iakwe kwe. Kijenmej, wōnm̧aanļo̧k n̄an kōjparok kien ko an Anij, im kōm̧m̧an bwe kwon juon waanjon̄ak em̧m̧an n̄an baam̧le eo am̧. Kalōk jemjerā ko ilowaan baam̧le eo ilo ward eo am̧. Kōppopo kiiō n̄an kalōk am̧ make baam̧le loe ilo katak ko an Jisōs Kraist.
Lale Aiseia 58:3–11 (unin jitļo̧k); 58:13–14 (kōjeram̧m̧an jān kauteij Jabōt); Malakai 3:8–10 (kōjeram̧m̧an jān kōļļā juon m̧ōttan jōnoul); Luk 6:27–28 (iakwe ro rej kōjrat kwe); 10:25–37 (wōn eo ritūrū?); Jon 3:16–17 (Anij ekar iakwe kōj, im E kar jilkintok Nejin); 14:15 (jej kōjparok kien ko kōnke jej iakwe Anij); 1 Jon 4:19 (jej iakwe Anij kōnke E ej iakwe kōj); Mosaia 2:17 (n̄e jej jerbal n̄an ro jet, jej jerbal n̄an Anij).
Kajjitōk ko ikkijeen pepa in mālim in deļo̧n̄e tampeļ
Kwoj ke ļoore katak ko an Kabun̄ eo an Jisōs Kraist ilo m̧wil ko am̧ make im m̧wil ko am̧ n̄an armej otemjej im ippān ro uwaan baam̧le eo am̧ im ro jet?
Kwoj ke kajjieon̄ kōjparok ekwojarjar eo an raan in Jabōt, jim̧or ilo m̧weo im ilo m̧ōnjar eo; pād ilo kweilo̧k ko am̧, m̧aanjabpopo n̄an im bōk m̧ōttan kwojkwoj eo ilo erreo; im mour ilo ineem̧m̧an kōn kakien ko im kien ko an gospel eo?
Kwoj ke juon eo ej kōļļā juon m̧ōttan jon̄oul aolep iien?