1 Pea ko ʻeni, vakai, ʻoku ou fie lea siʻi ki he toenga ʻo e kakaí ni ʻa ia kuo fakahaofí, ʻo kapau ʻe tuku ʻe he ʻOtuá kiate kinautolu ʻa ʻeku ngaahi leá, koeʻuhi ke nau ʻilo ki he ngaahi meʻa ʻa ʻenau ngaahi tamaí; ʻio, ʻoku ou lea kiate kimoutolu, ʻa kimoutolu ko e toenga ʻo e fale ʻo ʻIsilelí; pea ko e ngaahi lea ʻeni ʻoku ou leaʻakí:

2 ʻOku mou ʻiloʻi koā, ʻoku mou ʻo e fale ʻo ʻIsilelí.

3 ʻOku mou ʻiloʻi koā kuo pau ke mou haʻu ʻo fakatomala, pe ʻe ʻikai lava ʻo fakamoʻui ʻa kimoutolu.

4 ʻOku mou ʻiloʻi koā kuo pau ke mou tuku hifo hoʻomou ngaahi mahafu ʻo e taú, pea ʻikai toe fiefia ʻi he lilingi totó, pea ʻoua ʻe toe toʻo hake ia, tuku kehe ʻo kapau ʻe fekau ʻe he ʻOtuá kiate kimoutolu.

5 ʻOku mou ʻiloʻi koā kuo pau ke mou maʻu ʻa e ʻilo ki hoʻomou ngaahi tamaí, pea fakatomala mei hoʻomou ngaahi angahala mo e ngaahi hia kotoa pē, pea tui kia Sīsū Kalaisi, ko e ʻAlo ia ʻo e ʻOtuá, pea naʻe tāmateʻi ia ʻe he kau Siú, pea ʻi he māfimafi ʻo e Tamaí kuó ne toe tuʻu, ʻa ia kuó ne ikuna ai ʻa e faʻitoká; pea ʻiate ia foki kuo folo hifo ai ʻa e mamahi ʻo e maté.

6 Pea ʻokú ne fakahoko ʻa e toetuʻu ʻa e maté, ʻa ia kuo pau ke fokotuʻu hake ai ʻa e tangatá ke tuʻu ʻi he ʻao ʻo hono nofoʻanga fakamāú.

7 Pea kuó ne fakahoko ʻa e huhuʻi ʻo e māmaní, koeʻuhí ko ia ia ʻe ʻiloʻi ʻoku taʻehalaia ʻi hono ʻaó ʻi he ʻaho fakamāú ʻe tuku ke ne nofo ʻi he ʻao ʻo e ʻOtuá ʻi hono puleʻangá, ke hiva ʻaki ʻa e fakafetaʻi taʻetuku fakataha mo e kau hiva ʻi ʻolunga, ki he Tamaí, pea ki he ʻAló, pea ki he Laumālie Māʻoniʻoní, ʻa ia ko e ʻOtua pē ʻe taha, ʻi ha tuʻunga ʻo e fiefia ʻa ia ʻoku ʻikai hano ngataʻanga.

8 Ko ia mou fakatomala, pea papitaiso ʻi he huafa ʻo Sīsuú, pea puke maʻu ʻa e ongoongolelei ʻa Kalaisi, ʻa ia ʻe tuku ʻi homou ʻaó, kae ʻikai ʻi he lekōtí ni pē kā ʻi he lekooti foki ʻa ia ʻe ʻomai ki he kau Senitailé mei he kau Siú, ʻa ia ko e lekooti ʻe ʻomai mei he kau Senitailé kiate kimoutolu.

9 He vakai, kuo tohi ʻeni koeʻuhí ke mou tui ki ai; pea kapau ʻoku mou tui ki ai te mou tui ki he meʻá ni foki; pea kapau ʻoku mou tui ki he meʻá ni te mou ʻilo ki hoʻomou ngaahi tamaí kae ʻumaʻā foki mo e ngaahi ngāue fakaofo ʻa ia kuo fakahoko ʻi he māfimafi ʻo e ʻOtuá ʻiate kinautolú.

10 Pea te mou ʻilo foki ko ha toenga ʻa kimoutolu ʻo e hako ʻo Sēkopé; ko ia ʻoku lau ʻa kimoutolu fakataha mo e kakai ʻo e ʻuluaki fuakavá; pea kapau leva te mou tui kia Kalaisi, pea mou papitaiso, ʻuluaki ʻi he vaí, pea toki ʻi he afi mo e Laumālie Māʻoniʻoni, ʻo muimui ki he sīpinga ʻa hotau Fakamoʻuí, ʻo fakatatau mo e meʻa kuó ne fekau kiate kitautolú, ʻe lelei ia kiate kimoutolu ʻi he ʻaho ʻo e fakamāú. ʻĒmeni.