1 Ug nahitabo nga sa dihang natapos ang ikakan-oman ug duha nga tuig sa pagmando sa mga maghuhukom, nahitabo kining tanan nga butang ug ang mga Lamanita, ang mas daghang bahin kanila, nahimo nga matarong nga katawhan, nga niana ang ilang pagkamatarong milabaw pa sa mga Nephita, tungod sa kalig-on ug kahugot sa ilang pagtuo.

2 Kay tan-awa, dihay daghan nga Nephita ang nahimong gahi ug dili mahinulsolon ug hilabihan ang pagkadaotan, nga ilang gisalikway ang pulong sa Dios ug tanan nga pagsangyaw ug pagpanagna nga miabot taliwala kanila.

3 Bisan pa niana, ang katawhan sa simbahan nakabaton og hilabihan nga kamaya tungod sa pagkakabig sa mga Lamanita, oo, tungod sa simbahan sa Dios, nga natukod taliwala kanila. Ug nakigdait sila sa usag usa, ug naglipay sa usag usa, ug nakabaton og hilabihan nga kamaya.

4 Ug nahitabo nga daghan sa mga Lamanita ang miabot sa yuta sa Zarahemla, ug gipahayag ngadto sa katawhan nga mga Nephita ang paagi sa ilang pagkakabig, ug miawhag kanila ngadto sa pagtuo ug paghinulsol.

5 Oo, ug daghan ang misangyaw uban sa hilabihan ka dako nga gahom ug katungod, sa pagdala sa daghan kanila ngadto sa hilabihan nga pagpaubos, aron mahimo nga mapainubsanong mga sumusunod sa Dios ug sa Kordero.

6 Ug nahitabo nga daghan sa mga Lamanita ang miadto sa yuta sa amihanang bahin; ug usab si Nephi ug Lehi miadto sa yuta sa amihanang bahin, aron mosangyaw sa katawhan. Ug sa ingon natapos ang ikakan-uman ug tulo nga tuig.

7 Ug tan-awa, dihay kalinaw sa tibuok yuta, nga niana ang mga Nephita miadto sa bisan diin nga bahin sa yuta nga ilang gusto, ngadto man sa mga Nephita o sa mga Lamanita.

8 Ug nahitabo nga ang mga Lamanita miadto usab sa bisan asa nga ilang gusto, sa mga Lamanita man o sa mga Nephita; ug sa ingon niana nakabaton sila og gawasnong pagpakigdait sa usag usa, sa pagpalit o sa pagbaligya, ug sa pag-angkon og bahandi, sumala sa ilang tinguha.

9 Ug nahitabo nga sila, ang mga Lamanita ug mga Nephita, nahimo nga hilabihan ka adunahan; ug nakabaton sila og hilabihan ka daghan nga bulawan, ug mga pilak, ug tanan nga matang sa mahalon nga metal, didto sa habagatang yuta ug sa amihanang yuta.

10 Karon ang habagatang yuta gitawag og Lehi, ug ang amihanang yuta gitawag og Mulek, diin sunod sa anak nga lalaki ni Sedekias; kay ang Ginoo midala kang Mulek ngadto sa amihanang yuta, ug kang Lehi ngadto sa habagatang yuta.

11 Ug tan-awa, dihay tanan nga matang sa bulawan dinhi niining duha ka yuta, ug pilak, ug mahalon nga oro sa matag matang; ug usab dihay talagsaon nga mga mamumuo, kinsa mibuhat sa tanan nga matang sa oro ug naglunsay niini; ug sa ingon sila nahimo nga mga adunahan.

12 Sila mipatubo og mga lugas sa dinaghan, didto sa amihanan ug sa habagatan; ug milambo sila sa hilabihan, didto sa amihanan ug sa habagatan. Ug misanay sila ug nagkaanam sa hilabihan nga kalig-on dinhi sa yuta. Ug mipasanay sila og daghang gagmayng kahayopan ug dagkong kahayopan, oo, daghan nga linaming.

13 Tan-awa, ang ilang mga babaye nag-uma ug nagbubod og hilo, ug naghimo sa tanan nga matang sa panapton, ug maanindot nga pagkalalik nga mga sida nga panapton sa matag matang, sa pagtabon sa ilang pagkahubo. Ug sa ingon niana milabay ang ikakan-oman ug upat nga tuig sa kalinaw.

14 Ug sa ikakan-oman ug lima nga tuig nakaangkon usab sila og hilabihan nga kamaya ug kalinaw, oo, daghan nga pagsangyaw ug mga panagna mahitungod niana nga moabot. Ug sa ingon niana milabay ang ikakan-oman ug lima nga tuig.

15 Ug nahitabo nga sa ikakan-oman ug unom nga tuig sa pagmando sa mga maghuhukom, tan-awa, si Cezoram gipatay sa usa ka wala mailhi nga tawo samtang siya naglingkod sa hukmanan. Ug nahitabo sa mao gihapon nga tuig, ang iyang anak nga lalaki, kinsa natudlo sa katawhan puli kaniya, gipatay usab. Ug sa ingon niana natapos ang ikakan-oman ug unom nga tuig.

16 Ug sa pagsugod sa ikakan-oman ug pito nga tuig ang katawhan nagsugod na usab sa pagtubo sa hilabihan nga kadaotan.

17 Kay tan-awa, ang Ginoo mipanalangin kanila og mga bahandi sa dugay nga panahon sa kalibotan nga sila wala masulsol sa kasuko, sa pagpakiggubat, ni sa pagpaagas sa dugo; mao nga nagsugod sila sa pagpahiluna sa ilang mga kasingkasing diha sa ilang mga bahandi; oo, sila nagsugod sa pagpaningkamot nga makaangkon og bahandi nga sila unta mabayaw nga labaw sa uban; busa nagsugod sila sa paghimo og tinago nga mga pagpatay, ug pagpanulis ug pagpanglungkab, nga sila unta makaangkon og bahandi.

18 Ug karon tan-awa, kadtong mga tigpatay ug mga tiglungkab mao ang pundok nga gitukod ni Kishkumen ug ni Gadianton. Ug karon nahitabo nga dihay daghan, bisan sa mga Nephita, nga sakop sa pundok ni Gadianton. Apan tan-awa, mas daghan sila taliwala sa mas daotan nga bahin sa mga Lamanita. Ug gitawag sila nga mga tulisan ni Gadianton ug mga tigpatay.

19 Ug sila kadtong kinsa mipatay sa labaw nga maghuhukom nga si Cezoram ug sa iyang anak, samtang anaa sa hukmanan; ug tan-awa, wala sila masakpi.

20 Ug karon nahitabo nga sa diha nga ang mga Lamanita nakakita nga adunay mga tulisan taliwala kanila hilabihan ang ilang ka masulub-on; ug gigamit nila ang tanang paagi sa ilang gahom aron laglagon sila ibabaw sa yuta.

21 Apan tan-awa, si Satanas misulsol sa mga kasingkasing sa mas daghan nga bahin sa mga Nephita, nga niana nakighiusa sila niadtong mga pundok sa mga tulisan, ug misulod sa ilang mga pakigsaad ug sa ilang mga panumpa, nga sila mopanalipod ug moamping sa usag usa sa bisan unsa nga kalisod sa ilang kahimtang, nga sila dili mag-antos tungod sa ilang mga pagpatay ug sa ilang mga panglungkab ug sa ilang mga pangawat.

22 Ug nahitabo nga sila adunay ilang mga sinyas, oo, ilang tinago nga mga sinyas, ug ilang tinago nga mga pulong; ug kini aron ilang mailhan ang usa ka igsoon kinsa misulod sa pakigsaad, nga ang bisan unsa nga kadaotan ang buhaton sa iyang igsoon dili siya mapasakitan sa iyang igsoon, ni niadtong kinsa nahisakop sa iyang pundok, kinsa nakahimo niini nga pakigsaad.

23 Ug sa ingon niana mahimo silang mopatay, ug manglungkab, ug mangawat, ug magbuhat og malaw-ay ug tanan nga matang sa pagkadaotan, nga supak sa mga balaod sa ilang nasod ug usab sa mga balaod sa ilang Dios.

24 Ug si bisan kinsa nga sakop sa ilang pundok ang motug-an ngadto sa kalibotan sa ilang pagkadaotan ug pagkasalawayon, pagahusayon, dili pinaagi sa mga balaod sa ilang nasod, apan sumala sa mga balaod sa ilang pagkadaotan nga gihatag ni Gadianton ug ni Kishkumen.

25 Karon tan-awa, mao kini ang tinago nga mga panumpa ug mga pakigsaad nga gimando ni Alma sa iyang anak nga lalaki nga dili gayod angay nga moabot sa katawhan, basin pa unya og mao kini ang mahimong hinungdan nga madala ang katawhan ngadto sa kalaglagan.

26 Karon tan-awa, kadto nga tinago nga mga panumpa ug mga pakigsaad wala moabot kang Gadianton gikan sa mga talaan nga gihatag ngadto ni Helaman; apan tan-awa gibutang kini diha sa kasingkasing ni Gadianton nianang mao gihapon nga binuhat kinsa nagdani sa atong unang mga ginikanan sa pagkaon sa gidili nga bunga—

27 Oo, kanang mao gihapon nga binuhat kinsa naglaraw uban ni Cain, nga kon siya mopatay sa iyang igsoon nga lalaki nga si Abel kini dili mahibaloan sa katawhan. Ug siya naglaraw uban ni Cain ug sa iyang mga sumusunod gikan niana nga panahon.

28 Ug usab mao gihapon kana nga binuhat ang mibutang niini diha sa mga kasingkasing sa katawhan sa pagtukod og usa ka tore nga may igong gitas-on aron makaadto sila sa langit. Ug mao gihapon kana nga binuhat ang midala sa katawhan gikan niana nga tore nganhi niini nga yuta; kinsa misabwag sa buluhaton sa kangitngit ug sa mga pagkasalawayon ibabaw sa tibuok yuta, hangtod nga naguyod niya ang katawhan ngadto sa hingpit nga kalaglagan, ug ngadto sa walay kataposang impyerno.

29 Oo, mao gihapon kana nga binuhat ang mibutang niini ngadto sa kasingkasing ni Gadianton aron ipadayon gihapon ang buhat sa kangitngit, ug ang tinago nga pagpatay; ug siya ang midala niini gikan sa sinugdanan sa tawo gani hangtod niini nga panahon.

30 Ug tan-awa, siya ang tigpasiugda sa tanan nga sala. Ug tan-awa, gipadayon niya ang iyang mga buhat sa kangitngit ug tinago nga pagpatay, ug mipasa sa ilang mga laraw, ug sa ilang mga panumpa, ug sa ilang mga pakigsaad, ug sa ilang mga plano nga makalilisang ang kadaotan, gikan sa kaliwatan ngadto sa laing kaliwatan kutob sa iyang mahimo sa pag-impluwensiya sa mga kasingkasing sa mga anak sa katawhan.

31 Ug karon tan-awa, naimpluwensiyahan na niya ang mga kasingkasing sa mga Nephita; oo, nga niana nahimo silang hilabihan kadaotan; oo, ang mas daghan nga bahin kanila mibiya sa dalan sa pagkamatarong, ug miyatakyatak sa mga sugo sa Dios, ug mipadayon sa ilang kaugalingong mga paagi, ug gihimo nila mismo nga mga dios-dios ang ilang mga bulawan ug ilang mga pilak.

32 Ug nahitabo nga kining tanan nga kadaotan midangat kanila sulod lamang sa dili daghan nga katuigan, nga niana ang mas daghan nga bahin niini midangat kanila sa ikakan-oman ug pito nga tuig sa pagmando sa mga maghuhukom sa katawhan ni Nephi.

33 Ug misamot ang ilang kadaotan sa ikakan-oman ug walo nga tuig usab, ngadto sa hilabihang kasubo ug pagbakho sa mga matarong.

34 Ug sa ingon niana atong makita nga ang mga Nephita misugod sa pagkunhod ngadto sa pagkawalay pagtuo, ug misamot sa pagkadaotan ug pagkasalawayon, samtang ang mga Lamanita misugod sa hilabihan nga pagtubo sa kahibalo sa ilang Dios; oo, sila misugod sa pagsunod sa iyang mga balaod ug mga sugo, ug naglakaw subay sa kamatuoran ug pagkamatarong sa iyang atubangan.

35 Ug sa ingon niana atong makita nga ang Espiritu sa Ginoo misugod sa pagbiya gikan sa mga Nephita, tungod sa kadaotan ug katig-a sa ilang mga kasingkasing.

36 Ug sa ingon niana atong makita nga ang Ginoo misugod pagbu-bo sa iyang Espiritu diha sa mga Lamanita, tungod sa ilang kadali ug kaandam nga motuo sa iyang mga pulong.

37 Ug nahitabo nga gipangita sa mga Lamanita ang pundok sa mga tulisan ni Gadianton; ug gisangyaw nila ang pulong sa Dios taliwala sa mas daotan nga bahin kanila, nga niana kini nga pundok sa mga tulisan hingpit nga nalaglag pinaagi sa mga Lamanita.

38 Ug sa laing bahin nahitabo, nga ang mga Nephita milig-on kanila ug mibulig kanila, nga nagsugod sa mas daotan nga bahin kanila, hangtod nga nalukop nila ang tibuok yuta sa mga Nephita, ug nahaylo ang mas daghan nga bahin sa mga matarong hangtod nga sila mituo sa ilang mga buhat ug miambit sa ilang mga linungkab, ug mipasakop kanila sa ilang tinago nga mga pagpatay ug mga kalihokan.

39 Ug sa ingon niana naangkon nila sa hingpit ang pagdumala sa gobyerno, nga sa ingon giyatakan nila ug gibunalan ug gipasakitan ug gitalikdan ang mga kabos ug ang mga maaghop, ug ang mapainubsanong mga sumusunod sa Dios.

40 Ug sa ingon niana atong makita nga anaa sila sa makalilisang ug nagkahinog nga kahimtang, alang sa walay kataposang kalaglagan.

41 Ug nahitabo nga sa ingon niana natapos ang ikakan-oman ug walo nga tuig sa pagmando sa mga maghuhukom sa katawhan ni Nephi.