1 Ndien edikem ete angel oro ɔdɔhɔ mi, ete: Sese! Ndien ami nse nyuŋ nkut ediwak idut ye mme obio ubɔŋ.

2 Ndien angel oro ɔdɔhɔ mi ete: Nso ke afo okut? Ndien ami ndɔhɔ nte: Ami nkut ediwak idut ye mme obio ubɔŋ.

3 Ndien enye ɔdɔhɔ mi ete: Mmɔ emi edi mme idut ye mme obio ubɔŋ mme Gentile.

4 Ndien edikem ete ami nkut ke ufɔt mme idut mme Gentile nte esiakde akwa ufɔk Abasi.

5 Ndien angel oro ɔdɔhɔ mi ete: Sese nte esiakde ufɔk Abasi emi mbubiam okponde ata eti eti akan kpukpru mme ufɔk Abasi eken, emi ewotde ndisana ikɔt Abasi, iŋ, ndien emia mmɔ ufen enyuŋ ebɔp mmɔ enim, ndien ekɔŋ mmɔ ɔkpɔnɔ ye ɔkpɔnɔ ukwak, ndien eda mmɔ esuhɔre esin ke nkpɔkɔbi.

6 Ndien edikem ete ami nkut akamba ye mbubiam ufɔk Abasi emi; ndien ami nkut satan nte ke enye edi andisiak enye.

7 Ndien ami nkut gold, ye silver, ye mme silk, ye mme ididuot ɔfɔŋ, ye eti edifiak linen, ye kpukpru utɔ nsɔŋ urua ɔfɔŋ; ndien ami nkut iban akpara.

8 Ndien angel oro ɔdɔhɔ mi, ete: Sese gold, ye silver, ye mme silk, ye mme ididuot ɔfɔŋ, ye eti edifiak linen, ye nsɔŋ urua ɔfɔŋ, ye iban akpara, edi mme udɔŋ akamba ye mbubiam ufɔk Abasi emi.

9 Ndien nko ke ntak itoro ererimbot ke mmɔ ebiat ndisana ikɔt Abasi, ndien eda mmɔ esuhɔhɔre esin ke nkpɔkɔbi.

10 Ndien edikem ete ami nse nyuŋ nkut ediwak mmɔŋ; ndien mmɔ ebahare mme Gentile ekpɔŋ ubon nditɔ eka mi iren.

11 Ndien edikem ete angel oro ɔdɔhɔ mi ete: Sese iyaresit Abasi odu ye ubon nditɔ eka fo iren.

12 Ndien ami nse nyuŋ nkut owo kiet ke ufɔt mme Gentile, emi ediwak mmɔŋ oro eke ebahare esio ke ubon nditɔ eka mi iren; ndien ami nkut Spirit Abasi, nte ke enye ama ɔsuhɔre edi onyuŋ anam ke owo oro; ndien enye aka ke ediwak mmɔŋ oro, tutu esim ubon nditɔ eka mi iren, emi ekedude ke isɔŋ enwɔŋɔ.

13 Ndien edikem ete ami nkut Spirit Abasi, nte ke enye anam ke mme Gentile efen; ndien mmɔ eka ekewɔrɔ ke nkpɔkɔbi, ke ediwak mmɔŋ.

14 Ndien edikem ete ami nkut ediwak otu mme Gentile ke isɔŋ enwɔŋɔ, ndien ami nkut iyaresit Abasi, nte ke okodu ye ubon nditɔ eka mi iren; ndien esuan mmɔ ke iso mme Gentile ndien emia mmɔ.

15 Ndien ami nkut Spirit Jehovah, nte ke ekedu ye mme Gentile, ndien mmɔ ema eforo enyuŋ ebɔ isɔŋ inyene mmɔ; ndien ami nkut nte ke mmɔ ekedi afia, enyuŋ esana eti eti enyuŋ eye, nte mme owo mi mbemiso ewot mmɔ.

16 Ndien edikem ete ami, Nephi, nkut nte ke mme Gentile emi ekekade ekewɔrɔ ke nkpɔkɔbi ema esuhɔre-idem mmɔ ke iso Jehovah; ndien odudu Jehovah ama odu ye mmɔ.

17 Ndien ami nkut nte ke eka mme Gentile mmɔ ema eboho kiet ke mme mmɔŋ oro, ye ke isɔŋ oro nko, ndinwana ye mmɔ.

18 Ndien ami nkut ete ke odudu Abasi ama odu ye mmɔ, ndien nko ete ke iyaresit Abasi ama odu ye kpukpru mbon oro emi eke ebohode ɔtɔkiet ebaŋa mmɔ ndinwana.

19 Ndien ami, Nephi, nkut nte ke mme Gentile emi eke ekade eke ewɔrɔ ke nkpɔkɔbi ke ema enam ebɔhɔ ke odudu Abasi ke mme ubɔk kpukpru mme idut eken.

20 Ndien edikem ete ami, Nephi, nkut nte ke mmɔ ema eforo ke isɔŋ, ndien ami nkut ŋwed, ndien ema emen enye ke ufɔt mmɔ.

21 Ndien angel oro ɔdɔhɔ mi ete: Afo ɔmɔfiɔk se ŋwed oro ɔwɔrɔde?

22 Ndien ami ndɔhɔ enye nte: Ami mfiɔkke.

23 Ndien enye ɔdɔhɔ ete: Sese enye ɔwɔrɔ ke inua Jew. Ndien ami, Nephi, nkut enye; ndien enye ɔdɔhɔ mi ete: Ŋwed oro emi afo okutde edi ŋwed mme Jew, emi ɔdɔŋɔde mme ediomi Jehovah, emi enye eke anamde ɔnɔ ufɔk Israel; ndien enye nko ɔdɔŋɔ ediwak prophecy edisana mme prophet; ndien enye edi ŋwed ukem ukem nte mme ŋkpɔ ekapde emi edude ke mme usan brass, edi mmɔ iwakke ntre; edi, mmɔ edɔŋɔ mme ediomi Jehovah, emi enye eke anamde ɔnɔ ufɔk Israel; ke ntre, mmɔ enyene akamba ufɔn enɔ mme Gentile.

24 Ndien angel Jehovah ɔdɔhɔ mi ete: Afo omokut ete ke ŋwed oro ɔwɔrɔ ke inua Jew; ndien ke ini enye ama ɔkɔwɔrɔ ke inua Jew enye ɔdɔŋɔ uyɔhɔ ikɔ Abasi Jehovah, emi mme apostle duopeba etiede ntiense; ndien mmɔ etie ntiense etiene akpanikɔ emi odude ke Eyen-erɔŋ Abasi.

25 Ke ntre, mme ŋkpɔ emi oto ke mme Jew ɔwɔrɔ ke edisana ɔnɔ mme Gentile, etiene akpanikɔ emi odude ke Abasi.

26 Ndien ke ini mmɔ ema eketo ewɔrɔ ke ubɔk mme apostle duopeba Eyen-erɔŋ, oto ke mme Jew esim mme Gentile, afo okut nte esiakde akamba ye mbubiam ufɔk Abasi oro, emi mbubiam okponde akan kpukpru mme ufɔk abasi eken; koro sese, mmɔ esio ewɔrɔ ke gospel Eyen-erɔŋ ediwak ubak emi aŋwaŋade onyuŋ ɔfɔnde; ndien nko ediwak mme ediomi Jehovah ke mmɔ esioŋo efep.

27 Ndien kpukpru emi ke mmɔ enam man mmɔ ekwaŋa mme nnen nnen usuŋ Jehovah, man mmɔ enam mme enyin edi nnan enyuŋ esɔŋ mme esit nditɔ owo.

28 Ke ntre, afo omokut ete ke ini ŋwed oro ama eke ebe ke mme ubɔk akamba ye mbubiam ufɔk Abasi, ete ke odu ediwak ŋkpɔ emi aŋwaŋade enyuŋ efɔnde emi esioŋode efep ke ŋwed oro, emi edide ŋwed Eyen-erɔŋ Abasi.

29 Ndien ke ini ema ekesioŋo mme ŋkpɔ emi aŋwaŋade enyuŋ efɔnde efep enye aka ke kpukpru mme idut mme Gentile; ndien ke ini enye ama akaka ke kpukpru mme idut mme Gentile, iŋ, tutu ebe ediwak mmɔŋ emi afo ekekutde ye mme Gentile emi ekekade ekewɔrɔ ke nkpɔkɔbi, afo okut—ke ntak ediwak ŋkpɔ emi aŋwaŋade enyuŋ efɔnde emi eke esioŋode efep ke ŋwed oro, emi eke aŋwaŋade ifiɔk nditɔ owo, etiene ediŋwaŋa emi odude ke Eyen-erɔŋ Abasi—ke ntak mme ŋkpɔ emi emi eke esioŋode ke gospel Eyen-erɔŋ, ata ediwak owo eduɔ, iŋ, tutu satan enyene akamba odudu ke idem mmɔ.

30 Edi, afo okut nte mme Gentile emi ekewɔrɔde ke nkpɔkɔbi, ndien enyuŋ emenere mmɔ ke enyɔŋ ke odudu Abasi ekan kpukpru mme idut eken, ke iso isɔŋ emi emekde esio ke mme isɔŋ efen, emi edide isɔŋ emi Jehovah Abasi okodiomide ye ete fo ete ke ana ubon esie enyene nte isɔŋ inyene mmɔ; ke ntre, afo okut ete ke Jehovah Abasi idiyakke ete mme Gentile esobo ofuri ofuri mbuaha ubon fo, emi edude ke ufɔt nditɔ eka fo iren.

31 Edi enye idiyakke ete mme Gentile esobo ubon nditɔ eka fo iren.

32 Edi Jehovah Abasi idiyakke ete mme Gentile edu ke nsinsi ke enyene ndik itie nnan, emi afo okutde nte mmɔ edude, ke ntak mme ubak gospel Eyen-erɔŋ emi aŋwaŋade enyuŋ efɔnde ekan emi mbubiam ufɔk Abasi oro osiode enim, emi nte eke esiakde enye afo ama okut.

33 Ke ntre Eyen-erɔŋ Abasi ɔdɔhɔ ete: Ami nyenyene mbɔm mbaŋa mme Gentile, tutu edise nsuhɔ ufɔk Israel ke akamba ubiere ikpe.

34 Ndien edikem ete angel Abasi etiŋ ye ami, ete: Sese, Eyen-erɔŋ Abasi ɔdɔhɔ, ke ami mma nkese nsuhɔ ufɔk Israel—ndien nsuhɔ emi ami ntiŋde mbaŋa edi ubon ete fo—ke ntre, ke mma nkese mmɔ ke ubiere ikpe, nyuŋ mia mmɔ ye ubɔk mme Gentile, ndien ke mme Gentile ema eduɔ ata eti eti, ke ntak mme ubak gospel Eyen-erɔŋ emi aŋwaŋade enyuŋ efɔnde emi mbubiam ufɔk Abasi oro osiode enim, emi edide eka iban akpara, Eyen-erɔŋ ɔdɔhɔ—Ami nyenyene mbɔm mbaŋa mme Gentile ke usen oro, tutu ete ke ami nyeda nsɔk mmɔ, ke odudu mi, ediwak gospel mi, emi ediŋwaŋade inyuŋ ifɔn, Eyen-erɔŋ ɔdɔhɔ.

35 Koro, sese, Eyen-erɔŋ ɔdɔhɔ: Ami nyeyarare idem mi nnɔ ubon fo, man mmɔ ewet ediwak ŋkpɔ emi ami ndikpepde mmɔ, emi ediŋwaŋade inyuŋ ifɔn; ndien ke ema ekesobo ubon fo, ndien etaha ke unana edinim, ndien nko ubon nditɔ eka fo iren, sese, mme ŋkpɔ emi eyedibe, man ewɔrɔ edi enɔ mme Gentile, ke enɔ ye odudu Eyen-erɔŋ.

36 Ndien ke mmɔ ke ediwet gospel mi, Eyen-erɔŋ ɔdɔhɔ, ye itiat mi ye erinyaŋa mi.

37 Ndien ɔfɔfɔn ɔnɔ mmɔ oro emi edi iyomde ndisiak Zion ke usen oro, koro mmɔ eye enyene enɔ ye odudu Edisana Spirit; ndien edieke mmɔ eyɔde tutu esim utit eyemenere mmɔ ke akpatre usen, ndien eyenyaŋa mmɔ ke nsinsi obio ubɔŋ Eyen-erɔŋ; ndien owo eke ededi emi edikwɔrɔde emem, iŋ, mme etop akamba idaresit, didie ke mmɔ ediye ke mme obot.

38 Ndien edikem ete ami nkut nsuhɔ ubon nditɔ eka mi iren, ndien nko ŋwed Eyen-erɔŋ, emi okotode inua Jew oro ɔwɔrɔ, nte ke enye oto ke mme Gentile ɔwɔrɔ ɔnɔ nsuhɔ ubon nditɔ eka mi iren.

39 Ndien ke enye ama ekewɔrɔ ɔnɔ mmɔ ami nkut mme ŋwed efen, emi ekewɔrɔde eto ke odudu Eyen-erɔŋ, eto mme Gentile esim mmɔ, man enam mme Gentile ekpuhɔre ekikere ye nsuhɔ ubon nditɔ eka mi iren, ndien nko mme Jew emi ekesuande ke kpukpru iso isɔŋ, ete ke mme ŋwed mme prophet ye mme apostle duopeba Eyen-erɔŋ edi akpanikɔ.

40 Ndien angel oro ɔdɔhɔ mi, ete: Mme akpatre ŋwed emi, emi afo okutde ke ufɔt mme Gentile, eye esɔŋɔ akpanikɔ eke akpa, emi edide eke mme apostle duopeba Eyen-erɔŋ, ndien eye efiɔk mme ŋkpɔ emi aŋwaŋade enyuŋ efɔnde emi eke esioŋode ke mmɔ; ndien eye enam kpukpru idut, mme usem, ye mme owo efiɔk, ete ke Eyen-erɔŋ Abasi edi Eyen Nsinsi Ete, ye Andinyaŋa ererimbot; ndien ke kpukpru owo ana edi etiene enye, midihe ntre mmɔ idibɔhɔ erinyaŋa.

41 Ndien ana nte mmɔ edi esaŋa nte mme ikɔ emi inua Eyen-erɔŋ edidɔhɔde; ndien edinam efiɔk mme ikɔ Eyen-erɔŋ ke mme ŋwed ubon fo, kpa ntre ke mme ŋwed mme apostle duopeba Eyen-erɔŋ, ke ntre mmɔ mbiba eyesɔŋɔ kiet eken; koro Abasi kiet ye Ekpeme-erɔŋ kiet odu ke kpukpru ererimbot.

42 Ndien ini ke edi emi enye ediyarare idem esie inɔ kpukpru idut, inɔ mme Jew ye nko inɔ mme Gentile; ndien ke enye ama ekeyarare idem esie ɔnɔ mme Jew ye nko mme Gentile, ndien enye eyeyarare idem esie ɔnɔ mme Gentile ye nko mme Jew, ndien akpatre eye edi akpa, ndien akpa edi akpatre.