1 Edi, sese, ke mme akpatre usen, mme ke mme usen mme Gentile—iŋ, sese kpukpru idut mme Gentile ye eke mme Jew, mbon emi edidide isɔŋ emi ye mbon emi edidude ke mme isɔŋ efen mbiba, iŋ, kpa ke ofuri isɔŋ ererimbot, sese, mmɔ eyeyuhɔ ye ukwaŋ-ŋkpɔ mmɔ nte mmin ye kpukpru mme mbubiam ido—

2 Ndien ke ini usen oro edidide Jehovah mme Udim eyedise mmɔ, ye obuma ŋko ye unyek-isɔŋ, ŋko ye akwa uyom, ŋko ye edim, ŋko ye oyobio, ŋko ye edemikaŋ akatade.

3 Ndien kpukpru mme idut emi eŋwanade ye Zion, ye emi etukde enye, eyebiet ndap ŋkukut okoneyo; iŋ, eyedi ɔnɔ mmɔ, kpa nte owo biɔŋ emi adabade ndap, ndien sese enye adia ŋkpɔ edi enye edemere ndien ukpɔŋ esie edi ukpɔk; mme nte owo emi itɔŋ asatde adabade ndap, ndien sese enye ɔŋwɔŋ edi enye edemere ndien sese idem emem enye, ndien ukpɔŋ esie enyene udɔŋ; iŋ, kpa ntre ke otu kpukpru mme idut emi eŋwanade ye Obot Zion edidi.

4 Koro sese, kpukpru mbufo emi enamde ukwaŋ-ŋkpɔ, mbufo enam ubihi ye utibe ŋkpɔ, koro mbufo eyeseme, enyuŋ efiori; iŋ, mbufo eyeyuhɔ edi idihe ye wine, mbufo eyeteŋ edi idihe ye ɔkpɔsɔŋ mmin.

5 Koro sese, Jehovah aŋwaŋa mbufo spirit ɔkpɔsɔŋ idap ke idem. Koro sese, mbufo emebɔp enyin mbufo, ndien mbufo esin mme prophet; ye mme andikara mbufo, ndien mme okut ŋkukut ke enye edip ke ŋtak ukwaŋ-ŋkpɔ mbufo.

6 Ndien eyedikem ete Jehovah Abasi ayada ɔsɔk mbufo mme ikɔ eke ŋwed, ndien mmɔ eyedi mme ikɔ mmɔ emi edede.

7 Ndien sese eyedian ŋwed oro; ndien ke ŋwed oro ke eriyarare edito Abasi idi, tɔŋɔ ke eritɔŋɔ ererimbot tutu esim utit esie.

8 Ke ntre, ke ntak mme ŋkpɔ oro emi ediande, mme ŋkpɔ emi ediande Abasi idiyakke inɔ ke usen ibak ye mbubiam mme owo. Ke ntre eyemum ŋwed oro ekama ekpɔŋ mmɔ.

9 Edi eyeyak ŋwed oro enɔ owo, ndien enye eyeyak mme ikɔ ŋwed oro ɔnɔ, emi edide mme ikɔ mbon oro emi ekedede ke ntan, ndien enye eyeyak mme ikɔ emi ɔnɔ owo efen;

10 Edi mme ikɔ emi ediande enye idiyakke inɔ, ŋko enye idiyakke ŋwed oro inɔ. Koro edidian ŋwed oro ke odudu Abasi, ndien eyenim eriyarare emi ekediande ke ŋwed oro tutu ekem ini Jehovah, man mmɔ ewɔrɔ edi; koro sese, mmɔ eyarade kpukpru ŋkpɔ tɔŋɔ ke eritɔŋɔ ererimbot tutu esim utit esie.

11 Ndien usen ke edi emi edikotde ke mme enyɔŋ ufɔk mme ikɔ ŋwed oro emi ekediande; ndien edikot mmɔ ke odudu Christ; ndien eyeyarade kpukpru ŋkpɔ enɔ nditɔ owo emi akananam okodude ye nditɔ owo, ye emi edidude tutu utit ererimbot.

12 Ke ntre, ke usen oro emi ediyakde ŋwed oro inɔ owo emi ami ŋketiŋde mbaŋa, eyedip ŋwed emi ke enyin ererimbot, man enyin owo ndomo kiet oku-kut enye ibɔhɔke edi mme ntiense ita oro edikut enye, ke odudu Abasi, ke ediande ye enye emi ediyakde ŋwed emi inɔ; ndien mmɔ eyetie ntiense ebaŋa akpanikɔ ŋwed oro ye mme ŋkpɔ emi edɔŋɔde ke esit.

13 Ndien owo efen emi edikutde enye iduhe, ibɔhɔke edi owo ifaŋ nte asaŋade ye uduak Abasi, nditie ntiense mbaŋa ikɔ esie nnɔ nditɔ owo; koro Jehovah Abasi ama ɔdɔhɔ ete ke mme ikɔ owo ɔbuɔtde idem eyetiŋ ikɔ nte enye oto mkpa.

14 Ke ntre, Jehovah Abasi ayada mme ikɔ ŋwed oro edi; ndien ke inua mme ntiense emi ediwakde nte ɔfɔnde ye enye ke enye edisiak ikɔ esie; ndien ɔyɔdɔdiɔk ɔnɔ enye emi ekesinde ikɔ Abasi!

15 Edi sese, eyedikem ete Jehovah Abasi ɔyɔdɔhɔ enye emi enye ediyakde ŋwed oro inɔ ete: Men mme ikɔ emi emi owo midianke nyuŋ yak mmɔ nɔ owo efen, man enye ada mmɔ owut owo emi ekpepde ŋkpɔ, ɔdɔhɔ ete: Kot emi, mbɔk. Ndien owo emi ekpepde ŋkpɔ eyedɔhɔ ete: Da ŋwed oro di, ndien ami nyekot mmɔ.

16 Ndien idahaemi, ke ntak ubɔŋ ererimbot ye ke ndinyene udori ke mmɔ edidɔhɔ emi, ndien idihe ke ntak ubɔŋ Abasi.

17 Ndien owo oro eyedɔhɔ ete: Ami nkemeke ndida ŋwed oro ndi, sia ediande enye.

18 Ndien ke owo emi ekpepde ŋkpɔ edidɔhɔ ete: Ami nkemeke ndikot enye.

19 Ke ntre eyedikem, ete Jehovah Abasi ayafiak ayak ŋwed oro ye mme ikɔ esie ɔnɔ enye emi mikpepke ŋkpɔ; ndien owo emi mikpepke ŋkpɔ ɔyɔdɔhɔ ete: Ami mkpepke ŋkpɔ.

20 Ndien ke Jehovah Abasi edidɔhɔ enye ete: Mme owo emi ekpepde ŋkpɔ ikemeke ndikot mmɔ, koro mmɔ esin mmɔ, ndien ami makan nnam utom mi; ke ntre afo oyokot mme ikɔ emi ami ndinɔde fi.

21 Kutuk mme ŋkpɔ emi ediande, koro ami nyada mmɔ ndi ke ekem ini mi; koro ami ŋyowut nditɔ owo nte ke ami mekan nnam utom mi.

22 Ke ntre, ke ini afo okotde mme ikɔ emi ami nnɔde fi uyo, onyuŋ ɔbɔde mme ntiense emi ami ŋwɔŋɔde nnɔ fi, ndien ke afo edifiak idian ŋwed oro, onyuŋ edip enye ɔnɔ mi, man ami ntim mme ikɔ emi afo mukotke nnim, tutu ami ŋkut nte ke odot ke ifiɔk mi ndiyarare kpukpru ŋkpɔ nnɔ nditɔ owo.

23 Koro sese, ami ndi Abasi; ndien ami ndi Abasi mme utibe ŋkpɔ; ndien ami nyowut ererimbot nte ke ami ndi ukem ukem mkpɔŋ, mfin, ye ke nsinsi; ndien ami nnamke utom ke ufɔt nditɔ owo ibɔhɔke edi nte mbuɔtidem mmɔ edide.

24 Ndien ayafiak edikem ete Jehovah ɔyɔdɔhɔ enye emi edikotde mme ikɔ emi ediyakde inɔ enye ete:

25 Koro adaŋa nte mme owo emi esikde ekpere mi ye inua mmɔ, ndien ye mkpɔk-inua mmɔ ke ekpono mi, edi esio esit mmɔ nsan nsan ekpɔŋ mi, ndien uteŋe mmɔ kabaŋa mi edi mme item mme owo ekpepde—

26 Ke ntak oro, ami nyanam utibe utom ke ufɔt mbio emi, iŋ, utibe ye mkpaidem utom, koro ifiɔk mme ɔfiɔk ŋkpɔ owo mmɔ ye mme ekpep ŋkpɔ eyetak, ndien ɔniɔŋ mme enyene ɔniɔŋ mmɔ eyenime.

27 Ndien ɔyɔdɔdiɔk ɔnɔ mmɔ emi edukde ke ntuŋɔ man edip Jehovah item mmɔ! Ndien mme utom mmɔ edi ke ekim; ndien mmɔ edɔhɔ ete: Anie owo okut nnyin, anie owo ɔfiɔk nnyin? Ndien mmɔ enyuŋ edɔhɔ ete: Ke akpanikɔ, eyeda nte mbat obot eso usuŋ emi mbufo eŋwɔŋɔde mme ibuot ŋkpɔ ewut isɔŋ. Edi sese, ami nyowut mmɔ, Jehovah mme Udim ɔdɔhɔ, ete ke ami mɔfiɔk kpukpru mme utom mmɔ. Koro utom eyetiŋ abaŋa enye emi akanamde enye ete, enye ikinamke mi? Mme ŋkpɔ emi ekebotde eyedɔhɔ enye emi ekebotde enye ete, ke enye ikinyeneke ifiɔk?

28 Edi sese, Jehovah mme Udim ɔdɔhɔ: Ami nyowut nditɔ owo nte ke edi ata esisit ini ndien Lebanon ayakabare edi eti iŋwaŋ; ndien eti iŋwaŋ akabare edi akai.

29 Ndien ke usen oro ke mme inan edikop mme ikɔ ŋwed oro, ndien enyin mme nnan eyewɔrɔ ke eke etiede nnan-nnan okut ŋkpɔ onyuŋ ɔwɔrɔ ke ekim.

30 Ndien mme suŋ-suŋ owo ŋko eyetara, ndien idaresit mmɔ oyodu ke Jehovah, ndien mme ubuene ke otu mmɔ eyedara ke Edisana Owo Israel.

31 Koro ke akpanikɔ ma uwem Jehovah mmɔ eyekut ete ke mbon afai ekure, ndien mbon nsahi etak, ndien esibe kpukpru mbon ekeyomde ukwaŋ-ŋkpɔ esio;

32 Ndien mmɔ emi enamde ikpe etip owo ke ntak ikɔ esie, enyuŋ ekɔkde afia ke inua otop enɔ enye emi asuade ɔnɔ, enyuŋ ebinde edinen owo esio ke ikpikpu ŋkpɔ.

33 Ke ntre, ntem ke Jehovah ɔdɔhɔ, emi ekefakde Abraham, kabaŋa ufɔk Jacob: But idinamke Jacob, ndien iso esie idikɔrike idahaemi idi afia.

34 Edi ke ini enye okutde nditɔ esie, mme utom ubɔk mi, ke ufɔt mmɔ, mmɔ eyenam enyiŋ mi asana, enyuŋ enam Edisana Owo Jacob asana, ndien eyebak Abasi Israel.

35 Mmɔ ŋko emi ekeduede ke spirit eyedinyene ifiɔk, ndien mmɔ emi ekekunide eyekpep ŋkpɔ.