1 Sa kaya vakaidina vakaoqo na Turaga: Ena qai yaco, ni ko ira na yalo kecega era na biuta laivi na nodra ivalavala ca ka lako mai vei au, ka masuta na yacaqu, ka talairawarawa ki na domoqu, ka muria na noqu ivakaro, ena raica na mataqu ka kila ni sai au;

2 Ka ni sai Au na rarama dina sa vakararamataka na tamata kecega sa lako mai ki vuravura;

3 Ni’u sa tu vei Tamaqu, ka sa tu vei au ko Tamaqu; ia ko Tamaqu kei Au, keirau sa duabau—

4 Na Tamada baleta ni a solia vei au na taucoko ni nona lagilagi, ia na Luvena baleta ni’u a tiko e vuravura ka cakava me noqu vale na yago, ka tiko voli ena kedra maliwa na luve ni tamata.

5 Au a tiko e vuravura ka ciqoma na veika eso mai vei Tamaqu, ka sa vakaraitaki kina vakamatata na nona cakacaka.

6 Ka sa raica ka vola ko Joni na itukutuku ni kena taucoko ni noqu lagilagi, ena qai vakatakilai malua yani na taucoko ni nona itukutuku ko Joni.

7 A sa vola vakaoqo ko koya, ka kaya: Au sa raica na nona lagilagi, ni a sa tu mai na ivakatekivu, ni sa bera ni buli ko vuravura;

8 Ia, ena ivakatekivu sa bula ko koya na Vosa, ni sai koya ga na Vosa, io ko koya na italai sa kauta mai na veivakabulai—

9 Na rarama kei na Dauveivueti kei vuravura; io na Yalo ni ka dina, ko koya sa lako mai ki vuravura, baleta ni a bulia na vuravura, ia sa tu vua na bula ni tamata kei na rarama ni tamata.

10 A sa bulia na vuravura kecega ko koya; io sa buli ira tale ga na tamata; raica sa bulia na ka kecega ko koya, io era sa buli ena vukuna, ka sa buli ira ko koya.

11 Ia koi au ko Joni, au sa vakadinadinataka ni’u a raica na nona lagilagi ni sa vaka na lagilagi ni Le Duabau ga nei Tamana; a sa sinai ena loloma soli wale kei na dina; io na Yalo ni ka dina, sa lako sobu mai ka mai bula vakayago, ka tiko vata kei keda.

12 Ia koi au ko Joni, au a raica ni sa sega ni rawata na kena taucoko ena imatai ga ni gauna, ia sa rawata mai na iloloma soli wale ki na iloloma soli wale.

13 Ia sa sega ni rawata ga na kena taucoko ena imatai ni gauna, ia sa tubucake tikoga mai na iloloma soli wale ki na iloloma soli wale, me yacova ni sa rawata ena kena taucoko;

14 Sai koya oqo sa vakatokai kina me Luve ni Kalou, baleta ni a sega ni rawata na kena taucoko ena imatai ga ni gauna.

15 Ia koi au ko Joni, au sa vakadinadinataka, ka raica ni sa tadola ko lomalagi, ka lako sobu mai na Yalo Tabu me vaka na ruve ka mai dabe vua, a sa rogo mai lomalagi e dua na domo ka vaka: Oqo na Luvequ Lomani.

16 Ia koi au ko Joni, au sa vakadinadinataka ni sa rawata na taucoko ni lagilagi nei Tamana;

17 A sa soli vua na kaukauwa kecega mai lomalagi kei vuravura, ka sa tiko vua na lagilagi nei Tamana, ni sa tiko vata kei koya.

18 Ka na qai yaco, kevaka ko sa yalodina tiko ko na rawata na taucoko ni lagilagi ni itukutuku nei Joni.

19 Au sa tukuna vei kemudou na veika oqo mo dou kila kina na ivakarau mo dou qaravi koya kina, ka kilai koya dou sa qarava, mo dou lako yani kina vei Tamaqu ena yacaqu, ka rawata na nona veivakataucokotaki ena kena gauna.

20 Ia kevaka dou sa muria na noqu ivakaro dou na veivakataucokotaki, ka vakalagilagi ena vukuqu me vaka ni’u sa vakalagilagi ena vukui Tamaqu; o koya, au sa kaya vei kemudou, dou na rawata kina mai na iloloma soli wale ki na iloloma soli wale.

21 Ia oqo, au sa kaya vakaidina vei kemudou, Au a tiko vata kei Tamaqu mai na ivakatekivu, ka ni sai au na Ulumatua;

22 Ia ko ira kecega sa sucu vou ena vukuqu era na vakaivotavota ena lagilagi vata oqo, ka ra sa lewe ni nona lotu na Ulumatua.

23 Raica dou a bula vata tale ga kei na Tamada mai na ivakatekivu; sai koya na Yalo, io na Yalo ni ka dina;

24 Ia na dina sai koya na kena kilai na veika ena kedra ituvaki ena gauna oqo, kei na kedra ituvaki ena veigauna sa oti, kei na kedra ituvaki ena veigauna e se bera mai;

25 Ia na ka ga e levu cake se lailai sobu mai na kena oqo sa yaloi koya na daucaka ca ko ya ko koya na dau lasulasu mai na ivakatekivu.

26 Na Yalo ni ka dina sa mai vua na Kalou. Sai Au na Yalo ni ka dina, ka sa vakadinadinataki au ko Joni, ka vaka: Sa rawata ko Koya na taucoko ni ka dina, io, na ka dina taucoko ga;

27 Ia sa sega na tamata sa rawata na kena taucoko vakavo kevaka sa muria na nona ivunau.

28 Ko koya sa muria na nona ivakaro sa rawata na ka dina kei na rarama, me yacova ni sa vakalagilagi ena ka dina ka kila na ka kecega.

29 Ena ivakatekivu erau sa tiko vata talega na tamata kei na Kalou. Ia na vuku se na rarama ni ka dina, a sega ni qai tauyavutaki ga se buli, e sega ni rawa vakaidina me vakakina.

30 Na dina taucoko era sa tu vakataki ira ga ena vanua sa biuti ira kina na Kalou, me lewai koya ga, sa vakakina na vuku kece sara; kevaka e sega ena sega na bula.

31 Raica, sai koya oqo na galala ni digidigi ni tamata, ka sai koya talega oqo na cudruvi ni tamata; baleta ni veika kece sara mai na ivakatekivu sa vakaraitaki oti vakamatata vei ira, ia era a sega ni ciqoma na rarama.

32 Ia na tamata kecega a sega ni ciqoma na yalona na rarama ena cudruvi.

33 Ni yalo na tamata. Ia sa tawamudu na vei vu ni ka, ia na yalo kei na vei vu ni ka erau semati ka sega ni rawa ni rau veitawasei, erau na rawata na marau sa vuabale;

34 Ia ni rau sa veitawasei, sa na sega ni rawata na marau sa vuabale na tamata.

35 Raica sa vale ni Kalou na vei vu ni ka; io, sa vale ni Kalou na tamata, io sa nona valetabu; ia na valetabu sa vakadukadukalitaki, ena vakarusa na Kalou.

36 Raica sa lagilagi ni Kalou na vuku, se, ena dua tale na kena itukutukuni, na rarama kei na dina.

37 Na rarama kei na dina sa biuta laivi na tevoro.

38 Sa savasava na yalo ni tamata kecega mai na ivakatekivu; ia ni sa vueta na tamata na Kalou mai na nona lutu tani, sa yaco tale kina na tamata, me vaka na kena ituvaki ena nona se gonelailai, me savasava ena mata ni Kalou.

39 A sa lako mai na ca ka kovea tani na rarama kei na dina mai vei ira na luve ni tamata, ena vuku ni talaidredre kei na nodra ivakarau na nodra qase.

40 Ia au sa vakaroti kemudou mo dou vakavulici ira na luvemudou ena rarama kei na dina.

41 Ia au sa kaya vakaidina vei iko Veretariki G. Viliame na noqu tamata, ni ko sa ia tiko ga ena ivalavala ca oqo;

42 Ko sa sega ni vakavulici ira na luvemu ena rarama kei na dina, me vaka na ivakaro; ka sa rawai iko kina na tevoro, sai koya oqori na vu ni nomu vakararawataki.

43 Ia oqo au sa solia vei iko e dua na ivakaro—kevaka ko vinakata mo sereki mo vakavulici ira vinaka na lewe ni nomu matavuvale, ni vuqa na ka e sega tiko ni dodonu ena nomu vuvale.

44 Au sa kaya vakaidina vei Sidini Rikitoni na noqu tamata, ni sega ni muria tiko na ivakaro ena so na ka me baleti ira na luvena; o koya, sa dodonu me vakavulici ira mada e liu na lewe ni nona vale.

45 Au sa kaya vakaidina vei Josefa Simici Lailai, na noqu tamata, se ena dua tale na kena itukutukuni, au na vakatokai kemudou mo dou wekaqu ni dou sa wekaqu, ni na tiko na nomudou ivotavota vakawa vata kei au—

46 Au sa vakatokai kemudou mo dou noqu tamata ena vukudra na kai vuravura, ia dou sa nodra tamata na kai vuravura ena vukuqu—

47 Ia oqo, au sa kaya vakaidina vei Josefa Simici Lailai, na noqu tamata—Ko sa sega ni muria na ivakaro, ka sa dodonu kina mo vunauci ena mata ni Turaga;

48 Sa dodonu me ra veivutuni na nomu matavuvale ka biuta laivi eso na ka, ka me ra vakarorogo vakavinaka ki na nomu vosa, ia kevaka e sega era na kaliraki tani ena nodra itutu.

49 Raica na ka au sa vakarota vua e dua sa baleta na tamata kecega; dou daumasu tiko ga me kakua ni rawai kemudou na tevoro, ka kaliraki kemudou tani mai na nomudou itutu.

50 Na noqu tamata talega ko Niueli K. Witini, e dua na bisopi ni noqu lotu, sa dodonu me vunauci, ka vakavulici ira na lewe ni nona vuvale, ka raica me ra dau gugumatua ka cakacaka vakaukauwa mai vale, ka dau masu tikoga, ia kevaka e sega era na kaliraki tani mai na nodra itutu.

51 Oqo, au sa kaya vei kemudou, na wekaqu, me lako kusarawa ena nona ilakolako ko Sidini Rikitoni na noqu tamata, io me vunautaka na yabaki vinaka ni Turaga, kei na kosipeli ni veivakabulai, ni’u na solia ki vua na ka me tukuna; kevaka dou sa duavata ena nomudou masu ni vakabauta.

52 Ka me rau ia kusarawa tale ga ko Josefa Simici Lailai, kei Veretariki G. Viliame na noqu tamata, ia au na vakaukauwataki rau tale ga ena nomudou masu ni vakabauta; ia kevaka dou sa muria tiko ga na noqu vosa ena sega na ka mo dou madua kina ena vuravura oqo, se ena vuravura sa bera mai.

53 Ia, au sa kaya vakaidina vei kemudou, niu gadreva mo dou ia kusarawa ka vakadewataka na noqu ivolanikalou, ka mo dou vulica na itukutuku makawa, na ka e baleta na veivanua, kei na veimatanitu, na lawa ni Kalou kei na tamata, io mo dou kila na veika kecega oqo me vakabulai kina ko Saioni. Emeni.