សេចក្ដីសញ្ញាអ័ប្រាហាំ

អ័ប្រាហាំបានទទួលដំណឹងល្អ ហើយត្រូវបានតែងតាំងជាសង្ឃជាន់ខ្ពស់ ( សូមមើល គ. និង ស. ៨៤:១៤, អ័ប្រាហាំ ១:២ ) ។ ក្រោយមក លោកបានចូលទៅក្នុងចំណងអាពាហ៍ពិពាហ៍សេឡេស្ទាល ដែលជាសេចក្ដីសញ្ញានៃភាពតម្កើងឡើង ( សូមមើល គ. និង ស. ១៣១:១–៤, ១៣២:១៩, ២៩ ) ។ ដោយមានទំនាក់ទំនងជាមួយនឹងសេចក្ដីសញ្ញាដែលលោកបានធ្វើ លោកទទួលបានការសន្យាដ៏ធំពីព្រះអម្ចាស់ទាក់ទងទៅនឹងគ្រួសាររបស់លោក ។ ក្នុងចំណោមសេចក្ដីសញ្ញាទាំងនេះមានដូចខាងក្រោម ៖

ពូជរបស់លោកនឹងត្រូវចម្រើនច្រើនឡើង ( សូមមើល លោកុប្បត្តិ ១៧:៥–៦, អ័ប្រាហាំ ២:៩, ៣:១៤ ) ។
ពូជរបស់លោក ឬ កូនចៅរបស់លោកនឹងទទួលដំណឹងល្អ ហើយនឹងកាន់បព្វជិតភាព ( សូមមើល អ័ប្រាហាំ ២:៩ ) ។
តាមរយៈការងារបម្រើនៃពូជរបស់លោក « អស់ទាំងគ្រួសារនៅលើផែនដី [ នឹង ] បានពរ គឺដោយព្រះពរទាំងឡាយនៃដំណឹងល្អ ដែលជាព្រះពរទាំងឡាយខាងសេចក្ដីសង្គ្រោះ គឺខាងជីវិតដ៏នៅអស់កល្បជានិច្ច » ( អ័ប្រាហាំ ២:១១ ) ។

រាល់សេចក្ដីសញ្ញា និង ការសន្យាទាំងអស់បូកបញ្ចូលគ្នាដែលអ័ប្រាហាំបានទទួលពីព្រះអម្ចាស់ ត្រូវបានហៅថា សេចក្តីសញ្ញាអ័ប្រាហាំ ។ វាគឺជាសេចក្ដីសញ្ញាដ៏នៅអស់កល្បជានិច្ច ដែលរីកសុះសាយដល់ពូជរបស់អ័ប្រាហាំទាំងអស់ ( សូមមើល លោកុប្បត្តិ ១៧:៧ ) ។ ដើម្បីអាចរាប់ជាពូជរបស់អ័ប្រាហាំបាន មនុស្សម្នាក់ៗត្រូវគោរពតាមក្រឹត្យវិន័យ និង ពិធីបរិសុទ្ធទាំងឡាយនៃដំណឹងល្អ ។ បន្ទាប់មក បុគ្គលនោះអាចទទួលពរជ័យទាំងអស់នៃសេចក្ដីសញ្ញាអ័ប្រាហាំ ទោះបីជាពួកគេមិនមែនជាកូនចៅផ្ទាល់របស់អ័ប្រាហាំក៏ដោយ ( សូមមើល កាឡាទី ៣:២៦–២៩, ៤:១–៧, គ និង ស ៨៤:៣៣–៤០ ) ។

ក្នុងនាមជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ អ្នកទាំងអស់គ្នាគឺជាកូនចៅនៅក្នុងសេចក្ដីសញ្ញា ( សូមមើល នីហ្វៃទី ៣ ២០:២៥–២៦ ) ។ អ្នកទាំងអស់គ្នាបានទទួលដំណឹងល្អដ៏នៅអស់កល្បជានិច្ច ហើយបានគ្រងមរតកដែលបានប្រទានឲ្យអ័ប្រាហាំ អ៊ីសាក និង យ៉ាកុប ។ អ្នកទាំងអស់គ្នាមានសិទ្ធិទទួលបានពរជ័យនៃបព្វជិតភាព និង ជីវិតដ៏នៅអស់កល្បជានិច្ច ស្របទៅតាមភាពស្មោះត្រង់របស់អ្នកក្នុងការទទួលយកពិធីបរិសុទ្ធទាំងឡាយនៃ សេចក្ដីសង្គ្រោះ ហើយរក្សាសេចក្ដីសញ្ញាដែលជាប់ពាកព័ន្ធជាមួយនឹងពិធីបរិសុទ្ធទាំងនេះ ។ គ្រប់ជាតិសាសន៍នៅលើផែនដីនេះនឹងមានពរ តាមរយៈកិច្ចខិតខំរបស់អ្នក និង តាមរយៈការងាររបស់កូនចៅអ្នក ។