Nā te parau mau ’oe e fa’ati’amā

E Atua nō te parau mau tō ’oe Metua i te ao ra. ’Ua ’ite ’oia i te mau mea ato’a. Nō roto mai iāna te mau parau mau ato’a, ’e e arata’i te reira iāna ra. Tē ha’afaufa’a nei ’oe i te parau mau ’ia ’imi ’oe i te ha’api’i i te mau mea, ’ia ora ’oe ma te huru parauti’a ’e ’ia ti’a itoito ’oe nō te parau mau tā ’oe i ’ite—noa atu ē ’o ’oe ana’e tē ti’a ra.

Hōho’a

E taure’are’a mata ’ata’ata.

Tē hina’aro nei te Metua i te ao ra i tāna mau tamāhine e mau tamaiti ’ia tāmau noa i te ha’api’i. E tumu i te pae tino ’e i te pae vārua nō te ’imira’a i te ha’api’i i te mau mea, ’e te herera’a i te reira. E ’ere te ha’api’ira’a nō te noa’a noa te moni. E tuha’a nō tā ’oe fā mure ’ore, ’ia rahi atu ā i te riro mai te Metua i te ao ra te huru.

Te orara’a mai te huru parauti’a, ’o te herera’a ïa i te parau mau ma tō ’ā’au ato’a—e hau atu i te herera’a i te fāna’o, te ro’o ’e te orara’a ’ōhie. ’O te ravera’a i te ’ohipa ti’a i te mea noa ho’i e mea ti’a te reira.

E tao’a faufa’a rahi tā ’oe e nehenehe e hōro’a. Tei roto i te ’evanelia a Iesu Mesia te mau pāhonora’a i te mau uira’a o te orara’a. ’O te ’ē’a ho’i e tae atu ai i te hau ’e te ’oa’oa. ’Aita paha ’oe i ’ite i te mau mea ato’a, ’ua nava’i rā tō ’oe ’ite nō te tauturu i te ta’ata ’ia māramarama ’e ’ia ha’afaufa’a i te mau parau tumu mau ’e te mure ’ore.

E ha’api’i noa i te mau mea. ’A hi’o i te mau rāve’a nō te fa’a’ā’ano atu ā i tō ’oe ferurira’a ’e tō ’oe ’aravihi. Tei roto i teie mau rāve’a te mau fa’anahora’a i te fare ha’api’ira’a ’e te ha’api’ipi’ira’a tōro’a, ’e tae noa atu te mau ha’api’ira’a ri’i e noa’a mai nā roto i te tahi mau tino ’o tā ’oe e ti’aturi. ’A fa’aō ato’a mai i te Fatu i roto i tā ’oe mau tauto’ora’a, ’e e arata’i ’oia ia ’oe. ’A ha’api’i ai ’oe nō ni’a i teie ao tei roto ’oe, ’a ha’api’i ato’a mai nō ni’a i te Fa’aora, tei hāmani i teie ao. ’A tuatāpapa i tōna ora ’e tāna mau ha’api’ira’a. ’A fa’ariro i te séminaire ’e te institut ’e tā ’oe iho tuatāpapara’a ’evanelia ’ei tuha’a nō tā ’oe tītaura’a ’ite i te roara’a o te orara’a.

’A here roa i te parau mau ’ia ’ore roa atu ’oe e hina’aro e ’eiā, ’e ha’avare, e punu ’e e fa’ahema i te ta’ata—i te fare ha’api’ira’a, i te ’ohipa, nā ni’a i te natirara ’e i te mau vāhi ato’a ho’i. ’Ei pipi ha’apa’o maita’i ’oe nō Iesu Mesia i mua i te ta’ata ’e i te vāhi ’ōmo’e.

’Ei māramarama ’oe nō vetahi ’ē. ’Ia fa’a’ite tā ’oe mau parau ’e tā ’oe mau ’ohipa i tō ’oe fa’aro’o ia Iesu Mesia. ’A fa’aineine i teienei nō ananahi, ’ia fāna’o atu ’oe i te fa’a’ite i tāna ’evanelia hanahana ’ei misiōnare, ’e i te roara’a o tō ’oe orara’a. ’E ’ia ineine ’oe nō te parau atu i te ta’ata e ui mai ia ’oe nō ni’a i te tīa’ira’a ’e te poupou tā ’oe e ’ite ra i roto ia ’oe.

E fa’arahi te fāito ha’api’ira’a maita’i i tō ’oe ’aravihi ’ia tāvini i te Fatu. E hōro’a te reira ia ’oe i te mana nō te ha’amaita’i ia vetahi ’ē, tō ’oe iho ā rā ’utuāfare. Rahi noa atu ’oe i te ha’api’i, rahi noa ato’a atu ’oe i te tauturu i te patura’a i te bāsileia o te Atua ma te fa’auru i tō te ao nei ’ia rave i te maita’i.

E tae mai te hau ’e te fa’aturara’a iāna iho i te huru parauti’a. ’Ia tū’ati ana’e tā ’oe mau parau ’e tā ’oe mau ’ohipa i ni’a i te parau mau, tē fa’a’ite ra ïa ’oe ē, e nehenehe te ta’ata e ti’aturi mai—te ta’ata ’e te Fatu.

’Ia ti’a ’oe nō te mau ha’api’ira’a a Iesu Mesia, e ti’a ato’a mai ’oia i pīha’i iho ia ’oe. ’Aita paha te tahi pae e fāri’i i tā ’oe mau parau, e ’itehia rā tō ’oe itoito ’e te ateate. ’Ore noa atu ā te ta’ata e pe’e i tō ’oe hi’ora’a, e rahi mai tō ’oe ’itera’a pāpū ’e tō ’oe ti’aturi ’e tō ’oe fa’aro’o i te Mesia.

Hōho’a

ītona nō te uira’a ’e pāhonora’a

Uira’a ’e pāhonora’a

E mea hape ānei ’ia uiui nō ni’a i te ’Ēkālesia ? Nāhea vau e ’ite i te mau pāhonora’a ? E ’ere te mau uira’a i te tāpa’o nō te ta’ata paruparu ’aore rā nō te ’erera’a i te fa’aro’o. Inaha, e nehenehe ho’i te mau uira’a e tauturu i te fa’arahi i te fa’aro’o. ’Ua ha’amata te Fa’aho’i-fa’ahou-ra’a o te ’evanelia i te taime ’a ui ai Iosepha Semita i te tahi mau uira’a nō ni’a i te fa’aro’o, i te 14ra’a o tōna matahiti. ’A ’imi i te pāhonora’a i roto i te mau pāpa’ira’a mo’a, i roto i te mau parau a te mau peropheta a te Atua, i pīha’i iho i tō ’oe feiā fa’atere ’e tō ’oe nā metua ha’apa’o maita’i, ’e i mua ato’a i te Atua. ’Ia ’ore te pāhonora’a e tae mai i reira ra, ’a ti’aturi ē, e ha’api’i mai ’oe te a’o nā ni’a i te a’o. ’A tāmau noa i te ora i te mau mea tā ’oe i ’ite a’ena, ’e ’a tāmau noa i te ’imi i te parau mau.

Hōho’a

Hōho’a pēni nō Joseph Smith tē tūturi ra i mua i te Atua te Metua ’e ia Iesu Mesia i roto i te uru rā’au mo’a.

Nāhea vau e ti’a ai nō te parau ti’a ma te ’ore e fa’a’ino i te ta’ata e ti’aturira’a ’ē tōna ? ’A ha’amata nā mua i te hi’o maita’i ē, tā ’oe mau parau ’e tā ’oe mau ’ohipa, nō roto mai ïa i tō ’oe here i te Atua ’e i tāna mau tamari’i. ’Eiaha te fa’a’itera’a i te evanelia ’ia ravehia nā roto i te vārua mārō, nā roto rā i te māramarama ’e te marū ’e te hāmani maita’i. E nehenehe ’oe e fa’a’ite i te here i ta’ata noa atu ē ’aita tā ’ōrua hi’ora’a e tū’ati ra.

Hi’o Mataio 5:14–16 (’ia ’ana’ana tō māramarama) ; Ioane 14:6 (’O Iesu te parau mau) ; 1 Petero 3:15 (e vai ineine noa nō te fa’a’ite i tō ’oe tīa’i i te Mesia) ; Te Ha’api’ira’a Tumu ’e te mau Fafaura’a 88:77–80 (te mau mea tā te Fatu i hina’aro ia tātou ’ia ha’api’i mai) ; 93:36 (te hanahana o te Atua ’o te māramarama ïa) ; 124:15 (te huru parau ti’a, ’o te herera’a ïa i te mea ti’a) ; 130:18 (e ti’a tō tātou ’ite nā muri ia tātou i te ti’afa’ahoura’a).

Hōho’a

ītona nō te hiero

Te uira’a nō te parau fa’ati’a nō te hiero

Tē tūtava ra ānei ’oe ’eiaha e ha’avare i roto i te mau mea ato’a tā ’oe e rave ?