1 Koro sese, edikem ete Jehovah etiŋ ɔnɔ ete mi, iŋ, kpa ke ndap, onyuŋ ɔdɔhɔ enye ete: Ɔfɔfɔn ɔnɔ fi Lehi, ke ntak mme ŋkpɔ oro emi afo anamde; ye ke ntak afo ɔbuɔtde idem onyuŋ ɔdɔhɔde mbon emi mme ŋkpɔ emi ami nkenɔde fi uyo, sese, mmɔ eyom ndi men uwem fo mfep.

2 Ndien edikem ete Jehovah ɔnɔ ete mi uyo, kpa ke ndap, ete yak enye ataŋ ikot ufɔk esie onyuŋ ɔwɔrɔ aka ke wilderness.

3 Ndien edikem ete enye ama osuk ibuot ɔnɔ ikɔ Jehovah, ke ntre enye ama anam nte Jehovah eke ɔnɔde enye uyo.

4 Ndien edikem ete enye ɔwɔrɔ aka ke wilderness. Ndien enye ɔkpɔŋ ufɔk esie, ye isɔŋ inyene esie, ye gold esie, ye silver esie, ye mme ŋkpɔ uto esie, inyuŋ imenke ŋkpɔ ndomo kiet ye enye, ke me ibɔhɔke ikɔt ufɔk esie, ye mme ŋkpɔ udia, ye mme tent, onyuŋ ɔwɔrɔ aka ke wilderness.

5 Ndien enye ɔsuhɔre edi ke mme adaŋa emi ekperede mben Ididuot Inyaŋ; ndien enye onyuŋ asaŋa ke wilderness ke mme adaŋa emi ekperede Ididuot Inyaŋ; ndien enye asaŋa ke wilderness ye ikɔt ufɔk esie, emi ekesinede eka mi, Sariah, ye mme ikpɔ nditɔ eka mi iren, emi ekedide Laman, Lemuel, ye Sam.

6 Ndien edikem ete ke ini enye ama ekesaŋa usen ita ke wilderness, enye owuk tent esie ke ebedeŋ ke mben eke akpa mmɔŋ.

7 Ndien edikem ete enye ɔbɔp itie uwa ke mme itiat, onyuŋ anam uwa ɔnɔ Jehovah, onyuŋ ɔkɔm Jehovah Abasi nnyin.

8 Ndien edikem ete enye okot enyiŋ akpa oro, Laman, ndien enye awat oduk ke Ididuot Inyaŋ; ndien ebedeŋ oro okodu ke mme adaŋa emi ekperede inua esie.

9 Ndien ke ini ete mi ekekutde ete mme mmɔŋ akpa emi ewat eduk ke ntɔŋɔ Ididuot Inyaŋ; enye ɔdɔhɔ Laman, ete: O afo ekpekap etie nte akpa emi, akade iso efehe oduk ntɔŋɔ kpukpru nnen nnen ido!

10 Ndien enye nko etiŋ ye Lemuel: O afo ekpekap etie nte ebedeŋ emi, etiŋ enyin onyuŋ ɔsɔŋ ada, unyuŋ isikke ke ndinim mme mbet Jehovah!

11 Idahaemi emi enye eketiŋ ke ntak nsɔŋ ibuot Laman ye Lemuel; koro sese mmɔ ema ekuni kabaŋa ediwak ŋkpɔ ebaŋa ete mmɔ, ke ntak emi enye ekedide owo nkukut, onyuŋ adade mmɔ ɔwɔrɔ ke isɔŋ Jerusalem, ndikpɔŋ isɔŋ inyene mmɔ, ye gold mmɔ, ye silver mmɔ, ye ŋkpɔ uto mmɔ, ndi tak ke wilderness. Ndien emi mmɔ ekedɔhɔ ke enye anam ke ntak mme ndisime ekikere esit esie.

12 Ndien ke ntre Laman ye Lemuel, emi ekedide mbon ekekponde ekan, ema ekuni ebaŋa ete mmɔ. Ndien mmɔ ekekuni koro mmɔ mikediɔŋɔke mme edinam Abasi emi okobotde mmɔ.

13 Nko mmɔ ikenimke ete ke Jerusalem, akwa obio oro, ke ekeme ndisobo nte mme ikɔ mme prophet eketiŋde. Ndien mmɔ eketie nte mme Jew emi ekedude ke Jerusalem, emi ekeyomde ndimen uwem ete mi mfep.

14 Ndien edikem ete ete mi etiŋ ikɔ ɔnɔ mmɔ ke ebedeŋ Lemuel, ye odudu, koro enye ɔkɔyɔhɔde ye spirit, tutu idem mmɔ enyek ke iso esie. Ndien enye etimere mmɔ, man mmɔ ekutiŋ ikɔ ebaŋa enye; ke ntre, mmɔ enam nte enye ɔkɔnɔde mmɔ uyo.

15 Ndien ete mi oduŋ ke tent.

16 Ndien edikem ete ami, Nephi, emi nkedide ata ekpri eyen, edi mkpon ke idaha, ndien nko nyenede mme akwa udɔŋ ndidiɔŋɔ mme ndibe ŋkpɔ Abasi, ke ntre, ami mma nseme nnɔ Jehovah; ndien sese enye ama edise mi, onyuŋ anam esit mi emem ndien nyuŋ nnim kpukpru mme ikɔ emi ete mi eketiŋde; ke ntre, ami nkefaŋake ye enye nte mme nditɔ eka mi iren.

17 Ndien ami ntiŋ ikɔ nnɔ Sam, nnam enye ɔfiɔk mme ŋkpɔ emi Jehovah ekeyarade ɔnɔ mi oto ke Edisana Spirit esie. Ndien edikem ete ke enye enim ke mme ikɔ mi.

18 Edi, sese, Laman ye Lemuel ikakpaŋke utɔŋ inɔ mme ikɔ mi; ndien koro nkɔfuhɔde ke ntak isɔŋ esit mmɔ ami nseme nnɔ Jehovah mbaŋa mmɔ.

19 Ndien edikem ete Jehovah ɔdɔhɔ mi, ete: Ɔfɔfɔn ɔnɔ fi, Nephi, ke ntak mbuɔtidem fo, koro afo esinde ifik oyom mi, ye nsuhɔre idem ke esit.

20 Ndien adaŋa nte afo edinimde ibet mi, afo eyeforo, ndien eyeda fi eka ke isɔŋ eŋwɔŋɔ; iŋ, kpa isɔŋ emi ami nnimde nnɔ fi; iŋ, isɔŋ emi emekde esio ke mme isɔŋ efen.

21 Ndien edieke nditɔ eka fo iren esɔŋde ibuot ye afo, eyesibe mmɔ esio ke iso Jehovah.

22 Ndien edieke afo edinimde mme mbet mi, eyenam fi andikara ye andikpep eke nditɔ eka fo iren.

23 Koro sese, ke usen oro emi mmɔ edisɔŋde ibuot ye ami, ami nyesuŋi mmɔ ye idiɔk isuŋi, ndien mmɔ idinyeneke odudu ikan ubon fo ibɔhɔke mmɔ esɔŋ ibuot ye ami nko.

24 Ndien edieke edide nte ke mmɔ esɔŋ ibuot ye ami, mmɔ eyedi ikpa enɔ ubon fo, man edemere mmɔ ke usuŋ editi.