Vahe 137
Ko ha meʻa-hā-mai kia Siosefa Sāmita ko e Palōfitá, ʻi he temipale ʻi Ketilaní, ʻi ʻOhaiō, ʻi he ʻaho 21 Sānualí 1836 (History of the Church, 2:380–381). Ko e meʻa ʻeni naʻe hoko ʻi he lolotonga ʻa hono fakahoko ʻo e ngaahi ouau ʻo e ʻenitaumení, ʻo fakatatau ki he ngaahi meʻa kuo ʻosi fakahā maí.
1–6, ʻOku mamata ʻa e Palōfitá ki hono tokoua ko ʻAlaviní ʻi he puleʻanga fakasilesitialé; 7–9, ʻOku fakahā mai ʻa e tokāteline ʻo e fakamoʻui ʻo e pekiá; 10, ʻOku fakamoʻui ʻa e fānau kotoa pē ʻi he puleʻanga fakasilesitiale.
1 Naʻe fakaava ʻa e ngaahi langí kiate kimautolu, pea naʻá ku mamata ki he puleʻanga fakasilesitiale ʻo e ʻOtuá, pea mo hono nāunaú, pea ʻoku ʻikai te u ʻilo pē naʻá ku ʻi he sinó pe ʻi he laumālié.
2 Naʻá ku mamata ki he fakaʻofoʻofa taʻe-hano-tatau ʻo e matapā ʻe hū ai ʻa e kau ʻea hokó ki he puleʻanga ko iá, ʻa ia naʻe hangē ko ha afi ulo takaí;
3 Kae ʻumaʻā foki ki he taloni ulo ngingila ʻo e ʻOtuá, ʻa ia naʻe ʻāfifio ai ʻa e Tamaí pea mo e ʻAló.
4 Naʻá ku mamata ki he ngaahi hala fakaʻofoʻofa ʻo e puleʻanga ko iá, ʻa ia naʻe hā mai ʻo hangē naʻe ngaohi ʻaki ha koulá.
5 Naʻá ku mamata ki he Tamai ko ʻĀtamá mo ʻĒpalahame; pea mo ʻeku tamaí mo ʻeku faʻeé; pea ki hoku tokoua ko ʻAlaviní, ʻa ia kuo fuoloa siʻene pekiá;
6 Pea naʻá ku fifili pē naʻá ne maʻu fēfē ha tofiʻa ʻi he puleʻanga ko iá, ʻi heʻeku ʻiloʻi naʻá ne mavahe atu meí he moʻuí ni ki muʻa ʻoku teʻeki ala mai ʻa e toʻukupu ʻo e ʻEikí ke tānaki ʻa ʻIsileli ko hono tuʻo uá, pea naʻe teʻeki ai foki ke ne papitaiso ke fakamolemoleʻi ʻa ʻene ngaahi angahalá.
7 Ko ia naʻe ongo mai ʻa e leʻo ʻo e ʻEikí kiate au, ʻo pehē: Ko kinautolu kotoa pē kuo nau pekia, ka naʻe teʻeki ai ke nau maʻu ha ʻilo ki he ongoongolelei ko ʻení, ʻa ia naʻa nau mei tali ia ʻo kapau naʻe fakaʻatā ke nau kei moʻui, te nau hoko ko e kau ʻea-hoko ki he puleʻanga fakasilesitiale ʻo e ʻOtuá;
8 Pea mo kinautolu kotoa pē foki ʻa ia te nau pekia mei he taimi ko ʻení ʻo faai atu, ka ʻoku teʻeki ai ke nau maʻu ha ʻilo ki he ongoongolelei ko iá, ʻa ia naʻa nau mei tali ia ʻaki honau lotó kotoa, te nau hoko foki mo kinautolu ko e kau ʻea-hoko ki he puleʻanga ko iá;
9 He ko au, ko e ʻEikí, te u fakamāuʻi ʻa e tangata kotoa pē ʻo fakatatau ki heʻenau ngaahi ngāué, pea fakatatau ki he ngaahi holi ʻo honau lotó.
10 Pea naʻá ku mamata foki ko e fānau iiki kotoa pē kuo nau pekia, ka ʻoku teʻeki ai ke nau taʻu motuʻa feʻunga ke ʻekeʻi meiate kinautolu ʻa ʻenau ngaahi ngāué, ʻoku fakamoʻui mo kinautolu ʻi he puleʻanga fakasilesitiale ʻo e langí.