Փնտրեք և ապավինեք Հոգուն

Սուրբ Հոգին Աստվածագլխի երրորդ անդամն է։ Նա հոգեղեն անձնավորություն է և չունի մսից ու ոսկորներից մարմին (տես Վարդապետություն և Ուխտեր 130.22 հատվածը)։ Նա Փրկչի կողմից խաստացված Մխիթարիչն է, ով կուսուցանի Իր հետևորդներին ամեն բան և կհիշեցնի նրանց այն, ինչ Հիսուսն ուսուցանել էր (տես Հովհաննես 14.26 հատվածը):

Նախքան մկրտությունը ճշմարտության անկեղծ որոնողներին եկող վկայությունը գալիս է Սուրբ Հոգու զորությամբ: Բոլոր մարդիկ կարող են վկայություն ստանալ Հիսուս Քրիստոսի և Նրա վերականգնված ավետարանի մասին Սուրբ Հոգու զորությամբ: «Սուրբ Հոգու զորությամբ [մենք] կարող եք իմանալ ճշմարտությունը բոլոր բաների վերաբերյալ» (Մորոնի 10.5):

Սուրբ Հոգու պարգևը Սուրբ Հոգու մշտական ընկերակցությունն ունենալու իրավունքն է, եթե մենք արժանի ենք: Մենք ստանում ենք Սուրբ Հոգու պարգևը ջրով մկրտվելուց հետո: Այն շնորհվում է հաստատման արարողության միջոցով:

Մարգարե Ջոզեֆ Սմիթն ասել է. «Սուրբ Հոգու և Սուրբ Հոգու պարգևի միջև տարբերություն կա: Կոռնելիոսը ստացել է Սուրբ Հոգին նախքան մկրտվելը, որը նրա համար Աստծո համոզիչ զորությունն էր Ավետարանի ճշմարտության վերաբերյալ, սակայն նա մինչ մկրտվելը չէր կարող ստանալ Սուրբ Հոգու պարգևը» (Եկեղեցու Նախագահների ուսմունքները․ Ջոզեֆ Սմիթ [2007], 97):

Մենք սրբագործվում ենք Սուրբ Հոգու պարգևով և զորությամբ, դառնալով ավելի սուրբ, ավելի ամբողջական, ավելի լիարժեք, ավելի նման Աստծուն: Պահելով Աստծո հետ կապած մեր ուխտերը, մենք կարող ենք հոգևորապես վերածնվել Քրիստոսի փրկագնման և Սուրբ Հոգու սրբագործող զորության միջոցով (տես Մոսիա 27.25–26 հատվածները):

Սուրբ Հոգին նաև կոչում են Խոստումի Սուրբ Հոգի (տես Վարդապետություն և Ուխտեր 88.3 հատվածը): Ըստ այդմ՝ Սուրբ Հոգին հաստատում է, որ քահանայության արարողությունները, որոնք մենք ստանում ենք, և ուխտերը, որոնք կապում ենք, ընդունելի են Աստծո կողմից: Խոստումի Սուրբ Հոգով կնքվածները կստանան այն ամենը, ինչ ունի Հայրը (տես Վարդապետություն և Ուխտեր 76.51–60, Եփեսացիս 1.13–14 հատվածները, Սուրբ գրքերի ուղեցույց, «Խոստումի Սուրբ Հոգի»):

Բոլոր արարողությունները և ուխտերը պետք է կնքվեն Խոստումի Սուրբ Հոգով, որպեսզի վավեր լինեն այս կյանքից հետո (տես Վարդապետություն և Ուխտեր 132.7, 18–19, 26 հատվածները): Այդ կնքումը կախված է մեր շարունակական հավատարմությունից:

Տերը մեզ Հոգևոր պարգևներ է տալիս, որպեսզի օրհնի մեզ և մեր միջոցով օրհնի ուրիշներին (տես Վարդապետություն և Ուխտեր 46.8–9, 26 հատվածները): Օրինակ՝ այն միսիոներները, որոնք նոր լեզու են սովորում, կարող են լեզուների պարգև ստանալ, որպես աստվածային օգնություն՝ ուրիշներին իրենց մայրենի լեզվով ուսուցանելու համար:

Հոգու մի քանի պարգևներ նկարագրված են Մորոնի 10.8–18, Վարդապետություն և Ուխտեր 46.11–33 և Ա Կորնթացիս 12.1–12 հատվածներում։ Սրանք Հոգու բազմաթիվ պարգևներից միայն մի քանիսն են: Տերը կարող է օրհնել մեզ այլ պարգևներով՝ կախված մեր հավատարմությունից, մեր կարիքներից և ուրիշների կարիքներից:

Փրկիչն առաջարկում է մեզ ջանասիրաբար փնտրել հոգևոր պարգևներ (տես Վարդապետություն և Ուխտեր 46.8, Ա Կորնթացիս 14.1, 12 հատվածները): Այս պարգևները գալիս են աղոթքով, հավատքով և ջանքերով, և ըստ Աստծո կամքի:

Հիսուսն ուսուցանել է մեզ, թե ինչպես աղոթել (տես Մատթեոս 6.9–13, 3 Նեփի 18.19 հատվածները): Աղոթեք անկեղծորեն և անկեղծ միտումով և գործեք համաձայն հուշումների, որոնք դուք ստանում եք Սուրբ Հոգուց: Արդյունավետ աղոթքը խոնարհ, շարունակական ջանքեր է պահանջում (տես Մորոնի 10.3–4, Վարդապետություն և Ուխտեր 8.10 հատվածները):

Օգտագործեք այնպիսի արտահայտություններ, որոնք փոխանցում են Աստծո հետ սիրո և երկրպագության հարաբերություններ։ Անգլերենում օգտագործեք սուրբգրային բառաձևեր օրինակ՝ դու, քո և քոնը սովորական դերանունների փոխարեն օգտագործեք հին անգլերենի դերանունները։

Միշտ երախտագիտություն հայտնեք: Երախտապարտ լինելու գիտակցված ջանքերը կօգնեն ձեզ ճանաչել, թե որքան ողորմած է Աստված ձեր կյանքում: Այն կբացի ձեր սիրտն ու միտքը ոգեշնչման համար:

Աղոթեք «սրտի ողջ կորովով», որպեսզի գթություն շնորհվի ձեզ (Մորոնի 7.48): Աղոթեք ուրիշների համար անուն առ անուն: Աղոթեք նրանց համար, ում սովորեցնում եք: Ոգեշնչում փնտրեք, թե ինչպես առաջարկել և օգնել նրանց գալ դեպի Քրիստոսը:

Ե՞րբ է պետք աղոթել։ Տերն ասել է. «Ջանասիրաբար փնտրեք, աղոթեք անդադար և եղեք հավատացող, և բոլոր բաները միաժամանակ կգործեն ձեր բարիքի համար» (Վարդապետություն և Ուխտեր 90.24):

Ալման ասել է. «Խորհուրդ արա Տիրոջ հետ քո բոլոր գործերում, և նա ուղղություն ցույց կտա քեզ բարու համար. այո, երբ դու պառկես գիշերը, պառկիր ի Տերը, որ նա կարողանա հսկել քեզ քնիդ մեջ, և երբ դու վեր կենաս առավոտյան, թող քո սիրտը լի լինի գոհությամբ առ Աստված» (Ալմա 37․37, տես նաև 34․17–27 հատվածները)։

Տերն առաջարկում է ձեզ հանգիստ և մեկուսացված պայմաններում ժամանակ հատկացնել աղոթելու համար. «Մտի՛ր քո սենյակը և … աղոթիր քո Հորը» (3 Նեփի 13.6, տես նաև հատվածներ 7–13):

Նախագահ Գորդոն Բ. Հինքլին ուսուցանել է. «Ամեն առավոտ …… , միսիոներները պետք է ծնկի գան և աղերսեն Տիրոջը, որ արձակի իրենց լեզուն և խոսի իրենց միջոցով՝ օրհնելու համար նրանց, ում պետք է ուսուցանեն։ Երբ նրանք անեն դա, նոր լույս կհայտնվի իրենց կյանքում: Գործելու նկատմամբ ավելի մեծ խանդավառություն կլինի։ Նրանք կիմանան, որ շատ իրական զգացումով իրենք Տիրոջ ծառաներն են, ովքեր խոսում են Նրա անունից» (“Missionary Service,” First Worldwide Leadership Training Meeting, Jan. 11, 2003, 20):

Աստծո հանդեպ հավատք ունենալը նշանակում է վստահել Նրան: Սա իր մեջ վստահություն է ներառում Նրա կամքի և Նրա ժամանակի հանդեպ, որն ուղված է ձեր աղոթքներին ի պատսախան (տես Եսայիա 55.8–9 հատվածները): Նախագահ Դալլին Հ. Օուքսն ուսուցանել է․

«Անկախ այն բանից, թե որքան ուժեղ է մեր հավատքը, այն չի կարող տալ այնպիսի արդյունք, որը հակառակ լինի Նրա կամքին, ում հավատում ենք: Հիշեք, թե երբ ձեր աղոթքներին չի տրվում պատասխան ձեր ցանկալի ձևով կամ ձեր ցանկացած ժամանակ: Տեր Հիսուս Քրիստոսի հանդեպ հավատքի գործադրումը միշտ ենթարկվում է երկնքի կարգին, Տիրոջ բարությանը և կամքին, իմաստությանն ու ժամանակին: Երբ մենք նման կերպով ենք հավատում և վստահում Տիրոջը, մենք իրական անվտանգություն և անդորր ենք ունենում մեր կյանքում» («The Atonement and Faith», Ensign, ապր. 2010, 30):

Ինչ վերաբերում է անպատասխան թվացող աղոթքներին, Նախագահ Ռասել Մ. Նելսոնն ասել է.

«Ինձ ծանոթ է այս զգացողությունը: Ինձ ծանոթ են այս պահի հետ կապված վախերն ու արցունքները: Սակայն ես նաև գիտեմ, որ մեր աղոթքները երբեք չեն անտեսվում: Մեր հավատքը երբեք չգնահատված չի մնում: Ես գիտեմ, որ գերիմաստուն Երկնային Հայրն ավելի հեռուն է տեսնում, քան մենք։ Մենք տեղյակ ենք միայն մեր մահկանացու խնդիրների և ցավերի մասին, իսկ Նա տեղյակ է մեր հավերժ առաջընթացի և ներուժի մասին: Եթե մենք աղոթում ենք՝ Նրա կամքն իմանալու և այդ կամքին համբերությամբ և քաջությամբ հնազանդվելու համար, երկնային բժշկումը կարող է տեղի ունենալ Նրա ձևով և Նրա ժամանակին» («Հիսուս Քրիստոսը՝ Բժշկող Տերը», Լիահոնա, նոյ. 2005, 86):

Ոգեշնչման համար աղոթելիս, համեմատեք ձեր հոգևոր տպավորությունները սուրբ գրությունների և ապրող մարգարեների ուսմունքների հետ: Հոգուց եկող տպավորությունները կհամապատասխանեն այս աղբյուրներին:

Համոզված եղեք, որ ձեր ստացած զգացմունքները համապատասխանում են ձեր հանձնարարությանը: Եթե դուք կանչված չեք ճիշտ իշխանության կողմից, ուրիշներին խորհուրդ տալու կամ ուղղելու համար Հոգուց եկող տպավորությունները չեն տրվի ձեզ: Օրինակ՝ դուք հայտնություն չեք ստանա, որպեսզի եպիսկոպոսին ասեք, թե նա ինչ պետք է անի իր կոչման մեջ:

Նկար

Լույսի պարգևը

Հայտնաբերեք Հոգու իրական ազդեցությունը

Նախագահ Հովարդ Վ. Հանթերը խորհուրդ է տվել. «Թույլ տվեք զգուշացնել: … Կարծում եմ, եթե մենք զգույշ չլինենք…, մենք կարող ենք անարժան և մանիպուլյատիվ միջոցներով կեղծիքի փորձեր սկսել Տիրոջ Հոգու իրական ազդեցության դեմ: Ես մտահոգվում եմ, երբ կարծես թե ուժեղ հույզերը կամ ազատ հոսող արցունքները հավասարեցվում են Հոգու ներկայության հետ: Անշուշտ Տիրոջ Հոգին կարող է առաջացնել ուժեղ հուզական զգացողություններ, ներառյալ արցունքներ, բայց այդ արտաքին դրսևորումը չպետք է շփոթել Հոգու՝ իր իսկ ներկայության հետ» (Հովարդ Վ․ Հանթերի ուսմունքները [1997], 184)։

Հոգևոր գործերը չեն կարող պարտադրվել: Դուք կարող եք Հոգին հրավիրող վերաբերմունք և միջավայր զարգացնել, անգամ կարող եք ինքներդ պատրասվել, սակայն չեք կարող թելադրել, թե ինչպես և երբ պետք է ոգեշնչումը գա: Համբերատար եղեք և վստահեք, որ դուք կստանաք այն, ինչ ձեզ անհրաժեշտ է, երբ կգա ճիշտ ժամանակը:

Որպես միսիոներ, դուք կարող եք ավելի շատ տեղյակ լինել հոգևոր փորձառությունների մասին, քան ավելի վաղ ձեր կյանքում: Այս փորձառությունները սուրբ են և սովորաբար ձեր սկզբունքների, կատարելագործման կամ ուղղվելու համար են:

Լավ է, երբ այս փորձառություններից շատերը պահվեն գաղտնի: Կիսվեք միայն այն դեպքում, երբ Հոգին ցույց է տալիս, որ անելով դա, դուք կարող եք օրհնել այլ մարդկանց (տես Ալմա 12.9, Վարդապետություն և Ուխտեր 63.64, 84.73 հատվածները):

Երբեմն մենք ցանկանում ենք ամեն ինչում առաջնորդվել Հոգու կողմից: Այնուամենայնիվ, հաճախ Տերը ցանկանում է, որ մենք գործենք՝ լավագույնս օգտագործելով մեր դատողությունը (տես Վարդապետություն և Ուխտեր 60.5, 61.22, 62.5 հատվածները): Նախագահ Դալլին Հ. Օուքսն ուսուցանել է․

«Տիրոջ կողմից առաջնորդվելու ցանկությունն ուժ է, սակայն դրա հետ մեկտեղ պետք է հասկանալ, որ մեր Երկնային Հայրը թողնում է շատ որոշումներ մեր անձնական ընտրությանը: … Անձնական որոշում ընդունելն աճի աղբյուրներից մեկն է, որը մենք կոչված ենք ճաշակել մահկանացու կյանքում: Այն մարդիկ, ովքեր բոլոր որոշումների կայացումը փորձում են թողնել Տիրոջը և ամեն մի ընտրության համար հայտնություն են խնդրում, շուտով կհայտնվեն իրավիճակներում, երբ կաղոթեն առաջնորդության համար, սակայն ստանա այն: Օրինակ, սա հավանական է, որ տեղի ունենա այն բազում հանգամանքներում, որոնց դեպքում ընտրություններն անկարևոր են կամ երկուսն էլ ընդունելի են:

Մենք պետք է քննենք այդ բաները մեր մտքում, օգտագործելով կշռադատելու այն զորությունը, որ մեր Արարիչը դրել է մեր մեջ: Ապա պետք է աղոթենք առաջնորդության համար և գործենք ըստ դրա, եթե մենք դա ստանանք: Եթե մենք չենք ստանում առաջնորդություն, մենք պետք է գործենք ըստ մեր լավագույն դատողության: Անձինք, ովքեր համառորեն ձգտում են հայտնությամբ առաջնորդություն ստանալ այն հարցերի շուրջ, որոնց վերաբերյալ Տերը չի ընտրել մեզ առաջնորդել, կարող են իրենց երևակայության կամ կողմնակալ դիրքորոշման արդյունքում պատասխան գտնել, կամ կարող են նույնիսկ ստանալ պատասխան կեղծ հայտնության միջոցով» («Our Strengths Can Become Our Downfall», Ensign, հոկտ. 1994, 13–14)։

• Էջը բաժանեք երկու սյունակի։ Մի սյունակը վերնագրեք «Ինչ արեց Տերը», իսկ մյուս սյունակը՝ «Ինչ արեցին Լեքին կամ Նեփին»: Կարդացեք Լիահոնայի և կոտրված աղեղի պատմությունը (1 Նեփի 16.9–31) կամ Նեփիի նավ կառուցելու պատմությունը (1 Նեփի 17.7–16, 18.1–6): Համապատասխան սյունակներում թվարկեք իրադարձությունները տվյալ պատմությունից: Մտածեք, թե ինչ կարող է ձեզ ուսուցանել պատմությունը ոգեշնչման բնույթի մասին:

• Ձեր օրագրում գտեք դեպքեր, երբ առաջնորդվել եք Հոգով կամ զգացել եք Հոգու պարգևը: Մտածեք, թե երբ, որտեղ և ինչու են տեղի ունեցել այս փորձառությունները: Ինչպե՞ս դրսևորվեց Տիրոջ ձեռքը: Ինչպե՞ս եք ձեզ զգացել: Այս փորձառությունների մասին հիշողությունը կարող է օգնել ձեզ ճանաչել Հոգին:

• Ուսումնասիրեք Ալմա 33.1–12 և Ալմա 34.17–31 հատվածները։ Ո՞ր հարցերին էին պատասխանում Ալման և Ամուղեկը (վերանայեք Ալմա 33․1–2 հատվածները)։ Նրանք ինչպե՞ս կպատասխանեին այդ հարցերին։ Ի՞նչ երաշխիքներ են նրանք տվել։

• Տերը խոստացել է, որ Հոգին կառաջնորդի մեզ շատ կարևոր ուղիներով: Հետևյալ հատվածները կարդալիս բացահայտեք ձեր աշխատանքի այն ոլորտները, որոնք պահանջում են Հոգու առաջնորդությունը: Ի՞նչ են նշանակում հետևյալ սուրբ գրությունների սկզբունքները ձեր անձնական և զուգընկերոջ հետ ուսումնասիրության, շրջանի խորհրդի ժողովների, գոտիների համաժողովների, մկրտության ծառայությունների և այլ ժողովների համար:

  Աղոթել

  • 3 Նեփի 19․24

  • Հռովմայեցիս 8.26

  Ժողովներ վարել

  • Մորոնի 6․9

  • Վարդապետություն և Ուխտեր 20․45, 46․2

• Խոսեք այն աղոթքների մասին, որոնք դուք ասում եք զուգընկերներով: Արդյո՞ք դրանք առաջնորդվում են Սուրբ Հոգով: Ինչպե՞ս եք ստացել ձեր աղոթքների պատասխանները որպես զուգընկերներ: Որպես զուգընկերներ աղոթելիս դուք․

  • Հավատո՞ւմ եք, որ Աստված կտա ձեզ այն, ինչ դուք խնդրում եք արդարությամբ և Իր կամքի համաձայն:

  • Գնահատում և շնորհակալություն հայտնո՞ւմ եք ձեր աղոթքների պատասխանների համար:

  • Աղոթո՞ւմ եք մարդկանց համար անուն առ անուն, հաշվի առնելով նրանց կարիքները:

  • Աղոթո՞ւմ եք միմյանց և Հոգու համար, որ Նա առաջնորդի ձեզ:

  • Ստանո՞ւմ եք ձեր աղոթքների պատասխանները:

  • Աղոթո՞ւմ եք՝ պարտավորվելով գործել համաձայն ձեր ստացած հուշումների:

• Քննարկեք, թե ինչպես եք ավելի ջանասիրաբար փնտրելու Հոգին:

• Քննարկեք, թե ինչպես են մարդիկ տարբեր եղանակներով նկարագրում Սուրբ Հոգու ազդեցությունը: Ձեր ուսումնասիրության օրագրում գրի առեք ձեր կողմից ուսուցանվողների մեկնաբանությունները, որոնք նրանք արել են Հոգու հետ ունեցած իրենց փորձառությունների մասին: Ինչպե՞ս կարող եք օգնել ուրիշներին ճանաչել այս սրբազան ազդեցությունը:

• Անհրաժեշտության դեպքում խնդրեք միսիոներներին կիսվել մի պատմությունով կամ փորձառությամբ, որը նրանք լսել են վկայության վերջին ժողովի, ուսուցման ժամանակ կամ այլ միջավայրում: Մյուս մարդկանց պատմած հոգևոր պատմություններն ու փորձառությունները կարող են օգնել ձեզ զարգացնել հավատքը և հասկանալ, որ Հոգու ազդեցությունը համատարած և հաճախակի է դրսևորվում։

• Խնդրեք միսիոներներին ելույթներ ունենալ Սուրբ Հոգու առաքելության և զորության վերաբերյալ:

• Քննարկեք, թե ինչպես է երախտագիտություն հայտնելն օգնում ձեզ տեսնել այն փոքր, բայց շատ կարևոր ուղիները, որոնցով Տերն օրհնում է ձեզ (տես Եթեր 3.5, Վարդապետություն և Ուխտեր 59.21 հատվածները): Քննարկեք երախտագիտություն արտահայտելու եղանակները:

• Դուք կարող եք նոր անդամներից մեկին խնդրել, որպեսզի խոսի այն մասին, թե ինչպես է իր վրա ազդել Հոգին Եկեղեցու մասին սովորելիս: Խնդրեք այդ մարդուն կիսվել միայն այն փորձառություններով, որոնք նա տեղին է համարում:

• Խնդրեք միսիոներներին ձեզ ուղղված իրենց շաբաթական նամակում ներառել համապատասխան հոգևոր փորձառություններ:

• Հարցազրույցների կամ զրույցների ընթացքում ժամանակ առ ժամանակ հարցրեք միսիոներներին իրենց առավոտյան և երեկոյան աղոթքների մասին: Անհրաժեշտության դեպքում նրանց հետ խորհրդակցեք, թե ինչպես ավելի իմաստալից դարձնել իրենց աղոթքները:

• Հարցրեք միսիոներներին, թե ինչպես են իրենց կողմից ուսուցանվողներին օգնում զգալ և ճանաչել Հոգին: