Vahe 4
Ko e fakahā naʻe fai mai ʻia Siosefa Sāmita ko e Palōfitá ki heʻene tamai, ko Siosefa Sāmita, ko e Lahi, ʻi Hāmoni, Penisilivēnia, ʻi Fēpueli 1829 (History of the Church, 1:28).
1–4, ʻOku fakamoʻui ʻe he ngāue ʻosikiavelengá ʻa e kau ngāue ʻa e ʻEikí; 5–6, ʻOku hanga ʻe he ngaahi ʻulungāanga faka-ʻOtuá ʻo fakafeʻungaʻi kinautolu ki he ngāué; 7, Kuo pau ke kumi ki he ngaahi meʻa ʻa e ʻOtuá.
1 Ko ʻeni vakai, ʻoku ofi ke hoko mai ha ngāue fakaofo ʻi he lotolotonga ʻo e fānau ʻa e tangatá.
2 Ko ia, ko kimoutolu ʻoku kamata ke fai ʻa e ngāue ʻa e ʻOtuá, mou tokanga ke mou tauhi kiate ia ʻaki homou lotó, iví, ʻatamaí mo e mālohí kotoa, koeʻuhí ke mou tuʻu taʻehalaia ʻi he ʻao ʻo e ʻOtuá ʻi he ʻaho fakaʻosí.
3 Ko ia, kapau ʻoku mou maʻu ʻa e ngaahi holi ke ngāue maʻá e ʻOtuá ʻoku ui ʻa kimoutolu ki he ngāué;
4 He vakai ʻoku hina ʻa e ngoué ki he utu-taʻú; pea vakai, ko ia ʻokú ne ʻai ʻene hele tuʻusí ʻaki hono tūkuingatá, ʻokú ne tokonaki ke ʻoua naʻá ne mate, kae fakahoko ʻa e fakamoʻuí ki hono laumālié;
5 Pea ʻoku hanga ʻe he tuí, ʻamanaki leleí, manavaʻofá mo e ʻofá, mo e mata ʻoku hanga taha pē ki hono fakalāngilangiʻi ʻo e ʻOtuá, ʻo fakafeʻungaʻi ia ki he ngāué.
6 Manatuʻi ʻa e tuí, angamaʻá, ʻiló, anga-fakamaʻumaʻú, faʻa kātakí, feʻofoʻofani fakakāingá, anga faka-ʻOtuá, manavaʻofá, loto-fakatōkilaló, mo e faʻa ngāué.
7 Kole pea te ke maʻu; tukituki, pea ʻe toʻo kiate koe. ʻĒmeni.