Te autahu’ara’a mo’a

’Ua [hōro’ahia] na te pūai ’e te mana autahu’ara’a i te ta’ata i muta’a ihora. ’Ua hōro’ahia te autahu’ara’a iti a’e i te mau tamari’i a Aarona nō te fa’atere i roto i te mau mea pae tino ’e i roto ato’a i te tahi mau ’ōro’a mo’a nō te autahu’ara’a. ’Ua hōro’ahia atu te autahu’ara’a teitei a’e e te Fatu iho i tāna ra mau ’āpōsetolo, mai te au i tāna parau ia Petero : « ’E e hōro’a atu ho’i au i te mau tāviri o te bāsileia o te ao ra ia ’oe, e tā ’oe e ha’amau i raro nei, e ha’amau-ato’a-hia ïa i te ao ; e tā ’oe e tu’u i raro nei, e tu’u-ato’a-hia ïa i te ao » (Mataio 16:19).

Tei roto i te fa’aho’i-hope-ra’a-hia mai te autahu’ara’a te taera’a mai ’o Ioane Bāpetizo… ’e ’o Petero, Iakobo ’e Ioane… ’Ua tae ato’a mai ’o Mose, Elia, ’e ’o Eliaha, tei ’āfa’i tāta’itahi mai i te mau tāviri nō te autahu’ara’a nō te fa’ahope i te fa’aho’ira’a mai o te mau ’ohipa ’e te mau ’ōro’a ato’a nō te mau tau tu’ura’a ’evanelia tahito i roto i teie tau tu’ura’a ’evanelia hope’a ’e te fa’ahiahia nō te ’īra’a o te mau tau.

Tei ’ō nei te autahu’ara’a… ’Ua ’ite mātou, nō te mea ’ua ’ite mata mātou, i te mana o teie autahu’ara’a. ’Ua ite mātou i te feiā ma’i tei fa’aorahia, ’ua haere te piri’o’i, te taera’a mai o te māramarama ’e te ’ite ’e te hāro’aro’ra’a i te feiā tei roto na i te pōuri.³

’Ua fa’a’ite mai te peropheta Iosepha Semita i te huru o [te autahu’ara’a] i te hō’ē taime nā roto i teie mau parau : « Te autahu’ara’a ’o te hō’ē ïa ture mure ’ore, tei vai na i te Atua mai te mātāmua mai ā, ’e e vai noa ē a muri noa atu, ma te ha’amatara’a ’ore o te mau mahana ’aore rā te hope’a-’ore-ra’a o te mau matahiti » (History of the Church, 3:386.)

E mana mau teie nō te Atua Mana Hope tei hōro’ahia i te ta’ata ’ia rave i Tōna ra i’oa nō te mono atu Iāna. E hōro’ara’a teie nō te mana hanahana, ta’a ’ē atu i te tahi atu mau mana ato’a i ni’a i te tino o te fenua nei. E ’ere i te mea māere ē ’ua fa’aho’ihia mai te reira e te mau ta’ata tei ti’afa’ahou ’e tei mau i te reira i muta’a ihora, ’e ’aita ïa e uira’a nō ni’a i te mana ’e te ti’ara’a mau. ’Ia ’ore te reira ’aita ïa e ’Ēkālesia maori rā te i’oa noa, ’aore ho’i e mana nō te fa’atere i te mau mea a te Atua. « Ma [te autahu’ara’a], ’aore e mea e’ita e nehenehe e fa’ahaerehia i mua te ’ohipa a te bāsileia a te Atua ». E mea hanahana i roto i tōna nātura. Nō te pae tino ’e e mea mure ’ore i roto i tōna ra mana. Teie ana’e te mana i ni’a i te fenua nei ’o te haere atu i te tahi atu pae o te pāruru o te pohe.⁴

« Tē here nei au i te autahu’ara’a i roto i teie ’Ēkālesia. E mea faufa’a, e mea ora. ’O te māfatu ’e te pūai iho o teie ’ohipa. ’O te pūai ’e te mana e rave fa’aoti ai te Atua, tō tātou Metua Mure ’Ore i tāna ’ohipa i ni’a i te fenua nei.⁵

Tē mau nei te autahu’ara’a mo’a i te mana nō te fa’atere i te mau ’ohipa o te bāsileia o te Atua i ni’a i te fenua nei. I raro a’e i te mau heheura’a a te Fatu, e ti’a i te ’Ēkālesia ’ia peresidenihia e nā tahu’a rahi e toru. E tauturuhia rātou e te hō’ē pupu nō te Tino Ahuru ma Piti ’āpōsetolo, ’o te tauturu-ato’a-hia e… te Hitu ’Ahuru. E hōpoi’a nā te hō’ē ’episekōpora’a fa’atere e toru ta’ata nō te mau ’ohipa pae tino i raro a’e i te arata’ira’a a te Peresidenira’a. E feiā fa’atere autahu’ara’a pā’āto’a teie mau ta’ata. Taua mana i hōro’ahia mai e te ra’i ra e mana ïa e fa’atere ai rātou i te ’ohipa. E mea nā reira ato’a i roto i te mau titi ’e te mau pāroisa ’e te mau peresidenira’a e te mau ’episekōpora’a. ’Oia ato’a i roto i te mau pupu autahu’ara’a. Tē amo nei te feiā fa’atere no te mau pupu tauturu i tā rātou ’ohipa i raro a’e i te arata’ira’a ’e te mana o te autahu’ara’a. Mai te mea ’aore e autahu’ara’a e huru paha ïa te reira nō te hō’ē ’Ēkālesia, e ’ere rā te fa’anahora’a mau. Teie te ’Ēkālesia a Iesu Mesia, tei fa’aterehia e taua mana ra « mai te au i te ha’apa’ora’a a te Tamaiti a te Atua » (PH&PF 107:3).⁶

[Te autahu’ara’a]… e hō’ē ïa tuha’a nō te ’ōpuara’a a te Atua tō tātou Metua Mure ’Ore nō te ha’amaita’i i te orara’a o tāna mau tamāroa ’e mau tamāhine nō te mau u’i ato’a.⁷

Tei roto i te autahu’ara’a mo’a te mana ’ia ha’amaita’i. ’O rātou nō te autahu’ara’a a Aarona, tei roto ato’a ïa te mana nō te hōro’a i te ’āmuira’a te mau tāpa’o nō te tino ’e nō te toto o te Fatu, tei hōro’a i Tōna ra ora ’ei tusia nō te tā’āto’ara’a. Te ’ōro’a ’e te ’amura’a i teie mau tāpa’o ’o te māfatu mau ïa o tā tātou ha’amorira’a i te mahana sābati. Tei roto i te reira te hō’ē fa’a’āpīra’a i te mau fafaura’a ’e te Atua. Tei roto i te reira te hō’ē fafaura’a ē ’ia vai noa mai Tōna Vārua Mo’a ia tātou ra. E ha’amaita’ira’a ’aita tōna e fa’aaura’a e ti’a ’ia fāna’ohia e te tā’āto’ara’a, tei noa’a nā roto i te mana i hōro’ahia i te feiā ’āpī tāne parau ti’a […]

Tē mau nei te autahu’ara’a a Melehizedeka i te mana nō te hōro’a i te Vārua Maita’i. ’Auē ïa ha’amaita’ira’a rahi ’ia fāri’i i te mana utuutura’a nō te hō’ē melo nō te Toru-Tahi, nō te fāri’ira’a ho’i i taua hōro’ara’a ra i raro a’e i te rima o te feiā tei ’ohipa i raro a’e i te mana mo’a. Mai te mea e tāmau tātou i te haere nā roto i te vi’ivi’i ’ore, e ’oa’oa ïa tātou i te fafaura’a tei ravehia e te Fatu ’a parau ai ’Oia ē : « E riro te Vārua Maita’i ’ei ’āpiti nō ’outou i te mau taime ato’a, ’e tō ’outou sepeta ’ei sepeta taui ’ore nō te parau ti’a ’e te parau mau ; ’e e riro tō ’outou mana ’ei mana mure ’ore, ’e e tahe mai te reira ia ’outou ma te fa’ahepo ’ore ē a muri ē a muri noa atu » (PH&PF 121:46).

Tei roto i te autahu’ara’a mo’a te mana ’ia ha’amaita’i i te feiā ma’i. Tē vai ra ānei te tahi ta’ata e fa’aroo mai nei iā’u ’e tei ’ore i fa’a’ohipa ’aore rā i ’ite i taua mana hanahana ra ? E nehenehe ānei i te hō’ē o tātou ’ia fē’a’a i te maita’i o teie autahu’ara’a ? E nehenehe tā tātou e parau nō ni’a i te mau semeio, te mea mo’a ’e te mea fa’ahiahia, ’o tā tātou i ’ite i roto i tō tātou iho orara’a […]

Tē mau nei teie autahu’ara’a mo’a a Melehizedeka i te mana nō te ha’amaita’i ma te tohu, nō te tāmāhanahana, nō te pāturu, nō te arata’i. Tē vai nei tō tātou mau patereareha i rotopū ia tātou, tei parau, nā roto i te mana tei mauhia e rātou, i te rēni he’era’a ’e tei fa’ahiti i te mau ha’amaita’ira’a nō te arata’ira’a ia tātou. E nehenehe teie mau ha’amaita’ira’a e riro ’ei hō’ē tūtau e nehenehe tā tātou e tāpe’a ia tātou ma te ’āueue ’ore i roto i te mau vero nō te orara’a nei.

Te fa’a’itera’a rahi roa ’ino e ’ite tātou i roto i te autahu’ara’a mo’a, ’o te mana ïa nō te tā’ati i ni’a i te fenua ’e ’ia vai noa taua tā’atira’a ra i te ra’i. E mea ta’a ’ē ’e e mea fa’ahiahia te reira. ’O te mana ïa e fa’a’ohipahia nei i roto i te mau hiero a te Atua. Nō te feiā ora ’e te feiā pohe ato’a. ’Ua riro te reira ’ei mā’a mau nō te orara’a a muri atu. E mana teie nō te ra’i mai tei hōro’ahia mai e te Atua Mana Hope ’ei tufa’a nō tāna ’ōpuara’a rahi nō te tāhuti ’ore ’e te ora mure ’ore o te ta’ata nei.

E mea faufa’a rahi roa teie hōro’a nō ’ō mai i te Atua ra.⁸

E nehenehe i te mau tāne parau ti’a ato’a, noa atu e aha tō rātou fenua ’āi’a, tō rātou ’iri, ’aore rā te tahi atu tumu, ’ia fāri’i i te autahu’ara’a. E riro tōna ha’apa’ora’a i te mau fa’auera’a a te Atua ’ei tumu faufa’a rahi. E hōro’ahia te autahu’ara’a mai te au i te parau ti’a o te ta’ata i mua i te Fatu […]

’O terā ïa te māerera’a nō teie autahu’ara’a. E ’ere te moni te tumu. E ’ere te ha’api’ira’a te tumu. E ’ere te mau hanahana o te ta’ata te tumu. Te tumu e fāri’ihia ai te autahu’ara’a, ’o te fāri’ira’ahia mai ïa e te Fatu.⁹

’Ua tae te taime nō tātou pā’āto’a tei fa’atōro’ahia i te autahu’ara’a a Aarona ’aore rā i te autahu’ara’a a Melehizedeka, ’e i te hō’ē o te mau tōro’a i roto, ’ia feruri hōhonu i tō tātou orara’a, ’ia hi’opo’a i tō tātou mau paruparu, ’e ’ia tātarahapa i taua mau ’ohipa tei ’ore i tū’ati i te fa’auera’a teitei ’e te mo’a tā tātou i fāri’i […]

’Aore roa e nehenehe i te hō’ē ta’ata, te ’āpī ’aore rā te pa’ari… tei fa’atōro’ahia, ’ia ha’afaufa’a ’ore i te mea tāna i mau. Tei roto ’oia i te hō’ē aura’a ’ohipa e te Atua ’e tei ni’a iho iāna te hō’ē tītaura’a pa’ari ’e te mo’a ’ia ora mai te hō’ē ta’ata parau ti’a nō te parau ’e nō te rave i te ’ohipa i te i’oa o te Atua mai tōna ti’ara’a ha’amanahia.¹⁰

Noa atu ē ’ua tu’u mai teie feiā mana i tō rātou rima i ni’a i tō tātou mau upo’o ’e ’ua fa’atōro’ahia tātou, e nehenehe tā tātou nā roto i tō tātou huru e fa’a’ore ’e e fa’aru’e i te fa’a’ohipa i teie nei mana hanahana…

« E ’ore roa e nehenehe ’e e ’ore roa ho’i e ti’a ’ia ha’amauhia te hō’ē mana ’e ’aore rā te hō’ē vāhi iti a’e nō te tura nā roto i te autahu’ara’a, maori rā nā roto i te tāparura’a, nā roto i te fa’a’oroma’i-noa-ra’a, nā roto i te marū ’e te ha’eha’a, ’e nā roto i te here mau ra ;

« Nā roto i te aroha, ’e te ’ite ateate ra, ’o te fa’arahi roa i te vārua ma te fa’ahua ’ore, ’e ma te ha’avare ’ore i roto i tōna ’ā’au » (PF&PF 121:41–42).

I teienei, e tō’u mau taea’e, ’o teie ïa te mau ’ōtia ’ia fa’a’ohipahia teie nei autahu’ara’a. E ’ere mai te hō’ē pereue tā tātou e ’ō’omo ’e e tātara mai te au i tō tātou hina’aro. ’Ia fa’a’ohipa-ana’e-hia ma te parau ti’a, e riro ïa mai te ivi mau o tō tātou mau tino, e tufa’a nō tātou i te mau taime ato’a ’e i te mau vāhi ato’a.¹¹

E ti’a ia tātou ’ia tāpe’a māite i te mea maita’i roa a’e i roto ia tātou. E mau tamāroa tātou nā te Atua tei fāri’i i te hanahana nō te mau i tōna mana hanahana. Tē ora nei rā tātou i roto i te hō’ē ao tei ’ī i te ’ino. Tē vai nei te hō’ē mana tāmau, ’o te huti nei ia tātou i raro, ’o te ani nei ia tātou ’ia rave i te mau mea ’o tei ’ore e tano roa i te autahu’ara’a hanahana tei mauhia e tātou […]

Tē hōro’a atu nei au ia ’outou te mau tāne i te hō’ē tītaura’a. ’A horo ātea atu i te ’are nō te mau mea faufau ’oi paremo ’outou. ’A fa’aātea ’ē atu i te mau ino o teie nei ao. ’A tāpe’a noa i tō ’outou huru maita’i. ’A tāpe’a i te mea maita’i roa a’e i roto ia ’outou. ’A ha’apa’o ’e ’a tāpe’a i te mau fafaura’a tei ’āpitihia atu i te autahu’ara’a a te Atua.¹²

I te feiā fa’atere ato’a, te mau ’orometua ha’api’i ato’a i roto i teie ’Ēkālesia ’o te rave nei i te ’ohipa i roto i te hō’ē tōro’a o te autahu’ara’a, tē tae mai nei te hōpoi’a mo’a nō te fa’arahi i taua pi’ira’a autahu’ara’a ra. E hōpoi’a nā tātou tāta’itahi te orara’a maita’i ’e te tupura’a ’e te haerera’a i mua o vetahi ’ē. E’ita tātou e ora nō tātou ana’e. Mai te mea e ti’a ia tātou ’ia fa’ananea i tō tātou mau pi’ira’a, e’ita ïa e nehenehe ia tātou ’ia ora nō tātou ana’e.¹³

E au ra e rave rahi mau ta’ata e mana’o nei ē nō te mea ho’i ē ’ua fa’atōro’ahia rātou, nō rātou ïa te autahu’ara’a ē a muri noa atu nō te fa’a’ohipa mai tā rātou e mā’iti. Tē mana’o nei rātou ē e nehenehe tā rātou e ’ōfati i te hō’ē fafaura’a ’e te hō’ē fa’auera’a i te tahi taime, ma te tāpe’a-noa-ra’a i roto ia rātou iho i te mana nō te autahu’ara’a ’e e ha’amana mai te Atua i te mea tā rātou e parau nā ni’a i tōna ra i’oa mo’a ’e i te i’oa o te Tara’ehara. ’Ua riro teie e fa’ao’ō’ora’a, ’e tē ti’aturi nei au i roto i taua ’ohipa ra, tē fa’ahiti faufa’a ’ore nei ïa rātou i te i’oa o te Atua. Tē fa’a’ino nei rātou i te i’oa o tāna Tamaiti Here. Tē ha’avi’ivi’i ra rātou i te hōro’ara’a mo’a tei tae mai nā roto i te fa’atōro’ara’a, ’e te mana tei ’erehia e rātou nā roto i te hara […]

Tē fa’ateitei nei au i te reo fa’aarara’a i te tā’āto’ara’a, te mau tamāroa ’e te mau tāne, ’ia ’ape i te hara. E’ita te hara e tū’ati i te mana nō te ra’i. ’A ’ape i te mau hōho’a faufau mai tā ’outou e ’ape i te ’ati. ’A ’ape i te hara mōrare i tō rātou mau huru ato’a. ’A ’ape i te parau ti’a ’ore ’e te ha’avare. Tē ani nei au ia ’outou ’ia ha’avī i te mau huru ’ohipa te’ote’o ’aore rā te hina’aro faufa’a ’ore. Tē ani nei au ia ’outou ’ia feruri i tō ’outou huru nō te hi’o ē ’aita e huru fa’atītī ’aore rā fa’ahepora’a i tā ’outou mau vahine fa’apoipo ’aore rā tā ’outou mau tamari’i […]

Tē ti’aturi roa nei au ē e’ita tō tātou Metua i te Ao ra e māuruuru i te hō’ē tāne ’aore rā i te hō’ē tamāroa ’o tei fāri’i i te fa’atōro’ara’a ’e ’o te rave i muri iho i te hara. I roto i te fāri’ira’a i te autahu’ara’a e tomo ’oia i roto i te hō’ē tāpūra’a ’e te hō’ē fafaura’a i rotopū iāna ’e tōna Atua.¹⁴

’Aore roa e ta’ata, te mea ’āpī ’aore rā te mea pa’ari, e ora mai te au i te mau ture nō te autahu’ara’a ’o te ha’afaufa’a ’ore ’aore rā e tū’ino i te ti’ara’a vahine, ’o tei ’ore e hōro’a i taua fāito fa’atura i te mau tamāhine a te Atua o tā tō tātou Metua i te ao ra e hōro’a nei ia rātou.¹⁵

’Ia riro na tātou ’ei mau tāne fa’aipoipo ’e ’ei mau metua tāne maita’i. Te ta’ata ’o te riro ’ei hō’ē ta’ata fa’atītī i roto i tōna iho ’utuāfare e ’ere ïa ’oia i te mea parau ti’a nō te fāri’i i te autahu’ara’a. E’ita ïa ’oia e ti’a ’ia riro ’ei mauha’a ti’amā i roto i te rima o te Fatu mai te mea ’aita ’oia e fa’a’ite i te fa’atura ’e te marū ’e te here i tōna hoa fa’aipoipo. ’Oia ato’a, te hō’ē ta’ata ’o te riro ’ei hi’ora’a ’ino nō tāna mau tamari’i, ’o tei ’ore e nehenehe e ha’avī i tōna huru ta’ata, ’aore rā tei rave i te mau peu parau ti’a ’ore aore rā te vi’ivi’i e ’ite ïa ’oia ē e ha’afaufa’a-’ore-hia te mana nō tōna ra autahu’ara’a.¹⁶

Te vahine tā ’outou i mā’iti e riro ïa ’ei ’aifāito nō ’outou… E ’ere ’oia tō ’outou tāvini, tā ’outou tao’a, ’aore rā te tahi atu mea mai te reira te huru. « ’Auē te pe’ape’a ’e te au ’ore i te hāmani-’ino-ra’a i te vahine. Te tāne ato’a i roto i teie ’Ēkālesia ’o tei hāmani ’ino i tāna vahine, ’o te ha’afaufa’a ’ore iāna, ’o te parau ’ino iāna, ’o te fa’a’ohipa i te fa’aterera’a fa’ahepo i ni’a iho iāna e’ita ïa ’oia e nehenehe ’ia mau i te autahu’ara’a. Noa atu ē ’ua fa’atōro’ahia ’oia, e ’īritihia te mau ra’i iāna ra, e ’oto te Vārua o te Fatu, ’e ’āmene te mana o te autahu’ara’a o terā taata. Te ta’ata ’o te rave i teie peu e ’ere ïa i te mea ti’a iāna ’ia mau i te hō’ē parau fa’ati’a nō te hiero […]

Mai te mea tē vai nei te tahi… tei rave i taua huru peu ra, tē pi’i nei au ia ’outou ’ia tātarahapa. ’A tūturi i raro ’e ’a ani i te Fatu ’ia fa’a’ore mai i tā ’outou hapa. ’A pure Iāna ’ia roaa ia ’outou te pūai nō te ha’avī i tō ’outou arero ’e tō ’outou rima teimaha. ’A ani i te tātarahapara’a i tā ’outou vahine ’e i tā ’outou mau tamari’i […]

’Ua pāpū iā’u ē ’ia ti’a ana’e tātou i mua i te ha’avāra’a a te Atua, ’aita re’a fa’ahitira’a nō ni’a i te rahira’a faufa’a tā tātou i ha’aputu i roto i te orara’a ’aore rā te mau hanahana tei noa’a paha ia tātou. E tītorotorora’a pāpū rā nō ni’a i te mea i ravehia i te fare. ’E ’ua pāpū iā’u ē, ’o rātou tei rātere nā roto i te orara’a ma te here ’e te fa’atura ’e te ha’afa’ahiahiara’a i tō rātou hoa ’e i te mau tamari’i, ’o rātou te fāri’i mai i te mau parau a te ha’avā mure ’ore, « ’ua ti’a roa, e teie nei tāvini maita’i ’e te ha’avare ’ore : … e haere ’oe i roto i te ’oa’oara’a a tō fatu » (Mataio 25:21).¹⁷

’Ua pāpū iā’u ē ’ua ’ōpua te Fatu ē ’ia riro te hō’ē pupu autahu’ara’a hau atu i te hō’ē noa piha ha’api’ira’a fa’aro’o i te mau po’ipo’i sābati. ’Oia mau, e hōpoi’a autahu’ara’a faufa’a rahi te patura’a i te vāruara’a ’e te ha’apūaira’a i te ’itera’a pāpū nā roto i te ha’api’ira’a maita’i i te ’evanelia. Teie noa rā te hō’ē tuha’a nō te ’ohipa a te pupu autahu’ara’a. E ti’a i te pupu autahu’ara’a tāta’itahi ’ia riro ’ei autaea’era’a nō te mau melo ato’a mai te mea e hina’arohia ē ’ia tupu te ’ōpuara’a nō te pupu […]

Te pupu autahu’ara’a ’o te fa’anahonahora’a ïa a te Fatu nō te mau tāne o te ’Ēkālesia, mai te Sōtaiete Tauturu i riro ’ei fa’anahonahora’a a te Fatu nā te mau vahine o te ’Ēkālesia. Tē vai nei i roto i te mau hōpoi’a a te mau melo tāta’itahi, nō reira ho’i te pupu i ha’amauhia ai, te tauturura’a i te mau ta’ata i roto i te fifi.

I te taime ’a ha’amauhia ai te Sōtaiete Tauturu ’ua parau te peropheta Iosepha Semita nō te mau vahine nō te sōtaiete : « E ma’ue atu ïa rātou nō te tauturu i te ta’ata ’e’ē ; e mani’i rātou i te hinu ’e te uaina i ni’a i te māfatu mamae o te ta’ata hepohepo ; ’e e tāmaro rātou i te mau roimata o te ’ōtare ’e e fa’a’oa’oa rātou i te ’ā’au o te vahine ’ivi » [Te mau ha’api’ira’a a te mau Peresideni o te ’Ēkālesia : Iosepha Semita (2007), 514]. Tē ti’aturi nei au e nehenehe te reira e parau-ato’a-hia nō te mau tāne nō te autahu’ara’a.

E riro ïa ’ei mahana fa’ahiahia… ’ia riro ana’e tā tātou mau pupu autahu’ara’a ’ei hō’ē tūtau nō te pūai nō te mau ta’ata ato’a nō te pupu, ’ia nehenehe ana’e i taua huru ta’ata ra e parau maita’i mai, « e melo vau nō te hō’ē pupu autahu’ara’a a te ’Ēkālesia a Iesu Mesia i te Feiā Mo’a i te Mau Mahana Hope’a nei. ’Ua ineine au i te tauturu i tō’u mau taea’e i roto i tō rātou ato’a mau hina’aro, mai tā’u i pāpū ē e ineine ato’a rātou nō te tauturu iā’u i roto i tō’u mau hina’aro. Ma te rave ’āmui i te ’ohipa, e tupu ïa tātou i te pae vārua ’ei mau tamāroa fafauhia a te Atua. Ma te rave ’āmui i te ’ohipa, e nehenehe ïa tātou e fa’aruru atu, ma te ha’amā ’ore ’e ma te mata’u ’ore, i te mau mata’i ato’a a te ’enemi e nehenehe e fārara mai, nō te pae faufa’a ānei, te pae sōtiare ānei, ’aore rā te pae vārua ».¹⁸

Hōho’a

rurura’a a te ’āpo’ora’a pāroisa

’Ua mau te mau tāne i te autahu’ara’a, ’oia ïa. ’Ua riro rā ta’u vahine fa’aipoipo ’ei hoa nō’u. I roto i teie ’Ēkālesia e’ita te tāne e haere nā mua atu i tāna vahine fa’aipoipo ’aore rā i muri i tāna vahine fa’aipoipo i pīha’i iho rā iāna. ’Ua ’aifāito rāua i roto i teie nei orara’a i roto i te hō’ē ’ohipa fa’ahiahia.¹⁹

Tē vai nei te pūai ’e te ’aravihi rahi i roto i te mau vahine o teie ’Ēkālesia. Tē vai nei te fa’aterera’a ’e te arata’ira’a, te tahi vārua ti’amā, ’e te māuruurura’a rahi nō te rirora’a ’ei tufa’a nō teie, te bāsileia o te Fatu, ’e te ravera’a te rima i roto i te rima e te autahu’ara’a nō te fa’ahaere i te bāsileia i mua.²⁰

Tē ha’amāuruuru nei au i tō’u Metua Mure ’Ore nō te fa’aho’ira’ahia mai te autahu’ara’a mo’a, « ’ia parau te mau ta’ata ato’a nā roto i te i’oa o te Atua te Fatu, ’oia ïa te Fa’aora o te ao » (PH&PF 1:20). ’Ua ’ite au i te nehenehe ’e te ’ūmerera’a nō taua autahu’ara’a ra i roto i te fa’aterera’a o teie ’Ēkālesia fa’ahiahia. ’Ua ’ite au i te mana nō taua autahu’ara’a ra te tahera’a mai i roto iā’u nei nō te ha’amaita’ira’a ’e nō te fa’aorara’a i te feiā ma’i. ’Ua ’ite au i te hanahana tei hōro’ahia i te mau tāne ha’eha’a tei pi’ihia i ni’a i te mau hōpoi’a rahi ’e te paari. ’Ua ’ite au i te reira ’a a’o mai ai rātou ma te pūai ’e te mana nō ni’a mai mai te mea ra tē parau mai nei te reo o te Atua nā roto mai ia rātou.

Tē ha’amāuruuru nei au i te Fatu nō te ’itera’a pāpū tāna i hōro’a iā’u nō te hō’ēra’a, te ’ā’anora’a, te āteara’a ’e te hōhonura’a o te ’evanelia. ’Ua ’ōpuahia te reira nō te ha’amaita’i i te mau tamāroa ’e te mau tamāhine nō te mau u’i ato’a o te tau—nō te feiā ora ’e te feiā pohe.²¹

• ’A tai’o fa’ahou i te mau ha’api’ira’a a te peresideni Hinckley i roto i te tuha’a 1 nō ni’a i te fa’aho’ira’ahia mai te autahu’ara’a. E aha te mau mea tā ’outou i ’ite i te tauturura’a ia ’outou ’ia noa’a te hō’ē ’itera’a pāpū nō teie nei mau parau mau ?

• ’Ua ha’api’i te peresideni Hinckley ē « tē mau nei te autahu’ara’a mo’a i te mana nō te fa’atere i te mau ’ohipa o te bāsileia o te Atua i ni’a i te fenua nei » (tuha’a 2). Nāhea teie nei parau mau e tano ai i roto i te mau titi ’e te mau pāroisa ? I roto i te mau pupu autahu’ara’a ? I roto i te Sōtaiete Tauturu ? Nāhea te mana autahu’ara’a e ha’apūai ai i tā ’outou tāvinira’a i roto i te bāsileia a te Atua ?

• I roto i te tuha’a 3, ’a tai’o fa’ahou i te mau ha’amaita’ira’a tā tātou pā’āto’a e nehenehe e fāri’i nā roto i te autahu’ara’a. E mea nāhea tō ’outou ’itera’a i te mana ’e te mau ha’amaita’ira’a o te autahu’ara’a ?

• E aha tā tātou e nehenehe e ’apo mai nā roto i te mau ha’api’ira’a a te peresideni Hinckley nō ni’a i te huru-’ē-ra’a i rotopū i te mana o te autahu’ara’a ’e te pūai o te autahu’ara’a ? (Hi’o te tuha’a 4). I tō ’outou mana’ora’a e aha te aura’a nō te hō’ē taea’e tei mau i te autahu’ara’a « ’ia tāpe’a noa i te mea maita’i roa a’e i roto [iāna] » ? Nō te aha e’ita i te mea ti’a i te mau taea’e tei mau i te autahu’ara’a « ’ia ora nō rātou ana’e » ?

• I roto i te tuha’a 5, e aha tei ha’aputapū ia ’outou nō ni’a i te mau fa’a’itera’a a te peresideni Hinckley nō ni’a i te mau pupu autahu’ara’a ’e te Sōtaiete Tauturu ? E aha tā tātou e nehenehe e rave i roto i tā tātou pāroisa ’aore rā ’āmaa nō te pe’e i tāna a’o ?

• Nō te aha e ti’a ai i te mau tāne ’e i te mau vahine ’ia rave ’āmui i te ’ohipa ’ei « feiā ’aifāito » nō te rave fa’aoti i te ’ohipa a te Fatu ? (Hi’o te tuha’a 6).

Hebera 5:1–4 ; 1 Nephi 14:12–14 ; Alama 13:1–9 ; PH&PF 84:33–44 ; 88:133 ; 112:30–32

« ’A ui i te mau uira’a e tūra’i nei i te mau pīahi ’ia ’imi i te mau pāhonora’a i roto i te mau pāpa’ira’a mo’a ’e i roto i te mau ha’api’ira’a a te mau peropheta o te tau hope’a nei ». (Te Ha’api’ira’a : ’Aita e Pi’ira’a Teitei a’e [1999], 62).