Vahe 93
Ko e fakahā naʻe fai mai ʻia Siosefa Sāmita ko e Palōfitá, ʻi Ketilani, ʻi ʻOhaiō, ʻi he ʻaho 6 Mē 1833 (History of the Church, 1:343–346).
1–5, Ko kinautolu kotoa pē ʻoku tui faivelengá te nau mamata ki he ʻEikí; 6–18, Naʻe fakamoʻoniʻi ʻe Sione naʻe tupulaki ʻa e ʻAlo ʻo e ʻOtuá mei he angaʻofa ki he angaʻofa kae ʻoua kuó ne maʻu hono fonu ʻo e nāunau ʻo e Tamaí; 19–20, Ko e kakai tui faivelenga kotoa pē, ʻoku nau tupulaki mei he angaʻofa ki he angaʻofá, te nau maʻu foki mo hono fonú; 21–22, Ko kinautolu kuo fanauʻi ʻia Kalaisí ko e Siasi ʻo e ʻUluaki Fānaú ʻa kinautolu; 23–28, Naʻe maʻu ʻe Kalaisi hono kakato ʻo e moʻoni kotoa pē, pea ʻe lava ʻe he tangatá ʻo maʻu ia ʻi heʻenau talangofuá; 29–32, Naʻe ʻi he kamataʻangá ʻa e tangatá fakataha mo e ʻOtuá; 33–35, ʻOku taʻengata ʻa e ngaahi ʻelemēnití, pea ʻe lava ʻe he tangatá ʻo maʻu hono kakato ʻo e fiefiá ʻi he Toetuʻú; 36–37, Ko e nāunau ʻo e ʻOtuá ko e ʻatamai poto; 38–40, ʻOku taʻehalaia ʻa e fānaú ʻi he ʻao ʻo e ʻOtuá tuʻunga ʻi he huhuʻi ʻa Kalaisí; 41–53, ʻOku fekau ki he kau takimuʻá ke fakamaau honau ngaahi fāmilí.
1 Ko e moʻoni, ʻoku folofola peheni ʻe he ʻEikí: ʻE hoko ʻo pehē ko e tangata kotoa pē ʻe liʻaki ʻene ngaahi angahalá pea haʻu kiate au, ʻo ui ki hoku hingoá, pea talangofua ki hoku leʻó, mo tauhi ʻeku ngaahi fekaú, te ne mamata ki hoku matá pea ʻiloʻi ʻoku ou ʻi ai;
2 Pea ko au ʻa e maama moʻoni ʻoku fakamaama ʻa e tangata kotoa pē ʻoku haʻu ki he māmaní;
3 Pea ʻoku ou ʻi he Tamaí, pea ʻoku ʻiate au ʻa e Tamaí, pea ko e Tamaí mo au ʻokú ma taha pē—
4 Ko e Tamaí koeʻuhi naʻá ne foaki kiate au mei hono fonú, pea ko e ʻAló koeʻuhí naʻá ku ʻi he māmaní peá u ngaohi ʻa e kakanó ko hoku nofoʻanga, peá u nofo ʻi he lotolotonga ʻo e ngaahi foha ʻo e tangatá.
5 Naʻá ku ʻi he māmaní peá u maʻu mei heʻeku Tamaí, pea naʻe fakahā mahino lelei ʻa e ngaahi ngāue ʻo iá.
6 Pea naʻe mamata mo fakamoʻoni ʻa Sione ki hono kakato ʻo hoku nāunaú, pea ʻe fakahā ʻamui ʻa hono kotoa ʻo e lekooti ʻa Sioné.
7 Pea naʻá ne fakamoʻoni, ʻo pehē: Naʻá ku mamata ki hono nāunaú, pea naʻe ʻi he kamataʻangá ia, ʻi he teʻeki ai ke ʻi ai ʻa e māmaní;
8 Ko ia, naʻe ʻi he kamataʻangá ʻa e Folofolá, he ko e Folofolá ia, ʻio ʻa e talafekau ʻo e fakamoʻuí—
9 Ko e maama mo e Huhuʻi ʻo e māmaní; ko e Laumālie ʻo e moʻoní, ʻa ia naʻe hāʻele mai ki he māmaní, koeʻuhí he naʻe ngaohi ʻe ia ʻa e māmaní, pea naʻe ʻiate ia ʻa e moʻui ʻa e tangatá pea mo e maama ʻo e tangatá.
10 Naʻe ngaohi ʻe ia ʻa e ngaahi māmá; naʻe ngaohi ʻe ia ʻa e tangatá; naʻe ngaohi ʻe ia, pea ʻiate ia, pea meiate ia ʻa e ngaahi meʻa kotoa pē.
11 Pea ko au, Sione, ʻoku ou fakamoʻoni, naʻá ku mamata ki hono nāunaú, ko e nāunau ʻo e ʻAlo pē Taha naʻe Fakatupu ʻo e Tamaí, ʻoku fonu ʻi he ʻaloʻofa mo e moʻoni, ʻio ʻa e Laumālie ʻo e moʻoní, ʻa ia naʻe hāʻele mai ʻo ʻafio ʻi he kakanó, pea ʻafio ʻi hotau lotolotongá.
12 Pea ko au, Sione, naʻá ku mamata, naʻe ʻikai te ne maʻu mei he fonú ʻi he kamataʻangá, ka naʻá ne maʻu ʻa e ʻaloʻofa hoko mo e ʻaloʻofa;
13 Pea naʻe ʻikai te ne maʻu mei he fonú ʻi he kamataʻangá, ka naʻá ne fai atu mei he ʻaloʻofa ki he ʻaloʻofa, ʻo aʻu ki heʻene maʻu hono fonú;
14 Pea ko ia naʻe ui ia ko e ʻAlo ʻo e ʻOtuá, koeʻuhí he naʻe ʻikai te ne maʻu mei he fonú ʻi he kamataʻangá.
15 Pea ko au, Sione, ʻoku ou fakamoʻoni, pea ʻiloange, naʻe fakaava mai ʻa e ngaahi langí, pea naʻe maliu hifo ʻa e Laumālie Māʻoniʻoní kiate ia ʻi he tatau ʻo ha lupe, ʻo nofo ʻiate ia, pea naʻe ongo mai ha leʻo mei he langí ʻo pehē: Ko hoku ʻAlo ʻofaʻangá ʻeni.
16 Pea ko au, Sione, ʻoku ou fakamoʻoni naʻá ne maʻu hono fonu ʻo e nāunau ʻo e Tamaí;
17 Pea naʻá ne maʻu ʻa e mālohi kotoa, ʻi he langí pea ʻi he māmaní fakatouʻosi, pea naʻe ʻiate ia ʻa e nāunau ʻo e Tamaí, he naʻá ne ʻafio ʻiate ia.
18 Pea ʻe hoko ʻo pehē, kapau te mou faivelenga te mou maʻu ʻa hono kakato ʻo e lekooti ʻa Sioné.
19 ʻOku ou ʻoatu kiate kimoutolu ʻa e ngaahi leá ni koeʻuhí ke mahino kiate kimoutolu pea mou ʻiloʻi ʻa e founga ke hū aí, pea ʻiloʻi ʻa ia ʻoku mou hū ki aí, koeʻuhí ke mou lava ʻo haʻu ki he Tamaí ʻi hoku hingoá, pea mou maʻu mei hono fonú ʻi hono taimi totonu.
20 He ʻo kapau te mou tauhi ʻeku ngaahi fekaú te mou maʻu mei hono fonú, pea ʻe fakalāngilangiʻi ʻa kimoutolu ʻiate au ʻo hangē ko au ʻi he Tamaí; ko ia, ʻoku ou pehē kiate kimoutolu, te mou maʻu ʻa e ʻaloʻofa hoko mo e ʻaloʻofa.
21 Pea ko ʻeni, ko e moʻoni ʻoku ou pehē kiate kimoutolu, naʻá ku ʻi he kamataʻangá mo e Tamaí, pea ko au ʻa e ʻUluaki Fānaú;
22 Pea ko kinautolu kotoa pē kuo fakatupu ʻiate aú ʻoku nau maʻu mei hono nāunau ʻo iá, pea ko e siasi ʻa kinautolu ʻo e ʻUluaki Fānaú.
23 Naʻa mou ʻi he kamataʻangá foki mo e Tamaí; ko e meʻa ko ia ko e Laumālié, ʻio ko e Laumālie ʻo e moʻoní;
24 Pea ko e moʻoní ʻa e ʻiloʻi ʻo e ngaahi meʻa ʻo hangē ko honau anga ʻoku ʻi aí, pea naʻa nau ʻi aí, pea te nau hoko ki aí;
25 Pea ʻilonga ha meʻa ʻoku lahi hake pe siʻi hifo ʻi heni, ko e laumālie ia ʻo e tokotaha angakoví ʻa ia ko ha tokotaha loi talu mei he kamataʻangá.
26 ʻOku mei he ʻOtuá ʻa e Laumālie ʻo e moʻoní. Ko au ʻa e Laumālie ʻo e moʻoní, pea naʻe fakamoʻoni ʻa Sione kiate au, ʻo pehē: Naʻá ne maʻu ʻa hono kakato ʻo e moʻoní, ʻio, ʻa e moʻoní kotoa pē;
27 Pea ʻoku ʻikai maʻu ʻe ha tangata ʻa hono kakató tuku kehe ʻo kapau te ne tauhi ʻene ngaahi fekaú.
28 Ko ia ia ʻokú ne tauhi ʻene ngaahi fekaú ʻokú ne maʻu ʻa e moʻoní mo e māmá, kae ʻoua ke fakanāunauʻi ia ʻi he moʻoní peá ne ʻiloʻi ʻa e ngaahi meʻa kotoa pē.
29 Naʻe ʻi he kamataʻangá foki ʻa e tangatá mo e ʻOtuá. Ko e ʻatamai potó [ʻiniteliseni], pe ko e maama ʻo e moʻoní, naʻe ʻikai ke fakatupu pe ngaohi ia, pea ʻoku ʻikai foki ke lava ia.
30 ʻOku tauʻatāina ʻa e moʻoni kotoa pē ʻi he tuʻunga ko ia ʻa ia kuo tuku ia ki ai ʻe he ʻOtuá, ke ngāue ʻiate ia pē, ʻo hangē foki ko e ʻatamai poto kotoa pē; ka ne ʻikai pehē pea ʻoku ʻikai ke ʻi ai ha meʻa ʻe moʻui.
31 Vakai, ko ʻeni ʻa e tauʻatāina ke fili ʻa e tangatá, pea ko ʻeni ʻa hono fakahalaiaʻi ʻo e tangatá; koeʻuhí he ko e meʻa ko ia naʻe ʻi ai talu mei he kamataʻangá ʻoku fakahā mahinongofua kiate kinautolu, pea ʻoku ʻikai te nau tali ʻa e māmá.
32 Pea ko e tangata kotoa pē ʻoku ʻikai ke maʻu ʻe hono laumālié ʻa e māmá ʻoku fakahalaiaʻi ia.
33 He ko e laumālie ʻa e tangatá. ʻOku taʻengata ʻa e ngaahi ʻelemēnití, pea ko e laumālié mo e ʻelemēnití ʻo ka fakatahaʻi, ʻo taʻelava ke toe mavahevahe, ʻoku maʻu ʻe ia hono kakato ʻo e fiefiá;
34 Pea ʻo ka mavahevahe ia, ʻoku ʻikai lava ʻe he tangata ʻo maʻu hono kakato ʻo e fiefiá.
35 Ko e ngaahi ʻelemēnití ko e ʻafioʻanga ia ʻo e ʻOtuá; ʻio, ko e tangatá ko e ʻafioʻanga ia ʻo e ʻOtuá, ʻio, ko e ngaahi temipale; pea ʻilonga ha temipale ʻe ʻuliʻí, ʻe fakaʻauha ʻe he ʻOtuá ʻa e temipale ko iá.
36 Ko e nāunau ʻo e ʻOtuá ko e ʻatamai potó, pe, ko hono ʻai ʻe tahá, ko e maama mo e moʻoni.
37 ʻOku liʻaki ʻe he māmá mo e moʻoní ʻa e tokotaha angakovi ná.
38 Naʻe taʻehalaia ʻa e laumālie kotoa pē ʻo e tangatá ʻi he kamataʻangá; pea koeʻuhí kuo huhuʻi ʻe he ʻOtuá ʻa e tangatá mei he hingá, kuo toe hoko ai ʻa e tangatá, ki honau tuʻunga kei valevalé, ʻo taʻehalaia ʻi he ʻao ʻo e ʻOtuá.
39 Pea ʻoku haʻu ʻa e tokotaha angakovi ná ʻo toʻo atu ʻa e māmá mo e moʻoní, mei he fānau ʻa e tangatá, tuʻunga ʻi he talangataʻá, pea koeʻuhi ko e ngaahi talatukufakaholo ʻa ʻenau ngaahi tamaí.
40 Ka kuó u fekau kiate kimoutolu ke mou akonakiʻi hake ʻa hoʻomou fānaú ʻi he māmá mo e moʻoní.
41 Ka ko e moʻoni ʻoku ou pehē kiate koe, ʻa ʻeku tamaioʻeiki ko Feletiliki G. Uiliamisí, kuó ke fai atu ʻi he moʻulaloa ki he fakahalaiá ni;
42 Kuo ʻikai te ke akoʻi ʻa hoʻo fānaú ʻi he māmá mo e moʻoní, ʻo fakatatau ki he ngaahi fekaú; pea ʻoku kei maʻu ʻe he tokotaha angakovi ná, ʻa e mālohi kiate koe, pea ko e meʻa ʻeni ʻoku tupu ai hoʻo faingataʻaʻiá.
43 Pea ko ʻeni ʻoku ou fai ha fekau kiate koe—kapau ʻokú ke fie maʻu ke fakahaofi koe kuo pau ke ke fakamaau ho fale ʻoʻoú, he ʻoku lahi ʻa e ngaahi meʻa ʻoku ʻikai ke totonu ʻi ho falé.
44 Ko e moʻoni, ʻoku ou pehē ki heʻeku tamaioʻeiki ko Sitenei Likitoní, kuo ʻikai te ne tauhi ʻi he ngaahi meʻa ʻe niʻihi ki he ngaahi fekau ʻoku kau ki heʻene fānaú; ko ia, ke ke ʻuluaki fakamaau ʻa ho falé.
45 Ko e moʻoni, ʻoku ou pehē ki heʻeku tamaioʻeiki ko Siosefa Sāmita, ko e Siʻí, pe ʻi hono ʻai ʻe tahá, te u ui ʻa kimoutolu ko e ngaahi kaumeʻa, he ko hoku ngaahi kaumeʻa ʻa kimoutolu, pea te mou maʻu ha tofiʻa fakataha mo au—
46 Naʻá ku ui ʻa kimoutolu ko e kau tamaioʻeiki koeʻuhi ko e māmaní, pea ko ʻenau kau tamaioʻeiki ʻa kimoutolu koeʻuhí ko au—
47 Pea ko ʻeni, ko e moʻoni ʻoku ou pehē kia Siosefa Sāmita, ko e Siʻí—Kuo ʻikai te ke tauhi ʻa e ngaahi fekaú, pea kuo pau ke valokiʻi koe ʻi he ʻao ʻo e ʻEikí;
48 Kuo pau ke fakatomala ʻa ho fāmilí pea liʻaki ʻa e ngaahi meʻa ʻe niʻihi, pea tokanga fakamātoato ange ki hoʻo ngaahi leá, pe ʻe toʻo atu ʻa kinautolu mei honau tuʻungá.
49 Ko e meʻa ʻoku ou lea ʻaki ki he toko tahá, ʻoku ou lea ʻaki ia ki he kakai kotoa pē; lotu maʻu ai pē telia naʻa maʻu ʻe he tokotaha angakovi ná ʻa e mālohi kiate kimoutolu, pea toʻo atu ʻa kimoutolu mei homou tuʻungá.
50 ʻOku pehē foki mo ʻeku tamaioʻeiki ko Niueli K. Uitenií, ʻa ia ko ha pīsope ʻi hoku siasí, ʻoku ʻaonga ke valokiʻi mo ia, pea ke ne fakamaau ʻa hono fāmilí, pea tokanga ke nau faivelenga mo tokanga ʻo lahi ange ʻi ʻapi, pea lotu maʻu ai pē, pe ʻe toʻo atu ʻa kinautolu mei honau tuʻungá.
51 Ko ʻeni, ʻoku ou pehē kiate kimoutolu, ʻe hoku ngaahi kaumeʻa, tuku ke ʻalu atu ʻa ʻeku tamaioʻeiki ko Sitenei Likitoní ʻi heʻene fonongá, pea fakatoʻotoʻo, pea malanga ʻaki foki ʻa e taʻu lelei ʻo e ʻEikí, pea mo e ongoongolelei ʻo e fakamoʻuí, he te u fakaleaʻi ia; pea ʻi hoʻomou lotu ʻo e tuí ʻi he loto-tahá te u poupouʻi hake ia.
52 Pea tuku ke fai fakatoʻotoʻo foki ʻe heʻeku ongo tamaioʻeiki ko Siosefa Sāmita, ko e Siʻí, mo Feletiliki G. Uiliamisí, pea ʻe foaki kiate kinaua ʻo fakatatau pē ki he lotu ʻo e tuí; pea fakatatau ki hoʻomou tauhi ʻeku ngaahi leá ʻe ʻikai veuveuki ʻa kimoutolu ʻi he māmani ko ʻení, pe ʻi he maama ka hoko maí.
53 Pea, ko e moʻoni ʻoku ou pehē kiate kimoutolu, ko hoku lotó ke mou fakatoʻotoʻo ke liliu ʻeku ngaahi folofolá, pea ke maʻu ha ʻilo ki he hisitōliá, pea mo e ngaahi fonuá, mo e ngaahi puleʻangá, mo e ngaahi fono ʻa e ʻOtuá mo e ngaahi lao ʻa e tangatá, pea ke fai ʻeni kotoa pē koeʻuhi ko hono fakamoʻui ʻo Saioné. ʻĒmeni.