Bahagi 52
Paghahayag na ibinigay sa pamamagitan ni Joseph Smith, ang Propeta, sa mga elder ng Simbahan, sa Kirtland, Ohio, ika-7 ng Hunyo 1831 (History of the Church, 1:175–179). Isang pagpupulong ang ginanap sa Kirtland, simula sa ika-3 at nagtapos sa ika-6 ng Hunyo. Sa pagpupulong na ito ang unang natatanging pag-oorden sa katungkulan ng mataas na saserdote ay ginawa, at ilang pagpapakita ng huwad at manlilinlang na espiritu ay nawari at sinaway.
1–2, Ang susunod na pagpupulong ay itinakda na gaganapin sa Missouri; 3–8, Ang pagtatalaga sa ilang elder na maglalakbay na sama-sama ay isinagawa; 9–11, Ituturo ng mga elder yaong mga isinulat ng mga apostol at propeta; 12–21, Ang mga yaong naliwanagan ng Espiritu ay magdadala ng bunga ng papuri at karunungan; 22–44, Ilang elder ang itinalaga na humayong nangangaral ng ebanghelyo habang naglalakbay sa Missouri para sa pagpupulong.
1 Masdan, ganito ang wika ng Panginoon sa mga elder na kanyang tinawag at pinili sa mga huling araw na ito, sa pamamagitan ng tinig ng kanyang Espiritu—
2 Sinasabing: Ako, ang Panginoon, ay ipaaalam sa inyo ang aking kalooban na gagawin ninyo mula sa oras na ito hanggang sa susunod na pagpupulong, na gaganapin sa Missouri, sa lupain na aking ilalaan sa aking mga tao, na siyang mga labi ni Jacob, at yaong mga tagapagmana alinsunod sa tipan.
3 Dahil dito, katotohanang sinasabi ko sa inyo, ang aking mga tagapaglingkod na sina Joseph Smith, Jun., at Sidney Rigdon ay maglakbay sa sandali na maisagawa ang mga paghahanda upang lisanin ang kanilang mga tahanan at maglakbay sa lupain ng Missouri.
4 At yayamang sila ay matatapat sa akin, ipaaalam sa kanila ang kanilang dapat gawin;
5 At gayon din, yayamang sila ay matatapat, ipaaalam sa kanila ang lupain na inyong mana.
6 At yayamang sila ay hindi matatapat, sila ay mahihiwalay, maging gaya ng kalooban ko, kung ano ang inaakala kong mabuti.
7 At muli, katotohanang sinasabi ko sa inyo, ang aking tagapaglingkod na sina Lyman Wight at ang aking tagapaglingkod na si John Corrill ay maglakbay na kaagad;
8 At gayon din ang aking tagapaglingkod na si John Murdock, at ang aking tagapaglingkod na si Hyrum Smith, na maglakbay sa lugar ding yaon sa daanan patungong Detroit.
9 At maglakbay sila mula roon nangangaral ng salita sa daan, nangungusap ng wala nang ibang bagay kundi ang mga isinulat ng mga propeta at apostol, at ang yaong mga itinuro sa kanila ng Mang-aaliw sa pamamagitan ng panalangin na may pananampalataya.
10 Sila ay humayo nang dala-dalawa, at ganito sila ay mangaral sa daan sa bawat kongregasyon, magbibinyag sa pamamagitan ng tubig, at ang pagpapatong ng mga kamay sa tabi ng tubig.
11 Sapagkat ganito ang wika ng Panginoon, aking paiikliin ang aking gawain sa kabutihan, sapagkat darating ang mga araw na aking ibababa ang paghahatol tungo sa tagumpay.
12 At mag-ingat ang aking tagapaglingkod na si Lyman Wight, sapagkat ninanais ni Satanas na bistayin siya gaya ng ipa.
13 At masdan, siya na matapat ay gagawing tagapamahala sa maraming bagay.
14 At muli, ako ay magbibigay sa inyo ng isang huwaran sa lahat ng bagay, nang hindi kayo malinlang; sapagkat si Satanas ay nagtungo sa lupa, at siya ay naglilibot nililinlang ang mga bansa—
15 Dahil dito siya na nananalangin, na ang espiritu ay nagsisisi, siya rin ay aking tinatanggap kung sinusunod niya ang aking mga ordenansa.
16 Siya na nagsasalita, na ang espiritu ay nagsisisi, na ang mga salita ay may kaamuan at nagpapatibay, siya rin ay mula sa Diyos kung sinusunod niya ang aking mga ordenansa.
17 At muli, siya na nanginginig sa ilalim ng aking kapangyarihan ay gagawing malakas, at magdadala ng bunga ng papuri at karunungan, alinsunod sa mga paghahayag at katotohanan na aking ibinigay sa inyo.
18 At muli, siya na nadaig at hindi nakapagdala ng mga bunga, maging alinsunod sa huwarang ito, ay hindi sa akin.
19 Dahil dito, sa pamamagitan ng huwarang ito inyong makikilala ang mga espiritu sa lahat ng pagkakataon sa silong ng buong kalangitan.
20 At ang mga araw ay sumapit na, alinsunod sa pananampalataya ng mga tao mangyayari ito sa kanila.
21 Masdan, ang kautusang ito ay ibinigay sa lahat ng elder na aking pinili.
22 At muli, katotohanang sinasabi ko sa inyo maglakbay rin ang aking tagapaglingkod na sina Thomas B. Marsh at Ezra Thayre, mangangaral ng salita sa daan sa lupain ding ito.
23 At muli, maglakbay ang aking mga tagapaglingkod na si Isaac Morley at ang aking tagapaglingkod na si Ezra Booth, nangangaral din ng salita sa daan sa lupain ding ito.
24 At muli, maglakbay ang aking mga tagapaglingkod na sina Edward Partridge at Martin Harris kasama ang aking mga tagapaglingkod na sina Sidney Rigdon at Joseph Smith, Jun.
25 Maglakbay rin ang aking mga tagapaglingkod na sina David Whitmer at Harvey Whitlock, at mangaral sa daan sa lupain ding ito.
26 At maglakbay ang aking mga tagapaglingkod na sina Parley P. Pratt at Orson Pratt, at mangaral sa daan, maging sa lupain ding ito.
27 At maglakbay rin ang aking mga tagapaglingkod na sina Solomon Hancock at Simeon Carter sa lupain ding ito, at mangaral sa daan.
28 Maglakbay rin ang aking mga tagapaglingkod na sina Edson Fuller at Jacob Scott.
29 Maglakbay rin ang aking mga tagapaglingkod na sina Levi W. Hancock at Zebedee Coltrin.
30 Maglakbay rin ang aking mga tagapaglingkod na sina Reynolds Cahoon at Samuel H. Smith.
31 Maglakbay rin ang aking mga tagapaglingkod na sina Wheeler Baldwin at William Carter.
32 At ang aking mga tagapaglingkod na sina Newel Knight at Selah J. Griffin ay ordenan kapwa at maglakbay rin.
33 Oo, katotohanang sinasabi ko, lahat sila ay maglakbay sa isang lugar, sa kanilang iba-ibang daanan, at ang isang tao ay hindi dapat magtatag sa ibabaw ng saligan ng iba, ni maglakbay sa pinagdaanan ng iba.
34 Siya na matapat, siya rin ay pangangalagaan at pagpapalain ng maraming bunga.
35 At muli, sinasabi ko sa inyo, ang aking tagapaglingkod na sina Joseph Wakefield at Solomon Humphrey ay maglakbay patungo sa mga lupaing silangan;
36 Gumawa sila kasama ng kanilang mag-anak, nagpapahayag ng walang ibang bagay maliban sa mga propeta at apostol, na kanilang nakita at narinig at tunay na pinaniniwalaan, upang ang mga propesiya ay matupad.
37 Bunga ng paglabag, ang yaong ipinagkaloob kay Heman Basset ay kunin sa kanya, at ilagay sa ulo ni Simonds Ryder.
38 At muli, katotohanang sinasabi ko sa inyo, si Jared Carter ay iordenang isang saserdote, at gayon din si George James ay iordenang isang saserdote.
39 Ang mga natirang elder ay mangalaga sa mga simbahan, at ipahayag ang salita sa mga lugar sa paligid nila; at gumawa sila sa pamamagitan ng kanilang sariling mga kamay nang hindi magkaroon ng pagsamba sa mga diyus-diyusan ni paggawa ng kasamaan.
40 At alalahanin sa lahat ng bagay ang mga maralita at ang mga nangangailangan, ang maysakit at ang naghihirap, sapagkat siya na hindi gumagawa ng mga bagay na ito, siya rin ay hindi ko disipulo.
41 At muli, magdala ang aking mga tagapaglingkod na sina Joseph Smith, Jun., at Sidney Rigdon at Edward Partridge ng isang rekomendasyon mula sa simbahan. At kumuha rin ng isa para sa aking tagapaglingkod na si Oliver Cowdery.
42 At sa ganito, maging gaya ng sinabi ko, kung kayo ay matatapat ay titipunin ninyo nang sama-sama ang inyong sarili upang magsaya sa lupain ng Missouri, na lupain na inyong mana, na ngayon ay lupain ng inyong mga kaaway.
43 Subalit, masdan, ako, ang Panginoon, ay mamadaliin ang lunsod sa kanyang panahon, at puputungan ang matatapat nang may galak at nang may pagsasaya.
44 Masdan, ako si Jesucristo, ang Anak ng Diyos, at dadakilain ko sila sa huling araw. Maging gayon nga. Amen.