Fakakakato Hoʻo Taumuʻa Fakafaifekaú

ʻOku ʻākilotoa koe ʻe he kakaí. ʻOkú ke fetaulaki mo kinautolu ʻi he halá mo kaungā-fononga mo kinautolu. ʻOkú ke ʻaʻahi kiate kinautolu ʻi honau ngaahi ʻapí mo fetuʻutaki mo kinautolu ʻi he telefoní. Ko e fānau kotoa kinautolu ʻa e ʻOtuá—ko ho ngaahi tokoua, tuofāfine mo e tuongaʻane. ʻOku ʻofa ʻa e ʻOtuá ʻiate kinautolu ʻo hangē pē ko ʻEne ʻofa ʻiate koé.

Ko e tokolahi ʻo e kakaí ni ʻoku nau fekumi ki ha taumuʻa ʻi he moʻuí. ʻOku nau hohaʻa ki honau kahaʻú mo e kahaʻu honau ngaahi fāmilí. ʻOku nau fiemaʻu ʻa e ongoʻi ʻoku nau kau ko ē, ʻoku maʻu ʻi he ʻiloʻi ko e fānau kinautolu ʻa e ʻOtuá mo e kau mēmipa ʻo Hono fāmili taʻengatá. ʻOku nau fiemaʻu ke nau ongoʻi malu ʻi ha māmani kuo feliliuaki ai e ngaahi tuʻunga ʻulungaanga mahuʻingá. ʻOku nau fakaʻamua ʻa e “melino ʻi māmani, pea mo e moʻui taʻengata ʻi he maama ka hoko maí” (Tokāteline mo e Ngaahi Fuakava 59:23).

Ko ha tokolahi, “ʻoku kei ta‘ofi ʻa kinautolu mei he moʻoní koeʻuhí he ‘oku ʻikai pē te nau ʻilo ʻa e feituʻu ke ʻiloʻi ai iá” (Tokāteline mo e Ngaahi Fuakava 123:12). Ko e ongoongolelei ʻo Sīsū Kalaisí, ʻi hono fakafoki mai ʻi he Palōfita ko Siosefa Sāmitá, ʻokú ne ʻomai ʻa e moʻoni taʻengatá. ʻOku faitokonia ʻe he moʻoni ko ʻení ʻa e ngaahi fiemaʻu fakalaumālie ʻa e kakaí mo tokoniʻi kinautolu ʻi he fakahoko ʻenau ngaahi fakaʻānaua vivili tahá.

ʻI hoʻo hoko ko e fakafofonga kuo fakamafaiʻi ʻo Sīsū Kalaisí, ʻokú ke akoʻi ʻoku “fou mai ʻa e huhuʻí ʻo tuʻunga ʻi he Mīsaia Māʻoniʻoní” (2 Nīfai 2:6). ʻOkú ke fakaafeʻi ʻa e kakaí ke nau haʻu kia Kalaisi, ke nau ului kiate Ia mo ʻEne ongoongolelei kuo fakafoki maí. ʻI heʻenau tali hoʻo fakaafé, te nau maʻu ai ha fiefia, ʻamanaki lelei, nonga, mo ha taumuʻa lahi ange.

Ke haʻu ki he Fakamoʻuí, ʻe fiemaʻu ʻa e kakaí ke nau tui kiate Ia. Te ke lava ʻo tokoni ke nau fakatupulaki ʻa e tui ko ʻení, ʻi hoʻo:

• Akoʻi ange ʻa e ongoongolelei ʻo Kalaisi kuo fakafoki maí mo fakamoʻoni ki hono moʻoní.

• Fakaafeʻi ke nau tukupā ke moʻui fakatatau ki hono ngaahi akonakí.

• Toe muimuiʻi mo tokoni ke nau ngāueʻi ʻa e ngaahi tukupā ʻoku nau faí.

• Tokoniʻi kinautolu ke nau foua ha ngaahi aʻusia ʻoku nau ongoʻi ai ʻa e ivi tākiekina ʻo e Laumālie Māʻoniʻoní (vakai, 1 Nīfai 10:17–19).

ʻE taki ʻe he tui kia Sīsū Kalaisí ʻa e kakaí ke nau fakatomala. ʻOku ʻai ʻe Sīsū ke malava ʻa e fakatomalá, ʻaki ʻEne fakalelei maʻa ʻetau ngaahi angahalá. Ko e taimi ʻoku fakatomala ai ʻa e kakaí, ʻe fakamaʻa kinautolu mei he angahalá pea nau fakaʻau ʻo ofi ange ki he Tamai Hēvaní mo Sīsū Kalaisi. Te nau maʻu ʻa e nēkeneka mo e nonga ʻo e maʻu e fakamolemolé.

ʻOku teuteuʻi ʻe he fakatomalá ʻa e kakaí ki he fuakava ʻo e papitaisó pea mo e meʻafoaki ʻo e Laumālie Māʻoniʻoní. Naʻe folofola ʻa e Fakamoʻuí, “Haʻu kiate au, ʻo papitaiso ʻi hoku hingoá, koeʻuhi ke fakamāʻoniʻoniʻi ʻa kimoutolu ʻi he maʻu ʻo e Laumālie Māʻoniʻoní, koeʻuhí ke mou tuʻu taʻe-ha-mele ʻi hoku ʻaó ʻi he ʻaho fakaʻosí” (3 Nīfai 27:20).

Ko e taimi ʻoku tupulaki ai hoʻo mahinó mo e fakamoʻoni ki he Fakamoʻuí mo ʻEne Fakaleleí, ʻe tupulaki ai mo hoʻo fakaʻamu ke vahevahe ʻa e ongoongoleleí. Hangē ko e ongo naʻe maʻu ʻe Līhaí, te ke ongoʻi foki ʻene “mahu‘inga lahi ke fakahā ʻa e ngaahi meʻá ni ki he kakai ‘oku nofo ‘i he māmaní” (2 Nīfai 2:8).

ʻĪmisi

ko e meʻa-hā-mai ʻo e ʻAkau ʻo e Moʻuí

Kuo uiuiʻi koe mo vaheʻi ke ke “malanga ʻaki ʻa e ongoongo fakafiefia ʻo e fiefia lahí, ʻio, ʻa e ongoongolelei taʻengatá” (Tokāteline mo e Ngaahi Fuakava 79:1). Te ke lava ʻo faiako, ʻo hangē ko e ngaahi foha ʻo Mōsaiá, ʻi he mafai mo e mālohi ʻo e ʻOtuá (vakai, ʻAlamā 17:2–3).

Naʻe fakafoki mai ʻa e mafai ke malangaʻi ʻa e ongoongoleleí ʻi he Palōfita ko Siosefa Sāmitá, ʻi he fakahinohino ʻe Kalaisí. Ko e taimi naʻe vaheʻi ai koe ko e faifekaú, naʻá ke maʻu ai ʻa e mafai ko ʻení. ʻOku haʻu fakataha mo ia ʻa e totonu, faingamālie, mo e fatongia ke fakafofongaʻi ʻa e ʻEikí mo akoʻi ʻEne ongoongoleleí.

ʻOku kau ʻi he mafai ko ʻení ʻa e fatongia ke moʻui taau mo ho uiuiʻí. Fakahoko moʻoni ʻa hono vaheʻi koé. Fakamamaʻo mei he angahalá mo ha meʻa pē ʻoku taʻe-taau mo taʻe-fakaʻapaʻapa. Fakamamaʻo mei he ngaahi ʻalunga mo e fakakaukau ʻa e māmaní. Muimui ki he ngaahi tuʻunga moʻui ʻi he Ngaahi Tuʻunga Moʻui Fakafaifekau maʻá e Kau Ākonga ʻa Sīsū Kalaisí. ʻI hoʻo hoko ko e fakafofonga ʻo e ʻEikí, hoko ko “[ha sīpinga ʻo e] kakai tuí” (1 Tīmote 4:12). Fakaʻapaʻapaʻi ʻa e huafa ʻo Sīsū Kalaisí ʻaki hoʻo ngaahi angafaí mo e ngaahi leá.

Makehe mei he mafaí, te ke fiemaʻu ʻa e mālohi fakalaumālie ke fakahoko ho uiuiʻí. ʻOku foaki ʻe he ʻOtuá ʻa e mālohi fakalaumālié ʻi hoʻo ngāue taʻe-tuku ke fakaivia hoʻo fakamoʻoni kiate Ia, ʻa Sīsū Kalaisi, pea mo e ngaahi moʻoni ʻo e ongoongoleleí ʻokú ke akoʻí. ʻOkú Ne foaki ʻa e mālohi fakalaumālié ʻi hoʻo lotu, ako ʻa e folofolá, mo feinga ke fakahoko hoʻo taumuʻa fakafaifekaú. ʻOkú Ne foaki ʻa e mālohi fakalaumālié ʻi hoʻo feinga ke tauhi ʻEne ngaahi fekaú pea mo e ngaahi fuakava naʻá ke fakahoko ʻi he taimi naʻá ke maʻu ai ʻa e ngaahi ouau ʻo e fakamoʻoní (vakai, Tokāteline mo e Ngaahi Fuakava 35:24).

ʻE lava ke fakahaaʻi ʻa e mālohi fakalaumālié ʻi hoʻo:

• Fakaʻaongaʻi ʻa e folofolá ke akoʻi ʻa e kakaí, fakalahi ʻenau mahino ki he ngaahi moʻoni ʻo e ongoongoleleí, mo tokoniʻi kinautolu ke nau ʻiloʻi ʻa e founga ke fakaʻaongaʻi ai ʻa e ngaahi moʻoni ko ʻení ʻi heʻenau moʻuí (vakai, 1 Nīfai 19:23; ʻAlamā 26:13; 31:5).

• Maʻu e fakahinohino ʻa e Laumālié ki he meʻa ʻoku finangalo ʻa e ʻEikí ke ke lea ʻakí (vakai, Tokāteline mo e Ngaahi Fuakava 84:85).

• Maʻu e fakahinohino ʻa e Laumālié ki he feituʻu ke ke ʻalu ki aí mo e meʻa ke ke faí (vakai, Tokāteline mo e Ngaahi Fuakava 28:15; 31:11; 75:26–27).

• ʻAi ke fakamoʻoniʻi hoʻo faiakó mo e fakamoʻoní ʻe he fakamoʻoni ʻa e Laumālié (vakai, 2 Nīfai 33:1; Tokāteline mo e Ngaahi Fuakava 100:5–8).

• Kau ʻi he ngaahi ouau ʻo e fakamoʻuí (vakai, Tokāteline mo e Ngaahi Fuakava 84:19–20).

• Foaki ʻa e ngaahi tāpuaki ʻo e lakanga fakataulaʻeikí kapau ko e kaumātuʻa koe (vakai, Sēmisi 5:14–15).

• Lotu fakataha pea mo hūfia ʻa e kakai ʻokú ke ngāue mo kinautolú (vakai, ʻAlamā 6:6; 8:18–22; 10:7–11; 31:26–35; Tokāteline mo e Ngaahi Fuakava 75:19).

• Fakahaaʻi hoʻo ʻofa mo e houngaʻia ki he ʻEikí, ho fāmilí, kau faifekau kehé, pea mo e kakai ʻokú ke ngāue ki aí (vakai, Tokāteline mo e Ngaahi Fuakava 59:7; 78:19).

Naʻá ke maʻu ʻa e meʻafoaki ʻo e Laumālie Māʻoniʻoní ʻi he taimi naʻe hilifakinima ai koe ko e mēmipa ʻo e Siasí. ʻI hoʻo hoko ko e faifekaú—pea ʻi he kotoa hoʻo moʻuí—ko e taha hoʻo ngaahi fiemaʻu maʻongoʻonga tahá ke ʻiate koe ʻa e Laumālie Māʻoniʻoní (vakai, 1 Nīfai 10:17; 3 Nīfai 19:9). Ko e Laumālie Māʻoniʻoní ʻa e mēmipa hono tolu ʻo e Toluʻi ʻOtuá.

ʻE hanga ʻe he Laumālie Māʻoniʻoní ʻo tataki, akoʻi, pea mo fakafiemālieʻi koe. Te Ne fakamaʻa mo fakamāʻoniʻoniʻi koe. Te Ne fakamoʻoniʻi ʻa e moʻoní mo fakamoʻoni ki he Tamaí mo e ʻAló. Ko ia ʻokú ne fakahoko ʻetau uluí mo e ului ʻa kinautolu ʻokú ke akoʻí. (Vakai, 3 Nīfai 27:20; 28:11; ʻEta 12:41; Molonai 8:26; 10:5; Sione 15:26.)

ʻE hanga ʻe he Laumālie Māʻoniʻoní ʻo “fakahā kiate kimoutolu ʻa e meʻa kotoa pē ʻoku totonu ke mou faí” (2 Nīfai 32:5). Te Ne fakalahi ho iví mo hoʻo ngāué ʻo ope atu ʻaupito ʻi he meʻa naʻá ke mei lava ʻo fakahoko ʻiate koe peé.

ʻOku totonu ke hoko ʻa e feinga ke maʻu ʻa e Laumālie Māʻoniʻoní ko e taha ia hoʻo ngaahi fakaʻānaua fakamātoato tahá. Te ke ongoʻi ʻEne takauá ʻi hoʻo:

• Lotú (vakai, Tokāteline mo e Ngaahi Fuakava 42:14).

• Mataʻikoloaʻaki e folofola ʻa e ʻOtuá (vakai, Tokāteline mo e Ngaahi Fuakava 11:21; 84:85).

• Fakamaʻa ho lotó (vakai, Tokāteline mo e Ngaahi Fuakava 112:28).

• Tauhi e ngaahi fekaú (vakai, Tokāteline mo e Ngaahi Fuakava 130:20–21).

• Maʻu ʻa e sākalamēnití ʻi he uike takitaha (vakai, Molonai 4–5; Tokāteline mo e Ngaahi Fuakava 20:77, 79).

ʻĪmisi

Palesiteni Russell M. Nelson

“ʻOku ou kole atu kiate kimoutolu ke fakatupulaki hoʻomou malava fakalaumālie ke maʻu ʻa e fakahaá. Fili ke ke fai ʻa e ngāue fakalaumālie ʻoku fiemaʻu ke ke maʻu ai ʻa e meʻafoaki ʻo e Laumālie Māʻoniʻoní mo toutou fanongo pea mo mahino ange kiate koe ʻa e leʻo ʻo e Laumālié” (“Fakahā maʻá e Siasí, Fakahā ki Heʻetau Moʻuí,” Liahona, Mē 2018, 96).

ʻĪmisi

One by One [Tokotaha Taki Taha], tā fakatātā ʻa Walter Rane

Ko e Ongoongolelei ʻo Kalaisí mo e Tokāteline ʻo Kalaisí

ʻOku fakamahinoʻi ʻe he ongoongolelei ʻo Sīsū Kalaisí hoʻo pōpoakí mo hoʻo taumuʻá. ‘Okú ne fakatou ʻomai ʻa e “meʻa” pea mo e “uhinga” hoʻo ngāue fakafaifekaú. ʻOku kau ʻi Heʻene ongoongoleleí ʻa e kotoa ʻo e ngaahi tokāteline, ngaahi tefitoʻi moʻoni, ngaahi fono, ngaahi fekau, ngaahi ouau, mo e ngaahi fuakava ʻoku fiemaʻu ki he fakamoʻuí mo e hākeakiʻí.

Ko e pōpoaki ʻo e ongoongoleleí te tau lava ʻo maʻu ʻa e mālohi fakahaofi mo e huhuʻi ʻo Sīsū Kalaisí ʻaki haʻatau tui kiate Ia, fakatomala, papitaiso, maʻu ʻa e meʻafoaki ʻo e Laumālie Māʻoniʻoní, pea kātaki ki he ngataʻangá (vakai, 3 Nīfai 27:13–22).

ʻOku toe ʻiloa foki ʻeni ko e tokāteline ʻa Kalaisi. Ko hono moʻui ʻaki ʻo e tokāteline ko ʻení ko e founga ia ʻoku tau haʻu ai kia Kalaisi pea fakahaofí (vakai, 1 Nīfai 15:14). ʻOku akoʻi mahino ʻeni ʻi he Tohi ʻa Molomoná (vakai, 2 Nīfai 31; 32:1–6; 3 Nīfai 11:31–40). Ko hoʻo taumuʻá ke tokoniʻi ʻa e kakaí ke nau haʻu kia Kalaisi ʻaki hono tokoniʻi kinautolu ke nau moʻui ʻaki ʻEne tokāteliné.

ʻĪmisi

Hailame Sāmita

“Malangaʻi ʻa e ngaahi ʻuluaki tefitoʻi moʻoni ʻo e Ongoongoleleí—toe malangaʻi pē kinautolu: pea te ke fakatokangaʻi ʻe fakahā mai kiate koe, mei he ʻaho ki he ʻaho, ha ngaahi fakakaukau foʻou mo ha ngaahi mahino makehe fekauʻaki mo kinautolu. Te ke lava ʻo toe fakamaama ange kinautolu ke mahino lelei ange kiate koe. Pea te ke toki lava leva ʻo ʻai ke mahino ange ia kiate kinautolu ʻokú ke akoʻí” (Hyrum Smith, ʻi he History, 1838–1856, volume E-1 [1 July 1843–30 April 1844], 1994, josephsmithpapers.org).

ʻĪmisi

Ko e Mālohi Fakaului ʻo e Tohi ʻa Molomoná, fai ʻe Ben Sowards

Tui kia Sīsū Kalaisí

Ko e tuí ko e fakavaʻe ia ki he ngaahi tefitoʻi moʻoni kehe kotoa pē ʻo e ongoongoleleí. Ko ha tefitoʻi moʻoni ia ʻo e ngāue mo e mālohi.

Ko ʻetau tuí ʻoku totonu ke nofotaha ia ʻia Sīsū Kalaisi he ʻokú ne taki kitautolu ki he fakamoʻuí. Naʻe akoʻi ʻe he Fakamoʻuí, “He naʻe ʻofa pehē ʻa e ʻOtuá ki māmani, naʻá ne foaki hono ʻAlo pē taha naʻe fakatupú, koeʻuhí ko ia kotoa pē ʻe tui kiate iá ke ʻoua naʻa ʻauha, kae maʻu ʻa e moʻui taʻengatá” (Sione 3:16).

ʻOku kau ʻi he tui kia Sīsū Kalaisi ʻa e tui ko e ʻAlo ʻOfaʻanga Pē Taha ia Naʻe Fakatupu ʻo e ʻOtuá. Ko e falala ia ko Iá ko hotau Fakamoʻui mo e Huhuʻi (vakai, Mōsaia 3:17; 4:6–10; ʻAlamā 5:7–15). Ko e maʻu ia ʻo e falala kakato kiate Ia mo ʻEne folofolá, ngaahi akonakí, mo e ngaahi palōmesí. ʻOku tupulaki ʻetau tui kia Kalaisí ʻi heʻetau muimui ki Heʻene ngaahi akonakí mo e sīpingá ʻi he loto fakamātoato moʻoní (vakai, 2 Nīfai 31:6–13; 3 Nīfai 27:21–22).

ʻI hoʻo hoko ko e faifekaú, tokoniʻi ʻa e kakaí ke nau fakahoko mo tauhi ʻa e ngaahi tukupā ko ē ʻokú ne langaki ʻenau tui kia Sīsū Kalaisí. ʻOku teuteuʻi ʻe he ngaahi tukupā ko ʻení kinautolu ke nau maʻu ʻa e ngaahi ouaú mo fai e ngaahi fuakava mo e ʻOtuá.

ʻE lava ke liliu ʻe he ongongolelei ʻo Sīsū Kalaisí ʻa e anga ʻo ʻetau moʻuí mo hotau kahaʻú. Ko hono ngaahi tefitoʻi moʻoní ʻoku ʻikai ko ha ngaahi sitepu pē ʻoku tau foua tuʻo taha ʻi heʻetau moʻuí. Ko e taimi ʻoku tau toutou fakahoko ai ia ʻi heʻetau moʻuí, ʻoku nau ʻomai kitautolu ke tau ofi ange ki he ʻOtuá mo hoko ko ha sīpinga ʻaonga ʻo e moʻuí. ʻOku nau ʻomai ʻa e nonga, fakamoʻui, mo e fakamolemole. ʻOku nau toe fakamahino foki ʻa e hala kuo foaki ʻe heʻetau Tamai Hēvaní ke tau moʻui taʻengata ai mo Iá.

ʻOku fakahinohino ʻe he ongoongolelei ʻo Sīsū Kalaisí ʻa e anga hoʻo ngāue ko ha faifekaú. ʻOkú ne toe fakatonua foki hoʻo ngaahi ngāué. Tokoniʻi ʻa e kakaí ke nau maʻu ha tui kia Sīsū Kalaisi pea nau fakatomala (vakai, ʻAlamā 34:15–17). Akoʻi mo fakamoʻoniʻi ko e kakato ʻo e ongoongolelei ʻo Sīsū Kalaisí pea mo e mafai ʻo e lakanga fakataulaʻeikí kuo ʻosi fakafoki mai. Fakaafeʻi ʻa e kakaí ke nau papitaiso mo moʻui ʻaki e ngaahi akonaki ʻa e Fakamoʻuí.

Ko e ongoongolelei ʻo Sīsū Kalaisí maʻá e fānau kotoa ʻa e ʻOtuá. ʻOku akoʻi ʻe he folofolá “ʻoku tatau ʻa e taha kotoa” ki he ʻOtuá. ʻOkú Ne fakaafeʻi ʻa e “[taha] kotoa ke nau haʻu kiate ia ʻo maʻu ʻi heʻene angaleleí; pea ʻoku ʻikai te ne taʻofi ha tokotaha ʻoku haʻu kiate ia” (2 Nīfai 26:33).

ʻOku tāpuakiʻi kitautolu ʻe he ongoongoleleí ʻi heʻetau moʻui fakamatelié pea mo ʻitāniti. ʻOku ngali te tau fiefia—fakafoʻituitui mo fakafāmili fakatouʻosi—ʻi he taimi ʻoku tau moʻui ʻaki ai ʻa e ngaahi akonaki ʻa Sīsū Kalaisí (vakai, Mōsaia 2:41; “Ko e Fāmilí: Ko ha Fanongonongo ki Māmani,” ChurchofJesusChrist.org). ʻOku hanga ʻe he moʻui ʻaki e ongoongoleleí ʻo fakalahi ʻetau fiefiá, tataki ʻetau tōʻongá, mo fakaleleiʻi ʻetau ngaahi fetuʻutakí.

Ko e taha ʻo e ngaahi pōpoaki maʻongoʻonga ʻo e fakafoki mai ʻo e ongoongoleleí ʻa ʻetau hoko kotoa ko e konga e fāmili ʻo e ʻOtuá. Ko kitautolú ko Hono ngaahi foha mo e ngaahi ʻofefine ʻofeina. Tatau ai pē pe ko e hā e tuʻunga hotau fāmilí ʻi māmani, ko kitautolú takitaha ko ha mēmipa ʻo e fāmili ʻo e ʻOtuá.

Ko ha konga maʻongoʻonga ʻe taha ʻo ʻetau pōpoakí ko e lava ko ia ʻa e ngaahi fāmilí ke fakatahaʻi ʻo taʻengatá. Ko e fāmilí ko e tuʻutuʻuni ia ʻa e ʻOtuá. Kuo akoʻi ʻe he kau palōfita ʻo e Ngaahi ʻAho Kimui Ní:

ʻOku ʻai ʻe he palani fakalangi ʻa e [Tamai Hēvaní] ke lava ʻa e ngaahi feohi fakafāmilí ʻo tolonga kae ʻikai ngata pē ʻi faʻitoka. ʻOku hanga ʻe he ngaahi ouau toputapu mo e ngaahi fuakava ʻi he ngaahi temipalé ʻo ʻai ke lava ʻa e fakafoʻituituí ʻo toe foki ki he ʻao ʻo e ʻOtuá pea mo e ngaahi fāmilí ke fakatahaʻi ʻo taʻengata” (“Ko e Fāmili: Ko ha Fanongonongo ki Māmani”).

ʻOku tokolahi ha kakai ʻoku siʻisiʻi hanau faingamālie ke mali pe ha ngaahi faingamālie ki ha ngaahi feohi ʻofa ko ha fāmili. Ko ha tokolahi kuo nau foua ʻa e vete malí mo ha ngaahi tūkunga faingataʻa fakafāmili kehe. Ka, ʻoku tāpuakiʻi kitautolu fakafoʻituitui ʻe he ongoongoleleí neongo pe ko e hā e tūkunga hotau fāmilí. ʻI heʻetau faivelengá, ʻe foaki mai ʻe he ʻOtuá ha founga ke tau maʻu ai ʻa e ngaahi tāpuaki ʻo ha ngaahi fāmili ʻofa, ʻi he moʻuí ni pe ʻi he moʻui ka hokó (vakai, Mōsaia 2:41).

Tatau ai pē pe ʻokú ke ngāue ʻi fē pe ko hai ʻokú ke akoʻí, fakatefito hoʻo faiakó ʻia Sīsū Kalaisi mo e Fakafoki Mai ʻo ʻEne ongoongoleleí. ʻI hoʻo ako ko ia ʻa e tokāteline ʻi he ngaahi lēsoni fakafaifekaú, te ke fakatokangaʻi ʻoku ʻi ai haʻatau pōpoaki pē taha: Ko Sīsū Kalaisi ʻa e Kalaisí ko hotau Fakamoʻui mo e Huhuʻi. Kuo ʻosi fakafoki mai ʻe he Tamai Hēvaní, ʻi ha palōfita ʻo onopooni, ʻa e ʻilo ki Heʻene palani ki hotau fakamoʻuí. ʻOku fakatefito ʻeni ʻia Sīsū Kalaisi. Tuʻunga ʻi Heʻene feilaulau fakaleleí, ʻoku hanga ai ʻe he Fakamoʻuí ʻo ʻai ke lava ʻo fakahaofi kātoa kitautolu mei he angahalá mo e maté pea foki ki he Tamai Hēvaní.

Tokoni ke mahino ki he kakai ʻokú ke akoʻí ʻa e ngaahi meʻa ko ʻení:

• Ko e ʻOtuá ʻa ʻetau Tamai Hēvaní. ʻOku haohaoa ʻa ʻEne ʻofa ʻiate kitautolú. Ko e tokotaha kotoa ʻi māmani ko e fānau ia ʻa e ʻOtuá pea ʻokú ne kau ki he fāmili ʻo e ʻOtuá.

• Kuo tuku mai ʻe he Tamai Hēvaní ha palani ke tau maʻu ʻa e moʻui fakamatelié mo e moʻui taʻengatá, ʻa ia ko ʻEne ongo tāpuaki maʻongoʻonga tahá ia (vakai, Mōsese 1:39). Kuo tau ōmai ki māmaní ke ako, tupulaki, mo teuteu ki he kakato ʻo ʻEne ngaahi tāpuakí.

• Ko e konga ʻo ʻEne palaní, kuo foaki mai ai ʻe he Tamai Hēvaní ha ngaahi fekau ke tataki kitautolu ʻi he lolotonga ʻo e moʻui ko ʻení mo tokoni ke tau foki ange kiate Ia (vakai, hangē ko ʻení, ʻEkesōtosi 20:3–17).

• ʻI he moʻui ní, ʻoku tau faiangahala kātoa, ʻoku tau mate kātoa. Kae tuʻunga ʻi he ʻofa ʻa e Tamai Hēvaní kiate kitautolú, naʻá Ne fekau mai ai Hono ʻAlo ko Sīsū Kalaisí, ke huhuʻi kitautolu mei he angahalá mo e maté.

• Tuʻunga ʻi he feilaulau fakalelei ʻa Sīsuú, ʻe lava ke fakamaʻa kitautolu mei heʻetau ngaahi angahalá ʻi haʻatau fakatomala mo papitaiso mo hilifakinima kitautolu. ʻOku ʻomai ʻe he meʻá ni ʻa e nongá kiate kitautolu mo ʻai ke tau lava ʻo toe foki ki he ʻao ʻo e ʻOtuá pea maʻu ʻa e kakato ʻo e fiefiá.

• Tuʻunga ʻi he Toetuʻu ʻa Sīsuú, te tau toetuʻu kātoa ʻi he hili ʻetau maté. ʻOku ʻuhinga ʻeni ʻe toe fakatahaʻi ʻa e laumālie mo e sino ʻo e taha takitaha pea moʻui ʻo taʻengata.

• ʻI he kotoa e hisitōlia ʻo e tohi tapú, naʻe fakahā ʻe he ʻEikí ʻEne ongoongoleleí mo fokotuʻu Hono Siasí ʻi ha kau palōfita. Naʻe toutou fakasītuʻaʻi ia ʻe he meimei kakai kotoa pē. Naʻe kamata ʻi he Fuakava Motuʻá ha sīpinga ʻo ha hē mei he ongoongoleleí mo ha fiemaʻu ke toe fakafoki mai.

• Hili ʻa e pekia mo e Toetuʻu ʻa e Fakamoʻuí, naʻe taki ʻe Heʻene kau ʻAposetoló ʻa e Siasí ʻi ha vahaʻa taimi. Naʻe aʻu ʻo nau pekia, mole ʻa e mafai ʻo e lakanga fakataulaʻeikí, pea hoko ha toe hē mei he ngaahi akonaki ʻa e Fakamoʻuí. Naʻe liliu ʻe he kakaí ʻa e tokāteliné mo e ngaahi ouaú.

• Naʻe fakafoki mai ʻa e ongoongolelei ʻo Sīsū Kalaisí ʻe he Tamai Hēvaní ʻi he Palōfita ko Siosefa Sāmitá. Naʻe hā ʻa e Tamai Hēvaní mo Sīsū Kalaisi kia Siosefa Sāmita ʻi he faʻahitaʻu failau ʻo e 1820. Pea maʻu kimui ai ʻe Siosefa Sāmita ʻa e mafai ʻo e lakanga fakataulaʻeikí pea naʻe fakahinohino ke ne fokotuʻu ʻa e Siasi ʻo Sīsū Kalaisí ʻi māmani.

Akoʻi ange ko e Siasi ʻo Sīsū Kalaisí ʻoku ʻikai ko ha toe tui fakalotu pē. Pe ko ha Siasi faka-ʻAmelika. Ka, ko hono fakafoki mai ia ʻo e “kakato ʻo e ongoongolelei” ʻo Sīsū Kalaisí (Tokāteline mo e Ngaahi Fuakava 1:23). He ʻikai ke toe ʻave ia mei māmani.

Ko e Tohi ʻa Molomoná: Ko ha Fakamoʻoni ʻe Taha kia Sīsū Kalaisi, ʻoku fakamoʻoni kia Sīsū Kalaisi mo hono misiona fakalangí, ko e Fakamoʻui ʻo e māmaní. ʻOku toe hoko foki ia ko ha fakamoʻoni mālohi ko Sīsū Kalaisi naʻá Ne fakafoki mai ʻEne ongoongoleleí mo Hono Siasí ʻi he Palōfita ko Siosefa Sāmitá. Fakaafeʻi mo tokoniʻi ʻa e kakaí ke nau lau ʻa e Tohi ʻa Molomoná mo lotua ʻene pōpoakí.

Falala ki he talaʻofa fakaofo ʻi he Molonai 10:3–5. Fakalotolahiʻi ʻa e kakaí ke nau fehuʻi fakamātoato ki he ʻOtuá, ʻi he loto moʻoni, pe ko e Tohi ʻa Molomoná ko e folofola ia ʻa e ʻOtuá. ʻOku ʻuhinga ʻa e lotu ʻi he loto fakamoʻomoʻoní ke loto-fiemālie ke fakahoko ʻa e tali ʻe maʻu mei he fakamoʻoni ʻa e Laumālie Māʻoniʻoní. ʻOku hoko ʻa e fakamoʻoni ko iá ko e fakavaʻe ʻo e tui ʻa ha taha kuo ʻosi fakafoki mai ʻe Kalaisi ʻa Hono Siasí. Tokoniʻi ʻa kinautolu ʻokú ke akoʻí ke nau kumi ki he fakamoʻoni fakalaumālie ko iá.

Ko e taimi naʻe fakafoki mai ai ʻe Sīsū Kalaisi Hono Siasí, naʻá ne fakahinohinoʻi ʻa e Palōfita ko Siosefa Sāmitá mo ha niʻihi kehe ke nau “fokotuʻu” mo “langa hake ia” (Tokāteline mo e Ngaahi Fuakava 31:7; 39:13). ʻOku fokotuʻu mo langa hake ʻa e Siasí ʻi he taimi ʻoku papitaiso ai mo hilifakinima ʻa e kakai ʻoku ʻi ai haʻanau fakamoʻoní, tauhi ʻenau ngaahi fuakavá, teuteu ke ō ki he temipalé, mo tokoni ke fakamālohia honau uōtí pe koló.

ʻĪmisi

ko ha tangata ʻoku lotu

ʻI hoʻo hoko ko e faifekaú, ʻoku ke tokoni ʻi he fokotuʻu mo langa hake ʻa e Siasi ʻo e Fakamoʻuí. ʻOku lahi e ngaahi founga te ke lava ai ʻo fakahoko ʻení. Te ke lava ʻo poupou ki he kāingalotú ʻi heʻenau vahevahe ʻa e ongoongoleleí ʻi he tefitoʻi moʻoni ʻo e ʻofá, vahevahé, mo e fakaafé (vakai, Tohi Tuʻutuʻuni Fakakātoá, 23.1). Te ke lava ʻo tokoni ki he kakaí ke nau papitaiso mo tupulaki ʻi heʻenau tuí. Te ke lava ʻo tokoni ki he kāingalotú ʻi heʻenau fakaangaanga ki heʻenau moʻui foʻoú pea mo kei tupulaki fakalaumālie. Te ke toe lava foki ʻo tokoni ki he kāingalotu foki maí ke fakamālohia ʻenau tui kia Sīsū Kalaisí.

ʻOku tupulaki ʻa e fakamoʻoni mo e tui ʻa e kāingalotu foki maí ʻi he taimi ʻoku nau foua ai e ngāue ʻa e ongoongoleleí ʻi heʻenau moʻuí. Ke fakahoko ʻeni, ʻoku mahuʻinga:

• Ke nau maʻu ha ngaahi kaungāmeʻa ko ha kau mēmipa ʻo e Siasí.

• Foaki ange ha fatongia ʻi he Siasí.

• Ke fafangaʻi ʻaki e folofola ʻa e ʻOtuá.

(Vakai, Gordon B. Hinckley, “Converts and Young Men,” Ensign, May 1997, 47.)

Ko e kau faifekaú, kau taki fakafeituʻú, mo e kāingalotu kehe ʻo e Siasí, ʻoku totonu ke nau tali fiefia ʻa e faingamālie ke fafangaʻi mo fakamālohia ʻa e kāingalotu foʻoú mo e kau foki maí. ʻOku tokoni ʻa e ngāue ko ʻení “ke tauhi ʻa kinautolu ʻi he hala totonú” (Molonai 6:4).

Naʻe tokoniʻi ʻe he Fakamoʻuí ha kakai kehe ʻi he lolotonga ʻo ʻEne ngāue ʻi he matelié. Naʻá Ne “fai lelei” mo “malanga ʻaki ʻa e ongoongoleleí” (Ngāue 10:38; Mātiu 4:23). ʻI hoʻo muimui ki Heʻene sīpingá, te ke maʻu ʻa e kakai te ke lava ʻo tokoni ki ai pea te nau tali koé.

ʻI he ngāué, te ke fakahoko ai ʻa e ongo fekau lahi ʻe ua ke ʻofa ki he ʻOtuá mo ʻofa ki ho kaungāʻapí (vakai, Mātiu 22:36–40; 25:40; Mōsaia 2:17). ʻI he ngāué, te ke ala fakatahataha ai mo ha niʻihi kehe ʻi ha founga fakaʻofoʻofa mo fakalaumālie.

ʻI hoʻo hoko ko e faifekaú, te ke fakahoko ai ha ngāue tokoni kuo palani ʻi he uike takitaha (vakai, Ngaahi Tuʻunga Moʻui Fakafaifekaú, 2.7 mo e 7.2, ki ha fakamatala mo ha ngaahi fakahinohino. Te ke lava ʻi he malumalu ʻo e fakahinohino ʻa e palesiteni fakamisioná, ke maʻu ha ngaahi faingamālie ke tokoni ʻi he koló ʻo fakafou ʻi he JustServe (ʻi he feituʻu kuo fakangofua aí) pea mo e ngaahi ngāue tokoni ʻofa fakaetangata ʻa e Siasí mo e ngaahi meʻa ʻi he fakatamakí.

Lotu ʻi he lolotonga ʻo e ʻahó, mo siofi ha ngaahi faingamālie naʻe ʻikai palani ke fai ai ha ngāue lelei. Fakafanongo ki he Laumālié ke ke fakatokangaʻi ʻa e taimi ʻe lava ke ke fakahoko ai ha fanga kiʻi ngāue ʻofá.

ʻĪmisi

Palesiteni Gordon B. Hinckley

“ʻOkú ke fie fiefia? Fakangaloki pea fakafemoʻuekinaʻi koe ʻi he ngāue maʻongoʻongá ni. Foaki ho iví ke tokoni ki he kakaí. … ʻAi ke ke toe lelei ange, hiki hake kinautolu ʻoku [vaivai] ʻenau tuí, hiki hake ʻa e nima ʻo kinautolu ʻoku tāupe ki laló. Moʻui ʻaki e ongoongolelei ʻo Sīsū Kalaisí” (Palesiteni Kōtoni B. Hingikelī, Ngaahi Akonaki ʻa e Kau Palesiteni ʻo e Siasí: Kōtoni B. Hingikelī [2016), 229–30).

Ko hoʻo ikuna ʻi he ngāue fakafaifekaú ʻoku meimei ke fakafuofua pē ia ʻi hoʻo loto-holi mo tukupā ke kumi, akoʻi, papitaiso, mo hilifakinima ʻa e kau uluí pea mo tokoni ke nau hoko ko ha kau ākonga faivelenga ʻa Kalaisí mo e kau mēmipa ʻo Hono Siasí (vakai, ʻAlamā 41:3).

‘Oku ʻikai fakafuofuaʻi hoʻo lavameʻá ʻi he tokolahi ʻo e kakai ʻokú ke akoʻi pe tokoni ke nau papitaisó. Pe ʻe fakafuofuaʻi ʻi haʻo maʻu ha ngaahi tuʻunga fakatakimuʻa.

ʻOku ʻikai makatuʻunga hoʻo lavameʻá ʻi he fili ʻa ha niʻihi ke tali koe, pe tali hoʻo ngaahi fakaafé, pe ki heʻenau meʻa ʻoku fai ʻi hoʻo ngaahi tōʻonga ʻofa fakamātoató. ʻOku maʻu ʻe he kakaí ʻa e tauʻatāina ke fili pe te nau tali pe ʻikai tali ʻa e pōpoaki ʻo e ongoongoleleí. Ko ho fatongiá pē ke akoʻi mahino pea mo pau kinautolu koeʻuhí ke nau lava ʻo fai ha fili ʻilopau te ne tāpuakiʻi kinautolu.

Fakakaukau ki he talafakatātā ʻa e Fakamoʻuí ki he ngaahi talēnití ʻi he Mātiu 25:14–28. Naʻe fakatou fakahīkihikiʻí ʻe he pulé, ʻa ia ʻokú ne fakafofongaʻi ʻa e ʻEikí, ʻa ʻEne ongo tamaioʻeiki faivelengá neongo naʻe kehekehe ʻa e lalahi ʻo ʻena feilaulaú (vakai, Mātiu 25:21, 23). Naʻá ne toe ʻoange foki kiate kinaua fakatouʻosi ʻa e pale tatau, mo fakaafeʻi ke na hū ki he fiefiaʻanga ʻo hona ʻeikí” koeʻuhí ne naʻá na fakalahi ʻa e meʻa naʻe foaki kiate kinauá.

Kuo foaki atu ʻe he ʻOtuá kiate koe ha ngaahi talēniti mo ha ngaahi meʻaʻofa ke ke fakaʻaongaʻi ʻi Heʻene ngāué. Ko ho ngaahi talēnití mo e ngaahi meʻafoakí ʻoku kehe ia mei he niʻihi kehé. Fakatokangaʻi ko e ngaahi meʻá ni kotoa ʻoku mahuʻinga, kau ai mo ia ʻoku ʻikai fuʻu fakatokangaʻí. Ko e taimi ʻokú ke fakatapui ai ho ngaahi talēnití mo e ngaahi meʻafoakí kiate Iá, te Ne fakalahi kinautolu mo fakahoko ha ngaahi mana ʻi he meʻa ʻokú ke foakí.

Fakaʻehiʻehi mei he fakatauhoa koe ki he kau faifekau kehé pea mo hono fuatatau ʻa e ola hoʻo ngaahi ngāue ʻoku hā ki tuʻá ki haʻanautolú. Ko e fakatauhoá ʻoku faʻa fakaiku ki ha ikuʻanga kovi, hangē ko e loto-foʻí pe hīkisiá. ʻOku toe faʻa takihala foki mo e fakatauhoá. Ko e meʻa ʻoku fiemaʻu ʻe he ʻEikí ko hoʻo lelei taha pē ʻaʻaú—ke ke “tauhi kiate ia ʻaki e kotoa ho lotó, iví, ʻatamaí mo e mālohí” (Tokāteline mo e Ngaahi Fuakava 4:2; ko e tānaki atu e fakamamafaʻi).

Mahalo te ke loto-mamahi kapau ʻoku teʻeki tali ʻe he kakaí ʻa e ongoongoleleí. Te ke ala ongoʻi loto-foʻi ʻi he taimi ʻe niʻihi. Naʻa mo e kau faifekau maʻongoʻonga mo e kau palōfita ʻi he folofolá naʻá na faʻa ongoʻi loto-foʻi ʻi he taimi ʻe niʻihi (vakai, 2 Nīfai 4:17–19; ʻAlamā 26:27). ʻI he faʻahinga taimi peheé, muimui ʻi he sīpinga ʻa Nīfaí ʻi heʻene tafoki ki he ʻEikí, falala kiate Ia, lotua ha ivi, mo manatuʻi ʻa e ngaahi meʻa lelei kuó Ne fakahoko maʻaú (vakai, 2 Nīfai 4:16–35).

ʻĪmisi

ongo faifekau ʻokú na lotu

ʻI hoʻo tafoki ki he ʻEikí ʻi he ngaahi taimi faingataʻá, kuó Ne talaʻofa, “te u fakamālohia koe; ʻio, te u tokoniʻi koe; ʻio, te u poupouʻi hake koe” (ʻĪsaia 41:10). Te ke lava ʻi hoʻo tui kia Kalaisí ke maʻu ha nonga mo ha fakamahino ki hoʻo ngaahi ngāué. ʻE tokoniʻi koe ʻe he tuí ke ke tuiaki mo hoko atu ʻi he ngaahi holi māʻoniʻoní.

Tokanga pē ki hoʻo tukupā kia Kalaisí mo hoʻo taumuʻa fakafaifekaú—kae ʻikai ko e ngaahi ola ʻoku hā ki tuʻá. Ko e ngaahi ola ko ʻení ʻoku ʻikai ke faʻa hoko vave leva. ʻI he taimi tatau pē, pukepuke hoʻo ngaahi fakaʻamú ke mahuʻinga taha ʻi he ngaahi pole ʻokú ke fehangahangai mo iá. ʻE hanga ʻe he ngaahi fakaʻamu māʻolungá ʻo fakatupulaki hoʻo leleí, hoʻo fakaʻamú, pea mo hoʻo malava ke muimui ʻi he Laumālié.

ʻOku ʻoatu ʻi lalo ha niʻihi ʻo e ngaahi founga te ke lava ai ʻo fakafuofuaʻi hoʻo tukupā ki he ʻEikí pea mo hoʻo feinga ke hoko ko ha faifekau lavameʻá.

• Feinga faivelenga ke hoko ko ha ākonga ʻa Sīsū Kalaisi, ako ʻiate Ia mo fakalakalaka māmālie (vakai, Sione 8:31; 2 Nīfai 28:30).

• Kumi ki he ngaahi ʻulungaanga faka-Kalaisí (vakai, 2 Pita 1:2–9; Tokāteline mo e Ngaahi Fuakava 4:5–6).

• ʻOfa moʻoni ʻi he kakaí pea fai hoʻo lelei tahá ʻi he ʻaho kotoa ke ʻomai ha ngaahi laumālie kia Kalaisi (vakai, 1 Kolinitō 13; Molonai 7:45–48).

• Fakaafeʻi ʻa e kakaí ke nau fai ha ngaahi tukupā mo tauhi ʻa e ngaahi tukupā te ne langaki ʻenau tui ki he Fakamoʻuí.

• Ako ʻa e folofolá, mo lotu faivelenga ke fakahaaʻi hoʻo fakamāloó mo kole ha tokoni fakalangi (vakai, Sione 5:39; 2 Nīfai 32:3; ‘Inosi 1:4; ʻAlamā 37:37; Tokāteline mo e Ngaahi Fuakava 26:1).

• Talangofua ki he ngaahi fekau ʻa e ʻOtuá mo tauhi ʻa e ngaahi tuʻunga moʻui fakafaifekaú (vakai, Tokāteline mo e Ngaahi Fuakava 35:24).

• Moʻui ke lava ʻa e Laumālié ʻo tataki koe ʻi he feituʻu ke ke ʻalu ki aí, meʻa ke ke fakahokó, mo ia ke ke lea ʻakí (vakai, Tokāteline mo e Ngaahi Fuakava 18:18; 42:14).

• Fokotuʻu ha ngaahi taumuʻa ʻi he faʻa lotu, faʻu ha ngaahi palani, pea ngāue ke fakahoko kinautolu (vakai, Luke 14:28; Tokāteline mo e Ngaahi Fuakava 88:119).

• Langa hake mo fakamālohia ʻa e uooti pe kolo kuo vahe koe ki aí (vakai, Tokāteline mo e Ngaahi Fuakava 18:5).

• Feʻaluaki ʻo failelei mo tokoni ki he kakaí ʻi he faingamālie kotoa pē, tatau ai pē pe ʻoku nau tali hoʻo pōpoakí pe ʻikai (vakai, Ngāue 10:38).

Ko e taimi ko ē kuó ke ʻosi fai ai hoʻo lelei tahá, mahalo te ke kei taʻefiemālie, ka he ʻikai ke ke loto-mamahi ʻi he ngāue kuó ke faí. Te ke lava ʻo ongoʻi fakapapau ʻoku hōifua ʻa e ʻEikí, ʻi he taimi te ke ongoʻi ai ʻoku ngāue ʻa e Laumālié ʻiate koé.