1 ʻE ʻOtua, ʻokú ke ʻi fē? Pea ʻoku ʻi fē ʻa e fale ʻoku ʻufiʻufi ʻa ho fufūʻangá?

2 ʻE fēfē hono fuoloa ʻo e taʻofi ho toʻukupú, pea ʻafio ʻa ho fofongá, ʻio, ʻa ho fofonga maʻá, mei he ngaahi langi taʻengatá ki he ngaohikovia ʻo ho kakaí pea mo hoʻo kau tamaioʻeikí, pea ongo ki ho telingá ʻa ʻenau ngaahi tangí?

3 ʻIo, ʻe ʻEiki, ʻe fēfē hono fuoloa ʻo ʻenau kātakiʻi ʻa e ngaahi kovi mo e ngaahi fakamālohi taʻetotonu ko ʻení, kae teʻeki ai ke fakamolū ho finangaló kiate kinautolu, pea ngāue ʻa ho finangaló ʻi he ʻaloʻofa kiate kinautolu?

4 ʻE ʻEiki ko e ʻOtua Māfimafí, ko e tupuʻanga ʻo e langí mo e māmaní mo e ngaahi tahí pea mo e ngaahi meʻa kotoa pē ʻoku ʻi aí, pea ʻokú ke puleʻi mo fakamoʻulaloaʻi ʻa e tēvoló, pea mo e puleʻanga fakapoʻuli mo vale ʻo Seiolí—ke mafao mai ho toʻukupú; tuku ke fakaʻasi ʻe ho fofongá; tuku ke hiki hake ʻa ho falé; tuku ke ʻoua naʻa toe ʻufiʻufi ʻa ho fufūʻangá; tuku ke tokanga mai ʻa ho telingá; tuku ke fakamolū ʻa ho finangaló, pea ngāue ʻa ho finangaló ʻi he ʻaloʻofa kiate kimautolu.

5 Tuku ke tupu ʻa ho houhaú ki homau ngaahi filí; pea sāuni ʻa homau ngaahi ngaohikoviá ʻaki hoʻo heletaá ʻi he houhau ʻa ho finangaló.

6 Manatuʻi ʻa hoʻo kāingalotu ʻoku mamahiʻiá, ʻe homau ʻOtua; pea ʻe nēkeneka ʻa hoʻo kau tamaioʻeikí ʻi ho huafá ʻo taʻengata.

7 ʻE hoku foha, ke ʻi ho laumālié ʻa e melino; ʻe kiʻi fuofuoloa siʻi pē ʻa hoʻo faingataʻaʻiá pea mo hoʻo ngaahi mamahí;

8 Pea ʻe toki hakeakiʻi koe ʻe he ʻOtuá ʻi ʻolunga ʻo kapau te ke kātakiʻi ia ʻo lelei; te ke ikunaʻi ʻa ho ngaahi fili kotoa pē.

9 ʻOku piki kiate koe ʻa ho ngaahi kaumeʻá, pea te nau toe fetapa kiate koe ʻi he loto māfana pea mo e nima fakakaumeʻa.

10 ʻOku teʻeki ai te ke tatau mo Siope; ʻoku ʻikai fakakikihi mo koe ʻa ho ngaahi kaumeʻá, pea ʻikai foki te nau tukuakiʻi koe ʻi he maumau-fono ʻo hangē ko ʻenau fai kia Siopé.

11 Pea ko kinautolu ʻoku tukuakiʻi koe ʻi he maumau-fonó, ʻe fakaʻauha ʻenau ʻamanaki leleí, pea ʻe mole atu ʻa ʻenau ngaahi ʻamanakiʻangá ʻo hangē ko e mole atu ʻa e hahau sinou ʻi he ngaahi huelo vela ʻo e laʻā ʻoku lolotonga hopo haké;

12 Pea kuo ʻai foki ʻe he ʻOtuá ʻa hono toʻukupú pea mo ʻene fakaʻilongá ke ne liliu ʻa e ngaahi kuongá mo e ngaahi faʻahitaʻú, pea fakakuihi ʻa honau ngaahi ʻatamaí, koeʻuhí ke ʻoua naʻa mahino kiate kinautolu ʻa ʻene ngaahi ngāue fakaofó; koeʻuhí ke ne ʻahiʻahiʻi ʻa kinautolu foki pea tauheleʻi ʻa kinautolu ʻi heʻenau fai olopoto ʻanautolú;

13 Pea koeʻuhí foki ʻi he liliu ʻo kovi ʻa honau lotó pea koeʻuhí ke hoko kiate kinautolu pē ʻo fuʻu hulu fau ʻa e ngaahi meʻa ʻoku nau loto ke fakahoko ki ha niʻihi kehe, pea nau manako ke mamahi ai ha niʻihi kehé;

14 Koeʻuhi foki ke tō noa ʻenau ʻamanakí, pea motuhi mo ʻenau ngaahi ʻamanaki leleí;

15 Pea he ʻikai fuoloa taʻu ka ʻe tafiʻi atu ʻa kinautolu mo honau hakó mei he lalo langí, ʻoku folofola ʻe he ʻOtuá, ke ʻoua naʻa toe ʻi ai hanau taha ke tuʻu ʻi he veʻe ʻaá.

16 ʻOku malaʻia ʻa kinautolu kotoa pē ʻe hiki ʻa e muivaʻe ʻo fakafili ki heʻeku kau paní, ʻoku folofola ʻe he ʻEikí, pea kaila ʻo pehē kuo nau fai angahala, ka kuo ʻikai ke nau fai angahala ʻi hoku ʻaó, ʻoku folofola ʻe he ʻEikí, ka kuo nau fai ʻa e meʻa ʻoku lelei ʻi hoku ʻaó pea naʻá ku fekau ke nau faí.

17 Ka ko kinautolu ʻoku kalanga ʻaki ʻa e maumau-fonó ʻoku nau fai pehē koeʻuhí he ko e kau pōpula ʻa kinautolu ki he angahalá, pea ko e fānau kinautolu ʻo e talangataʻá.

18 Pea ko kinautolu ʻoku fuakava loi ʻo kau ki heʻeku kau tamaioʻeikí, koeʻuhí ke nau ʻomi ʻa kinautolu ki he pōpulá mo e maté—

19 ʻE hoko ʻa e malaʻia kiate kinautolu; ko e meʻa ʻi heʻenau faikovi ki heʻeku fānau īkí, ko ia ʻe motuhi ai ʻa kinautolu mei he ngaahi ouau ʻo hoku falé.

20 ʻE ʻikai fonu ʻa ʻenau kato meʻakaí, ʻe ʻauha ʻa honau ngaahi falé mo e ngaahi feleokó, pea ʻe fehiʻanekina ʻa kinautolu pē ʻe kinautolu naʻe fakahekehekeʻi ʻa kinautolú.

21 He ʻikai te nau maʻu ha totonu ki he lakanga fakataulaʻeikí, pe ko honau hako ki mui ʻiate kinautolú, mei he toʻu tangata ki he toʻu tangata.

22 ʻE lelei ange ka ne tautau ʻi honau kiá ha fuʻu maka-momosi pea lōmakiʻi ʻa kinautolu ʻi he loto moaná.

23 ʻE malaʻia ʻa kinautolu kotoa pē ʻoku fakamamahiʻi ʻa hoku kakaí pe tuli mo fakapoongi mo talatalaakiʻi ʻa kinautolú, ʻoku folofola ʻe he ʻEiki ʻo e Ngaahi Kau Taú; ʻe ʻikai hao mei he malaʻia ʻo helí ha toʻu tangata ʻo e ngata fekaí.

24 Vakai, ʻoku sio ʻa hoku matá ʻo u ʻiloʻi ʻa ʻenau ngaahi ngāue kotoa pē, pea kuó u ʻosi teuteu ha tautea ʻe hoko fakafokifā ʻi hono taimi totonu ʻoʻoná kiate kinautolu kotoa pē;

25 He ʻoku ai ha taimi kuo kotofa ki he tangata kotoa pē, ʻo fakatatau mo ʻene ngaahi ngāue ʻe faí.

26 ʻE foaki kiate kimoutolu ʻe he ʻOtuá ʻa e ʻilo ʻi hono Laumālie Māʻoniʻoni, ʻio, ʻi he meʻa-foaki taʻe-mafakamatalaʻi ʻo e Laumālie Māʻoniʻoní, ʻa ia kuo teʻeki ai ke fakahā talu mei he fokotuʻu ʻo māmaní ʻo aʻu mai ki he taimí ni;

27 ʻA ia kuo tatali ʻa ʻetau ngaahi kuí ki hono fakahā mai ʻi he ngaahi ʻaho fakaʻosí ʻi he ʻamanaki lahi fau, ʻa ia naʻe fakaʻamanakiʻi honau lotó ki ai ʻe he kau ʻāngeló, ko e meʻa kuo teuteu ki he kakato ʻo honau nāunaú;

28 Ki ha kuonga ʻa ia ʻe hoko mai, ʻa ia ʻe ʻikai taʻofi ai ha meʻa, pe ʻoku ʻi ai ha ʻÓtua pē toko taha, pe ko e ngaahi ʻotua tokolahi, ʻe fakahā ʻa kinautolu.

29 ʻE fakahā ʻa e ngaahi taloni mo e ngaahi puleʻanga, mo e ngaahi pule fakapilinisi mo e ngaahi mālohi kotoa pē, pea fokotuʻu atu ia kiate kinautolu kotoa pē kuo nau kātaki ʻi he loto-toʻa koeʻuhi ko e ongoongolelei ʻa Sīsū Kalaisí.

30 Pea ko ʻeni foki, kapau ʻoku ʻi ai ha ngaahi ngataʻanga kuo fokotuʻu ki he ngaahi langí pe ki he ngaahi tahí, pe ki he fonua mōmoá, pe ki he laʻaá, pe ko e māhiná pe ko e ngaahi fetuʻú—

31 ʻA e ngaahi faʻahitaʻu kotoa pē ʻo ʻenau ngaahi ʻalu takaí, ʻa e ngaahi ʻaho mo e ngaahi māhina mo e ngaahi taʻu kotoa pē kuo tuʻutuʻuní, pea mo e ngaahi taimi kotoa pē ʻo honau ngaahi ʻahó mo e ngaahi māhiná mo e ngaahi taʻú pea mo honau ngaahi nāunaú mo e ngaahi laó mo e ngaahi kuonga tukupau kotoa pē, ʻe fakahā ia ʻi he ngaahi ʻaho ʻo e kuonga ʻo e kakato ʻo e ngaahi kuongá—

32 ʻO fakatatau mo e meʻa naʻe tuʻutuʻuni ʻi he lotolotonga ʻo e Fakataha Alēlea ʻo e ʻOtua Taʻengata ʻo e ngaahi ʻotua kehe kotoa pē ʻi he teʻeki ai ke tuʻu ʻa māmaní, ke taʻofi ia ʻo aʻu ki he fakaʻosinga pea mo e ngataʻanga ʻo iá, ʻo ka hū ʻa e tangata fulipē ki hono ʻao taʻengatá pea ki hono mālōlōʻanga taʻe-faʻa-maté.

33 ʻE fēfē hono fuoloa ʻo e kei lava ke taʻemaʻa ai pē ʻa e ngaahi vai ʻoku tafé? Ko e hā ha mālohi ʻe faʻa mataʻofia ʻa e ngaahi langí? ʻE faingofua tatau ʻa hono fakamafao atu ʻe ha tangata ʻa hono nima vaivaí ke taʻofi ʻa e vaitafe Mīsulí ʻi heʻene tafe atu ʻi hono ʻaluʻanga kuo vaheʻí, pe fakatafoki ia ke tafe ki mui pea mo hono taʻofi ʻo e Māfimafí mei heʻene lilingi hifo ʻa e ʻilo mei he langí, ki he ʻulu ʻo e Kau Māʻoniʻoni ʻi he Ngaahi ʻAho Kimui Ní.

34 Vakai, ʻoku ui ʻa e tokolahi, kae fili ʻa e tokosiʻi. Pea ko e hā ʻoku ʻikai ke fili ai ʻa kinautolú?

35 Koeʻuhí he ʻoku mālohi pehē fau hono tuku ʻo honau lotó ki he ngaahi meʻa ʻo e māmani ko ʻení, pea nau holi ki he fakaʻapaʻapa ʻa e kakaí, ʻoku ʻikai te nau ʻiloʻi ai ʻa e moʻoni ʻe taha ko ʻení—

36 Ko e ngaahi totonu ʻo e lakanga fakataulaʻeikí kuo fakamaʻu taʻelava ke veteki ki he ngaahi mālohi ʻo e langí, pea ʻoku ʻikai lava ke mapuleʻi pe ngāue ʻaki ʻa e ngaahi mālohi ʻo e langí kae ngata pē ʻi he ngaahi founga ʻo e māʻoniʻoní.

37 ʻOku moʻoni pē ʻoku lava ke foaki ia kiate kitautolu; ka ʻo ka tau ka feinga ke ʻufiʻufi ʻetau ngaahi angahalá pe fakafiemālieʻi ʻetau loto-hīkisiá pe ko ʻetau kakapa taʻeʻaongá pe ngāue ʻaki ha fakakouna pe puleʻi pe fakamālohiʻi ʻa e loto ʻo e fānau ʻa e tangatá ʻi ha kihiʻi momoʻi founga taʻe-māʻoniʻoni, vakai, ʻoku mahuʻi atu leva ʻa e ngaahi langí; ʻoku mamahi mo e Laumālie ʻo e ʻEikí; pea ʻo ka toʻo atu ia, ko e ʻĒmeni ia ki he lakanga fakataulaʻeiki pe ko e mafai ʻo e tangata ko iá.

38 Vakai, ʻi he teʻeki ai ke ne ʻilo, kuo fakatukutukuʻi ia ke ne nofo toko taha pē, ke ʻakahi ʻa e ngaahi meʻa māsilá, ke fakatangaʻi ʻa e kāingalotú, pea fakafili ki he ʻOtuá.

39 Kuo tau ʻiloʻi ʻi he ngaahi meʻa pango kuo hoko kiate kitautolú, ko e anga mo e ʻulungāanga ʻo e kakai meimei kotoa pē, ʻo ka nau ka maʻu leva ha kiʻi mafai, ʻo hangē tokua ko ʻenau mahaló, ke nau kamata leva ke ngāue ʻaki ha pule taʻe-māʻoniʻoni.

40 Ko ia ʻoku ui ʻa e tokolahi kae fili ʻa e tokosiʻi.

41 ʻOku ʻikai lava, pe ʻoku ʻikai totonu, ke ngāue ʻaki ha mālohi pe ivi ʻi he mafai ʻo e lakanga fakataulaʻeikí, kae ngata pē ʻi he feifeingaʻi ʻi he faʻa kātaki fuoloa, ʻi he angavaivai mo e angamalū pea mo e ʻofa taʻe-mālualoi;

42 ʻI he angaʻofa, mo e ʻilo haohaoa, ʻa ia ʻe fuʻu fakafuofuolahi ʻa e laumālié taʻe ʻi ai ha mālualoi pea taʻe-ha-kākā—

43 Pea valokiʻi ʻi hono taimí, ʻi he lea māsila, ʻo ka ueʻi ke fai pehē ʻe he Laumālie Māʻoniʻoní; pea hili ia ke toki fakahā ange ʻa e ʻofa lahi ange kiate ia kuó ke valokiʻí, telia naʻá ne lau koe ko hono fili;

44 Koeʻuhí ke ne ʻiloʻi ʻoku mālohi ange ʻa ho angatonú ʻi he ngaahi afo ʻo e maté.

45 Tuku foki ke fonu ʻa ho lotó ʻi he manavaʻofa ki he kakai fulipē, pea ki he fale ʻo e tuí pea tuku ke ngaohi ke fakaʻofoʻofa maʻu ai pē ʻe he angamaʻá ʻa hoʻo ngaahi fakakaukaú; pea ʻe ʻāsili mālohi ʻa hoʻo falalá ʻi he ʻao ʻo e ʻOtuá; pea ko e tokāteline ʻo e lakanga fakataulaʻeikí ʻe mokulu ia ki ho laumālié ʻo hangē ko e ngaahi hahau mei he langí.

46 ʻE hoko ʻa e Laumālie Māʻoniʻoní ko ho takaua maʻu ai pē, pea ko ho tokotokó, ko e tokotoko taʻe-faʻa-liliu ʻo e māʻoniʻoni mo e moʻoni; pea ko hoʻo pulé ʻe hoko ia ko e pule taʻengata, pea ʻe tafe mai ia kiate koe taʻe ʻi ai ha fakamālohiʻi ʻo taʻengata pea taʻengata.